ᠮᠠᠲ᠋ᠠᠢ ᠬᠣᠷᠢ
ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠦᠨ ᠠᠵᠢᠯᠴᠢᠳ
1 ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠪᠣᠯ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠭ ᠳᠡᠭᠡᠨ ᠠᠵᠢᠯᠯᠠᠭᠤᠯᠬᠤ ᠬᠥᠮᠦᠰ ᠢ ᠬᠥᠯᠥᠰᠥᠯᠡᠬᠦ ᠪᠡᠷ ᠦᠷ ᠢᠶᠡᠷ ᠭᠠᠷᠤᠭᠰᠠᠨ ᠭᠠᠵᠠᠷ ᠤᠨ ᠡᠵᠡᠨ ᠲᠡᠢ ᠠᠳᠠᠯᠢ᠃ 2 ᠲᠡᠷᠡ ᠪᠡᠷ ᠡᠳᠦᠷ ᠦᠨ ᠨᠢᠭᠡ ᠳ᠋ᠧᠨᠠᠷ ᠥᠭᠬᠦ ᠪᠡᠷ ᠠᠵᠢᠯᠴᠢᠳ ᠲᠠᠢ ᠲᠣᠭᠲᠠᠵᠤ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠭ ᠳᠡᠭᠡᠨ ᠣᠷᠣᠭᠤᠯᠪᠠ᠃ 3 ᠶᠢᠰᠦᠨ ᠴᠠᠭ ᠤᠨ ᠣᠷᠴᠢᠮ ᠢᠶᠠᠷ ᠲᠡᠷᠡ ᠵᠡᠭᠡᠯᠢ ᠳᠡᠭᠡᠷᠡ ᠭᠠᠷᠴᠤ᠂ ᠢᠰᠡᠯᠡ ᠵᠣᠭᠰᠣᠵᠤ ᠪᠠᠢᠭᠠ ᠥᠭᠡᠷᠡ ᠬᠥᠮᠦᠰ ᠢ ᠬᠠᠷᠠᠭᠠᠳ 4 ᠲᠡᠳᠡᠨ ᠳᠦ᠄ 〈ᠲᠠ ᠨᠠᠷ ᠪᠠᠰᠠ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠭ ᠤᠷᠤᠭᠤ ᠶᠠᠪᠤ᠃ ᠪᠢ ᠲᠠ ᠨᠠᠷ ᠲᠤ ᠬᠡᠳᠦᠢ ᠪᠣᠯ ᠲᠡᠳᠦᠢ ᠪᠠᠷ ᠵᠣᠬᠢᠰᠲᠠᠢ ᠪᠠᠷ ᠨᠢ ᠥᠭᠭᠥᠨᠡ〉 ᠭᠡᠰᠡᠨ ᠳᠦ᠂ ᠲᠡᠳᠡ ᠣᠴᠢᠵᠠᠢ᠃ 5 ᠲᠡᠷᠡ ᠪᠡᠷ ᠠᠷᠪᠠᠨ ᠬᠣᠶᠠᠷ ᠴᠠᠭ ᠲᠤ᠂ ᠪᠠᠰᠠ ᠠᠷᠪᠠᠨ ᠲᠠᠪᠤᠨ ᠴᠠᠭ ᠤᠨ ᠣᠷᠴᠢᠮ ᠢᠶᠠᠷ ᠭᠠᠷᠴᠤ ᠡᠮᠦᠨᠡᠬᠢ ᠰᠢᠭ ᠢᠶᠠᠨ ᠦᠢᠯᠡᠳᠪᠡ᠃ 6 ᠠᠷᠪᠠᠨ ᠳᠣᠯᠣᠭᠠᠨ ᠴᠠᠭ ᠤᠨ ᠣᠷᠴᠢᠮ ᠢᠶᠠᠷ ᠭᠠᠷᠬᠤ ᠳᠠᠭᠠᠨ ᠴᠤ ᠳᠡᠮᠡᠢ ᠵᠣᠭᠰᠣᠵᠤ ᠪᠤᠢ ᠥᠭᠡᠷᠡ ᠬᠥᠮᠦᠰ ᠲᠡᠢ ᠲᠠᠭᠠᠷᠠᠯᠳᠤᠵᠤ᠄ 〈ᠲᠠ ᠨᠠᠷ ᠶᠠᠭᠤᠨ ᠳᠤ ᠡᠳᠦᠷᠵᠢᠨ ᠢᠰᠡᠯᠡ ᠵᠣᠭᠰᠣᠭᠠᠳ ᠪᠠᠢᠭᠠ ᠶᠤᠮ︖〉 ᠭᠡᠪᠡ᠃ 7 ᠲᠡᠳᠡ᠄ 〈ᠪᠢᠳᠡᠨ ᠢ ᠬᠡᠨ ᠴᠤ ᠬᠥᠯᠥᠰᠥᠯᠡᠭᠡ ᠦᠭᠡᠢ〉 ᠭᠡᠬᠦ ᠳᠦ᠂ ᠲᠡᠷᠡ᠄ 〈ᠲᠠ ᠨᠠᠷ ᠴᠤ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠭ ᠤᠷᠤᠭᠤ ᠶᠠᠪᠤ〉 ᠭᠡᠵᠡᠢ᠃ 8 ᠣᠷᠣᠢ ᠪᠣᠯᠬᠤ ᠳᠤ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠦᠨ ᠡᠵᠡᠨ ᠳᠠᠭᠠᠭᠠᠮᠠᠯ ᠳᠠᠭᠠᠨ᠄ 〈ᠠᠵᠢᠯᠴᠢᠳ ᠢ ᠳᠠᠭᠤᠳᠠᠵᠤ᠂ ᠰᠡᠭᠦᠯᠴᠢ ᠶᠢᠨ ᠬᠢ ᠡᠴᠡ ᠡᠬᠢᠯᠡᠨ ᠲᠦᠷᠦᠭᠦᠴᠢ ᠶᠢᠨ ᠬᠢ ᠬᠦᠷᠲᠡᠯᠡ ᠬᠥᠯᠥᠰᠥ ᠶᠢ ᠨᠢ ᠥᠭ〉 ᠭᠡᠵᠡᠢ᠃ 9 ᠠᠷᠪᠠᠨ ᠳᠣᠯᠣᠭᠠᠨ ᠴᠠᠭ ᠤᠨ ᠠᠵᠢᠯᠴᠢᠳ ᠭᠠᠷᠴᠤ ᠢᠷᠡᠭᠡᠳ ᠨᠢᠭᠡ ᠨᠢᠭᠡ ᠳ᠋ᠧᠨᠠᠷ ᠣᠯᠣᠭᠰᠠᠨ ᠳᠤ᠂ 10 ᠲᠦᠷᠦᠭᠦᠨ ᠳᠦ ᠢᠷᠡᠭᠰᠡᠨ ᠬᠥᠮᠦᠰ ᠨᠢ ᠥᠪᠡᠷᠰᠡᠳ ᠢ ᠪᠠᠨ ᠢᠯᠡᠭᠦᠦ ᠣᠯᠣᠨᠠ ᠪᠠᠢᠬᠠ ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠮᠥᠨ ᠯᠠ ᠨᠢᠭᠡ ᠨᠢᠭᠡ ᠳ᠋ᠧᠨᠠᠷ ᠣᠯᠵᠠᠢ᠃ 11 ᠲᠡᠳᠡ ᠠᠪᠤᠭᠰᠠᠨ ᠤ ᠳᠠᠷᠠᠭᠠ᠂ ᠭᠠᠵᠠᠷ ᠤᠨ ᠡᠵᠡᠨ ᠳᠦ᠄ 12 〈ᠰᠡᠭᠦᠯ ᠳᠦ ᠢᠷᠡᠭᠰᠡᠨ ᠡᠨᠡ ᠬᠥᠮᠦᠰ ᠨᠢᠭᠡ ᠯᠠ ᠴᠠᠭ ᠠᠵᠢᠯᠯᠠᠭᠰᠠᠨ ᠪᠠᠢᠬᠤ ᠳᠤ᠂ ᠡᠳᠦᠷᠵᠢᠨ ᠬᠠᠯᠠᠭᠤᠨ ᠨᠠᠷᠠᠨ ᠳᠤ ᠵᠦᠳᠡᠷᠡᠭᠰᠡᠨ ᠪᠢᠳᠡᠨ ᠢ ᠲᠡᠳᠡᠨ ᠲᠡᠢ ᠠᠳᠠᠯᠢ ᠦᠨᠡᠯᠡᠯᠡ〉 ᠭᠡᠵᠦ ᠭᠤᠩᠭᠢᠨᠠᠬᠤ ᠳᠤ᠂ 13 ᠭᠠᠵᠠᠷ ᠤᠨ ᠡᠵᠡᠨ ᠲᠡᠳᠡᠨ ᠦ ᠨᠢᠭᠡᠨ ᠳᠦ᠄ 〈ᠨᠠᠢᠵᠠ ᠡ᠂ ᠪᠢ ᠴᠢᠮᠠ ᠳᠤ ᠰᠢᠳᠤᠷᠭᠤ ᠪᠤᠰᠤ ᠬᠠᠨᠳᠤᠵᠤ ᠪᠠᠢᠭᠠ ᠪᠢᠰᠢ᠂ ᠴᠢ ᠨᠢᠭᠡ ᠳ᠋ᠧᠨᠠᠷ ᠢᠶᠠᠷ ᠨᠠᠳᠠ ᠲᠠᠢ ᠲᠣᠬᠢᠷᠠᠯᠴᠠᠭᠰᠠᠨ ᠪᠢᠰᠢ ᠤᠤ︖ 14 ᠬᠥᠯᠥᠰᠥ ᠪᠡᠨ ᠠᠪᠤᠭᠠᠳ ᠶᠠᠪᠤ᠂ ᠪᠢ ᠴᠢᠮᠠ ᠳᠤ ᠥᠭᠭᠥᠭᠰᠡᠨ ᠲᠡᠢ ᠠᠳᠠᠯᠢ ᠡᠨᠡ ᠰᠡᠭᠦᠯᠴᠢ ᠶᠢᠨ ᠬᠥᠮᠦᠰ ᠲᠦ ᠥᠭᠬᠦ ᠪᠡᠷ ᠪᠠᠢᠨᠠ᠃ 15 ᠪᠢ ᠥᠪᠡᠷ ᠦᠨ ᠶᠠᠭᠤᠮᠠ ᠪᠠᠨ ᠰᠠᠨᠠᠭᠠ ᠪᠠᠷ ᠢᠶᠠᠨ ᠵᠠᠷᠤᠵᠤ ᠪᠣᠯᠳᠠᠭ ᠦᠭᠡᠢ ᠶᠤᠮ ᠤᠤ︖ ᠨᠠᠮᠠᠶᠢ ᠥᠭᠭᠢᠶᠡᠮᠦᠷ ᠭᠡᠳ ᠠᠳᠠ ᠦᠵᠡᠵᠦ ᠪᠠᠢᠨᠠ ᠤᠤ︖ 16 ᠡᠢᠨ ᠬᠦ ᠰᠡᠭᠦᠯᠴᠢ ᠶᠢᠨ ᠬᠢᠨᠢ ᠲᠦᠷᠦᠭᠦᠨ ᠦ ᠬᠢ ᠪᠣᠯᠵᠤ᠂ ᠲᠦᠷᠦᠭᠦᠨ ᠦ ᠬᠢᠨᠢ ᠰᠡᠭᠦᠯᠴᠢ ᠶᠢᠨ ᠬᠢ ᠪᠣᠯᠣᠨᠠ》 ᠭᠡᠪᠡ᠃
ᠠᠯᠠᠭᠳᠠᠵᠤ ᠠᠮᠢᠯᠠᠬᠤ ᠲᠤᠬᠠᠢ ᠪᠠᠨ (2)
17 ᠢᠰᠦ᠋ᠰ ᠶᠧᠷᠦ᠋ᠰᠠᠯᠧᠮ ᠥᠭᠡᠳᠡ ᠶᠠᠪᠤᠵᠤ ᠪᠠᠢᠬᠤ ᠳᠠᠭᠠᠨ ᠠᠷᠪᠠᠨ ᠬᠣᠶᠠᠷ ᠱᠠᠪᠢ ᠪᠠᠨ ᠠᠰ ᠲᠤᠨᠢ ᠬᠠᠵᠠᠭᠤ ᠳᠠᠭᠠᠨ ᠠᠪᠴᠢᠷᠠᠵᠤ᠂ ᠵᠠᠮ ᠳᠠᠭᠠᠨ ᠲᠡᠳᠡᠨ ᠳᠦ᠄ 18 《ᠠᠩ᠋ᠬᠠᠷᠤᠭᠲᠤᠨ᠂ ᠪᠢᠳᠡ ᠶᠧᠷᠦ᠋ᠰᠠᠯᠧᠮ ᠥᠭᠡᠳᠡ ᠶᠠᠪᠤᠵᠤ ᠪᠠᠢᠨᠠ᠃ ᠬᠥᠮᠦᠨ ᠦ ᠬᠦᠦ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ᠂ ᠪᠢᠴᠢᠭᠲᠡᠳ ᠲᠦ ᠲᠤᠰᠢᠶᠠᠭᠳᠠᠨᠠ᠃ ᠲᠡᠳᠡ ᠲᠡᠭᠦᠨ ᠢ ᠠᠯᠠᠬᠤ ᠪᠠᠷ ᠶᠠᠯᠠᠯᠠᠵᠤ᠂ 19 ᠬᠠᠷᠢᠴᠤᠳ ᠲᠤ ᠲᠤᠰᠢᠶᠠᠨ ᠳᠣᠭᠣᠭᠢᠯᠠᠭᠤᠯᠵᠤ᠂ ᠲᠠᠰᠢᠭᠤᠷᠳᠠᠭᠤᠯᠵᠤ᠂ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠭᠤᠯᠬᠤ ᠪᠣᠯᠣᠨᠠ᠃ ᠬᠠᠷᠢᠨ ᠲᠡᠷᠡ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠳᠡᠭᠡᠷᠡ ᠪᠡᠨ ᠠᠮᠢᠯᠠᠬᠤ ᠪᠣᠯᠣᠨᠠ》 ᠭᠡᠯᠡ᠃
ᠡᠷᠬᠡ ᠮᠡᠳᠡᠯ ᠭᠤᠶᠤᠭᠴᠢ
20 ᠲᠡᠷᠡ ᠦᠶᠡ ᠳᠦ᠂ ᠽᠧᠪᠧᠳᠠᠢ ᠶᠢᠨ ᠬᠥᠪᠡᠭᠦᠳ ᠦᠨ ᠡᠬᠡ ᠬᠥᠪᠡᠭᠦᠳ ᠦᠨ ᠢᠶᠠᠨ ᠬᠠᠮᠲᠤ ᠢᠰᠦ᠋ᠰ ᠤᠨ ᠳᠡᠷᠭᠡᠳᠡ ᠢᠷᠡᠭᠡᠳ ᠡᠮᠦᠨᠡ ᠨᠢ ᠰᠥᠭᠥᠳᠴᠦ᠂ ᠶᠠᠭᠤ ᠨᠢᠭᠡ ᠶᠢ ᠭᠤᠶᠤᠵᠤ ᠡᠬᠢᠯᠡᠪᠡ᠃ 21 ᠢᠰᠦ᠋ᠰ᠄ 《ᠶᠠᠭᠤ ᠬᠦᠰᠡᠵᠦ ᠪᠠᠢᠨᠠ ᠪᠤᠢ︖》 ᠭᠡᠬᠦ ᠳᠦ᠂ ᠲᠡᠷᠡ᠄ 《ᠲᠠ ᠥᠪᠡᠷ ᠦᠨ ᠢᠶᠠᠨ ᠬᠠᠭᠠᠨᠴᠢᠯᠠᠯ ᠳᠤ ᠬᠣᠶᠠᠷ ᠬᠦᠦ ᠶᠢᠨ ᠮᠢᠨᠢ ᠨᠢᠭᠡ ᠶᠢ ᠨᠢ ᠪᠠᠷᠠᠭᠤᠨ ᠲᠠᠯᠠ ᠳᠠᠭᠠᠨ᠂ ᠨᠥᠭᠥᠭᠡ ᠶᠢ ᠨᠢ ᠵᠡᠭᠦᠨ ᠲᠠᠯᠠ ᠳᠠᠭᠠᠨ ᠰᠠᠭᠤᠯᠭᠠᠵᠤ ᠰᠣᠶᠣᠷᠬᠠᠭᠠᠴᠢ》 ᠭᠡᠪᠡ᠃ 22 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠲᠠ ᠨᠠᠷ ᠶᠠᠭᠤ ᠭᠤᠶᠤᠵᠤ ᠪᠠᠢᠭᠠ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠲᠠ ᠨᠠᠷ ᠮᠢᠨᠦ ᠤᠤᠭᠤᠬᠤ ᠭᠡᠵᠦ ᠪᠠᠢᠭᠠ ᠴᠣᠮᠣ ᠠᠴᠠ ᠤᠤᠭᠤᠵᠤ ᠴᠢᠳᠠᠬᠤ ᠤᠤ︖》 ᠭᠡᠰᠡᠨ ᠳᠦ᠂ ᠲᠡᠳᠡ᠄ 《ᠴᠢᠳᠠᠨᠠ》 ᠭᠡᠵᠡᠭᠡᠪᠡ᠃ 23 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠨᠡᠭᠡᠷᠡᠨ ᠮᠢᠨᠦ ᠴᠣᠮᠣ ᠠᠴᠠ ᠤᠤᠭᠤᠨᠠ᠃ ᠬᠠᠷᠢᠨ ᠮᠢᠨᠦ ᠪᠠᠷᠠᠭᠤᠨ ᠵᠡᠭᠦᠨ ᠲᠠᠯᠠ ᠳᠤ ᠰᠠᠭᠤᠬᠤ ᠶᠢ ᠰᠣᠶᠣᠷᠬᠠᠬᠤ ᠨᠢ ᠪᠢ ᠪᠢᠰᠢ᠂ ᠮᠢᠨᠦ ᠡᠴᠢᠭᠡ ᠬᠡᠨ ᠳᠦ ᠪᠡᠯᠡᠳᠬᠡᠭᠰᠡᠨ ᠪᠣᠯ ᠲᠡᠷᠡ ᠰᠠᠭᠤᠨᠠ》 ᠭᠡᠵᠡᠢ᠃ 24 ᠠᠷᠪᠠᠨ ᠱᠠᠪᠢ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠲᠡᠷᠡ ᠠᠬᠠ ᠳᠡᠭᠦᠦ ᠬᠣᠶᠠᠷ ᠲᠤ ᠠᠭᠤᠷᠯᠠᠪᠠ᠃ 25 ᠬᠠᠷᠢᠨ ᠢᠰᠦ᠋ᠰ ᠲᠡᠳᠡᠨ ᠢ ᠬᠠᠵᠠᠭᠤ ᠳᠠᠭᠠᠨ ᠳᠠᠭᠤᠳᠠᠵᠤ᠄ 《ᠬᠠᠷᠢᠴᠤᠳ ᠤᠨ ᠵᠠᠬᠢᠷᠤᠭᠴᠢᠳ ᠠᠷᠠᠳ ᠣᠯᠠᠨ ᠢᠶᠠᠨ ᠨᠣᠶᠠᠷᠬᠠᠳᠠᠭ ᠪᠥᠭᠡᠳ ᠶᠡᠬᠡ ᠲᠦᠰᠢᠮᠡᠳ ᠨᠢ ᠲᠡᠳᠡᠨ ᠢ ᠡᠷᠬᠡᠰᠢᠶᠡᠳᠡᠭ ᠢ ᠲᠠ ᠨᠠᠷ ᠮᠡᠳᠡᠨᠡ᠃ 26 ᠲᠠ ᠨᠠᠷ ᠤᠨ ᠳᠤᠮᠳᠠ ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ᠃ ᠬᠠᠷᠢᠨ ᠲᠠ ᠨᠠᠷ ᠤᠨ ᠳᠤᠮᠳᠠ ᠠᠭᠤᠤ ᠪᠣᠯᠬᠤ ᠶᠢ ᠬᠦᠰᠡᠭᠴᠢ ᠨᠢ ᠦᠢᠯᠡᠴᠢᠯᠡᠭᠴᠢ ᠪᠣᠯᠵᠤ᠂ 27 ᠲᠠ ᠨᠠᠷ ᠤᠨ ᠳᠤᠮᠳᠠ ᠲᠡᠷᠢᠭᠦᠨ ᠪᠣᠯᠬᠤ ᠶᠢ ᠬᠦᠰᠡᠭᠴᠢ ᠨᠢ ᠵᠠᠷᠤᠴᠠ ᠴᠢᠨᠢ ᠪᠣᠯᠣᠭ᠃ 28 ᠬᠥᠮᠦᠨ ᠦ ᠬᠦᠦ ᠴᠤ ᠦᠢᠯᠡᠴᠢᠯᠡᠭᠦᠯᠬᠦ ᠪᠡᠷ ᠪᠤᠰᠤ᠂ ᠬᠠᠷᠢᠨ ᠦᠢᠯᠡᠴᠢᠯᠡᠬᠦ ᠪᠡᠷ᠂ ᠠᠮᠢ ᠪᠠᠨ ᠣᠯᠠᠨ ᠤ ᠲᠥᠯᠥᠭᠡ ᠵᠣᠯᠢᠶᠠᠰᠤ ᠪᠣᠯᠭᠠᠨ ᠥᠭᠬᠦ ᠪᠡᠷ ᠢᠷᠡᠭᠰᠡᠨ ᠶᠤᠮ》 ᠭᠡᠪᠡ᠃
ᠬᠠᠷᠠᠭᠠ ᠣᠷᠣᠭᠰᠠᠨ ᠬᠣᠶᠠᠷ
29 ᠲᠡᠳᠡ ᠶᠧᠷᠢᠺᠣ ᠠᠴᠠ ᠭᠠᠷᠴᠤ ᠶᠠᠪᠤᠬᠤ ᠳᠤ᠂ ᠮᠠᠰᠢ ᠣᠯᠠᠨ ᠬᠥᠮᠦᠨ ᠢᠰᠦ᠋ᠰ ᠢ ᠳᠠᠭᠠᠵᠠᠢ᠃ 30 ᠵᠠᠮ ᠤᠨ ᠬᠠᠵᠠᠭᠤ ᠳᠤ ᠰᠠᠭᠤᠵᠤ ᠪᠠᠢᠭᠰᠠᠨ ᠬᠣᠶᠠᠷ ᠰᠣᠬᠣᠷ ᠬᠥᠮᠦᠨ ᠳᠡᠷᠭᠡᠳᠡᠭᠦᠷ ᠨᠢ ᠢᠰᠦ᠋ᠰ ᠤᠨ ᠥᠩᠭᠡᠷᠡᠵᠦ ᠪᠤᠢ ᠶᠢ ᠰᠣᠨᠣᠰᠣᠭᠠᠳ ᠥᠨᠳᠥᠷ ᠳᠠᠭᠤ ᠪᠠᠷ᠄ 《ᠳ᠋ᠠᠸᠢᠳ᠋ ᠤᠨ ᠤᠳᠤᠮ᠂ ᠡᠵᠡᠨ ᠮᠢᠨᠢ ᠡ︕ ᠪᠢᠳᠡᠨ ᠢ ᠡᠨᠡᠷᠢᠭᠡᠴᠢ》 ᠭᠡᠪᠡ᠃ 31 ᠣᠯᠠᠨ ᠬᠥᠮᠦᠨ ᠲᠡᠳᠡᠨ ᠢ᠄ 《ᠳᠠᠭᠤ ᠦᠭᠡᠢ ᠪᠠᠢ》 ᠭᠡᠵᠦ ᠵᠠᠩᠨᠠᠭᠰᠠᠨ ᠪᠣᠯᠪᠠᠴᠤ ᠲᠡᠳᠡ ᠤᠯᠠᠮ ᠴᠢᠩᠭ᠍ᠠ ᠪᠠᠷ᠄ 《ᠳ᠋ᠠᠸᠢᠳ᠋ ᠤᠨ ᠤᠳᠤᠮ᠂ ᠡᠵᠡᠨ ᠮᠢᠨᠢ ᠡ︕ ᠪᠢᠳᠡᠨ ᠢ ᠡᠨᠡᠷᠢᠭᠡᠴᠢ》 ᠭᠡᠵᠦ ᠬᠠᠰᠬᠢᠷᠪᠠ᠃ 32 ᠢᠰᠦ᠋ᠰ ᠬᠦᠯᠢᠶᠡᠰᠬᠢᠵᠦ ᠲᠡᠳᠡᠨ ᠢ ᠳᠠᠭᠤᠳᠠᠭᠠᠳ᠄ 《ᠲᠠ ᠨᠠᠷ ᠨᠠᠳᠠ ᠪᠠᠷ ᠶᠠᠭᠤ ᠬᠢᠯᠭᠡᠬᠦ ᠶᠢ ᠬᠦᠰᠡᠵᠦ ᠪᠠᠢᠨᠠ ᠪᠤᠢ︖》 ᠭᠡᠬᠦ ᠳᠦ᠂ 33 ᠲᠡᠳᠡ᠄ 《ᠡᠵᠡᠨ ᠡ᠂ ᠪᠢᠳᠡ ᠬᠠᠷᠠᠭᠠ ᠲᠠᠢ ᠪᠣᠯᠬᠤ ᠶᠤᠮ ᠰᠠᠨ》 ᠭᠡᠪᠡ᠃ 34 ᠢᠰᠦ᠋ᠰ ᠲᠡᠳᠡᠨ ᠢ ᠥᠷᠥᠪᠳᠥᠵᠦ᠂ ᠨᠢᠳᠦᠨ ᠳᠦᠨᠢ ᠭᠠᠷ ᠢᠶᠠᠨ ᠬᠦᠷᠭᠡᠮᠡᠭᠴᠡ ᠲᠡᠳᠡ ᠬᠠᠷᠠᠭᠠ ᠣᠷᠣᠵᠤ ᠲᠡᠭᠦᠨ ᠢ ᠳᠠᠭᠠᠯᠠ᠃