ᠱᠠᠰᠲᠢᠷ ᠤᠨ ᠳᠡᠭᠡᠳᠦ ᠠᠷᠪᠠᠨ ᠳᠥᠷᠪᠡ
ᠳ᠋ᠠᠸᠢᠳ᠋ ᠤᠨ ᠬᠠᠭᠠᠨᠴᠢᠯᠠᠯ ᠪᠠᠲᠤᠵᠢᠪᠠ
1 ᠲᠢᠷ ᠤᠨ ᠬᠠᠭᠠᠨ ᠾᠢᠷᠠᠮ ᠳ᠋ᠠᠸᠢᠳ᠋ ᠤᠷᠤᠭᠤ ᠡᠯᠴᠢᠳ ᠢ ᠬᠤᠱᠢ ᠮᠣᠳᠣ᠂ ᠴᠢᠯᠠᠭᠤᠨ ᠳᠠᠷᠬᠠᠳ᠂ ᠮᠣᠳᠣᠨ ᠳᠠᠷᠬᠠᠳ ᠲᠠᠢ ᠬᠠᠮᠲᠤ ᠢᠯᠡᠭᠡᠵᠦ᠂ ᠲᠡᠭᠦᠨ ᠦ ᠣᠷᠳᠣᠨ ᠢ ᠪᠠᠷᠢᠭᠤᠯᠪᠠ᠃ 2 ᠲᠡᠭᠡᠬᠦ ᠳᠦ᠂ ᠳ᠋ᠠᠸᠢᠳ᠋ ᠶᠣᠬᠣᠸᠠ ᠶᠢᠨ ᠥᠪᠡᠷ ᠢ ᠨᠢ ᠢᠰᠷᠧᠯ ᠤᠨ ᠬᠠᠭᠠᠨ ᠢᠶᠠᠷ ᠲᠣᠮᠢᠯᠠᠭᠰᠠᠨ ᠢ᠂ ᠮᠥᠨ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠤᠨ ᠢᠶᠠᠨ ᠲᠥᠯᠥᠭᠡ ᠥᠪᠡᠷ ᠦᠨ ᠬᠢᠨᠢ ᠬᠠᠭᠠᠨᠴᠢᠯᠠᠯ ᠢ ᠡᠷᠭᠦᠮᠵᠢᠯᠡᠭᠰᠡᠨ ᠢ ᠤᠬᠠᠭᠠᠷᠠᠪᠠ᠃
3 ᠳ᠋ᠠᠸᠢᠳ᠋ ᠶᠧᠷᠦ᠋ᠰᠠᠯᠧᠮ ᠳᠤ ᠨᠡᠩ ᠣᠯᠠᠨ ᠡᠬᠡᠨᠡᠷ ᠠᠪᠤᠭᠰᠠᠨ ᠢᠶᠠᠷ ᠲᠡᠭᠦᠨ ᠳᠦ ᠨᠡᠩ ᠣᠯᠠᠨ ᠬᠥᠪᠡᠭᠦᠳ ᠥᠬᠢᠳ ᠲᠥᠷᠥᠪᠡ᠃ 4 ᠶᠧᠷᠦ᠋ᠰᠠᠯᠧᠮ ᠳᠤ ᠲᠥᠷᠥᠭᠰᠡᠨ ᠲᠡᠭᠦᠨ ᠦ ᠬᠡᠦᠬᠡᠳ ᠤᠳ ᠤᠨ ᠨᠡᠷᠡᠰ ᠭᠡᠪᠡᠯ᠄ ᠱᠠᠮᠦ᠋ᠶᠠ᠂ ᠱᠣᠪᠠᠪ᠂ ᠨᠠᠲ᠋ᠠᠨ᠂ ᠰᠣᠯᠣᠮᠣᠨ᠂ 5 ᠢᠪᠬᠠᠷ᠂ ᠡᠯᠢᠱᠦ᠋ᠶᠠ᠂ ᠡᠯᠫᠧᠯᠧᠲ᠂ 6 ᠨᠣᠭᠠ᠂ ᠨᠧᠹᠧᠭ᠂ ᠶᠠᠹᠢᠶᠠ᠂ 7 ᠡᠯᠢᠱᠠᠮᠠ᠂ ᠪᠧᠯᠢᠶᠠᠳᠠ᠂ ᠡᠯᠢᠹᠧᠯᠧᠲ ᠶᠤᠮ᠃
ᠹᠢᠯᠢᠰᠲ᠋ᠴᠦᠳ ᠢ ᠢᠯᠠᠪᠠ
8 ᠳ᠋ᠠᠸᠢᠳ᠋ ᠲᠣᠰᠣᠯᠠᠭᠳᠠᠨ᠂ ᠪᠦᠬᠦ ᠢᠰᠷᠧᠯ ᠤᠨ ᠬᠠᠭᠠᠨ ᠪᠣᠯᠣᠭᠰᠠᠨ ᠢ ᠹᠢᠯᠢᠰᠲ᠋ᠴᠦᠳ ᠰᠣᠨᠣᠰᠣᠭᠠᠳ ᠲᠡᠭᠦᠨ ᠢ ᠣᠯᠬᠤ ᠪᠠᠷ ᠪᠦᠬᠦ ᠬᠦᠴᠦ ᠪᠡᠨ ᠳᠠᠢᠴᠢᠯᠠᠨ ᠭᠠᠷᠴᠤ ᠢᠷᠡᠵᠡᠭᠡᠪᠡ᠃ ᠳ᠋ᠠᠸᠢᠳ᠋ ᠰᠣᠨᠣᠰᠣᠭᠠᠳ ᠲᠡᠳᠡᠨ ᠲᠡᠢ ᠳᠠᠢᠲᠤᠬᠤ ᠪᠠᠷ ᠭᠠᠷᠪᠠ᠃ 9 ᠹᠢᠯᠢᠰᠲ᠋ᠴᠦᠳ ᠬᠦᠷᠴᠦ ᠢᠷᠡᠭᠡᠳ᠂ ᠷᠧᠹᠠᠢᠮ ᠤᠨ ᠬᠥᠨᠳᠡᠢ ᠶᠢ ᠳᠠᠭᠠᠷᠢᠭᠰᠠᠨ ᠪᠠᠢᠵᠠᠢ᠃ 10 ᠳ᠋ᠠᠸᠢᠳ᠋ ᠪᠤᠷᠬᠠᠨ ᠠᠴᠠ ᠯᠠᠪᠯᠠᠨ᠄ 《ᠪᠢ ᠹᠢᠯᠢᠰᠲ᠋ᠴᠦᠳ ᠲᠡᠢ ᠳᠠᠢᠲᠤᠬᠤ ᠪᠠᠷ ᠬᠥᠳᠡᠯᠵᠦ ᠪᠣᠯᠬᠤ ᠤᠤ︖ ᠲᠠ ᠲᠡᠳᠡᠨ ᠢ ᠮᠢᠨᠦ ᠭᠠᠷ ᠲᠤ ᠲᠤᠰᠢᠶᠠᠬᠤ ᠤᠤ︖》 ᠭᠡᠪᠡ᠃ ᠶᠣᠬᠣᠸᠠ ᠲᠡᠭᠦᠨ ᠳᠦ᠄ 《ᠬᠥᠳᠡᠯ᠂ ᠪᠢ ᠲᠡᠳᠡᠨ ᠢ ᠴᠢᠨᠦ ᠭᠠᠷ ᠲᠤ ᠲᠤᠰᠢᠶᠠᠶᠠ》 ᠭᠡᠰᠡᠨ ᠳᠦ᠂ 11 ᠲᠡᠷᠡ ᠪᠡᠷ ᠪᠠᠯ ᠫᠧᠷᠠᠽᠢᠮ ᠤᠷᠤᠭᠤ ᠬᠥᠳᠡᠯᠪᠡ᠃ ᠳ᠋ᠠᠸᠢᠳ᠋ ᠲᠡᠨᠳᠡ ᠲᠡᠳᠡᠨ ᠢ ᠪᠤᠲᠠ ᠴᠣᠬᠢᠵᠤ᠄ 《ᠪᠤᠷᠬᠠᠨ ᠬᠠᠰᠢᠯᠭᠠ ᠶᠢ ᠰᠦᠢᠷᠡᠭᠦᠯᠳᠡᠭ ᠤᠰᠤ ᠮᠡᠲᠦ ᠪᠡᠷ ᠮᠢᠨᠦ ᠳᠠᠢᠰᠤᠨ ᠨᠤᠭᠤᠳ ᠢ ᠮᠢᠨᠦ ᠡᠮᠦᠨᠡ ᠮᠢᠨᠦ ᠭᠠᠷ ᠢᠶᠠᠷ ᠰᠦᠢᠷᠡᠭᠦᠯᠵᠡᠢ》 ᠭᠡᠰᠡᠨ ᠦ ᠤᠯᠠᠮ ᠢᠶᠠᠷ ᠲᠡᠷᠡ ᠭᠠᠵᠠᠷ ᠪᠠᠯ ᠫᠧᠷᠠᠽᠢᠮ 7 ᠭᠡᠵᠦ ᠨᠡᠷᠡᠯᠡᠭᠳᠡᠵᠡᠢ᠃ 12 ᠹᠢᠯᠢᠰᠲ᠋ᠴᠦᠳ ᠪᠤᠷᠬᠠᠳ ᠢᠶᠠᠨ ᠲᠡᠨᠳᠡ ᠣᠷᠬᠢᠭᠰᠠᠨ ᠪᠠᠢᠯᠠ᠂ ᠳ᠋ᠠᠸᠢᠳ᠋ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠲᠡᠳᠡᠭᠡᠷ ᠢ ᠭᠠᠯ ᠳᠤ ᠰᠢᠲᠠᠭᠠᠵᠠᠢ᠃
13 ᠹᠢᠯᠢᠰᠲ᠋ᠴᠦᠳ ᠨᠥᠭᠥᠭᠡ ᠬᠥᠨᠳᠡᠢ ᠲᠠᠯᠠ ᠶᠢ ᠳᠠᠬᠢᠨᠲᠠ ᠳᠣᠪᠲᠣᠯᠪᠠ᠃ 14 ᠳ᠋ᠠᠸᠢᠳ᠋ ᠳᠠᠬᠢᠨ ᠪᠤᠷᠬᠠᠨ ᠠᠴᠠ ᠠᠰᠠᠭᠤᠭᠰᠠᠨ ᠳᠤ᠂ ᠪᠤᠷᠬᠠᠨ᠄ 《ᠴᠢ ᠰᠢᠭᠤᠳ ᠭᠠᠷᠴᠤ ᠪᠣᠯᠬᠤ ᠦᠭᠡᠢ᠃ ᠲᠡᠳᠡᠨ ᠢ ᠲᠣᠭᠣᠷᠢᠨ ᠣᠴᠢᠵᠤ᠂ ᠢᠯᠠᠮᠠ ᠶᠢᠨ ᠮᠣᠳᠣᠳ ᠤᠨ ᠤᠷᠳᠤᠭᠤᠷ ᠲᠡᠳᠡᠨ ᠤᠷᠤᠭᠤ ᠳᠠᠭᠠᠷᠢ᠃ 15 ᠢᠯᠠᠮᠠ ᠶᠢᠨ ᠮᠣᠳᠣᠳ ᠤᠨ ᠣᠷᠣᠢ ᠳᠡᠭᠡᠭᠦᠷ ᠤᠷᠤᠭᠰᠢᠯᠠᠬᠤ ᠴᠢᠮᠡᠭᠡ ᠰᠣᠨᠣᠰᠳᠠᠬᠤ ᠦᠶᠡ ᠳᠦ᠂ ᠴᠢ ᠲᠤᠯᠤᠯᠳᠤᠭᠠᠨ ᠳᠤ ᠭᠠᠷᠴᠤ ᠶᠠᠪᠤ᠃ ᠤᠴᠢᠷ ᠨᠢ ᠪᠤᠷᠬᠠᠨ ᠹᠢᠯᠢᠰᠲ ᠤᠨ ᠴᠡᠷᠢᠭ ᠢ ᠴᠣᠬᠢᠬᠤ ᠪᠠᠷ ᠴᠢᠮᠠ ᠠᠴᠠ ᠲᠦᠷᠦᠭᠦᠯᠡᠨ ᠭᠠᠷᠤᠭᠰᠠᠨ ᠪᠠᠢᠨᠠ》 ᠭᠡᠵᠦ ᠠᠢᠯᠠᠳᠪᠠ᠃ 16 ᠳ᠋ᠠᠸᠢᠳ᠋ ᠪᠤᠷᠬᠠᠨ ᠤ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠦᠢᠯᠡᠳᠦᠭᠰᠡᠨ ᠪᠥᠭᠡᠳ ᠲᠡᠳᠡ ᠭᠢᠪᠧᠶᠣᠨ ᠠᠴᠠ ᠭᠧᠽᠧᠷ ᠬᠦᠷᠲᠡᠯᠡ ᠹᠢᠯᠢᠰᠲ᠋ᠴᠦᠳ ᠦᠨ ᠴᠡᠷᠢᠭ ᠢ ᠴᠣᠬᠢᠪᠠ᠃ 17 ᠢᠩᠭᠢᠭᠡᠳ ᠳ᠋ᠠᠸᠢᠳ᠋ ᠤᠨ ᠠᠯᠳᠠᠷ ᠨᠡᠷᠡ ᠪᠦᠬᠦ ᠭᠠᠵᠠᠷ ᠢᠶᠠᠷ ᠲᠠᠷᠬᠠᠵᠠᠢ᠃ ᠶᠣᠬᠣᠸᠠ ᠠᠴᠠ ᠪᠣᠯᠵᠤ᠂ ᠪᠦᠬᠦ ᠦᠨᠳᠦᠰᠦᠲᠡᠨ ᠳ᠋ᠠᠸᠢᠳ᠋ ᠠᠴᠠ ᠡᠮᠢᠶᠡᠬᠦ ᠪᠣᠯᠵᠠᠢ᠃