ᠨᠢᠭᠡᠳᠦᠭᠡᠷ ᠰᠠᠮᠦ᠋ᠶᠧᠯ ᠠᠷᠪᠠᠨ ᠳᠣᠯᠣᠭᠠ
ᠳ᠋ᠠᠸᠢᠳ᠋ ᠪᠣᠯᠣᠨ ᠭᠣᠯᠢᠶᠠᠲ
1 ᠹᠢᠯᠢᠰᠲ᠋ᠴᠦᠳ ᠪᠠᠢᠯᠳᠤᠬᠤ ᠪᠠᠷ ᠴᠡᠷᠢᠭ ᠢᠶᠠᠨ ᠴᠤᠭᠯᠠᠭᠤᠯᠪᠠ᠃ ᠲᠡᠳᠡ ᠶᠦᠳᠠ ᠶᠢᠨ ᠰᠣᠺᠣ ᠳᠤ ᠴᠤᠭᠯᠠᠷᠠᠵᠤ᠂ ᠰᠣᠺᠣ ᠪᠣᠯᠣᠨ ᠠᠽᠧᠺᠠ ᠶᠢᠨ ᠳᠤᠮᠳᠠ ᠪᠠᠢᠭᠠ ᠡᠹᠧᠰ ᠳ᠋ᠠᠮᠢᠮ ᠳᠤ ᠬᠤᠸᠠᠷᠠᠩᠨᠠᠪᠠ᠃ 2 ᠰᠠᠦ᠋ᠯ ᠪᠣᠯᠣᠨ ᠢᠰᠷᠧᠯ ᠤᠨ ᠡᠷᠡᠴᠦᠳ ᠴᠤ ᠴᠤᠭᠯᠠᠷᠠᠵᠤ᠂ ᠧᠯᠠ ᠶᠢᠨ ᠬᠥᠨᠳᠡᠢ ᠳᠦ ᠬᠤᠸᠠᠷᠠᠩᠨᠠᠵᠤ᠂ ᠹᠢᠯᠢᠰᠲ᠋ᠴᠦᠳ ᠲᠡᠢ ᠲᠤᠯᠤᠯᠳᠤᠬᠤ ᠪᠠᠷ ᠵᠢᠭᠰᠠᠪᠠ᠃ 3 ᠹᠢᠯᠢᠰᠲ᠋ᠴᠦᠳ ᠴᠠᠭᠠᠲᠤ ᠲᠠᠯᠠ ᠶᠢᠨ ᠠᠭᠤᠯᠠᠨ ᠳᠡᠭᠡᠷᠡ᠂ ᠢᠰᠷᠧᠯ ᠨᠠᠭᠠᠳᠤ ᠲᠠᠯᠠ ᠶᠢᠨ ᠠᠭᠤᠯᠠᠨ ᠳᠡᠭᠡᠷᠡ ᠪᠠᠢᠭᠰᠠᠨ ᠪᠥᠭᠡᠳ ᠳᠤᠮᠳᠠᠭᠤᠷ ᠨᠢ ᠬᠥᠨᠳᠡᠢ ᠪᠠᠢᠪᠠ᠃ 4 ᠲᠡᠭᠡᠬᠦ ᠳᠦ ᠹᠢᠯᠢᠰᠲ᠋ᠴᠦᠳ ᠦᠨ ᠴᠡᠷᠢᠭ ᠤᠨ ᠬᠤᠸᠠᠷᠠᠨ ᠠᠴᠠ ᠨᠢᠭᠡᠨ ᠬᠦᠴᠦᠲᠦ ᠳᠠᠢᠴᠢᠨ ᠡᠷᠡ ᠭᠠᠷᠴᠤ ᠢᠷᠡᠪᠡ᠃ ᠲᠡᠷᠡ ᠪᠣᠯ ᠭᠠᠲ ᠤᠨ ᠬᠥᠮᠦᠨ ᠭᠣᠯᠢᠶᠠᠲ ᠪᠥᠭᠡᠳ ᠥᠨᠳᠥᠷ ᠨᠢ ᠵᠢᠷᠭᠤᠭᠠᠨ ᠲᠣᠬᠣᠢ ᠨᠢᠭᠡ ᠰᠥᠭᠥᠮ 13 ᠪᠠᠢᠵᠠᠢ᠃ 5 ᠲᠡᠷᠡ ᠪᠡᠷ ᠲᠣᠯᠣᠭᠠᠢ ᠳᠠᠭᠠᠨ ᠬᠦᠷᠡᠯ ᠳᠤᠭᠤᠯᠠᠭᠠ᠂ ᠪᠡᠶᠡ ᠳᠡᠭᠡᠨ ᠲᠠᠪᠤᠨ ᠮᠢᠩ᠋ᠭᠠᠨ ᠱᠧᠺᠧᠯ 14 ᠬᠦᠷᠡᠯ ᠦᠨ ᠵᠢᠩ ᠲᠠᠢ ᠬᠠᠢᠷᠰᠤᠲᠤ ᠬᠤᠶᠠᠭ ᠡᠮᠦᠰᠦᠭᠰᠡᠨ ᠪᠠᠢᠪᠠ᠃ 6 ᠲᠡᠷᠡ ᠬᠥᠯ ᠳᠡᠭᠡᠨ ᠬᠦᠷᠡᠯ ᠡᠪᠦᠲᠦᠭᠡᠪᠴᠢ ᠲᠠᠢ ᠪᠥᠭᠡᠳ ᠨᠢᠷᠤᠭᠤᠨ ᠳᠠᠭᠠᠨ ᠬᠦᠷᠡᠯ ᠵᠢᠳᠠ ᠡᠭᠦᠷᠦᠭᠰᠡᠨ ᠪᠠᠢᠪᠠ᠃ 7 ᠲᠡᠭᠦᠨ ᠦ ᠵᠢᠳᠠᠨ ᠤ ᠡᠰᠢ ᠨᠢ ᠨᠡᠬᠡᠮᠡᠯᠴᠢᠨ ᠤ ᠭᠣᠬᠠᠳᠠᠭᠴᠢ ᠮᠣᠳᠣ ᠮᠡᠲᠦ᠂ ᠵᠢᠳᠠᠨ ᠤ ᠦᠵᠦᠭᠦᠷ ᠨᠢ ᠵᠢᠷᠭᠤᠭᠠᠨ ᠵᠠᠭᠤᠨ ᠱᠧᠺᠧᠯ ᠤᠨ ᠵᠢᠩ ᠲᠠᠢ 15 ᠲᠡᠮᠦᠷ ᠪᠠᠢᠪᠠ᠃ ᠲᠡᠭᠦᠨ ᠦ ᠪᠠᠮᠪᠠᠢ ᠡᠭᠦᠷᠦᠭᠴᠢ ᠨᠢ ᠪᠠᠰᠠ ᠡᠮᠦᠨᠡ ᠨᠢ ᠶᠠᠪᠤᠵᠤ ᠪᠠᠢᠪᠠ᠃ 8 ᠭᠣᠯᠢᠶᠠᠲ ᠢᠰᠷᠧᠯ ᠤᠨ ᠴᠡᠷᠢᠭ ᠤᠨ ᠵᠢᠭᠰᠠᠭᠠᠯ ᠤᠷᠤᠭᠤ ᠬᠠᠨᠳᠤᠨ ᠵᠣᠭᠰᠣᠭᠠᠳ ᠬᠠᠰᠬᠢᠷᠤᠨ ᠳᠠᠭᠤᠳᠠᠵᠤ᠄ 《ᠲᠠ ᠨᠠᠷ ᠲᠤᠯᠤᠯᠳᠤᠭᠠᠨ ᠤ ᠵᠢᠭᠰᠠᠭᠠᠯ ᠵᠢᠭᠰᠠᠭᠠᠳ ᠶᠠᠭᠠᠬᠢᠬᠤ ᠭᠡᠰᠡᠨ ᠪᠤᠢ︖ ᠹᠢᠯᠢᠰᠲ ᠬᠥᠮᠦᠨ ᠪᠢ ᠡ᠊ᠨᠳᠡ ᠪᠠᠢᠨᠠ᠃ ᠲᠠ ᠨᠠᠷ ᠰᠠᠦ᠋ᠯ ᠤᠨ ᠪᠣᠭᠣᠯ ᠪᠢᠰᠢ ᠤᠤ︖ ᠥᠪᠡᠷᠰᠡᠳ ᠡᠴᠡ ᠪᠡᠨ ᠨᠢᠭᠡ ᠬᠥᠮᠦᠨ ᠢ ᠰᠣᠩ᠋ᠭᠣᠵᠤ ᠨᠠᠳᠠ ᠤᠷᠤᠭᠤ ᠶᠠᠪᠤᠭᠤᠯ᠃ 9 ᠬᠡᠷᠪᠡ ᠲᠡᠷᠡ ᠬᠥᠮᠦᠨ ᠨᠠᠳᠠ ᠲᠠᠢ ᠲᠤᠯᠤᠯᠳᠤᠵᠤ ᠳᠡᠢᠯᠦᠭᠡᠳ᠂ ᠨᠠᠮᠠᠶᠢ ᠠᠯᠠᠪᠠᠯ ᠪᠢᠳᠡ ᠲᠠ ᠨᠠᠷ ᠤᠨ ᠪᠣᠭᠣᠯ ᠪᠣᠯᠣᠶᠠ᠃ ᠪᠢ ᠲᠡᠭᠦᠨ ᠢ ᠢᠯᠠᠵᠤ᠂ ᠠᠯᠠᠪᠠᠯ ᠲᠠ ᠨᠠᠷ ᠬᠠᠷᠢᠨ ᠪᠢᠳᠡᠨ ᠦ ᠪᠣᠭᠣᠯ ᠪᠣᠯᠵᠤ᠂ ᠪᠢᠳᠡᠨ ᠳᠦ ᠦᠢᠯᠡᠴᠢᠯᠡᠭᠲᠦᠨ》 ᠭᠡᠪᠡ᠃ 10 ᠹᠢᠯᠢᠰᠲ ᠬᠥᠮᠦᠨ ᠴᠢᠨᠠᠭᠰᠢ ᠨᠢ᠄ 《ᠥᠨᠥᠳᠥᠷ ᠪᠢ ᠢᠰᠷᠧᠯ ᠤᠨ ᠵᠢᠭᠰᠠᠭᠠᠯ ᠢ ᠢᠩᠭᠢᠵᠦ ᠳᠣᠷᠣᠮᠵᠢᠯᠠᠵᠤ ᠪᠠᠢᠬᠤ ᠳᠤ᠂ ᠲᠠ ᠨᠠᠷ ᠨᠢᠭᠡ ᠬᠥᠮᠦᠨ ᠢ ᠶᠠᠪᠤᠭᠤᠯᠬᠤ ᠦᠭᠡᠢ ᠤᠤ︖ ᠬᠠᠯᠵᠠ ᠲᠤᠯᠤᠯᠳᠤᠶᠠ》 ᠭᠡᠪᠡ᠃ 11 ᠰᠠᠦ᠋ᠯ ᠪᠣᠯᠣᠨ ᠪᠦᠬᠦ ᠢᠰᠷᠧᠯ ᠡᠨᠡ ᠹᠢᠯᠢᠰᠲ ᠬᠥᠮᠦᠨ ᠦ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠵᠣᠷᠢᠭ ᠨᠢ ᠮᠣᠬᠣᠵᠤ᠂ ᠠᠢᠳᠠᠰ ᠲᠤ ᠠᠪᠲᠠᠵᠠᠢ᠃
12 ᠳ᠋ᠠᠸᠢᠳ᠋ ᠪᠣᠯ ᠶᠦᠳᠠ ᠶᠢᠨ ᠪᠧᠲ᠋ᠯᠧᠾᠧᠮ ᠳᠤ ᠰᠠᠭᠤᠳᠠᠭ ᠡᠹᠷᠠᠲ ᠬᠥᠮᠦᠨ ᠢᠱᠠᠢ ᠶᠢᠨ ᠬᠥᠪᠡᠭᠦᠨ ᠶᠤᠮ᠃ ᠢᠱᠠᠢ ᠨᠠᠢ᠌ᠮᠠᠨ ᠬᠥᠪᠡᠭᠦᠨ ᠲᠡᠢ ᠪᠥᠭᠡᠳ ᠰᠠᠦ᠋ᠯ ᠤᠨ ᠦᠶᠡ ᠳᠦ ᠥᠨᠳᠥᠷ ᠨᠠᠰᠤᠲᠠᠢ ᠪᠣᠯᠣᠭᠰᠠᠨ ᠪᠠᠢᠵᠠᠢ᠃ 13 ᠢᠱᠠᠢ ᠶᠢᠨ ᠭᠤᠷᠪᠠᠨ ᠲᠣᠮᠣ ᠬᠥᠪᠡᠭᠦᠨ ᠨᠢ ᠰᠠᠦ᠋ᠯ ᠢ ᠳᠠᠭᠠᠨ ᠳᠠᠢᠨ ᠳᠤ ᠶᠠᠪᠤᠭᠰᠠᠨ ᠪᠠᠢᠪᠠ᠃ ᠳᠠᠢᠨ ᠳᠤ ᠶᠠᠪᠤᠭᠰᠠᠨ ᠭᠤᠷᠪᠠᠨ ᠬᠥᠪᠡᠭᠦᠨ ᠦ ᠤᠤᠭᠠᠨ ᠨᠢ ᠡᠯᠢᠶᠠᠪ᠂ ᠤᠳᠠᠭᠠᠬᠢ ᠨᠢ ᠠᠪᠢᠨᠠᠳᠠᠪ᠂ ᠳᠠᠷᠠᠭᠠᠬᠢ ᠨᠢ ᠱᠠᠮᠠ ᠪᠢᠯᠡ᠃ 14 ᠣᠳᠬᠣᠨ ᠬᠥᠪᠡᠭᠦᠨ ᠨᠢ ᠳ᠋ᠠᠸᠢᠳ᠋ ᠠᠵᠢ᠃ ᠭᠤᠷᠪᠠᠨ ᠶᠡᠬᠡ ᠠᠬᠠ ᠨᠢ ᠰᠠᠦ᠋ᠯ ᠢ ᠳᠠᠭᠠᠵᠤ ᠶᠠᠪᠤᠭᠰᠠᠨ ᠪᠠᠢᠬᠤ ᠳᠤ᠂ 15 ᠳ᠋ᠠᠸᠢᠳ᠋ ᠡᠴᠢᠭᠡ ᠶᠢᠨ ᠢᠶᠠᠨ ᠬᠣᠨᠢᠨ ᠰᠦᠷᠦᠭ ᠢ ᠬᠠᠷᠢᠭᠤᠯᠵᠤ ᠪᠧᠲ᠋ᠯᠧᠾᠧᠮ ᠪᠣᠯᠣᠨ ᠰᠠᠦ᠋ᠯ ᠤᠨ ᠬᠣᠭᠣᠷᠣᠨᠳᠣ ᠢᠷᠡᠨ ᠣᠴᠢᠨ ᠪᠠᠢᠪᠠ᠃ 16 ᠥᠨᠥᠬᠢ ᠹᠢᠯᠢᠰᠲ ᠬᠥᠮᠦᠨ ᠥᠷᠯᠥᠭᠡ᠂ ᠦᠳᠡᠰᠢ ᠪᠣᠯᠭᠠᠨ ᠭᠠᠷᠴᠤ ᠢᠷᠡᠨ ᠥᠪᠡᠷ ᠢ ᠪᠠᠨ ᠬᠠᠷᠠᠭᠤᠯᠤᠭᠰᠠᠭᠠᠷ ᠳᠥᠴᠢᠨ ᠡᠳᠦᠷ ᠪᠣᠯᠪᠠ᠃
17 ᠢᠱᠠᠢ ᠬᠥᠪᠡᠭᠦᠨ ᠳ᠋ᠠᠸᠢᠳ᠋ ᠲᠠᠭᠠᠨ᠄ 《ᠠᠬᠠ ᠨᠠᠷ ᠲᠤ ᠴᠢᠨᠢ ᠪᠡᠯᠡᠳᠬᠡᠭᠰᠡᠨ ᠡᠨᠡ ᠰᠠᠭᠰᠤ 16 ᠬᠠᠭᠤᠷᠤᠭᠰᠠᠨ ᠪᠤᠳᠠᠭᠠ᠂ ᠠᠷᠪᠠᠨ ᠪᠣᠣᠪᠣ ᠶᠢ ᠠᠪᠴᠤ ᠬᠤᠸᠠᠷᠠᠨ ᠲᠡᠰᠢ ᠠᠬᠠ ᠨᠠᠷ ᠤᠷᠤᠭᠤ ᠪᠠᠨ ᠭᠦᠶᠦ᠃ 18 ᠪᠠᠰᠠ ᠡᠨᠡ ᠠᠷᠪᠠᠨ ᠪᠢᠰᠢᠯᠠᠭ ᠢ ᠮᠢᠩ᠋ᠭᠠᠲᠤ ᠶᠢᠨ ᠳᠠᠷᠤᠭᠠ ᠳᠤᠨᠢ ᠬᠦᠷᠭᠡᠵᠦ ᠥᠭᠭᠥᠨ ᠠᠬᠠ ᠨᠠᠷ ᠤᠨ ᠢᠶᠠᠨ ᠮᠡᠨᠳᠦ ᠶᠢ ᠮᠡᠳᠡᠭᠡᠳ ᠲᠡᠳᠡᠨ ᠡᠴᠡ ᠮᠡᠳᠡᠭᠡ ᠠᠪᠤᠭᠠᠳ ᠢᠷᠡ᠃
19 ᠠᠬᠠ ᠨᠠᠷ ᠴᠢᠨᠢ ᠰᠠᠦ᠋ᠯ ᠪᠣᠯᠣᠨ ᠢᠰᠷᠧᠯ ᠤᠨ ᠪᠦᠬᠦ ᠡᠷᠡᠴᠦᠳ ᠲᠡᠢ ᠬᠠᠮᠲᠤ ᠧᠯᠠ ᠶᠢᠨ ᠬᠥᠨᠳᠡᠢ ᠳᠦ ᠹᠢᠯᠢᠰᠲ᠋ᠴᠦᠳ ᠲᠡᠢ ᠲᠤᠯᠤᠯᠳᠤᠵᠤ ᠪᠠᠢᠭᠠ》 ᠭᠡᠵᠦ ᠬᠡᠯᠡᠪᠡ᠃ 20 ᠳ᠋ᠠᠸᠢᠳ᠋ ᠥᠷᠯᠥᠭᠡ ᠡᠷᠲᠡ ᠪᠣᠰᠴᠤ᠂ ᠬᠣᠨᠢᠨ ᠰᠦᠷᠦᠭ ᠢᠶᠡᠨ ᠥᠭᠡᠷᠡ ᠬᠣᠨᠢᠴᠢᠨ ᠳᠤ ᠨᠠᠢᠳᠠᠵᠤ ᠣᠷᠬᠢᠭᠠᠳ ᠢᠱᠠᠢ ᠶᠢᠨ ᠲᠤᠰᠢᠶᠠᠭᠰᠠᠨ ᠢᠶᠠᠷ ᠬᠦᠨᠡᠰᠦ ᠶᠢ ᠠᠪᠴᠤ ᠶᠠᠪᠤᠯᠠ᠃ ᠲᠡᠷᠡ ᠬᠤᠸᠠᠷᠠᠨ ᠳᠤ ᠢᠷᠡᠬᠦ ᠳᠦ᠂ ᠴᠡᠷᠢᠭ ᠤᠳ ᠤᠤᠬᠠᠢᠯᠠᠨ ᠬᠠᠰᠬᠢᠷᠤᠭᠰᠠᠭᠠᠷ ᠵᠢᠭᠰᠠᠵᠠᠭᠠᠵᠤ ᠪᠠᠢᠪᠠ᠃ 21 ᠢᠰᠷᠧᠯ ᠪᠣᠯᠣᠨ ᠹᠢᠯᠢᠰᠲ᠋ᠴᠦᠳ ᠦᠨ ᠴᠡᠷᠢᠭ ᠤᠳ ᠪᠠᠢᠯᠳᠤᠭᠠᠨ ᠤ ᠵᠢᠭᠰᠠᠭᠠᠯ ᠪᠡᠯᠡᠳᠦᠭᠡᠳ ᠥᠭᠡᠳᠡ ᠥᠭᠡᠳᠡ ᠡᠴᠡ ᠪᠡᠨ ᠬᠠᠷᠠᠯᠠ᠃ 22 ᠲᠡᠭᠡᠬᠦ ᠳᠦ ᠳ᠋ᠠᠸᠢᠳ᠋ ᠠᠪᠴᠢᠷᠠᠭᠰᠠᠨ ᠶᠠᠭᠤᠮᠠ ᠪᠠᠨ ᠴᠡᠷᠢᠭ ᠤᠨ ᠪᠠᠷᠠᠭᠠ ᠬᠠᠮᠢᠶᠠᠷᠤᠭᠴᠢ ᠳᠤ ᠣᠷᠬᠢᠭᠠᠳ᠂ ᠪᠠᠢᠯᠳᠤᠭᠠᠨ ᠤ ᠲᠠᠯᠠᠪᠤᠷ ᠤᠷᠤᠭᠤ ᠭᠦᠶᠦᠨ ᠣᠴᠢᠵᠤ᠂ ᠠᠬᠠ ᠨᠠᠷ ᠤᠨ ᠢᠶᠠᠨ ᠮᠡᠨᠳᠦ ᠶᠢ ᠠᠰᠠᠭᠤᠪᠠ᠃ 23 ᠠᠬᠠ ᠨᠠᠷ ᠲᠠᠢ ᠪᠠᠨ ᠶᠠᠷᠢᠯᠴᠠᠵᠤ ᠪᠠᠢᠬᠤ ᠳᠤᠨᠢ ᠹᠢᠯᠢᠰᠲ ᠤᠨ ᠭᠠᠲ ᠬᠥᠮᠦᠨ᠂ ᠨᠥᠭᠥᠭᠡ ᠲᠡᠷᠢᠭᠦᠨ ᠳᠠᠢᠴᠢᠨ ᠭᠣᠯᠢᠶᠠᠲ ᠵᠢᠭᠰᠠᠭᠠᠯ ᠠᠴᠠ ᠪᠠᠨ ᠭᠠᠷᠴᠤ ᠢᠷᠡᠨ᠂ ᠤᠷᠢᠳᠤ ᠶᠢᠨ ᠬᠡᠯᠡᠳᠡᠭ ᠢᠶᠡᠨ ᠬᠡᠯᠡᠬᠦ ᠳᠦ᠂ ᠳ᠋ᠠᠸᠢᠳ᠋ ᠣᠯᠵᠤ ᠰᠣᠨᠣᠰᠪᠠ᠃
24 ᠭᠡᠪᠡᠴᠦ ᠢᠰᠷᠧᠯ ᠤᠨ ᠪᠦᠬᠦ ᠡᠷᠡᠴᠦᠳ ᠲᠡᠷᠡ ᠬᠥᠮᠦᠨ ᠢ ᠬᠠᠷᠠᠭᠠᠳ᠂ ᠶᠡᠬᠡᠳᠡ ᠠᠶᠤᠨ ᠵᠢᠭᠤᠲᠠᠪᠠ᠃ 25 ᠢᠰᠷᠧᠯ ᠤᠨ ᠡᠷᠡᠴᠦᠳ᠄ 《ᠲᠡᠷᠡ ᠭᠠᠷᠴᠤ ᠢᠷᠡᠵᠦ ᠪᠠᠢᠭᠠ ᠬᠥᠮᠦᠨ ᠢ ᠬᠠᠷᠠᠪᠠ ᠤᠤ︖ ᠲᠡᠷᠡ ᠶᠠᠭ ᠢᠰᠷᠧᠯ ᠢ ᠳᠣᠷᠣᠮᠵᠢᠯᠠᠬᠤ ᠪᠠᠷ ᠭᠠᠷᠴᠤ ᠢᠷᠡᠵᠦ ᠪᠠᠢᠳᠠᠭ᠃ ᠲᠡᠭᠦᠨ ᠢ ᠠᠯᠠᠭᠰᠠᠨ ᠬᠥᠮᠦᠨ ᠢ ᠮᠠᠨ ᠤ ᠬᠠᠭᠠᠨ ᠶᠡᠬᠡ ᠡᠳ᠋ ᠬᠥᠷᠥᠩᠭᠡ ᠪᠡᠷ ᠱᠠᠩᠨᠠᠬᠤ ᠠᠴᠠ ᠭᠠᠳᠠᠨᠠ ᠥᠬᠢᠨ ᠢᠶᠠᠨ ᠥᠭᠴᠦ᠂ ᠲᠡᠭᠦᠨ ᠦ ᠡᠴᠢᠭᠡ ᠶᠢᠨ ᠭᠡᠷ ᠢ ᠢᠰᠷᠧᠯ ᠳᠠᠬᠢ ᠪᠦᠬᠦ ᠠᠯᠪᠠᠨ ᠠᠴᠠ ᠴᠢᠯᠥᠭᠡᠯᠡᠬᠦ ᠪᠣᠯᠣᠨᠠ》 ᠭᠡᠯᠴᠡᠪᠡ᠃ 26 ᠲᠡᠭᠡᠬᠦ ᠳᠦ ᠳ᠋ᠠᠸᠢᠳ᠋ ᠬᠠᠵᠠᠭᠤ ᠳᠠᠬᠢ ᠬᠥᠮᠦᠰ ᠲᠦ ᠶᠠᠷᠢᠨ᠄ 《ᠡᠨᠡ ᠹᠢᠯᠢᠰᠲ ᠬᠥᠮᠦᠨ ᠢ ᠠᠯᠠᠵᠤ᠂ ᠢᠰᠷᠧᠯ ᠡᠴᠡ ᠢᠴᠢᠭᠦᠷᠢ ᠶᠢ ᠠᠷᠢᠯᠭᠠᠬᠤ ᠬᠥᠮᠦᠨ ᠢ ᠶᠠᠭᠠᠬᠢᠨᠠ ᠭᠡᠨᠡ︖ ᠡᠨᠡ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠡ ᠦᠭᠡᠢ ᠹᠢᠯᠢᠰᠲ ᠬᠥᠮᠦᠨ ᠬᠡᠨ ᠪᠣᠯᠣᠭᠠᠳ ᠠᠮᠢᠳᠤ ᠪᠤᠷᠬᠠᠨ ᠤ ᠴᠡᠷᠢᠭ ᠢ ᠳᠣᠷᠣᠮᠵᠢᠯᠠᠵᠤ ᠪᠠᠢᠭᠠ ᠶᠤᠮ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 27 ᠬᠥᠮᠦᠰ ᠡᠮᠦᠨᠡᠬᠢ ᠶᠢᠨ ᠠᠳᠠᠯᠢ ᠪᠠᠷ᠂ ᠲᠡᠭᠦᠨ ᠢ ᠠᠯᠠᠭᠰᠠᠨ ᠬᠥᠮᠦᠨ ᠢ ᠢᠩᠭᠢᠨᠡ ᠲᠡᠭᠡᠨᠡ ᠭᠡᠵᠡᠭᠡᠪᠡ᠃
28 ᠲᠡᠭᠦᠨ ᠦ ᠬᠥᠮᠦᠰ ᠲᠡᠢ ᠶᠠᠷᠢᠵᠤ ᠪᠠᠢᠬᠤ ᠶᠢ ᠠᠬᠠ ᠡᠯᠢᠶᠠᠪ ᠨᠢ ᠰᠣᠨᠣᠰᠴᠠᠢ᠃ ᠡᠯᠢᠶᠠᠪ ᠳ᠋ᠠᠸᠢᠳ᠋ ᠲᠤ ᠶᠡᠬᠡᠳᠡ ᠠᠭᠤᠷᠯᠠᠨ᠄ 《ᠴᠢ ᠶᠠᠭᠠᠬᠢᠬᠤ ᠭᠡᠵᠦ ᠨᠠᠰᠢ ᠪᠠᠨ ᠢᠷᠡᠭᠰᠡᠨ ᠶᠤᠮ ᠪᠤᠢ︖ ᠬᠡᠭᠡᠷᠡ ᠪᠠᠢᠭᠠ ᠬᠡᠳᠦᠨ ᠬᠣᠨᠢ ᠪᠠᠨ ᠬᠡᠨ ᠳᠦ ᠣᠷᠬᠢᠴᠢᠬᠠᠪᠠ᠂ ᠴᠢ︖ ᠴᠢᠨᠦ ᠪᠠᠷᠳᠠᠮ ᠵᠠᠩ᠂ ᠮᠠᠭᠤ ᠰᠠᠨᠠᠭᠠ ᠶᠢ ᠪᠢ ᠮᠡᠳᠡᠨᠡ᠃ ᠪᠠᠢᠯᠳᠤᠭᠠᠨ ᠢ ᠦᠵᠡᠬᠦ ᠪᠡᠷ ᠢᠷᠡᠭᠰᠡᠨ ᠪᠢᠵᠡ ᠳᠠ᠂ ᠴᠢ︖》 ᠭᠡᠵᠦ ᠵᠠᠩᠨᠠᠪᠠ᠃ 29 ᠬᠠᠷᠢᠨ ᠳ᠋ᠠᠸᠢᠳ᠋᠄ 《ᠪᠢ ᠰᠠᠶ᠋ᠢ ᠶᠠᠭᠠᠬᠢᠭᠰᠠᠨ ᠭᠡᠵᠢ︖ ᠵᠦᠭᠡᠷ ᠶᠠᠭᠤᠮᠠ ᠠᠰᠠᠭᠤᠵᠤ ᠪᠣᠯᠳᠠᠭ ᠦᠭᠡᠢ ᠶᠤᠮ ᠤᠤ︖》 ᠭᠡᠵᠦ ᠬᠡᠯᠡᠪᠡ᠃ 30 ᠳ᠋ᠠᠸᠢᠳ᠋ ᠴᠠᠰᠢ ᠡᠷᠭᠢᠨ ᠬᠥᠮᠦᠰ ᠡᠴᠡ ᠲᠡᠷᠡ ᠯᠠ ᠵᠦᠢᠯ ᠢᠶᠠᠨ ᠠᠰᠠᠭᠤᠬᠤ ᠳᠤ᠂ ᠬᠥᠮᠦᠰ ᠲᠦᠷᠦᠭᠦᠴᠢ ᠶᠢᠨ ᠬᠢ ᠲᠠᠢ ᠪᠠᠨ ᠠᠳᠠᠯᠢ ᠲᠡᠭᠡᠨᠡ ᠭᠡᠰᠡᠨ ᠬᠠᠷᠢᠭᠤ ᠥᠭᠴᠡᠢ᠃
31 ᠳ᠋ᠠᠸᠢᠳ᠋ ᠤᠨ ᠬᠡᠯᠡᠭᠰᠡᠨ ᠦᠭᠡ ᠶᠢ ᠬᠥᠮᠦᠰ ᠰᠣᠨᠣᠰᠣᠭᠠᠳ ᠰᠠᠦ᠋ᠯ ᠳᠤ ᠮᠡᠳᠡᠭᠦᠯᠦᠭᠰᠡᠨ ᠳᠦ᠂ ᠰᠠᠦ᠋ᠯ ᠳ᠋ᠠᠸᠢᠳ᠋ ᠢ ᠳᠠᠭᠤᠳᠠᠨ ᠠᠪᠴᠢᠷᠠᠭᠤᠯᠪᠠ᠃ 32 ᠳ᠋ᠠᠸᠢᠳ᠋ ᠰᠠᠦ᠋ᠯ ᠳᠤ᠄ 《ᠲᠡᠷᠡ ᠬᠥᠮᠦᠨ ᠡᠴᠡ ᠪᠣᠯᠵᠤ ᠬᠡᠨ ᠴᠤ ᠪᠦᠦ ᠵᠢᠷᠦᠬᠡ ᠠᠯᠳᠠᠭ᠂ ᠪᠣᠭᠣᠯ ᠨᠢ ᠶᠠᠪᠤᠵᠤ᠂ ᠲᠡᠷᠡ ᠹᠢᠯᠢᠰᠲ ᠬᠥᠮᠦᠨ ᠲᠡᠢ ᠲᠤᠯᠤᠯᠳᠤᠶᠠ》 ᠭᠡᠪᠡ᠃ 33 ᠰᠠᠦ᠋ᠯ ᠳ᠋ᠠᠸᠢᠳ᠋ ᠲᠤ᠄ 《ᠴᠢ ᠲᠡᠷᠡ ᠹᠢᠯᠢᠰᠲ ᠬᠥᠮᠦᠨ ᠤᠷᠤᠭᠤ ᠣᠴᠢᠵᠤ ᠲᠡᠭᠦᠨ ᠲᠡᠢ ᠲᠤᠯᠤᠯᠳᠤᠵᠤ ᠳᠡᠢᠯᠬᠦ ᠦᠭᠡᠢ᠃ ᠴᠢ ᠡᠢᠮᠦ ᠪᠠᠭᠠ ᠵᠠᠯᠠᠭᠤ ᠬᠥᠮᠦᠨ᠂ ᠬᠠᠷᠢᠨ ᠲᠡᠷᠡ ᠪᠣᠯ ᠵᠠᠯᠠᠭᠤ ᠪᠠᠢᠬᠤ ᠠᠴᠠ ᠪᠠᠨ ᠴᠡᠷᠢᠭ ᠤᠨ ᠬᠥᠮᠦᠨ ᠪᠠᠢᠭᠰᠠᠨ》 ᠭᠡᠪᠡ᠃ 34 ᠭᠡᠪᠡᠴᠦ ᠳ᠋ᠠᠸᠢᠳ᠋ ᠰᠠᠦ᠋ᠯ ᠳᠤ᠄ 《ᠪᠣᠭᠣᠯ ᠨᠢ ᠡᠴᠢᠭᠡ ᠶᠢᠨ ᠢᠶᠠᠨ ᠬᠣᠨᠢ ᠶᠢ ᠬᠠᠷᠢᠭᠤᠯᠤᠭᠰᠠᠭᠠᠷ ᠢᠷᠡᠭᠰᠡᠨ᠃ ᠠᠷᠰᠯᠠᠨ ᠪᠤᠶᠤ ᠪᠠᠭᠠᠪᠠᠭᠠᠢ ᠢᠷᠡᠭᠡᠳ᠂ ᠬᠣᠨᠢᠨ ᠰᠦᠷᠦᠭ ᠡᠴᠡ ᠮᠢᠨᠢ ᠬᠤᠷᠠᠭᠠ ᠪᠠᠷᠢᠬᠤ ᠳᠤ᠂ 35 ᠪᠢ ᠠᠷᠤ ᠠᠴᠠ ᠨᠢ ᠳᠠᠭᠠᠷᠢᠨ ᠨᠣᠴᠣᠵᠤ ᠠᠮᠠᠨ ᠠᠴᠠ ᠨᠢ ᠬᠤᠷᠠᠭᠠ ᠪᠠᠨ ᠠᠪᠤᠷᠠᠳᠠᠭ ᠪᠠᠢᠭᠰᠠᠨ᠃ ᠬᠡᠷᠪᠡ ᠲᠡᠷᠡ ᠨᠠᠳᠠ ᠤᠷᠤᠭᠤ ᠳᠠᠭᠠᠷᠢᠪᠠᠯ ᠪᠢ ᠰᠠᠬᠠᠯ ᠠᠴᠠ ᠨᠢ ᠰᠢᠭᠦᠷᠦᠨ ᠠᠪᠴᠤ᠂ ᠲᠡᠭᠦᠨ ᠢ ᠴᠣᠬᠢᠵᠤ ᠠᠯᠠᠳᠠᠭ ᠪᠠᠢᠪᠠ᠃ 36 ᠪᠣᠭᠣᠯ ᠨᠢ ᠠᠷᠰᠯᠠᠨ ᠢ ᠴᠤ᠂ ᠪᠠᠭᠠᠪᠠᠭᠠᠢ ᠶᠢ ᠴᠤ ᠴᠣᠬᠢᠵᠤ ᠠᠯᠠᠳᠠᠭ ᠪᠣᠯᠬᠣᠷ ᠲᠡᠷᠡ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠡ ᠦᠭᠡᠢ ᠹᠢᠯᠢᠰᠲ ᠬᠥᠮᠦᠨ ᠢ ᠴᠤ ᠲᠡᠳᠡᠨ ᠲᠡᠢ ᠨᠢᠭᠡ ᠠᠳᠠᠯᠢ ᠪᠣᠯᠭᠠᠶᠠ᠃ ᠲᠡᠷᠡ ᠠᠮᠢᠳᠤ ᠪᠤᠷᠬᠠᠨ ᠤ ᠴᠡᠷᠢᠭ ᠢ ᠳᠣᠷᠣᠮᠵᠢᠯᠠᠭᠰᠠᠨ ᠰᠢᠦ》 ᠭᠡᠵᠦ ᠬᠡᠯᠡᠪᠡ᠃ 37 ᠳ᠋ᠠᠸᠢᠳ᠋ ᠴᠢᠨᠠᠭᠰᠢ ᠨᠢ᠄ 《ᠠᠷᠰᠯᠠᠨ᠂ ᠪᠠᠭᠠᠪᠠᠭᠠᠢ ᠶᠢᠨ ᠰᠠᠪᠠᠷ ᠠᠴᠠ ᠨᠠᠮᠠᠶᠢ ᠠᠪᠤᠷᠠᠭᠰᠠᠨ ᠶᠣᠬᠣᠸᠠ ᠲᠡᠷᠡ ᠹᠢᠯᠢᠰᠲ ᠬᠥᠮᠦᠨ ᠦ ᠭᠠᠷ ᠠᠴᠠ ᠴᠤ ᠨᠠᠮᠠᠶᠢ ᠠᠪᠤᠷᠠᠨᠠ》 ᠭᠡᠬᠦ ᠳᠦ᠂ ᠰᠠᠦ᠋ᠯ ᠳ᠋ᠠᠸᠢᠳ᠋ ᠲᠤ᠄ 《ᠶᠠᠪᠤᠭᠲᠤᠨ᠂ ᠶᠣᠬᠣᠸᠠ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠲᠤᠭᠠᠢ》 ᠭᠡᠵᠦ ᠬᠡᠯᠡᠪᠡ᠃
38 ᠲᠡᠭᠡᠭᠡᠳ ᠰᠠᠦ᠋ᠯ ᠳ᠋ᠠᠸᠢᠳ᠋ ᠢ ᠥᠪᠡᠷ ᠦᠨ ᠢᠶᠠᠨ ᠬᠤᠪᠴᠠᠰᠤ ᠪᠠᠷ ᠬᠤᠪᠴᠠᠰᠤᠯᠠᠵᠤ᠂ ᠲᠣᠯᠣᠭᠠᠢ ᠳᠤᠨᠢ ᠬᠦᠷᠡᠯ ᠳᠤᠭᠤᠯᠠᠭᠠ ᠪᠠᠨ ᠡᠮᠦᠰᠬᠡᠵᠦ᠂ ᠪᠡᠶᠡ ᠳᠦᠨᠢ ᠬᠤᠶᠠᠭ ᠢᠶᠠᠨ ᠡᠮᠦᠰᠬᠡᠪᠡ᠃ 39 ᠳ᠋ᠠᠸᠢᠳ᠋ ᠰᠠᠦ᠋ᠯ ᠤᠨ ᠬᠤᠶᠠᠭ ᠤᠨ ᠭᠠᠳᠠᠭᠤᠷ ᠰᠠᠦ᠋ᠯ ᠤᠨ ᠢᠯᠳᠦ ᠶᠢ ᠴᠤ ᠪᠦᠰᠡᠯᠡᠵᠦ ᠵᠡᠭᠦᠪᠡ᠂ ᠬᠠᠷᠢᠨ ᠡᠢᠮᠦ ᠵᠦᠢᠯ ᠳᠤ ᠳᠠᠰᠤᠭᠠ ᠦᠭᠡᠢ ᠲᠤᠯᠠ ᠳ᠋ᠠᠸᠢᠳ᠋ ᠠᠯᠬᠤᠬᠤ ᠭᠡᠵᠦ ᠣᠷᠣᠯᠳᠤᠭᠰᠠᠨ ᠤ ᠳᠠᠷᠠᠭᠠ᠂ ᠰᠠᠦ᠋ᠯ ᠳᠤ᠄ 《ᠳᠠᠰᠤᠭᠠ ᠦᠭᠡᠢ ᠪᠣᠯᠬᠣᠷ ᠪᠢ ᠡᠭᠦᠨ ᠢ ᠡᠮᠦᠰᠴᠦ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ ᠨᠢ》 ᠭᠡᠳ ᠡᠮᠦᠰᠬᠡᠯ ᠢ ᠨᠢ ᠲᠠᠢᠯᠵᠠᠢ᠃ 40 ᠲᠡᠷᠡ ᠥᠪᠡᠷ ᠦᠨ ᠢᠶᠠᠨ ᠲᠠᠶᠠᠭ ᠢ ᠭᠠᠷ ᠲᠠᠭᠠᠨ ᠠᠪᠴᠤ᠂ ᠭᠣᠷᠣᠬᠠᠨ ᠠᠴᠠ ᠲᠠᠪᠤᠨ ᠮᠥᠯᠢᠭᠡᠷ ᠴᠢᠯᠠᠭᠤ ᠰᠢᠯᠢᠵᠦ ᠠᠪᠤᠭᠠᠳ ᠥᠪᠡᠷ ᠦᠨ ᠢᠶᠠᠨ ᠠᠪᠴᠤ ᠶᠠᠪᠤᠭᠰᠠᠨ ᠬᠤᠷᠠᠭᠠᠨ ᠤ ᠤᠭᠤᠲᠠᠨ ᠳᠤ ᠬᠢᠵᠦ᠂ ᠳᠦᠦᠭᠡᠦᠷ ᠢᠶᠡᠨ ᠭᠠᠷ ᠲᠠᠭᠠᠨ ᠪᠠᠷᠢᠭᠠᠳ᠂ ᠥᠨᠥᠬᠢ ᠹᠢᠯᠢᠰᠲ ᠬᠥᠮᠦᠨ ᠤᠷᠤᠭᠤ ᠶᠠᠪᠤᠪᠠ᠃
41 ᠥᠨᠥᠬᠢ ᠹᠢᠯᠢᠰᠲ ᠬᠥᠮᠦᠨ ᠴᠤ ᠳ᠋ᠠᠸᠢᠳ᠋ ᠤᠷᠤᠭᠤ ᠣᠢᠷᠠᠲᠤᠨ ᠢᠷᠡᠵᠦ ᠪᠠᠢᠯᠠ᠃ ᠡᠮᠦᠨᠡ ᠨᠢ ᠲᠡᠭᠦᠨ ᠦ ᠪᠠᠮᠪᠠᠢ ᠪᠠᠷᠢᠭᠴᠢ ᠶᠠᠪᠤᠵᠤ ᠪᠠᠢᠪᠠ᠃ 42 ᠹᠢᠯᠢᠰᠲ ᠬᠥᠮᠦᠨ ᠳ᠋ᠠᠸᠢᠳ᠋ ᠢ ᠬᠠᠷᠠᠭᠠᠳ ᠤᠯᠠᠭᠠ ᠪᠤᠲᠠᠷᠠᠭᠰᠠᠨ᠂ ᠰᠠᠢᠬᠠᠨ ᠴᠢᠷᠠᠢ ᠲᠠᠢ ᠵᠠᠯᠠᠭᠤ ᠪᠠᠢᠬᠤ ᠶᠢ ᠦᠵᠡᠭᠡᠳ ᠲᠣᠭᠣᠮᠰᠠᠷᠯᠠᠵᠤ ᠶᠠᠳᠠᠪᠠ᠃ 43 ᠹᠢᠯᠢᠰᠲ ᠬᠥᠮᠦᠨ ᠳ᠋ᠠᠸᠢᠳ᠋ ᠲᠤ᠄ 《ᠴᠢ ᠶᠠᠭᠠᠬᠢᠬᠤ ᠭᠡᠵᠦ ᠲᠠᠶᠠᠭ ᠪᠠᠷᠢᠵᠤ ᠨᠠᠳᠠ ᠤᠷᠤᠭᠤ ᠢᠷᠡᠪᠡ︖ ᠨᠠᠮᠠᠶᠢ ᠨᠣᠬᠠᠢ ᠭᠡᠵᠦ ᠪᠣᠳᠣᠪᠠ ᠤᠤ︖》 ᠬᠡᠮᠡᠨ ᠥᠪᠡᠷ ᠦᠨ ᠢᠶᠠᠨ ᠪᠤᠷᠬᠠᠳ ᠤᠨ ᠨᠡᠷᠡ ᠪᠡᠷ ᠳ᠋ᠠᠸᠢᠳ᠋ ᠢ ᠬᠠᠷᠢᠶᠠᠪᠠ᠃ 44 ᠹᠢᠯᠢᠰᠲ ᠬᠥᠮᠦᠨ ᠳ᠋ᠠᠸᠢᠳ᠋ ᠲᠤ᠄ 《ᠨᠠᠰᠢ ᠢᠷᠡ᠂ ᠮᠢᠬᠠ ᠶᠢ ᠴᠢᠨᠢ ᠪᠢ ᠣᠭᠲᠠᠷᠭᠤᠢ ᠶᠢᠨ ᠰᠢᠪᠠᠭᠤᠳ᠂ ᠬᠡᠭᠡᠷᠡ ᠶᠢᠨ ᠠᠷᠢᠶᠠᠲᠠᠨ ᠳᠤ ᠥᠭᠭᠥᠶᠡ》 ᠭᠡᠬᠦ ᠳᠦ᠂ 45 ᠳ᠋ᠠᠸᠢᠳ᠋ ᠹᠢᠯᠢᠰᠲ ᠬᠥᠮᠦᠨ ᠳᠦ᠄ 《ᠴᠢ ᠢᠯᠳᠦ᠂ ᠪᠠᠮᠪᠠᠢ᠂ ᠵᠢᠳᠠ ᠪᠠᠷᠢᠵᠤ ᠨᠠᠳᠠ ᠤᠷᠤᠭᠤ ᠢᠷᠡᠵᠦ ᠪᠠᠢᠭᠠ ᠪᠣᠯ᠂ ᠪᠢ ᠴᠢᠨᠦ ᠳᠣᠷᠣᠮᠵᠢᠯᠠᠭᠰᠠᠨ ᠢᠰᠷᠧᠯ ᠤᠨ ᠴᠡᠷᠢᠭ ᠤᠨ ᠪᠤᠷᠬᠠᠨ᠂ ᠠᠤᠭᠠ ᠬᠦᠴᠦᠲᠦ ᠶᠣᠬᠣᠸᠠ ᠶᠢᠨ ᠨᠡᠷᠡ ᠪᠡᠷ ᠴᠢᠮᠠ ᠤᠷᠤᠭᠤ ᠢᠷᠡᠵᠦ ᠪᠠᠢᠨᠠ᠃ 46 ᠥᠨᠥᠳᠥᠷ ᠶᠣᠬᠣᠸᠠ ᠴᠢᠮᠠᠶᠢ ᠮᠢᠨᠦ ᠭᠠᠷ ᠲᠤ ᠥᠭᠭᠥᠨᠡ᠃ ᠪᠢ ᠴᠢᠮᠠᠶᠢ ᠴᠣᠬᠢᠵᠤ ᠴᠢᠨᠦ ᠲᠣᠯᠣᠭᠠᠢ ᠶᠢ ᠪᠡᠶᠡ ᠡᠴᠡ ᠴᠢᠨᠢ ᠲᠠᠰᠤᠯᠤᠨᠠ᠃ ᠥᠨᠥᠳᠥᠷ ᠪᠢ ᠹᠢᠯᠢᠰᠲ ᠴᠡᠷᠢᠭ ᠤᠳ ᠤᠨ ᠬᠡᠭᠦᠷ ᠢ ᠣᠭᠲᠠᠷᠭᠤᠢ ᠶᠢᠨ ᠰᠢᠪᠠᠭᠤᠳ᠂ ᠬᠡᠭᠡᠷᠡ ᠶᠢᠨ ᠠᠷᠢᠶᠠᠲᠠᠨ ᠳᠤ ᠥᠭᠭᠥᠨᠡ᠃ ᠭᠠᠵᠠᠷ ᠤᠨ ᠰᠠᠭᠤᠭᠠᠯᠢᠴᠢᠳ ᠪᠦᠭᠦᠳᠡᠭᠡᠷ ᠢᠰᠷᠧᠯ ᠳᠤ ᠪᠤᠷᠬᠠᠨ ᠪᠠᠢᠨᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃ 47 ᠡᠨᠡ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠴᠤ ᠶᠣᠬᠣᠸᠠ ᠢᠯᠳᠦ᠂ ᠵᠢᠳᠠ ᠬᠡᠷᠡᠭᠯᠡᠯ ᠦᠭᠡᠢ ᠪᠠᠷ ᠠᠪᠤᠷᠠᠨᠠ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠣᠨᠠ᠃ ᠪᠠᠢᠯᠳᠤᠭᠠᠨ ᠪᠣᠯ ᠶᠣᠬᠣᠸᠠ ᠶᠢᠨ ᠬᠢ᠂ ᠶᠣᠬᠣᠸᠠ ᠲᠠ ᠨᠠᠷ ᠢ ᠪᠢᠳᠡᠨ ᠦ ᠭᠠᠷ ᠲᠤ ᠥᠭᠭᠥᠨᠡ》 ᠭᠡᠪᠡ᠃
48 ᠹᠢᠯᠢᠰᠲ ᠬᠥᠮᠦᠨ ᠬᠥᠳᠡᠯᠵᠦ᠂ ᠳ᠋ᠠᠸᠢᠳ᠋ ᠤᠨ ᠥᠭᠡᠳᠡ ᠡᠴᠡ ᠲᠤᠯᠤᠯᠳᠤᠬᠤ ᠪᠠᠷ ᠣᠢᠷᠠᠲᠤᠨ ᠢᠷᠡᠬᠦ ᠳᠦ᠂ ᠳ᠋ᠠᠸᠢᠳ᠋ ᠴᠤ ᠲᠡᠭᠦᠨ ᠲᠡᠢ ᠲᠤᠯᠤᠯᠳᠤᠬᠤ ᠪᠠᠷ ᠪᠠᠢᠯᠳᠤᠭᠠᠨ ᠤ ᠲᠠᠯᠠᠪᠤᠷ ᠤᠷᠤᠭᠤ ᠬᠤᠷᠳᠤᠨ ᠭᠦᠶᠦᠵᠦ ᠭᠠᠷᠪᠠ᠃ 49 ᠳ᠋ᠠᠸᠢᠳ᠋ ᠤᠭᠤᠲᠠ ᠤᠷᠤᠭᠤ ᠪᠠᠨ ᠭᠠᠷ ᠢᠶᠠᠨ ᠶᠠᠪᠤᠭᠤᠯᠵᠤ᠂ ᠨᠢᠭᠡ ᠴᠢᠯᠠᠭᠤ ᠭᠠᠷᠭᠠᠵᠤ ᠠᠪᠤᠭᠠᠳ ᠳᠦᠦᠭᠡᠦᠷ ᠢᠶᠡᠷ ᠳᠦᠦᠭᠡᠦᠷᠳᠡᠨ᠂ ᠹᠢᠯᠢᠰᠲ ᠬᠥᠮᠦᠨ ᠦ ᠮᠠᠩᠨᠠᠢ ᠶᠢ ᠣᠨᠣᠪᠠ᠃ ᠴᠢᠯᠠᠭᠤ ᠮᠠᠩᠨᠠᠢ ᠤᠷᠤᠭᠤ ᠨᠢ ᠰᠢᠭᠢᠳᠦᠨ ᠣᠷᠣᠬᠤ ᠳᠤ᠂ ᠲᠡᠷᠡ ᠨᠢᠭᠤᠷ ᠢᠶᠠᠷ ᠢᠶᠠᠨ ᠭᠠᠵᠠᠷ ᠰᠢᠭᠠᠨ ᠤᠨᠠᠯᠠ᠃
50 ᠡᠢᠨ ᠬᠦ ᠳ᠋ᠠᠸᠢᠳ᠋ ᠳᠦᠦᠭᠡᠦᠷ ᠪᠣᠯᠣᠨ ᠨᠢᠭᠡ ᠴᠢᠯᠠᠭᠤ ᠪᠠᠷ ᠥᠨᠥᠬᠢ ᠹᠢᠯᠢᠰᠲ ᠬᠥᠮᠦᠨ ᠢ ᠢᠯᠠᠵᠠᠢ᠃ ᠲᠡᠷᠡ ᠢᠯᠳᠦ ᠦᠭᠡᠢ ᠭᠠᠷ ᠢᠶᠠᠷ ᠢᠶᠠᠨ ᠹᠢᠯᠢᠰᠲ ᠬᠥᠮᠦᠨ ᠢ ᠴᠣᠬᠢᠵᠤ ᠠᠯᠠᠪᠠ᠃ 51 ᠳ᠋ᠠᠸᠢᠳ᠋ ᠭᠦᠶᠦᠨ ᠣᠴᠢᠭᠠᠳ ᠲᠡᠷᠡ ᠹᠢᠯᠢᠰᠲ ᠬᠥᠮᠦᠨ ᠦ ᠳᠡᠭᠡᠷᠡ ᠭᠠᠷᠴᠤ᠂ ᠲᠡᠭᠦᠨ ᠦ ᠢᠯᠳᠦ ᠶᠢ ᠬᠤᠢ ᠠᠴᠠ ᠨᠢ ᠰᠤᠭᠤᠯᠤᠨ ᠠᠪᠴᠤ᠂ ᠲᠡᠭᠦᠨ ᠢ ᠠᠯᠠᠭᠠᠳ ᠲᠣᠯᠣᠭᠠᠢ ᠶᠢ ᠨᠢ ᠴᠠᠪᠴᠢᠪᠠ᠃
52 ᠢᠰᠷᠧᠯ ᠪᠣᠯᠣᠨ ᠶᠦᠳᠠᠢᠴᠤᠳ ᠬᠥᠳᠡᠯᠦᠯᠴᠡᠨ᠂ ᠤᠤᠬᠠᠢᠯᠠᠨ ᠬᠠᠰᠬᠢᠷᠴᠤ᠂ ᠹᠢᠯᠢᠰᠲ᠋ᠴᠦᠳ ᠢ ᠬᠥᠭᠡᠭᠡᠭᠰᠡᠭᠡᠷ ᠬᠥᠨᠳᠡᠢ ᠲᠠᠯᠠ ᠶᠢ ᠥᠩᠭᠡᠷᠡᠵᠦ ᠡᠺᠷᠣᠨ ᠤ ᠬᠠᠭᠠᠯᠭᠠ ᠬᠦᠷᠪᠡ᠃ ᠦᠬᠦᠵᠦ ᠰᠢᠷᠬᠠᠲᠤᠭᠰᠠᠨ ᠹᠢᠯᠢᠰᠲ᠋ᠴᠦᠳ ᠱᠠᠶᠠᠷᠠᠢᠮ ᠠᠴᠠ ᠭᠠᠲ ᠢ ᠳᠠᠭᠠᠷᠢᠨ ᠡᠺᠷᠣᠨ ᠳᠤ ᠬᠦᠷᠬᠦ ᠵᠠᠮ ᠳᠡᠭᠡᠷᠡ ᠡ᠊ᠨᠳᠡ ᠲᠡᠨᠳᠡ ᠦᠭᠡᠢ ᠤᠨᠠᠵᠠᠭᠠᠭᠰᠠᠨ ᠪᠠᠢᠪᠠ᠃ 53 ᠢᠰᠷᠧᠯᠴᠦᠳ ᠹᠢᠯᠢᠰᠲ᠋ᠴᠦᠳ ᠢ ᠬᠥᠭᠡᠭᠡᠬᠦ ᠪᠡᠨ ᠪᠣᠯᠢᠵᠤ ᠪᠤᠴᠠᠵᠤ ᠢᠷᠡᠭᠡᠳ᠂ ᠹᠢᠯᠢᠰᠲ᠋ᠴᠦᠳ ᠦᠨ ᠬᠤᠸᠠᠷᠠᠨ ᠨᠤᠭᠤᠳ ᠢ ᠲᠣᠨᠣᠵᠠᠢ᠃ 54 ᠳ᠋ᠠᠸᠢᠳ᠋ ᠨᠥᠭᠥᠭᠡ ᠹᠢᠯᠢᠰᠲ ᠬᠥᠮᠦᠨ ᠦ ᠲᠣᠯᠣᠭᠠᠢ ᠶᠢ ᠶᠧᠷᠦ᠋ᠰᠠᠯᠧᠮ ᠳᠤ ᠠᠪᠠᠴᠢᠵᠤ᠂ ᠵᠡᠪᠰᠡᠭ ᠢ ᠨᠢ ᠮᠠᠢᠬᠠᠨ ᠳᠠᠭᠠᠨ ᠲᠠᠯᠪᠢᠪᠠ᠃
55 ᠳ᠋ᠠᠸᠢᠳ᠋ ᠲᠡᠷᠡ ᠬᠦ ᠹᠢᠯᠢᠰᠲ ᠬᠥᠮᠦᠨ ᠦ ᠡᠰᠡᠷᠭᠦ ᠭᠠᠷᠴᠤ ᠶᠠᠪᠤᠬᠤ ᠶᠢ ᠰᠠᠦ᠋ᠯ ᠬᠠᠷᠠᠭᠠᠳ ᠴᠡᠷᠢᠭ ᠤᠨ ᠶᠡᠷᠦᠩᠬᠡᠢ ᠵᠠᠬᠢᠷᠤᠭᠴᠢ ᠠᠪᠨᠧᠷ ᠡᠴᠡ᠄ 《ᠠᠪᠨᠧᠷ ᠡ᠂ ᠡᠨᠡ ᠵᠠᠯᠠᠭᠤ ᠬᠡᠨ ᠦ ᠬᠥᠪᠡᠭᠦᠨ ᠪᠤᠢ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠠᠪᠨᠧᠷ᠄ 《ᠬᠠᠭᠠᠨᠲᠠᠨ ᠮᠢᠨᠢ᠂ ᠲᠠᠨ ᠤ ᠠᠮᠢᠳᠤ ᠪᠠᠢᠬᠤ ᠲᠠᠢ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ᠂ ᠪᠢ ᠦᠯᠦ ᠮᠡᠳᠡᠨᠡ》 ᠭᠡᠪᠡ᠃ 56 ᠲᠡᠭᠡᠭᠡᠳ ᠬᠠᠭᠠᠨ᠄ 《ᠲᠡᠷᠡ ᠵᠠᠯᠠᠭᠤ ᠬᠡᠨ ᠦ ᠬᠥᠪᠡᠭᠦᠨ ᠪᠣᠯᠬᠤ ᠶᠢ ᠯᠠᠪᠯᠠᠭᠲᠤᠨ》 ᠭᠡᠯᠡ᠃ 57 ᠳ᠋ᠠᠸᠢᠳ᠋ ᠲᠡᠷᠡ ᠹᠢᠯᠢᠰᠲ ᠬᠥᠮᠦᠨ ᠢ ᠠᠯᠠᠭᠠᠳ ᠪᠤᠴᠠᠵᠤ ᠢᠷᠡᠬᠦ ᠳᠦᠨᠢ ᠠᠪᠨᠧᠷ ᠲᠡᠭᠦᠨ ᠢ ᠳᠠᠭᠠᠭᠤᠯᠤᠨ ᠰᠠᠦ᠋ᠯ ᠤᠨ ᠡᠮᠦᠨᠡ ᠬᠦᠷᠪᠡ᠃ ᠳ᠋ᠠᠸᠢᠳ᠋ ᠤᠨ ᠭᠠᠷ ᠲᠤ ᠹᠢᠯᠢᠰᠲ ᠬᠥᠮᠦᠨ ᠦ ᠲᠣᠯᠣᠭᠠᠢ ᠪᠠᠢᠪᠠ᠃ 58 ᠰᠠᠦ᠋ᠯ ᠳ᠋ᠠᠸᠢᠳ᠋ ᠠᠴᠠ᠄ 《ᠵᠠᠯᠠᠭᠤ ᠮᠢᠨᠢ᠂ ᠴᠢ ᠬᠡᠨ ᠦ ᠬᠥᠪᠡᠭᠦᠨ ᠪᠤᠢ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ ᠳ᠋ᠠᠸᠢᠳ᠋᠄ 《ᠪᠢ ᠲᠠᠨ ᠤ ᠪᠣᠭᠣᠯ ᠪᠧᠲ᠋ᠯᠧᠾᠧᠮ ᠤᠨ ᠬᠥᠮᠦᠨ ᠢᠱᠠᠢ ᠶᠢᠨ ᠬᠥᠪᠡᠭᠦᠨ》 ᠭᠡᠪᠡ᠃