ᠮᠠᠲ᠋ᠠᠢ ᠲᠠᠪᠤ
ᠠᠭᠤᠯᠠᠨ ᠳᠡᠭᠡᠷᠡᠬᠢ ᠨᠣᠮᠯᠠᠯ — ᠨᠠᠢ᠌ᠮᠠᠨ ᠪᠤᠶᠠᠨ
1 ᠢᠰᠦ᠋ᠰ ᠣᠯᠠᠨ ᠬᠥᠮᠦᠨ ᠢ ᠬᠠᠷᠠᠭᠠᠳ ᠠᠭᠤᠯᠠᠨ ᠳᠤ ᠭᠠᠷᠴᠤ ᠰᠠᠭᠤᠭᠰᠠᠨ ᠳᠤ᠂ ᠱᠠᠪᠢ ᠨᠠᠷ ᠨᠢ ᠲᠡᠭᠦᠨ ᠦ ᠳᠡᠷᠭᠡᠳᠡ ᠳᠥᠭᠥᠵᠦ ᠢᠷᠡᠯᠡ᠃ 2 ᠲᠡᠷᠡ ᠠᠮᠠ ᠨᠡᠭᠡᠭᠡᠨ ᠲᠡᠳᠡᠨ ᠳᠦ ᠰᠤᠷᠭᠠᠵᠤ ᠡᠬᠢᠯᠡᠪᠡ᠄
3 《ᠰᠦᠨᠡᠰᠦ ᠶᠠᠳᠠᠭᠤ ᠨᠢ ᠪᠤᠶᠠᠨ ᠲᠠᠢ ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠲᠡᠳᠡᠨ ᠦ ᠬᠢ᠃
4 ᠭᠠᠰᠢᠭᠤᠳᠠᠭᠴᠢ ᠨᠢ ᠪᠤᠶᠠᠨ ᠲᠠᠢ ᠲᠡᠳᠡ ᠲᠠᠢᠳᠬᠤᠷᠠᠯ ᠢ ᠣᠯᠣᠨᠠ᠃
5 ᠳᠥᠯᠭᠡᠨ ᠳᠠᠷᠤᠤ ᠨᠢ ᠪᠤᠶᠠᠨ ᠲᠠᠢ ᠲᠡᠳᠡ ᠭᠠᠵᠠᠷ ᠢ ᠥᠪᠯᠡᠨᠡ᠃
6 ᠵᠥᠪ ᠦᠨ ᠥᠯᠥᠰᠬᠥᠯᠡᠩ ᠪᠠ ᠴᠠᠩ᠋ᠭᠠᠭᠠ ᠲᠠᠢ ᠨᠢ ᠪᠤᠶᠠᠨ ᠲᠠᠢ ᠲᠡᠳᠡ ᠬᠠᠩ᠋ᠭᠠᠭᠳᠠᠨᠠ᠃
7 ᠡᠨᠡᠷᠢᠭ᠍ᠴᠢ ᠨᠢ ᠪᠤᠶᠠᠨ ᠲᠠᠢ ᠲᠡᠳᠡ ᠡᠨᠡᠷᠢᠭᠦᠯᠦᠨᠡ᠃
8 ᠴᠡᠪᠡᠷ ᠵᠢᠷᠦᠬᠡᠲᠡᠨ ᠨᠢ ᠪᠤᠶᠠᠨ ᠲᠠᠢ ᠲᠡᠳᠡ ᠪᠤᠷᠬᠠᠨ ᠢ ᠦᠵᠡᠨᠡ᠃
9 ᠡᠩᠬᠡ ᠪᠣᠯᠭᠠᠭᠴᠢ ᠨᠢ ᠪᠤᠶᠠᠨ ᠲᠠᠢ ᠲᠡᠳᠡ ᠪᠤᠷᠬᠠᠨ ᠤ ᠬᠡᠦᠬᠡᠳ ᠤᠳ ᠭᠡᠭᠳᠡᠨᠡ᠃
10 ᠵᠥᠪ ᠦᠨ ᠲᠥᠯᠥᠭᠡ ᠬᠠᠪᠴᠢᠭᠳᠠᠭᠴᠢ ᠨᠢ ᠪᠤᠶᠠᠨ ᠲᠠᠢ ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠲᠡᠳᠡᠨ ᠦ ᠬᠢ᠃
11 ᠨᠠᠳᠠ ᠠᠴᠠ ᠪᠣᠯᠵᠤ ᠲᠠ ᠨᠠᠷ ᠢ ᠬᠠᠷᠢᠶᠠᠨ ᠬᠠᠪᠴᠢᠵᠤ ᠶᠠᠩᠵᠤ ᠪᠦᠷᠢ ᠶᠢᠨ ᠮᠠᠭᠤ ᠶᠢ ᠲᠠ ᠨᠠᠷ ᠤᠨ ᠡᠰᠡᠷᠭᠦ ᠬᠤᠳᠠᠯ ᠢᠶᠠᠷ ᠥᠭᠦᠯᠡᠪᠡᠯ᠂ ᠲᠠ ᠨᠠᠷ ᠪᠤᠶᠠᠨ ᠲᠠᠢ ᠶᠤᠮ︕ 12 ᠪᠠᠶᠠᠰᠤᠨ ᠴᠡᠩᠭᠡᠯᠳᠦᠵᠡᠭᠡ᠂ ᠲᠩᠷᠢ ᠳᠠᠬᠢ ᠱᠠᠩᠨᠠᠯ ᠴᠢᠨᠢ ᠶᠡᠬᠡ ᠶᠤᠮ᠃ ᠲᠠ ᠨᠠᠷ ᠠᠴᠠ ᠡᠮᠦᠨᠡᠬᠢ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠴᠤ ᠲᠡᠢᠨ ᠬᠦ ᠬᠠᠪᠴᠢᠭᠳᠠᠭᠰᠠᠨ ᠶᠤᠮ᠃
ᠱᠠᠪᠢ ᠨᠠᠷ ᠪᠠ ᠶᠢᠷᠲᠢᠨᠴᠦ
13 ᠲᠠ ᠨᠠᠷ ᠪᠣᠯ ᠭᠠᠵᠠᠷ ᠤᠨ ᠳᠠᠪᠤᠰᠤ᠃ ᠭᠡᠪᠡᠴᠦ ᠳᠠᠪᠤᠰᠤ ᠠᠮᠲᠠ ᠪᠠᠨ ᠠᠯᠳᠠᠪᠠᠯ᠂ ᠳᠠᠬᠢᠨ ᠶᠠᠭᠤ ᠪᠠᠷ ᠳᠠᠪᠤᠰᠤᠯᠢᠭ ᠪᠣᠯᠭᠠᠬᠤ ᠪᠢᠯᠡ︖ ᠲᠡᠭᠡᠪᠡᠯ ᠶᠠᠭᠤᠨ ᠳᠤ ᠴᠤ ᠬᠡᠷᠡᠭ ᠦᠭᠡᠢ ᠪᠣᠯᠵᠤ ᠭᠠᠳᠠᠨᠠ ᠬᠠᠶᠠᠭᠳᠠᠨ ᠬᠥᠮᠦᠰ ᠲᠦ ᠭᠢᠰᠬᠢᠭᠳᠡᠬᠦ ᠯᠠ ᠪᠣᠯᠣᠨᠠ᠃
14 ᠲᠠ ᠨᠠᠷ ᠪᠣᠯ ᠶᠢᠷᠲᠢᠨᠴᠦ ᠶᠢᠨ ᠭᠡᠷᠡᠯ᠃ ᠠᠭᠤᠯᠠᠨ ᠳᠡᠭᠡᠷᠡᠬᠢ ᠬᠣᠲᠠ ᠨᠢᠭᠤᠭᠳᠠᠵᠤ ᠴᠢᠳᠠᠬᠤ ᠦᠭᠡᠢ᠃ 15 ᠬᠡᠨ ᠴᠤ ᠳ᠋ᠧᠩ ᠢ ᠠᠰᠠᠭᠠᠭᠠᠳ ᠰᠠᠪᠠ ᠶᠢᠨ ᠳᠣᠣᠷᠠ ᠲᠠᠯᠪᠢᠳᠠᠭ ᠦᠭᠡᠢ᠂ ᠬᠠᠷᠢᠨ ᠲᠠᠯᠪᠢᠭᠤᠷ ᠳᠡᠭᠡᠷᠡ ᠲᠠᠯᠪᠢᠳᠠᠭ᠂ ᠢᠩᠭᠢᠪᠡᠯ ᠭᠡᠷ ᠳᠣᠲᠣᠷᠠᠬᠢ ᠪᠦᠬᠦᠨ ᠢ ᠭᠡᠷᠡᠯᠲᠦᠭᠦᠯᠦᠨᠡ᠃ 16 ᠲᠠ ᠨᠠᠷ ᠤᠨ ᠭᠡᠷᠡᠯ ᠴᠤ ᠡᠭᠦᠨᠴᠢᠯᠡᠨ ᠬᠥᠮᠦᠰ ᠦᠨ ᠡᠮᠦᠨᠡ ᠭᠡᠷᠡᠯᠲᠦᠬᠦ ᠪᠣᠯᠲᠦᠭᠠᠢ᠃ ᠡᠢᠨ ᠬᠦ ᠲᠡᠳᠡ ᠲᠠ ᠨᠠᠷ ᠤᠨ ᠰᠠᠢᠨ ᠦᠢᠯᠡᠰ ᠢ ᠬᠠᠷᠠᠭᠠᠳ ᠲᠩᠷᠢ ᠳᠠᠬᠢ ᠡᠴᠢᠭᠡ ᠶᠢ ᠴᠢᠨᠢ ᠠᠯᠳᠠᠷᠰᠢᠭᠤᠯᠬᠤ ᠪᠣᠯᠣᠨᠠ᠃
17 ᠨᠠᠮᠠᠶᠢ ᠬᠠᠤᠯᠢ ᠪᠤᠶᠤ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢ ᠬᠦᠴᠦᠨ ᠦᠭᠡᠢ ᠪᠣᠯᠭᠠᠬᠤ ᠪᠠᠷ ᠢᠷᠡᠭᠰᠡᠨ ᠭᠡᠵᠦ ᠪᠦᠦ ᠪᠣᠳᠣ᠃ ᠬᠦᠴᠦᠨ ᠦᠭᠡᠢ ᠪᠣᠯᠭᠠᠬᠤ ᠪᠠᠷ ᠪᠢᠰᠢ᠂ ᠬᠠᠷᠢᠨ ᠪᠡᠶᠡᠯᠡᠭᠦᠯᠬᠦ ᠪᠡᠷ ᠢᠷᠡᠭᠰᠡᠨ᠃ 18 ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠂ ᠲᠩᠷᠢ ᠭᠠᠵᠠᠷ ᠠᠯᠠᠭᠠ ᠪᠣᠯᠣᠭᠰᠠᠨ ᠴᠤ ᠬᠠᠤᠯᠢ ᠶᠢᠨ ᠭᠠᠭᠴᠠ ᠵᠢᠷᠤᠭᠠᠰᠤ᠂ ᠭᠠᠭᠴᠠ ᠴᠡᠭ ᠴᠤ ᠯᠠᠪ ᠠᠯᠠᠭᠠ ᠪᠣᠯᠬᠤ ᠦᠭᠡᠢ᠂ ᠴᠥᠮ ᠢᠶᠡᠷ ᠢᠶᠠᠨ ᠪᠡᠶᠡᠯᠡᠭᠳᠡᠨᠡ᠃ 19 ᠬᠡᠨ ᠴᠤ ᠪᠣᠯᠣᠭ᠂ ᠡᠳᠡᠭᠡᠷ ᠵᠠᠷᠯᠢᠭ ᠤᠨ ᠬᠠᠮᠤᠭ ᠤᠨ ᠥᠴᠦᠬᠡᠨ ᠢ ᠨᠢ ᠴᠤ ᠰᠤᠯᠠᠷᠠᠭᠤᠯᠵᠤ ᠬᠥᠮᠦᠰ ᠢ ᠲᠡᠷᠡ ᠮᠡᠲᠦ ᠪᠡᠷ ᠰᠤᠷᠭᠠᠪᠠᠯ ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠳᠤ ᠬᠠᠮᠤᠭ ᠤᠨ ᠥᠴᠦᠬᠡᠨ ᠭᠡᠭᠳᠡᠬᠦ ᠪᠣᠯᠣᠨᠠ᠃ ᠬᠠᠷᠢᠨ ᠬᠡᠨ ᠴᠤ ᠪᠣᠯᠣᠭ᠂ ᠲᠡᠳᠡᠭᠡᠷ ᠢ ᠪᠡᠶᠡᠯᠡᠭᠦᠯᠦᠨ᠂ ᠰᠤᠷᠭᠠᠪᠠᠯ ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠳᠤ ᠠᠭᠤᠤ ᠭᠡᠭᠳᠡᠨᠡ᠃ 20 ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠵᠥᠪ ᠴᠢᠨᠢ ᠪᠢᠴᠢᠭᠲᠡᠳ ᠪᠠ ᠹᠠᠷᠢᠰᠠᠢᠴᠤᠳ ᠤᠨ ᠵᠥᠪ ᠡᠴᠡ ᠢᠯᠡᠭᠦᠦ ᠪᠢᠰᠢ ᠪᠣᠯ ᠲᠠ ᠨᠠᠷ ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠳᠤ ᠶᠡᠷᠦ ᠡᠴᠡ ᠣᠷᠣᠵᠤ ᠴᠢᠳᠠᠬᠤ ᠦᠭᠡᠢ᠃
ᠬᠥᠮᠦᠰ ᠦᠨ ᠬᠣᠭᠣᠷᠣᠨᠳᠣᠬᠢ ᠬᠠᠷᠢᠯᠴᠠᠭᠠ
21 ᠡᠷᠲᠡᠨ ᠦ ᠬᠥᠮᠦᠰ ᠲᠦ᠄ 〈ᠬᠥᠮᠦᠨ ᠪᠦᠦ ᠠᠯᠠ᠂ ᠬᠥᠮᠦᠨ ᠠᠯᠠᠭᠴᠢ ᠪᠣᠯᠭᠠᠨ ᠶᠠᠯᠠ ᠬᠦᠯᠢᠶᠡᠬᠦ ᠤᠴᠢᠷ ᠲᠠᠢ〉 ᠭᠡᠵᠦ ᠬᠡᠯᠡᠭᠰᠡᠨ ᠢ ᠲᠠ ᠨᠠᠷ ᠰᠣᠨᠣᠰᠣᠭᠰᠠᠨ᠃ 22 ᠬᠠᠷᠢᠨ ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠠᠬᠠ ᠳᠡᠭᠦᠦ ᠳᠡᠭᠡᠨ ᠠᠭᠤᠷᠯᠠᠭᠴᠢ ᠪᠦᠬᠦᠨ ᠶᠠᠯᠠ ᠬᠦᠯᠢᠶᠡᠵᠦ᠂ ᠠᠬᠠ ᠳᠡᠭᠦᠦ ᠪᠡᠨ 〈ᠬᠡᠷᠡᠭ ᠦᠭᠡᠢ ᠲᠣᠯᠣᠭᠠᠢ︕〉 7 ᠭᠡᠵᠦ ᠬᠡᠯᠡᠭᠴᠢ ᠨᠢ ᠰᠢᠭᠦᠬᠦ ᠵᠥᠪᠯᠡᠯ ᠳᠦ ᠰᠢᠭᠦᠭᠳᠡᠬᠦ ᠪᠥᠭᠡᠳ 〈ᠮᠤᠩ᠋ᠬᠠᠭ︕〉 ᠭᠡᠵᠦ ᠬᠡᠯᠡᠭᠴᠢ ᠨᠢ ᠲᠠᠮᠤ ᠶᠢᠨ ᠭᠠᠯ ᠳᠤ ᠣᠷᠣᠬᠤ ᠤᠴᠢᠷ ᠲᠠᠢ᠃ 23 ᠲᠡᠢᠮᠦ ᠡᠴᠡ ᠴᠢ ᠲᠠᠬᠢᠯ ᠤᠨ ᠲᠠᠪᠴᠠᠩ ᠳᠤ ᠡᠷᠭᠦᠯ ᠢᠶᠡᠨ ᠡᠷᠭᠦᠬᠦ ᠳᠡᠭᠡᠨ᠂ ᠠᠬᠠ ᠳᠡᠭᠦᠦ ᠴᠢᠨᠢ ᠴᠢᠮᠠ ᠳᠤ ᠭᠣᠮᠣᠳᠠᠯ ᠲᠠᠢ ᠶᠢ ᠲᠡᠨᠳᠡ ᠰᠠᠨᠠᠵᠤ ᠣᠯᠪᠠᠯ᠂ 24 ᠡᠷᠭᠦᠯ ᠢᠶᠡᠨ ᠲᠠᠬᠢᠯ ᠤᠨ ᠲᠠᠪᠴᠠᠩ ᠤᠨ ᠡᠮᠦᠨᠡ ᠲᠠᠯᠪᠢᠭᠠᠳ ᠤᠷᠢᠳᠠᠪᠠᠷ ᠶᠠᠪᠤᠵᠤ ᠠᠬᠠ ᠳᠡᠭᠦᠦ ᠲᠠᠢ ᠪᠠᠨ ᠡᠪᠯᠡᠷᠡ᠂ ᠲᠡᠭᠡᠭᠰᠡᠨ ᠦ ᠬᠣᠢᠨᠠ ᠢᠷᠡᠵᠦ ᠡᠷᠭᠦᠯ ᠢᠶᠡᠨ ᠡᠷᠭᠦ᠃ 25 ᠵᠠᠭᠠᠯᠳᠤᠭᠴᠢ ᠲᠠᠢ ᠪᠠᠨ ᠵᠠᠮ ᠳᠤ ᠬᠠᠮᠲᠤ ᠶᠠᠪᠤᠭᠠ ᠳᠡᠭᠡᠷᠡ ᠪᠡᠨ ᠪᠤᠰᠢᠭᠤᠬᠠᠨ ᠡᠶᠡᠳᠡ᠂ ᠡᠰᠡ ᠲᠡᠭᠡᠪᠡᠯ ᠵᠠᠭᠠᠯᠳᠤᠭᠴᠢ ᠴᠢᠨᠢ ᠴᠢᠮᠠᠶᠢ ᠰᠢᠭᠦᠭᠴᠢ ᠳᠤ ᠲᠤᠰᠢᠶᠠᠵᠤ᠂ ᠰᠢᠭᠦᠭᠴᠢ ᠬᠤᠶᠠᠭ ᠲᠠᠭᠠᠨ ᠰᠢᠯᠵᠢᠭᠦᠯᠦᠭᠡᠳ ᠱᠣᠷᠣᠩ ᠳᠤ ᠬᠠᠶᠠᠬᠤ ᠪᠣᠯᠣᠭᠤᠵᠠᠢ᠃ 26 ᠴᠢᠮᠠ ᠳᠤ ᠪᠠᠲᠤᠲᠠᠢ ᠬᠡᠯᠡᠶᠡ᠂ ᠴᠢ ᠡᠴᠦᠰ ᠦᠨ ᠨᠢᠭᠡ ᠮᠥᠩᠭᠥ ᠬᠦᠷᠲᠡᠯᠡ ᠭᠦᠢᠴᠡᠳ ᠲᠥᠯᠥᠬᠦ ᠡᠴᠡ ᠨᠠᠰᠢ ᠲᠡᠨᠳᠡ ᠡᠴᠡ ᠯᠠᠪ ᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ᠃
27 〈ᠪᠦᠦ ᠵᠠᠪᠬᠠᠢᠷᠠ〉 ᠭᠡᠰᠡᠨ ᠢ ᠲᠠ ᠨᠠᠷ ᠰᠣᠨᠣᠰᠣᠭᠰᠠᠨ᠃ 28 ᠬᠠᠷᠢᠨ ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠡᠮᠡᠭᠲᠡᠢ ᠬᠥᠮᠦᠨ ᠢ ᠲᠠᠴᠢᠶᠠᠨ ᠬᠠᠷᠠᠭᠴᠢ ᠪᠦᠬᠦᠨ ᠰᠡᠳᠬᠢᠯ ᠳᠡᠭᠡᠨ ᠲᠡᠭᠦᠨ ᠲᠡᠢ ᠵᠠᠪᠬᠠᠢᠷᠠᠴᠢᠬᠠᠭᠰᠠᠨ ᠬᠡᠷᠡᠭ᠃ 29 ᠪᠠᠷᠠᠭᠤᠨ ᠨᠢᠳᠦ ᠴᠢᠨᠢ ᠴᠢᠮᠠᠶᠢ ᠨᠢᠭᠦᠯ ᠦᠢᠯᠡᠳᠦᠭᠦᠯᠪᠡᠯ ᠤᠬᠤᠵᠤ ᠬᠠᠶᠠ᠂ ᠪᠦᠲᠦᠨ ᠪᠡᠶᠡ ᠴᠢᠨᠢ ᠲᠠᠮᠤ ᠳᠤ ᠬᠠᠶᠠᠭᠳᠠᠬᠤ ᠠᠴᠠ ᠨᠢᠭᠡ ᠡᠷᠬᠡᠲᠡᠨ ᠢᠶᠡᠨ ᠠᠯᠳᠠᠬᠤ ᠨᠢ ᠲᠤᠰᠠᠲᠠᠢ᠃ 30 ᠪᠠᠷᠠᠭᠤᠨ ᠭᠠᠷ ᠴᠢᠨᠢ ᠴᠢᠮᠠᠶᠢ ᠨᠢᠭᠦᠯ ᠦᠢᠯᠡᠳᠦᠭᠦᠯᠪᠡᠯ ᠲᠠᠰᠤᠳᠠᠵᠤ ᠬᠠᠶᠠ᠂ ᠪᠦᠲᠦᠨ ᠪᠡᠶᠡ ᠴᠢᠨᠢ ᠲᠠᠮᠤ ᠳᠤ ᠤᠨᠠᠬᠤ ᠠᠴᠠ ᠨᠢᠭᠡ ᠡᠷᠬᠡᠲᠡᠨ ᠢᠶᠡᠨ ᠠᠯᠳᠠᠬᠤ ᠨᠢ ᠲᠤᠰᠠᠲᠠᠢ᠃
31 〈ᠡᠬᠡᠨᠡᠷ ᠡᠴᠡ ᠪᠡᠨ ᠰᠠᠯᠤᠭᠴᠢ ᠨᠢ ᠲᠡᠭᠦᠨ ᠳᠡᠭᠡᠨ ᠰᠠᠯᠤᠯᠲᠠ ᠶᠢᠨ ᠭᠡᠷᠡᠴᠢ ᠥᠭᠬᠦ ᠤᠴᠢᠷᠲᠠᠢ〉 ᠭᠡᠵᠦ ᠬᠡᠯᠡᠭᠰᠡᠨ ᠪᠠᠢᠳᠠᠭ᠃ 32 ᠬᠠᠷᠢᠨ ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠰᠠᠳᠤᠷ ᠰᠠᠮᠠᠭᠤᠨ ᠠᠴᠠ ᠥᠭᠡᠷᠡ ᠰᠢᠯᠲᠠᠭᠠᠨ ᠢᠶᠠᠷ ᠡᠬᠡᠨᠡᠷ ᠡᠴᠡ ᠪᠡᠨ ᠰᠠᠯᠤᠭᠴᠢ ᠪᠣᠯᠭᠠᠨ ᠡᠬᠡᠨᠡᠷ ᠢᠶᠡᠨ ᠵᠠᠪᠬᠠᠢᠷᠠᠭᠤᠯᠵᠤ ᠪᠠᠢᠭᠠ ᠪᠥᠭᠡᠳ ᠬᠡᠨ ᠰᠠᠯᠤᠭᠰᠠᠨ ᠡᠮᠡᠭᠲᠡᠢ ᠲᠡᠢ ᠭᠡᠷᠯᠡᠪᠡᠯ ᠮᠥᠨ ᠵᠠᠪᠬᠠᠢᠷᠠᠵᠤ ᠪᠠᠢᠭᠠ ᠬᠡᠷᠡᠭ ᠶᠤᠮ᠃
33 ᠡᠷᠲᠡᠨ ᠦ ᠬᠥᠮᠦᠰ ᠲᠦ᠄ 〈ᠬᠠᠭᠤᠷᠮᠠᠴᠢ ᠪᠠᠷ ᠪᠦᠦ ᠲᠠᠩ᠋ᠭᠠᠷᠢᠭᠯᠠ᠂ ᠬᠠᠷᠢᠨ ᠡᠵᠡᠨ ᠳᠦ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠢᠶᠠᠨ ᠭᠦᠢᠴᠡᠳᠬᠡ〉 ᠭᠡᠵᠦ ᠬᠡᠯᠡᠭᠰᠡᠨ ᠢ ᠲᠠ ᠨᠠᠷ ᠮᠥᠨ ᠰᠣᠨᠣᠰᠣᠭᠰᠠᠨ᠃ 34 ᠬᠠᠷᠢᠨ ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠣᠭᠲᠣᠬᠠᠨ ᠴᠤ ᠪᠦᠦ ᠲᠠᠩ᠋ᠭᠠᠷᠢᠭᠯᠠ︕ ᠲᠩᠷᠢ ᠪᠠᠷ ᠴᠤ ᠪᠦᠦ ᠲᠠᠩ᠋ᠭᠠᠷᠢᠭᠯᠠ᠂ ᠲᠩᠷᠢ ᠪᠣᠯ ᠪᠤᠷᠬᠠᠨ ᠤ ᠰᠡᠨᠲᠢ ᠶᠤᠮ᠃ 35 ᠭᠠᠵᠠᠷ ᠢᠶᠠᠷ ᠴᠤ ᠪᠦᠦ ᠲᠠᠩ᠋ᠭᠠᠷᠢᠭᠯᠠ᠂ ᠭᠠᠵᠠᠷ ᠪᠣᠯ ᠪᠤᠷᠬᠠᠨ ᠤ ᠬᠥᠯ ᠦᠨ ᠭᠢᠰᠬᠢᠭᠦᠷ ᠶᠤᠮ᠃ ᠶᠧᠷᠦ᠋ᠰᠠᠯᠧᠮ ᠢᠶᠠᠷ ᠪᠦᠦ ᠲᠠᠩ᠋ᠭᠠᠷᠢᠭᠯᠠ᠂ ᠲᠡᠷᠡ ᠪᠣᠯ ᠶᠡᠬᠡ ᠬᠠᠭᠠᠨ ᠤ ᠬᠣᠲᠠ ᠶᠤᠮ᠃ 36 ᠲᠣᠯᠣᠭᠠᠢ ᠪᠠᠷ ᠢᠶᠠᠨ ᠴᠤ ᠪᠦᠦ ᠲᠠᠩ᠋ᠭᠠᠷᠢᠭᠯᠠ᠃ ᠴᠢ ᠰᠢᠷᠬᠡᠭ ᠦᠰᠦ ᠪᠡᠨ ᠴᠤ ᠴᠠᠭᠠᠨ ᠪᠤᠶᠤ ᠬᠠᠷᠠ ᠪᠣᠯᠭᠠᠵᠤ ᠦᠯᠦ ᠴᠢᠳᠠᠨᠠ᠃ 37 ᠲᠠ ᠨᠠᠷ ᠵᠥᠪᠬᠡᠨ 〈ᠲᠡᠢᠮᠦ᠂ ᠲᠡᠢᠮᠦ〉᠂ ᠡᠰᠡᠪᠡᠯ 〈ᠦᠭᠡᠢ᠂ ᠦᠭᠡᠢ〉 ᠭᠡᠵᠦ ᠬᠡᠯᠡᠭᠡᠷᠡᠢ᠂ ᠡᠳᠡᠭᠡᠷ ᠡᠴᠡ ᠴᠠᠭᠠᠰᠢᠬᠢ ᠨᠢ ᠮᠠᠭᠤ ᠠᠴᠠ ᠡᠭᠦᠰᠳᠡᠭ ᠶᠤᠮ᠃
38 ᠲᠠ ᠨᠠᠷ 〈ᠨᠢᠳᠦ ᠶᠢ ᠨᠢᠳᠦ ᠪᠡᠷ᠂ ᠰᠢᠳᠦ ᠶᠢ ᠰᠢᠳᠦ ᠪᠡᠷ〉 ᠭᠡᠵᠦ ᠬᠡᠯᠡᠭᠰᠡᠨ ᠢ ᠰᠣᠨᠣᠰᠣᠭᠰᠠᠨ᠃ 39 ᠬᠠᠷᠢᠨ ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠮᠠᠭᠤ ᠬᠥᠮᠦᠨ ᠢ ᠪᠦᠦ ᠡᠰᠡᠷᠭᠦᠴᠡ︕ ᠬᠡᠨ ᠨᠢᠭᠡᠨ ᠨᠢ ᠪᠠᠷᠠᠭᠤᠨ ᠬᠠᠴᠠᠷ ᠢ ᠴᠢᠨᠢ ᠠᠯᠠᠭᠠᠳᠠᠪᠠᠯ᠂ ᠲᠡᠭᠦᠨ ᠳᠦ ᠨᠥᠭᠥᠭᠡ ᠬᠠᠴᠠᠷ ᠢᠶᠠᠨ ᠴᠤ ᠥᠭ᠃ 40 ᠴᠢᠮᠠᠶᠢ ᠵᠠᠭᠠᠯᠳᠤᠨ ᠳᠣᠲᠣᠭᠤᠷ ᠴᠠᠮᠴᠠ ᠶᠢ ᠴᠢᠨᠢ ᠠᠪᠤᠶᠠ ᠭᠡᠵᠦ ᠪᠠᠢᠭᠠ ᠬᠥᠮᠦᠨ ᠳᠦ ᠭᠠᠳᠠᠭᠤᠷ ᠬᠤᠪᠴᠠᠰᠤ ᠪᠠᠨ ᠴᠤ ᠥᠭ᠃ 41 ᠬᠡᠨ ᠨᠢᠭᠡᠨ ᠨᠢ ᠴᠢᠮᠠᠶᠢ ᠨᠢᠭᠡ ᠪᠡᠷᠡ ᠶᠢᠨ ᠭᠠᠵᠠᠷ ᠶᠠᠪᠤᠭᠤᠯᠬᠤ ᠪᠠᠷ ᠠᠯᠪᠠᠳᠠᠪᠠᠯ ᠲᠡᠭᠦᠨ ᠲᠡᠢ ᠬᠣᠶᠠᠷ ᠪᠡᠷᠡ ᠶᠢᠨ ᠭᠠᠵᠠᠷ ᠬᠠᠮᠲᠤ ᠶᠠᠪᠤ᠃ 42 ᠴᠢᠮᠠ ᠠᠴᠠ ᠭᠤᠶᠤᠭᠰᠠᠨ ᠪᠣᠯᠭᠠᠨ ᠳᠤ ᠥᠭ᠂ ᠴᠢᠮᠠ ᠠᠴᠠ ᠵᠢᠭᠡᠯᠡᠶᠡ ᠭᠡᠰᠡᠨ ᠬᠥᠮᠦᠨ ᠡᠴᠡ ᠪᠦᠦ ᠵᠠᠢᠯᠠ᠃
43 ᠲᠠ ᠨᠠᠷ 〈ᠬᠥᠷᠰᠢ ᠪᠠᠨ ᠬᠠᠢᠷᠠᠯᠠ᠂ ᠳᠠᠢᠰᠤᠨ ᠢᠶᠠᠨ ᠵᠠᠨᠤ〉 ᠭᠡᠰᠡᠨ ᠢ ᠰᠣᠨᠣᠰᠣᠭᠰᠠᠨ᠃ 44 ᠬᠠᠷᠢᠨ ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠳᠠᠢᠰᠤᠨ ᠨᠤᠭᠤᠳ ᠢᠶᠠᠨ ᠬᠠᠢᠷᠠᠯᠠ᠂ ᠲᠠ ᠨᠠᠷ ᠢ ᠬᠠᠪᠴᠢᠭᠴᠢᠳ ᠤᠨ ᠲᠥᠯᠥᠭᠡ ᠳᠠᠭᠠᠳᠬᠠ᠃ 45 ᠢᠩᠭᠢᠪᠡᠯ ᠲᠠ ᠨᠠᠷ ᠲᠩᠷᠢ ᠳᠠᠬᠢ ᠡᠴᠢᠭᠡ ᠶᠢᠨ ᠢᠶᠠᠨ ᠬᠡᠦᠬᠡᠳ ᠤᠳ ᠪᠣᠯᠣᠨᠠ᠃ ᠤᠴᠢᠷ ᠨᠢ ᠲᠡᠷᠡ ᠮᠠᠭᠤ ᠪᠠ ᠰᠠᠢᠨ ᠬᠥᠮᠦᠰ ᠦᠨ ᠳᠡᠭᠡᠷᠡ ᠨᠠᠷᠠ ᠪᠠᠨ ᠮᠠᠨᠳᠤᠭᠤᠯᠵᠤ᠂ ᠵᠥᠪᠲᠦ ᠪᠠ ᠵᠥᠪᠲᠦ ᠪᠤᠰᠤ ᠬᠥᠮᠦᠰ ᠦᠨ ᠳᠡᠭᠡᠷᠡ ᠪᠣᠷᠣᠭᠠᠨ ᠣᠷᠣᠭᠤᠯᠳᠠᠭ ᠪᠢᠯᠡ᠃ 46 ᠬᠡᠷᠪᠡ ᠲᠠ ᠨᠠᠷ ᠥᠪᠡᠷᠰᠡᠳ ᠢ ᠴᠢᠨᠢ ᠬᠠᠢᠷᠠᠯᠠᠭᠰᠠᠳ ᠢ ᠯᠠ ᠬᠠᠢᠷᠠᠯᠠᠪᠠᠯ ᠲᠠ ᠨᠠᠷ ᠲᠤ ᠶᠠᠮᠠᠷ ᠱᠠᠩᠨᠠᠯ ᠪᠠᠢᠬᠤ ᠪᠤᠢ︖ ᠭᠠᠢᠯᠢᠴᠢᠳ ᠬᠦᠷᠲᠡᠯᠡ ᠲᠡᠭᠡᠳᠡᠭ ᠪᠤᠰᠤ ᠤᠤ︖ 47 ᠲᠠ ᠨᠠᠷ ᠵᠥᠪᠬᠡᠨ ᠠᠬᠠ ᠳᠡᠭᠦᠦ ᠲᠠᠢ ᠪᠠᠨ ᠯᠠ ᠮᠡᠨᠳᠦᠴᠢᠯᠡᠪᠡᠯ᠂ ᠪᠤᠰᠤᠳ ᠠᠴᠠ ᠶᠠᠭᠤ ᠨᠢ ᠢᠯᠡᠭᠦᠦ ᠶᠤᠮ ᠪᠤᠢ︖ ᠬᠠᠷᠢᠴᠤᠳ ᠬᠦᠷᠲᠡᠯᠡ ᠲᠡᠭᠡᠳᠡᠭ ᠪᠤᠰᠤ ᠤᠤ︖ 48 ᠲᠩᠷᠢᠯᠢᠭ ᠡᠴᠢᠭᠡ ᠲᠠᠨᠢ ᠲᠡᠭᠦᠰ ᠪᠠᠢᠳᠠᠭ ᠰᠢᠭ᠋ ᠲᠠ ᠨᠠᠷ ᠴᠤ ᠲᠡᠭᠦᠰ ᠪᠠᠢ᠃