ᠨᠢᠭᠡᠳᠦᠭᠡᠷ ᠰᠠᠮᠦ᠋ᠶᠧᠯ ᠲᠠᠪᠤ
ᠶᠣᠬᠣᠸᠠ ᠶᠢᠨ ᠬᠢᠯᠢᠩ ᠹᠢᠯᠢᠰᠲ᠋ᠴᠦᠳ ᠲᠦ ᠪᠠᠭᠤᠪᠠ
1 ᠹᠢᠯᠢᠰᠲ᠋ᠴᠦᠳ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠪᠤᠯᠢᠶᠠᠵᠤ ᠠᠪᠤᠭᠠᠳ᠂ ᠡᠪᠧᠨᠧᠽᠧᠷ ᠡᠴᠡ ᠠᠱᠠᠳᠣᠳ᠋ ᠤᠷᠤᠭᠤ ᠠᠪᠴᠢᠷᠠᠪᠠ᠃ 2 ᠲᠡᠭᠡᠭᠡᠳ ᠹᠢᠯᠢᠰᠲ᠋ᠴᠦᠳ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠠᠪᠴᠤ᠂ ᠳ᠋ᠠᠭᠣᠨ ᠤ ᠳᠤᠭᠠᠩ ᠳᠤ ᠣᠷᠣᠭᠤᠯᠤᠨ ᠳ᠋ᠠᠭᠣᠨ ᠤ ᠳᠡᠷᠭᠡᠳᠡ ᠲᠠᠯᠪᠢᠪᠠ᠃ 3 ᠠᠱᠠᠳᠣᠳ᠋ᠴᠤᠳ ᠳᠠᠷᠠᠭᠠ ᠡᠳᠦᠷ ᠨᠢ ᠡᠷᠲᠡᠯᠡᠨ ᠪᠣᠰᠣᠭᠠᠳ ᠦᠵᠡᠬᠦ ᠳᠦ᠂ ᠳ᠋ᠠᠭᠣᠨ ᠨᠢ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢᠨ ᠡᠮᠦᠨᠡ ᠨᠢᠭᠤᠷ ᠢᠶᠠᠷ ᠢᠶᠠᠨ ᠭᠠᠵᠠᠷ ᠤᠨᠠᠭᠰᠠᠨ ᠪᠠᠢᠪᠠ᠃ ᠲᠡᠳᠡ ᠳ᠋ᠠᠭᠣᠨ ᠢ ᠠᠪᠴᠤ᠂ ᠪᠠᠢᠷᠢᠨ ᠳᠤᠨᠢ ᠡᠷᠭᠢᠭᠦᠯᠦᠨ ᠲᠠᠯᠪᠢᠪᠠ᠃ 4 ᠲᠡᠳᠡ ᠳᠠᠷᠠᠭᠠ ᠥᠷᠯᠥᠭᠡ ᠨᠢ ᠪᠣᠰᠴᠤ ᠦᠵᠡᠬᠦ ᠳᠦ᠂ ᠳ᠋ᠠᠭᠣᠨ ᠨᠢ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢᠨ ᠡᠮᠦᠨᠡ ᠨᠢᠭᠤᠷ ᠢᠶᠠᠷ ᠢᠶᠠᠨ ᠭᠠᠵᠠᠷ ᠤᠨᠠᠴᠢᠬᠠᠭᠰᠠᠨ ᠪᠠᠢᠪᠠ᠃ ᠳ᠋ᠠᠭᠣᠨ ᠤ ᠲᠣᠯᠣᠭᠠᠢ᠂ ᠬᠣᠶᠠᠷ ᠴᠠᠷᠪᠠᠭᠤ ᠨᠢ ᠪᠣᠱᠣᠭᠠᠨ ᠤ ᠳᠡᠷᠭᠡᠳᠡ ᠲᠠᠰᠤᠷᠠᠵᠤ᠂ ᠶᠡᠬᠡ ᠪᠡᠶᠡ ᠨᠢ ᠯᠠ ᠦᠯᠡᠳᠡᠭᠰᠡᠨ ᠪᠠᠢᠪᠠ᠃ 5 ᠲᠡᠢᠮᠦ ᠡᠴᠡ ᠥᠨᠥ ᠬᠦᠷᠲᠡᠯᠡ ᠳ᠋ᠠᠭᠣᠨ ᠤ ᠲᠠᠬᠢᠯᠴᠢᠳ ᠪᠣᠯᠣᠨ ᠳ᠋ᠠᠭᠣᠨ ᠤ ᠳᠤᠭᠠᠩ ᠳᠤ ᠢᠷᠡᠭᠴᠢ ᠪᠣᠯᠭᠠᠨ ᠠᠱᠠᠳᠣᠳ᠋ ᠳᠠᠬᠢ ᠳ᠋ᠠᠭᠣᠨ ᠤ ᠪᠣᠱᠣᠭᠠᠨ ᠳᠡᠭᠡᠷᠡ ᠬᠥᠯ ᠲᠠᠯᠪᠢᠳᠠᠭ ᠦᠭᠡᠢ᠃
6 ᠶᠣᠬᠣᠸᠠ ᠶᠢᠨ ᠮᠤᠲᠤᠷ ᠠᠱᠠᠳᠣᠳ᠋ᠴᠤᠳ ᠤᠨ ᠳᠡᠭᠡᠷᠡ ᠬᠦᠨᠳᠦ ᠪᠡᠷ ᠳᠠᠷᠤᠵᠤ᠂ ᠠᠱᠠᠳᠣᠳ᠋ ᠪᠣᠯᠣᠨ ᠲᠡᠭᠦᠨ ᠦ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨ ᠢ ᠰᠦᠢᠷᠡᠭᠦᠯᠵᠦ᠂ ᠬᠠᠪᠤᠳᠠᠷ ᠡᠪᠡᠳᠴᠢᠨ ᠢᠶᠠᠷ ᠴᠣᠬᠢᠪᠠ᠃ 7 ᠠᠱᠠᠳᠣᠳ᠋ ᠤᠨ ᠬᠥᠮᠦᠰ ᠡᠭᠦᠨ ᠢ ᠦᠵᠡᠭᠡᠳ᠄ 《ᠢᠰᠷᠧᠯ ᠤᠨ ᠪᠤᠷᠬᠠᠨ ᠤ ᠠᠪᠳᠠᠷᠠ ᠪᠢᠳᠡᠨ ᠦ ᠳᠤᠮᠳᠠ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠃ ᠲᠡᠭᠦᠨ ᠦ ᠮᠤᠲᠤᠷ ᠪᠢᠳᠡ ᠪᠣᠯᠣᠨ ᠪᠢᠳᠡᠨ ᠦ ᠪᠤᠷᠬᠠᠨ ᠳ᠋ᠠᠭᠣᠨ ᠳᠤ ᠬᠠᠲᠠᠭᠤ ᠪᠠᠢᠨᠠ》 ᠭᠡᠵᠡᠭᠡᠪᠡ᠃ 8 ᠡᠢᠨ ᠬᠦ ᠲᠡᠳᠡ ᠬᠥᠮᠦᠨ ᠶᠠᠪᠤᠭᠤᠯᠵᠤ᠂ ᠹᠢᠯᠢᠰᠲ ᠤᠨ ᠪᠦᠬᠦ ᠨᠣᠶᠠᠨ ᠢ ᠴᠤᠭᠯᠠᠭᠤᠯᠤᠨ᠄ 《ᠢᠰᠷᠧᠯ ᠤᠨ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠪᠢᠳᠡ ᠶᠠᠭᠠᠬᠢᠬᠤ ᠪᠤᠢ︖》 ᠭᠡᠰᠡᠨ ᠳᠦ᠂ 《ᠢᠰᠷᠧᠯ ᠤᠨ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠭᠠᠲ ᠤᠷᠤᠭᠤ ᠰᠢᠯᠵᠢᠭᠦᠯᠦᠶᠡ》 ᠭᠡᠵᠡᠭᠡᠪᠡ᠃ ᠲᠡᠭᠡᠭᠡᠳ ᠢᠰᠷᠧᠯ ᠤᠨ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠰᠢᠯᠵᠢᠭᠦᠯᠪᠡ᠃ 9 ᠲᠡᠭᠦᠨ ᠢ ᠭᠠᠲ ᠲᠤ ᠰᠢᠯᠵᠢᠭᠦᠯᠦᠭᠰᠡᠨ ᠦ ᠳᠠᠷᠠᠭᠠ᠂ ᠶᠣᠬᠣᠸᠠ ᠶᠢᠨ ᠮᠤᠲᠤᠷ ᠡᠨᠡ ᠬᠣᠲᠠ ᠳᠤ ᠠᠰᠤᠷᠤ ᠶᠡᠬᠡ ᠠᠢᠳᠠᠰ ᠦᠢᠮᠡᠭᠡᠨ ᠠᠪᠴᠢᠷᠠᠪᠠ᠂ ᠶᠣᠬᠣᠸᠠ ᠬᠠᠪᠤᠳᠠᠷ ᠡᠪᠡᠳᠴᠢᠨ ᠲᠠᠷᠬᠠᠭᠠᠨ ᠬᠣᠲᠠ ᠶᠢᠨ ᠬᠥᠮᠦᠰ ᠢ ᠶᠡᠬᠡ ᠪᠠᠭᠠ ᠢᠯᠭᠠᠯ ᠦᠭᠡᠢ ᠴᠣᠬᠢᠪᠠ᠃ 10 ᠲᠡᠢᠮᠦ ᠡᠴᠡ ᠲᠡᠳᠡ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠡᠺᠷᠣᠨ ᠤᠷᠤᠭᠤ ᠨᠡᠭᠦᠯᠭᠡᠪᠡ᠃ ᠪᠤᠷᠬᠠᠨ ᠤ ᠠᠪᠳᠠᠷᠠ ᠡᠺᠷᠣᠨ ᠳᠤ ᠬᠦᠷᠴᠦ ᠢᠷᠡᠭᠰᠡᠨ ᠳᠦ᠂ ᠡᠺᠷᠣᠨᠴᠤᠳ ᠪᠠᠷᠬᠢᠷᠠᠨ ᠬᠠᠰᠬᠢᠷᠤᠯᠳᠤᠵᠤ᠄ 《ᠲᠡᠳᠡ ᠢᠰᠷᠧᠯ ᠤᠨ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠨᠠᠰᠢ ᠰᠢᠯᠵᠢᠭᠦᠯᠦᠭᠡᠳ ᠮᠠᠨ ᠤ ᠠᠷᠠᠳ ᠲᠦᠮᠡᠨ ᠢ ᠰᠥᠨᠥᠭᠡᠬᠦ ᠭᠡᠵᠦ ᠪᠠᠢᠨᠠ︕》 ᠭᠡᠵᠡᠭᠡᠪᠡ᠃ 11 ᠲᠡᠢᠮᠦ ᠡᠴᠡ ᠲᠡᠳᠡ ᠬᠥᠮᠦᠨ ᠶᠠᠪᠤᠭᠤᠯᠵᠤ᠂ ᠹᠢᠯᠢᠰᠲ ᠤᠨ ᠬᠠᠮᠤᠭ ᠨᠣᠶᠠᠨ ᠢ ᠴᠤᠭᠯᠠᠭᠤᠯᠤᠨ᠄ 《ᠢᠰᠷᠧᠯ ᠤᠨ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠶᠠᠪᠤᠭᠤᠯ᠂ ᠲᠡᠭᠦᠨ ᠢ ᠪᠠᠢᠭᠰᠠᠨ ᠭᠠᠵᠠᠷ ᠤᠷᠤᠭᠤ ᠨᠢ ᠪᠤᠴᠠᠭᠠ᠃ ᠮᠠᠨ ᠤ ᠠᠷᠠᠳ ᠲᠦᠮᠡᠨ ᠢ ᠰᠥᠨᠥᠭᠡᠴᠢᠬᠡᠬᠦ ᠪᠤᠢ》 ᠭᠡᠵᠡᠭᠡᠪᠡ᠃ ᠤᠴᠢᠷ ᠨᠢ ᠪᠦᠬᠦ ᠬᠣᠲᠠ ᠶᠢ ᠦᠬᠦᠯ ᠦᠨ ᠠᠢᠳᠠᠰ ᠨᠥᠮᠥᠷᠥᠭᠰᠡᠨ ᠪᠠᠢᠵᠠᠢ᠃ ᠪᠤᠷᠬᠠᠨ ᠤ ᠮᠤᠲᠤᠷ ᠲᠡᠷᠡ ᠭᠠᠵᠠᠷ ᠢ ᠡᠢᠨ ᠬᠦ ᠬᠦᠨᠳᠦ ᠪᠡᠷ ᠳᠠᠷᠤᠵᠤ ᠪᠠᠢᠯᠠ᠃ 12 ᠦᠬᠦᠭᠡ ᠦᠭᠡᠢ ᠬᠥᠮᠦᠰ ᠨᠢ ᠬᠠᠪᠤᠳᠠᠷ ᠡᠪᠡᠳᠴᠢᠨ ᠳᠤ ᠪᠠᠷᠢᠭᠳᠠᠵᠤ᠂ ᠬᠣᠲᠠ ᠶᠢᠨ ᠭᠠᠰᠠᠯᠬᠤ ᠳᠠᠭᠤ ᠲᠩᠷᠢ ᠳᠤ ᠬᠠᠳᠠᠪᠠ᠃