ᠨᠢᠭᠡᠳᠦᠭᠡᠷ ᠰᠠᠮᠦ᠋ᠶᠧᠯ ᠬᠣᠷᠢᠨ ᠨᠠᠢ᠌ᠮᠠ
ᠰᠠᠦ᠋ᠯ ᠰᠦᠨᠡᠰᠦ ᠳᠠᠭᠤᠳᠠᠭᠴᠢ ᠡᠮᠡ ᠶᠢᠨ ᠳᠤ
1 ᠲᠡᠷᠡ ᠦᠶᠡ ᠳᠦ ᠹᠢᠯᠢᠰᠲ᠋ᠴᠦᠳ ᠢᠰᠷᠧᠯ ᠲᠠᠢ ᠲᠤᠯᠤᠯᠳᠤᠬᠤ ᠪᠠᠷ ᠴᠡᠷᠢᠭ ᠢᠶᠠᠨ ᠴᠤᠭᠯᠠᠭᠤᠯᠪᠠ᠃ ᠠᠺᠢᠱ ᠳ᠋ᠠᠸᠢᠳ᠋ ᠲᠤ᠄ 《ᠴᠢ ᠪᠣᠯᠣᠨ ᠴᠢᠨᠦ ᠬᠥᠮᠦᠰ ᠨᠠᠳᠠ ᠲᠠᠢ ᠬᠠᠮᠲᠤ ᠲᠤᠯᠤᠯᠳᠤᠭᠠᠨ ᠳᠤ ᠶᠠᠪᠤᠨᠠ ᠭᠡᠳᠡᠭ ᠢ ᠮᠡᠳᠡᠵᠦ ᠠᠪ︕》 ᠭᠡᠵᠦ ᠬᠡᠯᠡᠪᠡ᠃ 2 ᠳ᠋ᠠᠸᠢᠳ᠋ ᠠᠺᠢᠱ ᠲᠤ᠄ 《ᠵᠠ᠂ ᠶᠠᠭᠠᠬᠢᠬᠤ ᠪᠤᠢ᠃ ᠪᠣᠭᠣᠯ ᠤᠨ ᠢᠶᠠᠨ ᠶᠠᠭᠤ ᠬᠢᠵᠦ ᠴᠢᠳᠠᠬᠤ ᠶᠢ ᠲᠠ ᠮᠡᠳᠡᠬᠦ ᠪᠣᠯᠣᠨᠠ》 ᠭᠡᠰᠡᠨ ᠳᠦ᠂ ᠠᠺᠢᠱ ᠳ᠋ᠠᠸᠢᠳ᠋ ᠲᠤ᠄ 《ᠵᠠ᠂ ᠵᠠ᠂ ᠪᠢ ᠴᠢᠮᠠᠶᠢ ᠨᠠᠰᠤᠨ ᠲᠤᠷᠰᠢ ᠳᠠᠭᠠᠨ ᠥᠪᠡᠷ ᠦᠨ ᠢᠶᠠᠨ ᠰᠢᠳᠠᠷ ᠬᠠᠮᠠᠭᠠᠯᠠᠭᠴᠢ ᠪᠣᠯᠭᠠᠶᠠ》 ᠭᠡᠪᠡ᠃
3 ᠡᠨᠡ ᠬᠣᠭᠣᠷᠣᠨᠳᠣ ᠰᠠᠮᠦ᠋ᠶᠧᠯ ᠥᠭᠡᠳᠡ ᠪᠣᠯᠪᠠ᠃ ᠪᠦᠬᠦ ᠢᠰᠷᠧᠯ ᠲᠡᠭᠦᠨ ᠦ ᠲᠥᠯᠥᠭᠡ ᠭᠠᠰᠢᠭᠤᠳᠠᠵᠤ᠂ ᠲᠡᠭᠦᠨ ᠢ ᠥᠪᠡᠷ ᠦᠨ ᠬᠢᠨᠢ ᠬᠣᠲᠠ ᠷᠠᠮᠠ ᠳᠤ ᠣᠷᠣᠰᠢᠭᠤᠯᠪᠠ᠃ ᠰᠠᠦ᠋ᠯ ᠴᠤ ᠰᠦᠨᠡᠰᠦ ᠳᠠᠭᠤᠳᠠᠭᠴᠢᠳ ᠪᠠ ᠮᠡᠷᠭᠡᠴᠢ ᠲᠥᠯᠭᠡᠴᠢᠳ ᠢ ᠤᠯᠤᠰ ᠣᠷᠣᠨ ᠠᠴᠠ ᠪᠠᠨ ᠬᠥᠭᠡᠭᠡᠭᠰᠡᠨ ᠪᠠᠢᠯᠠ᠃ 4 ᠹᠢᠯᠢᠰᠲ᠋ᠴᠦᠳ ᠴᠤᠭᠯᠠᠨ ᠢᠷᠡᠵᠦ ᠱᠦᠨᠧᠮ ᠳᠤ ᠬᠤᠸᠠᠷᠠᠩᠨᠠᠬᠤ ᠳᠤ᠂ ᠰᠠᠦ᠋ᠯ ᠪᠦᠬᠦ ᠢᠰᠷᠧᠯ ᠢ ᠴᠤᠭᠯᠠᠭᠤᠯᠤᠨ ᠭᠢᠯᠪᠣᠶᠠ ᠳᠤ ᠬᠤᠸᠠᠷᠠᠩᠨᠠᠨ ᠪᠠᠭᠤᠪᠠ᠃ 5 ᠰᠠᠦ᠋ᠯ ᠹᠢᠯᠢᠰᠲ᠋ᠴᠦᠳ ᠦᠨ ᠬᠤᠸᠠᠷᠠᠨ ᠢ ᠦᠵᠡᠭᠡᠳ ᠠᠢᠳᠠᠰ ᠲᠤ ᠠᠪᠲᠠᠨ ᠵᠢᠷᠦᠬᠡ ᠨᠢ ᠴᠡᠴᠡᠷᠡᠪᠡ᠃ 6 ᠰᠠᠦ᠋ᠯ ᠶᠣᠬᠣᠸᠠ ᠠᠴᠠ ᠠᠰᠠᠭᠤᠭᠰᠠᠨ ᠳᠤ᠂ ᠶᠣᠬᠣᠸᠠ ᠲᠡᠭᠦᠨ ᠳᠦ ᠵᠡᠭᠦᠳᠦ ᠪᠡᠷ ᠴᠤ᠂ ᠦᠷᠢᠮ 21 ᠢᠶᠠᠷ ᠴᠤ᠂ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢᠶᠠᠷ ᠴᠤ ᠬᠠᠷᠢᠭᠤ ᠥᠭᠭᠥᠭᠰᠡᠨ ᠦᠭᠡᠢ᠃ 7 ᠰᠠᠦ᠋ᠯ ᠵᠠᠷᠤᠴᠠ ᠨᠠᠷ ᠲᠠᠭᠠᠨ᠄ 《ᠨᠠᠳᠠ ᠳᠤ ᠰᠦᠨᠡᠰᠦ ᠳᠠᠭᠤᠳᠠᠭᠴᠢ ᠡᠮᠡ ᠡᠷᠢᠵᠦ ᠥᠭ᠃ ᠪᠢ ᠣᠴᠢᠵᠤ ᠲᠡᠷᠡ ᠡᠮᠡ ᠡᠴᠡ ᠠᠰᠠᠭᠤᠶᠠ》 ᠭᠡᠬᠦ ᠳᠦ᠂ ᠵᠠᠷᠤᠴᠠ ᠨᠠᠷ ᠨᠢ ᠰᠠᠦ᠋ᠯ ᠳᠤ᠄ 《ᠧᠨ ᠳ᠋ᠣᠷ ᠲᠤ ᠨᠢᠭᠡᠨ ᠰᠦᠨᠡᠰᠦ ᠳᠠᠭᠤᠳᠠᠭᠴᠢ ᠡᠮᠡ ᠪᠤᠢ》 ᠭᠡᠯᠡ᠃
8 ᠰᠠᠦ᠋ᠯ ᠬᠤᠪᠴᠠᠰᠤ ᠪᠠᠨ ᠰᠣᠯᠢᠵᠤ ᠵᠢᠰᠦ ᠪᠤᠷᠤᠭᠤᠯᠠᠨ᠂ ᠬᠣᠶᠠᠷ ᠬᠥᠮᠦᠨ ᠳᠠᠭᠠᠭᠤᠯᠵᠤ᠂ ᠰᠥᠨᠢ ᠪᠠᠷ ᠲᠡᠷᠡ ᠡᠮᠡ ᠳᠡᠭᠡᠷᠡ ᠬᠦᠷᠪᠡ᠃ ᠰᠠᠦ᠋ᠯ᠄ 《ᠴᠢ ᠤᠪᠠᠳᠢᠰ ᠭᠠᠷᠭᠠᠵᠤ᠂ ᠮᠢᠨᠦ ᠨᠡᠷᠡᠯᠡᠬᠦ ᠬᠥᠮᠦᠨ ᠢ ᠨᠠᠳᠠ ᠳᠤ ᠳᠠᠭᠤᠳᠠᠵᠤ ᠢᠯᠡᠷᠡᠭᠦᠯᠦᠭᠡᠴᠢ》 ᠭᠡᠬᠦ ᠳᠦ᠂ 9 ᠲᠡᠷᠡ ᠡᠮᠡ ᠲᠡᠭᠦᠨ ᠳᠦ᠄ 《ᠰᠠᠦ᠋ᠯ ᠤᠨ ᠶᠠᠭᠤ ᠬᠢᠭᠰᠡᠨ ᠢ ᠲᠠ ᠴᠤ ᠯᠠᠪ ᠮᠡᠳᠡᠨᠡ ᠰᠢᠦ ᠳᠠ᠂ ᠲᠡᠷᠡ ᠡᠨᠡ ᠨᠤᠲᠤᠭ ᠠᠴᠠ ᠰᠦᠨᠡᠰᠦ ᠳᠠᠭᠤᠳᠠᠭᠴᠢᠳ᠂ ᠮᠡᠷᠭᠡᠴᠢ ᠲᠥᠯᠭᠡᠴᠢᠳ ᠢ ᠤᠰᠠᠳᠬᠠᠭᠰᠠᠨ ᠠᠲᠠᠯᠠ ᠲᠠ ᠶᠠᠭᠤᠨ ᠳᠤ ᠨᠠᠮᠠᠶᠢ ᠤᠷᠠᠬᠠᠨ ᠳᠤ ᠣᠷᠣᠭᠤᠯᠤᠨ ᠠᠮᠢ ᠶᠢ ᠮᠢᠨᠢ ᠠᠪᠬᠤ ᠭᠡᠵᠦ ᠪᠠᠢᠨᠠ ᠪᠤᠢ︖》 ᠭᠡᠯᠡ᠃ 10 ᠰᠠᠦ᠋ᠯ ᠲᠡᠷᠡ ᠡᠮᠡ ᠳᠦ ᠶᠣᠬᠣᠸᠠ ᠶᠢᠨ ᠨᠡᠷᠡ ᠪᠡᠷ ᠲᠠᠩ᠋ᠭᠠᠷᠢᠭᠯᠠᠨ᠄ 《ᠶᠣᠬᠣᠸᠠ ᠶᠢᠨ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ᠂ ᠲᠠ ᠡᠭᠦᠨ ᠦ ᠤᠯᠠᠮ ᠢᠶᠠᠷ ᠶᠠᠯᠠ ᠳᠤ ᠤᠨᠠᠬᠤ ᠦᠭᠡᠢ ᠶᠤᠮ》 ᠭᠡᠵᠦ ᠬᠡᠯᠡᠪᠡ᠃ 11 ᠲᠡᠭᠡᠬᠦ ᠳᠦ ᠲᠡᠷᠡ ᠡᠮᠡ᠄ 《ᠪᠢ ᠬᠡᠨ ᠢ ᠳᠠᠭᠤᠳᠠᠵᠤ ᠢᠯᠡᠷᠡᠭᠦᠯᠬᠦ ᠪᠤᠢ︖》 ᠭᠡᠰᠡᠨ ᠳᠦ᠂ ᠰᠠᠦ᠋ᠯ᠄ 《ᠨᠠᠳᠠ ᠳᠤ ᠰᠠᠮᠦ᠋ᠶᠧᠯ ᠢ ᠳᠠᠭᠤᠳᠠᠵᠤ ᠢᠯᠡᠷᠡᠭᠦᠯᠦᠭᠡᠴᠢ》 ᠭᠡᠪᠡ᠃ 12 ᠲᠡᠷᠡ ᠡᠮᠡ ᠰᠠᠮᠦ᠋ᠶᠧᠯ ᠢ ᠦᠵᠡᠩᠭᠦᠲᠡ ᠪᠡᠨ ᠴᠢᠩᠭ᠍ᠠ ᠳᠠᠭᠤ ᠪᠠᠷ ᠬᠠᠰᠬᠢᠷᠪᠠ᠃ ᠲᠡᠭᠡᠭᠡᠳ ᠲᠡᠷᠡ ᠡᠮᠡ ᠰᠠᠦ᠋ᠯ ᠳᠤ᠄ 《ᠲᠠ ᠶᠠᠭᠤᠨ ᠳᠤ ᠨᠠᠮᠠᠶᠢ ᠮᠡᠬᠡᠯᠡᠪᠡ︖ ᠲᠠ ᠴᠢᠨᠢ ᠰᠠᠦ᠋ᠯ ᠪᠠᠢᠨᠠ》 ᠭᠡᠪᠡ᠃ 13 ᠬᠠᠭᠠᠨ ᠲᠡᠷᠡ ᠡᠮᠡ ᠳᠦ᠄ 《ᠪᠦᠦ ᠠᠶᠤ᠂ ᠬᠠᠷᠢᠨ ᠴᠢ ᠶᠠᠭᠤ ᠬᠠᠷᠠᠵᠤ ᠪᠠᠢᠨᠠ ᠪᠤᠢ︖》 ᠭᠡᠪᠡ᠃ ᠲᠡᠷᠡ ᠡᠮᠡ ᠰᠠᠦ᠋ᠯ ᠳᠤ᠄ 《ᠭᠠᠵᠠᠷ ᠠᠴᠠ ᠰᠦᠨᠡᠰᠦ 22 ᠭᠠᠷᠴᠤ ᠢᠷᠡᠬᠦ ᠶᠢ ᠪᠢ ᠬᠠᠷᠠᠵᠤ ᠪᠠᠢᠨᠠ》 ᠭᠡᠪᠡ᠃ 14 ᠰᠠᠦ᠋ᠯ ᠲᠡᠷᠡ ᠡᠮᠡ ᠡᠴᠡ᠄ 《ᠶᠠᠮᠠᠷ ᠲᠥᠷᠬᠥ ᠲᠠᠢ ᠪᠠᠢᠨᠠ ᠪᠤᠢ︖》 ᠭᠡᠰᠡᠨ ᠳᠦ᠂ ᠲᠡᠷᠡ ᠡᠮᠡ᠄ 《ᠨᠠᠰᠤᠲᠠᠢ ᠬᠥᠮᠦᠨ ᠭᠠᠷᠴᠤ ᠢᠷᠡᠵᠦ ᠪᠠᠢᠨᠠ᠂ ᠳᠡᠪᠡᠯ ᠡᠮᠦᠰᠦᠭᠰᠡᠨ ᠪᠠᠢᠨᠠ》 ᠭᠡᠪᠡ᠃ ᠲᠡᠷᠡ ᠨᠢ ᠰᠠᠮᠦ᠋ᠶᠧᠯ ᠪᠣᠯᠬᠤ ᠶᠢ ᠰᠠᠦ᠋ᠯ ᠮᠡᠳᠡᠭᠡᠳ ᠬᠠᠮᠠᠷ ᠢᠶᠠᠨ ᠭᠠᠵᠠᠷ ᠲᠤ ᠬᠦᠷᠭᠡᠨ ᠮᠥᠷᠭᠥᠪᠡ᠃
15 ᠰᠠᠮᠦ᠋ᠶᠧᠯ ᠰᠠᠦ᠋ᠯ ᠳᠤ᠄ 《ᠲᠠ ᠶᠠᠭᠤᠨ ᠳᠤ ᠨᠠᠮᠠᠶᠢ ᠭᠠᠷᠭᠠᠵᠤ ᠶᠠᠷᠰᠢᠭᠯᠠᠵᠤ ᠪᠠᠢᠬᠤ ᠪᠤᠢ︖》 ᠭᠡᠬᠦ ᠳᠦ᠂ ᠰᠠᠦ᠋ᠯ ᠬᠠᠷᠢᠭᠤᠯᠤᠨ᠄ 《ᠪᠢ ᠰᠦᠷᠡᠬᠡᠢ ᠪᠠᠴᠢᠮᠳᠠᠵᠤ ᠪᠠᠢᠨᠠ᠃ ᠹᠢᠯᠢᠰᠲ᠋ᠴᠦᠳ ᠨᠠᠮᠠᠶᠢ ᠳᠠᠭᠠᠷᠢᠬᠤ ᠪᠠᠷ ᠢᠷᠡᠵᠦ ᠪᠠᠢᠬᠤ ᠳᠤ᠂ ᠪᠤᠷᠬᠠᠨ ᠨᠠᠳᠠ ᠠᠴᠠ ᠰᠠᠯᠤᠭᠰᠠᠨ ᠪᠥᠭᠡᠳ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢᠶᠠᠷ ᠴᠤ᠂ ᠵᠡᠭᠦᠳᠦ ᠪᠡᠷ ᠴᠤ ᠨᠠᠳᠠ ᠳᠤ ᠬᠠᠷᠢᠭᠤ ᠥᠭᠬᠦ ᠪᠡᠨ ᠪᠣᠯᠢᠭᠰᠠᠨ᠃ ᠲᠡᠢᠮᠦ ᠡᠴᠡ ᠪᠢ ᠶᠠᠭᠠᠬᠢᠬᠤ ᠶᠣᠰᠣᠲᠠᠢ ᠪᠠᠨ ᠮᠡᠳᠡᠬᠦ ᠶᠢᠨ ᠲᠤᠯᠠᠳᠠ ᠲᠠᠨ ᠢ ᠳᠠᠭᠤᠳᠠᠯᠠ》 ᠭᠡᠪᠡ᠃ 16 ᠰᠠᠮᠦ᠋ᠶᠧᠯ᠄ 《ᠶᠣᠬᠣᠸᠠ ᠲᠠᠨ ᠠᠴᠠ ᠰᠠᠯᠵᠤ᠂ ᠲᠠᠨ ᠤ ᠳᠠᠢᠰᠤᠨ ᠪᠣᠯᠣᠭᠰᠠᠨ ᠪᠠᠢᠲᠠᠯᠠ ᠲᠠ ᠶᠠᠭᠤᠨ ᠳᠤ ᠨᠠᠳᠠ ᠠᠴᠠ ᠠᠰᠠᠭᠤᠵᠤ ᠪᠠᠢᠨᠠ ᠪᠤᠢ︖ 17 ᠶᠣᠬᠣᠸᠠ ᠨᠠᠳᠠ ᠪᠠᠷ ᠳᠠᠮᠵᠢᠭᠤᠯᠤᠨ ᠠᠢᠯᠠᠳᠤᠭᠰᠠᠨ ᠶᠣᠰᠣᠭᠠᠷ ᠢᠶᠠᠨ ᠭᠦᠢᠴᠡᠳᠬᠡᠭᠰᠡᠨ ᠶᠤᠮ᠃ ᠶᠣᠬᠣᠸᠠ ᠲᠠᠨ ᠤ ᠭᠠᠷ ᠠᠴᠠ ᠬᠠᠭᠠᠨᠴᠢᠯᠠᠯ ᠢ ᠰᠠᠯᠭᠠᠨ ᠠᠪᠴᠤ᠂ ᠲᠠᠨ ᠤ ᠬᠥᠷᠰᠢ ᠳ᠋ᠠᠸᠢᠳ᠋ ᠲᠤ ᠥᠭᠭᠥᠭᠰᠡᠨ ᠶᠤᠮ᠃ 18 ᠲᠠ ᠶᠣᠬᠣᠸᠠ ᠶᠢᠨ ᠳᠠᠭᠤ ᠶᠢ ᠳᠠᠭᠠᠯ ᠦᠭᠡᠢ᠂ ᠲᠡᠭᠦᠨ ᠦ ᠰᠢᠷᠦᠭᠦᠨ ᠠᠭᠤᠷ ᠬᠢᠯᠢᠩ ᠤᠨ ᠳᠠᠭᠠᠤ ᠠᠮᠠᠯᠧᠺ ᠲᠤ ᠦᠢᠯᠡᠳᠦᠭᠡ ᠦᠭᠡᠢ ᠤᠴᠢᠷ ᠠᠴᠠ ᠶᠣᠬᠣᠸᠠ ᠥᠨᠥᠳᠥᠷ ᠲᠠᠨ ᠳᠤ ᠡᠭᠦᠨ ᠢ ᠦᠢᠯᠡᠳᠴᠡᠢ᠃ 19 ᠶᠣᠬᠣᠸᠠ ᠢᠰᠷᠧᠯ ᠢ ᠴᠤ ᠲᠠᠨ ᠲᠠᠢ ᠬᠠᠮᠲᠤ ᠹᠢᠯᠢᠰᠲ᠋ᠴᠦᠳ ᠦᠨ ᠭᠠᠷ ᠲᠤ ᠲᠤᠰᠢᠶᠠᠨᠠ᠃ ᠮᠠᠷᠭᠠᠰᠢ ᠲᠠ ᠪᠣᠯᠣᠨ ᠲᠠᠨ ᠤ ᠬᠥᠪᠡᠭᠦᠳ ᠨᠠᠳᠠ ᠲᠠᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠣᠨᠠ᠃ ᠶᠣᠬᠣᠸᠠ ᠢᠰᠷᠧᠯ ᠤᠨ ᠴᠡᠷᠢᠭ ᠤᠳ ᠢ ᠴᠤ ᠹᠢᠯᠢᠰᠲ᠋ᠴᠦᠳ ᠦᠨ ᠭᠠᠷ ᠲᠤ ᠲᠤᠰᠢᠶᠠᠨᠠ》 ᠭᠡᠵᠦ ᠬᠡᠯᠡᠪᠡ᠃
20 ᠲᠡᠭᠡᠵᠦ ᠬᠡᠯᠡᠮᠡᠭᠴᠡ ᠰᠠᠦ᠋ᠯ ᠭᠠᠵᠠᠷ ᠲᠤ ᠰᠤᠯᠳᠠᠢᠨ ᠤᠨᠠᠪᠠ᠃ ᠰᠠᠮᠦ᠋ᠶᠧᠯ ᠤᠨ ᠦᠭᠡ ᠲᠡᠭᠦᠨ ᠢ ᠶᠡᠬᠡᠳᠡ ᠠᠶᠤᠯᠭᠠᠭᠰᠠᠨ ᠠᠵᠢ᠃ ᠲᠡᠷᠡ ᠮᠥᠨ ᠡᠳᠦᠷᠵᠢᠨ ᠰᠥᠨᠢᠵᠢᠨ ᠬᠣᠭᠣᠯᠠ ᠤᠮᠳᠠ ᠠᠮᠰᠠᠭᠠ ᠦᠭᠡᠢ ᠪᠣᠯᠬᠣᠷ ᠬᠦᠴᠦ ᠲᠡᠩᠬᠡᠭᠡ ᠠᠯᠠᠭᠠ ᠪᠠᠢᠵᠠᠢ᠃ 21 ᠨᠥᠭᠥᠭᠡ ᠡᠮᠡ ᠰᠠᠦ᠋ᠯ ᠤᠷᠤᠭᠤ ᠢᠷᠡᠵᠦ᠂ ᠰᠠᠦ᠋ᠯ ᠤᠨ ᠶᠡᠬᠡᠳᠡ ᠮᠡᠩᠳᠡᠭᠦᠷᠡᠭᠰᠡᠨ ᠢ ᠬᠠᠷᠠᠭᠠᠳ᠂ ᠲᠡᠭᠦᠨ ᠳᠦ᠄ 《ᠰᠢᠪᠡᠭᠴᠢᠨ ᠴᠢᠨᠢ ᠡ᠊ᠨᠳᠡ ᠪᠠᠢᠨᠠ᠃ ᠪᠢ ᠲᠠᠨ ᠤ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠠᠮᠢ ᠪᠠᠨ ᠭᠠᠷ ᠲᠤ ᠴᠢᠨᠢ ᠲᠠᠯᠪᠢᠵᠤ᠂ ᠲᠠᠨ ᠤ ᠵᠠᠬᠢᠭᠰᠠᠨ ᠢ ᠳᠠᠭᠠᠭᠰᠠᠨ ᠰᠢᠦ᠃ 22 ᠲᠡᠢᠮᠦ ᠡᠴᠡ ᠲᠠ ᠣᠳᠣ ᠰᠢᠪᠡᠭᠴᠢᠨ ᠤ ᠪᠠᠨ ᠦᠭᠡ ᠶᠢ ᠴᠤ ᠰᠣᠨᠣᠰᠣᠭᠠᠷᠠᠢ᠃ ᠪᠢ ᠲᠠᠨ ᠤ ᠡᠮᠦᠨᠡ ᠵᠦᠰᠦᠮ ᠪᠣᠣᠪᠣ ᠲᠠᠯᠪᠢᠶᠠ᠃ ᠲᠠ ᠡᠭᠦᠨ ᠢ ᠢᠳᠡᠵᠦ ᠵᠠᠮ ᠬᠥᠭᠡᠭᠡᠬᠦ ᠳᠡᠭᠡᠨ ᠬᠦᠴᠦ ᠲᠠᠮᠢᠷ ᠠᠪᠤᠭᠠᠷᠠᠢ》 ᠭᠡᠪᠡ᠃ 23 ᠬᠠᠷᠢᠨ ᠰᠠᠦ᠋ᠯ᠄ 《ᠪᠢ ᠢᠳᠡᠬᠦ ᠦᠭᠡᠢ》 ᠭᠡᠳ ᠬᠦᠯᠢᠶᠡᠨ ᠠᠪᠬᠤ ᠦᠭᠡᠢ ᠪᠠᠢᠯᠠ᠃ ᠵᠠᠷᠤᠴᠠ ᠨᠠᠷ ᠨᠢ ᠴᠤ ᠨᠥᠭᠥᠭᠡ ᠡᠮᠡᠭᠲᠡᠢ ᠶᠢᠨ ᠬᠠᠮᠲᠤ ᠢᠳᠬᠠᠭᠠᠳ ᠪᠠᠢᠬᠤ ᠳᠤ᠂ ᠲᠡᠷᠡ ᠲᠡᠳᠡᠨ ᠦ ᠦᠭᠡ ᠪᠡᠷ ᠭᠠᠵᠠᠷ ᠠᠴᠠ ᠪᠣᠰᠴᠤ ᠢᠰᠠᠷᠢ ᠳᠡᠭᠡᠷᠡ ᠰᠠᠭᠤᠪᠠ᠃ 24 ᠲᠡᠷᠡ ᠡᠮᠡᠭᠲᠡᠢ ᠭᠡᠷ ᠦᠨ ᠢᠶᠠᠨ ᠲᠠᠷᠭᠤᠨ ᠲᠤᠭᠤᠯ ᠢ ᠳᠠᠷᠤᠢᠬᠠᠨ ᠨᠢᠳᠤᠯᠤᠭᠠᠳ᠂ ᠭᠤᠯᠢᠷ ᠵᠢᠭᠤᠷᠠᠨ ᠬᠥᠷᠥᠩᠭᠡ ᠦᠭᠡᠢ ᠪᠣᠣᠪᠣ ᠬᠢᠵᠦ᠂ 25 ᠰᠠᠦ᠋ᠯ ᠪᠣᠯᠣᠨ ᠲᠡᠭᠦᠨ ᠦ ᠵᠠᠷᠤᠴᠠ ᠨᠠᠷ ᠤᠨ ᠡᠮᠦᠨᠡ ᠲᠠᠯᠪᠢᠵᠠᠢ᠃ ᠲᠡᠳᠡ ᠢᠳᠡᠭᠡᠳ ᠬᠥᠳᠡᠯᠵᠦ᠂ ᠲᠡᠷᠡ ᠰᠥᠨᠢ ᠳᠡᠭᠡᠨ ᠶᠠᠪᠤᠯᠠ᠃