ᠮᠠᠲ᠋ᠠᠢ ᠬᠣᠷᠢᠨ ᠭᠤᠷᠪᠠ
ᠹᠠᠷᠢᠰᠠᠢᠴᠤᠳ ᠤᠨ ᠦᠢᠯᠡ ᠶᠠᠪᠤᠳᠠᠯ ᠢ ᠢᠯᠡᠴᠢᠯᠡᠭᠰᠡᠨ ᠨᠢ
1 ᠲᠡᠭᠡᠬᠦ ᠳᠦ᠂ ᠢᠰᠦ᠋ᠰ ᠬᠤᠷᠠᠭᠰᠠᠨ ᠣᠯᠠᠨ ᠬᠢᠭᠡᠳ ᠱᠠᠪᠢ ᠨᠠᠷ ᠲᠠᠭᠠᠨ ᠠᠢᠯᠠᠳᠤᠭᠰᠠᠨ ᠨᠢ᠄ 2 《ᠪᠢᠴᠢᠭᠲᠡᠳ ᠪᠣᠯᠣᠨ ᠹᠠᠷᠢᠰᠠᠢᠴᠤᠳ ᠮᠣᠰᠧ ᠶᠢᠨ ᠰᠠᠭᠤᠳᠠᠯ ᠳᠤ ᠰᠠᠭᠤᠭᠰᠠᠨ ᠪᠠᠢᠳᠠᠭ᠃ 3 ᠲᠡᠢᠮᠦ ᠡᠴᠡ ᠲᠠ ᠨᠠᠷ ᠲᠤ ᠬᠡᠯᠡᠳᠡᠭ ᠪᠣᠯᠭᠠᠨ ᠢ ᠨᠢ ᠪᠡᠶᠡᠯᠡᠭᠦᠯ᠂ ᠰᠠᠬᠢ᠃ ᠬᠠᠷᠢᠨ ᠲᠡᠳᠡᠨ ᠦ ᠦᠢᠯᠡᠰ ᠢ ᠪᠦᠦ ᠳᠠᠭᠠ᠂ ᠲᠡᠳᠡ ᠬᠡᠯᠡᠳᠡᠭ ᠪᠣᠯᠪᠠᠴᠤ ᠪᠡᠶᠡᠯᠡᠭᠦᠯᠳᠡᠭ ᠦᠭᠡᠢ᠃ 4 ᠲᠡᠳᠡ ᠳᠠᠭᠠᠭᠠᠵᠤ ᠳᠡᠢᠯᠦᠰᠢ ᠦᠭᠡᠢ ᠬᠦᠨᠳᠦ ᠠᠴᠢᠶᠠ ᠶᠢ ᠪᠠᠭᠯᠠᠵᠤ ᠬᠥᠮᠦᠰ ᠦᠨ ᠮᠥᠷᠥᠨ ᠳᠡᠭᠡᠷᠡ ᠲᠠᠯᠪᠢᠳᠠᠭ ᠪᠣᠯᠪᠠᠴᠤ ᠠᠴᠢᠶᠠ ᠵᠥᠭᠡᠭᠡᠬᠦ ᠳᠦ ᠥᠪᠡᠷᠰᠡᠳ ᠦᠨ ᠢᠶᠠᠨ ᠭᠠᠭᠴᠠ ᠬᠤᠷᠤᠭᠤ ᠶᠢ ᠴᠤ ᠬᠥᠳᠡᠯᠭᠡᠬᠦ ᠳᠤᠷᠠ ᠦᠭᠡᠢ ᠪᠠᠢᠳᠠᠭ᠃ 5 ᠲᠡᠳᠡ ᠬᠥᠮᠦᠰ ᠲᠦ ᠬᠠᠷᠠᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠪᠦᠬᠦ ᠵᠦᠢᠯ ᠢᠶᠠᠨ ᠬᠢᠳᠡᠭ ᠶᠤᠮ᠃ ᠠᠷᠢᠭᠤᠨ ᠦᠭᠡ ᠶᠢᠨ ᠬᠠᠢᠷᠴᠠᠭ 39 ᠢᠶᠠᠨ ᠲᠣᠮᠣᠰᠬᠠᠨ᠂ ᠬᠤᠪᠴᠠᠰᠤᠨ ᠤ ᠰᠠᠴᠤᠭ ᠢᠶᠠᠨ ᠤᠷᠲᠤ ᠤᠨᠵᠢᠭᠤᠯᠵᠤ ᠶᠠᠪᠤᠳᠠᠭ᠃ 6 ᠲᠡᠳᠡ ᠨᠠᠢᠷ ᠤᠨ ᠬᠣᠢᠮᠣᠷ᠂ ᠬᠤᠷᠠᠯ ᠤᠨ ᠲᠠᠩᠬᠢᠮ ᠤᠨ ᠳᠡᠭᠡᠳᠦ ᠰᠠᠭᠤᠳᠠᠯ ᠳᠤ ᠰᠠᠭᠤᠬᠤ᠂ 7 ᠵᠡᠭᠡᠯᠢ ᠳᠡᠭᠡᠷᠡ ᠮᠡᠨᠳᠦᠴᠢᠯᠡᠭᠦᠯᠬᠦ ᠪᠠ 〈ᠪᠠᠭᠰᠢ ᠡ〉 ᠭᠡᠵᠦ ᠳᠠᠭᠤᠳᠠᠭᠤᠯᠬᠤ ᠳᠤᠷᠠᠲᠠᠢ᠃ 8 ᠬᠠᠷᠢᠨ ᠲᠠ ᠨᠠᠷ 〈ᠪᠠᠭᠰᠢ ᠡ〉 ᠭᠡᠵᠦ ᠪᠢᠲᠡᠭᠡᠢ ᠳᠠᠭᠤᠳᠠᠭᠤᠯ᠂ ᠲᠠ ᠨᠠᠷ ᠲᠤ ᠭᠠᠭᠴᠠᠬᠠᠨ ᠪᠠᠭᠰᠢ ᠪᠠᠢᠳᠠᠭ ᠪᠥᠭᠡᠳ ᠲᠠ ᠨᠠᠷ ᠪᠦᠭᠦᠳᠡᠭᠡᠷ ᠠᠬᠠ ᠳᠡᠭᠦᠦᠰ ᠪᠢᠯᠡ᠃ 9 ᠭᠠᠵᠠᠷ ᠳᠡᠭᠡᠷᠡ ᠬᠡᠨ ᠢ ᠴᠤ 〈ᠪᠢᠳᠡᠨ ᠦ ᠡᠴᠢᠭᠡ〉 ᠭᠡᠵᠦ ᠪᠢᠲᠡᠭᠡᠢ ᠳᠠᠭᠤᠳᠠᠵᠠᠭᠠ᠃ ᠲᠠ ᠨᠠᠷ ᠲᠤ ᠭᠠᠭᠴᠠᠬᠠᠨ ᠡᠴᠢᠭᠡ ᠪᠠᠢᠳᠠᠭ ᠪᠥᠭᠡᠳ ᠲᠡᠷᠡ ᠨᠢ ᠲᠩᠷᠢ ᠳᠤ ᠪᠤᠢ ᠪᠢᠯᠡ᠃ 10 ᠲᠠ ᠨᠠᠷ ᠤᠳᠤᠷᠢᠳᠤᠭᠴᠢᠳ ᠭᠡᠵᠦ ᠪᠢᠲᠡᠭᠡᠢ ᠳᠠᠭᠤᠳᠠᠭᠤᠯ᠃ ᠲᠠ ᠨᠠᠷ ᠲᠤ ᠭᠠᠭᠴᠠᠬᠠᠨ ᠤᠳᠤᠷᠢᠳᠤᠭᠴᠢ ᠪᠠᠢᠳᠠᠭ ᠪᠥᠭᠡᠳ ᠲᠡᠷᠡ ᠨᠢ ᠾᠷᠢᠰᠲ᠋ᠣᠰ ᠶᠤᠮ᠃ 11 ᠬᠠᠷᠢᠨ ᠲᠠ ᠨᠠᠷ ᠤᠨ ᠳᠤᠮᠳᠠ ᠠᠴᠠ ᠬᠠᠮᠤᠭ ᠤᠨ ᠠᠭᠤᠤ ᠨᠢ ᠲᠠ ᠨᠠᠷ ᠤᠨ ᠦᠢᠯᠡᠴᠢᠯᠡᠭᠴᠢ ᠪᠣᠯᠠᠢ᠃ 12 ᠥᠪᠡᠷ ᠢ ᠪᠠᠨ ᠳᠡᠭᠡᠳᠦᠯᠡᠭᠴᠢ ᠨᠢ ᠳᠣᠣᠷᠠᠰᠢᠶᠠᠭᠳᠠᠨᠠ᠂ ᠥᠪᠡᠷ ᠢ ᠪᠠᠨ ᠳᠣᠣᠷᠠᠰᠢᠶᠠᠭᠴᠢ ᠨᠢ ᠳᠡᠭᠡᠳᠦᠯᠡᠭᠳᠡᠨᠡ᠃
ᠳᠣᠯᠣᠭᠠᠨ ᠭᠠᠢ
13 ᠲᠠ ᠨᠠᠷ ᠲᠤ ᠭᠠᠢ ᠪᠣᠯᠣᠨᠠ᠂ ᠪᠢᠴᠢᠭᠲᠡᠳ᠂ ᠹᠠᠷᠢᠰᠠᠢᠴᠤᠳ ᠪᠠ ᠬᠣᠶᠠᠷ ᠨᠢᠭᠤᠷᠲᠤ ᠬᠥᠮᠦᠰ ᠡ︕ ᠲᠠ ᠨᠠᠷ ᠬᠥᠮᠦᠰ ᠦᠨ ᠡᠮᠦᠨᠡ ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠤᠨ ᠡᠭᠦᠳᠡ ᠶᠢ ᠬᠠᠭᠠᠵᠤ᠂ ᠥᠪᠡᠷᠰᠡᠳ ᠢᠶᠡᠨ ᠣᠷᠣᠬᠤ ᠦᠭᠡᠢ᠂ ᠣᠷᠣᠬᠤ ᠭᠡᠵᠦ ᠪᠠᠢᠭᠠ ᠬᠥᠮᠦᠰ ᠢ ᠴᠤ ᠣᠷᠣᠭᠤᠯᠬᠤ ᠦᠭᠡᠢ ᠪᠠᠢᠳᠠᠭ᠃ 14 40 15 ᠲᠠ ᠨᠠᠷ ᠲᠤ ᠭᠠᠢ ᠪᠣᠯᠣᠨᠠ᠂ ᠪᠢᠴᠢᠭᠲᠡᠳ᠂ ᠹᠠᠷᠢᠰᠠᠢᠴᠤᠳ ᠪᠠ ᠬᠣᠶᠠᠷ ᠨᠢᠭᠤᠷᠲᠤ ᠬᠥᠮᠦᠰ ᠡ᠂ ᠲᠠ ᠨᠠᠷ ᠭᠠᠭᠴᠠ ᠬᠥᠮᠦᠨ ᠢ ᠴᠤ ᠢᠲᠡᠭᠡᠭᠴᠢ ᠪᠣᠯᠭᠠᠬᠤ ᠶᠢᠨ ᠲᠤᠯᠠᠳᠠ ᠳᠠᠯᠠᠢ᠂ ᠬᠠᠭᠤᠷᠠᠢ ᠪᠠᠷ ᠭᠠᠵᠠᠷ ᠰᠠᠢ ᠦᠭᠡᠢ ᠶᠠᠪᠤᠵᠤ᠂ ᠣᠯᠴᠢᠬᠠᠪᠠᠯ ᠲᠡᠭᠦᠨ ᠢ ᠥᠪᠡᠷᠰᠡᠳ ᠡᠴᠡ ᠪᠡᠨ ᠳᠠᠬᠢᠨ ᠢᠶᠠᠷ ᠢᠯᠡᠭᠦᠦ ᠲᠠᠮᠤ ᠶᠢᠨ ᠬᠡᠦᠬᠡᠳ ᠪᠣᠯᠭᠠᠳᠠᠭ᠃
16 ᠲᠠ ᠨᠠᠷ ᠲᠤ ᠭᠠᠢ ᠪᠣᠯᠣᠨᠠ᠂ ᠰᠣᠬᠣᠷ ᠵᠠᠮᠴᠢᠯᠠᠭᠴᠢ ᠡ᠂ ᠲᠠ ᠨᠠᠷ᠄ 〈ᠥᠷᠭᠥᠭᠡ ᠪᠡᠷ ᠲᠠᠩ᠋ᠭᠠᠷᠢᠭᠯᠠᠭᠴᠢ ᠨᠢ ᠶᠠᠮᠠᠷ ᠴᠤ ᠡᠭᠦᠷᠭᠡ ᠦᠭᠡᠢ᠂ ᠬᠠᠷᠢᠨ ᠥᠷᠭᠥᠭᠡᠨ ᠦ ᠠᠯᠲᠠ ᠪᠠᠷ ᠲᠠᠩ᠋ᠭᠠᠷᠢᠭᠯᠠᠭᠴᠢ ᠨᠢ ᠪᠡᠶᠡᠯᠡᠭᠦᠯᠬᠦ ᠡᠭᠦᠷᠭᠡ ᠲᠠᠢ〉 ᠭᠡᠳᠡᠭ᠃ 17 ᠮᠤᠩ᠋ᠬᠠᠭ ᠰᠣᠬᠣᠷ ᠬᠥᠮᠦᠰ ᠡ︕ ᠠᠯᠢ ᠨᠢ ᠢᠯᠡᠭᠦᠦ ᠴᠢᠬᠤᠯᠠ ᠪᠤᠢ︖ ᠠᠯᠲᠠ ᠤᠤ︖ ᠡᠰᠡᠪᠡᠯ ᠠᠯᠲᠠ ᠶᠢ ᠠᠷᠢᠭᠤᠰᠬᠠᠳᠠᠭ ᠥᠷᠭᠥᠭᠡ ᠤᠤ︖ 18 ᠲᠠ ᠨᠠᠷ ᠮᠥᠨ᠄ 〈ᠲᠠᠬᠢᠯ ᠤᠨ ᠰᠢᠷᠡᠭᠡ ᠪᠡᠷ ᠲᠠᠩ᠋ᠭᠠᠷᠢᠭᠯᠠᠭᠴᠢ ᠨᠢ ᠶᠠᠮᠠᠷ ᠴᠤ ᠡᠭᠦᠷᠭᠡ ᠦᠭᠡᠢ᠂ ᠬᠠᠷᠢᠨ ᠲᠡᠭᠦᠨ ᠦ ᠳᠡᠭᠡᠷᠡᠬᠢ ᠡᠷᠭᠦᠯ ᠢᠶᠡᠷ ᠲᠠᠩ᠋ᠭᠠᠷᠢᠭᠯᠠᠭᠴᠢ ᠨᠢ ᠪᠡᠶᠡᠯᠡᠭᠦᠯᠬᠦ ᠡᠭᠦᠷᠭᠡ ᠲᠠᠢ〉 ᠭᠡᠳᠡᠭ᠃ 19 ᠰᠣᠬᠣᠷ ᠬᠥᠮᠦᠰ ᠡ᠂ ᠠᠯᠢ ᠨᠢ ᠢᠯᠡᠭᠦᠦ ᠴᠢᠬᠤᠯᠠ ᠪᠤᠢ︖ ᠡᠷᠭᠦᠯ ᠤᠤ︖ ᠡᠰᠡᠪᠡᠯ ᠲᠡᠷᠡ ᠡᠷᠭᠦᠯ ᠢ ᠠᠷᠢᠭᠤᠰᠬᠠᠳᠠᠭ ᠲᠠᠬᠢᠯ ᠤᠨ ᠰᠢᠷᠡᠭᠡ ᠤᠤ︖ 20 ᠲᠠᠬᠢᠯ ᠤᠨ ᠰᠢᠷᠡᠭᠡ ᠪᠡᠷ ᠲᠠᠩ᠋ᠭᠠᠷᠢᠭᠯᠠᠭᠴᠢ ᠨᠢ ᠲᠠᠬᠢᠯ ᠤᠨ ᠰᠢᠷᠡᠭᠡ ᠪᠣᠯᠣᠨ ᠳᠡᠭᠡᠷᠡ ᠨᠢ ᠪᠠᠢᠭᠠ ᠪᠦᠬᠦᠨ ᠢᠶᠡᠷ ᠲᠠᠩ᠋ᠭᠠᠷᠢᠭᠯᠠᠵᠤ ᠪᠠᠢᠭᠠ ᠬᠡᠷᠡᠭ᠂ 21 ᠥᠷᠭᠥᠭᠡ ᠪᠡᠷ ᠲᠠᠩ᠋ᠭᠠᠷᠢᠭᠯᠠᠭᠴᠢ ᠨᠢ ᠥᠷᠭᠥᠭᠡ ᠪᠣᠯᠣᠨ ᠲᠡᠭᠦᠨ ᠳᠣᠲᠣᠷᠠ ᠣᠷᠣᠰᠢᠭᠴᠢ ᠪᠠᠷ ᠲᠠᠩ᠋ᠭᠠᠷᠢᠭᠯᠠᠵᠤ ᠪᠠᠢᠭᠠ ᠬᠡᠷᠡᠭ ᠪᠥᠭᠡᠳ 22 ᠲᠩᠷᠢ ᠪᠠᠷ ᠲᠠᠩ᠋ᠭᠠᠷᠢᠭᠯᠠᠭᠴᠢ ᠨᠢ ᠪᠤᠷᠬᠠᠨ ᠤ ᠰᠡᠨᠲᠢ ᠪᠠᠷ ᠪᠣᠯᠣᠨ ᠳᠡᠭᠡᠷᠡ ᠨᠢ ᠰᠠᠭᠤᠭᠴᠢ ᠪᠠᠷ ᠲᠠᠩ᠋ᠭᠠᠷᠢᠭᠯᠠᠵᠤ ᠪᠠᠢᠭᠠ ᠬᠡᠷᠡᠭ ᠶᠤᠮ᠃
23 ᠲᠠ ᠨᠠᠷ ᠲᠤ ᠭᠠᠢ ᠪᠣᠯᠣᠨᠠ᠂ ᠪᠢᠴᠢᠭᠲᠡᠳ᠂ ᠹᠠᠷᠢᠰᠠᠢᠴᠤᠳ ᠪᠠ ᠬᠣᠶᠠᠷ ᠨᠢᠭᠤᠷᠲᠤ ᠬᠥᠮᠦᠰ ᠡ᠂ ᠲᠠ ᠨᠠᠷ ᠪᠠᠳᠷᠠᠰᠢ᠂ ᠵᠣᠷᠭᠣᠳᠠᠰᠤ᠂ ᠴᠤᠭᠤᠷ ᠨᠣᠭᠣᠭᠠ ᠶᠢᠨ ᠠᠷᠪᠠᠨ ᠤ ᠨᠢᠭᠡ ᠶᠢ ᠡᠷᠭᠦᠳᠡᠭ ᠪᠠᠢᠲᠠᠯᠠ ᠪᠠᠨ ᠢᠯᠡᠭᠦᠦ ᠴᠢᠬᠤᠯᠠ ᠪᠣᠯᠬᠤ ᠬᠠᠤᠯᠢ ᠶᠢᠨ ᠵᠥᠪ ᠶᠣᠰᠣ᠂ ᠨᠢᠭᠦᠯᠡᠰᠦᠯ᠂ ᠢᠲᠡᠭᠡᠯ ᠵᠡᠷᠭᠡ ᠶᠢ ᠬᠠᠶᠠᠭᠰᠠᠨ ᠪᠠᠢᠳᠠᠭ᠃ ᠬᠠᠷᠢᠨ ᠡᠳᠡᠭᠡᠷ ᠢ ᠪᠡᠶᠡᠯᠡᠭᠦᠯᠬᠦ ᠶᠣᠰᠣᠲᠠᠢ ᠪᠥᠭᠡᠳ ᠲᠡᠳᠡᠭᠡᠷ ᠢ ᠴᠤ ᠬᠠᠶᠠᠵᠤ ᠪᠣᠯᠬᠤ ᠦᠭᠡᠢ ᠰᠠᠨ᠃
24 ᠰᠣᠬᠣᠷ ᠵᠠᠮᠴᠢᠯᠠᠭᠴᠢᠳ ᠡ᠂ ᠲᠠ ᠨᠠᠷ ᠰᠢᠮᠠᠭᠤᠯ ᠢ ᠱᠦᠭᠦᠨ ᠭᠠᠷᠭᠠᠳᠠᠭ ᠪᠠᠢᠲᠠᠯᠠ ᠪᠠᠨ ᠲᠡᠮᠡᠭᠡ ᠶᠢ ᠵᠠᠯᠭᠢᠴᠢᠬᠠᠳᠠᠭ ᠪᠠᠢᠨᠠ᠃ 25 ᠲᠠ ᠨᠠᠷ ᠲᠤ ᠭᠠᠢ ᠪᠣᠯᠣᠨᠠ᠂ ᠪᠢᠴᠢᠭᠲᠡᠳ᠂ ᠹᠠᠷᠢᠰᠠᠢᠴᠤᠳ ᠪᠠ ᠬᠣᠶᠠᠷ ᠨᠢᠭᠤᠷᠲᠤ ᠬᠥᠮᠦᠰ ᠡ᠂ ᠲᠠ ᠨᠠᠷ ᠠᠶᠠᠭᠠ ᠲᠠᠪᠠᠭ ᠤᠨ ᠢᠶᠠᠨ ᠭᠠᠳᠠᠨᠠ ᠲᠠᠯᠠ ᠶᠢ ᠴᠡᠪᠡᠷᠯᠡᠳᠡᠭ ᠪᠣᠯᠪᠠᠴᠤ ᠳᠣᠲᠣᠷᠠ ᠲᠠᠯᠠ ᠶᠢ ᠨᠢ ᠮᠥᠯᠵᠢᠯ᠂ ᠵᠠᠳᠠᠭᠠᠢᠷᠠᠯ ᠢᠶᠠᠷ ᠳᠦᠭᠦᠷᠭᠡᠭᠰᠡᠨ ᠪᠠᠢᠳᠠᠭ᠃ 26 ᠰᠣᠬᠣᠷ ᠹᠠᠷᠢᠰᠠᠢᠴᠤᠳ ᠡ᠂ ᠶᠠᠭᠤᠨ ᠤ ᠡᠮᠦᠨᠡ ᠠᠶᠠᠭᠠ ᠲᠠᠪᠠᠭ ᠤᠨ ᠢᠶᠠᠨ ᠳᠣᠲᠣᠷᠠ ᠲᠠᠯᠠ ᠶᠢ ᠴᠡᠪᠡᠷᠯᠡ᠂ ᠲᠡᠭᠡᠪᠡᠯ ᠭᠠᠳᠠᠨᠠ ᠲᠠᠯᠠ ᠨᠢ ᠴᠤ ᠴᠡᠪᠡᠷᠬᠡᠨ ᠪᠣᠯᠣᠨᠠ᠃
27 ᠲᠠ ᠨᠠᠷ ᠲᠤ ᠭᠠᠢ ᠪᠣᠯᠣᠨᠠ᠂ ᠪᠢᠴᠢᠭᠲᠡᠳ᠂ ᠹᠠᠷᠢᠰᠠᠢᠴᠤᠳ ᠪᠠ ᠬᠣᠶᠠᠷ ᠨᠢᠭᠤᠷᠲᠤ ᠬᠥᠮᠦᠰ ᠡ᠂ ᠲᠠ ᠨᠠᠷ ᠪᠣᠯ ᠴᠣᠬᠣᠢᠳᠠᠭᠰᠠᠨ ᠪᠤᠯᠠᠰᠢ ᠲᠠᠢ ᠠᠳᠠᠯᠢ ᠶᠤᠮ᠃ ᠪᠤᠯᠠᠰᠢᠨ ᠤ ᠭᠠᠳᠠᠨᠠ ᠲᠠᠯᠠ ᠨᠢ ᠭᠣᠶᠣ ᠬᠠᠷᠠᠭᠳᠠᠪᠠᠴᠤ ᠳᠣᠲᠣᠷᠠ ᠨᠢ ᠦᠬᠦᠭᠰᠡᠳ ᠦᠨ ᠶᠠᠰᠤ ᠪᠣᠯᠣᠨ ᠪᠣᠬᠢᠷ ᠪᠦᠬᠦᠨ ᠢᠶᠡᠷ ᠳᠦᠭᠦᠷᠡᠩ ᠪᠠᠢᠳᠠᠭ ᠰᠢᠭ᠋᠂ 28 ᠲᠡᠢᠨ ᠬᠦ ᠲᠠ ᠨᠠᠷ ᠴᠤ ᠬᠥᠮᠦᠰ ᠦᠨ ᠡᠮᠦᠨᠡ ᠭᠠᠳᠠᠨᠠ ᠪᠠᠨ ᠵᠥᠪᠲᠦ ᠮᠡᠲᠦ ᠬᠠᠷᠠᠭᠳᠠᠪᠠᠴᠤ ᠳᠣᠲᠣᠷᠠ ᠪᠠᠨ ᠬᠠᠤᠯᠢ ᠪᠤᠰᠤ᠂ ᠬᠣᠶᠠᠷ ᠨᠢᠭᠤᠷᠲᠤ ᠶᠠᠪᠤᠳᠠᠯ ᠢᠶᠠᠷ ᠳᠦᠭᠦᠷᠡᠩ ᠪᠠᠢᠳᠠᠭ᠃
29 ᠲᠠ ᠨᠠᠷ ᠲᠤ ᠭᠠᠢ ᠪᠣᠯᠣᠨᠠ᠂ ᠪᠢᠴᠢᠭᠲᠡᠳ᠂ ᠹᠠᠷᠢᠰᠠᠢᠴᠤᠳ ᠪᠠ ᠬᠣᠶᠠᠷ ᠨᠢᠭᠤᠷᠲᠤ ᠬᠥᠮᠦᠰ ᠡ᠂ ᠲᠠ ᠨᠠᠷ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠪᠤᠯᠠᠰᠢ ᠶᠢ ᠪᠠᠷᠢᠵᠤ᠂ ᠵᠥᠪᠲᠦ ᠬᠥᠮᠦᠨ ᠦ ᠬᠥᠰᠢᠶᠡ ᠶᠢ ᠴᠢᠮᠡᠭᠡᠳ᠂ 30 ᠪᠠᠰᠠ᠄ 〈ᠬᠡᠷᠪᠡ ᠪᠢᠳᠡ ᠳᠡᠭᠡᠳᠦᠰ ᠦᠨ ᠢᠶᠠᠨ ᠦᠶᠡ ᠳᠦ ᠪᠠᠢᠭᠰᠠᠨ ᠪᠣᠯ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠴᠢᠰᠤ ᠶᠢ ᠤᠷᠤᠰᠬᠠᠬᠤ ᠳᠤᠨᠢ ᠣᠷᠣᠯᠴᠠᠬᠤ ᠦᠭᠡᠢ ᠪᠠᠢᠭᠰᠠᠨ〉 ᠭᠡᠳᠡᠭ᠃ 31 ᠡᠢᠨ ᠬᠦ ᠲᠠ ᠨᠠᠷ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢ ᠬᠣᠷᠣᠭᠠᠭᠴᠢᠳ ᠤᠨ ᠦᠷᠡ ᠤᠳᠤᠮ ᠮᠥᠨ ᠭᠡᠳᠡᠭ ᠢᠶᠡᠨ ᠥᠪᠡᠷᠰᠡᠳ ᠢᠶᠡᠨ ᠭᠡᠷᠡᠴᠢᠯᠡᠵᠦ ᠪᠠᠢᠨᠠ᠃ 32 ᠲᠠ ᠨᠠᠷ ᠳᠡᠭᠡᠳᠦᠰ ᠦᠨ ᠢᠶᠠᠨ ᠨᠢᠭᠦᠯ ᠦᠨ ᠰᠠᠪᠠ ᠶᠢ ᠳᠦᠭᠦᠷᠭᠡᠭᠲᠦᠨ᠃ 33 ᠮᠣᠭᠠᠢ ᠨᠤᠭᠤᠳ᠂ ᠬᠣᠣᠷᠲᠤ ᠮᠣᠭᠠᠢ ᠶᠢᠨ ᠦᠷᠡ ᠲᠥᠯ᠂ ᠲᠠ ᠨᠠᠷ ᠲᠠᠮᠤ ᠶᠢᠨ ᠶᠠᠯᠠ ᠠᠴᠠ ᠶᠠᠭᠠᠬᠢᠨ ᠮᠤᠯᠲᠤᠷᠠᠬᠤ ᠪᠤᠢ︖ 34 ᠲᠡᠢᠮᠦ ᠡᠴᠡ ᠠᠩ᠋ᠬᠠᠷᠤᠭᠲᠤᠨ︕ ᠪᠢ ᠲᠠ ᠨᠠᠷ ᠤᠷᠤᠭᠤ ᠡᠰᠢ ᠦᠵᠡᠭᠦᠯᠦᠭᠴᠢᠳ᠂ ᠮᠡᠷᠭᠡᠳ ᠪᠠ ᠪᠢᠴᠢᠭᠲᠡᠳ ᠢ ᠢᠯᠡᠭᠡᠨᠡ᠃ ᠲᠠ ᠨᠠᠷ ᠲᠡᠳᠡᠨ ᠦ ᠵᠠᠷᠢᠮ ᠢ ᠨᠢ ᠠᠯᠠᠵᠤ᠂ ᠵᠠᠷᠢᠮ ᠢ ᠨᠢ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠬᠤ ᠪᠥᠭᠡᠳ ᠵᠠᠷᠢᠮ ᠢ ᠨᠢ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠠᠭᠠᠨ ᠲᠠᠰᠢᠭᠤᠷᠳᠠᠵᠤ᠂ ᠲᠣᠰᠬᠣᠨ ᠠᠴᠠ ᠲᠣᠰᠬᠣᠨ ᠤᠷᠤᠭᠤ ᠬᠥᠭᠡᠭᠡᠨ ᠬᠠᠪᠴᠢᠨᠠ᠃ 35 ᠲᠡᠢᠮᠦ ᠡᠴᠡ ᠵᠥᠪᠲᠡᠨ ᠠᠪᠧᠯ ᠤᠨ ᠴᠢᠰᠤᠨ ᠠᠴᠠ ᠠᠪᠤᠭᠠᠳ ᠠᠷᠢᠭᠤᠨ ᠭᠠᠵᠠᠷ ᠪᠣᠯᠣᠨ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠬᠣᠭᠣᠷᠣᠨᠳᠣ ᠲᠠ ᠨᠠᠷ ᠲᠤ ᠠᠯᠠᠭᠳᠠᠭᠰᠠᠨ ᠪᠧᠷᠧᠾᠢᠶᠠ ᠶᠢᠨ ᠬᠦᠦ ᠽᠠᠺᠠᠷᠢᠶᠠ ᠶᠢᠨ ᠴᠢᠰᠤ ᠬᠦᠷᠲᠡᠯᠡ ᠭᠠᠵᠠᠷ ᠳᠡᠭᠡᠷᠡ ᠤᠷᠤᠰᠤᠭᠰᠠᠨ ᠵᠥᠪᠲᠦ ᠬᠥᠮᠦᠰ ᠦᠨ ᠪᠦᠬᠦ ᠴᠢᠰᠤ ᠲᠠ ᠨᠠᠷ ᠲᠤ ᠬᠦᠷᠴᠦ ᠢᠷᠡᠨᠡ᠃ 36 ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠃ ᠡᠨᠡ ᠪᠦᠬᠦᠨ ᠡᠨᠡ ᠦᠶᠡ ᠶᠢᠨ ᠬᠢᠨ ᠳᠤ ᠢᠷᠡᠬᠦ ᠪᠣᠯᠣᠨᠠ᠃
ᠶᠧᠷᠦ᠋ᠰᠠᠯᠧᠮ ᠤᠨ ᠭᠠᠰᠢᠭᠤᠳᠠᠯ
37 ᠶᠧᠷᠦ᠋ᠰᠠᠯᠧᠮ ᠡ᠂ ᠶᠧᠷᠦ᠋ᠰᠠᠯᠧᠮ︕ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢ ᠠᠯᠠᠵᠤ᠂ ᠥᠪᠡᠷ ᠲᠦ ᠴᠢᠨᠢ ᠢᠯᠡᠭᠡᠭᠳᠡᠭᠰᠡᠨ ᠬᠥᠮᠦᠰ ᠢ ᠴᠢᠯᠠᠭᠤ ᠪᠠᠷ ᠴᠣᠬᠢᠳᠠᠭ ᠴᠢ᠂ ᠲᠠᠬᠢᠶᠠ ᠴᠤᠷᠪᠠᠭᠠ ᠨᠤᠭᠤᠳ ᠢᠶᠠᠨ ᠳᠠᠯᠠᠪᠴᠢᠨ ᠳᠣᠣᠷᠠ ᠪᠠᠨ ᠪᠥᠭᠡᠮᠨᠡᠷᠡᠭᠦᠯᠳᠡᠭ᠌ ᠰᠢᠭ ᠪᠢ ᠬᠡᠴᠢᠨᠡᠨ ᠤᠳᠠᠭᠠ ᠬᠡᠦᠬᠡᠳ ᠤᠳ ᠢ ᠴᠢᠨᠢ ᠪᠥᠭᠡᠮᠨᠡᠷᠡᠭᠦᠯᠬᠦ ᠭᠡᠯᠡ᠂ ᠬᠠᠷᠢᠨ ᠲᠠ ᠨᠠᠷ ᠬᠦᠰᠡᠭᠰᠡᠨ ᠦᠭᠡᠢ᠃ 38 ᠠᠩ᠋ᠬᠠᠷᠤᠭᠲᠤᠨ᠂ ᠲᠠ ᠨᠠᠷ ᠤᠨ ᠭᠡᠷ ᠡᠵᠡᠭᠦᠢ ᠬᠠᠶᠠᠭᠳᠠᠨᠠ᠃ 39 ᠲᠠ ᠨᠠᠷ ᠲᠤ ᠬᠡᠯᠡᠶᠡ᠃ ᠲᠠ ᠨᠠᠷ᠄ 〈ᠡᠵᠡᠨ ᠦ ᠨᠡᠷᠡ ᠪᠡᠷ ᠢᠷᠡᠭᠴᠢ ᠨᠢ ᠢᠷᠥᠭᠡᠯ ᠲᠡᠢ ᠡ︕〉 ᠭᠡᠵᠦ ᠬᠡᠯᠡᠬᠦ ᠡᠴᠡ ᠨᠠᠰᠢ ᠨᠠᠮᠠᠶᠢ ᠶᠡᠷᠦ ᠣᠯᠵᠤ ᠦᠵᠡᠬᠦ ᠦᠭᠡᠢ》 ᠭᠡᠪᠡ᠃