ᠨᠢᠭᠡᠳᠦᠭᠡᠷ ᠰᠠᠮᠦ᠋ᠶᠧᠯ ᠳᠥᠷᠪᠡ
ᠡᠵᠡᠨ ᠦ ᠠᠪᠳᠠᠷᠠ ᠪᠤᠯᠢᠶᠠᠭᠳᠠᠪᠠ
1 ᠲᠡᠭᠡᠬᠦ ᠳᠦ ᠹᠢᠯᠢᠰᠲ᠋ᠴᠦᠳ ᠴᠤᠭᠯᠠᠷᠠᠵᠤ ᠢᠰᠷᠧᠯ ᠤᠷᠤᠭᠤ ᠳᠠᠢᠨ ᠳᠡᠭᠳᠡᠭᠡᠭᠰᠡᠨ ᠳᠦ᠂ ᠢᠰᠷᠧᠯ ᠹᠢᠯᠢᠰᠲ᠋ᠴᠦᠳ ᠲᠡᠢ ᠲᠤᠯᠤᠯᠳᠤᠬᠤ ᠪᠠᠷ ᠭᠠᠷᠴᠠᠢ᠃ ᠲᠡᠳᠡ ᠡᠪᠧᠨᠧᠽᠧᠷ ᠤᠨ ᠳᠡᠷᠭᠡᠳᠡ ᠬᠤᠸᠠᠷᠠᠩᠨᠠᠵᠤ᠂ ᠹᠢᠯᠢᠰᠲ᠋ᠴᠦᠳ ᠠᠹᠧᠺ ᠲᠤ ᠬᠤᠸᠠᠷᠠᠩᠨᠠᠨ ᠪᠠᠭᠤᠪᠠ᠃ 2 ᠹᠢᠯᠢᠰᠲ᠋ᠴᠦᠳ ᠢᠰᠷᠧᠯᠴᠦᠳ ᠲᠡᠢ ᠤᠴᠠᠷᠠᠬᠤ ᠪᠠᠷ ᠵᠢᠭᠰᠠᠭᠠᠯ ᠵᠢᠭᠰᠠᠪᠠ᠃ ᠲᠤᠯᠤᠯᠳᠤᠭᠠᠨ ᠭᠠᠵᠠᠷ ᠠᠪᠬᠤ ᠳᠤ᠂ ᠢᠰᠷᠧᠯᠴᠦᠳ ᠹᠢᠯᠢᠰᠲ᠋ᠴᠦᠳ ᠲᠦ ᠴᠣᠬᠢᠭᠳᠠᠪᠠ᠃ ᠹᠢᠯᠢᠰᠲ᠋ᠴᠦᠳ ᠲᠤᠯᠤᠯᠳᠤᠭᠠᠨ ᠤ ᠲᠠᠯᠠᠪᠤᠷ ᠳᠡᠭᠡᠷᠡ ᠳᠥᠷᠪᠡᠨ ᠮᠢᠩ᠋ᠭᠠ ᠣᠷᠴᠢᠮ ᠬᠥᠮᠦᠨ ᠢ ᠬᠥᠨᠥᠭᠡᠪᠡ᠃ 3 ᠴᠡᠷᠢᠭ ᠬᠤᠸᠠᠷᠠᠨ ᠳᠤ ᠪᠤᠴᠠᠵᠤ ᠢᠷᠡᠬᠦ ᠳᠦ᠂ ᠢᠰᠷᠧᠯ ᠤᠨ ᠠᠬᠠᠮᠠᠳ ᠤᠳ᠄ 《ᠥᠨᠥᠳᠥᠷ ᠶᠣᠬᠣᠸᠠ ᠶᠠᠭᠠᠬᠢᠭᠠᠳ ᠪᠢᠳᠡᠨ ᠢ ᠹᠢᠯᠢᠰᠲ᠋ᠴᠦᠳ ᠦᠨ ᠡᠮᠦᠨᠡ ᠴᠣᠬᠢᠭᠰᠠᠨ ᠪᠤᠢ︖ ᠱᠢᠯᠣ᠋ ᠡᠴᠡ ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠥᠪᠡᠷᠰᠡᠳ ᠲᠡᠭᠡᠨ ᠠᠪᠴᠢᠷᠠᠶᠠ᠃ ᠲᠡᠷᠡ ᠠᠪᠳᠠᠷᠠ ᠪᠢᠳᠡᠨ ᠦ ᠳᠤᠮᠳᠠ ᠢᠷᠡᠴᠢᠬᠡᠪᠡᠯ ᠪᠢᠳᠡᠨ ᠢ ᠳᠠᠢᠰᠤᠨ ᠨᠤᠭᠤᠳ ᠤᠨ ᠰᠠᠪᠠᠷ ᠠᠴᠠ ᠠᠪᠤᠷᠠᠬᠤ ᠶᠤᠮ》 ᠭᠡᠵᠦ ᠬᠡᠯᠡᠵᠡᠢ᠃ 4 ᠲᠡᠢᠮᠦ ᠡᠴᠡ ᠠᠷᠠᠳ ᠣᠯᠠᠨ ᠱᠢᠯᠣ᠋ ᠤᠷᠤᠭᠤ ᠬᠥᠮᠦᠨ ᠢᠯᠡᠭᠡᠵᠦ᠂ ᠺᠧᠷᠣᠪ ᠤᠳ ᠤᠨ ᠬᠣᠭᠣᠷᠣᠨᠳᠣ ᠣᠷᠣᠰᠢᠭᠴᠢ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠲᠡᠨᠳᠡ ᠡᠴᠡ ᠠᠪᠴᠤ ᠢᠷᠡᠪᠡ᠃ ᠡᠯᠢ ᠶᠢᠨ ᠬᠣᠶᠠᠷ ᠬᠥᠪᠡᠭᠦᠨ ᠬᠣᠹᠨᠢ᠂ ᠹᠢᠨᠧᠬᠠᠰ ᠶᠠᠭ ᠲᠡᠷᠡ ᠭᠠᠵᠠᠷ ᠲᠤ ᠪᠤᠷᠬᠠᠨ ᠤ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢᠨ ᠳᠡᠷᠭᠡᠳᠡ ᠪᠠᠢᠵᠠᠢ᠃
5 ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠬᠤᠸᠠᠷᠠᠨ ᠳᠤ ᠣᠷᠣᠭᠤᠯᠵᠤ ᠢᠷᠡᠬᠦ ᠳᠦ᠂ ᠪᠦᠬᠦ ᠢᠰᠷᠧᠯ ᠭᠠᠵᠠᠷ ᠳᠣᠷᠭᠢᠭᠠᠨ ᠬᠦᠩᠭᠢᠨᠡᠭᠰᠡᠨ ᠶᠡᠬᠡ ᠳᠠᠭᠤ ᠪᠠᠷ ᠤᠤᠬᠠᠢᠯᠠᠨ ᠬᠠᠰᠬᠢᠷᠪᠠ᠃ 6 ᠹᠢᠯᠢᠰᠲ᠋ᠴᠦᠳ ᠲᠡᠷᠡ ᠤᠤᠬᠠᠢ ᠶᠢ ᠳᠤᠭᠤᠯᠤᠭᠠᠳ᠄ 《ᠢᠪᠷᠠᠢᠴᠤᠳ ᠤᠨ ᠬᠤᠸᠠᠷᠠᠨ ᠳᠤ ᠶᠠᠭᠤᠨ ᠰᠦᠷ ᠲᠡᠢ ᠤᠤᠬᠠᠢ ᠭᠠᠷᠬᠤ ᠨᠢ ᠡᠨᠡ ᠪᠤᠢ︖》 ᠭᠡᠯᠴᠡᠭᠰᠡᠨ ᠢᠶᠡᠨ ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢᠨ ᠬᠤᠸᠠᠷᠠᠨ ᠳᠤ ᠣᠷᠣᠭᠰᠠᠨ ᠢ ᠮᠡᠳᠡᠯᠡ᠃ 7 ᠹᠢᠯᠢᠰᠲ᠋ᠴᠦᠳ ᠠᠢᠳᠠᠰ ᠲᠤ ᠠᠪᠲᠠᠵᠤ᠄ 《ᠪᠤᠷᠬᠠᠨ ᠲᠡᠳᠡᠨ ᠦ ᠬᠤᠸᠠᠷᠠᠨ ᠳᠤ ᠵᠠᠯᠠᠷᠠᠨ ᠣᠷᠣᠭᠰᠠᠨ ᠪᠠᠢᠨᠠ》 ᠭᠡᠳ᠄ 《ᠭᠠᠢ ᠪᠣᠯᠣᠯᠠ︕ ᠤᠷᠢᠳᠤ ᠨᠢ ᠡᠢᠮᠦ ᠶᠠᠭᠤᠮᠠ ᠲᠣᠬᠢᠶᠠᠯᠳᠤᠵᠤ ᠪᠠᠢᠭᠠ ᠦᠭᠡᠢ᠃ 8 ᠭᠠᠢ ᠪᠣᠯᠣᠯᠠ︕ ᠬᠡᠨ ᠪᠢᠳᠡᠨ ᠢ ᠡᠨᠡ ᠠᠭᠤᠤ ᠬᠦᠴᠦᠲᠦ ᠪᠤᠷᠬᠠᠳ ᠤᠨ ᠭᠠᠷ ᠠᠴᠠ ᠮᠤᠯᠲᠤᠯᠤᠨ ᠠᠪᠤᠷᠠᠬᠤ ᠪᠤᠢ︖ ᠡᠳᠡᠭᠡᠷ ᠨᠢ ᠶᠧᠵᠢᠫᠲ᠋ᠴᠦᠳ ᠢ ᠡᠯᠳᠡᠪ ᠲᠥᠷᠥᠯ ᠦᠨ ᠭᠠᠮᠰᠢᠭ ᠢᠶᠠᠷ ᠴᠥᠯ ᠳᠤ ᠴᠣᠬᠢᠭᠰᠠᠨ ᠪᠤᠷᠬᠠᠳ ᠮᠥᠨ᠃ 9 ᠹᠢᠯᠢᠰᠲ᠋ᠴᠦᠳ ᠡ᠂ ᠡᠷᠡ ᠬᠥᠮᠦᠨ ᠰᠢᠭ ᠵᠣᠷᠢᠭᠲᠠᠢ ᠪᠠᠢ᠂ ᠦᠭᠡᠢ ᠪᠣᠯ ᠢᠪᠷᠠᠢᠴᠤᠳ ᠲᠠ ᠨᠠᠷ ᠤᠨ ᠪᠣᠭᠣᠯ ᠪᠠᠢᠭᠰᠠᠨ ᠤ ᠠᠳᠠᠯᠢ ᠲᠠ ᠨᠠᠷ ᠢᠪᠷᠠᠢᠴᠤᠳ ᠤᠨ ᠪᠣᠭᠣᠯ ᠪᠣᠯᠣᠨᠠ᠃ ᠡᠷᠡ ᠬᠥᠮᠦᠨ ᠰᠢᠭ ᠲᠤᠯᠤᠯᠳᠤᠭᠲᠤᠨ》 ᠭᠡᠯᠴᠡᠪᠡ᠃
10 ᠲᠡᠭᠡᠭᠡᠳ ᠹᠢᠯᠢᠰᠲ᠋ᠴᠦᠳ ᠲᠤᠯᠤᠯᠳᠤᠭᠰᠠᠨ ᠳᠤ᠂ ᠢᠰᠷᠧᠯ ᠴᠣᠬᠢᠭᠳᠠᠨ᠂ ᠬᠥᠮᠦᠨ ᠪᠦᠷᠢ ᠭᠡᠷ ᠤᠷᠤᠭᠤ ᠪᠠᠨ ᠵᠢᠭᠤᠲᠠᠵᠤ ᠬᠦᠨᠳᠦ ᠢᠯᠠᠭᠳᠠᠯ ᠳᠤ ᠤᠴᠠᠷᠠᠪᠠ᠃ ᠢᠰᠷᠧᠯ ᠡᠴᠡ ᠭᠤᠴᠢᠨ ᠮᠢᠩ᠋ᠭᠠᠨ ᠶᠠᠪᠠᠭᠠᠨ ᠴᠡᠷᠢᠭ ᠬᠥᠰᠡᠷ ᠤᠨᠠᠪᠠ᠃ 11 ᠪᠤᠷᠬᠠᠨ ᠤ ᠠᠪᠳᠠᠷᠠ ᠴᠤ ᠪᠤᠯᠢᠶᠠᠭᠳᠠᠵᠤ᠂ ᠡᠯᠢ ᠶᠢᠨ ᠬᠣᠶᠠᠷ ᠬᠥᠪᠡᠭᠦᠨ ᠬᠣᠹᠨᠢ᠂ ᠹᠢᠨᠧᠬᠠᠰ ᠠᠯᠠᠭᠳᠠᠪᠠ᠃
12 ᠨᠢᠭᠡᠨ ᠪᠢᠨᠶᠠᠮᠢᠨ ᠬᠥᠮᠦᠨ ᠲᠤᠯᠤᠯᠳᠤᠭᠠᠨ ᠤ ᠲᠠᠯᠠᠪᠠᠢ ᠠᠴᠠ ᠵᠢᠭᠤᠲᠠᠨ ᠭᠠᠷᠴᠤ ᠭᠦᠶᠦᠭᠰᠡᠭᠡᠷ ᠲᠡᠷᠡ ᠡᠳᠦᠷ ᠢᠶᠡᠨ ᠱᠢᠯᠣ᠋ ᠳᠤ ᠬᠦᠷᠪᠡ᠃ ᠬᠤᠪᠴᠠᠰᠤ ᠨᠢ ᠤᠷᠠᠭᠳᠠᠵᠤ᠂ ᠲᠣᠯᠣᠭᠠᠢ ᠨᠢ ᠰᠢᠷᠣᠢ ᠪᠣᠯᠵᠠᠢ᠃ 13 ᠲᠡᠷᠡ ᠢᠷᠡᠬᠦ ᠦᠶᠡ ᠳᠦ᠂ ᠡᠯᠢ ᠶᠠᠭ ᠵᠠᠮ ᠤᠨ ᠬᠠᠵᠠᠭᠤ ᠶᠢᠨ ᠰᠠᠨᠳᠠᠯᠢ ᠳᠡᠭᠡᠷᠡ ᠰᠠᠭᠤᠵᠤ ᠠᠩ᠋ᠬᠠᠷᠤᠨ ᠬᠠᠷᠠᠭᠤᠯᠳᠠᠭᠰᠠᠭᠠᠷ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢᠨ ᠲᠥᠯᠥᠭᠡ ᠵᠢᠷᠦᠬᠡ ᠨᠢ ᠲᠦᠭᠰᠢᠵᠦ ᠪᠠᠢᠯᠠ᠃ ᠥᠨᠥᠬᠢ ᠬᠥᠮᠦᠨ ᠬᠣᠲᠠ ᠤᠷᠤᠭᠤ ᠣᠷᠣᠵᠤ ᠮᠡᠳᠡᠭᠡ ᠶᠢ ᠳᠤᠭᠤᠯᠭᠠᠬᠤ ᠳᠤ᠂ ᠬᠣᠲᠠ ᠶᠢᠨ ᠬᠢᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠪᠠᠷᠬᠢᠷᠠᠨ ᠬᠠᠰᠬᠢᠷᠤᠯᠳᠤᠪᠠ᠃ 14 ᠡᠯᠢ ᠣᠷᠢᠯᠠᠬᠤ ᠳᠠᠭᠤ ᠶᠢ ᠰᠣᠨᠣᠰᠣᠭᠠᠳ᠄ 《ᠡᠨᠡ ᠶᠠᠭᠤᠨ ᠤ ᠳᠠᠭᠤ ᠱᠤᠤᠭᠢᠶᠠᠨ ᠪᠤᠢ︖》 ᠭᠡᠰᠡᠨ ᠳᠦ᠂ ᠥᠨᠥᠬᠢ ᠬᠥᠮᠦᠨ ᠶᠠᠭᠠᠷᠠᠪᠴᠢᠯᠠᠨ᠂ ᠡᠯᠢ ᠳᠤ ᠳᠤᠭᠤᠯᠭᠠᠪᠠ᠃ 15 ᠲᠡᠷᠡ ᠦᠶᠡ ᠳᠦ ᠡᠯᠢ ᠶᠡᠷᠡᠨ ᠨᠠᠢ᠌ᠮᠠᠨ ᠨᠠᠰᠤᠲᠠᠢ ᠪᠥᠭᠡᠳ ᠨᠢᠳᠦ ᠨᠢ ᠬᠠᠷᠠᠩ᠋ᠭᠤᠢᠯᠠᠨ᠂ ᠶᠠᠭᠤᠮᠠ ᠦᠵᠡᠬᠦ ᠪᠡᠨ ᠪᠣᠯᠢᠭᠰᠠᠨ ᠪᠠᠢᠪᠠ᠃ 16 ᠥᠨᠥᠬᠢ ᠬᠥᠮᠦᠨ ᠡᠯᠢ ᠳᠤ᠄ 《ᠪᠢ ᠲᠤᠯᠤᠯᠳᠤᠭᠠᠨ ᠠᠴᠠ ᠢᠷᠡᠭᠡᠳ ᠪᠠᠢᠭᠠ ᠨᠢᠭᠡᠨ ᠪᠠᠢᠨᠠ᠃ ᠪᠢ ᠥᠨᠥᠳᠥᠷ ᠲᠤᠯᠤᠯᠳᠤᠭᠠᠨ ᠤ ᠲᠠᠯᠠᠪᠤᠷ ᠠᠴᠠ ᠵᠢᠭᠤᠲᠠᠵᠤ ᠢᠷᠡᠯᠡ》 ᠭᠡᠰᠡᠨ ᠳᠦ᠂ ᠡᠯᠢ᠄ 《ᠶᠠᠭᠤ ᠪᠣᠯᠣᠭᠰᠠᠨ ᠪᠤᠢ︖ ᠬᠦᠦ ᠮᠢᠨᠢ》 ᠭᠡᠵᠦ ᠠᠰᠠᠭᠤᠪᠠ᠃ 17 ᠲᠡᠭᠡᠬᠦ ᠳᠦ ᠮᠡᠳᠡᠭᠡ ᠬᠦᠷᠭᠡᠭᠰᠡᠨ ᠬᠥᠮᠦᠨ᠄ 《ᠢᠰᠷᠧᠯ ᠹᠢᠯᠢᠰᠲ᠋ᠴᠦᠳ ᠡᠴᠡ ᠵᠢᠭᠤᠲᠠᠵᠤ᠂ ᠠᠷᠠᠳ ᠣᠯᠠᠨ ᠶᠡᠬᠡ ᠬᠢᠳᠤᠯᠭᠠ ᠳᠤ ᠤᠴᠠᠷᠠᠪᠠ᠃ ᠲᠠᠨ ᠤ ᠬᠣᠶᠠᠷ ᠬᠦᠦ ᠬᠣᠹᠨᠢ᠂ ᠹᠢᠨᠧᠬᠠᠰ ᠠᠯᠠᠭᠳᠠᠵᠤ᠂ ᠪᠤᠷᠬᠠᠨ ᠤ ᠠᠪᠳᠠᠷᠠ ᠪᠤᠯᠢᠶᠠᠭᠳᠠᠪᠠ》 ᠭᠡᠵᠦ ᠬᠠᠷᠢᠭᠤᠯᠤᠯᠠ᠃ 18 ᠲᠡᠭᠦᠨ ᠢ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢᠨ ᠲᠤᠬᠠᠢ ᠳᠤᠷᠠᠳᠤᠲᠠᠯᠠ ᠡᠯᠢ ᠰᠠᠨᠳᠠᠯᠢ ᠳᠡᠭᠡᠷᠡ ᠡᠴᠡ ᠪᠡᠨ ᠭᠡᠳᠡᠷᠭᠦ ᠪᠡᠨ ᠤᠨᠠᠨ᠂ ᠬᠦᠵᠦᠭᠦᠦ ᠪᠡᠨ ᠬᠤᠭᠤᠯᠵᠤ ᠬᠠᠭᠠᠯᠭᠠᠨ ᠤ ᠬᠠᠵᠠᠭᠤ ᠳᠤ ᠠᠮᠢᠰᠬᠤᠯ ᠬᠤᠷᠢᠶᠠᠪᠠ᠃ ᠤᠴᠢᠷ ᠨᠢ ᠲᠡᠷᠡ ᠨᠠᠰᠤᠲᠠᠢ᠂ ᠪᠡᠶᠡ ᠨᠢ ᠬᠦᠨᠳᠦ ᠪᠣᠯᠣᠭᠰᠠᠨ ᠠᠵᠢ᠃ ᠲᠡᠷᠡ ᠳᠥᠴᠢᠨ ᠵᠢᠯ ᠢᠰᠷᠧᠯ ᠢ ᠰᠢᠭᠦᠵᠡᠢ᠃
19 ᠲᠡᠭᠦᠨ ᠦ ᠪᠡᠷᠢ᠂ ᠹᠢᠨᠧᠬᠠᠰ ᠤᠨ ᠡᠬᠡᠨᠡᠷ ᠨᠢ ᠬᠥᠯ ᠬᠦᠨᠳᠦ᠂ ᠬᠥᠩᠭᠡᠵᠢᠬᠦ ᠳᠥᠭᠥᠭᠰᠡᠨ ᠪᠠᠢᠯᠠ᠃ ᠪᠤᠷᠬᠠᠨ ᠤ ᠠᠪᠳᠠᠷᠠ ᠪᠤᠯᠢᠶᠠᠭᠳᠠᠵᠤ᠂ ᠬᠠᠳᠠᠮ ᠡᠴᠢᠭᠡ ᠪᠣᠯᠣᠨ ᠨᠥᠬᠥᠷ ᠨᠢ ᠦᠬᠦᠭᠰᠡᠨ ᠲᠤᠬᠠᠢ ᠮᠡᠳᠡᠭᠡ ᠶᠢ ᠲᠡᠷᠡ ᠰᠣᠨᠣᠰᠣᠭᠠᠳ ᠭᠡᠨᠡᠳᠲᠡ ᠡᠪᠡᠳᠦᠯᠲᠡ ᠨᠢ ᠡᠬᠢᠯᠡᠵᠦ ᠰᠥᠬᠥᠷᠡᠵᠦ ᠰᠠᠭᠤᠨ᠂ ᠬᠡᠦᠬᠡᠳ ᠢᠶᠡᠨ ᠲᠥᠷᠥᠭᠦᠯᠪᠡ᠃ 20 ᠲᠡᠷᠡ ᠡᠮᠡᠭᠲᠡᠢ ᠦᠬᠦᠯ ᠦᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠬᠡᠪᠲᠡᠵᠦ ᠪᠠᠢᠬᠤ ᠳᠤ᠂ ᠬᠠᠵᠠᠭᠤ ᠳᠤᠨᠢ ᠡᠮᠡᠭᠲᠡᠢᠴᠦᠳ᠄ 《ᠪᠦᠦ ᠠᠶᠤ᠂ ᠴᠢ ᠬᠥᠪᠡᠭᠦᠨ ᠲᠥᠷᠥᠭᠦᠯᠦᠭᠰᠡᠨ》 ᠭᠡᠵᠦ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ ᠲᠡᠷᠡ ᠬᠠᠷᠢᠭᠤᠯᠤᠭᠰᠠᠨ ᠦᠭᠡᠢ᠂ ᠬᠠᠢᠬᠤᠷᠤᠭᠰᠠᠨ ᠴᠤ ᠦᠭᠡᠢ᠂ 21 ᠬᠠᠷᠢᠨ 《ᠠᠯᠳᠠᠷ ᠨᠢ ᠢᠰᠷᠧᠯ ᠡᠴᠡ ᠰᠠᠯᠵᠤ ᠣᠳᠪᠠ》 ᠭᠡᠳ ᠬᠥᠪᠡᠭᠦᠨ ᠢᠶᠡᠨ ᠢᠺᠠᠪᠣᠳ᠋ ᠭᠡᠵᠦ ᠨᠡᠷᠡᠯᠡᠪᠡ᠃ ᠡᠨᠡ ᠨᠢ ᠪᠤᠷᠬᠠᠨ ᠤ ᠠᠪᠳᠠᠷᠠ ᠪᠤᠯᠢᠶᠠᠭᠳᠠᠵᠤ᠂ ᠬᠠᠳᠠᠮ ᠡᠴᠢᠭᠡ ᠬᠢᠭᠡᠳ ᠨᠥᠬᠥᠷ ᠨᠢ ᠨᠠᠰᠤ ᠪᠠᠷᠠᠭᠰᠠᠨ ᠤ ᠤᠴᠢᠷ ᠠᠵᠢ᠃ 22 ᠲᠡᠷᠡ ᠡᠮᠡᠭᠲᠡᠢ᠄ 《ᠪᠤᠷᠬᠠᠨ ᠤ ᠠᠪᠳᠠᠷᠠ ᠪᠤᠯᠢᠶᠠᠭᠳᠠᠭᠰᠠᠨ ᠠᠴᠠ ᠪᠣᠯᠵᠤ᠂ ᠠᠯᠳᠠᠷ ᠨᠢ ᠢᠰᠷᠧᠯ ᠡᠴᠡ ᠰᠠᠯᠵᠤ ᠣᠳᠪᠠ》 ᠭᠡᠵᠦ ᠬᠡᠯᠡᠵᠡᠢ᠃