ᠵᠦᠢᠷ ᠮᠡᠷᠭᠡᠨ ᠦᠭᠡᠰ ᠬᠣᠷᠢᠨ ᠬᠣᠶᠠᠷ
1 ᠠᠷᠪᠢᠨ ᠪᠠᠶᠠᠯᠢᠭ ᠠᠴᠠ ᠢᠯᠡᠭᠦᠦ ᠪᠡᠷ ᠠᠯᠳᠠᠷ ᠢ ᠰᠣᠩ᠋ᠭᠣ ᠠᠯᠲᠠ ᠮᠥᠩᠭᠥᠨ ᠡᠴᠡ ᠲᠠᠭᠠᠯᠠᠯ ᠨᠢ ᠰᠠᠢᠨ᠃
2 ᠶᠠᠳᠠᠭᠤ ᠪᠠᠶᠠᠨ ᠬᠣᠶᠠᠷ ᠤᠨ ᠨᠡᠢᠲᠡᠯᠢᠭ ᠲᠠᠯᠠ ᠭᠡᠪᠡᠯ ᠬᠣᠶᠠᠭᠤᠯᠠ ᠶᠢ ᠨᠢ ᠶᠣᠬᠣᠸᠠ ᠪᠦᠲᠦᠭᠡᠭᠰᠡᠨ᠃
3 ᠠᠶᠤᠯ ᠢ ᠬᠠᠷᠠᠭᠠᠳ ᠬᠡᠷᠰᠡᠦ ᠨᠢ ᠳᠠᠯᠳᠠᠯᠠᠳᠠᠭ ᠪᠣᠯ ᠭᠡᠨᠡᠨ ᠨᠢ ᠣᠴᠢᠭᠠᠳ ᠬᠣᠣᠷᠯᠠᠭᠳᠠᠨᠠ᠃
4 ᠡᠭᠡᠯ ᠳᠠᠷᠤᠤ ᠬᠢᠭᠡᠳ ᠶᠣᠬᠣᠸᠠ ᠠᠴᠠ ᠡᠮᠢᠶᠡᠬᠦᠢ ᠨᠢ ᠡᠳ᠋ ᠪᠠᠶᠠᠯᠢᠭ᠂ ᠠᠯᠳᠠᠷ ᠬᠢᠭᠡᠳ ᠠᠮᠢ ᠶᠢ ᠣᠯᠭᠣᠬᠤ᠃
5 ᠬᠦᠵᠢᠭᠦᠳ ᠦᠨ ᠵᠠᠮ ᠳᠤ ᠥᠷᠭᠡᠰᠦ ᠲᠣᠣᠷ ᠠᠮᠢ ᠪᠠᠨ ᠬᠠᠷᠠᠭᠤᠯᠳᠠᠭᠴᠢ ᠲᠡᠳᠡᠭᠡᠷ ᠡᠴᠡ ᠬᠣᠯᠠᠭᠤᠷ᠃
6 ᠵᠠᠮ ᠤᠨ ᠬᠢᠨᠢ ᠡᠬᠢᠨ ᠡᠴᠡ ᠦᠷᠡ ᠬᠡᠦᠬᠡᠳ ᠢᠶᠡᠨ ᠳᠠᠰᠬᠠᠯᠵᠢᠭᠤᠯ ᠥᠲᠡᠯᠦᠭᠰᠡᠨ ᠴᠤ ᠲᠡᠷᠡ ᠬᠠᠵᠠᠢᠬᠤ ᠦᠭᠡᠢ᠃
7 ᠪᠠᠶᠠᠨ ᠨᠢ ᠦᠭᠡᠭᠦᠴᠦᠳ ᠦᠨ ᠵᠠᠬᠢᠷᠤᠭᠴᠢ ᠥᠷᠢᠲᠡᠨ ᠨᠢ ᠵᠢᠭᠡᠯᠡᠭᠦᠯᠦᠭᠴᠢ ᠶᠢᠨ ᠢᠶᠠᠨ ᠵᠠᠷᠤᠴᠠ᠃
8 ᠭᠡᠮ ᠢ ᠲᠠᠷᠢᠭᠴᠢ ᠭᠠᠢ ᠶᠢ ᠬᠤᠷᠢᠶᠠᠨᠠ ᠬᠢᠯᠢᠩ ᠤᠨ ᠬᠢᠨᠢ ᠰᠢᠯᠪᠢᠭᠦᠷ ᠬᠤᠭᠤᠷᠠᠨᠠ᠃
9 ᠦᠭᠡᠭᠦᠦ ᠳᠦ ᠬᠦᠨᠡᠰᠦ ᠪᠡᠨ ᠥᠭᠳᠡᠭ ᠥᠭᠭᠢᠶᠡᠮᠦᠷ ᠬᠥᠮᠦᠨ ᠪᠤᠶᠠᠨ ᠲᠠᠢ᠃
10 ᠪᠠᠰᠤᠮᠵᠢᠯᠠᠭᠴᠢ ᠶᠢ ᠬᠥᠭᠡᠭᠡᠪᠡᠯ ᠮᠠᠷᠭᠤᠭᠠᠨ ᠵᠠᠢᠯᠠᠵᠤ ᠬᠡᠷᠡᠭᠦᠯ ᠪᠠ ᠭᠦᠳᠬᠡᠯ ᠴᠤ ᠵᠣᠭᠰᠣᠨᠠ᠃
11 ᠠᠷᠢᠭᠤᠨ ᠰᠡᠳᠬᠢᠯ ᠲᠠᠢ᠂ ᠠᠶᠠᠲᠠᠢ ᠶᠠᠷᠢᠶᠠ ᠲᠠᠢ ᠨᠢᠭᠡᠨ ᠳᠦ ᠬᠠᠭᠠᠨ ᠬᠥᠮᠦᠨ ᠴᠤ ᠠᠨᠳᠠ ᠨᠥᠬᠥᠷ᠃
12 ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠮᠡᠳᠡᠯᠭᠡ ᠶᠢ ᠬᠠᠮᠠᠭᠠᠯᠠᠵᠤ ᠢᠲᠡᠭᠡᠮᠵᠢ ᠦᠭᠡᠢ ᠬᠥᠮᠦᠨ ᠦ ᠦᠭᠡ ᠶᠢ ᠨᠤᠷᠠᠭᠠᠨᠠ᠃
13 《ᠴᠠᠭᠠᠨᠠ ᠴᠢᠨᠢ ᠠᠷᠰᠯᠠᠨ ᠪᠠᠢᠨᠠ ᠵᠠᠮ ᠳᠡᠭᠡᠷᠡ ᠠᠯᠠᠭᠤᠯᠬᠤ ᠨᠢ》 ᠵᠠᠯᠬᠠᠭᠤ ᠶᠢᠨ ᠶᠠᠷᠢᠳᠠᠭ ᠨᠢ ᠡᠨᠡ᠃
14 ᠶᠠᠩ᠋ᠬᠠᠨ ᠤ ᠠᠮᠠ ᠭᠦᠨ ᠨᠦᠬᠡ ᠶᠣᠬᠣᠸᠠ ᠳᠤ ᠵᠢᠭ᠍ᠰᠢᠭᠳᠡᠭᠴᠢ ᠲᠡᠨᠳᠡ ᠤᠨᠠᠨᠠ᠃
15 ᠬᠡᠦᠬᠡᠳ ᠦᠨ ᠵᠢᠷᠦᠬᠡᠨ ᠳᠠᠬᠢ ᠮᠤᠩ᠋ᠬᠠᠭᠯᠠᠯ ᠤᠨ ᠬᠦᠯᠢᠶᠡᠰᠦ ᠶᠢ ᠭᠡᠰᠬᠡᠯᠲᠡ ᠶᠢᠨ ᠰᠠᠪᠠᠭᠠ ᠬᠣᠯᠠᠳᠠᠭᠤᠯᠤᠨᠠ᠃
16 ᠪᠠᠶᠠᠵᠢᠬᠤ ᠭᠡᠵᠦ ᠶᠠᠳᠠᠭᠤᠰ ᠢ ᠳᠠᠷᠤᠯᠠᠭᠴᠢ ᠪᠠᠶᠠᠨ ᠳᠤ ᠥᠭᠭᠥᠭᠴᠢ ᠯᠠᠪᠲᠠᠢ ᠶᠠᠳᠠᠭᠤᠷᠠᠨᠠ᠃
17 ᠮᠡᠷᠭᠡᠳ ᠦᠨ ᠦᠭᠡ ᠶᠢ ᠴᠢᠬᠢ ᠲᠠᠯᠪᠢᠨ ᠰᠣᠨᠣᠰ ᠮᠡᠳᠡᠯᠭᠡ ᠳᠦ ᠮᠢᠨᠢ ᠰᠡᠳᠬᠢᠯ ᠲᠠᠯᠪᠢ
18 ᠴᠢ ᠡᠳᠡᠭᠡᠷ ᠢ ᠴᠡᠭᠡᠵᠢᠨ ᠳᠡᠭᠡᠨ ᠬᠠᠳᠠᠭᠠᠯᠠᠵᠤ ᠣᠷᠣᠭᠤᠯ ᠳᠠᠭᠠᠨ ᠲᠣᠭᠲᠠᠭᠠᠪᠠᠯ ᠲᠠᠭᠠᠲᠠᠢ᠂
19 ᠢᠲᠡᠭᠡᠯ ᠢ ᠴᠢᠨᠢ ᠶᠣᠬᠣᠸᠠ ᠳᠤ ᠪᠠᠢᠯᠭᠠᠬᠤ ᠶᠢᠨ ᠲᠤᠯᠠᠳᠠ ᠡᠳᠡᠭᠡᠷ ᠢ ᠪᠢ ᠴᠢᠮᠠ ᠳᠤ ᠥᠨᠥᠳᠥᠷ ᠮᠡᠳᠡᠭᠦᠯᠪᠡ᠃
20 ᠮᠡᠷᠭᠡᠨ ᠵᠥᠪᠯᠡᠯᠭᠡ ᠬᠢᠭᠡᠳ ᠮᠡᠳᠡᠯᠭᠡ ᠤᠬᠠᠭᠠᠨ ᠤ ᠦᠭᠡᠰ ᠡᠴᠡ ᠪᠢ ᠴᠢᠮᠠ ᠳᠤ ᠭᠤᠴᠢ 24 ᠶᠢ ᠪᠢᠴᠢᠵᠦ ᠥᠭᠭᠥᠭᠰᠡᠨ ᠨᠢ
21 ᠶᠠᠭᠤ ᠨᠢ ᠵᠥᠪ ᠦᠨᠡᠨ ᠭᠡᠳᠡᠭ ᠢ ᠴᠢᠮᠠ ᠳᠤ ᠮᠡᠳᠡᠭᠦᠯᠵᠦ ᠥᠪᠡᠷ ᠢ ᠴᠢᠨᠢ ᠢᠯᠡᠭᠡᠭᠴᠢ ᠳᠤ ᠵᠥᠪ ᠬᠠᠷᠢᠭᠤ ᠶᠢ ᠥᠭᠭᠥᠭᠦᠯᠬᠦ ᠶᠢᠨ ᠲᠤᠯᠠᠳᠠ ᠪᠤᠰᠤ ᠤᠤ︖
22 ᠶᠠᠳᠠᠭᠤ ᠶᠢ ᠶᠠᠳᠠᠭᠤ ᠭᠡᠵᠦ ᠪᠦᠦ ᠮᠥᠯᠵᠢ ᠦᠭᠡᠭᠦᠴᠦᠳ ᠢ ᠰᠢᠭᠦᠯᠲᠡ ᠳᠡᠭᠡᠷᠡ ᠪᠦᠦ ᠳᠠᠷᠤᠯᠠ
23 ᠶᠣᠬᠣᠸᠠ ᠥᠪᠡᠷ ᠢᠶᠡᠨ ᠲᠡᠳᠡᠨ ᠢ ᠥᠮᠥᠭᠯᠡᠵᠦ ᠡᠳᠡᠨ ᠢ ᠴᠥᠯᠮᠥᠭᠴᠢ ᠶᠢ ᠴᠥᠯᠮᠥᠨᠡ᠃
24 ᠠᠭᠤᠷ ᠤᠨ ᠲᠤᠯᠤᠮ ᠲᠠᠢ ᠪᠦᠦ ᠨᠥᠬᠥᠷᠯᠡ ᠤᠯᠠᠭᠠᠨ ᠭᠠᠯᠵᠠᠭᠤ ᠲᠠᠢ ᠪᠦᠦ ᠨᠥᠬᠥᠴᠡᠯᠳᠦ
25 ᠡᠰᠡ ᠲᠡᠭᠡᠪᠡᠰᠦ ᠴᠢ ᠲᠡᠳᠡᠨ ᠦ ᠵᠠᠮ ᠢ ᠰᠤᠷᠤᠨᠠ ᠠᠮᠢ ᠪᠠᠨ ᠵᠠᠩ᠋ᠭᠤᠨ ᠳᠤ ᠣᠷᠣᠭᠤᠯᠤᠨᠠ᠃
26 ᠬᠥᠮᠦᠨ ᠦ ᠥᠷᠢ ᠶᠢ ᠳᠠᠭᠠᠭᠠᠬᠤ ᠪᠠᠷ ᠭᠠᠷ ᠪᠠᠷᠢᠭᠴᠢ ᠬᠥᠮᠦᠨ ᠪᠦᠦ ᠪᠣᠯ
27 ᠲᠥᠯᠥᠬᠦ ᠶᠠᠭᠤᠮᠠ ᠦᠭᠡᠢ ᠪᠣᠯᠣᠭᠠᠳ ᠣᠷᠣ ᠪᠠᠨ ᠴᠤ ᠪᠤᠯᠢᠶᠠᠯᠭᠠᠬᠤ ᠪᠤᠢ᠃
28 ᠡᠪᠦᠭᠡᠳ ᠦᠨ ᠢᠶᠠᠨ ᠲᠠᠯᠪᠢᠭᠰᠠᠨ ᠡᠷᠲᠡᠨ ᠦ ᠬᠢᠯᠢ ᠶᠢᠨ ᠲᠡᠮᠳᠡᠭ ᠢ ᠪᠦᠦ ᠰᠢᠯᠵᠢᠭᠦᠯ᠃
29 ᠠᠵᠢᠯ ᠳᠠᠭᠠᠨ ᠴᠢᠳᠠᠮᠠᠭᠠᠢ ᠬᠥᠮᠦᠨ ᠢ ᠴᠢ ᠠᠵᠢᠭᠯᠠᠪᠠ ᠤᠤ︖ ᠬᠠᠭᠠᠳ ᠤᠨ ᠡᠮᠦᠨᠡ ᠲᠡᠷᠡ ᠦᠢᠯᠡᠴᠢᠯᠡᠨᠡ ᠬᠠᠷᠠᠴᠤ ᠶᠢᠨ ᠡᠮᠦᠨᠡ ᠦᠢᠯᠡᠴᠢᠯᠡᠬᠦ ᠦᠭᠡᠢ᠃