ᠨᠢᠭᠡᠳᠦᠭᠡᠷ ᠰᠠᠮᠦ᠋ᠶᠧᠯ ᠭᠤᠷᠪᠠ
ᠡᠵᠡᠨ ᠰᠠᠮᠦ᠋ᠶᠧᠯ ᠢ ᠳᠠᠭᠤᠳᠠᠪᠠ
1 ᠬᠥᠪᠡᠭᠦᠨ ᠰᠠᠮᠦ᠋ᠶᠧᠯ ᠡᠯᠢ ᠶᠢᠨ ᠳᠣᠣᠷᠠ ᠶᠣᠬᠣᠸᠠ ᠳᠤ ᠦᠢᠯᠡᠴᠢᠯᠡᠵᠦ ᠪᠠᠢᠪᠠ᠃ ᠲᠡᠷᠡ ᠡᠳᠦᠷ ᠤᠳ ᠲᠤ ᠶᠣᠬᠣᠸᠠ ᠶᠢᠨ ᠦᠭᠡ ᠬᠣᠪᠣᠷ᠂ ᠦᠵᠡᠭᠳᠡᠯ ᠤᠳ ᠴᠤ ᠴᠥᠭᠡᠨ ᠪᠠᠢᠪᠠ᠃
2 ᠲᠡᠷᠡ ᠦᠶᠡ ᠳᠦ ᠡᠯᠢ ᠥᠷᠥᠭᠡᠨ ᠳᠡᠭᠡᠨ ᠬᠡᠪᠲᠡᠵᠦ ᠪᠠᠢᠯᠠ᠃ ᠲᠡᠭᠦᠨ ᠦ ᠨᠢᠳᠦ ᠮᠠᠭᠤᠳᠠᠵᠤ ᠬᠠᠷᠠᠵᠤ ᠴᠢᠳᠠᠬᠤ ᠪᠠᠨ ᠪᠣᠯᠢᠵᠠᠢ᠃ 3 ᠬᠠᠷᠢᠨ ᠪᠤᠷᠬᠠᠨ ᠤ ᠳ᠋ᠧᠩ ᠤᠨᠲᠠᠷᠠᠭᠠ ᠦᠭᠡᠢ ᠪᠠᠢᠬᠤ ᠳᠤ᠂ ᠰᠠᠮᠦ᠋ᠶᠧᠯ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠦ ᠬᠡᠪᠲᠡᠵᠦ ᠪᠠᠢᠪᠠ᠃ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠲᠡᠨᠳᠡ ᠪᠠᠢᠵᠠᠢ᠃ 4 ᠶᠣᠬᠣᠸᠠ ᠰᠠᠮᠦ᠋ᠶᠧᠯ ᠢ ᠳᠠᠭᠤᠳᠠᠪᠠ᠂ ᠲᠡᠷᠡ᠄ 《ᠪᠢ ᠡ᠊ᠨᠳᠡ ᠪᠠᠢᠨᠠ》 ᠭᠡᠵᠦ ᠬᠡᠯᠡᠭᠡᠳ᠂ 5 ᠡᠯᠢ ᠤᠷᠤᠭᠤ ᠭᠦᠶᠦᠨ ᠣᠴᠢᠵᠤ᠄ 《ᠪᠢ ᠡ᠊ᠨᠳᠡ ᠪᠠᠢᠨᠠ᠂ ᠲᠠ ᠨᠠᠮᠠᠶᠢ ᠳᠠᠭᠤᠳᠠᠪᠠ ᠤᠤ︖》 ᠭᠡᠬᠦ ᠳᠦ᠂ ᠡᠯᠢ᠄ 《ᠪᠢ ᠳᠠᠭᠤᠳᠠᠭᠠ ᠦᠭᠡᠢ᠂ ᠶᠠᠪᠤᠵᠤ ᠬᠡᠪᠲᠡ》 ᠭᠡᠬᠦ ᠪᠡᠷ ᠨᠢ ᠰᠠᠮᠦ᠋ᠶᠧᠯ ᠶᠠᠪᠤᠵᠤ ᠬᠡᠪᠲᠡᠪᠡ᠃ 6 ᠶᠣᠬᠣᠸᠠ ᠳᠠᠬᠢᠨ᠄ 《ᠰᠠᠮᠦ᠋ᠶᠧᠯ︕》 ᠭᠡᠵᠦ ᠳᠠᠭᠤᠳᠠᠪᠠ᠃ ᠰᠠᠮᠦ᠋ᠶᠧᠯ ᠪᠣᠰᠴᠤ᠂ ᠡᠯᠢ ᠤᠷᠤᠭᠤ ᠣᠴᠢᠨ᠄ 《ᠪᠢ ᠡ᠊ᠨᠳᠡ ᠪᠠᠢᠨᠠ᠂ ᠲᠠ ᠨᠠᠮᠠᠶᠢ ᠳᠠᠭᠤᠳᠠᠪᠠ ᠤᠤ︖》 ᠭᠡᠬᠦ ᠳᠦ᠂ ᠡᠯᠢ᠄ 《ᠪᠢ ᠳᠠᠭᠤᠳᠠᠭᠠ ᠦᠭᠡᠢ᠂ ᠬᠦᠦ ᠮᠢᠨᠢ᠂ ᠶᠠᠪᠤᠵᠤ ᠬᠡᠪᠲᠡ》 ᠭᠡᠪᠡ᠃ 7 ᠬᠠᠷᠢᠨ ᠰᠠᠮᠦ᠋ᠶᠧᠯ ᠶᠣᠬᠣᠸᠠ ᠶᠢ ᠬᠠᠷᠠᠬᠠᠨ ᠮᠡᠳᠡᠭᠡ ᠦᠭᠡᠢ᠂ ᠶᠣᠬᠣᠸᠠ ᠶᠢᠨ ᠦᠭᠡ ᠴᠤ ᠲᠡᠭᠦᠨ ᠳᠦ ᠢᠯᠡᠷᠬᠡᠶᠢᠯᠡᠭᠳᠡᠭᠡ ᠦᠭᠡᠢ ᠪᠠᠢᠵᠠᠢ᠃ 8 ᠶᠣᠬᠣᠸᠠ ᠳᠠᠬᠢᠨ ᠰᠠᠮᠦ᠋ᠶᠧᠯ ᠢ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠪᠠᠨ ᠳᠠᠭᠤᠳᠠᠬᠤ ᠳᠤ᠂ ᠰᠠᠮᠦ᠋ᠶᠧᠯ ᠪᠣᠰᠴᠤ᠂ ᠡᠯᠢ ᠤᠷᠤᠭᠤ ᠣᠴᠢᠨ᠄ 《ᠪᠢ ᠡ᠊ᠨᠳᠡ ᠪᠠᠢᠨᠠ᠂ ᠲᠠ ᠨᠠᠮᠠᠶᠢ ᠳᠠᠭᠤᠳᠠᠪᠠ ᠤᠤ︖》 ᠭᠡᠬᠦ ᠳᠦᠨᠢ ᠡᠯᠢ ᠡᠨᠡ ᠬᠡᠦᠬᠡᠳ ᠢ ᠳᠠᠭᠤᠳᠠᠭᠴᠢ ᠨᠢ ᠶᠣᠬᠣᠸᠠ ᠭᠡᠳᠡᠭ ᠢ ᠤᠬᠠᠭᠠᠷᠠᠯᠠ᠃ 9 ᠡᠯᠢ ᠰᠠᠮᠦ᠋ᠶᠧᠯ ᠳᠤ᠄ 《ᠶᠠᠪᠤ᠂ ᠬᠡᠪᠲᠡᠵᠦ ᠠᠮᠠᠷᠠ᠃ ᠬᠡᠷᠪᠡ ᠲᠡᠷᠡ ᠴᠢᠮᠠᠶᠢ ᠳᠠᠭᠤᠳᠠᠪᠠᠯ᠂ ᠴᠢ᠄ 〈ᠶᠣᠬᠣᠸᠠ ᠮᠢᠨᠢ᠂ ᠠᠢᠯᠠᠳᠴᠤ ᠬᠠᠢᠷᠠᠯᠠ᠂ ᠵᠠᠷᠤᠴᠠ ᠲᠠᠨᠢ ᠰᠣᠨᠣᠰᠴᠤ ᠪᠠᠢᠨᠠ〉 ᠭᠡᠵᠦ ᠬᠠᠷᠢᠭᠤᠯ》 ᠭᠡᠰᠡᠨ ᠳᠦ᠂ ᠰᠠᠮᠦ᠋ᠶᠧᠯ ᠶᠠᠪᠤᠵᠤ ᠣᠷᠣᠨ ᠳᠠᠭᠠᠨ ᠬᠡᠪᠲᠡᠪᠡ᠃
10 ᠲᠡᠭᠡᠬᠦ ᠳᠦᠨᠢ ᠶᠣᠬᠣᠸᠠ ᠢᠷᠡᠵᠦ᠂ ᠲᠡᠨᠳᠡ ᠵᠣᠭᠰᠣᠭᠠᠳ ᠤᠷᠢᠳᠤ ᠶᠢᠨ ᠠᠳᠠᠯᠢ᠄ 《ᠰᠠᠮᠦ᠋ᠶᠧᠯ᠂ ᠰᠠᠮᠦ᠋ᠶᠧᠯ︕》 ᠭᠡᠵᠦ ᠳᠠᠭᠤᠳᠠᠪᠠ᠃ ᠰᠠᠮᠦ᠋ᠶᠧᠯ᠄ 《ᠠᠢᠯᠠᠳᠴᠤ ᠬᠠᠢᠷᠠᠯᠠ᠂ ᠵᠠᠷᠤᠴᠠ ᠲᠠᠨᠢ ᠰᠣᠨᠣᠰᠴᠤ ᠪᠠᠢᠨᠠ》 ᠭᠡᠪᠡ᠃ 11 ᠶᠣᠬᠣᠸᠠ ᠰᠠᠮᠦ᠋ᠶᠧᠯ ᠳᠤ᠄ 《ᠠᠩ᠋ᠬᠠᠷᠤᠭᠲᠤᠨ᠂ ᠪᠢ ᠢᠰᠷᠧᠯ ᠳᠤ ᠤᠴᠠᠷᠠᠭᠤᠯᠬᠤ ᠪᠠᠷ ᠪᠠᠢᠭᠠ ᠨᠢᠭᠡᠨ ᠶᠠᠪᠤᠳᠠᠯ ᠪᠤᠢ᠃ ᠡᠭᠦᠨ ᠢ ᠰᠣᠨᠣᠰᠣᠭᠴᠢ ᠪᠦᠭᠦᠳᠡ ᠶᠢᠨ ᠬᠣᠶᠠᠷ ᠴᠢᠬᠢ ᠬᠠᠩᠭᠢᠨᠠᠬᠤ ᠪᠣᠯᠣᠨᠠ᠃ 12 ᠲᠡᠷᠡ ᠡᠳᠦᠷ ᠪᠢ ᠡᠯᠢ ᠳᠡᠭᠡᠷᠡ ᠲᠡᠭᠦᠨ ᠦ ᠭᠡᠷ ᠦᠨ ᠲᠤᠬᠠᠢ ᠬᠡᠯᠡᠭᠰᠡᠨ ᠪᠦᠬᠦᠨ ᠢᠶᠡᠨ ᠡᠬᠢᠨ ᠡᠴᠡ ᠨᠢ ᠳᠠᠭᠤᠰᠲᠠᠯᠠ ᠪᠡᠶᠡᠯᠡᠭᠦᠯᠦᠨᠡ᠃ 13 ᠲᠡᠭᠦᠨ ᠦ ᠮᠡᠳᠡᠳᠡᠭ ᠭᠡᠮ ᠨᠢᠭᠦᠯ ᠦᠨ ᠤᠴᠢᠷ ᠢᠶᠠᠷ ᠲᠡᠭᠦᠨ ᠦ ᠭᠡᠷ ᠢ ᠮᠥᠩᠬᠡᠳᠡ ᠰᠢᠳᠬᠡᠬᠦ ᠭᠡᠵᠦ ᠪᠤᠢ ᠪᠠᠨ ᠪᠢ ᠲᠡᠭᠦᠨ ᠳᠦ ᠲᠤᠩ᠋ᠬᠠᠭᠯᠠᠵᠤ ᠪᠠᠢᠨᠠ᠃ ᠲᠡᠭᠦᠨ ᠦ ᠬᠥᠪᠡᠭᠦᠳ ᠪᠤᠷᠬᠠᠨ ᠢ ᠳᠣᠷᠣᠮᠵᠢᠯᠠᠵᠤ ᠪᠠᠢᠳᠠᠭ ᠪᠣᠯᠪᠠᠴᠤ ᠲᠡᠷᠡ ᠲᠡᠳᠡᠨ ᠢ ᠵᠠᠰᠠᠭᠰᠠᠨ ᠦᠭᠡᠢ᠃ 14 ᠲᠡᠢᠮᠦ ᠡᠴᠡ ᠪᠢ ᠡᠯᠢ ᠶᠢᠨ ᠭᠡᠷ ᠲᠦ ᠠᠨᠳᠠᠭᠠᠢᠯᠠᠵᠤ ᠪᠠᠢᠨᠠ᠂ ᠲᠡᠭᠦᠨ ᠦ ᠭᠡᠷ ᠦᠨ ᠭᠡᠮ ᠨᠢᠭᠦᠯ ᠡᠷᠭᠦᠯ ᠢᠶᠡᠷ ᠴᠤ᠂ ᠲᠠᠬᠢᠯ ᠢᠶᠠᠷ ᠴᠤ ᠠᠭᠤᠴᠢᠯᠠᠭᠳᠡᠰᠢ ᠦᠭᠡᠢ》 ᠭᠡᠪᠡ᠃
15 ᠰᠠᠮᠦ᠋ᠶᠧᠯ ᠥᠷᠯᠥᠭᠡ ᠬᠦᠷᠲᠡᠯᠡ ᠬᠡᠪᠲᠡᠭᠡᠳ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠬᠠᠭᠠᠯᠭᠠ ᠨᠤᠭᠤᠳ ᠢ ᠨᠡᠭᠡᠭᠡᠪᠡ᠃ ᠰᠠᠮᠦ᠋ᠶᠧᠯ ᠲᠡᠷᠡ ᠬᠦ ᠦᠵᠡᠭᠳᠡᠯ ᠢ ᠡᠯᠢ ᠳᠤ ᠳᠤᠭᠤᠯᠭᠠᠬᠤ ᠠᠴᠠ ᠠᠶᠤᠵᠤ ᠪᠠᠢᠬᠤ ᠳᠤ᠂ 16 ᠡᠯᠢ ᠰᠠᠮᠦ᠋ᠶᠧᠯ ᠢ ᠳᠠᠭᠤᠳᠠᠵᠤ᠄ 《ᠮᠢᠨᠦ ᠬᠦᠦ᠂ ᠰᠠᠮᠦ᠋ᠶᠧᠯ ᠡ》 ᠭᠡᠪᠡ᠃ ᠰᠠᠮᠦ᠋ᠶᠧᠯ᠄ 《ᠪᠢ ᠡ᠊ᠨᠳᠡ ᠪᠠᠢᠨᠠ》 ᠭᠡᠰᠡᠨ ᠳᠦ᠂ 17 ᠡᠯᠢ᠄ 《ᠴᠢᠮᠠ ᠳᠤ ᠶᠠᠮᠠᠷ ᠦᠭᠡ ᠠᠢᠯᠠᠳᠤᠭᠰᠠᠨ ᠪᠤᠢ︖ ᠨᠠᠳᠠ ᠠᠴᠠ ᠶᠠᠭᠤ ᠴᠤ ᠪᠦᠦ ᠨᠢᠭᠤ᠃ ᠬᠡᠷᠪᠡ ᠴᠢᠮᠠ ᠳᠤ ᠠᠢᠯᠠᠳᠤᠭᠰᠠᠨ ᠪᠦᠬᠦ ᠦᠭᠡᠨ ᠡᠴᠡ ᠨᠢᠭᠡ ᠶᠢ ᠨᠢ ᠴᠤ ᠨᠢᠭᠤᠪᠠᠯ᠂ ᠪᠤᠷᠬᠠᠨ ᠴᠢᠮᠠᠶᠢ ᠬᠠᠲᠠᠭᠤ ᠰᠢᠳᠬᠡᠬᠦ ᠪᠣᠯᠲᠤᠭᠠᠢ》 ᠭᠡᠪᠡ᠃ 18 ᠰᠠᠮᠦ᠋ᠶᠧᠯ ᠦᠭᠡ ᠪᠦᠷᠢ ᠶᠢ ᠨᠢ ᠶᠠᠭᠤ ᠴᠤ ᠨᠢᠭᠤᠯ ᠦᠭᠡᠢ ᠳᠤᠭᠤᠯᠭᠠᠭᠰᠠᠨ ᠳᠤ᠂ ᠡᠯᠢ᠄ 《ᠲᠡᠷᠡ ᠪᠣᠯ ᠡᠵᠡᠨ᠂ ᠲᠡᠷᠡ ᠰᠠᠢᠨ ᠭᠡᠵᠦ ᠦᠵᠡᠭᠰᠡᠨ ᠢᠶᠡᠨ ᠦᠢᠯᠡᠳᠬᠦ ᠪᠣᠯᠣᠨᠠ︕》 ᠭᠡᠪᠡ᠃
19 ᠰᠠᠮᠦ᠋ᠶᠧᠯ ᠥᠰᠥᠨ ᠲᠣᠷᠨᠢᠭᠰᠠᠭᠠᠷ ᠪᠠᠢᠯᠠ᠃ ᠶᠣᠬᠣᠸᠠ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠵᠤ᠂ ᠲᠡᠭᠦᠨ ᠦ ᠦᠭᠡᠨ ᠡᠴᠡ ᠨᠢᠭᠡ ᠨᠢ ᠴᠤ ᠬᠥᠰᠡᠷ ᠬᠠᠶᠠᠭᠳᠠᠭᠰᠠᠨ ᠦᠭᠡᠢ᠃ 20 ᠰᠠᠮᠦ᠋ᠶᠧᠯ ᠪᠣᠯ ᠶᠣᠬᠣᠸᠠ ᠶᠢᠨ ᠲᠣᠭᠲᠠᠭᠠᠭᠰᠠᠨ ᠡᠰᠢ ᠦᠵᠡᠭᠦᠯᠦᠭᠴᠢ ᠮᠥᠨ ᠭᠡᠳᠡᠭ ᠢ ᠳ᠋ᠠᠨ ᠠᠴᠠ ᠪᠧᠷᠣᠲ ᠱᠧᠪᠠ ᠬᠦᠷᠲᠡᠯᠡᠬᠢ ᠢᠰᠷᠧᠯ ᠬᠥᠮᠦᠨ ᠪᠦᠬᠦᠨ ᠮᠡᠳᠡᠪᠡ᠃ 21 ᠶᠣᠬᠣᠸᠠ ᠰᠠᠮᠦ᠋ᠶᠧᠯ ᠳᠤ ᠥᠪᠡᠷ ᠢ ᠪᠠᠨ ᠥᠪᠡᠷ ᠦᠨ ᠢᠶᠠᠨ ᠦᠭᠡ ᠪᠡᠷ ᠱᠢᠯᠣ᠋ ᠳᠤ ᠢᠯᠡᠴᠢᠯᠡᠭᠰᠡᠨ ᠤᠴᠢᠷ ᠲᠡᠷᠡ ᠱᠢᠯᠣ᠋ ᠳᠤ ᠦᠵᠡᠭᠳᠡᠬᠦ ᠪᠣᠯᠪᠠ᠃ ᠰᠠᠮᠦ᠋ᠶᠧᠯ ᠤᠨ ᠦᠭᠡ ᠲᠡᠢᠨ ᠬᠦ ᠢᠰᠷᠧᠯ ᠳᠠᠶᠠᠭᠠᠷ ᠲᠠᠷᠬᠠᠪᠠ᠃