ᠮᠠᠲ᠋ᠠᠢ ᠠᠷᠪᠠ ᠶᠢᠰᠦ
ᠤᠷᠤᠭ ᠰᠠᠯᠬᠤ ᠶᠢᠨ ᠲᠤᠬᠠᠢ
1 ᠢᠰᠦ᠋ᠰ ᠡᠳᠡᠭᠡᠷ ᠦᠭᠡ ᠪᠡᠨ ᠶᠠᠷᠢᠭᠰᠠᠨ ᠤ ᠪᠠᠨ ᠳᠠᠷᠠᠭᠠ᠂ ᠭᠠᠯᠢᠯᠠᠶᠠ ᠠᠴᠠ ᠶᠠᠪᠤᠵᠤ ᠶᠣᠷᠳᠠᠨ ᠭᠣᠣᠯ ᠤᠨ ᠴᠠᠭᠠᠲᠤᠬᠢ ᠶᠦᠳᠠᠢ ᠨᠤᠲᠤᠭ ᠲᠤ ᠬᠦᠷᠪᠡ᠃ 2 ᠮᠠᠰᠢ ᠣᠯᠠᠨ ᠬᠥᠮᠦᠨ ᠲᠡᠭᠦᠨ ᠢ ᠳᠠᠭᠠᠬᠤ ᠳᠤ᠂ ᠢᠰᠦ᠋ᠰ ᠲᠡᠨᠳᠡ ᠲᠡᠳᠡᠨ ᠢ ᠡᠳᠡᠭᠡᠭᠡᠪᠡ᠃
3 ᠹᠠᠷᠢᠰᠠᠢᠴᠤᠳ ᠲᠡᠭᠦᠨ ᠢ ᠲᠡᠩᠰᠡᠬᠦ ᠭᠡᠵᠦ ᠢᠷᠡᠭᠡᠳ᠄ 《ᠬᠥᠮᠦᠨ ᠶᠠᠮᠠᠷ ᠨᠢᠭᠡᠨ ᠰᠢᠯᠲᠠᠭᠠᠨ ᠢᠶᠠᠷ ᠡᠬᠡᠨᠡᠷ ᠡᠴᠡ ᠪᠡᠨ ᠰᠠᠯᠵᠤ ᠪᠣᠯᠣᠨᠠ ᠤᠤ︖》 ᠭᠡᠬᠦ ᠳᠦ᠂ 4 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《ᠪᠦᠲᠦᠭᠡᠭᠴᠢ ᠠᠩ᠋ᠬᠠᠨ ᠠᠴᠠ ᠪᠠᠨ ᠬᠥᠮᠦᠨ ᠢ 〈ᠡᠷᠡᠭᠲᠡᠢ ᠡᠮᠡᠭᠲᠡᠢ ᠪᠠᠷ ᠵᠣᠬᠢᠶᠠᠭᠰᠠᠨ〉 ᠪᠥᠭᠡᠳ 5 ᠠᠢᠯᠠᠳᠬᠤ ᠳᠠᠭᠠᠨ᠄ 〈ᠡᠢᠮᠦ ᠡᠴᠡ ᠡᠷᠡ ᠬᠥᠮᠦᠨ ᠡᠴᠢᠭᠡ ᠡᠬᠡ ᠪᠡᠨ ᠣᠷᠬᠢᠭᠠᠳ ᠡᠬᠡᠨᠡᠷ ᠲᠡᠢ ᠪᠡᠨ ᠨᠠᠢᠯᠠᠨ᠂ ᠬᠣᠶᠠᠭᠤᠯᠠ ᠪᠠᠨ ᠨᠢᠭᠡ ᠮᠢᠬᠠᠨ ᠪᠡᠶᠡ ᠪᠣᠯᠣᠨᠠ〉 ᠭᠡᠰᠡᠨ ᠢ ᠲᠠ ᠨᠠᠷ ᠤᠩ᠋ᠰᠢᠭᠠ ᠦᠭᠡᠢ ᠤᠤ︖ 6 ᠡᠢᠨ ᠬᠦ ᠲᠡᠳᠡ ᠬᠣᠶᠠᠷ ᠪᠤᠰᠤ᠂ ᠨᠢᠭᠡ ᠪᠡᠶᠡ ᠮᠥᠨ᠃ ᠲᠡᠢᠨ ᠬᠦ ᠪᠤᠷᠬᠠᠨ ᠤ ᠬᠣᠯᠪᠣᠭᠰᠠᠨ ᠢ ᠬᠥᠮᠦᠨ ᠪᠦᠦ ᠰᠠᠯᠭᠠᠭ》 ᠭᠡᠪᠡ᠃ 7 ᠲᠡᠳᠡ ᠢᠰᠦ᠋ᠰ ᠲᠤ᠄ 《ᠲᠡᠭᠡᠪᠡᠯ ᠮᠣᠰᠧ ᠶᠠᠭᠠᠬᠢᠭᠠᠳ ᠰᠠᠯᠤᠯᠲᠠ ᠶᠢᠨ ᠭᠡᠷᠡᠴᠢ ᠥᠭᠴᠦ ᠲᠡᠭᠦᠨ ᠢ ᠪᠠᠨ ᠶᠠᠪᠤᠭᠤᠯ ᠭᠡᠵᠦ ᠵᠠᠷᠯᠢᠭᠳᠠᠭᠰᠠᠨ ᠪᠤᠢ︖》 ᠭᠡᠬᠦ ᠳᠦ᠂ 8 ᠲᠡᠷᠡ᠄ 《ᠲᠠ ᠨᠠᠷ ᠤᠨ ᠵᠢᠷᠦᠬᠡ ᠬᠠᠲᠠᠭᠤ ᠪᠣᠯᠬᠣᠷ ᠡᠬᠡᠨᠡᠷ ᠡᠴᠡ ᠪᠡᠨ ᠰᠠᠯᠬᠤ ᠶᠢ ᠴᠢᠨᠢ ᠮᠣᠰᠧ ᠵᠥᠪᠰᠢᠶᠡᠷᠡᠭᠰᠡᠨ ᠶᠤᠮ᠃ ᠭᠡᠪᠡᠴᠦ ᠠᠩ᠋ᠬᠠᠨ ᠠᠴᠠ ᠪᠠᠨ ᠲᠡᠢᠮᠦ ᠪᠠᠢᠭᠰᠠᠨ ᠪᠢᠰᠢ᠃ 9 ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠬᠡᠨ ᠰᠠᠳᠤᠷ ᠰᠠᠮᠠᠭᠤᠨ ᠠᠴᠠ ᠥᠭᠡᠷᠡ ᠰᠢᠯᠲᠠᠭᠠᠨ ᠢᠶᠠᠷ ᠡᠬᠡᠨᠡᠷ ᠡᠴᠡ ᠪᠡᠨ ᠰᠠᠯᠵᠤ᠂ ᠥᠭᠡᠷᠡ ᠡᠮᠡᠭᠲᠡᠢ ᠲᠡᠢ ᠭᠡᠷᠯᠡᠪᠡᠯ ᠵᠠᠪᠬᠠᠢᠷᠠᠭᠰᠠᠨ ᠪᠣᠯᠠᠢ》 ᠭᠡᠪᠡ᠃
10 ᠱᠠᠪᠢ ᠨᠠᠷ ᠨᠢ᠄ 《ᠨᠥᠬᠥᠷ ᠡᠬᠡᠨᠡᠷ ᠦᠨ ᠬᠠᠷᠢᠴᠠᠭᠠ ᠡᠢᠮᠦ ᠪᠠᠢᠪᠠᠯ ᠭᠡᠷᠯᠡᠬᠦ ᠦᠭᠡᠢ ᠨᠢ ᠳᠡᠭᠡᠷᠡ》 ᠭᠡᠬᠦ ᠳᠦ᠂ 11 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠡᠨᠡ ᠵᠢᠭᠠᠪᠤᠷᠢ ᠶᠢ ᠬᠥᠮᠦᠨ ᠪᠦᠬᠦᠨ ᠳᠠᠭᠠᠭᠠᠵᠤ ᠴᠢᠳᠠᠬᠤ ᠪᠢᠰᠢ᠂ ᠵᠥᠪᠰᠢᠶᠡᠷᠡᠭᠳᠡᠭᠰᠡᠨ ᠬᠥᠮᠦᠰ ᠯᠠ ᠴᠢᠳᠠᠨᠠ᠃ 12 ᠡᠬᠡ ᠶᠢᠨ ᠢᠶᠠᠨ ᠬᠡᠪᠡᠯᠢ ᠡᠴᠡ ᠲᠥᠷᠥᠬᠦ ᠳᠡᠭᠡᠨ ᠲᠠᠢᠭᠠᠨ ᠲᠥᠷᠥᠭᠰᠡᠨ ᠬᠥᠮᠦᠰ ᠪᠠᠢᠳᠠᠭ᠂ ᠬᠥᠮᠦᠨ ᠳᠦ ᠲᠠᠢᠭᠠᠯᠠᠭᠳᠠᠭᠰᠠᠨ ᠲᠠᠢᠭᠠᠨ ᠨᠤᠭᠤᠳ ᠴᠤ ᠪᠠᠢᠳᠠᠭ᠃ ᠪᠠᠰᠠ ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠤᠨ ᠲᠥᠯᠥᠭᠡ ᠥᠪᠡᠷ ᠢ ᠪᠠᠨ ᠲᠠᠢᠭᠠᠯᠠᠭᠰᠠᠨ ᠲᠠᠢᠭᠠᠨ ᠨᠤᠭᠤᠳ ᠴᠤ ᠪᠠᠢᠳᠠᠭ᠃ ᠡᠭᠦᠨ ᠢ ᠳᠠᠭᠠᠭᠠᠨ ᠠᠪᠴᠤ ᠴᠢᠳᠠᠬᠤ ᠬᠥᠮᠦᠨ ᠨᠢ ᠠᠪᠤᠭᠲᠤᠨ》 ᠭᠡᠪᠡ᠃
ᠢᠰᠦ᠋ᠰ ᠬᠡᠦᠬᠡᠳ ᠤᠳ ᠢ ᠢᠷᠥᠭᠡᠭᠰᠡᠨ ᠨᠢ
13 ᠲᠡᠭᠡᠬᠦ ᠳᠦ ᠬᠥᠮᠦᠰ ᠬᠡᠦᠬᠡᠳ ᠤᠳ ᠤᠨ ᠢᠶᠠᠨ ᠳᠡᠭᠡᠷᠡ ᠮᠤᠲᠤᠷ ᠲᠠᠯᠪᠢᠭᠤᠯᠤᠨ ᠳᠠᠭᠠᠳᠬᠠᠯᠭᠠᠬᠤ ᠭᠡᠵᠦ ᠢᠰᠦ᠋ᠰ ᠤᠷᠤᠭᠤ ᠠᠪᠴᠢᠷᠠᠵᠤ ᠪᠠᠢᠬᠤ ᠳᠤ᠂ ᠱᠠᠪᠢ ᠨᠠᠷ ᠨᠢ ᠲᠡᠳᠡᠨ ᠢ ᠵᠢᠮᠡᠯᠡᠵᠡᠢ᠃ 14 ᠬᠠᠷᠢᠨ ᠢᠰᠦ᠋ᠰ᠄ 《ᠬᠡᠦᠬᠡᠳ ᠤᠳ ᠤᠨ ᠨᠠᠳᠠ ᠤᠷᠤᠭᠤ ᠢᠷᠡᠬᠦ ᠶᠢ ᠵᠥᠪᠰᠢᠶᠡᠷᠡ᠂ ᠪᠦᠦ ᠬᠣᠷᠢᠭᠯᠠ᠃ ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠪᠣᠯ ᠡᠢᠮᠦᠷᠬᠦ ᠬᠥᠮᠦᠰ ᠦᠨ ᠬᠢ ᠶᠤᠮ》 ᠭᠡᠳ᠂ 15 ᠲᠡᠳᠡᠨ ᠦ ᠳᠡᠭᠡᠷᠡ ᠮᠤᠲᠤᠷ ᠢᠶᠠᠨ ᠲᠠᠯᠪᠢᠭᠰᠠᠨ ᠤ ᠳᠠᠷᠠᠭᠠ ᠲᠡᠨᠳᠡ ᠡᠴᠡ ᠶᠠᠪᠤᠪᠠ᠃
ᠪᠠᠶᠠᠨ ᠵᠠᠯᠠᠭᠤ ᠨᠣᠶᠠᠨ
16 ᠨᠢᠭᠡ ᠬᠥᠮᠦᠨ ᠢᠷᠡᠭᠡᠳ ᠲᠡᠭᠦᠨ ᠳᠦ᠄ 《ᠪᠠᠭᠰᠢ ᠡ᠂ ᠮᠥᠩᠬᠡ ᠠᠮᠢ ᠶᠢ ᠣᠯᠬᠤ ᠶᠢᠨ ᠲᠤᠯᠠᠳᠠ ᠪᠢ ᠶᠠᠮᠠᠷ ᠰᠠᠢᠨ ᠢ ᠦᠢᠯᠡᠳᠬᠦ ᠶᠣᠰᠣᠲᠠᠢ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 17 ᠢᠰᠦ᠋ᠰ᠄ 《ᠴᠢ ᠶᠠᠭᠤᠨ ᠳᠤ ᠨᠠᠳᠠ ᠠᠴᠠ ᠰᠠᠢᠨ ᠤ ᠲᠤᠬᠠᠢ ᠠᠰᠠᠭᠤᠨᠠ ᠪᠤᠢ︖ ᠰᠠᠢᠨ ᠭᠡᠭᠴᠢ ᠨᠢ ᠭᠠᠭᠴᠠ ᠯᠠ ᠪᠠᠢᠳᠠᠭ᠃ ᠴᠢ ᠮᠥᠩᠬᠡ ᠠᠮᠢ ᠳᠤ ᠣᠷᠣᠬᠤ ᠶᠢ ᠬᠦᠰᠡᠵᠦ ᠪᠠᠢᠪᠠᠯ ᠵᠠᠷᠯᠢᠭ ᠤᠳ ᠢ ᠰᠠᠬᠢ》 ᠭᠡᠪᠡ᠃ 18 ᠲᠡᠷᠡ ᠬᠥᠮᠦᠨ᠄ 《ᠠᠯᠢ ᠶᠢ ᠨᠢ ᠪᠤᠢ︖》 ᠭᠡᠬᠦ ᠳᠦ᠂ ᠢᠰᠦ᠋ᠰ᠄ 《ᠪᠦᠦ ᠠᠯᠠ᠂ ᠪᠦᠦ ᠵᠠᠪᠬᠠᠢᠷᠠ᠂ ᠪᠦᠦ ᠬᠤᠯᠠᠭᠠᠢᠯᠠ᠂ ᠬᠤᠳᠠᠯ ᠢᠶᠠᠷ ᠪᠦᠦ ᠭᠡᠷᠡᠴᠢᠯᠡ᠃ 19 ᠡᠴᠢᠭᠡ ᠡᠬᠡ ᠪᠡᠨ ᠬᠦᠨᠳᠦᠯᠡ᠂ ᠬᠥᠷᠰᠢ ᠪᠠᠨ ᠥᠪᠡᠷ ᠦᠨ ᠢᠶᠠᠨ ᠪᠡᠶᠡ ᠮᠡᠲᠦ ᠬᠠᠢᠷᠠᠯᠠ ᠵᠡᠷᠭᠡ ᠶᠤᠮ》 ᠭᠡᠵᠡᠢ᠃ 20 ᠲᠡᠷᠡ ᠵᠠᠯᠠᠭᠤ ᠢᠰᠦ᠋ᠰ ᠲᠤ᠄ 《ᠡᠨᠡ ᠪᠦᠬᠦᠨ ᠢ ᠪᠢ ᠰᠠᠬᠢᠭᠰᠠᠨ᠂ ᠣᠳᠣ ᠨᠠᠳᠠ ᠳᠤ ᠶᠠᠭᠤ ᠳᠤᠲᠠᠭᠤ ᠪᠠᠢᠭᠠ ᠶᠤᠮ ᠪᠤᠢ︖》 ᠭᠡᠬᠦ ᠳᠦ᠂ 21 ᠢᠰᠦ᠋ᠰ᠄ 《ᠴᠢ ᠲᠡᠭᠦᠰ ᠪᠣᠯᠬᠤ ᠶᠢ ᠬᠦᠰᠡᠵᠦ ᠪᠠᠢᠪᠠᠯ ᠶᠠᠪᠤ᠂ ᠪᠠᠢᠳᠠᠭ ᠢᠶᠠᠨ ᠬᠤᠳᠠᠯᠳᠤᠭᠠᠳ ᠶᠠᠳᠠᠭᠤᠴᠤᠳ ᠲᠤ ᠥᠭ᠃ ᠲᠡᠭᠡᠪᠡᠯ ᠴᠢ ᠲᠩᠷᠢ ᠳᠤ ᠡᠷᠳᠡᠨᠢᠰ ᠲᠠᠢ ᠪᠣᠯᠣᠨᠠ᠃ ᠲᠡᠭᠡᠭᠡᠳ ᠢᠷᠡᠵᠦ ᠨᠠᠮᠠᠶᠢ ᠳᠠᠭᠠ》 ᠭᠡᠪᠡ᠃ 22 ᠲᠡᠷᠡ ᠵᠠᠯᠠᠭᠤ ᠶᠡᠬᠡ ᠬᠥᠷᠥᠩᠭᠡ ᠲᠠᠢ ᠪᠣᠯᠬᠣᠷ ᠡᠨᠡ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠭᠤᠨᠢᠭᠲᠠᠢ ᠪᠠᠷ ᠶᠠᠪᠤᠵᠠᠢ᠃
23 ᠢᠰᠦ᠋ᠰ ᠱᠠᠪᠢ ᠨᠠᠷ ᠲᠠᠭᠠᠨ᠄ 《ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠂ ᠪᠠᠶᠠᠨ ᠬᠥᠮᠦᠨ ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠳᠤ ᠣᠷᠣᠬᠤ ᠳᠤ ᠪᠡᠷᠬᠡ ᠲᠠᠢ᠃ 24 ᠲᠠ ᠨᠠᠷ ᠲᠤ ᠳᠠᠬᠢᠨ ᠬᠡᠯᠡᠶᠡ᠃ ᠪᠠᠶᠠᠨ ᠬᠥᠮᠦᠨ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠳᠤ ᠣᠷᠣᠬᠤ ᠠᠴᠠ ᠲᠡᠪᠡᠨᠡ ᠶᠢᠨ ᠰᠦᠪᠡ ᠪᠡᠷ ᠲᠡᠮᠡᠭᠡ ᠣᠷᠣᠬᠤ ᠨᠢ ᠬᠢᠯᠪᠠᠷᠬᠠᠨ》 ᠭᠡᠪᠡ᠃ 25 ᠱᠠᠪᠢ ᠨᠠᠷ ᠨᠢ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠶᠡᠬᠡ ᠭᠠᠢᠬᠠᠵᠠᠭᠠᠨ᠄ 《ᠲᠡᠭᠡᠪᠡᠯ ᠬᠡᠨ ᠠᠪᠤᠷᠠᠭᠳᠠᠵᠤ ᠴᠢᠳᠠᠬᠤ ᠶᠤᠮ ᠪᠤᠢ︖》 ᠭᠡᠬᠦ ᠳᠦ᠂ 26 ᠢᠰᠦ᠋ᠰ ᠲᠡᠳᠡᠨ ᠢ ᠰᠢᠷᠲᠡᠵᠦ᠄ 《ᠬᠥᠮᠦᠨ ᠳᠦ ᠪᠣᠯᠣᠮᠵᠢ ᠦᠭᠡᠢ᠂ ᠬᠠᠷᠢᠨ ᠪᠤᠷᠬᠠᠨ ᠳᠤ ᠪᠦᠬᠦ ᠶᠠᠭᠤᠮᠠ ᠪᠣᠯᠣᠮᠵᠢ ᠲᠠᠢ》 ᠭᠡᠵᠡᠢ᠃
ᠱᠠᠪᠢ ᠨᠠᠷ ᠤᠨ ᠠᠪᠬᠤ ᠱᠠᠩᠨᠠᠯ
27 ᠲᠡᠭᠡᠲᠡᠯᠡ ᠫᠧᠲ᠋ᠧᠷ ᠲᠡᠭᠦᠨ ᠳᠦ᠄ 《ᠬᠠᠷᠠ ᠳᠠ᠂ ᠪᠢᠳᠡ ᠪᠦᠬᠦᠨ ᠢᠶᠡᠨ ᠣᠷᠬᠢᠭᠠᠳ ᠲᠠᠨ ᠢ ᠳᠠᠭᠠᠭᠰᠠᠨ᠂ ᠲᠡᠢᠨ ᠬᠦ ᠪᠢᠳᠡ ᠶᠠᠭᠤ ᠲᠠᠢ ᠪᠣᠯᠬᠤ ᠪᠤᠢ︖》 ᠭᠡᠬᠦ ᠳᠦ᠂ 28 ᠢᠰᠦ᠋ᠰ᠄ 《ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠬᠠᠮᠤᠭ ᠶᠠᠭᠤᠮᠠ ᠰᠢᠨᠡᠴᠢᠯᠡᠭᠳᠡᠵᠦ᠂ ᠬᠥᠮᠦᠨ ᠦ ᠬᠦᠦ ᠵᠢᠪᠬᠤᠯᠠᠩᠲᠤ ᠰᠡᠨᠲᠢ ᠳᠡᠭᠡᠨ ᠰᠠᠭᠤᠬᠤ ᠦᠶᠡ ᠳᠦ᠂ ᠨᠠᠮᠠᠶᠢ ᠳᠠᠭᠠᠭᠰᠠᠨ ᠲᠠ ᠨᠠᠷ ᠴᠤ ᠮᠥᠨ ᠠᠷᠪᠠᠨ ᠬᠣᠶᠠᠷ ᠰᠡᠨᠲᠢ ᠳᠤ ᠰᠠᠭᠤᠭᠠᠳ ᠢᠰᠷᠧᠯ ᠤᠨ ᠠᠷᠪᠠᠨ ᠬᠣᠶᠠᠷ ᠣᠪᠣᠭ ᠢ ᠰᠢᠭᠦᠬᠦ ᠪᠣᠯᠣᠨᠠ᠃ 29 ᠮᠢᠨᠦ ᠨᠡᠷᠡ ᠶᠢᠨ ᠲᠥᠯᠥᠭᠡ ᠭᠡᠷ ᠣᠷᠣᠨ᠂ ᠠᠬᠠ ᠳᠡᠭᠦᠦ᠂ ᠡᠭᠡᠴᠢ ᠳᠡᠭᠦᠦ᠂ ᠡᠴᠢᠭᠡ ᠪᠤᠶᠤ ᠡᠬᠡ᠂ ᠦᠷᠡ ᠬᠡᠦᠬᠡᠳ ᠤᠳ᠂ ᠡᠰᠡᠪᠡᠯ ᠭᠠᠵᠠᠷ ᠲᠠᠷᠢᠶᠠ ᠪᠠᠨ ᠣᠷᠬᠢᠭᠰᠠᠨ ᠬᠥᠮᠦᠨ ᠪᠣᠯᠭᠠᠨ ᠵᠠᠭᠤ ᠳᠠᠬᠢᠨ ᠶᠡᠬᠡ ᠶᠢ ᠬᠦᠷᠲᠡᠵᠦ ᠮᠥᠩᠬᠡ ᠠᠮᠢ ᠶᠢ ᠥᠪᠯᠡᠬᠦ ᠪᠣᠯᠣᠨᠠ᠃ 30 ᠬᠠᠷᠢᠨ ᠲᠦᠷᠦᠭᠦᠨ ᠳᠦ ᠪᠠᠢᠭᠠ ᠣᠯᠠᠨ ᠨᠢ ᠰᠡᠭᠦᠯᠴᠢ ᠶᠢᠨ ᠬᠢ ᠪᠣᠯᠵᠤ᠂ ᠰᠡᠭᠦᠯ ᠳᠦ ᠪᠠᠢᠭᠠ ᠣᠯᠠᠨ ᠨᠢ ᠲᠦᠷᠦᠭᠦᠨ ᠦ ᠬᠢ ᠪᠣᠯᠣᠨᠠ᠃