ᠮᠠᠲ᠋ᠠᠢ ᠭᠤᠷᠪᠠ
ᠤᠬᠢᠶᠠᠯ ᠬᠦᠷᠲᠡᠭᠡᠭᠴᠢ ᠶᠣᠬᠠᠨ ᠤ ᠲᠤᠩ᠋ᠬᠠᠭᠯᠠᠯ
1 ᠲᠡᠷᠡ ᠦᠶᠡ ᠳᠦ ᠤᠬᠢᠶᠠᠯ ᠬᠦᠷᠲᠡᠭᠡᠭᠴᠢ ᠶᠣᠬᠠᠨ ᠭᠠᠷᠴᠤ ᠢᠷᠡᠨ ᠶᠦᠳᠠᠢ ᠶᠢᠨ ᠴᠥᠯ ᠳᠤ᠄ 2 《ᠭᠡᠮᠰᠢᠵᠡᠭᠡ᠂ ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠣᠢᠷᠠᠲᠤᠯᠠ》 ᠭᠡᠵᠦ ᠲᠤᠩ᠋ᠬᠠᠭᠯᠠᠪᠠ᠃ 3 ᠲᠡᠭᠦᠨ ᠦ ᠲᠤᠬᠠᠢ ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠠᠢᠶᠠ᠄ 《ᠴᠥᠯ ᠳᠤ ᠬᠠᠰᠬᠢᠷᠤᠭᠴᠢ ᠨᠢᠭᠡᠨ ᠦ ᠳᠠᠭᠤ᠄ 〈ᠡᠵᠡᠨ ᠦ ᠵᠠᠮ ᠢ ᠪᠡᠯᠡᠳᠬᠡᠵᠡᠭᠡ᠂ ᠲᠡᠭᠦᠨ ᠦ ᠬᠠᠷᠭᠤᠢ ᠶᠢ ᠰᠢᠯᠤᠭᠤᠳᠬᠠᠵᠠᠭᠠ〉 ᠭᠡᠪᠡ》 ᠭᠡᠰᠡᠨ ᠶᠤᠮ᠃ 4 ᠶᠣᠬᠠᠨ ᠲᠡᠮᠡᠭᠡᠨ ᠨᠣᠣᠰᠣᠨ ᠬᠤᠪᠴᠠᠰᠤ ᠡᠮᠦᠰᠴᠦ᠂ ᠰᠣᠷ ᠪᠦᠰᠡ ᠪᠦᠰᠡᠯᠡᠭᠰᠡᠨ ᠪᠥᠭᠡᠳ ᠬᠣᠭᠣᠯᠠ ᠨᠢ ᠴᠠᠷᠴᠠᠬᠠᠢ᠂ ᠵᠡᠷᠯᠢᠭ ᠵᠥᠭᠡᠢ ᠶᠢᠨ ᠪᠠᠯ ᠪᠠᠢᠵᠠᠢ᠃ 5 ᠲᠡᠭᠡᠬᠦ ᠳᠦ ᠶᠧᠷᠦ᠋ᠰᠠᠯᠧᠮ᠂ ᠪᠦᠬᠦ ᠶᠦᠳᠠᠢ ᠪᠣᠯᠣᠨ ᠶᠣᠷᠳᠠᠨ ᠭᠣᠣᠯ ᠤᠨ ᠬᠠᠪᠢ ᠶᠢᠨ ᠬᠢᠨ ᠪᠦᠭᠦᠳᠡᠭᠡᠷ ᠲᠡᠭᠦᠨ ᠳᠦ ᠣᠴᠢᠨ᠂ 6 ᠭᠡᠮ ᠨᠢᠭᠦᠯ ᠢᠶᠡᠨ ᠥᠴᠢᠵᠦ᠂ ᠶᠣᠷᠳᠠᠨ ᠭᠣᠣᠯ ᠳᠤ ᠲᠡᠭᠦᠨ ᠡᠴᠡ ᠤᠬᠢᠶᠠᠯ ᠬᠦᠷᠲᠡᠵᠦ ᠪᠠᠢᠪᠠ᠃
7 ᠬᠠᠷᠢᠨ ᠶᠣᠬᠠᠨ ᠹᠠᠷᠢᠰᠠᠢᠴᠤᠳ ᠪᠣᠯᠣᠨ ᠰᠠᠳᠣᠺᠠᠢᠴᠤᠳ ᠤᠨ ᠤᠬᠢᠶᠠᠯ ᠬᠦᠷᠲᠡᠬᠦ ᠭᠡᠵᠦ ᠣᠯᠠᠭᠤᠯᠠ ᠢᠷᠡᠬᠦ ᠶᠢ ᠬᠠᠷᠠᠭᠠᠳ᠂ ᠲᠡᠳᠡᠨ ᠳᠦ᠄ 《ᠬᠣᠣᠷᠲᠤ ᠮᠣᠭᠠᠢ ᠶᠢᠨ ᠦᠷᠡ ᠲᠥᠯ ᠡ︕ ᠠᠢᠰᠤᠢ ᠬᠢᠯᠢᠩᠨᠡᠯ ᠡᠴᠡ ᠵᠠᠢᠯᠠ ᠭᠡᠵᠦ ᠬᠡᠨ ᠲᠠ ᠨᠠᠷ ᠲᠤ ᠵᠢᠭᠠᠭᠰᠠᠨ ᠪᠤᠢ︖ 8 ᠭᠡᠮᠰᠢᠯ ᠳᠤ ᠨᠡᠢᠴᠡᠬᠦ ᠵᠢᠮᠢᠰ ᠢᠶᠠᠨ ᠰᠠᠭᠤᠯᠭᠠ᠃ 9 〈ᠠᠪᠷᠠᠬᠠᠮ ᠪᠣᠯ ᠪᠢᠳᠡᠨ ᠦ ᠡᠪᠦᠭᠡ︕〉 ᠬᠡᠮᠡᠨ ᠶᠠᠷᠢᠶᠠ ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠢᠲᠡᠭᠡᠢ ᠪᠣᠳᠣ᠃ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠪᠤᠷᠬᠠᠨ ᠡᠳᠡᠭᠡᠷ ᠴᠢᠯᠠᠭᠤᠨ ᠠᠴᠠ ᠴᠤ ᠠᠪᠷᠠᠬᠠᠮ ᠤᠨ ᠦᠷᠡ ᠤᠳᠤᠮ ᠢ ᠪᠤᠢ ᠪᠣᠯᠭᠠᠵᠤ ᠴᠢᠳᠠᠨᠠ᠃ 10 ᠮᠣᠳᠣᠳ ᠤᠨ ᠦᠨᠳᠦᠰᠦᠨ ᠳᠦ ᠰᠦᠬᠡ ᠬᠡᠳᠦᠢᠨᠡᠢ ᠲᠠᠯᠪᠢᠭᠳᠠᠭᠰᠠᠨ ᠪᠠᠢᠨᠠ᠂ ᠰᠠᠢᠨ ᠵᠢᠮᠢᠰ ᠰᠠᠭᠤᠳᠠᠭ ᠦᠭᠡᠢ ᠮᠣᠳᠣ ᠪᠦᠬᠦᠨ ᠴᠠᠪᠴᠢᠭᠳᠠᠵᠤ ᠭᠠᠯ ᠳᠤ ᠬᠠᠶᠠᠭᠳᠠᠨᠠ᠃
11 ᠭᠡᠮᠰᠢᠯ ᠤᠨ ᠴᠢᠨᠢ ᠲᠥᠯᠥᠭᠡ ᠪᠢ ᠲᠠ ᠨᠠᠷ ᠲᠤ ᠤᠰᠤ ᠪᠠᠷ 5 ᠤᠬᠢᠶᠠᠯ ᠬᠦᠷᠲᠡᠭᠡᠵᠦ ᠪᠠᠢᠨᠠ᠃ ᠬᠠᠷᠢᠨ ᠨᠠᠳᠠ ᠠᠴᠠ ᠬᠦᠴᠦᠷᠬᠡᠭ ᠨᠢᠭᠡᠨ ᠨᠢ ᠮᠢᠨᠦ ᠠᠷᠤ ᠠᠴᠠ ᠢᠷᠡᠨᠡ᠂ ᠨᠠᠳᠠ ᠳᠤ ᠲᠡᠭᠦᠨ ᠦ ᠱᠠᠬᠠᠢ ᠶᠢ ᠪᠠᠷᠢᠵᠤ ᠶᠠᠪᠤᠬᠤ ᠬᠢᠷᠢ ᠭᠡᠮ ᠴᠤ ᠪᠠᠢᠬᠤ ᠦᠭᠡᠢ᠃ ᠲᠡᠷᠡ ᠲᠠ ᠨᠠᠷ ᠲᠤ ᠠᠷᠢᠭᠤᠨ ᠰᠦᠨᠡᠰᠦ ᠪᠣᠯᠣᠨ ᠭᠠᠯ ᠢᠶᠠᠷ ᠤᠬᠢᠶᠠᠯ ᠬᠦᠷᠲᠡᠭᠡᠨᠡ᠃ 12 ᠲᠡᠷᠡ ᠭᠠᠷ ᠲᠠᠭᠠᠨ ᠳᠡᠪᠢᠭᠦᠷ ᠪᠠᠷᠢᠵᠤ ᠦᠲᠦᠷᠮᠡ ᠪᠡᠨ ᠴᠡᠪᠡᠷᠯᠡᠨ᠂ ᠪᠤᠭᠤᠳᠠᠢ ᠪᠠᠨ ᠬᠥᠮᠥᠷᠭᠡ ᠳᠦ ᠬᠤᠷᠢᠶᠠᠬᠤ ᠪᠣᠯᠪᠠᠴᠤ ᠬᠡᠪᠡᠭ ᠢ ᠨᠢ ᠤᠨᠲᠠᠷᠠᠰᠢ ᠦᠭᠡᠢ ᠭᠠᠯ ᠳᠤ ᠲᠦᠯᠡᠬᠦ ᠪᠣᠯᠣᠨᠠ》 ᠭᠡᠯᠡ᠃
ᠢᠰᠦ᠋ᠰ ᠤᠬᠢᠶᠠᠯ ᠬᠦᠷᠲᠡᠭᠰᠡᠨ ᠨᠢ
13 ᠲᠡᠭᠡᠬᠦ ᠳᠦ᠂ ᠢᠰᠦ᠋ᠰ ᠶᠣᠬᠠᠨ ᠠᠴᠠ ᠤᠬᠢᠶᠠᠯ ᠬᠦᠷᠲᠡᠬᠦ ᠪᠡᠷ ᠭᠠᠯᠢᠯᠠᠶᠠ ᠠᠴᠠ ᠶᠣᠷᠳᠠᠨ ᠭᠣᠣᠯ ᠳᠤ ᠢᠷᠡᠪᠡ᠃ 14 ᠬᠠᠷᠢᠨ ᠶᠣᠬᠠᠨ᠄ 《ᠪᠢ ᠲᠠᠨ ᠠᠴᠠ ᠤᠬᠢᠶᠠᠯ ᠬᠦᠷᠲᠡᠬᠦ ᠤᠴᠢᠷ ᠲᠠᠢ ᠠᠲᠠᠯᠠ ᠲᠠ ᠨᠠᠳᠠ ᠤᠷᠤᠭᠤ ᠢᠷᠡᠬᠦ ᠨᠢ ᠤᠤ︖》 ᠬᠡᠮᠡᠨ ᠪᠣᠯᠢᠭᠤᠯᠬᠤ ᠭᠡᠬᠦ ᠳᠦ᠂ 15 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠡᠨᠡ ᠤᠳᠠᠭᠠ ᠵᠥᠪᠰᠢᠶᠡᠷᠡᠭᠡᠴᠢ᠂ ᠪᠢᠳᠡ ᠠᠯᠢᠪᠠ ᠵᠥᠪ ᠶᠣᠰᠣ ᠶᠢ ᠢᠩᠭᠢᠵᠦ ᠪᠡᠶᠡᠯᠡᠭᠦᠯᠬᠦ ᠶᠣᠰᠣᠲᠠᠢ》 ᠭᠡᠰᠡᠨ ᠳᠦ᠂ ᠶᠣᠬᠠᠨ ᠵᠥᠪᠰᠢᠶᠡᠷᠡᠪᠡ᠃ 16 ᠢᠰᠦ᠋ᠰ ᠤᠬᠢᠶᠠᠯ ᠬᠦᠷᠲᠡᠮᠡᠭᠴᠡ ᠤᠰᠤᠨ ᠠᠴᠠ ᠭᠠᠷᠪᠠ᠃ ᠠᠩ᠋ᠬᠠᠷᠤᠭᠲᠤᠨ᠂ ᠲᠩᠷᠢ ᠲᠡᠭᠦᠨ ᠳᠦ ᠨᠡᠭᠡᠭᠡᠭᠳᠡᠵᠦ᠂ ᠪᠤᠷᠬᠠᠨ ᠤ ᠰᠦᠨᠡᠰᠦ ᠲᠠᠭᠲᠠᠭᠠ ᠮᠡᠲᠦ ᠥᠪᠡᠷ ᠦᠨ ᠬᠢᠨᠢ ᠳᠡᠭᠡᠷᠡ ᠪᠠᠭᠤᠬᠤ ᠶᠢ ᠬᠠᠷᠠᠯᠠ᠃ 17 ᠲᠡᠭᠡᠲᠡᠯᠡ ᠲᠩᠷᠢ ᠡᠴᠡ ᠳᠠᠭᠤ ᠭᠠᠷᠴᠤ᠄ 《ᠡᠨᠡ ᠪᠣᠯ ᠮᠢᠨᠦ ᠬᠠᠢᠷᠠᠲᠠᠢ ᠬᠦᠦ᠂ ᠲᠡᠷᠡ ᠨᠠᠳᠠ ᠳᠤ ᠲᠠᠭᠠᠯᠠᠭᠳᠠᠳᠠᠭ》 ᠭᠡᠪᠡ᠃