ᠮᠠᠲ᠋ᠠᠢ ᠬᠣᠷᠢᠨ ᠨᠢᠭᠡ
ᠶᠧᠷᠦ᠋ᠰᠠᠯᠧᠮ ᠬᠣᠲᠠ ᠳᠤ ᠣᠷᠣᠭᠰᠠᠨ ᠨᠢ
1 ᠲᠡᠳᠡ ᠶᠧᠷᠦ᠋ᠰᠠᠯᠧᠮ ᠳᠤ ᠣᠢᠷᠠᠲᠤᠵᠤ᠂ ᠴᠢᠳᠦᠨ ᠠᠭᠤᠯᠠ ᠶᠢᠨ ᠪᠡᠯ ᠳᠠᠬᠢ ᠪᠧᠲ᠋ᠹᠠᠭᠧ ᠳᠤ ᠬᠦᠷᠪᠡ᠃ ᠲᠡᠷᠡ ᠦᠶᠡ ᠳᠦ ᠢᠰᠦ᠋ᠰ ᠬᠣᠶᠠᠷ ᠱᠠᠪᠢ ᠪᠠᠨ ᠶᠠᠪᠤᠭᠤᠯᠬᠤ ᠳᠠᠭᠠᠨ᠄ 2 《ᠡᠰᠡᠷᠭᠦ ᠲᠠᠯᠠ ᠶᠢᠨ ᠲᠣᠰᠬᠣᠨ ᠳᠤ ᠣᠴᠢ᠂ ᠲᠡᠨᠳᠡ ᠤᠶᠠᠭᠠᠲᠠᠢ ᠡᠯᠵᠢᠭᠡ ᠪᠠ ᠬᠠᠮᠲᠤ ᠪᠠᠢᠭᠠ ᠳᠠᠭᠠ ᠶᠢ ᠲᠦᠳᠡᠬᠡᠨ ᠬᠠᠷᠠᠬᠤ ᠪᠣᠯᠣᠨᠠ᠃ ᠲᠠ ᠨᠠᠷ ᠲᠠᠢᠯᠤᠭᠠᠳ ᠨᠠᠳᠠ ᠤᠷᠤᠭᠤ ᠠᠪᠴᠢᠷᠠ᠃ 3 ᠬᠡᠨ ᠨᠢᠭᠡ ᠨᠢ ᠲᠠ ᠨᠠᠷ ᠲᠤ ᠶᠠᠭᠤᠮᠠ ᠬᠡᠯᠡᠪᠡᠯ᠂ 〈ᠡᠵᠡᠨ ᠳᠦ ᠬᠡᠷᠡᠭ ᠲᠡᠢ〉 ᠭᠡᠵᠦ ᠬᠡᠯᠡᠭᠡᠷᠡᠢ᠃ ᠲᠡᠭᠡᠪᠡᠯ ᠲᠡᠷᠡ ᠬᠥᠮᠦᠨ ᠳᠠᠷᠤᠢᠬᠠᠨ ᠶᠠᠪᠤᠭᠤᠯᠤᠨᠠ》 ᠭᠡᠵᠡᠢ᠃ 4 ᠡᠢᠨ ᠬᠦ ᠡᠰᠢ ᠦᠵᠡᠭᠦᠯᠦᠭᠴᠢ ᠪᠠᠷ᠂ 5 《ᠽᠢᠶᠣᠨ ᠥᠬᠢᠨ ᠳᠤ ᠬᠡᠯᠡᠭᠡᠴᠢ᠄ 〈ᠬᠠᠷᠠ᠂ ᠳᠥᠯᠭᠡᠨ ᠬᠠᠭᠠᠨ ᠴᠢᠨᠢ ᠡᠯᠵᠢᠭᠡᠨ ᠳᠡᠭᠡᠷᠡ᠂ ᠡᠯᠵᠢᠭᠡᠨ ᠳᠠᠭᠠ ᠶᠢᠨ ᠳᠡᠭᠡᠷᠡ ᠤᠨᠤᠵᠤ ᠴᠢᠮᠠ ᠤᠷᠤᠭᠤ ᠠᠢᠰᠤᠢ〉》 ᠭᠡᠵᠦ ᠬᠡᠯᠡᠭᠦᠯᠦᠭᠰᠡᠨ ᠨᠢ ᠪᠡᠶᠡᠯᠡᠭᠳᠡᠵᠡᠢ᠃ 6 ᠱᠠᠪᠢ ᠨᠠᠷ ᠨᠢ ᠶᠠᠪᠤᠵᠤ ᠢᠰᠦ᠋ᠰ ᠤᠨ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠬᠢᠪᠡ᠃ 7 ᠲᠡᠳᠡ ᠡᠯᠵᠢᠭᠡ ᠶᠢ ᠳᠠᠭᠠ ᠲᠠᠢ ᠨᠢ ᠠᠪᠴᠢᠷᠠᠵᠤ ᠬᠤᠪᠴᠠᠰᠤ ᠪᠠᠨ ᠲᠣᠬᠣᠬᠤ ᠳᠤ᠂ ᠢᠰᠦ᠋ᠰ ᠤᠨᠤᠯᠠ᠃ 8 ᠦᠢ ᠲᠦᠮᠡᠨ ᠬᠥᠮᠦᠨ ᠵᠠᠮ ᠳᠡᠭᠡᠷᠡ ᠬᠤᠪᠴᠠᠰᠤ ᠪᠠᠨ ᠳᠡᠪᠢᠰᠦᠭᠰᠡᠨ ᠪᠥᠭᠡᠳ ᠵᠠᠷᠢᠮ ᠨᠢ ᠮᠣᠳᠣᠨ ᠤ ᠮᠥᠴᠢᠷ ᠣᠭᠲᠣᠯᠣᠨ ᠵᠠᠮ ᠳᠡᠭᠡᠷᠡ ᠳᠡᠪᠢᠰᠴᠦ ᠪᠠᠢᠯᠠ᠃ 9 ᠡᠮᠦᠨᠡ ᠬᠣᠢᠨᠠ ᠨᠢ ᠶᠠᠪᠤᠭᠠ ᠣᠯᠠᠨ ᠬᠥᠮᠦᠨ ᠴᠢᠩᠭ᠍ᠠ ᠳᠠᠭᠤ ᠪᠠᠷ᠄ 《ᠳ᠋ᠠᠸᠢᠳ᠋ ᠤᠨ ᠤᠳᠤᠮ ᠳᠤ ᠬᠣᠰᠠᠨᠨᠠ 35 ︕ ᠡᠵᠡᠨ ᠦ ᠨᠡᠷᠡ ᠪᠡᠷ ᠢᠷᠡᠭᠴᠢ ᠢᠷᠥᠭᠡᠯ ᠲᠡᠢ ᠡ 36 ︕ ᠳᠡᠭᠡᠳᠦ ᠶᠢᠨ ᠳᠡᠭᠡᠳᠦ ᠳᠦ ᠬᠣᠰᠠᠨᠨᠠ 37 ︕》 ᠭᠡᠵᠦ ᠪᠠᠢᠯᠠ᠃ 10 ᠢᠰᠦ᠋ᠰ ᠶᠧᠷᠦ᠋ᠰᠠᠯᠧᠮ ᠳᠤ ᠣᠷᠣᠭᠰᠠᠨ ᠳᠤ᠂ ᠪᠦᠬᠦ ᠬᠣᠲᠠ ᠪᠠᠷ ᠢᠶᠠᠨ ᠦᠢᠮᠡᠯᠳᠦᠭᠰᠡᠨ ᠪᠥᠭᠡᠳ 《ᠡᠨᠡ ᠬᠡᠨ ᠪᠢᠯᠡ︖》 ᠭᠡᠵᠡᠭᠡᠬᠦ ᠳᠦ᠂ 11 ᠬᠤᠷᠠᠭᠰᠠᠨ ᠣᠯᠠᠨ᠄ 《ᠡᠨᠡ ᠴᠢᠨᠢ ᠭᠠᠯᠢᠯᠠᠶᠠ ᠳᠠᠬᠢ ᠨᠠᠽᠠᠷᠧᠲ ᠤᠨ ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠦ᠋ᠰ ᠪᠠᠢᠨᠠ》 ᠭᠡᠯᠴᠡᠪᠡ᠃
ᠠᠷᠢᠭᠤᠨ ᠣᠷᠳᠣᠨ ᠠᠴᠠ ᠬᠤᠳᠠᠯᠳᠤᠭᠠᠴᠢᠳ ᠢ ᠬᠥᠭᠡᠭᠡᠭᠰᠡᠨ ᠨᠢ
12 ᠢᠰᠦ᠋ᠰ ᠠᠷᠢᠭᠤᠨ ᠣᠷᠳᠣᠨ ᠤ ᠬᠦᠷᠢᠶᠡᠨ ᠳᠦ ᠣᠷᠣᠭᠠᠳ᠂ ᠲᠡᠨᠳᠡ ᠪᠠᠢᠭᠰᠠᠨ ᠬᠤᠳᠠᠯᠳᠤᠭᠴᠢᠳ ᠪᠣᠯᠣᠨ ᠬᠤᠳᠠᠯᠳᠤᠨ ᠠᠪᠤᠭᠴᠢᠳ ᠢ ᠴᠥᠮ ᠢ ᠨᠢ ᠬᠥᠭᠡᠭᠡᠵᠦ᠂ ᠵᠣᠭᠣᠰ ᠰᠣᠯᠢᠭᠴᠢᠳ ᠤᠨ ᠰᠢᠷᠡᠭᠡ᠂ ᠲᠠᠭᠲᠠᠭᠠ ᠬᠤᠳᠠᠯᠳᠤᠭᠴᠢᠳ ᠤᠨ ᠰᠠᠨᠳᠠᠯᠢ ᠶᠢ ᠬᠥᠮᠥᠷᠢᠵᠦ ᠣᠷᠬᠢᠪᠠ᠃ 13 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《〈ᠮᠢᠨᠦ ᠥᠷᠭᠥᠭᠡ ᠳᠠᠭᠠᠳᠬᠠᠯ ᠤᠨ ᠥᠷᠭᠥᠭᠡ ᠭᠡᠵᠦ ᠨᠡᠷᠡᠯᠡᠭᠳᠡᠨᠡ〉 ᠬᠡᠮᠡᠨ ᠪᠢᠴᠢᠭᠳᠡᠭᠰᠡᠨ ᠠᠲᠠᠯᠠ᠂ ᠲᠠ ᠨᠠᠷ ᠡᠭᠦᠨ ᠢ ᠳᠡᠭᠡᠷᠡᠮᠴᠢᠳ ᠤᠨ ᠡᠭᠦᠷ ᠪᠣᠯᠭᠠᠵᠤ ᠪᠠᠢᠨᠠ》 ᠭᠡᠯᠡ᠃
14 ᠠᠷᠢᠭᠤᠨ ᠣᠷᠳᠣᠨ ᠳᠤ ᠪᠠᠢᠬᠤ ᠳᠤᠨᠢ ᠰᠣᠬᠣᠷ᠂ ᠳᠣᠭᠣᠯᠠᠩ ᠬᠥᠮᠦᠰ ᠢᠷᠡᠪᠡ᠃ ᠢᠰᠦ᠋ᠰ ᠲᠡᠳᠡᠨ ᠢ ᠡᠳᠡᠭᠡᠭᠡᠵᠡᠢ᠃ 15 ᠬᠠᠷᠢᠨ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠪᠠ ᠪᠢᠴᠢᠭᠲᠡᠳ ᠢᠰᠦ᠋ᠰ ᠤᠨ ᠦᠢᠯᠡᠳᠦᠭᠰᠡᠨ ᠭᠠᠢᠬᠠᠮᠰᠢᠭᠲᠤ ᠵᠦᠢᠯᠡᠰ ᠪᠣᠯᠣᠨ ᠣᠷᠳᠣᠨ ᠤ ᠬᠦᠷᠢᠶᠡᠨ ᠳᠦ 《ᠳ᠋ᠠᠸᠢᠳ᠋ ᠤᠨ ᠤᠳᠤᠮ ᠳᠤ ᠬᠣᠰᠠᠨᠨᠠ︕》 ᠭᠡᠵᠦ ᠬᠠᠰᠬᠢᠷᠤᠯᠳᠤᠵᠤ ᠪᠤᠢ ᠬᠡᠦᠬᠡᠳ ᠤᠳ ᠢ ᠬᠠᠷᠠᠭᠠᠳ ᠠᠭᠤᠷᠯᠠᠵᠤ᠂ 16 ᠢᠰᠦ᠋ᠰ ᠲᠤ 《ᠲᠡᠳᠡᠨ ᠦ ᠶᠠᠭᠤ ᠭᠡᠵᠡᠭᠡᠵᠦ ᠪᠠᠢᠭᠠ ᠶᠢ ᠰᠣᠨᠣᠰᠴᠤ ᠪᠠᠢᠨᠠ ᠤᠤ︖》 ᠬᠡᠮᠡᠬᠦ ᠳᠦ᠂ ᠢᠰᠦ᠋ᠰ᠄ 《ᠲᠡᠢᠮᠦ ᠡ᠂ 〈ᠲᠠ ᠪᠠᠯᠴᠢᠷ᠂ ᠬᠥᠬᠥᠭᠦᠯ ᠬᠡᠦᠬᠡᠳ ᠤᠳ ᠤᠨ ᠠᠮᠠ ᠪᠠᠷ ᠮᠠᠭᠲᠠᠭᠠᠯ ᠢ ᠲᠡᠭᠦᠯᠳᠡᠷᠵᠢᠭᠦᠯᠦᠭᠰᠡᠨ〉 ᠭᠡᠰᠡᠨ ᠢ ᠲᠠ ᠨᠠᠷ ᠬᠠᠷᠠᠬᠠᠨ ᠤᠩ᠋ᠰᠢᠭᠠ ᠦᠭᠡᠢ ᠶᠤᠮ ᠤᠤ︖》 ᠭᠡᠪᠡ᠃ 17 ᠢᠰᠦ᠋ᠰ ᠲᠡᠳᠡᠨ ᠢ ᠣᠷᠬᠢᠨ ᠬᠣᠲᠠ ᠠᠴᠠ ᠭᠠᠷᠴᠤ᠂ ᠪᠧᠲ᠋ᠠᠨᠢᠶᠠ ᠳᠤ ᠣᠴᠢᠭᠠᠳ ᠲᠡᠨᠳᠡ ᠪᠡᠨ ᠬᠣᠨᠣᠭᠯᠠᠪᠠ᠃
ᠦᠷᠡ ᠵᠢᠮᠢᠰ ᠦᠭᠡᠢ ᠮᠣᠳᠣ
18 ᠢᠰᠦ᠋ᠰ ᠦᠷ ᠢᠶᠡᠷ ᠬᠣᠲᠠ ᠤᠷᠤᠭᠤ ᠪᠤᠴᠠᠬᠤ ᠳᠠᠭᠠᠨ ᠥᠯᠥᠰᠴᠦ ᠪᠠᠢᠯᠠ᠃ 19 ᠲᠡᠷᠡ ᠵᠠᠮ ᠤᠨ ᠬᠠᠵᠠᠭᠤ ᠳᠠᠬᠢ ᠨᠢᠭᠡ ᠢᠨᠵᠢᠷ ᠤᠨ ᠮᠣᠳᠣ ᠶᠢ ᠬᠠᠷᠠᠭᠠᠳ ᠲᠡᠰᠢ ᠣᠴᠢᠭᠰᠠᠨ ᠪᠣᠯᠪᠠᠴᠤ ᠨᠠᠪᠴᠢᠨ ᠠᠴᠠ ᠥᠭᠡᠷᠡ ᠶᠠᠭᠤ ᠴᠤ ᠣᠯᠣᠭᠰᠠᠨ ᠦᠭᠡᠢ᠃ ᠢᠰᠦ᠋ᠰ ᠲᠡᠷᠡ ᠮᠣᠳᠣᠨ ᠳᠤ᠄ 《ᠡᠭᠦᠨ ᠡᠴᠡ ᠬᠣᠢᠰᠢ ᠥᠨᠢ ᠮᠥᠩᠬᠡᠳᠡ ᠴᠢᠮᠠ ᠳᠤ ᠵᠢᠮᠢᠰ ᠦᠯᠦ ᠰᠠᠭᠤᠬᠤ ᠪᠣᠯᠲᠤᠭᠠᠢ︕》 ᠭᠡᠬᠦ ᠳᠦ᠂ ᠢᠨᠵᠢᠷ ᠤᠨ ᠮᠣᠳᠣ ᠳᠣᠣᠷᠠ ᠪᠠᠨ ᠬᠠᠲᠠᠵᠠᠢ᠃ 20 ᠱᠠᠪᠢ ᠨᠠᠷ ᠨᠢ ᠡᠭᠦᠨ ᠢ ᠬᠠᠷᠠᠭᠠᠳ ᠭᠠᠢᠬᠠᠵᠤ᠄ 《ᠢᠨᠵᠢᠷ ᠤᠨ ᠮᠣᠳᠣ ᠶᠠᠭᠠᠬᠢᠭᠠᠳ ᠳᠣᠣᠷᠠ ᠪᠠᠨ ᠬᠠᠲᠠᠴᠢᠬᠠᠪᠠ︖》 ᠭᠡᠵᠡᠭᠡᠪᠡ᠃ 21 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠂ ᠬᠡᠷᠪᠡ ᠲᠠ ᠨᠠᠷ ᠢᠲᠡᠭᠡᠯ ᠲᠡᠢ᠂ ᠡᠷᠡᠭᠡᠯᠵᠡᠯ ᠦᠭᠡᠢ ᠪᠠᠢᠪᠠᠯ ᠢᠨᠵᠢᠷ ᠤᠨ ᠮᠣᠳᠣᠨ ᠳᠤ ᠦᠢᠯᠡᠳᠦᠭᠰᠡᠨ ᠢ ᠮᠢᠨᠢ ᠦᠢᠯᠡᠳᠬᠦ ᠪᠡᠷ ᠪᠠᠷᠠᠬᠤ ᠦᠭᠡᠢ᠂ ᠡᠨᠡ ᠠᠭᠤᠯᠠᠨ ᠳᠤ 〈ᠡ᠊ᠨᠳᠡ ᠡᠴᠡ ᠨᠡᠭᠦᠵᠦ᠂ ᠳᠠᠯᠠᠢ ᠳᠤ ᠬᠠᠶᠠᠭᠳᠠ〉 ᠭᠡᠰᠡᠨ ᠴᠤ ᠲᠡᠢᠨ ᠬᠦ ᠪᠡᠶᠡᠯᠡᠭᠳᠡᠬᠦ ᠪᠣᠯᠣᠨᠠ᠃ 22 ᠲᠠ ᠨᠠᠷ ᠢᠲᠡᠭᠡᠪᠡᠯ᠂ ᠶᠠᠭᠤ ᠳᠠᠭᠠᠳᠬᠠᠵᠤ ᠭᠤᠶᠤᠭᠰᠠᠨ ᠴᠤ ᠪᠦᠬᠦᠨ ᠢ ᠣᠯᠬᠤ ᠪᠣᠯᠣᠨᠠ》 ᠭᠡᠪᠡ᠃
ᠢᠰᠦ᠋ᠰ ᠤᠨ ᠡᠷᠬᠡ
23 ᠢᠰᠦ᠋ᠰ ᠠᠷᠢᠭᠤᠨ ᠣᠷᠳᠣᠨ ᠳᠤ ᠣᠷᠣᠭᠠᠳ ᠰᠤᠷᠭᠠᠯ ᠵᠢᠭᠠᠵᠤ ᠪᠠᠢᠲᠠᠯᠠ᠂ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠬᠢᠭᠡᠳ ᠠᠷᠠᠳ ᠤᠨ ᠠᠬᠠᠯᠠᠭᠴᠢᠳ ᠢᠷᠡᠵᠦ ᠲᠡᠭᠦᠨ ᠳᠦ᠄ 《ᠴᠢ ᠶᠠᠮᠠᠷ ᠡᠷᠬᠡ ᠪᠡᠷ ᠡᠳᠡᠭᠡᠷ ᠢ ᠦᠢᠯᠡᠳᠴᠦ ᠪᠠᠢᠨᠠ ᠪᠤᠢ︖ ᠬᠡᠨ ᠴᠢᠮᠠ ᠳᠤ ᠡᠨᠡ ᠡᠷᠬᠡ ᠶᠢ ᠥᠭᠭᠥᠭᠰᠡᠨ ᠪᠤᠢ︖》 ᠭᠡᠬᠦ ᠳᠦ᠂ 24 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠪᠢ ᠴᠤ ᠲᠠ ᠨᠠᠷ ᠠᠴᠠ ᠨᠢᠭᠡ ᠶᠠᠭᠤᠮᠠ ᠠᠰᠠᠭᠤᠶᠠ᠃ ᠲᠠ ᠨᠠᠷ ᠨᠠᠳᠠ ᠳᠤ ᠬᠠᠷᠢᠭᠤᠯᠪᠠᠯ᠂ ᠪᠢ ᠶᠠᠮᠠᠷ ᠡᠷᠬᠡ ᠪᠡᠷ ᠡᠳᠡᠭᠡᠷ ᠢ ᠦᠢᠯᠡᠳᠴᠦ ᠪᠠᠢᠭᠠ ᠪᠠᠨ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠃ 25 ᠶᠣᠬᠠᠨ ᠤ ᠤᠬᠢᠶᠠᠯ ᠬᠠᠮᠢᠭᠠ ᠠᠴᠠ ᠢᠷᠡᠭᠰᠡᠨ ᠪᠤᠢ︖ ᠲᠩᠷᠢ ᠡᠴᠡ ᠤᠤ︖ ᠡᠰᠡᠪᠡᠯ ᠬᠥᠮᠦᠨ ᠡᠴᠡ ᠤᠤ︖》 ᠭᠡᠯᠡ᠃ ᠲᠡᠳᠡ ᠬᠣᠭᠣᠷᠣᠨᠳᠣ ᠪᠠᠨ ᠵᠥᠪᠳᠡᠵᠦ᠄ 《ᠬᠡᠷᠪᠡ ᠪᠢᠳᠡ᠄ 〈ᠲᠩᠷᠢ ᠡᠴᠡ〉 ᠭᠡᠪᠡᠯ᠂ ᠲᠡᠷᠡ᠄ 〈ᠲᠡᠭᠡᠪᠡᠯ ᠲᠠ ᠨᠠᠷ ᠶᠠᠭᠠᠬᠢᠭᠠᠳ ᠲᠡᠭᠦᠨ ᠳᠦ ᠢᠲᠡᠭᠡᠭᠰᠡᠨ ᠦᠭᠡᠢ ᠪᠤᠢ︖〉 ᠭᠡᠨᠡ ᠳᠠ᠃ 26 〈ᠬᠥᠮᠦᠨ ᠡᠴᠡ〉 ᠭᠡᠬᠦ ᠨᠢ ᠠᠶᠤᠮᠰᠢᠭ ᠲᠠᠢ᠂ ᠶᠠᠭᠠᠬᠢᠭᠠᠳ ᠭᠡᠪᠡᠯ᠂ ᠠᠷᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠶᠣᠬᠠᠨ ᠢ ᠡᠰᠢ ᠦᠵᠡᠭᠦᠯᠦᠭᠴᠢ ᠭᠡᠵᠦ ᠦᠵᠡᠵᠦ ᠪᠠᠢᠨᠠ》 ᠭᠡᠳ᠂ 27 ᠢᠰᠦ᠋ᠰ ᠲᠤ᠄ 《ᠪᠢᠳᠡ ᠮᠡᠳᠡᠬᠦ ᠦᠭᠡᠢ》 ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠨ ᠳᠤ᠂ ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠪᠢ ᠴᠤ ᠭᠡᠰᠡᠨ ᠶᠠᠮᠠᠷ ᠡᠷᠬᠡ ᠪᠡᠷ ᠡᠳᠡᠭᠡᠷ ᠢ ᠬᠢᠵᠦ ᠪᠠᠢᠭᠠ ᠪᠠᠨ ᠲᠠ ᠨᠠᠷ ᠲᠤ ᠬᠡᠯᠡᠬᠦ ᠦᠭᠡᠢ᠃
ᠬᠣᠶᠠᠷ ᠬᠦᠦ ᠶᠢᠨ ᠦᠯᠢᠭᠡᠷᠯᠡᠯ
28 ᠬᠠᠷᠢᠨ ᠲᠠ ᠨᠠᠷ ᠶᠠᠭᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ︖ ᠨᠢᠭᠡᠨ ᠬᠥᠮᠦᠨ ᠬᠣᠶᠠᠷ ᠬᠦᠦ ᠲᠠᠢ ᠪᠠᠢᠵᠠᠢ᠃ ᠲᠡᠷᠡ ᠤᠤᠭᠠᠨ ᠬᠦᠦ ᠳᠡᠭᠡᠨ ᠣᠴᠢᠵᠤ᠄ 〈ᠬᠦᠦ ᠮᠢᠨᠢ᠂ ᠥᠨᠥᠳᠥᠷ ᠴᠢ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠳᠡᠭᠡᠨ ᠶᠠᠪᠤᠵᠤ ᠠᠵᠢᠯᠯᠠᠭᠠᠷᠠᠢ〉 ᠭᠡᠰᠡᠨ ᠳᠦ᠂ 29 ᠬᠦᠦ ᠨᠢ᠄ 〈ᠪᠢ ᠶᠠᠪᠤᠬᠤ ᠦᠭᠡᠢ〉 ᠭᠡᠰᠡᠨ ᠪᠣᠯᠪᠠᠴᠤ ᠡᠴᠦᠰ ᠲᠡᠭᠡᠨ ᠰᠠᠨᠠᠭᠠ ᠪᠠᠨ ᠥᠭᠡᠷᠡᠴᠢᠯᠡᠵᠦ ᠶᠠᠪᠤᠵᠠᠢ᠃ 30 ᠡᠴᠢᠭᠡ ᠨᠢ ᠬᠣᠶᠠᠳᠤᠭᠠᠷ ᠬᠦᠦ ᠳᠡᠭᠡᠨ ᠣᠴᠢᠭᠠᠳ ᠲᠡᠭᠦᠨᠴᠢᠯᠡᠨ ᠬᠡᠯᠡᠬᠦ ᠳᠦ᠂ ᠬᠦᠦ ᠨᠢ᠄ 〈ᠠᠪᠤ ᠡ᠂ ᠪᠢ ᠶᠠᠪᠤᠶᠠ〉 ᠭᠡᠰᠡᠨ ᠪᠣᠯᠪᠠᠴᠤ ᠶᠠᠪᠤᠭᠰᠠᠨ ᠦᠭᠡᠢ᠃ 31 ᠬᠣᠶᠠᠷ ᠬᠦᠦ ᠶᠢᠨ ᠠᠯᠢ ᠨᠢ ᠡᠴᠢᠭᠡ ᠶᠢᠨ ᠢᠶᠠᠨ ᠰᠠᠨᠠᠭᠠ ᠶᠢ ᠪᠡᠶᠡᠯᠡᠭᠦᠯᠦᠭᠰᠡᠨ ᠪᠤᠢ︖》 ᠭᠡᠬᠦ ᠳᠦ᠂ ᠲᠡᠳᠡ᠄ 《ᠤᠤᠭᠠᠨ ᠨᠢ》 ᠭᠡᠪᠡ᠃ ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠭᠠᠢᠯᠢᠴᠢᠳ ᠪᠠ ᠶᠠᠩ᠋ᠬᠠᠨ ᠨᠤᠭᠤᠳ ᠲᠠ ᠨᠠᠷ ᠠᠴᠠ ᠤᠷᠢᠳᠠᠪᠠᠷ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠳᠤ ᠣᠷᠣᠵᠤ ᠪᠠᠢᠨᠠ᠃ 32 ᠶᠣᠬᠠᠨ ᠵᠥᠪ ᠶᠣᠰᠣᠨ ᠤ ᠵᠠᠮ ᠢᠶᠠᠷ ᠲᠠ ᠨᠠᠷ ᠤᠷᠤᠭᠤ ᠢᠷᠡᠬᠦ ᠳᠦ᠂ ᠲᠠ ᠨᠠᠷ ᠲᠡᠭᠦᠨ ᠳᠦ ᠢᠲᠡᠭᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠭᠠᠢᠯᠢᠴᠢᠳ ᠪᠣᠯᠣᠨ ᠶᠠᠩ᠋ᠬᠠᠨ ᠨᠤᠭᠤᠳ ᠲᠡᠭᠦᠨ ᠳᠦ ᠢᠲᠡᠭᠡᠭᠰᠡᠨ ᠶᠤᠮ᠃ ᠲᠠ ᠨᠠᠷ ᠡᠨᠡ ᠶᠠᠪᠤᠳᠠᠯ ᠢ ᠦᠵᠡᠭᠰᠡᠨ ᠪᠣᠯᠪᠠᠴᠤ ᠡᠴᠦᠰ ᠲᠤᠨᠢ ᠬᠦᠷᠲᠡᠯᠡ ᠰᠠᠨᠠᠭᠠ ᠪᠠᠨ ᠥᠭᠡᠷᠡᠴᠢᠯᠡᠭᠰᠡᠨ ᠦᠭᠡᠢ᠂ ᠲᠡᠭᠦᠨ ᠳᠦ ᠢᠲᠡᠭᠡᠭᠰᠡᠨ ᠦᠭᠡᠢ᠃
ᠮᠠᠭᠤ ᠦᠵᠦᠮᠴᠢᠳ ᠤᠨ ᠦᠯᠢᠭᠡᠷᠯᠡᠯ
33 ᠥᠭᠡᠷᠡ ᠨᠢᠭᠡ ᠦᠯᠢᠭᠡᠷᠯᠡᠯ ᠢ ᠰᠣᠨᠣᠰᠴᠠᠭᠠ᠃ ᠨᠢᠭᠡ ᠭᠠᠵᠠᠷ ᠤᠨ ᠡᠵᠡᠨ ᠪᠠᠢᠵᠠᠢ᠃ ᠲᠡᠷᠡ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠪᠠᠢᠭᠤᠯᠵᠤ ᠬᠠᠰᠢᠶᠠᠯᠠᠭᠠᠳ᠂ ᠦᠵᠦᠮ ᠰᠢᠬᠠᠬᠤ ᠨᠦᠬᠡ ᠮᠠᠯᠲᠠᠵᠤ᠂ ᠴᠠᠮᠬᠠᠭ ᠪᠣᠰᠬᠠᠨ᠂ ᠦᠵᠦᠮᠴᠢᠳ ᠲᠤ ᠬᠦᠷᠢᠶᠡᠯᠡᠩ ᠢᠶᠡᠨ ᠲᠦᠷᠢᠶᠡᠰᠦᠯᠡᠵᠦ ᠥᠭᠭᠥᠭᠡᠳ ᠭᠠᠳᠠᠭᠠᠳᠤ ᠳᠤ ᠶᠠᠪᠤᠵᠤ ᠭᠡᠨᠡ᠃ 34 ᠬᠤᠷᠢᠶᠠᠯᠲᠠ ᠶᠢᠨ ᠴᠠᠭ ᠣᠢᠷᠠᠲᠤᠬᠤ ᠳᠤ᠂ ᠡᠵᠡᠨ ᠨᠢ ᠵᠢᠮᠢᠰ ᠢᠶᠠᠨ ᠠᠪᠴᠢᠷᠠᠭᠤᠯᠬᠤ ᠪᠠᠷ ᠵᠠᠷᠤᠴᠠ ᠨᠠᠷ ᠢᠶᠠᠨ ᠦᠵᠦᠮᠴᠢᠳ ᠤᠷᠤᠭᠤ ᠶᠠᠪᠤᠭᠤᠯᠵᠠᠢ᠃ 35 ᠦᠵᠦᠮᠴᠢᠳ ᠵᠠᠷᠤᠴᠠ ᠨᠠᠷ ᠢ ᠨᠢ ᠪᠠᠷᠢᠵᠤ ᠨᠢᠭᠡ ᠶᠢ ᠨᠢ ᠵᠣᠳᠣᠵᠤ᠂ ᠨᠥᠭᠥᠭᠡ ᠶᠢ ᠨᠢ ᠠᠯᠠᠵᠤ᠂ ᠭᠤᠷᠪᠠᠳᠠᠬᠢ ᠶᠢ ᠨᠢ ᠴᠢᠯᠠᠭᠤ ᠪᠠᠷ ᠴᠣᠬᠢᠪᠠ᠃ 36 ᠡᠵᠡᠨ ᠨᠢ ᠳᠠᠬᠢᠭᠠᠳ ᠠᠩ᠋ᠬᠠᠨ ᠤ ᠬᠢ ᠡᠴᠡ ᠪᠡᠨ ᠣᠯᠠᠨ ᠵᠠᠷᠤᠴᠠ ᠶᠢ ᠶᠠᠪᠤᠭᠤᠯᠤᠭᠰᠠᠨ ᠳᠤ᠂ ᠦᠵᠦᠮᠴᠢᠳ ᠲᠡᠳᠡᠨ ᠳᠦ ᠮᠥᠨ ᠯᠠ ᠲᠡᠭᠡᠵᠦ ᠬᠠᠨᠳᠤᠵᠠᠢ᠃ 37 ᠡᠴᠦᠰ ᠲᠤᠨᠢ ᠲᠡᠷᠡ᠄ 〈ᠲᠡᠳᠡ ᠬᠦᠦ ᠶᠢ ᠮᠢᠨᠢ ᠬᠦᠨᠳᠦᠯᠡᠬᠦ ᠪᠢᠵᠡ〉 ᠭᠡᠳ ᠬᠦᠦ ᠪᠡᠨ ᠢᠯᠡᠭᠡᠪᠡ᠃ 38 ᠭᠡᠲᠡᠯᠡ ᠦᠵᠦᠮᠴᠢᠳ ᠬᠦᠦ ᠶᠢ ᠨᠢ ᠬᠠᠷᠠᠭᠠᠳ ᠬᠣᠭᠣᠷᠣᠨᠳᠣ ᠪᠠᠨ᠄ 〈ᠥᠪᠯᠡᠭᠴᠢ ᠨᠢ ᠶᠤᠮ ᠪᠠᠢᠨᠠ᠂ ᠠᠯᠢ᠂ ᠲᠡᠭᠦᠨ ᠢ ᠠᠯᠠᠭᠠᠳ ᠥᠪ ᠢ ᠨᠢ ᠡᠵᠡᠯᠡᠵᠡᠭᠡᠶᠡ〉 ᠭᠡᠯᠴᠡᠨ᠂ 39 ᠲᠡᠭᠦᠨ ᠢ ᠪᠠᠷᠢᠪᠴᠢᠯᠠᠨ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠭ ᠡᠴᠡ ᠭᠠᠷᠭᠠᠵᠤ ᠠᠯᠠᠪᠠ᠃ 40 ᠣᠳᠣ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ ᠦᠨ ᠡᠵᠡᠨ ᠪᠤᠴᠠᠵᠤ ᠢᠷᠡᠬᠦ ᠳᠡᠭᠡᠨ ᠲᠡᠷᠡ ᠦᠵᠦᠮᠴᠢᠳ ᠢ ᠶᠠᠭᠠᠬᠢᠬᠤ ᠪᠤᠢ︖》 ᠭᠡᠰᠡᠨ ᠳᠦ᠂ 41 ᠲᠡᠳᠡ᠄ 《ᠮᠠᠭᠤ ᠶᠢ ᠮᠠᠭᠤ ᠪᠠᠷ ᠨᠢ ᠲᠡᠭᠦᠰᠬᠡᠵᠦ᠂ ᠦᠷᠡ ᠵᠢᠮᠢᠰ ᠢ ᠴᠠᠭ ᠲᠠᠭᠠᠨ ᠲᠤᠰᠢᠶᠠᠬᠤ ᠥᠭᠡᠷᠡ ᠦᠵᠦᠮᠴᠢᠳ ᠲᠤ ᠬᠦᠷᠢᠶᠡᠯᠡᠩ ᠢᠶᠡᠨ ᠲᠦᠷᠢᠶᠡᠰᠦᠯᠡᠵᠦ ᠥᠭᠭᠥᠨᠡ》 ᠭᠡᠪᠡ᠃
42 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《〈ᠪᠠᠷᠢᠯᠭᠠᠴᠢᠳ ᠤᠨ ᠭᠣᠯᠣᠭᠰᠠᠨ ᠴᠢᠯᠠᠭᠤ᠂ ᠲᠤᠯᠭᠠᠭᠤᠷᠢ ᠴᠢᠯᠠᠭᠤ 38 ᠪᠣᠯᠪᠠ᠃ ᠡᠵᠡᠨ ᠡᠭᠦᠨ ᠢ ᠬᠢᠭᠰᠡᠨ᠂ ᠪᠢᠳᠡᠨ ᠦ ᠨᠢᠳᠦᠨ ᠳᠦ ᠭᠠᠢᠬᠠᠯᠲᠠᠢ〉 ᠭᠡᠰᠡᠨ ᠡᠰᠢᠯᠡᠯ ᠢ ᠲᠠ ᠨᠠᠷ ᠶᠡᠷᠦ ᠳᠡᠭᠡᠨ ᠤᠩ᠋ᠰᠢᠭᠠ ᠦᠭᠡᠢ ᠤᠤ︖ 43 ᠡᠢᠮᠦ ᠡᠴᠡ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠃ ᠪᠤᠷᠬᠠᠨ ᠬᠠᠭᠠᠨᠴᠢᠯᠠᠯ ᠢᠶᠠᠨ ᠲᠠ ᠨᠠᠷ ᠠᠴᠠ ᠠᠪᠴᠤ᠂ ᠬᠠᠭᠠᠨᠴᠢᠯᠠᠯ ᠤᠨ ᠦᠷᠡ ᠵᠢᠮᠢᠰ ᠰᠠᠭᠤᠳᠠᠭ ᠦᠨᠳᠦᠰᠦᠲᠡᠨ ᠳᠦ ᠰᠣᠶᠣᠷᠬᠠᠬᠤ ᠪᠣᠯᠣᠨᠠ᠃ 44 [ᠬᠡᠨ ᠲᠡᠷᠡ ᠴᠢᠯᠠᠭᠤᠨ ᠳᠡᠭᠡᠷᠡ ᠤᠨᠠᠪᠠᠯ ᠪᠢᠴᠠᠷᠠᠨᠠ᠂ ᠬᠡᠨ ᠦ ᠳᠡᠭᠡᠷᠡ ᠡᠨᠡ ᠴᠢᠯᠠᠭᠤ ᠤᠨᠠᠪᠠᠯ ᠨᠢᠴᠠᠯᠤᠨᠠ]》 ᠭᠡᠪᠡ᠃
45 ᠹᠠᠷᠢᠰᠠᠢᠴᠤᠳ ᠪᠣᠯᠣᠨ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠢᠰᠦ᠋ᠰ ᠤᠨ ᠦᠯᠢᠭᠡᠷᠯᠡᠯ ᠢ ᠰᠣᠨᠣᠰᠣᠭᠠᠳ᠂ ᠥᠪᠡᠷᠰᠡᠳ ᠦᠨ ᠬᠢᠨᠢ ᠲᠤᠬᠠᠢ ᠶᠠᠷᠢᠵᠤ ᠪᠤᠢ ᠶᠢ ᠨᠢ ᠮᠡᠳᠡᠭᠡᠳ᠂ 46 ᠲᠡᠭᠦᠨ ᠢ ᠪᠠᠷᠢᠪᠴᠢᠯᠠᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠠᠷᠠᠳ ᠣᠯᠠᠨ ᠠᠴᠠ ᠠᠶᠤᠪᠠ᠃ ᠤᠴᠢᠷ ᠨᠢ ᠲᠡᠳᠡ ᠢᠰᠦ᠋ᠰ ᠢ ᠡᠰᠢ ᠦᠵᠡᠭᠦᠯᠦᠭᠴᠢ ᠭᠡᠵᠦ ᠦᠵᠡᠳᠡᠭ ᠠᠵᠢ᠃