ᠱᠠᠰᠲᠢᠷ ᠤᠨ ᠳᠡᠭᠡᠳᠦ ᠠᠷᠪᠠᠨ ᠲᠠᠪᠤ
ᠠᠪᠳᠠᠷᠠ ᠶᠢ ᠶᠧᠷᠦ᠋ᠰᠠᠯᠧᠮ ᠳᠤ ᠠᠪᠴᠢᠷᠠᠪᠠ
1 ᠲᠡᠷᠡ ᠳ᠋ᠠᠸᠢᠳ᠋ ᠤᠨ ᠬᠣᠲᠠ ᠳᠤ ᠥᠷᠭᠥᠭᠡ ᠨᠦᠭᠦᠳ ᠢᠶᠡᠨ ᠪᠠᠷᠢᠭᠤᠯᠤᠭᠠᠳ᠂ ᠪᠤᠷᠬᠠᠨ ᠤ ᠠᠪᠳᠠᠷᠠ ᠳᠤ ᠵᠣᠷᠢᠭᠤᠯᠤᠨ ᠭᠠᠵᠠᠷ ᠪᠡᠯᠡᠳᠬᠡᠵᠦ ᠲᠡᠨᠳᠡ ᠴᠠᠴᠠᠷ ᠪᠣᠰᠬᠠᠪᠠ᠃ 2 ᠲᠡᠭᠡᠭᠡᠳ ᠳ᠋ᠠᠸᠢᠳ᠋᠄ 《ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠯᠧᠸᠢᠴᠦᠳ ᠡᠴᠡ ᠥᠭᠡᠷᠡ ᠬᠡᠨ ᠴᠤ ᠡᠷᠭᠦᠨ ᠵᠥᠭᠡᠭᠡᠵᠦ ᠪᠣᠯᠬᠤ ᠦᠭᠡᠢ᠃ ᠶᠣᠬᠣᠸᠠ ᠲᠡᠳᠡᠨ ᠢ ᠰᠢᠯᠢᠵᠦ ᠠᠪᠤᠭᠠᠳ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠵᠥᠭᠡᠭᠡᠯᠭᠡᠵᠦ᠂ ᠦᠷᠭᠦᠯᠵᠢ ᠥᠪᠡᠷ ᠲᠡᠭᠡᠨ ᠦᠢᠯᠡᠴᠢᠯᠡᠭᠦᠯᠦᠭᠰᠡᠨ ᠶᠤᠮ》 ᠭᠡᠪᠡ᠃ 3 ᠳ᠋ᠠᠸᠢᠳ᠋ ᠪᠡᠯᠡᠳᠬᠡᠭᠰᠡᠨ ᠭᠠᠵᠠᠷ ᠲᠠᠭᠠᠨ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠠᠪᠴᠢᠷᠠᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠪᠦᠬᠦ ᠢᠰᠷᠧᠯ ᠢ ᠶᠧᠷᠦ᠋ᠰᠠᠯᠧᠮ ᠳᠤ ᠴᠤᠭᠯᠠᠭᠤᠯᠪᠠ᠃ 4 ᠳ᠋ᠠᠸᠢᠳ᠋ ᠠᠷᠣᠨ ᠤ ᠦᠷᠡ ᠤᠳᠤᠮ ᠪᠣᠯᠣᠨ ᠯᠧᠸᠢᠴᠦᠳ ᠢ ᠴᠤᠭᠯᠠᠭᠤᠯᠬᠤ ᠳᠤ᠄ 5 ᠺᠣᠬᠠᠲ ᠤᠨ ᠦᠷᠡ ᠤᠳᠤᠮ ᠠᠴᠠ ᠤᠳᠤᠷᠢᠳᠤᠭᠴᠢ ᠦᠷᠢᠶᠧᠯ ᠪᠣᠯᠣᠨ ᠲᠡᠭᠦᠨ ᠦ ᠵᠠᠭᠤ ᠬᠣᠷᠢᠨ ᠬᠠᠮᠢᠶᠠᠲᠠᠨ᠂ 6 ᠮᠧᠷᠠᠷᠢ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠤᠳᠤᠷᠢᠳᠤᠭᠴᠢ ᠠᠰᠠᠢᠶᠠ ᠪᠣᠯᠣᠨ ᠲᠡᠭᠦᠨ ᠦ ᠬᠣᠶᠠᠷ ᠵᠠᠭᠤ ᠬᠣᠷᠢᠨ ᠬᠠᠮᠢᠶᠠᠲᠠᠨ᠂ 7 ᠭᠧᠷᠱᠣᠨ ᠤ ᠦᠷᠡ ᠤᠳᠤᠮ ᠠᠴᠠ ᠤᠳᠤᠷᠢᠳᠤᠭᠴᠢ ᠶᠣᠶᠧᠯ ᠪᠣᠯᠣᠨ ᠲᠡᠭᠦᠨ ᠦ ᠵᠠᠭᠤ ᠭᠤᠴᠢᠨ ᠬᠠᠮᠢᠶᠠᠲᠠᠨ᠂ 8 ᠡᠯᠢᠱᠠᠹᠠᠨ ᠤ ᠦᠷᠡ ᠤᠳᠤᠮ ᠠᠴᠠ ᠤᠳᠤᠷᠢᠳᠤᠭᠴᠢ ᠱᠧᠮᠠᠢᠶᠠ ᠪᠣᠯᠣᠨ ᠲᠡᠭᠦᠨ ᠦ ᠬᠣᠶᠠᠷ ᠵᠠᠭᠤᠨ ᠬᠠᠮᠢᠶᠠᠲᠠᠨ᠂ 9 ᠾᠧᠪᠷᠣᠨ ᠤ ᠦᠷᠡ ᠤᠳᠤᠮ ᠠᠴᠠ ᠤᠳᠤᠷᠢᠳᠤᠭᠴᠢ ᠡᠯᠢᠶᠧᠯ ᠪᠣᠯᠣᠨ ᠲᠡᠭᠦᠨ ᠦ ᠨᠠᠶᠠᠨ ᠬᠠᠮᠢᠶᠠᠲᠠᠨ᠂ 10 ᠦᠽᠢᠶᠧᠯ ᠤᠨ ᠦᠷᠡ ᠤᠳᠤᠮ ᠠᠴᠠ ᠤᠳᠤᠷᠢᠳᠤᠭᠴᠢ ᠠᠮᠢᠨᠠᠳᠠᠪ ᠪᠣᠯᠣᠨ ᠲᠡᠭᠦᠨ ᠦ ᠵᠠᠭᠤ ᠠᠷᠪᠠᠨ ᠬᠣᠶᠠᠷ ᠬᠠᠮᠢᠶᠠᠲᠠᠨ ᠪᠠᠢᠪᠠ᠃
11 ᠳ᠋ᠠᠸᠢᠳ᠋ ᠲᠠᠬᠢᠯᠴᠢ ᠽᠠᠳᠣᠺ᠂ ᠠᠪᠢᠶᠠᠲ᠋ᠠᠷ ᠨᠠᠷ ᠪᠣᠯᠣᠨ ᠯᠧᠸᠢᠴᠦᠳ ᠪᠣᠯᠬᠤ ᠦᠷᠢᠶᠧᠯ᠂ ᠠᠰᠠᠢᠶᠠ᠂ ᠶᠣᠶᠧᠯ᠂ ᠱᠧᠮᠠᠢᠶᠠ᠂ ᠡᠯᠢᠶᠧᠯ᠂ ᠠᠮᠢᠨᠠᠳᠠᠪ ᠨᠠᠷ ᠢ ᠳᠠᠭᠤᠳᠠᠨ᠂ 12 ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠪᠣᠯ ᠯᠧᠸᠢ ᠤᠳᠤᠮ ᠤᠨ ᠠᠬᠠᠯᠠᠭᠴᠢᠳ ᠪᠢᠯᠡ᠃ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠮᠢᠨᠦ ᠪᠡᠯᠡᠳᠬᠡᠭᠰᠡᠨ ᠭᠠᠵᠠᠷ ᠲᠤ ᠡᠷᠭᠦᠨ ᠠᠪᠴᠢᠷᠠᠬᠤ ᠶᠢᠨ ᠲᠤᠯᠠᠳᠠ ᠬᠠᠮᠢᠶᠠᠲᠠᠳ ᠲᠠᠢ ᠪᠠᠨ ᠬᠠᠮᠲᠤ ᠪᠡᠶᠡ ᠪᠡᠨ ᠠᠷᠢᠭᠤᠰᠬᠠ᠃ 13 ᠡᠬᠢᠨ ᠤ ᠤᠳᠠᠭᠠ ᠲᠠ ᠨᠠᠷ ᠠᠪᠴᠢᠷᠠᠭᠰᠠᠨ ᠦᠭᠡᠢ ᠡᠴᠡ ᠪᠣᠯᠵᠤ᠂ ᠪᠢᠳᠡᠨ ᠦ ᠪᠤᠷᠬᠠᠨ ᠶᠣᠬᠣᠸᠠ ᠪᠢᠳᠡᠨ ᠦ ᠡᠰᠡᠷᠭᠦ ᠬᠢᠯᠢᠩᠨᠡᠭᠰᠡᠨ᠃ ᠪᠢᠳᠡ ᠶᠠᠭᠠᠬᠢᠬᠤ ᠲᠤᠬᠠᠢ ᠶᠣᠰᠣ ᠵᠢᠷᠤᠮ ᠢ ᠲᠡᠭᠦᠨ ᠡᠴᠡ ᠯᠠᠪᠯᠠᠭᠰᠠᠨ ᠦᠭᠡᠢ ᠪᠠᠢᠵᠠᠢ》 ᠭᠡᠵᠦ ᠬᠡᠯᠡᠪᠡ᠃ 14 ᠢᠩᠭᠢᠭᠡᠳ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠠᠪᠴᠢᠷᠠᠬᠤ ᠶᠢᠨ ᠲᠤᠯᠠᠳᠠ ᠲᠠᠬᠢᠯᠴᠢᠳ ᠪᠣᠯᠣᠨ ᠯᠧᠸᠢᠴᠦᠳ ᠪᠡᠶᠡ ᠪᠡᠨ ᠠᠷᠢᠭᠤᠰᠬᠠᠭᠰᠠᠨ ᠤ ᠳᠠᠷᠠᠭᠠ᠂ 15 ᠯᠧᠸᠢᠴᠦᠳ ᠶᠣᠬᠣᠸᠠ ᠶᠢᠨ ᠠᠢᠯᠠᠳᠤᠭᠰᠠᠨ ᠶᠣᠰᠣᠭᠠᠷ ᠮᠣᠰᠧ ᠶᠢᠨ ᠵᠠᠷᠯᠢᠭᠳᠠᠭᠰᠠᠨ ᠤ ᠳᠠᠭᠠᠤ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠳᠠᠮᠨᠠᠭᠤᠷᠭᠠ ᠨᠤᠭᠤᠳ ᠢᠶᠠᠷ ᠮᠥᠷᠥᠨ ᠳᠡᠭᠡᠷᠡ ᠪᠡᠨ ᠡᠭᠦᠷᠴᠡᠢ᠃
16 ᠲᠡᠭᠡᠬᠦ ᠳᠦ᠂ ᠳ᠋ᠠᠸᠢᠳ᠋ ᠯᠧᠸᠢᠴᠦᠳ ᠦᠨ ᠤᠳᠤᠷᠢᠳᠤᠭᠴᠢᠳ ᠲᠤ ᠵᠠᠬᠢᠨ ᠬᠠᠮᠢᠶᠠᠲᠠᠨ ᠨᠤᠭᠤᠳ ᠤᠨ ᠢᠶᠠᠨ ᠳᠤᠮᠳᠠ ᠠᠴᠠ ᠳᠠᠭᠤᠴᠢᠳ ᠢ ᠲᠣᠮᠢᠯᠠᠨ ᠪᠣᠰᠣᠭᠠ ᠶᠠᠲᠤᠭᠠ ᠪᠣᠯᠣᠨ ᠶᠠᠲᠤᠭᠠ ᠴᠢᠪᠬᠠᠳᠠᠭᠤᠯᠵᠤ᠂ ᠴᠠᠩ ᠴᠣᠬᠢᠭᠤᠯᠤᠨ᠂ ᠪᠠᠶᠠᠷ ᠤᠨ ᠳᠠᠭᠤᠤ ᠪᠠᠨ ᠴᠢᠩᠭ᠍ᠠ ᠳᠠᠭᠤᠯᠠᠭᠠᠷᠠᠢ ᠭᠡᠪᠡ᠃ 17 ᠡᠢᠮᠦ ᠡᠴᠡ ᠯᠧᠸᠢᠴᠦᠳ ᠶᠣᠶᠧᠯ ᠤᠨ ᠬᠦᠦ ᠾᠧᠮᠠᠨ ᠢ᠂ ᠲᠡᠭᠦᠨ ᠦ ᠬᠠᠮᠢᠶᠠᠲᠠᠳ ᠤᠨ ᠳᠤᠮᠳᠠ ᠠᠴᠠ ᠪᠧᠷᠧᠺᠢᠶᠠ ᠶᠢᠨ ᠬᠦᠦ ᠠᠰᠠᠹ ᠢ᠂ ᠮᠥᠨ ᠲᠡᠳᠡᠨ ᠦ ᠬᠠᠮᠢᠶᠠᠲᠠᠨ ᠮᠧᠷᠠᠷᠢᠴᠤᠳ ᠠᠴᠠ ᠺᠦᠱᠠᠢᠶᠠ ᠶᠢᠨ ᠬᠦᠦ ᠡᠲ᠋ᠠᠨ ᠢ ᠲᠣᠮᠢᠯᠠᠵᠤ᠂ 18 ᠮᠥᠨ ᠲᠡᠳᠡᠨ ᠦ ᠲᠤᠰᠠᠯᠠᠭᠴᠢᠳ ᠢᠶᠠᠷ ᠽᠧᠺᠠᠷᠢᠶᠠ᠂ ᠪᠧᠨ᠂ ᠶᠠᠽᠢᠶᠧᠯ᠂ ᠱᠧᠮᠢᠷᠠᠮᠣᠲ᠂ ᠶᠧᠾᠢᠶᠧᠯ᠂ ᠦᠦᠨᠢ᠂ ᠡᠯᠢᠶᠠᠪ᠂ ᠪᠧᠨᠠᠢᠶᠠ᠂ ᠮᠠᠶᠠᠰᠧᠶᠠ᠂ ᠮᠠᠲ᠋ᠢᠲ᠋ᠢᠶᠠ᠂ ᠡᠯᠢᠹᠧᠯᠧᠾᠦ᠋᠂ ᠮᠢᠺᠨᠧᠶᠠ᠂ ᠮᠥᠨ ᠬᠠᠭᠠᠯᠭᠠᠴᠢᠳ ᠣᠪᠧᠳ᠋ ᠡᠳᠣᠮ᠂ ᠶᠧᠶᠧᠯ ᠨᠠᠷ ᠢ ᠲᠣᠮᠢᠯᠠᠪᠠ᠃ 19 ᠢᠩᠭᠢᠭᠡᠳ ᠬᠥᠭᠵᠢᠮᠴᠢᠨ ᠾᠧᠮᠠᠨ᠂ ᠠᠰᠠᠹ᠂ ᠡᠲ᠋ᠠᠨ ᠨᠠᠷ ᠭᠠᠤᠯᠢᠨ ᠴᠠᠩ ᠴᠣᠬᠢᠵᠤ᠂ 20 ᠽᠧᠺᠠᠷᠢᠶᠠ᠂ ᠠᠽᠢᠶᠧᠯ᠂ ᠱᠧᠮᠢᠷᠠᠮᠣᠲ᠂ ᠶᠧᠾᠢᠶᠧᠯ᠂ ᠦᠦᠨᠢ᠂ ᠡᠯᠢᠶᠠᠪ᠂ ᠮᠠᠶᠠᠰᠧᠶᠠ᠂ ᠪᠧᠨᠠᠢᠶᠠ ᠨᠠᠷ ᠠᠯᠠᠮᠣᠲ 8 ᠲᠤ ᠨᠡᠢᠴᠡᠭᠦᠯᠦᠨ ᠪᠣᠰᠣᠭᠠ ᠶᠠᠲᠤᠭᠠ ᠴᠢᠪᠬᠠᠳᠠᠵᠤ᠂ 21 ᠮᠠᠲ᠋ᠢᠲ᠋ᠢᠶᠠ᠂ ᠡᠯᠢᠹᠧᠯᠧᠾᠦ᠋᠂ ᠮᠢᠺᠨᠧᠶᠠ᠂ ᠣᠪᠧᠳ᠋ ᠡᠳᠣᠮ᠂ ᠶᠧᠶᠧᠯ᠂ ᠠᠽᠠᠽᠢᠶᠠ ᠨᠠᠷ ᠱᠧᠮᠢᠨᠢᠲ 9 ᠲᠤ ᠨᠡᠢᠴᠡᠭᠦᠯᠦᠨ ᠶᠠᠲᠤᠭᠠ ᠳᠠᠷᠤᠪᠠ᠃ 22 ᠯᠧᠸᠢᠴᠦᠳ ᠦᠨ ᠠᠬᠠᠯᠠᠭᠴᠢ ᠺᠧᠨᠠᠨᠢᠶᠠ ᠠᠪᠢᠶᠠᠰ ᠲᠠᠢ ᠪᠣᠯᠬᠣᠷ ᠬᠥᠭᠵᠢᠮ ᠤᠨ ᠤᠳᠤᠷᠢᠳᠤᠭᠠᠴᠢ ᠶᠢᠨ ᠲᠤᠰᠢᠶᠠᠯ ᠲᠠᠢ᠃ 23 ᠪᠧᠷᠧᠺᠢᠶᠠ᠂ ᠡᠯᠺᠠᠨᠠ ᠨᠠᠷ ᠠᠪᠳᠠᠷᠠ ᠶᠢ ᠰᠠᠬᠢᠳᠠᠭ ᠬᠠᠭᠠᠯᠭᠠᠴᠢᠳ ᠪᠠᠢᠪᠠ᠃ 24 ᠲᠠᠬᠢᠯᠴᠢ ᠱᠧᠪᠠᠨᠢᠶᠠ᠂ ᠶᠣᠱᠠᠹᠠᠲ᠂ ᠨᠧᠲ᠋ᠠᠨᠧᠯ᠂ ᠠᠮᠠᠰᠠᠢ᠂ ᠽᠧᠺᠠᠷᠢᠶᠠ᠂ ᠪᠧᠨᠠᠢᠶᠠ᠂ ᠡᠯᠢᠶᠧᠽᠧᠷ ᠨᠠᠷ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢᠨ ᠡᠮᠦᠨᠡ ᠪᠦᠷᠢᠶᠡ ᠦᠯᠢᠶᠡᠬᠦ ᠲᠤᠰᠢᠶᠠᠯ ᠲᠠᠢ᠃ ᠣᠪᠧᠳ᠋ ᠡᠳᠣᠮ᠂ ᠶᠧᠾᠢᠶᠠ ᠨᠠᠷ ᠴᠤ ᠠᠪᠳᠠᠷᠠ ᠶᠢ ᠰᠠᠬᠢᠳᠠᠭ ᠬᠠᠭᠠᠯᠭᠠᠴᠢᠳ ᠪᠠᠢᠯᠠ᠃
25 ᠳ᠋ᠠᠸᠢᠳ᠋ ᠢᠰᠷᠧᠯ ᠤᠨ ᠠᠬᠠᠮᠠᠳ ᠤᠳ ᠪᠣᠯᠣᠨ ᠮᠢᠩ᠋ᠭᠠᠲᠤ ᠶᠢᠨ ᠳᠠᠷᠤᠭᠠ ᠨᠠᠷ ᠢ ᠳᠠᠭᠠᠭᠤᠯᠤᠨ ᠣᠴᠢᠵᠤ᠂ ᠣᠪᠧᠳ᠋ ᠡᠳᠣᠮ ᠤᠨ ᠭᠡᠷ ᠡᠴᠡ ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠪᠠᠶᠠᠷ ᠲᠠᠢ ᠪᠠᠷ ᠠᠪᠴᠢᠷᠠᠪᠠ᠃ 26 ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠵᠥᠭᠡᠭᠡᠭᠰᠡᠨ ᠯᠧᠸᠢᠴᠦᠳ ᠲᠦ ᠪᠤᠷᠬᠠᠨ ᠲᠤᠰᠠᠯᠠᠭᠰᠠᠨ ᠳᠤ᠂ ᠲᠡᠳᠡ ᠳᠣᠯᠣᠭᠠᠨ ᠪᠤᠬᠠ᠂ ᠳᠣᠯᠣᠭᠠᠨ ᠬᠤᠴᠠ ᠪᠠᠷ ᠲᠠᠬᠢᠯ ᠡᠷᠭᠦᠪᠡ᠃ 27 ᠳ᠋ᠠᠸᠢᠳ᠋ ᠨᠠᠷᠢᠨ ᠮᠠᠭᠠᠯᠢᠩ᠋ᠭᠤᠨ ᠳᠡᠪᠡᠯ ᠡᠮᠦᠰᠴᠡᠢ᠃ ᠠᠪᠳᠠᠷᠠ ᠶᠢ ᠵᠥᠭᠡᠭᠡᠭᠰᠡᠨ ᠪᠦᠬᠦ ᠯᠧᠸᠢᠴᠦᠳ ᠴᠤ᠂ ᠳᠠᠭᠤᠴᠢᠳ ᠴᠤ᠂ ᠳᠠᠭᠤᠤ ᠶᠢᠨ ᠤᠳᠤᠷᠢᠳᠤᠭᠠᠴᠢ ᠺᠧᠨᠠᠨᠢᠶᠠ ᠴᠤ ᠠᠳᠠᠯᠢᠬᠠᠨ ᠪᠠᠢᠯᠠ᠃ ᠳ᠋ᠠᠸᠢᠳ᠋ ᠮᠠᠭᠠᠯᠢᠩ᠋ᠭᠤᠨ ᠡᠹᠣᠳ ᠴᠤ ᠡᠮᠦᠰᠦᠭᠰᠡᠨ ᠪᠠᠢᠪᠠ᠃ 28 ᠡᠢᠨ ᠬᠦ ᠬᠠᠮᠤᠭ ᠢᠰᠷᠧᠯ ᠤᠤᠬᠠᠢᠯᠠᠵᠤ ᠡᠪᠡᠷ ᠪᠦᠷᠢᠶᠡ ᠪᠣᠯᠣᠨ ᠪᠦᠷᠢᠶᠡ ᠦᠯᠢᠶᠡᠵᠦ᠂ ᠴᠠᠩ ᠴᠣᠬᠢᠨ᠂ ᠪᠣᠰᠣᠭᠠ ᠶᠠᠲᠤᠭᠠ ᠪᠠ ᠶᠠᠲᠤᠭᠠ ᠴᠢᠪᠬᠠᠳᠠᠨ ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠠᠪᠴᠢᠷᠠᠵᠠᠢ᠃
29 ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠳ᠋ᠠᠸᠢᠳ᠋ ᠤᠨ ᠬᠣᠲᠠ ᠤᠷᠤᠭᠤ ᠢᠷᠡᠬᠦ ᠶᠢ ᠰᠠᠦ᠋ᠯ ᠤᠨ ᠥᠬᠢᠨ ᠮᠢᠺᠠᠯ ᠴᠣᠩ᠋ᠬᠣ ᠪᠠᠷ ᠥᠩᠭᠡᠶᠢᠨ ᠬᠠᠷᠠᠵᠤ ᠪᠠᠢᠬᠤ ᠳᠠᠭᠠᠨ ᠳ᠋ᠠᠸᠢᠳ᠋ ᠬᠠᠭᠠᠨ ᠤ ᠦᠰᠦᠷᠦᠨ ᠪᠥᠵᠢᠭᠯᠡᠵᠦ ᠪᠠᠶᠠᠷᠯᠠᠵᠤ ᠪᠤᠢ ᠶᠢ ᠬᠠᠷᠠᠭᠠᠳ ᠵᠢᠷᠦᠬᠡ ᠰᠡᠳᠬᠢᠯ ᠳᠡᠭᠡᠨ ᠲᠡᠭᠦᠨ ᠢ ᠪᠠᠰᠤᠮᠵᠢᠯᠠᠪᠠ᠃