ᠮᠠᠲ᠋ᠠᠢ ᠠᠷᠪᠠᠨ ᠵᠢᠷᠭᠤᠭᠠ
ᠢᠰᠦ᠋ᠰ ᠢ ᠲᠡᠩᠰᠡᠭᠴᠢᠳ
1 ᠹᠠᠷᠢᠰᠠᠢᠴᠤᠳ᠂ ᠰᠠᠳᠣᠺᠠᠢᠴᠤᠳ ᠢᠷᠡᠵᠦ ᠢᠰᠦ᠋ᠰ ᠢ ᠲᠡᠩᠰᠡᠨ᠂ ᠲᠩᠷᠢ ᠶᠢᠨ ᠰᠢᠳᠢ ᠲᠡᠮᠳᠡᠭ ᠦᠵᠡᠭᠦᠯᠬᠦ ᠶᠢ ᠱᠠᠭᠠᠷᠳᠠᠪᠠ᠃ 2 ᠲᠡᠷᠡ ᠬᠠᠷᠢᠭᠤ ᠳᠤᠨᠢ᠄ 《ᠣᠷᠣᠢ ᠨᠢ ᠲᠠ ᠨᠠᠷ᠄ 〈ᠲᠩᠷᠢ ᠤᠯᠠᠢᠵᠦ ᠪᠠᠢᠨᠠ᠂ ᠴᠡᠯᠮᠡᠭ ᠪᠣᠯᠬᠤ ᠨᠢ〉 ᠭᠡᠳᠡᠭ᠂ 3 ᠥᠷᠯᠥᠭᠡ ᠨᠢ᠄ 〈ᠲᠩᠷᠢ ᠤᠯᠠᠢᠵᠤ᠂ ᠪᠦᠷᠬᠦᠢᠵᠦ ᠪᠠᠢᠨᠠ᠂ ᠥᠨᠥᠳᠥᠷ ᠰᠢᠭᠤᠷᠭᠠ ᠲᠠᠢ ᠪᠠᠢᠬᠤ ᠨᠢ〉 ᠭᠡᠳᠡᠭ᠃ ᠲᠠ ᠨᠠᠷ ᠲᠩᠷᠢ ᠶᠢᠨ ᠪᠠᠢᠳᠠᠯ ᠢ ᠰᠢᠨᠵᠢᠯᠡᠵᠦ ᠮᠡᠳᠡᠳᠡᠭ ᠪᠠᠢᠲᠠᠯᠠ ᠪᠠᠨ ᠴᠠᠭ ᠦᠶᠡ ᠶᠢᠨ ᠲᠡᠮᠳᠡᠭ ᠢ ᠢᠯᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠤᠤ︖ 4 ᠮᠠᠭᠤ᠂ ᠵᠠᠪᠬᠠᠢ ᠦᠶᠡ ᠶᠢᠨ ᠬᠢᠨ ᠰᠢᠳᠢ ᠲᠡᠮᠳᠡᠭ ᠱᠠᠭᠠᠷᠳᠠᠳᠠᠭ ᠪᠣᠯᠪᠠᠴᠤ ᠶᠣᠨᠠ ᠶᠢᠨ ᠬᠢ ᠡᠴᠡ ᠥᠭᠡᠷᠡ ᠰᠢᠳᠢ ᠲᠡᠮᠳᠡᠭ ᠲᠡᠳᠡᠨ ᠳᠦ ᠥᠭᠭᠥᠭᠳᠡᠬᠦ ᠦᠭᠡᠢ》 ᠭᠡᠵᠦ ᠬᠡᠯᠡᠭᠡᠳ ᠲᠡᠳᠡᠨ ᠢ ᠣᠷᠬᠢᠨ ᠶᠠᠪᠤᠪᠠ᠃
5 ᠱᠠᠪᠢ ᠨᠠᠷ ᠨᠢ ᠨᠠᠭᠤᠷ ᠤᠨ ᠨᠥᠭᠥᠭᠡ ᠲᠠᠯᠠ ᠳᠤ ᠬᠦᠷᠪᠡ᠂ ᠲᠡᠳᠡ ᠪᠣᠣᠪᠣ ᠠᠪᠴᠢᠷᠠᠬᠤ ᠪᠠᠨ ᠮᠠᠷᠲᠠᠭᠰᠠᠨ ᠪᠠᠢᠵᠠᠢ᠃ 6 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠠᠩ᠋ᠬᠠᠷᠤᠭᠲᠤᠨ᠂ ᠹᠠᠷᠢᠰᠠᠢᠴᠤᠳ ᠪᠠ ᠰᠠᠳᠣᠺᠠᠢᠴᠤᠳ ᠤᠨ ᠢᠰᠭᠡᠭᠦᠷ ᠡᠴᠡ ᠪᠣᠯᠭᠣᠮᠵᠢᠯᠠ》 ᠭᠡᠬᠦ ᠳᠦ᠂ 7 ᠱᠠᠪᠢ ᠨᠠᠷ ᠨᠢ ᠬᠣᠭᠣᠷᠣᠨᠳᠣ ᠪᠠᠨ᠄ 《ᠪᠢᠳᠡᠨ ᠢ ᠪᠣᠣᠪᠣ ᠠᠪᠤᠭᠠ ᠦᠭᠡᠢ ᠭᠡᠵᠦ ᠪᠠᠢᠨᠠ》 ᠭᠡᠯᠴᠡᠵᠦ ᠪᠠᠢᠪᠠ᠃ 8 ᠢᠰᠦ᠋ᠰ ᠡᠭᠦᠨ ᠢ ᠮᠡᠳᠡᠭᠡᠳ᠄ 《ᠢᠲᠡᠭᠡᠯ ᠪᠠᠭᠠ ᠲᠠᠢ ᠬᠥᠮᠦᠰ ᠡ᠂ ᠶᠠᠭᠤᠨ ᠳᠤ ᠪᠣᠣᠪᠣ ᠪᠠᠢᠬᠤ ᠦᠭᠡᠢ ᠭᠡᠵᠦ ᠶᠠᠷᠢᠯᠴᠠᠨᠠ ᠪᠤᠢ︖ 9 ᠲᠠ ᠨᠠᠷ ᠬᠠᠷᠠᠬᠠᠨ ᠣᠢᠯᠠᠭᠠᠭᠠ ᠦᠭᠡᠢ ᠤᠤ︖ ᠲᠠᠪᠤᠨ ᠮᠢᠩ᠋ᠭᠠᠨ ᠬᠥᠮᠦᠨ ᠦ ᠲᠠᠪᠤᠨ ᠪᠣᠣᠪᠣ ᠶᠢ ᠰᠠᠨᠠᠬᠤ ᠦᠭᠡᠢ ᠤᠤ︖ ᠬᠤᠷᠢᠶᠠᠬᠤ ᠳᠤ ᠴᠢᠨᠢ ᠬᠡᠳᠦᠨ ᠰᠠᠭᠰᠤ ᠳᠦᠭᠦᠷᠦᠭᠰᠡᠨ ᠪᠤᠢ︖ 10 ᠮᠥᠨ ᠳᠥᠷᠪᠡᠨ ᠮᠢᠩ᠋ᠭᠠᠨ ᠬᠥᠮᠦᠨ ᠦ ᠳᠣᠯᠣᠭᠠᠨ ᠪᠣᠣᠪᠣ ᠶᠢ ᠰᠠᠨᠠᠬᠤ ᠦᠭᠡᠢ ᠤᠤ︖ ᠬᠤᠷᠢᠶᠠᠬᠤ ᠳᠤ ᠴᠢᠨᠢ ᠬᠡᠳᠦᠨ ᠰᠠᠭᠰᠤ ᠳᠦᠭᠦᠷᠦᠭᠰᠡᠨ ᠪᠤᠢ︖ 11 ᠲᠠ ᠨᠠᠷ ᠶᠠᠭᠠᠬᠢᠭᠠᠳ ᠣᠢᠯᠠᠭᠠᠬᠤ ᠦᠭᠡᠢ ᠪᠤᠢ︖ ᠪᠢ ᠲᠠ ᠨᠠᠷ ᠲᠤ ᠪᠣᠣᠪᠣ ᠶᠢᠨ ᠲᠤᠬᠠᠢ ᠶᠠᠷᠢᠭᠰᠠᠨ ᠦᠭᠡᠢ᠂ ᠹᠠᠷᠢᠰᠠᠢᠴᠤᠳ ᠪᠣᠯᠣᠨ ᠰᠠᠳᠣᠺᠠᠢᠴᠤᠳ ᠤᠨ ᠢᠰᠭᠡᠭᠦᠷ ᠡᠴᠡ ᠪᠣᠯᠭᠣᠮᠵᠢᠯᠠ》 ᠭᠡᠪᠡ᠃ 12 ᠲᠡᠭᠡᠬᠦ ᠳᠦ ᠯᠠ ᠪᠣᠣᠪᠣ ᠶᠢᠨ ᠢᠰᠭᠡᠭᠦᠷ ᠡᠴᠡ ᠪᠢᠰᠢ᠂ ᠬᠠᠷᠢᠨ ᠹᠠᠷᠢᠰᠠᠢᠴᠤᠳ ᠪᠣᠯᠣᠨ ᠰᠠᠳᠣᠺᠠᠢᠴᠤᠳ ᠤᠨ ᠰᠤᠷᠭᠠᠯ ᠠᠴᠠ ᠪᠣᠯᠭᠣᠮᠵᠢᠯᠠ ᠭᠡᠰᠡᠨ ᠢ ᠨᠢ ᠲᠡᠳᠡ ᠤᠬᠠᠭᠠᠷᠠᠯᠠ᠃
ᠫᠧᠲ᠋ᠧᠷ ᠢᠰᠦ᠋ᠰ ᠢ ᠠᠪᠤᠷᠠᠭᠴᠢ ᠭᠡᠵᠦ ᠢᠯᠡᠷᠬᠡᠶᠢᠯᠡᠭᠰᠡᠨ ᠨᠢ
13 ᠢᠰᠦ᠋ᠰ ᠹᠢᠯᠢᠫᠣᠢ ᠶᠢᠨ ᠺᠠᠶᠧᠰᠠᠷᠢᠶᠠ ᠨᠤᠲᠤᠭ ᠲᠤ ᠬᠦᠷᠦᠭᠡᠳ ᠱᠠᠪᠢ ᠨᠠᠷ ᠠᠴᠠ ᠪᠠᠨ᠄ 《ᠬᠥᠮᠦᠰ ᠬᠥᠮᠦᠨ ᠦ ᠬᠦᠦ ᠶᠢ ᠬᠡᠨ ᠭᠡᠵᠦ ᠶᠠᠷᠢᠳᠠᠭ ᠪᠤᠢ︖》 ᠭᠡᠵᠦ ᠠᠰᠠᠭᠤᠪᠠ᠃ 14 ᠲᠡᠳᠡ᠄ 《ᠵᠠᠷᠢᠮ ᠨᠢ ᠤᠬᠢᠶᠠᠯ ᠬᠦᠷᠲᠡᠭᠡᠭᠴᠢ ᠶᠣᠬᠠᠨ ᠭᠡᠵᠦ᠂ ᠵᠠᠷᠢᠮ ᠨᠢ ᠧᠯᠢᠶᠠ᠂ ᠪᠠᠰᠠ ᠵᠠᠷᠢᠮ ᠨᠢ ᠶᠧᠷᠧᠮᠢᠶᠠ ᠪᠤᠶᠤ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠨᠢᠭᠡ ᠭᠡᠳᠡᠭ》 ᠭᠡᠬᠦ ᠳᠦ᠂ 15 ᠲᠡᠷᠡ᠄ 《ᠬᠠᠷᠢᠨ ᠲᠠ ᠨᠠᠷ ᠨᠠᠮᠠᠶᠢ ᠬᠡᠨ ᠭᠡᠳᠡᠭ ᠪᠤᠢ︖》 ᠭᠡᠪᠡ᠃ 16 ᠰᠢᠮᠣᠨ ᠫᠧᠲ᠋ᠧᠷ ᠬᠠᠷᠢᠭᠤ ᠳᠤᠨᠢ᠄ 《ᠲᠠ ᠪᠣᠯ ᠾᠷᠢᠰᠲ᠋ᠣᠰ᠂ ᠠᠮᠢᠳᠤ ᠪᠤᠷᠬᠠᠨ ᠤ ᠬᠦᠦ ᠮᠥᠨ》 ᠭᠡᠰᠡᠨ ᠳᠦ᠂ 17 ᠢᠰᠦ᠋ᠰ ᠲᠡᠭᠦᠨ ᠳᠦ᠄ 《ᠶᠣᠨᠠ ᠶᠢᠨ ᠬᠦᠦ ᠰᠢᠮᠣᠨ ᠡ᠂ ᠴᠢ ᠪᠤᠶᠠᠨ ᠲᠠᠢ︕ ᠡᠭᠦᠨ ᠢ ᠴᠢᠮᠠ ᠳᠤ ᠢᠯᠡᠷᠬᠡᠶᠢᠯᠡᠭᠴᠢ ᠨᠢ ᠮᠢᠬᠠ ᠴᠢᠰᠤᠲᠤ ᠬᠥᠮᠦᠨ ᠪᠢᠰᠢ᠂ ᠬᠠᠷᠢᠨ ᠲᠩᠷᠢ ᠳᠠᠬᠢ ᠮᠢᠨᠦ ᠡᠴᠢᠭᠡ ᠶᠤᠮ᠃ 18 ᠪᠢ ᠴᠤ ᠴᠢᠮᠠ ᠳᠤ ᠬᠡᠯᠡᠶᠡ᠃ ᠴᠢ ᠪᠣᠯ ᠫᠧᠲ᠋ᠧᠷ 24 ᠂ ᠡᠨᠡ ᠬᠠᠳᠠᠨ ᠳᠡᠭᠡᠷᠡ ᠪᠢ ᠴᠢᠭᠤᠯᠭᠠᠨ ᠢᠶᠠᠨ ᠪᠣᠰᠬᠠᠨᠠ᠂ ᠲᠡᠭᠦᠨ ᠢ ᠦᠬᠦᠭᠰᠡᠳ ᠦᠨ ᠣᠷᠣᠨ ᠤ ᠬᠠᠭᠠᠯᠭᠠ ᠳᠡᠢᠯᠬᠦ ᠦᠭᠡᠢ᠃ 19 ᠪᠢ ᠴᠢᠮᠠ ᠳᠤ ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠤᠨ ᠲᠦᠯᠬᠢᠭᠦᠷ ᠢ ᠥᠭᠭᠥᠨᠡ᠃ ᠴᠢ ᠭᠠᠵᠠᠷ ᠳᠡᠭᠡᠷᠡ ᠶᠠᠭᠤ ᠶᠢ ᠬᠦᠯᠢᠪᠡᠯ᠂ ᠲᠡᠷᠡ ᠨᠢ ᠲᠩᠷᠢ ᠳᠤ ᠴᠤ ᠬᠦᠯᠢᠭᠳᠡᠨᠡ 25 ᠃ ᠭᠠᠵᠠᠷ ᠳᠡᠭᠡᠷᠡ ᠶᠠᠭᠤ ᠶᠢ ᠰᠤᠯᠠᠯᠠᠪᠠᠯ᠂ ᠲᠡᠷᠡ ᠨᠢ ᠲᠩᠷᠢ ᠳᠤ ᠴᠤ ᠰᠤᠯᠠᠯᠠᠭᠳᠠᠨᠠ 26 》 ᠭᠡᠯᠡ᠃ 20 ᠲᠡᠭᠡᠭᠡᠳ ᠢᠰᠦ᠋ᠰ ᠥᠪᠡᠷ ᠦᠨ ᠬᠢᠨᠢ ᠾᠷᠢᠰᠲ᠋ᠣᠰ ᠭᠡᠳᠡᠭ ᠢ ᠬᠡᠨ ᠳᠦ ᠴᠤ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠶᠢ ᠱᠠᠪᠢ ᠨᠠᠷ ᠲᠠᠭᠠᠨ ᠵᠠᠬᠢᠵᠠᠢ᠃
ᠢᠰᠦ᠋ᠰ ᠠᠯᠠᠭᠳᠠᠵᠤ ᠠᠮᠢᠯᠠᠬᠤ ᠲᠤᠬᠠᠢ ᠪᠠᠨ (1)
21 ᠢᠰᠦ᠋ᠰ ᠲᠡᠷᠡ ᠴᠠᠭ ᠠᠴᠠ ᠬᠣᠢᠰᠢ ᠶᠧᠷᠦ᠋ᠰᠠᠯᠧᠮ ᠳᠤ ᠣᠴᠢᠬᠤ ᠪᠠ ᠠᠬᠠᠯᠠᠭᠴᠢᠳ᠂ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠪᠣᠯᠣᠨ ᠪᠢᠴᠢᠭᠲᠡᠳ ᠦᠨ ᠭᠠᠷ ᠲᠤ ᠶᠡᠬᠡ ᠵᠣᠪᠠᠯᠠᠩ ᠠᠮᠰᠠᠬᠤ᠂ ᠠᠯᠠᠭᠳᠠᠭᠠᠳ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠳᠡᠭᠡᠷᠡ ᠪᠡᠨ ᠠᠮᠢᠯᠠᠬᠤ ᠶᠣᠰᠣᠲᠠᠢ ᠪᠠᠨ ᠱᠠᠪᠢ ᠨᠠᠷ ᠲᠠᠭᠠᠨ ᠲᠠᠢᠯᠪᠤᠷᠢᠯᠠᠵᠤ ᠡᠬᠢᠯᠡᠪᠡ᠃ 22 ᠫᠧᠲ᠋ᠧᠷ ᠢᠰᠦ᠋ᠰ ᠢ ᠬᠠᠵᠠᠭᠤ ᠲᠡᠰᠢ ᠠᠪᠠᠴᠢᠭᠠᠳ᠄ 《ᠶᠠᠭᠠᠬᠢᠯᠠ ᠭᠡᠵᠢ᠂ ᠡᠵᠡᠨ ᠡ︕ ᠡᠢᠮᠦ ᠶᠠᠭᠤᠮᠠ ᠲᠠᠨ ᠳᠤ ᠶᠠᠭᠠᠬᠢᠭᠰᠠᠨ ᠴᠤ ᠲᠣᠬᠢᠶᠠᠯᠳᠤᠬᠤ ᠦᠭᠡᠢ ᠶᠤᠮ》 ᠭᠡᠵᠦ ᠵᠢᠮᠡᠯᠡᠵᠦ ᠡᠬᠢᠯᠡᠭᠰᠡᠨ ᠳᠦ᠂ 23 ᠢᠰᠦ᠋ᠰ ᠡᠷᠭᠢᠨ ᠫᠧᠲ᠋ᠧᠷ ᠲᠤ᠄ 《ᠮᠢᠨᠦ ᠠᠷᠤ ᠠᠴᠠ ᠵᠠᠢᠯᠠ᠂ ᠰᠠᠲ᠋ᠠᠨ︕ ᠴᠢ ᠪᠣᠯ ᠨᠠᠮᠠᠶᠢ ᠪᠦᠳᠦᠷᠢᠭᠦᠯᠦᠭᠴᠢ᠃ ᠴᠢ ᠪᠤᠷᠬᠠᠨ ᠤ ᠬᠢ ᠶᠢ ᠪᠤᠰᠤ᠂ ᠬᠠᠷᠢᠨ ᠬᠥᠮᠦᠨ ᠦ ᠬᠢ ᠶᠢ ᠪᠣᠳᠣᠵᠤ ᠪᠠᠢᠨᠠ》 ᠭᠡᠯᠡ᠃
ᠱᠠᠪᠢ ᠪᠣᠯᠬᠤ ᠶᠢᠨ ᠦᠨᠡ ᠥᠷᠳᠡᠭ
24 ᠲᠡᠭᠡᠭᠡᠳ ᠢᠰᠦ᠋ᠰ ᠱᠠᠪᠢ ᠨᠠᠷ ᠲᠠᠭᠠᠨ᠄ 《ᠬᠡᠨ ᠨᠠᠮᠠᠶᠢ ᠳᠠᠭᠠᠶᠠ ᠭᠡᠪᠡᠯ᠂ ᠥᠪᠡᠷ ᠢ ᠪᠠᠨ ᠣᠭᠣᠷᠴᠤ᠂ ᠵᠠᠭᠠᠯᠮᠠᠢ ᠪᠠᠨ ᠡᠭᠦᠷᠴᠦ ᠨᠠᠮᠠᠶᠢ ᠳᠠᠭᠠ᠃ 25 ᠤᠴᠢᠷ ᠨᠢ ᠬᠡᠨ ᠠᠮᠢ ᠪᠠᠨ ᠠᠪᠤᠷᠠᠶᠠ ᠭᠡᠪᠡᠯ᠂ ᠠᠮᠢ ᠪᠠᠨ ᠠᠯᠳᠠᠨᠠ᠃ ᠬᠡᠨ ᠮᠢᠨᠦ ᠲᠥᠯᠥᠭᠡ ᠠᠮᠢ ᠪᠠᠨ ᠠᠯᠳᠠᠪᠠᠯ ᠠᠮᠢ ᠪᠠᠨ ᠣᠯᠣᠨᠠ᠃ 26 ᠬᠥᠮᠦᠨ ᠪᠦᠬᠦ ᠳᠡᠯᠡᠬᠡᠢ ᠶᠢ ᠣᠯᠣᠭᠰᠠᠨ ᠴᠤ ᠠᠮᠢ ᠪᠠᠨ ᠠᠯᠳᠠᠪᠠᠯ ᠶᠠᠮᠠᠷ ᠠᠰᠢᠭ ᠪᠠᠢᠬᠤ ᠪᠢᠯᠡ︖ ᠬᠥᠮᠦᠨ ᠶᠠᠭᠤ ᠪᠠᠨ ᠥᠭᠴᠦ ᠠᠮᠢ ᠪᠠᠨ ᠰᠣᠯᠢᠵᠤ ᠠᠪᠬᠤ ᠪᠢᠯᠡ︖
27 ᠤᠴᠢᠷ ᠨᠢ ᠬᠥᠮᠦᠨ ᠦ ᠬᠦᠦ ᠡᠴᠢᠭᠡ ᠶᠢᠨ ᠢᠶᠠᠨ ᠠᠯᠳᠠᠷ ᠰᠤᠤ ᠪᠠᠷ ᠲᠩᠷᠢ ᠶᠢᠨ ᠡᠯᠴᠢᠳ ᠲᠠᠢ ᠪᠠᠨ ᠬᠠᠮᠲᠤ ᠢᠷᠡᠬᠦ ᠪᠥᠭᠡᠳ ᠲᠡᠷᠡ ᠦᠶᠡ ᠳᠦ ᠬᠥᠮᠦᠨ ᠪᠦᠷᠢ ᠳᠤ ᠦᠢᠯᠡᠰ ᠦᠨ ᠬᠢᠨᠢ ᠶᠣᠰᠣᠭᠠᠷ ᠬᠠᠷᠢᠭᠤᠯᠬᠤ ᠪᠣᠯᠣᠨᠠ᠃ 28 ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠡ᠊ᠨᠳᠡ ᠵᠣᠭᠰᠣᠵᠤ ᠪᠤᠢ ᠬᠥᠮᠦᠰ ᠦᠨ ᠵᠠᠷᠢᠮ ᠨᠢ ᠬᠥᠮᠦᠨ ᠦ ᠬᠦᠦ ᠶᠢᠨ ᠬᠠᠭᠠᠨᠴᠢᠯᠠᠯ ᠳᠠᠭᠠᠨ ᠢᠷᠡᠬᠦ ᠶᠢ ᠦᠵᠡᠬᠦ ᠡᠴᠡ ᠨᠠᠰᠢ ᠦᠬᠦᠯ ᠢ ᠶᠡᠷᠦ ᠠᠮᠰᠠᠬᠤ ᠦᠭᠡᠢ》 ᠭᠡᠵᠡᠢ᠃