ᠮᠠᠲ᠋ᠠᠢ ᠬᠣᠷᠢᠨ ᠳᠥᠷᠪᠡ
 ᠾᠷᠢᠰᠲ᠋ᠣᠰ ᠤᠨ ᠳᠠᠬᠢᠨ ᠢᠷᠡᠬᠦ ᠶᠢᠨ ᠰᠢᠨᠵᠢ ᠲᠡᠮᠳᠡᠭ

1 ᠢᠰᠦ᠋ᠰ ᠠᠷᠢᠭᠤᠨ ᠣᠷᠳᠣᠨ ᠠᠴᠠ ᠭᠠᠷᠤᠭᠠᠳ ᠶᠠᠪᠤᠵᠤ ᠪᠠᠢᠲᠠᠯ᠎ᠠ᠂ ᠱᠠᠪᠢ ᠨᠠᠷ ᠨᠢ ᠣᠢᠷᠠᠲᠤᠨ ᠢᠷᠡᠵᠦ ᠠᠷᠢᠭᠤᠨ ᠣᠷᠳᠣᠨ ᠤ ᠪᠠᠷᠢᠯᠭ᠎ᠠ ᠵᠦᠭ ᠵᠢᠭᠠᠪᠠ᠃ 2 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠲᠠ ᠨᠠᠷ ᠡᠨᠡ ᠪᠦᠭᠦᠳᠡ ᠶᠢ ᠬᠠᠷᠠᠵᠤ ᠪᠠᠢᠨ᠎ᠠ ᠤᠤ︖ ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶ᠎ᠡ᠃ ᠡ᠊ᠨᠳᠡᠬᠢ ᠨᠢ ᠨᠢᠭᠡ ᠴᠢᠯᠠᠭᠤ ᠨᠢ ᠴᠤ ᠨᠥᠭᠥᠭᠡ ᠳᠡᠭᠡᠷ᠎ᠡ ᠪᠡᠨ ᠳᠠᠪᠬᠤᠷᠯᠠᠵᠤ ᠦᠯᠡᠳᠡᠬᠦ ᠦᠭᠡᠢ ᠪᠠᠷ ᠨᠤᠷᠠᠬᠤ ᠪᠣᠯᠣᠨ᠎ᠠ》 ᠭᠡᠪᠡ᠃

3 ᠢᠰᠦ᠋ᠰ ᠴᠢᠳᠦᠨ ᠠᠭᠤᠯᠠᠨ ᠳᠤ ᠰᠠᠭᠤᠵᠤ ᠪᠠᠢᠬᠤ ᠳᠤ᠂ ᠱᠠᠪᠢ ᠨᠠᠷ ᠨᠢ ᠲᠡᠭᠦᠨ ᠳᠦ ᠢᠷᠡᠵᠦ᠄ 《ᠪᠢᠳᠡᠨ ᠳᠦ ᠬᠡᠯᠡᠭᠡᠴᠢ᠂ ᠲᠡᠳᠡᠭᠡᠷ ᠶᠠᠪᠤᠳᠠᠯ ᠬᠡᠵᠢᠶ᠎ᠡ ᠪᠣᠯᠬᠤ ᠪᠤᠢ︖ ᠲᠠᠨ ᠢ ᠢᠷᠡᠬᠦ ᠳᠦ ᠪᠠ ᠡᠨᠡ ᠡᠷᠡᠨ ᠦ ᠲᠡᠭᠦᠰᠬᠡᠯ ᠳᠦ ᠶᠠᠮᠠᠷ ᠲᠡᠮᠳᠡᠭ ᠭᠠᠷᠬᠤ ᠪᠤᠢ︖》 ᠭᠡᠵᠦ ᠠᠮᠢᠨᠴᠢᠯᠠᠨ ᠠᠰᠠᠭᠤᠭᠰᠠᠨ ᠳᠤ᠂ 4 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠬᠡᠨ ᠨᠢᠭᠡᠨ ᠦ ᠲᠠ ᠨᠠᠷ ᠢ ᠪᠠᠴᠢᠯᠠᠬᠤ ᠠᠴᠠ ᠪᠣᠯᠭᠣᠮᠵᠢᠯᠠ᠃ 5 ᠤᠴᠢᠷ ᠨᠢ ᠣᠯᠠᠨ ᠬᠥᠮᠦᠨ᠄ 〈ᠪᠢ ᠪᠣᠯ ᠾᠷᠢᠰᠲ᠋ᠣᠰ〉 ᠬᠡᠮᠡᠨ ᠮᠢᠨᠦ ᠨᠡᠷ᠎ᠡ ᠪᠡᠷ ᠢᠷᠡᠵᠦ ᠣᠯᠠᠨ ᠢ ᠪᠠᠴᠢᠯᠠᠨ᠎ᠠ᠃ 6 ᠲᠠ ᠨᠠᠷ ᠳᠠᠢᠨ ᠪᠣᠯᠣᠨ ᠳᠠᠢᠨ ᠤ ᠰᠤᠷᠠᠭ ᠢ ᠰᠣᠨᠣᠰᠬᠤ ᠪᠣᠯᠣᠨ᠎ᠠ᠃ ᠬᠠᠷᠢᠨ ᠠᠩ᠋ᠬᠠᠷ᠂ ᠪᠢᠲᠡᠭᠡᠢ ᠬᠡᠯᠮᠡᠭᠳᠡ︕ ᠲᠡᠷᠡ ᠨᠢ ᠵᠠᠢᠯᠠᠰᠢ ᠦᠭᠡᠢ ᠲᠣᠬᠢᠶᠠᠯᠳᠤᠬᠤ ᠪᠣᠯᠪᠠᠴᠤ ᠬᠠᠷᠠᠬᠠᠨ ᠲᠡᠭᠦᠰᠬᠡᠯ ᠪᠢᠰᠢ᠃ 7 ᠦᠨᠳᠦᠰᠦᠲᠡᠨ ᠦᠨᠳᠦᠰᠦᠲᠡᠨ ᠦ ᠪᠠᠨ ᠡᠰᠡᠷᠭᠦ᠂ ᠤᠯᠤᠰ ᠤᠯᠤᠰ ᠤᠨ ᠢᠶᠠᠨ ᠡᠰᠡᠷᠭᠦ ᠪᠣᠰᠴᠤ ᠡ᠊ᠨᠳᠡ ᠲᠡᠨᠳᠡ ᠦᠭᠡᠢ ᠥᠯᠥᠰᠬᠥᠯᠡᠩ ᠪᠠ ᠭᠠᠵᠠᠷ ᠬᠥᠳᠡᠯᠦᠯᠲᠡ ᠪᠣᠯᠣᠨ᠎ᠠ᠃ 8 ᠡᠨᠡ ᠪᠦᠬᠦᠨ ᠢᠶᠡᠷ ᠲᠥᠷᠥᠯᠲᠡ ᠶᠢᠨ ᠡᠪᠡᠷᠰᠢᠶᠡᠯ ᠡᠬᠢᠯᠡᠨ᠎ᠡ᠃

9 ᠲᠡᠭᠡᠬᠦ ᠳᠦ᠂ ᠬᠥᠮᠦᠰ ᠲᠠ ᠨᠠᠷ ᠢ ᠵᠣᠪᠠᠯᠠᠩ ᠳᠤ ᠲᠤᠰᠢᠶᠠᠵᠤ᠂ ᠠᠯᠠᠨ᠎ᠠ᠃ ᠲᠠ ᠨᠠᠷ ᠮᠢᠨᠦ ᠨᠡᠷ᠎ᠡ ᠡᠴᠡ ᠪᠣᠯᠵᠤ ᠬᠠᠮᠤᠭ ᠦᠨᠳᠦᠰᠦᠲᠡᠨ ᠳᠦ ᠵᠠᠨᠤᠭᠳᠠᠬᠤ ᠪᠣᠯᠣᠨ᠎ᠠ᠃ 10 ᠲᠡᠷᠡ ᠦᠶ᠎ᠡ ᠳᠦ ᠣᠯᠠᠨ ᠬᠥᠮᠦᠨ ᠪᠦᠳᠦᠷᠢᠬᠦ ᠪᠥᠭᠡᠳ ᠨᠢᠭᠡ ᠨᠢᠭᠡᠨ ᠢ ᠪᠠᠨ ᠪᠠᠷᠢᠭᠤᠯᠵᠤ᠂ ᠨᠢᠭᠡ ᠨᠢᠭᠡᠨ ᠢ ᠪᠠᠨ ᠵᠠᠨᠤᠨ᠎ᠠ᠃ 11 ᠣᠯᠠᠨ ᠬᠠᠭᠤᠷᠮᠠᠭ ᠡᠰᠢ ᠦᠵᠡᠭᠦᠯᠦᠭᠴᠢ ᠪᠣᠰᠴᠤ ᠣᠯᠠᠨ ᠢ ᠪᠠᠴᠢᠯᠠᠨ᠎ᠠ᠃ 12 ᠬᠠᠤᠯᠢ ᠪᠤᠰᠤ ᠶᠠᠪᠤᠳᠠᠯ ᠣᠯᠠᠰᠢᠷᠠᠬᠤ ᠪᠣᠯᠬᠣᠷ ᠶᠡᠬᠡᠩᠬᠢ ᠬᠥᠮᠦᠨ ᠦ ᠬᠠᠢᠷ᠎ᠠ ᠬᠥᠷᠥᠨ᠎ᠡ᠃ 13 ᠬᠠᠷᠢᠨ ᠡᠴᠦᠰ ᠲᠤᠨᠢ ᠬᠦᠷᠲᠡᠯ᠎ᠡ ᠲᠡᠰᠪᠦᠷᠢᠯᠡᠭᠴᠢ ᠨᠢ ᠠᠪᠤᠷᠠᠭᠳᠠᠨ᠎ᠠ᠃ 14 ᠬᠠᠭᠠᠨᠴᠢᠯᠠᠯ ᠤᠨ ᠡᠨᠡ ᠪᠠᠶᠠᠷ ᠤᠨ ᠮᠡᠳᠡᠭᠡ ᠳᠡᠯᠡᠬᠡᠢ ᠳᠠᠶᠠᠭᠠᠷ ᠤᠯᠠᠮᠵᠢᠯᠠᠭᠳᠠᠵᠤ᠂ ᠬᠠᠮᠤᠭ ᠦᠨᠳᠦᠰᠦᠲᠡᠨ ᠳᠦ ᠭᠡᠷᠡᠴᠢᠯᠡᠭᠳᠡᠨ᠎ᠡ᠃ ᠲᠡᠭᠡᠬᠦ ᠳᠦ ᠯᠠ ᠲᠡᠭᠦᠰᠬᠡᠯ ᠪᠣᠯᠣᠨ᠎ᠠ᠃
 ᠭᠠᠮᠰᠢᠭ ᠤᠨ ᠦᠶ᠎ᠡ

15 ᠡᠰᠢ ᠦᠵᠡᠭᠦᠯᠦᠭᠴᠢ ᠳ᠋ᠠᠨᠢᠶᠧᠯ ᠤᠨ ᠬᠡᠯᠡᠭᠰᠡᠨ 〈ᠰᠦᠢᠷᠡᠭᠦᠯᠦᠭᠴᠢ ᠵᠢᠭᠰᠢᠭᠦᠷᠢᠲᠡᠨ〉 ᠦ ᠠᠷᠢᠭᠤᠨ ᠭᠠᠵᠠᠷ ᠲᠤ ᠵᠣᠭᠰᠣᠭᠰᠠᠨ ᠢ ᠬᠠᠷᠠᠪᠠᠯ (ᠤᠩ᠋ᠰᠢᠭᠴᠢ ᠨᠢ ᠣᠢᠯᠠᠭᠠᠭᠲᠤᠨ) 16 ᠲᠡᠷᠡ ᠦᠶ᠎ᠡ ᠳᠦ ᠶᠦᠳᠠᠢ ᠳᠤ ᠪᠠᠢᠭᠰᠠᠳ ᠨᠢ ᠠᠭᠤᠯᠠ ᠤᠷᠤᠭᠤ ᠳᠤᠲᠠᠭᠠᠭᠲᠤᠨ᠃ 17 ᠭᠡᠷ ᠦᠨ ᠭᠠᠳᠠᠨ᠎ᠠ ᠪᠠᠢᠭᠰᠠᠳ ᠨᠢ ᠭᠡᠷ ᠡᠴᠡ ᠪᠡᠨ ᠶᠠᠭᠤᠮ᠎ᠠ ᠠᠪᠬᠤ ᠪᠠᠷ ᠪᠢᠲᠡᠭᠡᠢ ᠣᠷᠣ᠃ 18 ᠲᠠᠷᠢᠶᠠᠨ ᠳᠡᠭᠡᠷ᠎ᠡ ᠪᠠᠢᠭᠰᠠᠳ ᠨᠢ ᠬᠤᠪᠴᠠᠰᠤ ᠬᠤᠨᠠᠷ ᠢᠶᠠᠨ ᠠᠪᠬᠤ ᠪᠠᠷ ᠪᠢᠲᠡᠭᠡᠢ ᠬᠠᠷᠢ᠃ 19 ᠲᠡᠷᠡ ᠡᠳᠦᠷ ᠤᠳ ᠢᠶᠠᠷ ᠵᠢᠷᠮᠦᠰᠦᠨ ᠪᠠ ᠬᠥᠬᠥᠭᠦᠯ ᠡᠮᠡᠭᠲᠡᠢᠴᠦᠳ ᠲᠦ ᠭᠠᠢ ᠪᠣᠯᠣᠨ᠎ᠠ᠃ 20 ᠳᠤᠲᠠᠭᠠᠬᠤ ᠳᠤ ᠴᠢᠨᠢ ᠡᠪᠦᠯ ᠪᠤᠶᠤ ᠠᠮᠠᠷᠠᠯ ᠤᠨ ᠡᠳᠦᠷ ᠡᠰᠡ ᠲᠣᠬᠢᠶᠠᠯᠳᠤᠬᠤ ᠶᠢ ᠳᠠᠭᠠᠳᠬ᠎ᠠ᠃ 21 ᠤᠴᠢᠷ ᠨᠢ ᠲᠡᠷᠡ ᠦᠶ᠎ᠡ ᠳᠦ ᠶᠡᠬᠡ ᠭᠠᠮᠰᠢᠭ ᠪᠣᠯᠣᠨ᠎ᠠ᠃ ᠲᠡᠢᠮᠦ ᠭᠠᠮᠰᠢᠭ ᠶᠢᠷᠲᠢᠨᠴᠦ ᠶᠢᠨ ᠡᠬᠢᠨ ᠡᠴᠡ ᠣᠳᠣ ᠬᠦᠷᠲᠡᠯ᠎ᠡ ᠲᠣᠬᠢᠶᠠᠯᠳᠤᠭ᠎ᠠ ᠦᠭᠡᠢ ᠪᠥᠭᠡᠳ ᠬᠣᠵᠢᠮ ᠴᠤ ᠯᠠᠪ ᠲᠣᠬᠢᠶᠠᠯᠳᠤᠬᠤ ᠦᠭᠡᠢ᠃ 22 ᠲᠡᠷᠡ ᠬᠤᠭᠤᠴᠠᠭ᠎ᠠ ᠶᠢ ᠪᠣᠭᠣᠨᠢᠰᠬᠠᠭᠰᠠᠨ ᠦᠭᠡᠢ ᠶᠤᠮ ᠪᠣᠯ ᠮᠢᠬᠠᠨ ᠪᠡᠶ᠎ᠡ ᠲᠠᠢ ᠪᠦᠬᠦᠨ ᠡᠴᠡ ᠨᠢᠭᠡ ᠴᠤ ᠠᠪᠤᠷᠠᠭᠳᠠᠬᠤ ᠦᠭᠡᠢ᠂ ᠬᠠᠷᠢᠨ ᠰᠣᠩ᠋ᠭᠣᠭᠳᠠᠭᠰᠠᠳ ᠤᠨ ᠢᠶᠠᠨ ᠲᠥᠯᠥᠭᠡ ᠲᠡᠷᠡ ᠬᠤᠭᠤᠴᠠᠭ᠎ᠠ ᠶᠢ ᠪᠣᠭᠣᠨᠢᠰᠬᠠᠨ᠎ᠠ᠃ 23 ᠲᠡᠷᠡ ᠦᠶ᠎ᠡ ᠳᠦ᠂ ᠬᠡᠨ ᠨᠢᠭᠡ ᠨᠢ ᠲᠠ ᠨᠠᠷ ᠲᠤ᠄ 〈ᠬᠠᠷᠠᠭᠠᠴᠢ︕ ᠾᠷᠢᠰᠲ᠋ᠣᠰ ᠡ᠊ᠨᠳᠡ ᠪᠠᠢᠨ᠎ᠠ〉 ᠭᠡᠰᠡᠨ ᠴᠤ᠂ 〈ᠲᠡᠨᠳᠡ ᠪᠠᠢᠨ᠎ᠠ〉 ᠭᠡᠰᠡᠨ ᠴᠤ ᠪᠦᠦ ᠢᠲᠡᠭᠡ᠃ 24 ᠤᠴᠢᠷ ᠨᠢ ᠬᠠᠭᠤᠷᠮᠠᠭ ᠾᠷᠢᠰᠲ᠋ᠣᠰ ᠤᠳ ᠪᠣᠯᠣᠨ ᠬᠠᠭᠤᠷᠮᠠᠭ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠭᠠᠷᠴᠤ᠂ ᠠᠤᠭ᠎ᠠ ᠰᠢᠳᠢ ᠲᠡᠮᠳᠡᠭ᠂ ᠭᠠᠢᠬᠠᠮᠰᠢᠭ ᠤᠳ ᠢ ᠦᠵᠡᠭᠦᠯᠦᠨ ᠠᠯᠢ ᠴᠢᠳᠠᠬᠤ ᠪᠠᠷ ᠰᠣᠩ᠋ᠭᠣᠭᠳᠠᠭᠰᠠᠳ ᠢ ᠴᠤ ᠪᠠᠴᠢᠯᠠᠬᠤ ᠭᠡᠬᠦ ᠪᠣᠯᠣᠨ᠎ᠠ᠃ 25 ᠠᠩ᠋ᠬᠠᠷᠤᠭᠲᠤᠨ᠂ ᠪᠢ ᠤᠷᠢᠳᠠ ᠠᠴᠠ ᠲᠠ ᠨᠠᠷ ᠲᠤ ᠬᠡᠯᠡᠴᠢᠬᠡᠯ᠎ᠡ᠃ 26 ᠡᠢᠮᠦ ᠡᠴᠡ ᠬᠥᠮᠦᠨ ᠲᠠ ᠨᠠᠷ ᠲᠤ᠄ 〈ᠬᠠᠷᠠᠭᠠᠴᠢ᠂ ᠲᠡᠷᠡ ᠴᠢᠨᠢ ᠴᠥᠯ ᠳᠤ ᠪᠠᠢᠨ᠎ᠠ〉 ᠭᠡᠰᠡᠨ ᠴᠤ ᠪᠦᠦ ᠣᠴᠢ᠂ 〈ᠬᠠᠷᠠᠭᠠᠴᠢ᠂ ᠲᠡᠷᠡ ᠴᠢᠨᠢ ᠳᠣᠲᠣᠷ᠎ᠠ ᠥᠷᠥᠭᠡᠨ ᠳᠦ ᠪᠠᠢᠨ᠎ᠠ〉 ᠭᠡᠰᠡᠨ ᠴᠤ ᠪᠦᠦ ᠢᠲᠡᠭᠡ᠃ 27 ᠭᠢᠯᠪᠢᠭᠡᠨ ᠵᠡᠭᠦᠨ ᠵᠦᠭ ᠲᠦ ᠴᠠᠬᠢᠯᠵᠤ᠂ ᠪᠠᠷᠠᠭᠤᠨ ᠵᠦᠭ ᠲᠦ ᠬᠦᠷᠲᠡᠯ᠎ᠡ ᠦᠵᠡᠭᠳᠡᠳᠡᠭ ᠰᠢᠭ᠂ ᠬᠥᠮᠦᠨ ᠦ ᠬᠦᠦ ᠲᠡᠭᠡᠵᠦ ᠢᠷᠡᠨ᠎ᠡ᠃ 28 ᠬᠡᠭᠦᠷ ᠪᠠᠢᠭ᠎ᠠ ᠭᠠᠵᠠᠷ ᠲᠤ ᠪᠦᠷᠭᠦᠳ ᠴᠤᠭᠯᠠᠷᠠᠨ᠎ᠠ᠃
 ᠾᠷᠢᠰᠲ᠋ᠣᠰ ᠤᠨ ᠳᠠᠬᠢᠨ ᠢᠷᠡᠬᠦ

29 ᠲᠡᠷᠡ ᠡᠳᠦᠷ ᠤᠳ ᠤᠨ ᠭᠠᠮᠰᠢᠭ ᠥᠩᠭᠡᠷᠡᠮᠡᠭᠴᠡ᠂ 〈ᠨᠠᠷᠠ ᠬᠠᠷᠠᠩ᠋ᠭᠤᠢᠯᠠᠵᠤ᠂ ᠰᠠᠷᠠ ᠭᠡᠷᠡᠯ ᠦᠭᠡᠢ ᠪᠣᠯᠣᠨ᠎ᠠ᠂ ᠣᠳᠣᠳ ᠲᠩᠷᠢ ᠡᠴᠡ ᠤᠨᠠᠵᠤ᠂ ᠲᠩᠷᠢ ᠶᠢᠨ ᠡᠷᠬᠡᠰ ᠳᠣᠷᠭᠢᠨ᠎ᠠ〉᠂ 30 ᠲᠡᠷᠡ ᠦᠶ᠎ᠡ ᠳᠦ᠂ ᠬᠥᠮᠦᠨ ᠦ ᠬᠦᠦ ᠶᠢᠨ ᠲᠡᠮᠳᠡᠭ ᠲᠩᠷᠢ ᠳᠤ ᠦᠵᠡᠭᠳᠡᠨ᠎ᠡ᠂ ᠲᠡᠭᠡᠬᠦ ᠳᠦ ᠭᠠᠵᠠᠷ ᠳᠡᠭᠡᠷᠡᠬᠢ ᠬᠠᠮᠤᠭ ᠣᠪᠣᠭ ᠠᠢᠮᠠᠭ ᠴᠡᠭᠡᠵᠢ ᠪᠠᠨ ᠳᠡᠯᠡᠳᠦᠨ ᠤᠬᠢᠯᠠᠯᠳᠤᠵᠤ᠂ ᠬᠥᠮᠦᠨ ᠦ ᠬᠦᠦ ᠶᠢᠨ ᠲᠩᠷᠢ ᠶᠢᠨ ᠡᠭᠦᠯᠡᠨ ᠳᠡᠭᠡᠷ᠎ᠡ ᠬᠦᠴᠦ ᠪᠣᠯᠣᠨ ᠠᠤᠭ᠎ᠠ ᠵᠢᠪᠬᠤᠯᠠᠩ ᠲᠠᠢ ᠪᠠᠷ ᠢᠷᠡᠬᠦ ᠶᠢ ᠬᠠᠷᠠᠨ᠎ᠠ᠃ 31 ᠲᠡᠷᠡ ᠪᠦᠷᠢᠶᠡᠨ ᠦ ᠥᠨᠳᠥᠷ ᠳᠠᠭᠤᠨ ᠲᠠᠢ ᠬᠠᠮᠲᠤ ᠲᠩᠷᠢ ᠶᠢᠨ ᠡᠯᠴᠢᠳ ᠢᠶᠠᠨ ᠢᠯᠡᠭᠡᠬᠦ ᠳᠦ᠂ ᠲᠡᠳᠡ ᠰᠣᠩ᠋ᠭᠣᠭᠳᠠᠭᠰᠠᠳ ᠢ ᠨᠢ ᠲᠩᠷᠢ ᠶᠢᠨ ᠨᠢᠭᠡ ᠬᠢᠵᠠᠭᠠᠷ ᠠᠴᠠ ᠨᠥᠭᠥᠭᠡ ᠬᠢᠵᠠᠭᠠᠷ ᠬᠦᠷᠲᠡᠯ᠎ᠡ ᠳᠥᠷᠪᠡᠨ ᠵᠦᠭ ᠡᠴᠡ ᠪᠥᠭᠡᠮᠨᠡᠷᠡᠭᠦᠯᠦᠨ᠎ᠡ᠃
 ᠢᠨᠵᠢᠷ ᠤᠨ ᠮᠣᠳᠣᠨ ᠤ ᠪᠠᠢᠳᠠᠯ

32 ᠢᠨᠵᠢᠷ ᠤᠨ ᠮᠣᠳᠣᠨ ᠠᠴᠠ ᠦᠯᠢᠭᠡᠷᠯᠡᠨ ᠰᠤᠷᠤᠭᠲᠤᠨ᠃ ᠮᠥᠴᠢᠷ ᠨᠢ ᠵᠥᠭᠡᠯᠡᠷᠡᠵᠦ᠂ ᠨᠠᠪᠴᠢᠯᠠᠩ᠋ᠭᠤᠲᠠ ᠵᠤᠨ ᠣᠢᠷᠠᠲᠤᠭᠰᠠᠨ ᠢ ᠲᠠ ᠨᠠᠷ ᠮᠡᠳᠡᠳᠡᠭ᠃ 33 ᠡᠭᠦᠨᠴᠢᠯᠡᠨ ᠲᠠ ᠨᠠᠷ ᠡᠳᠡᠭᠡᠷ ᠲᠣᠬᠢᠶᠠᠯᠳᠤᠯ ᠢ ᠬᠠᠷᠠᠬᠤ ᠳᠠᠭᠠᠨ᠂ ᠬᠥᠮᠦᠨ ᠦ ᠬᠦᠦ ᠶᠢᠨ ᠣᠢᠷᠠᠲᠤᠵᠤ ᠢᠷᠡᠭᠡᠳ ᠡᠭᠦᠳᠡᠨ ᠳᠡᠭᠡᠷ᠎ᠡ ᠪᠠᠢᠭ᠎ᠠ ᠶᠢ ᠮᠡᠳᠡᠭᠲᠦᠨ᠃ 34 ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶ᠎ᠡ᠃ ᠡᠨᠡ ᠦᠶ᠎ᠡ ᠰᠥᠨᠥᠬᠦ ᠡᠴᠡ ᠡᠮᠦᠨ᠎ᠡ᠂ ᠡᠨᠡ ᠪᠦᠬᠦᠨ ᠯᠠᠪ ᠪᠡᠶᠡᠯᠡᠭᠳᠡᠨ᠎ᠡ᠃ 35 ᠲᠩᠷᠢ ᠭᠠᠵᠠᠷ ᠠᠯᠠᠭ᠎ᠠ ᠪᠣᠯᠣᠨ᠎ᠠ᠂ ᠭᠡᠪᠡᠴᠦ ᠮᠢᠨᠦ ᠦᠭᠡ ᠯᠠᠪ ᠠᠯᠠᠭ᠎ᠠ ᠪᠣᠯᠬᠤ ᠦᠭᠡᠢ᠃

36 ᠬᠠᠷᠢᠨ ᠲᠡᠷᠡ ᠡᠳᠦᠷ ᠪᠠ ᠴᠠᠭ ᠢ ᠬᠡᠨ ᠴᠤ ᠮᠡᠳᠡᠬᠦ ᠦᠭᠡᠢ᠂ ᠲᠩᠷᠢ ᠶᠢᠨ ᠡᠯᠴᠢ ᠴᠤ᠂ ᠬᠦᠦ ᠴᠤ ᠮᠡᠳᠡᠬᠦ ᠦᠭᠡᠢ᠃ ᠡᠴᠢᠭᠡ ᠯᠠ ᠮᠡᠳᠡᠨ᠎ᠡ᠃ 37 ᠨᠣᠶᠠ ᠶᠢᠨ ᠡᠳᠦᠷ ᠤᠳ ᠰᠢᠭ᠂ ᠬᠥᠮᠦᠨ ᠦ ᠬᠦᠦ ᠶᠢᠨ ᠢᠷᠡᠬᠦ ᠦᠶ᠎ᠡ ᠴᠤ ᠲᠡᠢᠮᠦ ᠪᠣᠯᠣᠨ᠎ᠠ᠃ 38 ᠦᠶᠡᠷ ᠦᠨ ᠡᠮᠦᠨᠡᠬᠢ ᠡᠳᠦᠷ ᠤᠳ ᠢᠶᠠᠷ ᠬᠥᠮᠦᠰ ᠢᠳᠡᠵᠦ ᠤᠤᠭᠤᠨ ᠡᠬᠡᠨᠡᠷ ᠠᠪᠴᠤ᠂ ᠬᠠᠷᠢ ᠳᠤ ᠮᠣᠷᠳᠠᠭᠰᠠᠭᠠᠷ ᠪᠠᠢᠲᠠᠯ᠎ᠠ᠂ ᠨᠣᠶᠠ ᠶᠢᠨ ᠣᠩ᠋ᠭᠣᠴᠠᠨ ᠳᠠᠭᠠᠨ ᠣᠷᠣᠬᠤ ᠡᠳᠦᠷ ᠪᠣᠯᠵᠠᠢ᠃ 39 ᠦᠶᠡᠷ ᠪᠣᠯᠵᠤ᠂ ᠪᠦᠭᠦᠳᠡ ᠶᠢ ᠨᠢ ᠬᠠᠮᠤᠨ ᠣᠳᠬᠤ ᠬᠦᠷᠲᠡᠯ᠎ᠡ ᠲᠡᠳᠡ ᠮᠡᠳᠡᠭᠰᠡᠨ ᠦᠭᠡᠢ᠃ ᠬᠥᠮᠦᠨ ᠦ ᠬᠦᠦ ᠶᠢᠨ ᠢᠷᠡᠬᠦ ᠦᠶ᠎ᠡ ᠴᠤ ᠲᠡᠢᠮᠦ ᠪᠣᠯᠣᠨ᠎ᠠ᠃ 40 ᠲᠡᠷᠡ ᠦᠶ᠎ᠡ ᠳᠦ ᠬᠣᠶᠠᠷ ᠡᠷ᠎ᠡ ᠲᠠᠷᠢᠶᠠᠨ ᠳᠤ ᠪᠠᠢᠬᠤ ᠳᠤ᠂ ᠨᠢᠭᠡ ᠨᠢ ᠠᠪᠠᠴᠢᠭᠳᠠᠵᠤ᠂ ᠨᠥᠭᠥᠭᠡ ᠨᠢ ᠣᠷᠬᠢᠭᠳᠠᠨ᠎ᠠ᠃ 41 ᠬᠣᠶᠠᠷ ᠡᠮᠡᠭᠲᠡᠢ ᠲᠡᠭᠡᠷᠮᠡᠳᠡᠵᠦ ᠪᠠᠢᠬᠤ ᠳᠤ ᠨᠢᠭᠡ ᠨᠢ ᠠᠪᠠᠴᠢᠭᠳᠠᠵᠤ᠂ ᠨᠥᠭᠥᠭᠡ ᠨᠢ ᠣᠷᠬᠢᠭᠳᠠᠨ᠎ᠠ᠃ 42 ᠲᠡᠢᠮᠦ ᠡᠴᠡ ᠰᠣᠷᠭᠣᠭ ᠪᠠᠢᠭᠲᠤᠨ᠂ ᠡᠵᠡᠨ ᠴᠢᠨᠢ ᠶᠠᠮᠠᠷ ᠡᠳᠦᠷ ᠢᠷᠡᠬᠦ ᠶᠢ ᠲᠠ ᠨᠠᠷ ᠮᠡᠳᠡᠬᠦ ᠦᠭᠡᠢ᠃ 43 ᠬᠠᠷᠢᠨ ᠡᠭᠦᠨ ᠢ ᠮᠡᠳᠡᠲᠦᠭᠡᠢ᠄ ᠰᠥᠨᠢ ᠶᠢᠨ ᠬᠡᠳᠦᠨ ᠴᠠᠭ ᠲᠤ ᠬᠤᠯᠠᠭᠠᠢᠴᠢ ᠢᠷᠡᠬᠦ ᠶᠢ ᠭᠡᠷ ᠦᠨ ᠡᠵᠡᠨ ᠮᠡᠳᠡᠭᠰᠡᠨ ᠪᠣᠯ᠂ ᠰᠡᠷᠭᠡᠭ ᠪᠠᠢᠵᠤ ᠭᠡᠷ ᠢᠶᠡᠨ ᠡᠪᠳᠡᠭᠦᠯᠬᠦ ᠦᠭᠡᠢ ᠶᠤᠮ᠃ 44 ᠲᠡᠢᠮᠦ ᠡᠴᠡ ᠲᠠ ᠨᠠᠷ ᠴᠤ ᠪᠡᠯᠡᠬᠡᠨ ᠪᠠᠢ᠂ ᠬᠥᠮᠦᠨ ᠦ ᠬᠦᠦ ᠲᠠ ᠨᠠᠷ ᠤᠨ ᠰᠠᠨᠠᠭᠠᠨ ᠳᠤ ᠦᠭᠡᠢ ᠴᠠᠭ ᠲᠤ ᠢᠷᠡᠨ᠎ᠡ᠃
 ᠪᠡᠯᠡᠬᠡᠨ ᠪᠠᠢᠭᠲᠤᠨ

45 ᠠᠯᠢ ᠵᠠᠷᠤᠴᠠ ᠨᠢ ᠢᠲᠡᠭᠡᠮᠵᠢᠲᠦ ᠪᠥᠭᠡᠳ ᠤᠬᠠᠭᠠᠨᠯᠢᠭ ᠪᠣᠯ ᠡᠵᠡᠨ ᠨᠢ ᠲᠡᠭᠦᠨ ᠢᠶᠡᠷ ᠭᠡᠷ ᠦᠨ ᠬᠢᠨ ᠢᠶᠠᠨ ᠬᠠᠷᠢᠭᠤᠴᠠᠭᠤᠯᠵᠤ᠂ ᠴᠠᠭ ᠲᠤᠨᠢ ᠬᠦᠨᠡᠰᠦ ᠶᠢ ᠨᠢ ᠥᠭᠭᠥᠭᠦᠯᠦᠨ᠎ᠡ᠃ 46 ᠡᠵᠡᠨ ᠨᠢ ᠢᠷᠡᠬᠦ ᠳᠦ ᠲᠡᠢᠨ ᠬᠦ ᠪᠡᠶᠡᠯᠡᠭᠦᠯᠵᠦ ᠪᠠᠢᠭ᠎ᠠ ᠪᠠᠨ ᠬᠠᠷᠠᠭᠤᠯᠬᠤ ᠵᠠᠷᠤᠴᠠ ᠪᠤᠶᠠᠨ ᠲᠠᠢ᠃ 47 ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶ᠎ᠡ᠃ ᠡᠵᠡᠨ ᠨᠢ ᠪᠠᠢᠭ᠎ᠠ ᠪᠦᠬᠦᠨ ᠢᠶᠡᠨ ᠲᠡᠭᠦᠨ ᠢᠶᠡᠷ ᠬᠠᠷᠢᠭᠤᠴᠠᠭᠤᠯᠤᠨ᠎ᠠ᠃ 48 ᠬᠠᠷᠢᠨ ᠮᠠᠭᠤ ᠵᠠᠷᠤᠴᠠ ᠪᠣᠯ 〈ᠡᠵᠡᠨ ᠤᠳᠠᠬᠤ ᠨᠢ〉 ᠭᠡᠵᠦ ᠪᠣᠳᠣᠭᠠᠳ᠂ 49 ᠨᠠᠢᠵᠠ ᠵᠠᠷᠤᠴᠠ ᠨᠠᠷ ᠢᠶᠠᠨ ᠵᠣᠳᠣᠵᠤ᠂ ᠠᠷᠢᠬᠢᠴᠢᠳ ᠲᠠᠢ ᠪᠠᠨ ᠢᠳᠡᠵᠦ ᠤᠤᠭᠤᠵᠤ ᠡᠬᠢᠯᠡᠭᠰᠡᠨ ᠭᠡᠵᠦ ᠪᠣᠳᠣᠶ᠎ᠠ᠃ 50 ᠲᠡᠷᠡ ᠵᠠᠷᠤᠴᠠ ᠶᠢᠨ ᠡᠵᠡᠨ ᠪᠣᠳᠣᠯᠭᠠᠨ ᠳᠤ ᠦᠭᠡᠢ ᠡᠳᠦᠷ᠂ ᠰᠠᠨᠠᠭᠠᠨ ᠳᠤ ᠦᠭᠡᠢ ᠴᠠᠭ ᠲᠤᠨᠢ ᠢᠷᠡᠭᠡᠳ᠂ 51 ᠲᠡᠭᠦᠨ ᠢ ᠨᠡᠪᠰᠢᠷᠡᠲᠡᠯ᠎ᠡ ᠵᠠᠨᠴᠢᠵᠤ᠂ ᠬᠣᠶᠠᠷ ᠨᠢᠭᠤᠷᠲᠠᠳ ᠲᠠᠢ ᠬᠠᠮᠲᠤ ᠪᠠᠢᠯᠭᠠᠨ᠎ᠠ᠃ ᠲᠡᠷᠡ ᠲᠡᠨᠳᠡ ᠤᠬᠢᠯᠠᠵᠤ᠂ ᠰᠢᠳᠦ ᠪᠡᠨ ᠬᠠᠪᠢᠷᠬᠤ ᠪᠣᠯᠣᠨ᠎ᠠ᠃