ᠮᠠᠲ᠋ᠠᠢ ᠠᠷᠪᠠᠨ ᠨᠢᠭᠡ
ᠤᠬᠢᠶᠠᠯ ᠬᠦᠷᠲᠡᠭᠡᠭᠴᠢ ᠶᠣᠬᠠᠨ ᠤ ᠠᠰᠠᠭᠤᠯᠲᠠ
1 ᠢᠰᠦ᠋ᠰ ᠠᠷᠪᠠᠨ ᠬᠣᠶᠠᠷ ᠱᠠᠪᠢ ᠳᠠᠭᠠᠨ ᠵᠠᠬᠢᠵᠤ ᠳᠠᠭᠤᠰᠤᠭᠰᠠᠨ ᠤ ᠳᠠᠷᠠᠭᠠ᠂ ᠲᠡᠨᠳᠡ ᠡᠴᠡ ᠰᠠᠯᠵᠤ ᠲᠡᠳᠡᠨ ᠦ ᠲᠣᠰᠬᠣᠨ ᠨᠤᠭᠤᠳ ᠢᠶᠠᠷ ᠰᠤᠷᠭᠠᠵᠤ ᠲᠤᠩ᠋ᠬᠠᠭᠯᠠᠬᠤ ᠶᠢᠨ ᠲᠤᠯᠠᠳᠠ ᠶᠠᠪᠤᠵᠠᠢ᠃
2 ᠶᠣᠬᠠᠨ ᠱᠣᠷᠣᠩ ᠳᠤ ᠪᠠᠢᠬᠤ ᠳᠠᠭᠠᠨ ᠾᠷᠢᠰᠲ᠋ᠣᠰ ᠤᠨ ᠦᠢᠯᠡᠰ ᠢ ᠰᠣᠨᠣᠰᠣᠭᠠᠳ᠂ ᠱᠠᠪᠢ ᠨᠠᠷ ᠢᠶᠠᠨ ᠶᠠᠪᠤᠭᠤᠯᠵᠤ᠄ 3 《ᠢᠷᠡᠬᠦ ᠶᠣᠰᠣᠲᠠᠢ ᠨᠢᠭᠡᠨ ᠨᠢ ᠲᠠ ᠮᠥᠨ ᠤᠤ︖ ᠡᠰᠡᠪᠡᠯ ᠪᠢᠳᠡ ᠥᠭᠡᠷᠡ ᠨᠢᠭᠡᠨ ᠢ ᠬᠦᠯᠢᠶᠡᠬᠦ ᠤᠤ︖》 ᠭᠡᠵᠦ ᠬᠡᠯᠭᠦᠯᠦᠭᠰᠡᠨ ᠳᠦ᠂ 4 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠲᠠ ᠨᠠᠷ ᠶᠣᠬᠠᠨ ᠤᠷᠤᠭᠤ ᠪᠤᠴᠠᠭᠠᠳ ᠦᠵᠡᠵᠦ ᠰᠣᠨᠣᠰᠣᠭᠰᠠᠨ ᠢᠶᠠᠨ ᠳᠤᠭᠤᠯᠭᠠᠭᠠᠷᠠᠢ᠃ 5 ᠰᠣᠬᠣᠷ ᠨᠢ ᠬᠠᠷᠠᠭᠠ ᠣᠷᠣᠵᠤ᠂ ᠳᠣᠭᠣᠯᠠᠩ ᠨᠢ ᠠᠯᠬᠤᠵᠤ᠂ ᠤᠶᠠᠮᠠᠨ 21 ᠨᠢ ᠴᠡᠪᠡᠷᠰᠢᠵᠦ᠂ ᠳᠦᠯᠡᠢ ᠨᠢ ᠰᠣᠨᠣᠰᠴᠤ᠂ ᠦᠬᠦᠭᠰᠡᠨ ᠨᠢ ᠠᠮᠢᠯᠠᠵᠤ᠂ ᠶᠠᠳᠠᠭᠤᠴᠤᠳ ᠤᠨ ᠳᠤᠮᠳᠠ ᠪᠠᠶᠠᠷ ᠤᠨ ᠮᠡᠳᠡᠭᠡ ᠳᠡᠯᠭᠡᠷᠡᠵᠦ ᠪᠠᠢᠨᠠ᠃ 6 ᠨᠠᠳᠠ ᠠᠴᠠ ᠪᠣᠯᠵᠤ ᠪᠦᠳᠦᠷᠢᠳᠡᠭ ᠦᠭᠡᠢ ᠨᠢ ᠪᠤᠶᠠᠨ ᠲᠠᠢ》 ᠭᠡᠪᠡ᠃
ᠤᠬᠢᠶᠠᠯ ᠬᠦᠷᠲᠡᠭᠡᠭᠴᠢ ᠶᠣᠬᠠᠨ ᠤ ᠲᠤᠬᠠᠢ ᠶᠠᠷᠢᠭᠰᠠᠨ ᠨᠢ
7 ᠲᠡᠳᠡ ᠶᠠᠪᠤᠵᠤ᠂ ᠢᠰᠦ᠋ᠰ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠳᠤ ᠶᠣᠬᠠᠨ ᠤ ᠲᠤᠬᠠᠢ ᠶᠠᠷᠢᠵᠤ ᠡᠬᠢᠯᠡᠨ᠄ 《ᠲᠠ ᠨᠠᠷ ᠶᠠᠭᠤ ᠦᠵᠡᠬᠦ ᠪᠡᠷ ᠴᠥᠯ ᠤᠷᠤᠭᠤ ᠣᠴᠢᠪᠠ︖ ᠰᠠᠯᠬᠢᠨ ᠳᠤ ᠨᠠᠢᠭᠤᠯᠵᠠᠬᠤ ᠵᠡᠭᠡᠰᠦ ᠶᠢ ᠤᠤ︖ 8 ᠲᠠ ᠨᠠᠷ ᠶᠠᠭᠤ ᠬᠠᠷᠠᠬᠤ ᠪᠠᠷ ᠣᠴᠢᠪᠠ︖ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠬᠥᠮᠦᠨ ᠢ ᠤᠤ︖ ᠠᠩ᠋ᠬᠠᠷᠤᠭᠲᠤᠨ᠂ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠬᠥᠮᠦᠰ ᠨᠢ ᠬᠠᠭᠠᠨ ᠤ ᠣᠷᠳᠣᠨ ᠳᠤ ᠪᠠᠢᠨᠠ᠃ 9 ᠲᠠ ᠨᠠᠷ ᠶᠠᠭᠤ ᠬᠠᠷᠠᠬᠤ ᠪᠠᠷ ᠣᠴᠢᠪᠠ︖ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠢ ᠬᠠᠷᠠᠬᠤ ᠪᠠᠷ ᠤᠤ︖ ᠲᠡᠢᠮᠦ ᠡ᠂ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠲᠡᠷᠡ ᠪᠣᠯ ᠡᠰᠢ ᠦᠵᠡᠭᠦᠯᠦᠭᠴᠢ ᠡᠴᠡ ᠴᠤ ᠢᠯᠡᠭᠦᠦ ᠶᠤᠮ᠃ 10 ᠲᠡᠭᠦᠨ ᠦ ᠲᠤᠬᠠᠢ᠄ 〈ᠬᠠᠷᠠ᠂ ᠪᠢ ᠥᠪᠡᠷ ᠦᠨ ᠡᠯᠴᠢ ᠶᠢ ᠴᠢᠨᠦ ᠡᠮᠦᠨᠡ ᠢᠯᠡᠭᠡᠬᠦ ᠭᠡᠵᠦ ᠪᠠᠢᠨᠠ᠂ ᠲᠡᠷᠡ ᠴᠢᠮᠠ ᠠᠴᠠ ᠤᠷᠢᠳᠠᠪᠠᠷ ᠵᠠᠮ ᠢ ᠴᠢᠨᠢ ᠪᠡᠯᠡᠳᠬᠡᠨᠡ〉 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠪᠠᠢᠳᠠᠭ᠃ 11 ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠡᠮᠡᠭᠲᠡᠢᠴᠦᠳ ᠡᠴᠡ ᠲᠥᠷᠥᠭᠰᠡᠳ ᠦᠨ ᠳᠣᠲᠣᠷᠠ ᠤᠬᠢᠶᠠᠯ ᠬᠦᠷᠲᠡᠭᠡᠭᠴᠢ ᠶᠣᠬᠠᠨ ᠠᠴᠠ ᠠᠭᠤᠤ ᠬᠥᠮᠦᠨ ᠭᠠᠷᠤᠭᠠ ᠦᠭᠡᠢ᠃ ᠬᠠᠷᠢᠨ ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠳᠠᠬᠢ ᠬᠠᠮᠤᠭ ᠤᠨ ᠥᠴᠦᠬᠡᠨ ᠨᠢ ᠴᠤ ᠲᠡᠭᠦᠨ ᠡᠴᠡ ᠠᠭᠤᠤ ᠪᠢᠯᠡ᠃ 12 ᠤᠬᠢᠶᠠᠯ ᠬᠦᠷᠲᠡᠭᠡᠭᠴᠢ ᠶᠣᠬᠠᠨ ᠤ ᠡᠳᠦᠷ ᠤᠳ ᠠᠴᠠ ᠡᠳᠦᠭᠡ ᠪᠣᠯᠲᠠᠯᠠ ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠬᠦᠴᠦᠷᠬᠡᠭᠵᠢᠵᠦ 22 ᠪᠠᠢᠨᠠ᠃ ᠬᠦᠴᠦᠲᠡᠳ ᠲᠡᠭᠦᠨ ᠢ ᠲᠡᠮᠡᠴᠡᠵᠦ ᠠᠪᠤᠨᠠ᠃ 13 ᠪᠦᠬᠦ ᠡᠰᠢ ᠦᠵᠡᠭᠦᠯᠦᠭᠴᠢ ᠪᠣᠯᠣᠨ ᠬᠠᠤᠯᠢ ᠨᠢ ᠶᠣᠬᠠᠨ ᠬᠦᠷᠲᠡᠯᠡ ᠡᠰᠢ ᠦᠵᠡᠭᠦᠯᠦᠭᠰᠡᠨ᠃ 14 ᠬᠡᠷᠪᠡ ᠲᠠ ᠨᠠᠷ ᠳᠤᠷᠠᠲᠠᠢ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠪᠡᠯ᠂ ᠡᠨᠡ ᠬᠥᠮᠦᠨ ᠪᠣᠯ ᠢᠷᠡᠬᠦ ᠶᠣᠰᠣᠲᠠᠢ ᠧᠯᠢᠶᠠ ᠮᠥᠨ᠃ 15 ᠴᠢᠬᠢ ᠲᠠᠢ ᠨᠢ ᠰᠣᠨᠣᠰᠣᠭᠲᠤᠨ᠃
16 ᠪᠢ ᠡᠨᠡ ᠦᠶᠡ ᠶᠢᠨ ᠬᠢᠨ ᠢ ᠶᠠᠭᠤ ᠪᠠᠷ ᠦᠯᠢᠭᠡᠷᠯᠡᠬᠦ ᠪᠤᠢ︖ ᠬᠡᠦᠬᠡᠳ ᠤᠳ ᠵᠡᠭᠡᠯᠢ ᠳᠡᠭᠡᠷᠡ ᠰᠠᠭᠤᠭᠠᠳ ᠬᠠᠷᠢᠯᠴᠠᠨ ᠳᠠᠭᠤᠳᠠᠯᠴᠠᠨ᠄ 17 〈ᠪᠢᠳᠡ ᠯᠢᠩᠪᠦᠳᠡᠭᠰᠡᠨ ᠴᠤ᠂ ᠲᠠ ᠨᠠᠷ ᠪᠥᠵᠢᠭᠯᠡᠭᠰᠡᠨ ᠦᠭᠡᠢ᠃ ᠪᠢᠳᠡ ᠭᠠᠰᠢᠭᠤᠳᠠᠭᠰᠠᠨ ᠴᠤ᠂ ᠲᠠ ᠨᠠᠷ ᠴᠡᠭᠡᠵᠢ ᠪᠠᠨ ᠳᠡᠯᠡᠳᠦᠭᠰᠡᠨ ᠦᠭᠡᠢ〉 ᠭᠡᠯᠴᠡᠬᠦ ᠲᠠᠢ ᠠᠳᠠᠯᠢ᠃ 18 ᠶᠣᠬᠠᠨ ᠢᠷᠡᠭᠡᠳ ᠢᠳᠡᠬᠦ ᠴᠤ ᠦᠭᠡᠢ᠂ ᠤᠤᠭᠤᠬᠤ ᠴᠤ ᠦᠭᠡᠢ ᠪᠠᠢᠬᠤ ᠳᠤ᠂ ᠬᠥᠮᠦᠰ᠄ 〈ᠲᠡᠭᠦᠨ ᠳᠦ ᠴᠢᠳᠬᠥᠷ ᠣᠷᠣᠰᠢᠭᠰᠠᠨ ᠪᠠᠢᠨᠠ〉 ᠭᠡᠯᠴᠡᠵᠦ 19 ᠬᠥᠮᠦᠨ ᠦ ᠬᠦᠦ ᠢᠷᠡᠭᠡᠳ ᠢᠳᠡᠵᠦ ᠤᠤᠭᠤᠬᠤ ᠳᠤ᠂ ᠲᠡᠳᠡ᠄ 〈ᠬᠠᠷᠠᠵᠠᠭᠠ᠂ ᠲᠡᠷᠡ ᠴᠢᠨᠢ ᠢᠳᠡᠮᠡᠬᠡᠢ᠂ ᠠᠷᠢᠬᠢᠴᠢᠨ ᠪᠠᠢᠨᠠ᠂ ᠪᠠᠰᠠ ᠭᠠᠢᠯᠢᠴᠢᠳ ᠪᠣᠯᠣᠨ ᠨᠢᠭᠦᠯᠲᠡᠳ ᠦᠨ ᠨᠠᠢᠵᠠ ᠶᠤᠮ︕〉 ᠭᠡᠳᠡᠭ᠃ ᠬᠠᠷᠢᠨ ᠮᠡᠷᠭᠡᠨ ᠤᠬᠠᠭᠠᠨ ᠨᠢ ᠦᠢᠯᠡᠰ ᠢᠶᠡᠷ ᠢᠶᠠᠨ ᠵᠥᠪᠲᠥᠭᠡᠭᠳᠡᠳᠡᠭ᠌》 ᠭᠡᠪᠡ᠃
ᠭᠡᠮᠰᠢᠯ ᠦᠭᠡᠢ ᠲᠣᠰᠬᠣᠨ ᠨᠤᠭᠤᠳ
20 ᠬᠠᠮᠤᠭ ᠤᠨ ᠣᠯᠠᠨ ᠬᠦᠴᠦᠲᠦ ᠦᠢᠯᠡᠰ ᠢ ᠨᠢ ᠦᠵᠡᠭᠰᠡᠨ ᠲᠣᠰᠬᠣᠳ ᠭᠡᠮᠰᠢᠭᠰᠡᠨ ᠦᠭᠡᠢ ᠳᠦ᠂ ᠢᠰᠦ᠋ᠰ ᠵᠢᠮᠡᠯᠡᠵᠦ ᠡᠬᠢᠯᠡᠨ᠂ 21 《ᠴᠢᠮᠠ ᠳᠤ ᠭᠠᠢ ᠪᠣᠯᠣᠨᠠ︕ ᠬᠣᠷᠠᠽᠢᠨ ᠡ᠂ ᠴᠢᠮᠠ ᠳᠤ ᠭᠠᠢ ᠪᠣᠯᠣᠨᠠ︕ ᠪᠧᠲ᠋ᠰᠠᠢᠳᠠ ᠡ᠂ ᠬᠡᠷᠪᠡ ᠲᠠ ᠨᠠᠷ ᠲᠤ ᠲᠣᠬᠢᠶᠠᠯᠳᠤᠭᠰᠠᠨ ᠬᠦᠴᠦᠲᠦ ᠦᠢᠯᠡᠰ ᠲᠢᠷ ᠪᠣᠯᠣᠨ ᠰᠢᠢᠳᠣᠨ ᠳᠤ ᠲᠣᠬᠢᠶᠠᠯᠳᠤᠭᠰᠠᠨ ᠪᠣᠯ᠂ ᠲᠡᠳᠡ ᠬᠡᠳᠦᠢᠨᠡᠢ ᠥᠷᠮᠥᠭ ᠨᠥᠮᠥᠷᠴᠦ᠂ ᠲᠣᠯᠣᠭᠠᠢ ᠳᠠᠭᠠᠨ ᠦᠨᠡᠰᠦ ᠰᠠᠴᠤᠨ ᠭᠡᠮᠰᠢᠬᠦ ᠪᠠᠢᠭᠰᠠᠨ᠃ 22 ᠲᠠ ᠨᠠᠷ ᠲᠤ ᠨᠡᠮᠡᠵᠦ ᠬᠡᠯᠡᠶᠡ᠃ ᠰᠢᠭᠦᠯᠲᠡ ᠶᠢᠨ ᠡᠳᠦᠷ ᠲᠢᠷ ᠪᠣᠯᠣᠨ ᠰᠢᠢᠳᠣᠨ ᠤ ᠬᠦᠯᠢᠶᠡᠬᠦ ᠰᠢᠳᠬᠡᠯ ᠨᠢ ᠲᠠ ᠨᠠᠷ ᠠᠴᠠ ᠠᠷᠠᠢ ᠲᠡᠰᠪᠦᠷᠢᠯᠡᠭᠦᠰᠢᠲᠡᠢ ᠶᠤᠮ᠃ 23 ᠺᠠᠹᠠᠷᠨᠠᠦ᠋ᠮ ᠡ᠂ ᠴᠢ ᠲᠩᠷᠢ ᠳᠤ ᠬᠦᠷᠲᠡᠯᠡ ᠡᠷᠭᠦᠭᠳᠡᠨᠡ ᠭᠡᠵᠢ ᠤᠤ︖ ᠴᠢ ᠦᠬᠦᠭᠰᠡᠳ ᠦᠨ ᠣᠷᠣᠨ ᠳᠤ ᠬᠦᠷᠲᠡᠯᠡ ᠤᠨᠠᠭᠠᠭᠳᠠᠬᠤ ᠪᠣᠯᠣᠨᠠ᠃ ᠬᠡᠷᠪᠡ ᠴᠢᠮᠠ ᠳᠤ ᠲᠣᠬᠢᠶᠠᠯᠳᠤᠭᠰᠠᠨ ᠬᠦᠴᠦᠲᠦ ᠦᠢᠯᠡᠰ ᠰᠣᠳᠣᠮ ᠳᠤ ᠲᠣᠬᠢᠶᠠᠯᠳᠤᠭᠰᠠᠨ ᠪᠣᠯ ᠲᠡᠷᠡ ᠬᠣᠲᠠ ᠥᠨᠥᠳᠥᠷ ᠪᠣᠯᠲᠠᠯᠠ ᠦᠯᠡᠳᠡᠬᠦ ᠪᠠᠢᠭᠰᠠᠨ᠃ 24 ᠲᠠ ᠨᠠᠷ ᠲᠤ ᠨᠡᠮᠡᠵᠦ ᠬᠡᠯᠡᠶᠡ᠃ ᠰᠢᠭᠦᠯᠲᠡ ᠶᠢᠨ ᠡᠳᠦᠷ ᠰᠣᠳᠣᠮ ᠨᠤᠲᠤᠭ ᠤᠨ ᠬᠦᠯᠢᠶᠡᠬᠦ ᠰᠢᠳᠬᠡᠯ ᠨᠢ ᠲᠠ ᠨᠠᠷ ᠠᠴᠠ ᠠᠷᠠᠢ ᠲᠡᠰᠪᠦᠷᠢᠯᠡᠭᠦᠰᠢᠲᠡᠢ ᠶᠤᠮ》 ᠭᠡᠯᠡ᠃
ᠨᠠᠳᠠ ᠤᠷᠤᠭᠤ ᠢᠷᠡ
25 ᠲᠡᠷᠡ ᠴᠠᠭ ᠲᠤ ᠢᠰᠦ᠋ᠰ ᠠᠢᠯᠠᠳᠴᠤ ᠡᠬᠢᠯᠡᠨ᠄ 《ᠲᠠᠨ ᠢ ᠮᠠᠭᠲᠠᠶᠠ᠂ ᠠᠪᠤ ᠡ᠂ ᠲᠩᠷᠢ ᠭᠠᠵᠠᠷ ᠤᠨ ᠡᠵᠡᠨ᠂ ᠲᠠ ᠡᠳᠡᠭᠡᠷ ᠢ ᠰᠡᠴᠡᠨ ᠤᠬᠠᠭᠠᠨᠲᠠᠳ ᠠᠴᠠ ᠨᠢᠭᠤᠵᠤ᠂ ᠨᠢᠯᠬᠠ ᠬᠡᠦᠬᠡᠳ ᠤᠳ ᠲᠤ ᠢᠯᠡᠷᠬᠡᠶᠢᠯᠡᠭᠰᠡᠨ ᠪᠢᠯᠡ᠃ 26 ᠲᠡᠢᠮᠦ ᠡ᠂ ᠠᠪᠤ ᠡ᠂ ᠲᠠᠨ ᠤ ᠲᠠᠭᠠᠯᠠᠯ ᠡᠨᠡ ᠪᠠᠢᠵᠠᠢ᠃ 27 ᠠᠪᠤ ᠮᠢᠨᠢ ᠠᠯᠢᠪᠠ ᠶᠢ ᠨᠠᠳᠠ ᠳᠤ ᠲᠤᠰᠢᠶᠠᠭᠰᠠᠨ᠃ ᠬᠦᠦ ᠶᠢᠨ ᠬᠡᠨ ᠪᠣᠯᠬᠤ ᠶᠢ ᠡᠴᠢᠭᠡ ᠡᠴᠡ ᠨᠢ ᠥᠭᠡᠷᠡ ᠬᠡᠨ ᠴᠤ ᠮᠡᠳᠡᠳᠡᠭ ᠦᠭᠡᠢ᠃ ᠡᠴᠢᠭᠡ ᠶᠢᠨ ᠬᠡᠨ ᠪᠣᠯᠬᠤ ᠶᠢ ᠬᠦᠦ ᠪᠣᠯᠣᠨ ᠡᠴᠢᠭᠡ ᠪᠡᠨ ᠲᠡᠳᠡᠨ ᠳᠦ ᠢᠯᠡᠷᠬᠡᠶᠢᠯᠡᠶᠡ ᠭᠡᠵᠦ ᠬᠦᠦ ᠶᠢᠨ ᠰᠣᠩ᠋ᠭᠣᠭᠰᠠᠨ ᠬᠥᠮᠦᠨ ᠡᠴᠡ ᠥᠭᠡᠷᠡ ᠬᠡᠨ ᠴᠤ ᠮᠡᠳᠡᠳᠡᠭ ᠦᠭᠡᠢ᠃
28 ᠵᠦᠳᠡᠷᠡᠭᠰᠡᠨ᠂ ᠠᠴᠢᠶᠠᠨ ᠳᠤ ᠳᠠᠷᠤᠭᠳᠠᠭᠰᠠᠨ ᠬᠥᠮᠦᠨ ᠪᠦᠬᠦᠨ ᠨᠠᠳᠠ ᠤᠷᠤᠭᠤ ᠢᠷᠠ᠂ ᠪᠢ ᠲᠠ ᠨᠠᠷ ᠢ ᠠᠮᠠᠷᠠᠭᠠᠶᠠ᠃ 29 ᠪᠢ ᠳᠥᠯᠭᠡᠨ ᠳᠠᠷᠤᠤ ᠵᠠᠩ ᠲᠠᠢ ᠪᠠᠢᠳᠠᠭ᠂ ᠮᠢᠨᠦ ᠪᠤᠭᠤᠯᠠᠭᠠ ᠶᠢ ᠪᠡᠶᠡ ᠳᠡᠭᠡᠨ ᠡᠭᠦᠷᠴᠦ ᠨᠠᠳᠠ ᠠᠴᠠ ᠰᠤᠷᠤᠯᠴᠠ᠃ ᠲᠡᠭᠡᠪᠡᠯ ᠲᠠ ᠨᠠᠷ ᠰᠡᠳᠬᠢᠯ ᠳᠡᠭᠡᠨ ᠠᠮᠠᠷᠠᠯ ᠢ ᠣᠯᠬᠤ ᠪᠣᠯᠣᠨᠠ᠃ 30 ᠪᠤᠭᠤᠯᠠᠭᠠ ᠮᠢᠨᠢ ᠲᠠᠭᠠᠷᠠᠮᠵᠢᠲᠠᠢ᠂ ᠠᠴᠢᠶᠠ ᠮᠢᠨᠢ ᠬᠥᠩᠭᠡᠨ ᠪᠢᠯᠡ》 ᠭᠡᠵᠡᠢ᠃