ᠨᠢᠭᠡᠳᠦᠭᠡᠷ ᠰᠠᠮᠦ᠋ᠶᠧᠯ ᠭᠤᠴᠢ
ᠳ᠋ᠠᠸᠢᠳ᠋ ᠠᠮᠠᠯᠧᠺᠴᠤᠳ ᠢ ᠤᠰᠠᠳᠬᠠᠪᠠ
1 ᠬᠣᠶᠠᠷ ᠬᠣᠨᠣᠭ ᠤᠨ ᠳᠠᠷᠠᠭᠠ ᠳ᠋ᠠᠸᠢᠳ᠋ ᠪᠣᠯᠣᠨ ᠲᠡᠭᠦᠨ ᠦ ᠬᠥᠮᠦᠰ ᠽᠢᠺᠯᠠᠭ ᠲᠤ ᠪᠤᠴᠠᠵᠤ ᠢᠷᠡᠭᠡᠳ ᠦᠵᠡᠬᠦ ᠳᠦ᠂ ᠠᠮᠠᠯᠧᠺᠴᠤᠳ ᠡᠮᠦᠨᠡᠲᠦ ᠪᠦᠰᠡ ᠪᠣᠯᠣᠨ ᠽᠢᠺᠯᠠᠭ ᠤᠷᠤᠭᠤ ᠳᠣᠪᠲᠣᠯᠣᠨ ᠽᠢᠺᠯᠠᠭ ᠢ ᠴᠣᠬᠢᠵᠤ᠂ ᠭᠠᠯᠳᠠᠨ ᠰᠢᠲᠠᠭᠠᠭᠰᠠᠨ ᠪᠠᠢᠵᠠᠢ᠃ 2 ᠲᠡᠳᠡ ᠡᠮᠡᠭᠲᠡᠢᠴᠦᠳ ᠪᠣᠯᠣᠨ ᠲᠡᠨᠳᠡ ᠪᠠᠢᠭᠠ ᠪᠦᠬᠦ ᠬᠥᠮᠦᠨ ᠢ ᠶᠡᠬᠡ ᠪᠠᠭᠠ ᠭᠡᠵᠦ ᠢᠯᠭᠠᠯ ᠦᠭᠡᠢ ᠨᠢᠭᠡ ᠶᠢ ᠨᠢ ᠴᠤ ᠠᠯᠠᠯ ᠦᠭᠡᠢ ᠪᠠᠷ ᠣᠯᠵᠠᠯᠠᠨ ᠠᠪᠴᠤ᠂ ᠵᠠᠮ ᠳᠠᠭᠠᠨ ᠭᠠᠷᠴᠠᠢ᠃ 3 ᠳ᠋ᠠᠸᠢᠳ᠋ ᠪᠣᠯᠣᠨ ᠲᠡᠭᠦᠨ ᠦ ᠬᠥᠮᠦᠰ ᠬᠣᠲᠠ ᠳᠤ ᠢᠷᠡᠭᠡᠳ ᠦᠵᠡᠬᠦ ᠳᠦ᠂ ᠬᠣᠲᠠ ᠨᠢ ᠰᠢᠲᠠᠵᠤ᠂ ᠡᠬᠡᠨᠡᠷ ᠤᠳ᠂ ᠬᠥᠪᠡᠭᠦᠳ ᠥᠬᠢᠳ ᠨᠢ ᠣᠯᠵᠠᠯᠠᠭᠳᠠᠭᠰᠠᠨ ᠪᠠᠢᠵᠠᠢ᠃ 4 ᠲᠡᠭᠡᠭᠡᠳ ᠳ᠋ᠠᠸᠢᠳ᠋ ᠪᠣᠯᠣᠨ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠭᠠ ᠬᠥᠮᠦᠰ ᠡᠭᠡᠭ ᠳᠠᠭᠤ ᠲᠠᠯᠪᠢᠨ᠂ ᠤᠬᠢᠯᠠᠬᠤ ᠴᠤ ᠲᠡᠩᠬᠡᠭᠡ ᠦᠭᠡᠢ ᠪᠣᠯᠲᠠᠯᠠ ᠪᠠᠨ ᠴᠤᠷᠬᠢᠷᠠᠨ ᠤᠬᠢᠯᠠᠪᠠ᠃ 5 ᠳ᠋ᠠᠸᠢᠳ᠋ ᠤᠨ ᠬᠣᠶᠠᠷ ᠡᠬᠡᠨᠡᠷ᠂ ᠲᠤᠬᠠᠢᠯᠠᠪᠠᠯ ᠶᠧᠽᠷᠧᠯ ᠡᠮᠡᠭᠲᠡᠢ ᠠᠾᠢᠨᠣᠶᠠᠮ ᠪᠣᠯᠣᠨ ᠨᠠᠪᠠᠯ ᠤᠨ ᠡᠬᠡᠨᠡᠷ ᠪᠠᠢᠭᠰᠠᠨ ᠺᠠᠷᠮᠧᠯ ᠡᠮᠡᠭᠲᠡᠢ ᠠᠪᠢᠭᠠᠢᠯ ᠴᠤ ᠣᠯᠵᠠᠯᠠᠭᠳᠠᠨ ᠶᠠᠪᠤᠭᠰᠠᠨ ᠪᠠᠢᠪᠠ᠃ 6 ᠬᠥᠮᠦᠨ ᠪᠣᠯᠭᠠᠨ ᠬᠥᠪᠡᠭᠦᠳ ᠥᠬᠢᠳ ᠢᠶᠠᠨ ᠠᠯᠳᠠᠭᠠᠳ ᠰᠡᠳᠬᠢᠯ ᠭᠠᠰᠢᠭᠤᠳᠠᠵᠤ ᠪᠠᠢᠯᠠ᠃ ᠠᠷᠠᠳ ᠣᠯᠠᠨ ᠳ᠋ᠠᠸᠢᠳ᠋ ᠤᠷᠤᠭᠤ ᠴᠢᠯᠠᠭᠤ ᠰᠢᠳᠡᠬᠦ ᠪᠡᠷ ᠶᠠᠷᠢᠯᠴᠠᠵᠤ ᠪᠠᠢᠭᠰᠠᠨ ᠤᠴᠢᠷ ᠲᠤ ᠳ᠋ᠠᠸᠢᠳ᠋ ᠶᠡᠬᠡᠳᠡ ᠵᠣᠪᠠᠭᠰᠠᠨ ᠪᠣᠯᠪᠠᠴᠤ ᠶᠣᠬᠣᠸᠠ ᠪᠤᠷᠬᠠᠨ ᠠᠴᠠ ᠪᠠᠨ ᠬᠦᠴᠦ ᠠᠪᠤᠪᠠ᠃
7 ᠳ᠋ᠠᠸᠢᠳ᠋ ᠠᠾᠢᠮᠧᠯᠧᠺ ᠤᠨ ᠬᠥᠪᠡᠭᠦᠨ ᠲᠠᠬᠢᠯᠴᠢ ᠠᠪᠢᠶᠠᠲ᠋ᠠᠷ ᠲᠤ᠄ 《ᠡᠹᠣᠳ ᠢ ᠠᠪᠤᠭᠠᠳ ᠢᠷᠡ》 ᠭᠡᠰᠡᠨ ᠳᠦ᠂ ᠠᠪᠢᠶᠠᠲ᠋ᠠᠷ ᠳ᠋ᠠᠸᠢᠳ᠋ ᠲᠤ ᠡᠹᠣᠳ ᠢ ᠠᠪᠴᠢᠷᠠᠵᠠᠢ᠃ 8 ᠳ᠋ᠠᠸᠢᠳ᠋ ᠶᠣᠬᠣᠸᠠ ᠠᠴᠠ᠄ 《ᠡᠳᠡᠭᠡᠷ ᠳᠡᠭᠡᠷᠡᠮᠴᠢᠨ ᠢ ᠮᠥᠷᠳᠡᠬᠦ ᠤᠤ︖ ᠲᠡᠳᠡᠨ ᠢ ᠬᠥᠭᠡᠭᠡᠵᠦ ᠭᠦᠢᠴᠡᠬᠦ ᠤᠤ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠶᠣᠬᠣᠸᠠ᠄ 《ᠮᠥᠷᠳᠡᠭᠲᠦᠨ᠂ ᠲᠡᠳᠡᠨ ᠢ ᠦᠨᠡᠬᠡᠷ ᠬᠥᠭᠡᠭᠡᠵᠦ ᠭᠦᠢᠴᠡᠨᠡ᠂ ᠦᠨᠡᠬᠡᠷ ᠪᠤᠴᠠᠭᠠᠵᠤ ᠠᠪᠬᠤ ᠪᠣᠯᠣᠨᠠ》 ᠭᠡᠵᠡᠢ᠃ 9 ᠡᠢᠨ ᠬᠦ ᠳ᠋ᠠᠸᠢᠳ᠋ ᠵᠢᠷᠭᠤᠭᠠᠨ ᠵᠠᠭᠤᠨ ᠬᠥᠮᠦᠨ ᠲᠡᠢ ᠪᠡᠨ ᠬᠠᠮᠲᠤ ᠶᠠᠪᠤᠪᠠ᠃ ᠲᠡᠳᠡ ᠪᠧᠰᠣᠷ ᠭᠣᠷᠣᠬᠠᠨ ᠳᠤ ᠬᠦᠷᠴᠦ ᠢᠷᠡᠬᠦ ᠳᠦ᠂ ᠵᠠᠷᠢᠮ ᠨᠢ ᠲᠡᠨᠳᠡ ᠦᠯᠡᠳᠡᠪᠡ᠃ 10 ᠪᠧᠰᠣᠷ ᠭᠣᠷᠣᠬᠠ ᠶᠢ ᠭᠠᠲᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠲᠠᠯᠠ ᠪᠠᠨ ᠲᠤᠢᠯᠳᠠᠭᠰᠠᠨ ᠬᠣᠶᠠᠷ ᠵᠠᠭᠤᠨ ᠬᠥᠮᠦᠨ ᠲᠡᠨᠳᠡ ᠪᠡᠨ ᠦᠯᠡᠳᠡᠵᠦ᠂ ᠳ᠋ᠠᠸᠢᠳ᠋ ᠪᠣᠯᠣᠨ ᠳᠥᠷᠪᠡᠨ ᠵᠠᠭᠤ ᠬᠥᠮᠦᠨ ᠨᠢ ᠴᠢᠨᠠᠭᠰᠢ ᠮᠥᠷᠳᠡᠨ ᠬᠥᠭᠡᠭᠡᠪᠡ᠃
11 ᠲᠡᠳᠡ ᠬᠡᠭᠡᠷᠡ ᠡᠴᠡ ᠨᠢᠭᠡᠨ ᠶᠧᠵᠢᠫᠲ ᠬᠥᠮᠦᠨ ᠢ ᠣᠯᠣᠭᠠᠳ ᠳ᠋ᠠᠸᠢᠳ᠋ ᠤᠷᠤᠭᠤ ᠠᠪᠴᠢᠷᠠᠵᠠᠢ᠃ ᠬᠥᠮᠦᠰ ᠲᠡᠭᠦᠨ ᠳᠦ ᠪᠣᠣᠪᠣ ᠢᠳᠡᠭᠦᠯᠵᠦ᠂ ᠤᠰᠤ ᠤᠤᠭᠤᠯᠭᠠᠵᠠᠢ᠃ 12 ᠪᠠᠰᠠ ᠬᠡᠰᠡᠭ ᠬᠠᠲᠠᠭᠠᠭᠰᠠᠨ ᠢᠨᠵᠢᠷ᠂ ᠬᠣᠶᠠᠷ ᠪᠣᠭᠣᠳᠠᠯ ᠦᠵᠦᠮ ᠥᠭᠭᠥᠭᠰᠡᠨ ᠳᠦ᠂ ᠲᠡᠷᠡ ᠢᠳᠡᠯᠡ᠃ ᠲᠡᠭᠡᠭᠡᠳ ᠲᠡᠩᠬᠡᠭᠡ ᠣᠷᠣᠵᠠᠢ᠃ ᠲᠡᠷᠡ ᠭᠤᠷᠪᠠᠨ ᠡᠳᠦᠷ ᠭᠤᠷᠪᠠᠨ ᠰᠥᠨᠢ ᠬᠣᠭᠣᠯᠠ ᠢᠳᠡᠭᠡ ᠦᠭᠡᠢ᠂ ᠤᠰᠤ ᠤᠤᠭᠤᠭᠠ ᠦᠭᠡᠢ ᠪᠠᠢᠭᠰᠠᠨ ᠠᠵᠢ᠃ 13 ᠳ᠋ᠠᠸᠢᠳ᠋ ᠲᠡᠭᠦᠨ ᠡᠴᠡ᠄ 《ᠴᠢ ᠬᠡᠨ ᠦ ᠬᠠᠷᠢᠶᠠᠲᠤ ᠪᠤᠢ︖ ᠴᠢ ᠬᠠᠮᠢᠭᠠ ᠠᠴᠠ ᠢᠷᠡᠭᠰᠡᠨ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠲᠡᠷᠡ᠄ 《ᠪᠢ ᠶᠧᠵᠢᠫᠲ ᠬᠥᠮᠦᠨ᠂ ᠠᠮᠠᠯᠧᠺ ᠬᠥᠮᠦᠨ ᠦ ᠪᠣᠭᠣᠯ ᠪᠠᠢᠭᠰᠠᠨ᠃ ᠪᠢ ᠭᠤᠷᠪᠠᠨ ᠬᠣᠨᠣᠭ ᠤᠨ ᠡᠮᠦᠨᠡ ᠡᠪᠡᠳᠴᠢᠯᠡᠬᠦ ᠳᠦ᠂ ᠡᠵᠡᠨ ᠮᠠᠨᠢ ᠨᠠᠮᠠᠶᠢ ᠣᠷᠬᠢᠭᠠᠳ ᠶᠠᠪᠤᠭᠰᠠᠨ ᠶᠤᠮ᠃ 14 ᠪᠢᠳᠡ ᠺᠧᠷᠧᠲ᠋ᠴᠦᠳ ᠦᠨ ᠡᠮᠦᠨᠡᠲᠦ ᠪᠦᠰᠡ᠂ ᠶᠦᠳᠠ ᠶᠢᠨ ᠨᠤᠲᠤᠭ ᠳᠡᠪᠢᠰᠬᠡᠷ ᠪᠣᠯᠣᠨ ᠺᠠᠯᠧᠪ ᠤᠨ ᠡᠮᠦᠨᠡᠲᠦ ᠪᠦᠰᠡ ᠤᠷᠤᠭᠤ ᠳᠣᠪᠲᠣᠯᠵᠤ᠂ ᠽᠢᠺᠯᠠᠭ ᠢ ᠭᠠᠯᠳᠠᠨ ᠰᠢᠲᠠᠭᠠᠭᠰᠠᠨ ᠶᠤᠮ》 ᠭᠡᠵᠦ ᠬᠡᠯᠡᠪᠡ᠃ 15 ᠳ᠋ᠠᠸᠢᠳ᠋ ᠲᠡᠭᠦᠨ ᠳᠦ᠄ 《ᠲᠡᠳᠡᠭᠡᠷ ᠳᠡᠭᠡᠷᠡᠮᠴᠢᠨ ᠤᠷᠤᠭᠤ ᠭᠠᠵᠠᠷᠴᠢᠯᠠᠵᠤ ᠥᠭᠬᠦ ᠦᠭᠡᠢ ᠤᠤ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 《ᠨᠠᠮᠠᠶᠢ ᠠᠯᠠᠬᠤ ᠦᠭᠡᠢ᠂ ᠪᠠᠰᠠ ᠮᠢᠨᠦ ᠡᠵᠡᠨ ᠦ ᠭᠠᠷ ᠲᠤ ᠥᠭᠬᠦ ᠦᠭᠡᠢ ᠭᠡᠳᠡᠭ ᠢᠶᠡᠨ ᠪᠤᠷᠬᠠᠨ ᠤ ᠨᠡᠷᠡ ᠪᠡᠷ ᠨᠠᠳᠠ ᠳᠤ ᠲᠠᠩ᠋ᠭᠠᠷᠢᠭᠯᠠᠪᠠᠯ᠂ ᠪᠢ ᠲᠠᠨ ᠢ ᠲᠡᠳᠡᠭᠡᠷ ᠳᠡᠭᠡᠷᠡᠮᠴᠢᠨ ᠤᠷᠤᠭᠤ ᠠᠪᠠᠴᠢᠵᠤ ᠥᠭᠭᠥᠶᠡ》 ᠭᠡᠯᠡ᠃
16 ᠲᠡᠷᠡ ᠳ᠋ᠠᠸᠢᠳ᠋ ᠢ ᠳᠠᠭᠠᠭᠤᠯᠵᠤ ᠬᠦᠷᠪᠡ᠃ ᠬᠠᠷᠠ᠂ ᠠᠮᠠᠯᠧᠺᠴᠤᠳ ᠭᠠᠵᠠᠷ ᠰᠠᠢ ᠦᠭᠡᠢ ᠲᠠᠷᠬᠠᠭᠠᠳ ᠪᠠᠢᠯᠠ︕ ᠲᠡᠳᠡ ᠹᠢᠯᠢᠰᠲ᠋ᠴᠦᠳ ᠪᠣᠯᠣᠨ ᠶᠦᠳᠠ ᠶᠢᠨ ᠨᠤᠲᠤᠭ ᠠᠴᠠ ᠠᠪᠴᠢᠷᠠᠭᠰᠠᠨ ᠶᠠᠩᠵᠤ ᠪᠦᠷᠢ ᠶᠢᠨ ᠡᠯᠪᠡᠭ ᠣᠯᠵᠠ ᠪᠠᠨ ᠢᠳᠡᠵᠦ ᠤᠤᠭᠤᠨ᠂ ᠨᠠᠢᠷᠯᠠᠵᠤ ᠪᠠᠢᠯᠠ᠃ 17 ᠳ᠋ᠠᠸᠢᠳ᠋ ᠰᠥᠨᠢ ᠡᠴᠡ ᠠᠪᠤᠭᠠᠳ ᠳᠠᠷᠠᠭᠠ ᠡᠳᠦᠷ ᠦᠨ ᠬᠢᠨᠢ ᠣᠷᠣᠢ ᠪᠣᠯᠲᠠᠯᠠ ᠲᠡᠳᠡᠨ ᠢ ᠴᠣᠬᠢᠭᠰᠠᠨ ᠳᠤ᠂ ᠲᠡᠮᠡᠭᠡ ᠤᠨᠤᠵᠤ ᠵᠢᠭᠤᠲᠠᠭᠰᠠᠨ ᠳᠥᠷᠪᠡᠨ ᠵᠠᠭᠤᠨ ᠵᠠᠯᠠᠭᠤ ᠠᠴᠠ ᠥᠭᠡᠷᠡ ᠮᠤᠯᠲᠤᠷᠠᠵᠤ ᠴᠢᠳᠠᠭᠰᠠᠨ ᠬᠥᠮᠦᠨ ᠨᠢᠭᠡ ᠴᠤ ᠦᠭᠡᠢ᠃ 18 ᠡᠢᠨ ᠬᠦ ᠳ᠋ᠠᠸᠢᠳ᠋ ᠠᠮᠠᠯᠧᠺᠴᠤᠳ ᠲᠤ ᠪᠤᠯᠢᠶᠠᠭᠳᠠᠭᠰᠠᠨ ᠪᠦᠬᠦᠨ ᠢᠶᠡᠨ ᠡᠷᠭᠢᠭᠦᠯᠦᠨ ᠠᠪᠴᠠᠢ᠃ ᠠᠯᠳᠠᠭᠰᠠᠨ ᠬᠣᠶᠠᠷ ᠡᠬᠡᠨᠡᠷ ᠢᠶᠡᠨ ᠴᠤ ᠡᠷᠭᠢᠭᠦᠯᠦᠨ ᠠᠪᠤᠪᠠ᠃ 19 ᠶᠠᠭᠤ ᠴᠤ ᠳᠤᠲᠠᠭᠠ ᠦᠭᠡᠢ᠃ ᠳ᠋ᠠᠸᠢᠳ᠋ ᠬᠥᠭᠰᠢᠨ ᠵᠠᠯᠠᠭᠤ᠂ ᠬᠥᠪᠡᠭᠦᠳ ᠥᠬᠢᠳ᠂ ᠣᠯᠵᠠᠯᠠᠭᠰᠠᠨ ᠵᠦᠢᠯᠡᠰ᠂ ᠪᠤᠯᠢᠶᠠᠭᠳᠠᠭᠰᠠᠨ ᠵᠦᠢᠯᠡᠰ ᠢᠶᠡᠨ ᠪᠦᠭᠦᠳᠡ ᠶᠢ ᠪᠤᠴᠠᠭᠠᠨ ᠠᠪᠤᠪᠠ᠃ 20 ᠳ᠋ᠠᠸᠢᠳ᠋ ᠪᠠᠰᠠ ᠲᠡᠳᠡᠨ ᠦ ᠦᠬᠡᠷ ᠬᠣᠨᠢ ᠶᠢ ᠪᠦᠭᠦᠳᠡ ᠶᠢ ᠨᠢ ᠣᠯᠵᠠᠯᠠᠨ ᠠᠪᠤᠭᠰᠠᠨ ᠪᠥᠭᠡᠳ ᠬᠥᠮᠦᠰ ᠡᠳᠡᠭᠡᠷ ᠢ ᠰᠦᠷᠦᠭ ᠦᠨ ᠢᠶᠠᠨ ᠡᠬᠢᠨ ᠳᠤ ᠲᠠᠭᠤᠵᠤ᠄ 《ᠡᠨᠡ ᠪᠣᠯ ᠳ᠋ᠠᠸᠢᠳ᠋ ᠤᠨ ᠣᠯᠵᠠ︕》 ᠭᠡᠵᠦ ᠬᠠᠰᠬᠢᠷᠤᠯᠳᠤᠵᠤ ᠪᠠᠢᠯᠠ᠃
21 ᠳ᠋ᠠᠸᠢᠳ᠋ ᠪᠧᠰᠣᠷ ᠭᠣᠷᠣᠬᠠᠨ ᠳᠤ ᠬᠦᠷᠴᠦ ᠢᠷᠡᠬᠦ ᠳᠦ᠂ ᠶᠠᠳᠠᠷᠠᠵᠤ ᠲᠤᠢᠯᠳᠠᠨ ᠳᠠᠭᠠᠵᠤ ᠳᠡᠢᠯᠬᠦ ᠦᠭᠡᠢ ᠲᠡᠨᠳᠡ ᠪᠡᠨ ᠦᠯᠡᠳᠡᠭᠰᠡᠨ ᠬᠣᠶᠠᠷ ᠵᠠᠭᠤᠨ ᠬᠥᠮᠦᠨ ᠳ᠋ᠠᠸᠢᠳ᠋ ᠪᠣᠯᠣᠨ ᠲᠡᠭᠦᠨ ᠦ ᠬᠥᠮᠦᠰ ᠢ ᠤᠭᠲᠤᠬᠤ ᠪᠠᠷ ᠭᠠᠷᠴᠤ ᠢᠷᠡᠪᠡ᠃ ᠳ᠋ᠠᠸᠢᠳ᠋ ᠲᠡᠷᠡ ᠬᠥᠮᠦᠰ ᠲᠦ ᠣᠢᠷᠠᠲᠤᠨ ᠣᠴᠢᠵᠤ᠂ ᠮᠡᠨᠳᠦᠴᠢᠯᠡᠪᠡ᠃ 22 ᠬᠠᠷᠢᠨ ᠳ᠋ᠠᠸᠢᠳ᠋ ᠲᠠᠢ ᠬᠠᠮᠲᠤ ᠶᠠᠪᠤᠭᠠ ᠬᠥᠮᠦᠰ ᠦᠨ ᠳᠣᠲᠣᠷᠠᠬᠢ ᠮᠠᠭᠤ᠂ ᠪᠦᠲᠦᠯ ᠦᠭᠡᠢ ᠬᠥᠮᠦᠰ ᠠᠮᠠ ᠠᠮᠠᠨ ᠳᠠᠭᠠᠨ᠄ 《ᠲᠡᠳᠡ ᠪᠢᠳᠡᠨ ᠲᠡᠢ ᠬᠠᠮᠲᠤ ᠶᠠᠪᠤᠭᠠ ᠦᠭᠡᠢ ᠪᠣᠯᠬᠣᠷ ᠪᠢᠳᠡ ᠪᠤᠴᠠᠭᠠᠵᠤ ᠠᠪᠤᠭᠰᠠᠨ ᠣᠯᠵᠠᠨ ᠠᠴᠠ ᠪᠠᠨ ᠲᠡᠳᠡᠨ ᠲᠡᠢ ᠬᠤᠪᠢᠶᠠᠯᠴᠠᠬᠤ ᠦᠭᠡᠢ᠂ ᠲᠡᠳᠡ ᠡᠬᠡᠨᠡᠷ ᠬᠡᠦᠬᠡᠳ ᠤᠳ ᠢᠶᠠᠨ ᠯᠠ ᠠᠪᠴᠤ ᠶᠠᠪᠤᠭ》 ᠭᠡᠵᠦ ᠬᠡᠯᠡᠵᠡᠢ᠃ 23 ᠲᠡᠭᠡᠬᠦ ᠳᠦ ᠳ᠋ᠠᠸᠢᠳ᠋᠄ 《ᠶᠣᠬᠣᠸᠠ ᠶᠢᠨ ᠰᠣᠶᠣᠷᠬᠠᠭᠰᠠᠨ ᠵᠦᠢᠯᠡᠰ ᠢ ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ᠂ ᠠᠬᠠ ᠳᠡᠭᠦᠦ ᠨᠠᠷ ᠮᠢᠨᠢ᠃ ᠶᠣᠬᠣᠸᠠ ᠮᠠᠨ ᠤ ᠬᠢᠨ ᠢ ᠬᠠᠮᠠᠭᠠᠯᠠᠵᠤ᠂ ᠨᠥᠭᠥᠭᠡ ᠳᠡᠭᠡᠷᠡᠮᠴᠢᠳ ᠢ ᠮᠠᠨ ᠤ ᠭᠠᠷ ᠲᠤ ᠲᠤᠰᠢᠶᠠᠭᠰᠠᠨ ᠪᠢᠰᠢ ᠤᠤ︖ 24 ᠡᠨᠡ ᠶᠠᠪᠤᠳᠠᠯ ᠤᠨ ᠲᠠᠯᠠ ᠪᠠᠷ ᠲᠠ ᠨᠠᠷ ᠤᠨ ᠬᠢ ᠶᠢ ᠬᠡᠨ ᠰᠣᠨᠣᠰᠬᠤ ᠪᠤᠢ︖ ᠲᠤᠯᠤᠯᠳᠤᠭᠠᠨ ᠳᠤ ᠶᠠᠪᠤᠭᠰᠠᠨ ᠬᠥᠮᠦᠰ ᠦᠨ ᠬᠤᠪᠢ ᠴᠤ᠂ ᠠᠴᠢᠶᠠ ᠪᠠᠷᠠᠭᠠᠨ ᠤ ᠳᠡᠷᠭᠡᠳᠡ ᠪᠠᠢᠭᠰᠠᠨ ᠬᠥᠮᠦᠰ ᠦᠨ ᠬᠤᠪᠢ ᠴᠤ ᠠᠳᠠᠯᠢᠬᠠᠨ ᠪᠠᠢᠬᠤ ᠶᠣᠰᠣᠲᠠᠢ》 ᠭᠡᠵᠦ ᠬᠡᠯᠡᠪᠡ᠃ 25 ᠳ᠋ᠠᠸᠢᠳ᠋ ᠡᠭᠦᠨ ᠢ ᠢᠰᠷᠧᠯ ᠤᠨ ᠳᠦᠷᠢᠮ ᠲᠣᠭᠲᠠᠭᠠᠯ ᠪᠣᠯᠭᠠᠭᠰᠠᠨ ᠢᠶᠠᠷ ᠡᠨᠡ ᠨᠢ ᠲᠡᠷᠡ ᠡᠳᠦᠷ ᠡᠴᠡ ᠬᠣᠢᠰᠢ ᠥᠨᠥᠳᠥᠷ ᠪᠣᠯᠲᠠᠯᠠ ᠪᠠᠢᠭᠰᠠᠭᠠᠷ ᠪᠠᠢᠳᠠᠭ᠃
26 ᠳ᠋ᠠᠸᠢᠳ᠋ ᠽᠢᠺᠯᠠᠭ ᠲᠤ ᠪᠤᠴᠠᠵᠤ ᠢᠷᠡᠭᠰᠡᠨ ᠦ ᠳᠠᠷᠠᠭᠠ᠂ ᠶᠦᠳᠠ ᠳᠤ ᠪᠠᠢᠭᠠ ᠠᠬᠠᠯᠠᠭᠴᠢ ᠨᠠᠢᠵᠢ ᠨᠠᠷ ᠲᠠᠭᠠᠨ᠄ 《ᠶᠣᠬᠣᠸᠠ ᠶᠢᠨ ᠳᠠᠢᠰᠤᠨ ᠨᠤᠭᠤᠳ ᠠᠴᠠ ᠠᠪᠤᠭᠰᠠᠨ ᠣᠯᠵᠠᠨ ᠠᠴᠠ ᠪᠠᠨ ᠲᠠ ᠨᠠᠷ ᠲᠤ ᠪᠡᠯᠡᠭᠯᠡᠶᠡ》 ᠭᠡᠳ ᠣᠯᠵᠠᠨ ᠠᠴᠠ ᠪᠠᠨ ᠢᠯᠡᠭᠡᠪᠡ᠃ 27 ᠡᠭᠦᠨ ᠡᠴᠡ ᠭᠠᠳᠠᠨᠠ ᠪᠧᠲ᠋ᠧᠯ᠂ ᠡᠮᠦᠨᠡᠲᠦ ᠪᠦᠰᠡ ᠶᠢᠨ ᠷᠠᠮᠣᠲ᠂ ᠶᠠᠲ᠋ᠢᠷ᠂ 28 ᠠᠷᠣᠶᠧᠷ᠂ ᠰᠢᠹᠮᠣᠲ᠂ ᠡᠱᠲ᠋ᠧᠮᠣᠶᠠ᠂ 29 ᠷᠠᠺᠠᠯ᠂ ᠶᠧᠷᠠᠮᠧᠯᠴᠤᠳ ᠤᠨ ᠬᠣᠲᠠ ᠲᠣᠰᠬᠣᠨ᠂ ᠺᠧᠨᠴᠦᠳ ᠦᠨ ᠬᠣᠲᠠ ᠲᠣᠰᠬᠣᠨ᠂ 30 ᠬᠣᠷᠮᠠ᠂ ᠪᠣᠷ ᠠᠱᠠᠨ᠂ ᠠᠲ᠋ᠠᠺ᠋᠂ 31 ᠾᠧᠪᠷᠣᠨ᠂ ᠮᠥᠨ ᠳ᠋ᠠᠸᠢᠳ᠋ ᠪᠠ ᠲᠡᠭᠦᠨ ᠦ ᠬᠥᠮᠦᠰ ᠦᠨ ᠶᠠᠪᠤᠵᠤ ᠳᠠᠳᠤᠭᠰᠠᠨ ᠪᠦᠬᠦ ᠭᠠᠵᠠᠷ ᠤᠨ ᠨᠠᠢᠵᠢ ᠨᠠᠷ ᠲᠠᠭᠠᠨ ᠡᠳᠡᠭᠡᠷ ᠪᠡᠯᠡᠭ ᠢ ᠶᠠᠪᠤᠭᠤᠯᠵᠠᠢ᠃