ᠮᠠᠲ᠋ᠠᠢ ᠠᠷᠪᠠᠨ ᠬᠣᠶᠠᠷ
ᠠᠮᠠᠷᠠᠯ ᠤᠨ ᠡᠳᠦᠷ ᠦᠨ ᠡᠵᠡᠨ
1 ᠲᠡᠷᠡ ᠦᠶᠡ ᠳᠦ᠂ ᠢᠰᠦ᠋ᠰ ᠠᠮᠠᠷᠠᠯ ᠤᠨ ᠡᠳᠦᠷ ᠲᠠᠷᠢᠶᠠᠨ ᠳᠤᠮᠳᠠᠭᠤᠷ ᠶᠠᠪᠤᠵᠤ ᠪᠠᠢᠬᠤ ᠳᠤ᠂ ᠥᠯᠥᠰᠥᠭᠰᠡᠨ ᠱᠠᠪᠢ ᠨᠠᠷ ᠨᠢ ᠲᠠᠷᠢᠶᠠᠨ ᠲᠦᠷᠦᠭᠦᠦ ᠰᠢᠪᠲᠤᠷᠤᠨ ᠢᠳᠡᠵᠦ ᠡᠬᠢᠯᠡᠪᠡ᠃ 2 ᠹᠠᠷᠢᠰᠠᠢᠴᠤᠳ ᠡᠭᠦᠨ ᠢ ᠬᠠᠷᠠᠭᠠᠳ ᠢᠰᠦ᠋ᠰ ᠲᠤ᠄ 《ᠬᠠᠷᠠᠭᠠᠴᠢ᠂ ᠱᠠᠪᠢ ᠨᠠᠷ ᠴᠢᠨᠢ ᠠᠮᠠᠷᠠᠯ ᠤᠨ ᠡᠳᠦᠷ ᠬᠢᠵᠦ ᠪᠣᠯᠬᠤ ᠦᠭᠡᠢ ᠵᠦᠢᠯ ᠢ ᠬᠢᠵᠦ ᠪᠠᠢᠨᠠ》 ᠭᠡᠵᠡᠭᠡᠬᠦ ᠳᠦ᠂ 3 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠳ᠋ᠠᠸᠢᠳ᠋ ᠪᠣᠯᠣᠨ ᠬᠠᠮᠲᠤ ᠪᠠᠢᠭᠰᠠᠳ ᠨᠢ ᠥᠯᠥᠰᠬᠦ ᠳᠦ᠂ ᠳ᠋ᠠᠸᠢᠳ᠋ ᠶᠠᠭᠠᠬᠢᠭᠰᠠᠨ ᠢ ᠲᠠ ᠨᠠᠷ ᠤᠩ᠋ᠰᠢᠭᠠ ᠦᠭᠡᠢ ᠤᠤ︖ 4 ᠲᠡᠷᠡ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠳᠦ ᠣᠷᠣᠭᠠᠳ᠂ ᠥᠪᠡᠷ ᠢᠶᠡᠨ ᠴᠤ᠂ ᠬᠠᠮᠲᠤ ᠪᠠᠢᠭᠰᠠᠳ ᠨᠢ ᠴᠤ ᠢᠳᠡᠵᠦ ᠪᠣᠯᠬᠤ ᠦᠭᠡᠢ᠂ ᠲᠠᠬᠢᠯᠴᠢᠳ ᠯᠠ ᠢᠳᠡᠳᠡᠭ ᠲᠠᠪᠢᠭ ᠪᠣᠣᠪᠣ ᠶᠢ ᠢᠳᠡᠭᠰᠡᠨ ᠪᠢᠯᠡ᠃ 5 ᠮᠥᠨ ᠠᠮᠠᠷᠠᠯ ᠤᠨ ᠡᠳᠦᠷ ᠲᠠᠬᠢᠯᠴᠢᠳ ᠠᠷᠢᠭᠤᠨ ᠣᠷᠳᠣᠨ ᠳᠣᠲᠣᠷᠠ ᠠᠮᠠᠷᠠᠯ ᠤᠨ ᠡᠳᠦᠷ ᠢ ᠵᠥᠷᠢᠴᠡᠪᠡᠴᠦ ᠪᠤᠷᠤᠭᠤ ᠦᠭᠡᠢ ᠭᠡᠳᠡᠭ ᠢ ᠲᠠ ᠨᠠᠷ ᠬᠠᠤᠯᠢ ᠡᠴᠡ ᠤᠩ᠋ᠰᠢᠭᠠ ᠦᠭᠡᠢ ᠤᠤ︖ 6 ᠬᠠᠷᠢᠨ ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠣᠷᠳᠣᠨ ᠠᠴᠠ ᠢᠯᠡᠭᠦᠦ ᠠᠭᠤᠤ ᠨᠢᠭᠡᠨ ᠨᠢ ᠡ᠊ᠨᠳᠡ ᠪᠠᠢᠨᠠ᠃ 7 ᠬᠡᠷᠪᠡ 〈ᠪᠢ ᠲᠠᠬᠢᠯ ᠢ ᠪᠤᠰᠤ᠂ ᠡᠨᠡᠷᠢᠯ ᠢ ᠬᠦᠰᠡᠳᠡᠭ〉 ᠭᠡᠳᠡᠭ ᠦᠭᠡ ᠶᠢᠨ ᠤᠳᠬᠠ ᠶᠢ ᠲᠠ ᠨᠠᠷ ᠣᠢᠯᠠᠭᠠᠭᠰᠠᠨ ᠪᠣᠯ᠂ ᠪᠤᠷᠤᠭᠤ ᠦᠭᠡᠢ ᠬᠥᠮᠦᠨ ᠢ ᠪᠤᠷᠤᠭᠤᠳᠬᠠᠬᠤ ᠦᠭᠡᠢ ᠪᠠᠢᠬᠤ ᠰᠠᠨ᠃ 8 ᠬᠥᠮᠦᠨ ᠦ ᠬᠦᠦ ᠪᠣᠯ ᠠᠮᠠᠷᠠᠯ ᠤᠨ ᠡᠳᠦᠷ ᠦᠨ ᠡᠵᠡᠨ ᠶᠤᠮ》 ᠭᠡᠵᠡᠢ᠃
9 ᠢᠰᠦ᠋ᠰ ᠲᠡᠨᠳᠡ ᠡᠴᠡ ᠶᠠᠪᠤᠵᠤ᠂ ᠲᠡᠳᠡᠨ ᠦ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ ᠣᠷᠣᠪᠠ᠃ 10 ᠲᠡᠭᠡᠬᠦ ᠳᠦ᠂ ᠥᠷᠥᠭᠡᠰᠦᠨ ᠭᠠᠷ ᠨᠢ ᠲᠠᠲᠠᠩ᠋ᠬᠠᠢ ᠨᠢᠭᠡ ᠬᠥᠮᠦᠨ ᠲᠡᠨᠳᠡ ᠪᠠᠢᠵᠠᠢ᠃ ᠲᠡᠳᠡ ᠢᠰᠦ᠋ᠰ ᠢ ᠵᠠᠭᠠᠯᠳᠤᠬᠤ ᠶᠢᠨ ᠲᠤᠯᠠᠳᠠ ᠲᠡᠭᠦᠨ ᠡᠴᠡ᠄ 《ᠠᠮᠠᠷᠠᠯ ᠤᠨ ᠡᠳᠦᠷ ᠡᠳᠡᠭᠡᠭᠡᠬᠦ ᠨᠢ ᠵᠥᠪ ᠤᠤ︖》 ᠭᠡᠵᠦ ᠠᠰᠠᠭᠤᠪᠠ᠃ 11 ᠲᠡᠷᠡ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠤᠨ ᠳᠣᠲᠣᠷᠠᠬᠢ ᠵᠠᠷᠢᠮ ᠬᠥᠮᠦᠨ ᠳᠦ ᠨᠢᠭᠡ ᠬᠣᠨᠢ ᠪᠠᠢᠬᠤ ᠳᠤ᠂ ᠬᠣᠨᠢ ᠨᠢ ᠠᠮᠠᠷᠠᠯ ᠤᠨ ᠡᠳᠦᠷ ᠨᠦᠬᠡᠨ ᠳᠦ ᠤᠨᠠᠴᠢᠬᠠᠪᠠᠯ᠂ ᠲᠡᠭᠦᠨ ᠢ ᠪᠠᠨ ᠭᠠᠷᠭᠠᠵᠤ ᠠᠪᠬᠤ ᠦᠭᠡᠢ ᠤᠤ︖ 12 ᠬᠥᠮᠦᠨ ᠬᠣᠨᠢᠨ ᠠᠴᠠ ᠬᠡᠴᠢᠨᠡᠨ ᠡᠷᠬᠢᠮ ᠪᠢᠯᠡ᠂ ᠡᠢᠨ ᠬᠦ ᠠᠮᠠᠷᠠᠯ ᠤᠨ ᠡᠳᠦᠷ ᠰᠠᠢᠨ ᠢ ᠦᠢᠯᠡᠳᠬᠦ ᠨᠢ ᠵᠦᠢ ᠲᠡᠢ》 ᠭᠡᠳ᠂ 13 ᠥᠨᠥᠬᠢ ᠬᠥᠮᠦᠨ ᠳᠦ᠄ 《ᠭᠠᠷ ᠢᠶᠠᠨ ᠰᠤᠩ᠋ᠭᠠ》 ᠭᠡᠪᠡ᠃ ᠲᠡᠷᠡ ᠬᠥᠮᠦᠨ ᠭᠠᠷ ᠢᠶᠠᠨ ᠰᠤᠩ᠋ᠭᠠᠲᠠᠯᠠ ᠭᠠᠷ ᠨᠢ ᠨᠥᠭᠥᠭᠡ ᠭᠠᠷ ᠲᠠᠢ ᠪᠠᠨ ᠠᠳᠠᠯᠢ ᠡᠷᠡᠭᠦᠯ ᠪᠣᠯᠪᠠ᠃ 14 ᠬᠠᠷᠢᠨ ᠹᠠᠷᠢᠰᠠᠢᠴᠤᠳ ᠭᠠᠷᠴᠤ᠂ ᠢᠰᠦ᠋ᠰ ᠢ ᠬᠡᠷᠬᠢᠨ ᠬᠥᠨᠥᠭᠡᠬᠦ ᠲᠤᠬᠠᠢ ᠬᠤᠤᠪᠢᠯᠳᠤᠵᠠᠢ᠃
15 ᠢᠰᠦ᠋ᠰ ᠡᠭᠦᠨ ᠢ ᠮᠡᠳᠡᠭᠡᠳ ᠲᠡᠨᠳᠡ ᠡᠴᠡ ᠬᠣᠯᠠᠳᠪᠠ᠃ ᠦᠯᠡᠮᠵᠢ ᠣᠯᠠᠨ ᠬᠥᠮᠦᠨ ᠳᠠᠭᠠᠭᠰᠠᠨ ᠳᠤ᠂ ᠲᠡᠳᠡᠨ ᠢ ᠴᠥᠮ ᠢᠶᠡᠷ ᠨᠢ ᠡᠳᠡᠭᠡᠭᠡᠭᠡᠳ᠂ 16 《ᠮᠢᠨᠦ ᠲᠤᠬᠠᠢ ᠪᠢᠲᠡᠭᠡᠢ ᠦᠭᠡ ᠭᠠᠷᠭᠠ》 ᠭᠡᠵᠦ ᠬᠠᠲᠠᠭᠤ ᠰᠠᠨᠠᠭᠤᠯᠪᠠ᠃ 17 ᠡᠢᠨ ᠬᠦ ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠠᠢᠶᠠ ᠪᠠᠷ᠂
18 《ᠮᠢᠨᠦ ᠰᠣᠩ᠋ᠭᠣᠭᠰᠠᠨ ᠵᠠᠷᠤᠴᠠ᠂ ᠮᠢᠨᠦ ᠲᠠᠭᠠᠯᠠᠳᠠᠭ ᠬᠠᠢᠷᠠᠲᠠᠢ ᠨᠢᠭᠡᠨ ᠢ ᠮᠢᠨᠢ ᠬᠠᠷᠠ ᠪᠢ ᠲᠡᠭᠦᠨ ᠦ ᠳᠡᠭᠡᠷᠡ ᠰᠦᠨᠡᠰᠦ ᠪᠡᠨ ᠪᠠᠢᠯᠭᠠᠨᠠ ᠲᠡᠷᠡ ᠬᠠᠷᠢᠴᠤᠳ ᠲᠤ ᠭᠣᠣᠯᠴᠢ ᠶᠣᠰᠣ ᠶᠢ ᠲᠤᠩ᠋ᠬᠠᠭᠯᠠᠨᠠ᠃
19 ᠲᠡᠷᠡ ᠬᠡᠷᠡᠯᠳᠦᠬᠦ ᠦᠭᠡᠢ᠂ ᠬᠠᠰᠬᠢᠷᠬᠤ ᠦᠭᠡᠢ ᠲᠡᠭᠦᠨ ᠦ ᠳᠠᠭᠤ ᠭᠤᠳᠤᠮᠵᠢ ᠳᠤ ᠰᠣᠨᠣᠰᠳᠠᠬᠤ ᠦᠭᠡᠢ᠃
20 ᠲᠡᠷᠡ ᠪᠢᠴᠠᠯᠤᠭᠳᠠᠭᠰᠠᠨ ᠵᠡᠭᠡᠰᠦ ᠶᠢ ᠬᠤᠭᠤᠯᠬᠤ ᠦᠭᠡᠢ ᠪᠦᠳᠡᠭᠢᠷᠡᠵᠦ ᠪᠤᠢ ᠵᠤᠯᠠ ᠶᠢ ᠴᠤ ᠪᠥᠬᠥᠭᠡᠬᠦ ᠦᠭᠡᠢ ᠬᠣᠵᠢᠮ ᠭᠣᠣᠯᠴᠢ ᠶᠣᠰᠣ ᠪᠠᠨ ᠢᠯᠠᠯᠲᠠ ᠳᠤ ᠬᠦᠷᠭᠡᠨᠡ᠃
21 ᠬᠠᠷᠢᠴᠤᠳ ᠲᠡᠭᠦᠨ ᠦ ᠨᠡᠷᠡ ᠤᠷᠤᠭᠤ ᠲᠡᠮᠡᠦᠯᠬᠦ ᠪᠣᠯᠣᠨᠠ》
ᠭᠡᠵᠦ ᠬᠡᠯᠭᠦᠯᠦᠭᠰᠡᠨ ᠨᠢ ᠪᠡᠶᠡᠯᠡᠭᠳᠡᠵᠡᠢ᠃
ᠹᠠᠷᠢᠰᠠᠢᠴᠤᠳ ᠢ ᠵᠢᠮᠡᠯᠡᠭᠰᠡᠨ ᠨᠢ
22 ᠲᠡᠷᠡ ᠦᠶᠡ ᠳᠦ᠂ ᠴᠢᠳᠬᠥᠷ ᠣᠷᠣᠰᠢᠭᠰᠠᠨ ᠬᠠᠷᠠᠭᠠ ᠦᠭᠡᠢ᠂ ᠬᠡᠯᠡ ᠦᠭᠡᠢ ᠬᠥᠮᠦᠨ ᠢ ᠲᠡᠭᠦᠨ ᠳᠦ ᠠᠪᠴᠢᠷᠠᠬᠤ ᠳᠤ᠂ ᠢᠰᠦ᠋ᠰ ᠲᠡᠭᠦᠨ ᠢ ᠡᠳᠡᠭᠡᠭᠡᠭᠡᠳ ᠲᠡᠷᠡ ᠬᠡᠯᠡ ᠦᠭᠡᠢ ᠬᠥᠮᠦᠨ ᠢ ᠶᠠᠷᠢᠳᠠᠭ᠂ ᠬᠠᠷᠠᠳᠠᠭ ᠪᠣᠯᠭᠠᠵᠠᠢ᠃ 23 ᠣᠯᠠᠨ ᠬᠥᠮᠦᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠴᠣᠴᠢᠷᠳᠠᠵᠤ᠄ 《ᠡᠨᠡ ᠴᠢᠨᠢ ᠳ᠋ᠠᠸᠢᠳ᠋ ᠤᠨ ᠤᠳᠤᠮ ᠪᠢᠰᠢ ᠤᠤ︖》 ᠭᠡᠯᠴᠡᠵᠦ ᠪᠠᠢᠪᠠ᠃ 24 ᠬᠠᠷᠢᠨ ᠹᠠᠷᠢᠰᠠᠢᠴᠤᠳ ᠡᠭᠦᠨ ᠢ ᠰᠣᠨᠣᠰᠣᠭᠠᠳ᠄ 《ᠡᠨᠡ ᠬᠥᠮᠦᠨ ᠴᠢᠳᠬᠥᠷ ᠤᠳ ᠤᠨ ᠲᠣᠯᠣᠭᠠᠢᠯᠠᠭᠴᠢ ᠪᠧᠯᠽᠧᠪᠦ᠋ᠯ ᠢᠶᠠᠷ ᠯᠠ ᠴᠢᠳᠬᠥᠷ ᠤᠳ ᠢ ᠬᠥᠭᠡᠭᠡᠳᠡᠭ》 ᠭᠡᠯᠴᠡᠭᠰᠡᠨ ᠳᠦ᠂ 25 ᠢᠰᠦ᠋ᠰ ᠲᠡᠳᠡᠨ ᠦ ᠪᠣᠳᠣᠯ ᠢ ᠮᠡᠳᠡᠭᠡᠳ ᠲᠡᠳᠡᠨ ᠳᠦ᠄ 《ᠬᠠᠮᠤᠭ ᠤᠯᠤᠰ ᠳᠣᠲᠣᠷᠠ ᠪᠠᠨ ᠬᠠᠭᠠᠷᠠᠪᠠᠯ ᠮᠥᠬᠥᠨᠡ᠃ ᠬᠠᠮᠤᠭ ᠬᠣᠲᠠ᠂ ᠡᠰᠡᠪᠡᠯ ᠭᠡᠷ ᠳᠣᠲᠣᠷᠠ ᠪᠠᠨ ᠬᠠᠭᠠᠷᠠᠪᠠᠯ ᠲᠣᠭᠲᠠᠨᠢᠬᠤ ᠦᠭᠡᠢ᠃ 26 ᠰᠠᠲ᠋ᠠᠨ ᠰᠠᠲ᠋ᠠᠨ ᠢᠶᠠᠨ ᠬᠥᠭᠡᠭᠡᠪᠡᠯ᠂ ᠳᠣᠲᠣᠷᠠ ᠪᠠᠨ ᠬᠠᠭᠠᠷᠠᠬᠤ ᠪᠣᠯᠣᠨᠠ᠂ ᠢᠩᠭᠢᠪᠡᠯ ᠤᠯᠤᠰ ᠨᠢ ᠬᠡᠷᠬᠢᠨ ᠲᠣᠭᠲᠠᠨᠢᠬᠤ ᠪᠢᠯᠡ︖ 27 ᠬᠡᠷᠪᠡ ᠪᠢ ᠪᠧᠯᠽᠧᠪᠦ᠋ᠯ ᠢᠶᠠᠷ ᠴᠢᠳᠬᠥᠷ ᠤᠳ ᠢ ᠬᠥᠭᠡᠭᠡᠳᠡᠭ ᠪᠣᠯ᠂ ᠲᠠ ᠨᠠᠷ ᠤᠨ ᠬᠥᠪᠡᠭᠦᠳ ᠬᠡᠨ ᠢᠶᠡᠷ ᠴᠢᠳᠬᠥᠷ ᠬᠥᠭᠡᠭᠡᠳᠡᠭ ᠪᠤᠢ︖ ᠲᠡᠭᠡᠬᠦ ᠪᠡᠷ ᠬᠥᠪᠡᠭᠦᠳ ᠴᠢᠨᠢ ᠲᠠ ᠨᠠᠷ ᠢ ᠰᠢᠭᠦᠬᠦ ᠪᠣᠯᠣᠨᠠ᠃ 28 ᠬᠠᠷᠢᠨ ᠪᠢ ᠪᠤᠷᠬᠠᠨ ᠤ ᠰᠦᠨᠡᠰᠦ ᠪᠡᠷ ᠴᠢᠳᠬᠥᠷ ᠤᠳ ᠢ ᠬᠥᠭᠡᠭᠡᠳᠡᠭ ᠲᠤᠯᠠ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠲᠠ ᠨᠠᠷ ᠲᠤ ᠢᠷᠡᠴᠢᠬᠡᠭᠰᠡᠨ᠃ 29 ᠬᠥᠮᠦᠨ ᠬᠦᠴᠦᠲᠡᠨ ᠢ ᠤᠷᠢᠳᠠᠪᠠᠷ ᠬᠦᠯᠢᠬᠦ ᠡᠴᠡ ᠨᠠᠰᠢ ᠶᠠᠭᠠᠬᠢᠨ ᠲᠡᠭᠦᠨ ᠦ ᠭᠡᠷ ᠲᠦ ᠣᠷᠣᠵᠤ ᠡᠳ᠋ ᠬᠥᠷᠥᠩᠭᠡ ᠶᠢ ᠨᠢ ᠲᠣᠨᠣᠵᠤ ᠴᠢᠳᠠᠬᠤ ᠪᠢᠯᠡ︖ ᠬᠦᠯᠢᠴᠢᠭᠡᠭᠡᠳ ᠯᠠ ᠭᠡᠷ ᠢ ᠨᠢ ᠲᠣᠨᠣᠬᠤ ᠪᠣᠯᠣᠨᠠ᠃
ᠦᠯᠦ ᠠᠭᠤᠴᠢᠯᠠᠭᠳᠠᠬᠤ ᠨᠢᠭᠦᠯ
30 ᠨᠠᠳᠠ ᠲᠠᠢ ᠨᠡᠢᠯᠡᠳᠡᠭ ᠦᠭᠡᠢ ᠨᠢ ᠨᠠᠮᠠᠶᠢ ᠡᠰᠡᠷᠭᠦᠴᠡᠭᠴᠢ᠂ ᠨᠠᠳᠠ ᠲᠠᠢ ᠬᠠᠮᠲᠤ ᠬᠤᠷᠢᠶᠠᠯᠴᠠᠳᠠᠭ ᠦᠭᠡᠢ ᠨᠢ ᠪᠤᠲᠠᠷᠠᠭᠠᠭᠴᠢ ᠮᠥᠨ᠃ 31 ᠲᠡᠢᠮᠦ ᠡᠴᠡ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠬᠥᠮᠦᠰ ᠦᠨ ᠠᠯᠢᠪᠠ ᠨᠢᠭᠦᠯ ᠪᠠ ᠳᠣᠷᠣᠮᠵᠢᠯᠠᠯ ᠠᠭᠤᠴᠢᠯᠠᠭᠳᠠᠨᠠ᠃ ᠬᠠᠷᠢᠨ ᠠᠷᠢᠭᠤᠨ ᠰᠦᠨᠡᠰᠦ ᠶᠢ ᠳᠣᠷᠣᠮᠵᠢᠯᠠᠭᠰᠠᠨ ᠨᠢ ᠠᠭᠤᠴᠢᠯᠠᠭᠳᠠᠬᠤ ᠦᠭᠡᠢ᠃ 32 ᠬᠥᠮᠦᠨ ᠦ ᠬᠦᠦ ᠶᠢ ᠦᠭᠡ ᠪᠡᠷ ᠡᠰᠡᠷᠭᠦᠴᠡᠭᠴᠢ ᠨᠢ ᠠᠭᠤᠴᠢᠯᠠᠭᠳᠠᠨᠠ᠃ ᠬᠠᠷᠢᠨ ᠠᠷᠢᠭᠤᠨ ᠰᠦᠨᠡᠰᠦ ᠶᠢ ᠦᠭᠡ ᠪᠡᠷ ᠡᠰᠡᠷᠭᠦᠴᠡᠭᠴᠢ ᠨᠢ ᠡᠨᠡ ᠦᠶᠡ ᠳᠦ ᠴᠤ᠂ ᠢᠷᠡᠬᠦ ᠦᠶᠡ ᠳᠦ ᠴᠤ ᠠᠭᠤᠴᠢᠯᠠᠭᠳᠠᠬᠤ ᠦᠭᠡᠢ᠃
ᠬᠥᠮᠦᠨ ᠦᠭᠡ ᠪᠡᠷ ᠢᠶᠠᠨ ᠲᠠᠨᠢᠭᠳᠠᠨᠠ
33 ᠰᠠᠢᠨ ᠮᠣᠳᠣ ᠲᠠᠷᠢᠪᠠᠯ ᠰᠠᠢᠨ ᠵᠢᠮᠢᠰ ᠣᠯᠣᠨᠠ᠂ ᠮᠠᠭᠤ ᠮᠣᠳᠣ ᠲᠠᠷᠢᠪᠠᠯ ᠮᠠᠭᠤ ᠵᠢᠮᠢᠰ ᠣᠯᠣᠨᠠ᠂ ᠮᠣᠳᠣ ᠶᠢ ᠵᠢᠮᠢᠰ ᠢᠶᠠᠷ ᠨᠢ ᠲᠠᠨᠢᠨᠠ᠃ 34 ᠬᠣᠣᠷᠲᠤ ᠮᠣᠭᠠᠢ ᠶᠢᠨ ᠦᠷᠡ ᠲᠥᠯ︕ ᠲᠠ ᠨᠠᠷ ᠬᠣᠷᠣᠨ ᠮᠠᠭᠤ ᠲᠤᠯᠠ ᠶᠠᠭᠠᠬᠢᠨ ᠰᠠᠢᠨ ᠢ ᠶᠠᠷᠢᠵᠤ ᠴᠢᠳᠠᠬᠤ ᠪᠤᠢ︖ ᠬᠥᠮᠦᠨ ᠰᠡᠳᠬᠢᠯ ᠳᠡᠭᠡᠨ ᠪᠢᠯᠬᠠᠭᠰᠠᠨ ᠢ ᠠᠮᠠ ᠪᠠᠷ ᠢᠶᠠᠨ ᠶᠠᠷᠢᠳᠠᠭ᠃ 35 ᠰᠠᠢᠨ ᠬᠥᠮᠦᠨ ᠬᠠᠳᠠᠭᠠᠯᠠᠭᠰᠠᠨ ᠰᠠᠢᠨ ᠠᠴᠠ ᠪᠠᠨ ᠰᠠᠢᠨ ᠢ ᠭᠠᠷᠭᠠᠨ᠂ ᠮᠠᠭᠤ ᠬᠥᠮᠦᠨ ᠬᠠᠳᠠᠭᠠᠯᠠᠭᠰᠠᠨ ᠮᠠᠭᠤ ᠠᠴᠠ ᠪᠠᠨ ᠮᠠᠭᠤ ᠶᠢ ᠭᠠᠷᠭᠠᠨᠠ᠃ 36 ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠬᠥᠮᠦᠨ ᠳᠡᠮᠡᠢ ᠶᠠᠷᠢᠭᠰᠠᠨ ᠦᠭᠡ ᠪᠣᠯᠭᠠᠨ ᠢᠶᠠᠨ ᠰᠢᠭᠦᠯᠲᠡ ᠶᠢᠨ ᠡᠳᠦᠷ ᠥᠴᠢᠭᠯᠡᠬᠦ ᠶᠣᠰᠣᠲᠠᠢ᠃ 37 ᠴᠢ ᠦᠭᠡᠰ ᠢᠶᠡᠷ ᠢᠶᠠᠨ ᠵᠥᠪᠲᠥᠭᠡᠭᠳᠡᠵᠦ᠂ ᠮᠥᠨ ᠦᠭᠡᠰ ᠢᠶᠡᠷ ᠢᠶᠠᠨ ᠶᠠᠯᠠᠯᠠᠭᠳᠠᠨᠠ》 ᠭᠡᠪᠡ᠃
ᠰᠢᠳᠢ ᠲᠡᠮᠳᠡᠭ ᠬᠦᠰᠡᠭᠰᠡᠨ ᠨᠢ
38 ᠡᠭᠦᠨ ᠦ ᠬᠠᠷᠢᠭᠤ ᠳᠤ ᠪᠢᠴᠢᠭᠲᠡᠳ ᠪᠠ ᠹᠠᠷᠢᠰᠠᠢᠴᠤᠳ ᠤᠨ ᠵᠠᠷᠢᠮ ᠨᠢ᠄ 《ᠪᠠᠭᠰᠢ ᠡ᠂ ᠪᠢᠳᠡ ᠲᠠᠨ ᠠᠴᠠ ᠰᠢᠳᠢ ᠲᠡᠮᠳᠡᠭ ᠦᠵᠡᠬᠦ ᠶᠢ ᠬᠦᠰᠡᠵᠦ ᠪᠠᠢᠨᠠ》 ᠭᠡᠰᠡᠨ ᠳᠦ᠂ 39 ᠢᠰᠦ᠋ᠰ᠄ 《ᠮᠠᠭᠤ᠂ ᠵᠠᠪᠬᠠᠢ ᠦᠶᠡ ᠶᠢᠨ ᠬᠢᠨ ᠰᠢᠳᠢ ᠲᠡᠮᠳᠡᠭ ᠱᠠᠭᠠᠷᠳᠠᠳᠠᠭ ᠪᠣᠯᠪᠠᠴᠤ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠣᠨᠠ ᠶᠢᠨ ᠰᠢᠳᠢ ᠲᠡᠮᠳᠡᠭ ᠡᠴᠡ ᠥᠭᠡᠷᠡ ᠰᠢᠳᠢ ᠲᠡᠮᠳᠡᠭ ᠲᠡᠳᠡᠨ ᠳᠦ ᠥᠭᠭᠥᠭᠳᠡᠬᠦ ᠦᠭᠡᠢ᠃ 40 ᠶᠣᠨᠠ ᠠᠪᠤᠷᠭᠤ ᠵᠢᠭᠠᠰᠤᠨ ᠤ ᠭᠡᠳᠡᠰᠦᠨ ᠳᠦ ᠭᠤᠷᠪᠠᠨ ᠡᠳᠦᠷ ᠭᠤᠷᠪᠠᠨ ᠰᠥᠨᠢ ᠪᠠᠢᠭᠰᠠᠨᠴᠢᠯᠠᠨ ᠬᠥᠮᠦᠨ ᠦ ᠬᠦᠦ ᠭᠠᠵᠠᠷ ᠤᠨ ᠵᠢᠷᠦᠬᠡᠨ ᠳᠦ ᠭᠤᠷᠪᠠᠨ ᠡᠳᠦᠷ ᠭᠤᠷᠪᠠᠨ ᠰᠥᠨᠢ ᠪᠠᠢᠬᠤ ᠪᠣᠯᠣᠨᠠ᠃ 41 ᠰᠢᠭᠦᠯᠲᠡ ᠶᠢᠨ ᠦᠶᠡ ᠳᠦ ᠨᠢᠨᠧᠸᠧ ᠶᠢᠨ ᠬᠥᠮᠦᠰ ᠡᠨᠡ ᠦᠶᠡ ᠶᠢᠨ ᠬᠢᠨ ᠲᠠᠢ ᠬᠠᠮᠲᠤ ᠪᠣᠰᠴᠤ᠂ ᠡᠳᠡ ᠨᠠᠷ ᠢ ᠶᠠᠯᠠᠯᠠᠬᠤ ᠪᠣᠯᠣᠨᠠ᠃ ᠤᠴᠢᠷ ᠨᠢ ᠲᠡᠳᠡ ᠶᠣᠨᠠ ᠶᠢᠨ ᠰᠤᠷᠭᠠᠯ ᠳᠤ ᠭᠡᠮᠰᠢᠵᠡᠭᠡᠭᠰᠡᠨ ᠶᠤᠮ᠃ ᠠᠩ᠋ᠬᠠᠷᠤᠭᠲᠤᠨ᠂ ᠶᠣᠨᠠ ᠠᠴᠠ ᠠᠭᠤᠤ ᠨᠢᠭᠡᠨ ᠨᠢ ᠡ᠊ᠨᠳᠡ ᠪᠠᠢᠨᠠ᠃ 42 ᠰᠢᠭᠦᠯᠲᠡ ᠳᠡᠭᠡᠷᠡ ᠡᠮᠦᠨᠡᠲᠦ ᠶᠢᠨ ᠬᠠᠲᠤᠨ ᠬᠠᠭᠠᠨ ᠡᠨᠡ ᠦᠶᠡ ᠶᠢᠨ ᠬᠢᠨ ᠲᠠᠢ ᠬᠠᠮᠲᠤ ᠠᠮᠢᠯᠠᠵᠤ ᠡᠳᠡ ᠨᠠᠷ ᠢ ᠶᠠᠯᠠᠯᠠᠬᠤ ᠪᠣᠯᠣᠨᠠ᠃ ᠤᠴᠢᠷ ᠨᠢ ᠲᠡᠷᠡ ᠰᠣᠯᠣᠮᠣᠨ ᠤ ᠮᠡᠷᠭᠡᠨ ᠤᠬᠠᠭᠠᠨ ᠢ ᠰᠣᠨᠣᠰᠬᠤ ᠪᠠᠷ ᠳᠡᠯᠡᠬᠡᠢ ᠶᠢᠨ ᠬᠢᠵᠠᠭᠠᠷ ᠠᠴᠠ ᠢᠷᠡᠭᠰᠡᠨ ᠪᠢᠯᠡ᠃ ᠠᠩ᠋ᠬᠠᠷᠤᠭᠲᠤᠨ︕ ᠰᠣᠯᠣᠮᠣᠨ ᠠᠴᠠ ᠠᠭᠤᠤ ᠨᠢᠭᠡᠨ ᠨᠢ ᠡ᠊ᠨᠳᠡ ᠪᠠᠢᠨᠠ᠃
43 ᠪᠤᠵᠠᠷ ᠴᠢᠳᠬᠥᠷ ᠬᠥᠮᠦᠨ ᠡᠴᠡ ᠵᠠᠢᠯᠠᠵᠤ᠂ ᠠᠮᠠᠷᠠᠬᠤ ᠣᠷᠣᠨ ᠡᠷᠢᠭᠰᠡᠭᠡᠷ ᠤᠰᠤ ᠦᠭᠡᠢ ᠭᠠᠵᠠᠷ ᠢᠶᠠᠷ ᠬᠡᠰᠦᠭᠰᠡᠨ ᠪᠣᠯᠪᠠᠴᠤ ᠣᠯᠣᠭᠰᠠᠨ ᠦᠭᠡᠢ ᠳᠡᠭᠡᠨ᠄ 44 〈ᠤᠤᠯ ᠤᠨ ᠭᠡᠷ ᠲᠡᠭᠡᠨ ᠬᠠᠷᠢᠶᠠ〉 ᠬᠡᠮᠡᠨ ᠪᠤᠴᠠᠭᠠᠳ ᠦᠵᠡᠬᠦ ᠳᠦ᠂ ᠭᠡᠷ ᠨᠢ ᠡᠵᠡᠭᠦᠢᠷᠡᠵᠦ ᠴᠡᠪᠡᠷᠬᠡᠨ ᠴᠡᠭᠴᠡ ᠲᠠᠢ ᠪᠣᠯᠣᠭᠰᠠᠨ ᠪᠠᠢᠵᠠᠢ᠃ 45 ᠢᠩᠭᠢᠬᠦ ᠳᠦ ᠲᠡᠷᠡ ᠶᠠᠪᠤᠵᠤ᠂ ᠥᠪᠡᠷ ᠡᠴᠡ ᠪᠡᠨ ᠮᠠᠭᠤ ᠳᠣᠯᠣᠭᠠᠨ ᠴᠢᠳᠬᠥᠷ ᠢ ᠳᠠᠭᠠᠭᠤᠯᠤᠨ ᠲᠡᠨᠳᠡ ᠣᠷᠣᠩᠨᠠᠬᠤ ᠪᠣᠯᠣᠨᠠ᠃ ᠢᠩᠭᠢᠭᠡᠳ ᠲᠡᠷᠡ ᠬᠥᠮᠦᠨ ᠦ ᠡᠴᠦᠰ ᠨᠢ ᠤᠤᠯ ᠠᠴᠠ ᠪᠠᠨ ᠨᠡᠩ ᠳᠣᠣᠷᠠᠳᠤᠨᠠ᠃ ᠡᠨᠡ ᠬᠣᠷᠣᠨ ᠮᠠᠭᠤ ᠦᠶᠡ ᠶᠢᠨ ᠬᠢᠨ ᠴᠤ ᠮᠥᠨ ᠲᠡᠢᠮᠦ ᠪᠠᠢᠬᠤ ᠪᠣᠯᠣᠨᠠ》 ᠭᠡᠵᠦ ᠬᠠᠷᠢᠭᠤᠯᠵᠠᠢ᠃
ᠢᠰᠦ᠋ᠰ ᠤᠨ ᠭᠡᠷ ᠪᠦᠯᠢ ᠶᠢᠨ ᠬᠢᠨ
46 ᠢᠰᠦ᠋ᠰ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠳᠤ ᠶᠠᠷᠢᠵᠤ ᠪᠠᠢᠬᠤ ᠵᠠᠭᠤᠷᠠ᠂ ᠡᠵᠢ ᠪᠣᠯᠣᠨ ᠳᠡᠭᠦᠦ ᠨᠠᠷ ᠨᠢ ᠲᠡᠭᠦᠨ ᠳᠦ ᠶᠠᠭᠤᠮᠠ ᠬᠡᠯᠡᠬᠦ ᠭᠡᠵᠦ ᠭᠠᠳᠠᠨᠠ ᠵᠣᠭᠰᠣᠵᠤ ᠪᠠᠢᠯᠠ᠃ 47 [ᠬᠡᠨ ᠨᠢᠭᠡ ᠨᠢ ᠲᠡᠭᠦᠨ ᠳᠦ᠄ 《ᠬᠠᠷᠠᠭᠠᠴᠢ᠂ ᠡᠵᠢ ᠪᠣᠯᠣᠨ ᠳᠡᠭᠦᠦ ᠨᠠᠷ ᠴᠢᠨᠢ ᠲᠠᠨ ᠳᠤ ᠶᠠᠭᠤᠮᠠ ᠬᠡᠯᠡᠬᠦ ᠭᠡᠵᠦ ᠭᠠᠳᠠᠨᠠ ᠵᠣᠭᠰᠣᠵᠤ ᠪᠠᠢᠨᠠ》 ᠭᠡᠬᠦ ᠳᠦ᠂] 48 ᠢᠰᠦ᠋ᠰ ᠲᠡᠷᠡ ᠬᠥᠮᠦᠨ ᠳᠦ ᠬᠠᠷᠢᠭᠤᠯᠤᠨ᠄ 《ᠬᠡᠨ ᠮᠢᠨᠦ ᠡᠵᠢ᠂ ᠬᠡᠨ ᠮᠢᠨᠦ ᠳᠡᠭᠦᠦ ᠨᠠᠷ ᠶᠤᠮ ᠪᠤᠢ︖》 ᠭᠡᠳ᠂ 49 ᠭᠠᠷ ᠢᠶᠠᠷ ᠢᠶᠠᠨ ᠱᠠᠪᠢ ᠨᠠᠷ ᠢᠶᠠᠨ ᠵᠢᠭᠠᠵᠤ᠄ 《ᠮᠢᠨᠦ ᠡᠵᠢ ᠪᠣᠯᠣᠨ ᠮᠢᠨᠦ ᠳᠡᠭᠦᠦ ᠨᠠᠷ ᠡᠨᠡ ᠪᠠᠢᠨᠠ᠄ 50 ᠲᠩᠷᠢ ᠳᠠᠬᠢ ᠡᠴᠢᠭᠡ ᠶᠢᠨ ᠮᠢᠨᠢ ᠰᠠᠨᠠᠭᠠ ᠶᠢ ᠪᠡᠶᠡᠯᠡᠭᠦᠯᠦᠭᠴᠢ ᠪᠣᠯᠭᠠᠨ ᠮᠢᠨᠦ ᠬᠦᠦ ᠳᠡᠭᠦᠦ᠂ ᠥᠬᠢᠨ ᠳᠡᠭᠦᠦ ᠪᠣᠯᠣᠨ ᠡᠵᠢ ᠮᠥᠨ》 ᠭᠡᠪᠡ᠃