ᠮᠠᠲ᠋ᠠᠢ ᠬᠣᠷᠢᠨ ᠳᠣᠯᠣᠭ᠎ᠠ
 ᠶᠦᠳᠠ ᠠᠮᠢ ᠪᠠᠨ ᠬᠣᠣᠷᠯᠠᠭᠰᠠᠨ ᠨᠢ

1 ᠥᠷᠯᠥᠭᠡ ᠪᠣᠯᠬᠤ ᠳᠤ᠂ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠪᠣᠯᠣᠨ ᠠᠷᠠᠳ ᠤᠨ ᠠᠬᠠᠯᠠᠭᠴᠢᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠢᠰᠦ᠋ᠰ ᠢ ᠠᠯᠠᠭᠤᠯᠬᠤ ᠪᠠᠷ ᠵᠥᠪᠯᠡᠯᠳᠦᠪᠡ᠃ 2 ᠲᠡᠳᠡ ᠢᠰᠦ᠋ᠰ ᠢ ᠬᠦᠯᠢᠵᠦ ᠠᠪᠠᠴᠢᠭᠠᠳ᠂ ᠵᠠᠬᠢᠷᠤᠭᠴᠢ ᠫᠢᠯᠠᠲ ᠲᠤ ᠲᠤᠰᠢᠶᠠᠪᠠ᠃

3 ᠲᠡᠭᠡᠬᠦ ᠳᠦ ᠤᠷᠪᠠᠭᠴᠢ ᠶᠦᠳᠠ ᠢᠰᠦ᠋ᠰ ᠤᠨ ᠶᠠᠯᠠᠯᠠᠭᠳᠠᠭᠰᠠᠨ ᠢ ᠬᠠᠷᠠᠭᠠᠳ ᠬᠠᠷᠠᠮᠰᠠᠵᠤ᠂ ᠭᠤᠴᠢᠨ ᠮᠥᠩᠭᠥᠨ ᠵᠣᠭᠣᠰ ᠢᠶᠠᠨ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠪᠣᠯᠣᠨ ᠠᠬᠠᠯᠠᠭᠴᠢᠳ ᠲᠤ ᠪᠤᠴᠠᠭᠠᠨ ᠥᠭᠴᠡᠢ᠃ 4 ᠶᠦᠳᠠ᠄ 《ᠪᠢ ᠪᠤᠷᠤᠭᠤ ᠦᠭᠡᠢ ᠴᠢᠰᠤ ᠶᠢ ᠲᠤᠰᠢᠶᠠᠭᠰᠠᠨ ᠢᠶᠠᠷ ᠢᠶᠠᠨ ᠨᠢᠭᠦᠯ ᠬᠢᠭᠰᠡᠨ》 ᠭᠡᠬᠦ ᠳᠦ᠂ ᠲᠡᠳᠡ᠄ 《ᠪᠢᠳᠡᠨ ᠳᠦ ᠶᠠᠮᠠᠷ ᠬᠠᠮᠢᠶ᠎ᠠ ᠪᠠᠢᠨ᠎ᠠ︖ ᠥᠪᠡᠷ ᠢᠶᠡᠨ ᠮᠡᠳᠡ》 ᠭᠡᠰᠡᠨ ᠳᠦ᠂ 5 ᠶᠦᠳᠠ ᠮᠥᠩᠭᠥᠨ ᠵᠣᠭᠣᠰ ᠤᠳ ᠢ ᠥᠷᠭᠥᠭᠡᠨ ᠳᠦ ᠰᠢᠳᠡᠭᠡᠳ ᠭᠠᠷᠴᠤ ᠶᠠᠪᠤᠨ ᠪᠣᠭᠣᠵᠤ ᠦᠬᠦᠪᠡ᠃ 6 ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠮᠥᠩᠭᠥᠨ ᠵᠣᠭᠣᠰ ᠤᠳ ᠢ ᠲᠡᠭᠦᠵᠦ ᠠᠪᠤᠭᠠᠳ᠄ 《ᠡᠳᠡᠭᠡᠷ ᠢ ᠥᠷᠭᠥᠭᠡᠨ ᠦ ᠰᠠᠩ ᠳᠤ ᠬᠢᠵᠦ ᠪᠣᠯᠬᠤ ᠦᠭᠡᠢ᠂ ᠡᠨᠡ ᠴᠢᠨᠢ ᠴᠢᠰᠤᠨ ᠤ ᠦᠨ᠎ᠡ ᠶᠤᠮ》 ᠭᠡᠪᠡ᠃ 7 ᠲᠡᠳᠡ ᠵᠥᠪᠯᠡᠯᠳᠦᠭᠡᠳ ᠲᠡᠷᠡ ᠵᠣᠭᠣᠰ ᠢᠶᠠᠷ ᠸᠠᠭᠠᠷᠴᠢᠨ ᠤ ᠲᠠᠷᠢᠶ᠎ᠠ ᠶᠢ ᠬᠤᠳᠠᠯᠳᠤᠨ ᠠᠪᠴᠤ᠂ ᠭᠠᠳᠠᠨ᠎ᠠ ᠶᠢᠨ ᠬᠥᠮᠦᠰ ᠢ ᠣᠷᠣᠰᠢᠭᠤᠯᠬᠤ ᠭᠠᠵᠠᠷ ᠪᠣᠯᠭᠠᠪᠠ᠃ 8 ᠲᠡᠢᠮᠦ ᠡᠴᠡ ᠲᠡᠷᠡ ᠲᠠᠷᠢᠶ᠎ᠠ ᠨᠢ ᠥᠨᠥᠳᠥᠷ ᠪᠣᠯᠲᠠᠯ᠎ᠠ 《ᠴᠢᠰᠤᠲᠤ ᠲᠠᠷᠢᠶ᠎ᠠ》 ᠭᠡᠭᠳᠡᠬᠦ ᠪᠣᠯᠵᠠᠢ᠃ 9 ᠲᠡᠢᠨ ᠬᠦ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠧᠷᠧᠮᠢᠶ᠎ᠠ ᠪᠠᠷ 《ᠲᠡᠳᠡ ᠭᠤᠴᠢᠨ ᠮᠥᠩᠭᠥᠨ ᠵᠣᠭᠣᠰ (ᠢᠰᠷᠧᠯᠴᠦᠳ ᠲᠡᠷᠡ ᠦᠨ᠎ᠡ ᠪᠡᠷ ᠲᠡᠭᠦᠨ ᠦ ᠦᠨ᠎ᠡ ᠶᠢ ᠲᠣᠭᠲᠠᠭᠠᠭᠰᠠᠨ) ᠢ ᠠᠪᠴᠤ᠂ 10 ᠡᠵᠡᠨ ᠦ ᠨᠠᠳᠠ ᠳᠤ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠸᠠᠭᠠᠷᠴᠢᠨ ᠤ ᠲᠠᠷᠢᠶᠠᠨ ᠤ ᠦᠨ᠎ᠡ ᠶᠢ ᠲᠥᠯᠥᠪᠡ》 ᠭᠡᠵᠦ ᠬᠡᠯᠡᠭᠦᠯᠦᠭᠰᠡᠨ ᠨᠢ ᠪᠡᠶᠡᠯᠡᠭᠳᠡᠵᠡᠢ᠃
 ᠢᠰᠦ᠋ᠰ ᠫᠢᠯᠠᠲ ᠲᠤ ᠪᠠᠢᠴᠠᠭᠠᠭᠳᠠᠭᠰᠠᠨ ᠨᠢ

11 ᠢᠰᠦ᠋ᠰ ᠵᠠᠬᠢᠷᠤᠭᠴᠢ ᠶᠢᠨ ᠡᠮᠦᠨ᠎ᠡ ᠵᠣᠭᠰᠣᠪᠠ᠃ ᠵᠠᠬᠢᠷᠤᠭᠴᠢ ᠲᠡᠭᠦᠨ ᠡᠴᠡ᠄ 《ᠴᠢ ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ ᠮᠥᠨ ᠤᠤ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠢᠰᠦ᠋ᠰ᠄ 《ᠴᠢ ᠥᠪᠡᠷ ᠢᠶᠡᠨ ᠬᠡᠯᠡᠵᠦ ᠪᠠᠢᠨ᠎ᠠ》 ᠭᠡᠪᠡ᠃ 12 ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠪᠣᠯᠣᠨ ᠠᠬᠠᠯᠠᠭᠴᠢᠳ ᠵᠠᠭᠠᠯᠳᠤᠵᠤ ᠪᠠᠢᠬᠤ ᠳᠤ᠂ ᠢᠰᠦ᠋ᠰ ᠶᠠᠭᠤ ᠴᠤ ᠬᠠᠷᠢᠭᠤᠯᠤᠭᠰᠠᠨ ᠦᠭᠡᠢ᠃ 13 ᠫᠢᠯᠠᠲ ᠲᠡᠭᠦᠨ ᠳᠦ᠄ 《ᠲᠡᠳᠡ ᠬᠡᠴᠢᠨᠡᠨ ᠣᠯᠠᠨ ᠶᠠᠪᠤᠳᠠᠯ ᠢᠶᠠᠷ ᠴᠢᠨᠦ ᠡᠰᠡᠷᠭᠦ ᠭᠡᠷᠡᠴᠢᠯᠡᠵᠦ ᠪᠠᠢᠨ᠎ᠠ︕ ᠴᠢ ᠰᠣᠨᠣᠰᠬᠤ ᠦᠭᠡᠢ ᠪᠠᠢᠨ᠎ᠠ ᠤᠤ︖》 ᠭᠡᠪᠡ᠃ 14 ᠬᠠᠷᠢᠨ ᠢᠰᠦ᠋ᠰ ᠲᠡᠭᠦᠨ ᠳᠦ ᠨᠢᠭᠡ ᠦᠭᠡ ᠴᠤ ᠬᠠᠷᠢᠭᠤᠯᠤᠭᠰᠠᠨ ᠦᠭᠡᠢ᠂ ᠵᠠᠬᠢᠷᠤᠭᠴᠢ ᠶᠡᠬᠡᠳᠡ ᠭᠠᠢᠬᠠᠪᠠ᠃

15 ᠪᠠᠶᠠᠷ ᠤᠨ ᠦᠶ᠎ᠡ ᠳᠦ᠂ ᠵᠠᠬᠢᠷᠤᠭᠴᠢ ᠠᠷᠠᠳ ᠣᠯᠠᠨ ᠤ ᠬᠦᠰᠡᠯᠲᠡ ᠪᠡᠷ ᠨᠢᠭᠡ ᠬᠣᠷᠢᠭᠳᠠᠯ ᠢ ᠰᠤᠯᠠᠯᠠᠳᠠᠭ ᠵᠠᠩᠰᠢᠯ ᠲᠠᠢ ᠪᠠᠢᠵᠠᠢ᠃ 16 ᠲᠡᠷᠡ ᠦᠶ᠎ᠡ ᠳᠦ ᠪᠠᠷᠠᠪ ᠭᠡᠭᠴᠢ ᠴᠤᠤ ᠲᠠᠢ ᠬᠣᠷᠢᠭᠳᠠᠯ ᠪᠠᠢᠪᠠ᠃ 17 ᠫᠢᠯᠠᠲ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠠᠴᠠ᠄ 《ᠲᠠ ᠨᠠᠷ ᠬᠡᠨ ᠢ ᠰᠤᠯᠠᠯᠠᠭᠤᠯᠬᠤ ᠶᠢ ᠬᠦᠰᠡᠵᠦ ᠪᠠᠢᠨ᠎ᠠ ᠪᠤᠢ︖ ᠪᠠᠷᠠᠪ ᠢ ᠤᠤ︖ ᠡᠰᠡᠪᠡᠯ ᠾᠷᠢᠰᠲ᠋ᠣᠰ ᠭᠡᠭᠳᠡᠬᠦ ᠢᠰᠦ᠋ᠰ ᠢ ᠤᠤ︖》 ᠭᠡᠵᠦ ᠠᠰᠠᠭᠤᠪᠠ᠃ 18 ᠤᠴᠢᠷ ᠨᠢ ᠲᠡᠳᠡ ᠠᠲᠠᠭᠠᠷᠬᠠᠬᠤ ᠳᠠᠭᠠᠨ ᠢᠰᠦ᠋ᠰ ᠢ ᠲᠤᠰᠢᠶᠠᠭᠰᠠᠨ ᠢ ᠫᠢᠯᠠᠲ ᠮᠡᠳᠡᠵᠦ ᠪᠠᠢᠯ᠎ᠠ᠃ 19 ᠲᠡᠷᠡ ᠰᠢᠭᠦᠭᠴᠢ ᠶᠢᠨ ᠰᠠᠭᠤᠳᠠᠯ ᠳᠠᠭᠠᠨ ᠰᠠᠭᠤᠵᠤ ᠪᠠᠢᠲᠠᠯ᠎ᠠ ᠡᠬᠡᠨᠡᠷ ᠨᠢ᠄ 《ᠲᠡᠷᠡ ᠵᠥᠪᠲᠡᠨ ᠦ ᠶᠠᠪᠤᠳᠠᠯ ᠳᠤ ᠲᠠ ᠪᠢᠲᠡᠭᠡᠢ ᠣᠷᠣᠯᠴᠠᠭᠠᠷᠠᠢ᠂ ᠪᠢ ᠤᠷᠢᠳᠤ ᠰᠥᠨᠢ ᠵᠡᠭᠦᠳᠦᠨ ᠳᠡᠭᠡᠨ ᠲᠡᠭᠦᠨ ᠡᠴᠡ ᠪᠣᠯᠵᠤ ᠶᠡᠬᠡᠳᠡ ᠰᠢᠨᠠᠯᠤᠭᠰᠠᠨ》 ᠭᠡᠵᠦ ᠲᠡᠭᠦᠨ ᠳᠦ ᠬᠡᠯᠡᠭᠦᠯᠵᠡᠢ᠃ 20 ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠪᠣᠯᠣᠨ ᠠᠬᠠᠯᠠᠭᠴᠢᠳ ᠬᠤᠷᠠᠭᠰᠠᠨ ᠣᠯᠠᠨ ᠢ ᠢᠳᠬᠠᠭᠠᠳ ᠪᠠᠷᠠᠪ ᠢ ᠰᠤᠯᠠᠯᠠᠬᠤ ᠪᠠ ᠢᠰᠦ᠋ᠰ ᠢ ᠠᠯᠠᠬᠤ ᠶᠢ ᠭᠤᠶᠤᠭᠤᠯᠪᠠ᠃ 21 ᠵᠠᠬᠢᠷᠤᠭᠴᠢ ᠲᠡᠳᠡᠨ ᠳᠦ᠄ 《ᠡᠨᠡ ᠬᠣᠶᠠᠷ ᠤᠨ ᠬᠡᠨ ᠢ ᠨᠢ ᠰᠤᠯᠠᠯᠠᠬᠤ ᠶᠢ ᠬᠦᠰᠡᠵᠦ ᠪᠠᠢᠨ᠎ᠠ ᠪᠤᠢ︖》 ᠭᠡᠬᠦ ᠳᠦ᠂ ᠲᠡᠳᠡ᠄ 《ᠪᠠᠷᠠᠪ ᠢ》 ᠭᠡᠵᠡᠭᠡᠯ᠎ᠡ᠃ 22 ᠲᠡᠭᠡᠲᠡᠯ᠎ᠡ ᠫᠢᠯᠠᠲ᠄ 《ᠾᠷᠢᠰᠲ᠋ᠣᠰ ᠭᠡᠭᠳᠡᠬᠦ ᠢᠰᠦ᠋ᠰ ᠢ ᠪᠢ ᠶᠠᠭᠠᠬᠢᠬᠤ ᠪᠤᠢ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ ᠲᠡᠳᠡ ᠴᠥᠮ ᠢᠶᠡᠷ ᠢᠶᠠᠨ᠄ 《ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠ》 ᠭᠡᠪᠡ᠃ 23 ᠫᠢᠯᠠᠲ᠄ 《ᠶᠠᠭᠤᠨ ᠳᠤ ᠪᠤᠢ︖ ᠲᠡᠷᠡ ᠶᠠᠮᠠᠷ ᠮᠠᠭᠤ ᠶᠢ ᠦᠢᠯᠡᠳᠦᠭᠰᠡᠨ ᠪᠤᠢ︖》 ᠭᠡᠬᠦ ᠳᠦ᠂ ᠲᠡᠳᠡ ᠤᠯᠠᠮ ᠴᠢᠩᠭ᠍᠎ᠠ ᠳᠠᠭᠤ ᠪᠠᠷ᠄ 《ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠ︕》 ᠭᠡᠵᠦ ᠪᠠᠢᠯ᠎ᠠ᠃

24 ᠫᠢᠯᠠᠲ ᠲᠤᠰᠠ ᠪᠣᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠦᠢᠮᠡᠭᠡᠨ ᠡᠭᠦᠰᠴᠦ ᠪᠠᠢᠭ᠎ᠠ ᠶᠢ ᠬᠠᠷᠠᠭᠠᠳ ᠤᠰᠤ ᠠᠪᠴᠢᠷᠠᠭᠤᠯᠵᠤ᠂ ᠬᠤᠷᠠᠭᠰᠠᠨ ᠣᠯᠠᠨ ᠤ ᠡᠮᠦᠨ᠎ᠡ ᠭᠠᠷ ᠢᠶᠠᠨ ᠤᠬᠢᠶᠠᠨ᠄ 《ᠪᠢ ᠡᠨᠡ ᠬᠥᠮᠦᠨ ᠦ ᠴᠢᠰᠤᠨ ᠳᠤ ᠪᠤᠷᠤᠭᠤ ᠦᠭᠡᠢ᠃ ᠲᠠ ᠨᠠᠷ ᠥᠪᠡᠷᠰᠡᠳ ᠢᠶᠡᠨ ᠮᠡᠳᠡᠲᠦᠭᠡᠢ》 ᠭᠡᠵᠡᠢ᠃ 25 ᠲᠡᠭᠡᠬᠦ ᠳᠦ᠂ ᠠᠷᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠢᠶᠡᠨ᠄ 《ᠲᠡᠭᠦᠨ ᠦ ᠴᠢᠰᠤ ᠪᠢᠳᠡ ᠪᠣᠯᠣᠨ ᠪᠢᠳᠡᠨ ᠦ ᠦᠷ᠎ᠡ ᠬᠡᠦᠬᠡᠳ ᠦᠨ ᠳᠡᠭᠡᠷ᠎ᠡ ᠪᠠᠭᠤᠭ》 ᠭᠡᠵᠡᠭᠡᠪᠡ᠃ 26 ᠡᠢᠮᠦ ᠳᠦ ᠫᠢᠯᠠᠲ ᠪᠠᠷᠠᠪ ᠢ ᠰᠤᠯᠠᠯᠠᠭᠰᠠᠨ ᠪᠥᠭᠡᠳ ᠢᠰᠦ᠋ᠰ ᠢ ᠲᠠᠰᠢᠭᠤᠷᠳᠠᠭᠤᠯᠤᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠭᠤᠯᠬᠤ ᠪᠠᠷ ᠲᠤᠰᠢᠶᠠᠯ᠎ᠠ᠃
 ᠢᠰᠦ᠋ᠰ ᠳᠣᠷᠣᠮᠵᠢᠯᠠᠭᠳᠠᠭᠰᠠᠨ ᠨᠢ

27 ᠲᠡᠭᠡᠬᠦ ᠳᠦ᠂ ᠵᠠᠬᠢᠷᠤᠭᠴᠢ ᠶᠢᠨ ᠴᠡᠷᠢᠭ ᠤᠳ ᠢᠰᠦ᠋ᠰ ᠢ ᠣᠷᠳᠣᠨ ᠳᠤ ᠠᠪᠠᠴᠢᠭᠠᠳ ᠪᠦᠬᠦ ᠬᠤᠸᠠᠷᠠᠨ ᠤ ᠬᠢᠨ ᠢᠶᠠᠨ ᠲᠡᠭᠦᠨ ᠦ ᠳᠡᠷᠭᠡᠳᠡ ᠴᠤᠭᠯᠠᠭᠤᠯᠪᠠ᠃ 28 ᠲᠡᠳᠡ ᠲᠡᠭᠦᠨ ᠢ ᠲᠠᠢᠴᠢᠭᠠᠳ ᠴᠢᠰ ᠤᠯᠠᠭᠠᠨ ᠨᠥᠮᠥᠷᠭᠡ ᠨᠥᠮᠥᠷᠭᠡᠵᠦ᠂ 29 ᠥᠷᠭᠡᠰᠦᠲᠦ ᠮᠥᠴᠢᠷ ᠢᠶᠠᠷ ᠲᠢᠲᠢᠮ ᠰᠦᠯᠵᠢᠭᠡᠳ ᠲᠣᠯᠣᠭᠠᠢ ᠳᠡᠭᠡᠷ᠎ᠡ ᠨᠢ ᠲᠠᠯᠪᠢᠵᠤ᠂ ᠪᠠᠷᠠᠭᠤᠨ ᠭᠠᠷ ᠲᠤᠨᠢ ᠵᠡᠭᠡᠰᠦᠨ ᠰᠠᠪᠠᠭ᠎ᠠ ᠪᠠᠷᠢᠭᠤᠯᠤᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠲᠡᠭᠦᠨ ᠦ ᠡᠮᠦᠨ᠎ᠡ ᠰᠥᠭᠥᠳᠥᠨ᠄ 《ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ ᠮᠠᠨᠳᠤᠲᠤᠭᠠᠢ》 ᠬᠡᠮᠡᠨ ᠳᠣᠭᠣᠭᠢᠯᠠᠵᠠᠢ᠃ 30 ᠲᠡᠳᠡ ᠲᠡᠭᠦᠨ ᠦ ᠳᠡᠭᠡᠷ᠎ᠡ ᠨᠤᠯᠮᠤᠵᠤ᠂ ᠵᠡᠭᠡᠰᠦᠨ ᠰᠠᠪᠠᠭ᠎ᠠ ᠶᠢ ᠨᠢ ᠠᠪᠤᠭᠠᠳ ᠲᠣᠯᠣᠭᠠᠢ ᠤᠷᠤᠭᠤ ᠨᠢ ᠴᠣᠬᠢᠯᠠᠪᠠ᠃ 31 ᠢᠩᠭᠢᠵᠦ ᠳᠣᠭᠣᠭᠢᠯᠠᠭᠠᠳ ᠲᠡᠭᠦᠨ ᠦ ᠨᠥᠮᠥᠷᠭᠡ ᠶᠢ ᠲᠠᠢᠯᠵᠤ ᠬᠤᠪᠴᠠᠰᠤ ᠬᠤᠨᠠᠷ ᠢ ᠨᠢ ᠡᠮᠦᠰᠬᠡᠪᠡ᠃ ᠲᠡᠭᠡᠭᠡᠳ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠬᠤ ᠪᠠᠷ ᠲᠡᠭᠦᠨ ᠢ ᠠᠪᠴᠤ ᠶᠠᠪᠤᠵᠠᠢ᠃
 ᠢᠰᠦ᠋ᠰ ᠴᠣᠪᠳᠣᠯᠠᠭᠳᠠᠭᠰᠠᠨ ᠨᠢ

32 ᠲᠡᠳᠡ ᠭᠠᠷᠬᠤ ᠳᠠᠭᠠᠨ ᠰᠢᠮᠣᠨ ᠭᠡᠳᠡᠭ ᠺᠦᠷᠧᠨᠠᠢ ᠬᠥᠮᠦᠨ ᠲᠡᠢ ᠲᠠᠭᠠᠷᠠᠯᠳᠤᠵᠤ᠂ ᠲᠡᠭᠦᠨ ᠢ ᠠᠯᠪᠠᠳᠠᠨ ᠢᠰᠦ᠋ᠰ ᠤᠨ ᠵᠠᠭᠠᠯᠮᠠᠢ ᠶᠢ ᠡᠭᠦᠷᠦᠭᠦᠯᠪᠡ᠃ 33 ᠲᠡᠳᠡ ᠭᠣᠯᠭᠣᠲ᠋ᠠ (ᠭᠠᠪᠠᠯᠠ ᠶᠢᠨ ᠭᠠᠵᠠᠷ ᠭᠡᠰᠡᠨ ᠤᠳᠬ᠎ᠠ ᠲᠠᠢ) ᠬᠡᠮᠡᠬᠦ ᠭᠠᠵᠠᠷ ᠲᠤ ᠬᠦᠷᠦᠭᠡᠳ 34 ᠰᠥᠰᠥ ᠬᠣᠯᠢᠭᠰᠠᠨ ᠦᠵᠦᠮ ᠦᠨ ᠠᠷᠢᠬᠢ ᠶᠢ ᠢᠰᠦ᠋ᠰ ᠲᠤ ᠤᠤᠭᠤᠯᠭᠠᠬᠤ ᠪᠠᠷ ᠥᠭᠭᠥᠭᠰᠡᠨ ᠳᠦ᠂ ᠲᠡᠷᠡ ᠠᠮᠰᠠᠭᠰᠠᠨ ᠪᠣᠯᠪᠠᠴᠤ ᠤᠤᠭᠤᠬᠤ ᠦᠭᠡᠢ ᠪᠠᠢᠯ᠎ᠠ᠃ 35 ᠲᠡᠳᠡ ᠢᠰᠦ᠋ᠰ ᠢ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠭᠠᠳ᠂ ᠰᠢᠪᠠᠭᠠᠳᠠᠵᠤ ᠬᠤᠪᠴᠠᠰᠤ ᠬᠤᠨᠠᠷ ᠢ ᠨᠢ ᠬᠤᠪᠢᠶᠠᠯᠴᠠᠭᠰᠠᠨ ᠪᠥᠭᠡᠳ 36 ᠲᠡᠨᠳᠡ ᠪᠡᠨ ᠰᠠᠭᠤᠭᠠᠳ ᠢᠰᠦ᠋ᠰ ᠢ ᠰᠠᠬᠢᠵᠤ ᠪᠠᠢᠪᠠ᠃ 37 ᠲᠣᠯᠣᠭᠠᠢ ᠶᠢᠨ ᠬᠢᠨᠢ ᠳᠡᠭᠡᠳᠦ ᠲᠠᠯ᠎ᠠ ᠳᠤ 《ᠡᠨᠡ ᠪᠣᠯ ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ ᠢᠰᠦ᠋ᠰ》 ᠭᠡᠰᠡᠨ ᠪᠢᠴᠢᠭᠡᠰᠦ ᠲᠠᠢ ᠶᠠᠯ᠎ᠠ ᠶᠢᠨ ᠫᠠᠢᠵᠠ ᠶᠢ ᠬᠠᠳᠠᠵᠠᠢ᠃

38 ᠢᠰᠦ᠋ᠰ ᠲᠠᠢ ᠬᠠᠮᠲᠤ ᠬᠣᠶᠠᠷ ᠳᠡᠭᠡᠷᠡᠮᠴᠢᠨ ᠤ ᠨᠢᠭᠡ ᠶᠢ ᠨᠢ ᠪᠠᠷᠠᠭᠤᠨ ᠲᠠᠯ᠎ᠠ ᠳᠤᠨᠢ᠂ ᠨᠥᠭᠥᠭᠡ ᠶᠢ ᠨᠢ ᠵᠡᠭᠦᠨ ᠲᠠᠯ᠎ᠠ ᠳᠤᠨᠢ ᠴᠣᠪᠳᠣᠯᠠᠵᠠᠢ᠃ 39 ᠳᠡᠷᠭᠡᠳᠡᠭᠦᠷ ᠨᠢ ᠶᠠᠪᠤᠭᠰᠠᠳ ᠲᠣᠯᠣᠭᠠᠢ ᠰᠡᠭᠰᠦᠷᠦᠨ ᠢᠰᠦ᠋ᠰ ᠢ ᠳᠣᠷᠣᠮᠵᠢᠯᠠᠵᠤ᠄ 40 《ᠥᠷᠭᠥᠭᠡ ᠶᠢ ᠨᠤᠷᠠᠭᠠᠵᠤ᠂ ᠭᠤᠷᠪᠠᠨ ᠡᠳᠦᠷ ᠦᠨ ᠳᠣᠲᠣᠷ᠎ᠠ ᠪᠣᠰᠬᠠᠭᠴᠢ ᠡ︕ ᠥᠪᠡᠷ ᠢ ᠪᠠᠨ ᠠᠪᠤᠷᠠᠭᠠᠴᠢ ᠳᠠ᠃ ᠬᠡᠷᠪᠡ ᠴᠢ ᠪᠤᠷᠬᠠᠨ ᠤ ᠬᠦᠦ ᠮᠥᠨ ᠶᠤᠮ ᠪᠣᠯ᠂ ᠵᠠᠭᠠᠯᠮᠠᠢ ᠠᠴᠠ ᠪᠠᠨ ᠪᠠᠭᠤᠵᠤ ᠦᠵᠡ》 ᠭᠡᠵᠡᠭᠡᠵᠦ ᠪᠠᠢᠯ᠎ᠠ᠃ 41 ᠡᠭᠦᠨᠴᠢᠯᠡᠨ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠴᠤ ᠪᠢᠴᠢᠭᠲᠡᠳ ᠪᠣᠯᠣᠨ ᠠᠬᠠᠯᠠᠭᠴᠢᠳ ᠤᠨ ᠬᠠᠮᠲᠤ ᠲᠡᠭᠦᠨ ᠢ ᠳᠣᠭᠣᠭᠢᠯᠠᠨ᠄ 42 《ᠪᠤᠰᠤᠳ ᠢ ᠠᠪᠤᠷᠠᠭᠰᠠᠨ ᠬᠢᠷᠢ ᠨᠢ ᠥᠪᠡᠷ ᠢ ᠪᠠᠨ ᠠᠪᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠶᠤᠮ ᠪᠠᠢᠨ᠎ᠠ᠃ ᠢᠰᠷᠧᠯ ᠤᠨ ᠬᠠᠭᠠᠨ ᠭᠡᠨ᠎ᠡ᠂ ᠣᠳᠣ ᠵᠠᠭᠠᠯᠮᠠᠢ ᠠᠴᠠ ᠪᠠᠨ ᠪᠠᠭᠤ ᠳᠠ︕ ᠲᠡᠭᠡᠪᠡᠯ ᠪᠢᠳᠡ ᠲᠡᠭᠦᠨ ᠳᠦ ᠢᠲᠡᠭᠡᠨ᠎ᠡ᠃ 43 ᠲᠡᠷᠡ ᠪᠤᠷᠬᠠᠨ ᠳᠤ ᠨᠠᠢᠳᠠᠭᠰᠠᠨ ᠶᠤᠮ᠂ ᠪᠤᠷᠬᠠᠨ ᠲᠡᠭᠦᠨ ᠢ ᠲᠠᠭᠠᠯᠠᠪᠠᠯ ᠣᠳᠣ ᠠᠪᠤᠷᠠᠨ᠎ᠠ᠃ 〈ᠪᠢ ᠪᠤᠷᠬᠠᠨ ᠤ ᠬᠦᠦ〉 ᠭᠡᠰᠡᠨ ᠶᠤᠮ ᠴᠢᠨᠢ》 ᠭᠡᠵᠡᠭᠡᠪᠡ᠃ 44 ᠬᠠᠮᠲᠤ ᠴᠣᠪᠳᠣᠯᠠᠭᠳᠠᠭᠰᠠᠨ ᠳᠡᠭᠡᠷᠡᠮᠴᠢᠳ ᠴᠤ ᠢᠰᠦ᠋ᠰ ᠢ ᠡᠭᠦᠨᠴᠢᠯᠡᠨ ᠲᠠᠪᠠᠯᠠᠵᠤ ᠪᠠᠢᠯ᠎ᠠ᠃

45 ᠦᠳᠡ ᠡᠴᠡ ᠠᠪᠤᠭᠠᠳ ᠭᠤᠷᠪᠠᠨ ᠴᠠᠭ ᠪᠣᠯᠲᠠᠯ᠎ᠠ ᠭᠠᠵᠠᠷ ᠨᠡᠢᠳᠡᠮ ᠬᠠᠷᠠᠩ᠋ᠭᠤᠢᠯᠠᠵᠠᠢ᠃ 46 ᠭᠤᠷᠪᠠᠨ ᠴᠠᠭ ᠤᠨ ᠣᠷᠴᠢᠮ ᠢᠰᠦ᠋ᠰ ᠴᠢᠩᠭ᠍᠎ᠠ ᠳᠠᠭᠤ ᠪᠠᠷ᠄ 《ᠧᠯᠢ᠂ ᠧᠯᠢ᠂ ᠯᠧᠮᠠ ᠰᠠᠪᠠᠺᠲ᠋ᠠᠨᠢ︖ (ᠣᠷᠴᠢᠭᠤᠯᠪᠠᠯ 〈ᠪᠤᠷᠬᠠᠨ ᠮᠢᠨᠢ᠂ ᠪᠤᠷᠬᠠᠨ ᠮᠢᠨᠢ᠂ ᠶᠠᠭᠤᠨ ᠳᠤ ᠲᠠ ᠨᠠᠮᠠᠶᠢ ᠣᠷᠬᠢᠪᠠ︖〉)》 ᠭᠡᠵᠦ ᠬᠠᠰᠬᠢᠷᠤᠯ᠎ᠠ᠃ 47 ᠲᠡᠨᠳᠡ ᠵᠣᠭᠰᠣᠭᠰᠠᠨ ᠵᠠᠷᠢᠮ ᠨᠢ ᠡᠭᠦᠨ ᠢ ᠰᠣᠨᠣᠰᠣᠭᠠᠳ᠄ 《ᠲᠡᠷᠡ ᠧᠯᠢᠶ᠎ᠠ ᠶᠢ ᠳᠠᠭᠤᠳᠠᠵᠤ ᠪᠠᠢᠨ᠎ᠠ》 ᠭᠡᠵᠦ ᠪᠠᠢᠪᠠ᠃ 48 ᠨᠢᠭᠡ ᠨᠢ ᠳᠠᠷᠤᠢᠬᠠᠨ ᠭᠦᠶᠦᠵᠦ ᠳᠠᠯᠠᠢ ᠶᠢᠨ ᠬᠥᠪᠥᠩ ᠠᠪᠴᠤ᠂ ᠢᠰᠭᠦᠯᠡᠩ ᠳᠠᠷᠠᠰᠤᠨ ᠳᠤ ᠨᠣᠷᠭᠠᠭᠠᠳ ᠵᠡᠭᠡᠰᠦᠨ ᠦ ᠰᠠᠪᠠᠭᠠᠨ ᠳᠤ ᠡᠯᠭᠦᠨ ᠲᠡᠭᠦᠨ ᠳᠦ ᠤᠤᠭᠤᠯᠭᠠᠬᠤ ᠭᠡᠰᠡᠨ ᠳᠦ᠂ 49 ᠪᠤᠰᠤᠳ ᠨᠢ᠄ 《ᠪᠠᠢᠵᠠ᠂ ᠧᠯᠢᠶ᠎ᠠ ᠢᠷᠡᠵᠦ ᠠᠪᠤᠷᠠᠬᠤ ᠡᠰᠡᠬᠦ ᠶᠢ ᠬᠠᠷᠠᠵᠠᠭᠠᠶ᠎ᠠ》 ᠭᠡᠯᠴᠡᠪᠡ᠃ 50 ᠢᠰᠦ᠋ᠰ ᠳᠠᠬᠢᠨ ᠴᠢᠩᠭ᠍᠎ᠠ ᠳᠠᠭᠤ ᠪᠠᠷ ᠬᠠᠰᠬᠢᠷᠤᠭᠠᠳ ᠠᠮᠢ ᠲᠠᠯᠪᠢᠪᠠ᠃ 51 ᠬᠠᠷᠠ᠂ ᠥᠷᠭᠥᠭᠡᠨ ᠦ ᠬᠥᠰᠢᠭᠡ ᠳᠡᠭᠡᠷ᠎ᠡ ᠡᠴᠡ ᠪᠡᠨ ᠳᠣᠷᠣᠭᠰᠢ ᠬᠣᠶᠠᠷ ᠬᠡᠰᠡᠭ ᠪᠣᠯᠣᠨ ᠴᠤᠤᠷᠠᠵᠤ᠂ ᠭᠠᠵᠠᠷ ᠬᠥᠳᠡᠯᠦᠨ ᠬᠠᠳᠠ ᠴᠢᠯᠠᠭᠤᠳ ᠬᠠᠭᠠᠷᠠᠵᠤ᠂ 52 ᠪᠤᠯᠠᠰᠢ ᠨᠤᠭᠤᠳ ᠨᠡᠭᠡᠭᠡᠭᠳᠡᠨ᠂ ᠨᠣᠢᠷᠰᠣᠭᠰᠠᠨ ᠠᠷᠢᠭᠤᠨ ᠬᠥᠮᠦᠰ ᠦᠨ ᠪᠡᠶ᠎ᠡ ᠣᠯᠠᠨ ᠢᠶᠠᠷ ᠠᠮᠢᠯᠠᠵᠠᠢ᠃ 53 ᠲᠡᠳᠡ ᠪᠤᠯᠠᠰᠢᠨ ᠠᠴᠠ ᠪᠠᠨ ᠭᠠᠷᠤᠭᠰᠠᠨ ᠪᠥᠭᠡᠳ ᠢᠰᠦ᠋ᠰ ᠠᠮᠢᠯᠠᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠠᠷᠢᠭᠤᠨ ᠬᠣᠲᠠ ᠳᠤ ᠣᠷᠣᠵᠤ ᠣᠯᠠᠨ ᠬᠥᠮᠦᠨ ᠳᠦ ᠬᠠᠷᠠᠭᠳᠠᠪᠠ᠃ 54 ᠢᠰᠦ᠋ᠰ ᠢ ᠰᠠᠬᠢᠵᠤ ᠪᠠᠢᠭᠰᠠᠨ ᠵᠠᠭᠤᠲᠤ ᠶᠢᠨ ᠳᠠᠷᠤᠭ᠎ᠠ ᠪᠣᠯᠣᠨ ᠬᠠᠮᠲᠤ ᠪᠠᠢᠭᠰᠠᠳ ᠨᠢ ᠭᠠᠵᠠᠷ ᠬᠥᠳᠡᠯᠦᠯᠲᠡ ᠪᠠ ᠪᠣᠯᠣᠭᠰᠠᠨ ᠶᠠᠪᠤᠳᠠᠯ ᠤᠳ ᠢ ᠬᠠᠷᠠᠭᠠᠳ ᠶᠡᠬᠡᠳᠡ ᠡᠮᠢᠶᠡᠵᠦ᠄ 《ᠡᠨᠡ ᠴᠢᠨᠢ ᠨᠡᠭᠡᠷᠡᠨ ᠪᠤᠷᠬᠠᠨ ᠤ ᠬᠦᠦ ᠪᠠᠢᠵᠠᠢ》 ᠭᠡᠵᠡᠭᠡᠪᠡ᠃

55 ᠲᠡᠨᠳᠡ ᠣᠯᠠᠨ ᠡᠮᠡᠭᠲᠡᠢ ᠬᠣᠯᠠ ᠠᠴᠠ ᠠᠵᠢᠭᠯᠠᠵᠤ ᠪᠠᠢᠯ᠎ᠠ᠃ ᠲᠡᠳᠡ ᠢᠰᠦ᠋ᠰ ᠲᠤ ᠦᠢᠯᠡᠴᠢᠯᠡᠭᠰᠡᠭᠡᠷ ᠭᠠᠯᠢᠯᠠᠶ᠎ᠠ ᠠᠴᠠ ᠳᠠᠭᠠᠵᠤ ᠢᠷᠡᠭᠰᠡᠨ ᠪᠥᠭᠡᠳ 56 ᠳᠤᠮᠳᠠ ᠨᠢ ᠮᠠᠭᠳᠠᠯ ᠤᠨ ᠮᠠᠷᠢᠶᠠ ᠪᠣᠯᠣᠨ ᠶᠠᠺᠣᠪ᠂ ᠶᠣᠰᠧᠹ ᠬᠣᠶᠠᠷ ᠤᠨ ᠡᠬᠡ ᠮᠠᠷᠢᠶᠠ᠂ ᠪᠠᠰᠠ ᠽᠧᠪᠧᠳᠠᠢ ᠶᠢᠨ ᠬᠥᠪᠡᠭᠦᠳ ᠦᠨ ᠡᠬᠡ ᠴᠤ ᠪᠠᠢᠵᠠᠢ᠃
 ᠢᠰᠦ᠋ᠰ ᠪᠤᠯᠠᠰᠢᠯᠠᠭᠳᠠᠭᠰᠠᠨ ᠨᠢ

57 ᠣᠷᠣᠢ ᠪᠣᠯᠬᠤ ᠳᠤ᠂ ᠠᠷᠢᠮᠠᠲ᠋ᠠ ᠨᠤᠲᠤᠭ ᠤᠨ ᠶᠣᠰᠧᠹ ᠭᠡᠭᠴᠢ ᠨᠢᠭᠡᠨ ᠪᠠᠶᠠᠨ ᠬᠥᠮᠦᠨ ᠢᠷᠡᠯ᠎ᠡ᠃ ᠲᠡᠷᠡ ᠴᠤ ᠢᠰᠦ᠋ᠰ ᠤᠨ ᠱᠠᠪᠢ ᠪᠠᠢᠪᠠ᠃ 58 ᠡᠨᠡ ᠬᠥᠮᠦᠨ ᠫᠢᠯᠠᠲ ᠳᠡᠭᠡᠷ᠎ᠡ ᠣᠴᠢᠵᠤ ᠢᠰᠦ᠋ᠰ ᠤᠨ ᠴᠣᠭᠴᠠ ᠶᠢ ᠭᠤᠶᠤᠬᠤ ᠳᠤ᠂ ᠫᠢᠯᠠᠲ ᠥᠭ ᠭᠡᠵᠦ ᠵᠠᠬᠢᠪᠠ᠃ 59 ᠶᠣᠰᠧᠹ ᠴᠣᠭᠴᠠ ᠶᠢ ᠠᠪᠤᠭᠠᠳ ᠴᠡᠪᠡᠷ ᠥᠷᠮᠥᠭ ᠢᠶᠡᠷ ᠤᠷᠢᠶᠠᠭᠰᠠᠨ ᠤ ᠳᠠᠷᠠᠭ᠎ᠠ᠂ 60 ᠬᠠᠳᠠ ᠤᠬᠤᠵᠤ ᠪᠡᠯᠡᠳᠬᠡᠭᠰᠡᠨ ᠰᠢᠨ᠎ᠡ ᠪᠤᠯᠠᠰᠢᠨ ᠳᠤ ᠲᠠᠯᠪᠢᠵᠠᠢ᠃ ᠲᠡᠭᠡᠭᠡᠳ ᠲᠣᠮᠣ ᠴᠢᠯᠠᠭᠤ ᠥᠩᠬᠥᠷᠢᠭᠦᠯᠦᠨ ᠪᠤᠯᠠᠰᠢᠨ ᠤ ᠠᠮᠠ ᠶᠢ ᠲᠠᠭᠯᠠᠭᠠᠳ ᠶᠠᠪᠤᠪᠠ᠃ 61 ᠮᠠᠭᠳᠠᠯ ᠤᠨ ᠮᠠᠷᠢᠶᠠ ᠪᠣᠯᠣᠨ ᠨᠥᠭᠥᠭᠡ ᠮᠠᠷᠢᠶᠠ ᠲᠡᠨᠳᠡ ᠪᠤᠯᠠᠰᠢ ᠶᠢ ᠡᠰᠡᠷᠭᠦᠯᠡᠨ ᠰᠠᠭᠤᠵᠤ ᠪᠠᠢᠪᠠ᠃

62 ᠳᠠᠷᠠᠭ᠎ᠠ ᠡᠳᠦᠷ (ᠪᠡᠯᠡᠳᠬᠡᠯ ᠦᠨ ᠡᠳᠦᠷ ᠦᠨ ᠳᠠᠷᠠᠭᠠᠬᠢ ᠡᠳᠦᠷ) ᠨᠢ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠪᠣᠯᠣᠨ ᠹᠠᠷᠢᠰᠠᠢᠴᠤᠳ ᠫᠢᠯᠠᠲ ᠤᠨ ᠡᠮᠦᠨ᠎ᠡ ᠴᠤᠭᠯᠠᠷᠠᠵᠤ᠄ 63 《ᠨᠣᠶᠠᠨᠲᠠᠨ ᠡ᠂ ᠲᠡᠷᠡ ᠪᠠᠴᠢᠯᠠᠭᠴᠢ ᠠᠮᠢᠳᠤ ᠪᠠᠢᠬᠤ ᠳᠠᠭᠠᠨ᠄ 〈ᠪᠢ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠳᠡᠭᠡᠷ᠎ᠡ ᠪᠡᠨ ᠠᠮᠢᠯᠠᠨ᠎ᠠ〉 ᠭᠡᠵᠦ ᠬᠡᠯᠡᠭᠰᠡᠨ ᠢ ᠪᠢᠳᠡ ᠰᠠᠨᠠᠵᠤ ᠣᠯᠣᠯ᠎ᠠ᠃ 64 ᠲᠠ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠨᠢ ᠪᠣᠯᠲᠠᠯ᠎ᠠ ᠪᠤᠯᠠᠰᠢ ᠶᠢ ᠨᠢ ᠴᠢᠩᠳᠠ ᠰᠠᠬᠢ ᠭᠡᠵᠦ ᠵᠠᠬᠢᠨ᠎ᠠ ᠤᠤ︖ ᠱᠠᠪᠢ ᠨᠠᠷ ᠨᠢ ᠢᠷᠡᠵᠦ ᠴᠣᠭᠴᠠ ᠶᠢ ᠬᠤᠯᠠᠭᠠᠢᠯᠠᠨ ᠠᠪᠤᠭᠠᠳ᠂ ᠠᠷᠠᠳ ᠣᠯᠠᠨ ᠳᠤ᠄ 〈ᠲᠡᠷᠡ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠠᠮᠢᠯᠠᠭᠰᠠᠨ〉 ᠭᠡᠵᠦ ᠬᠡᠯᠡᠭᠦᠵᠡᠢ᠃ ᠲᠡᠭᠡᠪᠡᠯ ᠰᠡᠭᠦᠯᠴᠢ ᠶᠢᠨ ᠪᠠᠴᠢ ᠨᠢ ᠠᠩ᠋ᠬᠠᠨ ᠤ ᠬᠢ ᠡᠴᠡ ᠪᠡᠨ ᠴᠤ ᠢᠯᠡᠭᠦᠦ ᠪᠣᠯᠣᠨ᠎ᠠ》 ᠭᠡᠵᠡᠭᠡᠯ᠎ᠡ᠃ 65 ᠫᠢᠯᠠᠲ ᠲᠡᠳᠡᠨ ᠳᠦ᠄ 《ᠬᠠᠷᠠᠭᠤᠯ ᠤᠨ ᠴᠡᠷᠢᠭ ᠠᠪᠤᠭᠠᠳ ᠶᠠᠪᠤ᠂ ᠣᠢᠯᠠᠭᠠᠭᠰᠠᠨ ᠶᠣᠰᠣᠭᠠᠷ ᠢᠶᠠᠨ ᠴᠢᠩᠳᠠ ᠰᠠᠬᠢᠭᠲᠤᠨ》 ᠭᠡᠰᠡᠨ ᠳᠦ᠂ 66 ᠲᠡᠳᠡ ᠣᠴᠢᠭᠠᠳ ᠪᠤᠯᠠᠰᠢ ᠶᠢ ᠴᠢᠩᠭ᠍᠎ᠠ ᠰᠠᠬᠢᠪᠠ᠃ ᠴᠢᠯᠠᠭᠤ ᠶᠢ ᠯᠠᠴᠠᠳᠠᠵᠤ᠂ ᠬᠠᠷᠠᠭᠤᠯ ᠤᠨ ᠴᠡᠷᠢᠭ ᠲᠠᠯᠪᠢᠪᠠ᠃