ᠮᠠᠲ᠋ᠠᠢ ᠳᠥᠷᠪᠡ
ᠢᠰᠦ᠋ᠰ ᠲᠡᠩᠰᠡᠭᠳᠡᠭᠰᠡᠨ ᠨᠢ
1 ᠲᠡᠷᠡ ᠦᠶᠡ ᠳᠦ᠂ ᠠᠷᠢᠭᠤᠨ ᠰᠦᠨᠡᠰᠦ ᠢᠰᠦ᠋ᠰ ᠢ ᠴᠥᠯ ᠤᠷᠤᠭᠤ ᠤᠳᠤᠷᠢᠳᠤᠭᠰᠠᠨ ᠳᠤ᠂ ᠰᠠᠲ᠋ᠠᠨ ᠲᠡᠭᠦᠨ ᠢ ᠲᠡᠩᠰᠡᠪᠡ᠃ 2 ᠢᠰᠦ᠋ᠰ ᠳᠥᠴᠢᠨ ᠡᠳᠦᠷ ᠳᠥᠴᠢᠨ ᠰᠥᠨᠢ ᠪᠠᠴᠠᠭ ᠪᠠᠷᠢᠭᠰᠠᠨ ᠤ ᠳᠠᠷᠠᠭᠠ ᠥᠯᠥᠰᠬᠦ ᠳᠦ᠂ 3 ᠲᠡᠩᠰᠡᠭᠴᠢ ᠳᠥᠭᠥᠨ ᠢᠷᠡᠵᠦ ᠲᠡᠭᠦᠨ ᠳᠦ᠄ 《ᠴᠢ ᠪᠤᠷᠬᠠᠨ ᠤ ᠬᠦᠦ ᠮᠥᠨ ᠪᠣᠯ ᠡᠨᠡ ᠴᠢᠯᠠᠭᠤ ᠨᠤᠭᠤᠳ ᠲᠤ 〈ᠪᠣᠣᠪᠣ ᠪᠣᠯ︕〉 ᠭᠡᠵᠦ ᠬᠡᠯᠡ》 ᠭᠡᠯᠡ᠃ 4 ᠢᠰᠦ᠋ᠰ ᠬᠠᠷᠢᠭᠤ ᠳᠤᠨᠢ᠄ 《〈ᠬᠥᠮᠦᠨ ᠵᠥᠪᠬᠡᠨ ᠪᠣᠣᠪᠣ ᠪᠠᠷ ᠪᠤᠰᠤ᠂ ᠬᠠᠷᠢᠨ ᠪᠤᠷᠬᠠᠨ ᠤ ᠠᠮᠠᠨ ᠠᠴᠠ ᠭᠠᠷᠳᠠᠭ ᠠᠯᠢᠪᠠ ᠦᠭᠡ ᠪᠡᠷ ᠠᠮᠢᠳᠤᠷᠠᠨᠠ〉 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠪᠠᠢᠳᠠᠭ》 ᠭᠡᠵᠦ ᠬᠡᠯᠡᠪᠡ᠃ 5 ᠲᠡᠭᠡᠬᠦ ᠳᠦ ᠰᠠᠲ᠋ᠠᠨ ᠲᠡᠭᠦᠨ ᠢ ᠠᠷᠢᠭᠤᠨ ᠬᠣᠲᠠ ᠳᠤ ᠠᠪᠠᠴᠢᠵᠤ᠂ ᠠᠷᠢᠭᠤᠨ ᠣᠷᠳᠣᠨ ᠤ ᠣᠷᠣᠢ ᠳᠡᠭᠡᠷᠡ ᠵᠣᠭᠰᠣᠭᠠᠭᠠᠳ᠂ 6 ᠲᠡᠭᠦᠨ ᠳᠦ᠄ 《ᠴᠢ ᠪᠤᠷᠬᠠᠨ ᠤ ᠬᠦᠦ ᠮᠥᠨ ᠪᠣᠯ ᠳᠣᠷᠣᠭᠰᠢ ᠪᠠᠨ ᠦᠰᠦᠷ᠂ ᠤᠴᠢᠷ ᠨᠢ 〈ᠲᠡᠷᠡ ᠲᠩᠷᠢ ᠶᠢᠨ ᠡᠯᠴᠢᠳ ᠲᠡᠭᠡᠨ ᠴᠢᠨᠦ ᠲᠤᠬᠠᠢ ᠵᠠᠬᠢᠨᠠ〉᠂ ᠪᠠᠰᠠ 〈ᠴᠢᠨᠦ ᠬᠥᠯ ᠴᠢᠯᠠᠭᠤᠨ ᠳᠤ ᠤᠨᠤᠭᠤᠵᠠᠢ ᠭᠡᠵᠦ ᠲᠡᠳᠡ ᠴᠢᠮᠠᠶᠢ ᠭᠠᠷ ᠳᠡᠭᠡᠷᠡ ᠪᠡᠨ ᠡᠷᠭᠦᠨᠡ〉 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠪᠠᠢᠳᠠᠭ》 ᠭᠡᠰᠡᠨ ᠳᠦ᠂ 7 ᠢᠰᠦ᠋ᠰ ᠲᠡᠭᠦᠨ ᠳᠦ᠄ 《〈ᠡᠵᠡᠨ ᠪᠤᠷᠬᠠᠨ ᠢᠶᠠᠨ ᠪᠦᠦ ᠲᠡᠩᠰᠡ〉 ᠭᠡᠵᠦ ᠪᠠᠰᠠ ᠪᠢᠴᠢᠭᠳᠡᠭᠰᠡᠨ ᠪᠠᠢᠳᠠᠭ》 ᠭᠡᠪᠡ᠃
8 ᠰᠠᠲ᠋ᠠᠨ ᠪᠠᠰᠠ ᠲᠡᠭᠦᠨ ᠢ ᠮᠠᠰᠢ ᠥᠨᠳᠥᠷ ᠠᠭᠤᠯᠠᠨ ᠳᠤ ᠠᠪᠠᠴᠢᠵᠤ᠂ ᠳᠡᠯᠡᠬᠡᠢ ᠶᠢᠨ ᠬᠠᠮᠤᠭ ᠤᠯᠤᠰ ᠪᠣᠯᠣᠨ ᠲᠡᠳᠡᠨ ᠦ ᠰᠦᠷ ᠵᠢᠪᠬᠤᠯᠠᠩ ᠢ ᠦᠵᠡᠭᠦᠯᠦᠭᠡᠳ᠄ 9 《ᠴᠢ ᠨᠠᠳᠠ ᠳᠤ ᠰᠥᠭᠥᠳᠥᠨ ᠮᠥᠷᠭᠥᠪᠡᠯ ᠡᠨᠡ ᠪᠦᠬᠦᠨ ᠢ ᠪᠢ ᠴᠢᠮᠠ ᠳᠤ ᠥᠭᠭᠥᠶᠡ》 ᠭᠡᠵᠦ ᠬᠡᠯᠡᠬᠦ ᠳᠦ᠂ 10 ᠢᠰᠦ᠋ᠰ᠄ 《ᠲᠣᠨᠢᠯ᠂ ᠰᠠᠲ᠋ᠠᠨ︕ 〈ᠴᠢ ᠡᠵᠡᠨ ᠪᠤᠷᠬᠠᠨ ᠳᠠᠭᠠᠨ ᠮᠥᠷᠭᠥᠵᠦ᠂ ᠲᠡᠭᠦᠨ ᠳᠡᠭᠡᠨ ᠯᠠ ᠦᠢᠯᠡᠴᠢᠯᠡ〉 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠪᠠᠢᠳᠠᠭ》 ᠭᠡᠯᠡ᠃ 11 ᠲᠡᠭᠡᠭᠡᠳ ᠰᠠᠲ᠋ᠠᠨ ᠲᠡᠭᠦᠨ ᠡᠴᠡ ᠰᠠᠯᠤᠭᠰᠠᠨ ᠳᠤ᠂ ᠲᠩᠷᠢ ᠶᠢᠨ ᠡᠯᠴᠢᠳ ᠢᠷᠡᠭᠡᠳ ᠲᠡᠭᠦᠨ ᠳᠦ ᠦᠢᠯᠡᠴᠢᠯᠡᠵᠦ ᠪᠠᠢᠪᠠ᠃
ᠢᠰᠦ᠋ᠰ ᠠᠵᠢᠯ ᠢᠶᠠᠨ ᠡᠬᠢᠯᠡᠭᠰᠡᠨ ᠨᠢ
12 ᠢᠰᠦ᠋ᠰ ᠶᠣᠬᠠᠨ ᠤ ᠪᠠᠷᠢᠪᠴᠢᠯᠠᠭᠳᠠᠭᠰᠠᠨ ᠢ ᠳᠤᠭᠤᠯᠤᠭᠠᠳ ᠭᠠᠯᠢᠯᠠᠶᠠ ᠤᠷᠤᠭᠤ ᠣᠳᠣᠯᠠ᠃ 13 ᠲᠡᠷᠡ ᠨᠠᠽᠠᠷᠧᠲ ᠡᠴᠡ ᠰᠠᠯᠵᠤ᠂ ᠽᠧᠪᠦ᠋ᠯᠣᠨ ᠪᠣᠯᠣᠨ ᠨᠠᠹᠲ᠋ᠠᠯᠢ ᠶᠢᠨ ᠨᠤᠲᠤᠭ ᠳᠠᠬᠢ ᠨᠠᠭᠤᠷ ᠤᠨ ᠬᠥᠪᠡᠭᠡᠨ ᠳᠦ ᠪᠠᠢᠭᠠ ᠺᠠᠹᠠᠷᠨᠠᠦ᠋ᠮ ᠳᠤ ᠬᠦᠷᠴᠦ ᠰᠠᠭᠤᠷᠢᠰᠢᠪᠠ᠃ 14 ᠡᠢᠨ ᠬᠦ ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠠᠢᠶᠠ ᠪᠠᠷ᠄
15 《ᠶᠣᠷᠳᠠᠨ ᠭᠣᠣᠯ ᠤᠨ ᠴᠠᠭᠠᠲᠤ ᠳᠠᠯᠠᠢ ᠬᠦᠷᠬᠦ ᠵᠠᠮ ᠳᠠᠬᠢ ᠽᠧᠪᠦ᠋ᠯᠣᠨ ᠨᠤᠲᠤᠭ᠂ ᠨᠠᠹᠲ᠋ᠠᠯᠢ ᠨᠤᠲᠤᠭ᠂ ᠬᠠᠷᠢ ᠶᠢᠨ ᠬᠢᠨ ᠤ ᠭᠠᠯᠢᠯᠠᠶᠠ︕
16 ᠬᠠᠷᠠᠩ᠋ᠭᠤᠢ ᠳᠤ ᠰᠠᠭᠤᠭᠴᠢ ᠠᠷᠠᠳ ᠲᠦᠮᠡᠨ ᠦᠯᠡᠮᠵᠢ ᠶᠢᠨ ᠭᠡᠷᠡᠯ ᠢ ᠬᠠᠷᠠᠪᠠ ᠦᠬᠦᠯ ᠦᠨ ᠰᠡᠭᠦᠳᠡᠷᠲᠦ ᠨᠤᠲᠤᠭ ᠲᠤ ᠰᠠᠭᠤᠭᠰᠠᠳ ᠳᠡᠭᠡᠷᠡ ᠭᠡᠷᠡᠯ ᠲᠤᠰᠪᠠ》
ᠭᠡᠵᠦ ᠬᠡᠯᠡᠭᠦᠯᠦᠭᠰᠡᠨ ᠨᠢ ᠪᠡᠶᠡᠯᠡᠭᠳᠡᠵᠡᠢ᠃ 17 ᠲᠡᠷᠡ ᠴᠠᠭ ᠠᠴᠠ ᠬᠣᠢᠰᠢ ᠢᠰᠦ᠋ᠰ᠄ 《ᠭᠡᠮᠰᠢᠵᠡᠭᠡ᠂ ᠲᠩᠷᠢ ᠶᠢᠨ ᠬᠠᠭᠠᠨᠴᠢᠯᠠᠯ ᠣᠢᠷᠠᠲᠤᠯᠠ》 ᠭᠡᠵᠦ ᠲᠤᠩ᠋ᠬᠠᠭᠯᠠᠵᠤ ᠡᠬᠢᠯᠡᠪᠡ᠃
ᠠᠩ᠋ᠬᠠᠨ ᠤ ᠱᠠᠪᠢ ᠨᠠᠷ
18 ᠢᠰᠦ᠋ᠰ ᠭᠠᠯᠢᠯᠠᠶᠠ ᠨᠠᠭᠤᠷ ᠤᠨ ᠬᠥᠪᠡᠭᠡ ᠪᠡᠷ ᠶᠠᠪᠤᠵᠤ ᠪᠠᠢᠬᠤ ᠳᠠᠭᠠᠨ᠂ ᠫᠧᠲ᠋ᠧᠷ ᠭᠡᠭᠳᠡᠳᠡᠭ ᠰᠢᠮᠣᠨ᠂ ᠠᠨᠳ᠋ᠷᠧ ᠠᠬᠠ ᠳᠡᠭᠦᠦ ᠬᠣᠶᠠᠷ ᠤᠨ ᠨᠠᠭᠤᠷ ᠲᠤ ᠲᠣᠣᠷ ᠬᠠᠶᠠᠵᠤ ᠪᠠᠢᠭᠠ ᠶᠢ ᠬᠠᠷᠠᠯᠠ᠃ ᠲᠡᠳᠡ ᠵᠢᠭᠠᠰᠤᠴᠢᠨ ᠠᠵᠢ᠃ 19 ᠢᠰᠦ᠋ᠰ ᠲᠡᠳᠡᠨ ᠳᠦ᠄ 《ᠵᠠ᠂ ᠨᠠᠮᠠᠶᠢ ᠳᠠᠭᠠᠭᠠᠷᠠᠢ᠂ ᠪᠢ ᠲᠠ ᠨᠠᠷ ᠢ ᠬᠥᠮᠦᠨ ᠤᠯᠳᠠᠭ ᠵᠢᠭᠠᠰᠤᠴᠢᠨ ᠪᠣᠯᠭᠠᠶᠠ》 ᠭᠡᠬᠦ ᠳᠦ᠂ 20 ᠲᠡᠳᠡ ᠳᠠᠷᠤᠢᠬᠠᠨ ᠲᠣᠣᠷ ᠢᠶᠠᠨ ᠣᠷᠬᠢᠵᠤ ᠲᠡᠭᠦᠨ ᠢ ᠳᠠᠭᠠᠪᠠ᠃ 21 ᠲᠡᠨᠳᠡ ᠡᠴᠡ ᠴᠠᠰᠢᠯᠠᠭᠰᠠᠨ ᠢᠶᠠᠨ ᠢᠰᠦ᠋ᠰ ᠥᠭᠡᠷᠡ ᠠᠬᠠ ᠳᠡᠭᠦᠦ ᠬᠣᠶᠠᠷ᠂ ᠽᠧᠪᠧᠳᠠᠢ ᠶᠢᠨ ᠬᠥᠪᠡᠭᠦᠨ ᠶᠠᠺᠣᠪ ᠪᠣᠯᠣᠨ ᠲᠡᠭᠦᠨ ᠦ ᠳᠡᠭᠦᠦ ᠶᠣᠬᠠᠨ ᠤ ᠵᠠᠪᠢ ᠶᠢᠨ ᠳᠣᠲᠣᠷᠠ ᠡᠴᠢᠭᠡ ᠽᠧᠪᠧᠳᠠᠢ ᠲᠠᠢ ᠪᠠᠨ ᠲᠣᠣᠷ ᠢᠶᠠᠨ ᠰᠡᠯᠪᠢᠵᠦ ᠪᠠᠢᠭᠠ ᠶᠢ ᠬᠠᠷᠠᠭᠠᠳ ᠲᠡᠷᠡ ᠬᠣᠶᠠᠷ ᠢ ᠳᠠᠭᠤᠳᠠᠭᠰᠠᠨ ᠳᠤ᠂ 22 ᠲᠡᠳᠡ ᠳᠠᠷᠤᠢᠬᠠᠨ ᠵᠠᠪᠢ ᠪᠠ ᠡᠴᠢᠭᠡ ᠪᠡᠨ ᠣᠷᠬᠢᠵᠤ ᠲᠡᠭᠦᠨ ᠢ ᠳᠠᠭᠠᠪᠠ᠃
ᠭᠠᠯᠢᠯᠠᠶᠠ ᠳᠠᠬᠢ ᠦᠢᠯᠡ ᠠᠵᠢᠯᠯᠠᠭᠠ
23 ᠢᠰᠦ᠋ᠰ ᠭᠠᠯᠢᠯᠠᠶᠠ ᠳᠠᠶᠠᠭᠠᠷ ᠶᠠᠪᠤᠵᠤ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤᠨᠢ ᠰᠤᠷᠭᠠᠯ ᠵᠢᠭᠠᠨ᠂ ᠬᠠᠭᠠᠨᠴᠢᠯᠠᠯ ᠤᠨ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠳᠡᠯᠭᠡᠷᠡᠭᠦᠯᠵᠦ᠂ ᠠᠷᠠᠳ ᠤᠨ ᠳᠤᠮᠳᠠ ᠬᠠᠮᠤᠭ ᠡᠪᠡᠳᠴᠢᠨ ᠡᠮᠭᠡᠭ ᠢ ᠡᠳᠡᠭᠡᠭᠡᠵᠦ ᠪᠠᠢᠯᠠ᠃ 24 ᠢᠰᠦ᠋ᠰ ᠤᠨ ᠲᠤᠬᠠᠢ ᠰᠤᠷᠠᠭ ᠰᠢᠷᠢᠶᠠ ᠳᠠᠶᠠᠭᠠᠷ ᠲᠠᠷᠬᠠᠪᠠ᠃ ᠶᠠᠩᠵᠤ ᠶᠠᠩᠵᠤ ᠶᠢᠨ ᠡᠪᠡᠳᠴᠢᠨ ᠲᠡᠢ᠂ ᠰᠢᠨᠠᠯᠤᠯ ᠲᠠᠢ᠂ ᠴᠢᠳᠬᠥᠷ ᠣᠷᠣᠰᠢᠭᠰᠠᠨ᠂ ᠤᠨᠠᠳᠠᠭ ᠡᠪᠡᠳᠴᠢᠲᠡᠨ᠂ ᠰᠠ ᠡᠪᠡᠳᠴᠢᠲᠡᠨ ᠵᠡᠷᠭᠡ ᠬᠠᠮᠤᠭ ᠡᠪᠡᠳᠴᠢᠲᠡᠨ ᠢ ᠬᠥᠮᠦᠰ ᠠᠪᠴᠢᠷᠠᠬᠤ ᠳᠤ᠂ ᠢᠰᠦ᠋ᠰ ᠲᠡᠳᠡᠨ ᠢ ᠡᠳᠡᠭᠡᠭᠡᠪᠡ᠃ 25 ᠡᠢᠮᠦ ᠡᠴᠡ ᠦᠯᠡᠮᠵᠢ ᠣᠯᠠᠨ ᠬᠥᠮᠦᠨ ᠭᠠᠯᠢᠯᠠᠶᠠ᠂ ᠳ᠋ᠧᠺᠠᠫᠣᠯᠢ 6 ᠂ ᠶᠧᠷᠦ᠋ᠰᠠᠯᠧᠮ᠂ ᠶᠦᠳᠠᠢ ᠪᠠ ᠶᠣᠷᠳᠠᠨ ᠭᠣᠣᠯ ᠤᠨ ᠲᠡᠷᠲᠡᠭᠡ ᠡᠴᠡ ᠢᠷᠡᠵᠦ ᠲᠡᠭᠦᠨ ᠢ ᠳᠠᠭᠠᠯᠠ᠃