ᠮᠠᠲ᠋ᠠᠢ ᠳᠣᠯᠣᠭᠠ
ᠬᠥᠮᠦᠨ ᠢ ᠪᠦᠦ ᠰᠢᠭᠦᠮᠵᠢᠯᠡ
1 ᠰᠢᠭᠦᠮᠵᠢᠯᠡᠭᠳᠡᠬᠦ ᠦᠭᠡᠢ ᠭᠡᠪᠡᠯ ᠪᠦᠦ ᠰᠢᠭᠦᠮᠵᠢᠯᠡ᠃ 2 ᠲᠠ ᠨᠠᠷ ᠰᠢᠭᠦᠮᠵᠢᠯᠡᠭᠰᠡᠨ ᠰᠢᠭᠦᠮᠵᠢ ᠪᠠᠷ ᠢᠶᠠᠨ ᠰᠢᠭᠦᠮᠵᠢᠯᠡᠭᠳᠡᠵᠦ᠂ ᠬᠡᠮᠵᠢᠭᠰᠡᠨ ᠬᠡᠮᠵᠢᠭᠦᠷ ᠢᠶᠡᠷ ᠢᠶᠠᠨ ᠬᠡᠮᠵᠢᠭᠳᠡᠨᠡ᠃ 3 ᠴᠢ ᠠᠬᠠ ᠳᠡᠭᠦᠦ ᠶᠢᠨ ᠢᠶᠠᠨ ᠨᠢᠳᠦᠨ ᠳᠠᠬᠢ ᠬᠣᠭ ᠢ ᠬᠠᠷᠠᠳᠠᠭ ᠠᠲᠠᠯᠠ ᠥᠪᠡᠷ ᠦᠨ ᠢᠶᠠᠨ ᠨᠢᠳᠦᠨ ᠳᠠᠬᠢ ᠳ᠋ᠠᠮ ᠨᠢᠷᠤᠭᠤ ᠶᠢ ᠶᠠᠭᠠᠬᠢᠭᠠᠳ ᠠᠩᠵᠠᠭᠠᠷᠠᠳᠠᠭ ᠦᠭᠡᠢ ᠪᠤᠢ︖ 4 ᠠᠩ᠋ᠬᠠᠷᠤᠭᠲᠤᠨ᠂ ᠥᠪᠡᠷ ᠦᠨ ᠴᠢᠨᠢ ᠨᠢᠳᠦᠨ ᠳᠦ ᠳ᠋ᠠᠮ ᠨᠢᠷᠤᠭᠤ ᠪᠤᠢ ᠠᠲᠠᠯᠠ ᠴᠢ ᠶᠠᠭᠤᠨ ᠳᠤ ᠠᠬᠠ ᠳᠡᠭᠦᠦ ᠳᠡᠭᠡᠨ᠄ 〈ᠨᠢᠳᠦᠨ ᠦ ᠴᠢᠨᠢ ᠬᠣᠭ ᠢ ᠠᠪᠤᠭᠠᠳ ᠥᠭᠭᠥᠶᠡ〉 ᠭᠡᠵᠦ ᠬᠡᠯᠡᠬᠦ ᠪᠤᠢ︖ 5 ᠬᠣᠶᠠᠷ ᠨᠢᠭᠤᠷᠲᠠᠨ ᠴᠢ᠂ ᠤᠷᠢᠳᠠᠪᠠᠷ ᠨᠢᠳᠦᠨ ᠳᠠᠬᠢ ᠳ᠋ᠠᠮ ᠨᠢᠷᠤᠭᠤ ᠪᠠᠨ ᠠᠪᠴᠢᠬᠠ᠂ ᠲᠡᠭᠡᠪᠡᠯ ᠠᠬᠠ ᠳᠡᠭᠦᠦ ᠶᠢᠨ ᠢᠶᠠᠨ ᠨᠢᠳᠦᠨ ᠡᠴᠡ ᠬᠣᠭ ᠢ ᠨᠢ ᠠᠪᠬᠤ ᠳᠤ ᠲᠣᠳᠣ ᠬᠠᠷᠠᠬᠤ ᠪᠣᠯᠣᠨᠠ᠃
6 ᠲᠠ ᠨᠠᠷ ᠠᠷᠢᠭᠤᠨ ᠶᠠᠭᠤᠮᠠ ᠪᠠᠨ ᠨᠣᠬᠠᠢ ᠳᠤ ᠪᠦᠦ ᠥᠭ᠂ ᠰᠤᠪᠤᠳ ᠢᠶᠠᠨ ᠭᠠᠬᠠᠢ ᠶᠢᠨ ᠡᠮᠦᠨᠡ ᠪᠦᠦ ᠬᠠᠶᠠ᠃ ᠭᠠᠬᠠᠢ ᠡᠳᠡᠭᠡᠷ ᠢ ᠬᠥᠯ ᠳᠣᠣᠷᠠ ᠪᠠᠨ ᠭᠢᠰᠬᠢᠨ᠂ ᠨᠣᠬᠠᠢ ᠡᠷᠭᠢᠵᠦ ᠲᠠ ᠨᠠᠷ ᠢ ᠲᠠᠰᠤ ᠬᠠᠵᠠᠬᠤ ᠪᠣᠯᠣᠭᠤᠵᠠᠢ᠃
ᠭᠤᠶᠤᠪᠠᠯ ᠥᠭᠭᠥᠨᠡ
7 ᠭᠤᠶᠤ᠂ ᠲᠡᠭᠡᠪᠡᠯ ᠥᠭᠭᠥᠨᠡ᠃ ᠡᠷᠢ᠂ ᠲᠡᠭᠡᠪᠡᠯ ᠣᠯᠣᠨᠠ᠃ ᠲᠣᠭᠰᠢ᠂ ᠲᠡᠭᠡᠪᠡᠯ ᠨᠡᠭᠡᠭᠡᠭᠳᠡᠨᠡ᠃ 8 ᠭᠤᠶᠤᠭᠴᠢ ᠪᠣᠯᠭᠠᠨ ᠬᠦᠷᠲᠡᠨᠡ᠂ ᠡᠷᠢᠭ᠍ᠴᠢ ᠨᠢ ᠣᠯᠣᠨᠠ᠂ ᠲᠣᠭᠰᠢᠭᠴᠢ ᠳᠤ ᠨᠡᠭᠡᠭᠡᠭᠳᠡᠬᠦ ᠪᠣᠯᠣᠨᠠ᠃ 9 ᠲᠠ ᠨᠠᠷ ᠤᠨ ᠳᠤᠮᠳᠠ ᠬᠦᠦ ᠪᠡᠨ ᠪᠣᠣᠪᠣ ᠭᠤᠶᠤᠬᠤ ᠳᠤ ᠴᠢᠯᠠᠭᠤ ᠥᠭᠴᠦ᠂ 10 ᠵᠢᠭᠠᠰᠤ ᠭᠤᠶᠤᠬᠤ ᠳᠤ ᠮᠣᠭᠠᠢ ᠥᠭᠬᠦ ᠬᠥᠮᠦᠨ ᠪᠠᠢᠨᠠ ᠤᠤ︖ 11 ᠲᠠ ᠨᠠᠷ ᠮᠠᠭᠤ ᠪᠠᠢᠯᠠ ᠴᠤ ᠬᠡᠦᠬᠡᠳ ᠤᠳ ᠲᠡᠭᠡᠨ ᠰᠠᠢᠨ ᠶᠠᠭᠤᠮᠠ ᠥᠭᠬᠦ ᠪᠡᠨ ᠮᠡᠳᠡᠳᠡᠭ ᠪᠠᠢᠲᠠᠯᠠ᠂ ᠲᠩᠷᠢ ᠳᠠᠬᠢ ᠡᠴᠢᠭᠡ ᠲᠠᠨᠢ ᠥᠪᠡᠷ ᠡᠴᠡ ᠨᠢ ᠭᠤᠶᠤᠭᠴᠢᠳ ᠲᠤ ᠰᠠᠢᠨ ᠵᠦᠢᠯᠡᠰ ᠥᠭᠬᠦ ᠨᠢ ᠯᠠᠪᠲᠠᠢ ᠪᠢᠰᠢ ᠤᠤ︖
12 ᠲᠠ ᠨᠠᠷ ᠠᠯᠢᠪᠠ ᠵᠦᠢᠯ ᠳᠡᠭᠡᠷᠡ ᠬᠥᠮᠦᠰ ᠢ ᠥᠪᠡᠷᠰᠡᠳ ᠲᠡᠭᠡᠨ ᠬᠡᠷᠬᠢᠨ ᠬᠠᠨᠳᠤᠭᠠᠰᠠᠢ ᠭᠡᠵᠦ ᠬᠦᠰᠡᠳᠡᠭ ᠪᠣᠯ ᠥᠪᠡᠷᠰᠡᠳ ᠢᠶᠡᠨ ᠴᠤ ᠲᠡᠳᠡᠨ ᠳᠦ ᠲᠡᠭᠡᠵᠦ ᠬᠠᠨᠳᠤ᠃ ᠡᠨᠡ ᠪᠣᠯ ᠬᠠᠤᠯᠢ ᠪᠣᠯᠣᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠤᠭ ᠰᠠᠨᠠᠭᠠ ᠶᠤᠮ᠃
ᠬᠣᠶᠠᠷ ᠵᠠᠮ ᠬᠣᠶᠠᠷ ᠦᠷᠡ ᠵᠢᠮᠢᠰ
13 ᠨᠠᠷᠢᠨ ᠡᠭᠦᠳᠡ ᠪᠡᠷ ᠣᠷᠣ᠃ ᠰᠦᠢᠷᠡᠯ ᠳᠦ ᠬᠦᠷᠬᠦ ᠡᠭᠦᠳᠡ ᠨᠢ ᠥᠷᠭᠡᠨ᠂ ᠵᠠᠮ ᠨᠢ ᠠᠭᠤᠵᠢᠮ᠂ ᠲᠡᠷᠡᠭᠦᠷ ᠣᠷᠣᠭᠴᠢᠳ ᠣᠯᠠᠨ᠃ 14 ᠠᠮᠢ ᠳᠤ ᠬᠦᠷᠬᠦ ᠡᠭᠦᠳᠡ ᠨᠢ ᠨᠠᠷᠢᠨ᠂ ᠵᠠᠮ ᠨᠢ ᠳᠠᠪᠴᠢᠭᠤ᠂ ᠲᠡᠭᠦᠨ ᠢ ᠣᠯᠣᠭᠴᠢ ᠨᠢ ᠴᠥᠭᠡᠨ᠃
15 ᠬᠠᠭᠤᠷᠮᠠᠭ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠡᠴᠡ ᠪᠣᠯᠭᠣᠮᠵᠢᠯᠠ᠃ ᠲᠡᠳᠡ ᠬᠣᠨᠢᠨ ᠤ ᠳᠦᠷᠢ ᠲᠠᠢ ᠪᠠᠷ ᠲᠠ ᠨᠠᠷ ᠲᠤ ᠢᠷᠡᠬᠦ ᠪᠣᠯᠪᠠᠴᠤ ᠳᠣᠲᠣᠷᠠ ᠨᠢ ᠬᠡᠷᠴᠡᠭᠡᠢ ᠴᠢᠨᠣᠠ ᠪᠠᠢᠳᠠᠭ᠃ 16 ᠲᠠ ᠨᠠᠷ ᠲᠡᠳᠡᠨ ᠢ ᠵᠢᠮᠢᠰ ᠢᠶᠠᠷ ᠨᠢ ᠲᠠᠨᠢᠨᠠ᠃ ᠥᠷᠭᠡᠰᠦᠲᠦ ᠪᠤᠲᠠᠨ ᠠᠴᠠ ᠦᠵᠦᠮ᠂ ᠠᠵᠢᠷᠭᠠᠨᠠ ᠠᠴᠠ ᠢᠨᠵᠢᠷ ᠲᠡᠭᠦᠳᠡᠭ ᠤᠤ︖ 17 ᠡᠭᠦᠨᠴᠢᠯᠡᠨ ᠰᠠᠢᠨ ᠮᠣᠳᠣ ᠰᠠᠢᠨ ᠵᠢᠮᠢᠰ ᠰᠠᠭᠤᠯᠭᠠᠳᠠᠭ᠂ ᠮᠠᠭᠤ ᠮᠣᠳᠣ ᠮᠠᠭᠤ ᠵᠢᠮᠢᠰ ᠰᠠᠭᠤᠯᠭᠠᠳᠠᠭ᠃ 18 ᠰᠠᠢᠨ ᠮᠣᠳᠣ ᠮᠠᠭᠤ ᠵᠢᠮᠢᠰ ᠰᠠᠭᠤᠯᠭᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠮᠠᠭᠤ ᠮᠣᠳᠣ ᠰᠠᠢᠨ ᠵᠢᠮᠢᠰ ᠰᠠᠭᠤᠯᠭᠠᠵᠤ ᠴᠢᠳᠠᠬᠤ ᠦᠭᠡᠢ᠃ 19 ᠰᠠᠢᠨ ᠵᠢᠮᠢᠰ ᠰᠠᠭᠤᠯᠭᠠᠳᠠᠭ ᠦᠭᠡᠢ ᠮᠣᠳᠣ ᠪᠦᠬᠦᠨ ᠴᠠᠪᠴᠢᠭᠳᠠᠵᠤ ᠭᠠᠯ ᠳᠤ ᠬᠠᠶᠠᠭᠳᠠᠨᠠ᠃ 20 ᠲᠡᠢᠮᠦ ᠡᠴᠡ ᠲᠠ ᠨᠠᠷ ᠲᠡᠳᠡᠨ ᠢ ᠵᠢᠮᠢᠰ ᠢᠶᠠᠷ ᠨᠢ ᠲᠠᠨᠢᠨᠠ᠃
21 ᠨᠠᠳᠠ ᠳᠤ᠄ 〈ᠡᠵᠡᠨ ᠡ᠂ ᠡᠵᠡᠨ〉 ᠭᠡᠵᠦ ᠬᠡᠯᠡᠭᠴᠢ ᠪᠣᠯᠭᠠᠨ ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠳᠤ ᠣᠷᠣᠬᠤ ᠪᠢᠰᠢ᠂ ᠬᠠᠷᠢᠨ ᠲᠩᠷᠢ ᠳᠤ ᠪᠠᠢᠭᠠ ᠮᠢᠨᠦ ᠡᠴᠢᠭᠡ ᠶᠢᠨ ᠰᠠᠨᠠᠭᠠ ᠶᠢ ᠪᠡᠶᠡᠯᠡᠭᠦᠯᠦᠭᠴᠢ ᠨᠢ ᠯᠠ ᠣᠷᠣᠨᠠ᠃ 22 ᠲᠡᠷᠡ ᠡᠳᠦᠷ ᠨᠢ ᠣᠯᠠᠨ ᠬᠥᠮᠦᠨ ᠨᠠᠳᠠ ᠳᠤ᠄ 〈ᠡᠵᠡᠨ ᠡ᠂ ᠡᠵᠡᠨ᠂ ᠪᠢᠳᠡ ᠲᠠᠨ ᠤ ᠨᠡᠷᠡ ᠪᠡᠷ ᠡᠰᠢ ᠦᠵᠡᠭᠦᠯᠵᠦ᠂ ᠲᠠᠨ ᠤ ᠨᠡᠷᠡ ᠪᠡᠷ ᠴᠢᠳᠬᠥᠷ ᠤᠳ ᠢ ᠬᠥᠭᠡᠭᠡᠵᠦ᠂ ᠲᠠᠨ ᠤ ᠨᠡᠷᠡ ᠪᠡᠷ ᠣᠯᠠᠨ ᠬᠦᠴᠦᠲᠦ ᠦᠢᠯᠡᠰ ᠦᠢᠯᠡᠳᠦᠭᠰᠡᠨ ᠪᠤᠰᠤ ᠤᠤ︖〉 ᠭᠡᠬᠦ ᠪᠣᠯᠣᠨᠠ᠃ 23 ᠲᠡᠭᠡᠬᠦ ᠳᠦ ᠪᠢ ᠲᠡᠳᠡᠨ ᠳᠦ᠄ 〈ᠪᠢ ᠲᠠ ᠨᠠᠷ ᠢ ᠶᠡᠷᠦ ᠡᠴᠡ ᠲᠠᠨᠢᠬᠤ ᠦᠭᠡᠢ᠂ ᠬᠠᠤᠯᠢ ᠪᠤᠰᠤ ᠶᠢ ᠦᠢᠯᠡᠳᠳᠡᠭ ᠲᠠ ᠨᠠᠷ ᠨᠠᠳᠠ ᠠᠴᠠ ᠵᠠᠢᠯᠠ︕〉 ᠭᠡᠵᠦ ᠢᠯᠡᠷᠬᠡᠶᠢᠯᠡᠨᠡ᠃
ᠬᠣᠶᠠᠷ ᠰᠠᠭᠤᠷᠢ
24 ᠲᠡᠢᠮᠦ ᠡᠴᠡ ᠮᠢᠨᠦ ᠡᠳᠡᠭᠡᠷ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠪᠡᠶᠡᠯᠡᠭᠦᠯᠦᠭᠴᠢ ᠪᠣᠯᠭᠠᠨ ᠬᠠᠳᠠᠨ ᠳᠡᠭᠡᠷᠡ ᠪᠠᠢᠰᠢᠩ ᠢᠶᠠᠨ ᠪᠠᠷᠢᠭᠰᠠᠨ ᠤᠬᠠᠭᠠᠯᠢᠭ ᠬᠥᠮᠦᠨ ᠲᠡᠢ ᠠᠳᠠᠯᠢ᠃ 25 ᠪᠣᠷᠣᠭᠠᠨ ᠣᠷᠣᠵᠤ ᠦᠶᠡᠷᠯᠡᠨ᠂ ᠰᠠᠯᠬᠢ ᠦᠯᠢᠶᠡᠵᠦ ᠲᠡᠷᠡ ᠪᠠᠢᠰᠢᠩ ᠢ ᠳᠡᠯᠡᠰᠦᠭᠰᠡᠨ ᠴᠤ ᠬᠠᠳᠠᠨ ᠳᠡᠭᠡᠷᠡ ᠰᠠᠭᠤᠷᠢᠯᠠᠭᠰᠠᠨ ᠪᠠᠢᠰᠢᠩ ᠨᠤᠷᠠᠭᠰᠠᠨ ᠦᠭᠡᠢ᠃ 26 ᠬᠠᠷᠢᠨ ᠮᠢᠨᠦ ᠡᠳᠡᠭᠡᠷ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠦᠯᠦ ᠪᠡᠶᠡᠯᠡᠭᠦᠯᠦᠭᠴᠢ ᠪᠣᠯᠭᠠᠨ ᠡᠯᠡᠰᠦᠨ ᠳᠡᠭᠡᠷᠡ ᠪᠠᠢᠰᠢᠩ ᠢᠶᠠᠨ ᠪᠠᠷᠢᠭᠰᠠᠨ ᠮᠤᠩ᠋ᠬᠠᠭ ᠬᠥᠮᠦᠨ ᠲᠡᠢ ᠠᠳᠠᠯᠢ᠃ 27 ᠪᠣᠷᠣᠭᠠᠨ ᠣᠷᠣᠵᠤ ᠦᠶᠡᠷᠯᠡᠨ᠂ ᠰᠠᠯᠬᠢ ᠦᠯᠢᠶᠡᠵᠦ ᠲᠡᠷᠡ ᠪᠠᠢᠰᠢᠩ ᠢ ᠳᠡᠯᠡᠰᠦᠭᠰᠡᠨ ᠳᠦ᠂ ᠪᠠᠢᠰᠢᠩ ᠨᠤᠷᠠᠪᠠ᠃ ᠲᠡᠷᠡ ᠨᠤᠷᠠᠯᠲᠠ ᠠᠰᠤᠷᠤ ᠶᠡᠬᠡ ᠪᠠᠢᠵᠠᠢ》 ᠭᠡᠪᠡ᠃
28 ᠢᠰᠦ᠋ᠰ ᠡᠳᠡᠭᠡᠷ ᠢ ᠶᠠᠷᠢᠵᠤ ᠳᠠᠭᠤᠰᠬᠤ ᠳᠤ᠂ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠲᠡᠭᠦᠨ ᠦ ᠰᠤᠷᠭᠠᠯ ᠢ ᠱᠠᠭᠰᠢᠵᠤ ᠪᠠᠢᠯᠠ᠃ 29 ᠤᠴᠢᠷ ᠨᠢ ᠢᠰᠦ᠋ᠰ ᠲᠡᠳᠡᠨ ᠦ ᠪᠢᠴᠢᠭᠲᠡᠳ ᠰᠢᠭ ᠪᠢᠰᠢ᠂ ᠬᠠᠷᠢᠨ ᠡᠷᠬᠡ ᠮᠡᠳᠡᠯ ᠲᠡᠢ ᠪᠠᠷ ᠲᠡᠳᠡᠨ ᠳᠦ ᠵᠢᠭᠠᠵᠤ ᠪᠠᠢᠪᠠ᠃