ᠨᠢᠭᠡᠳᠦᠭᠡᠷ ᠰᠠᠮᠦ᠋ᠶᠧᠯ ᠶᠢᠰᠦ
ᠡᠯᠵᠢᠭᠡ ᠪᠡᠨ ᠡᠷᠢᠭᠰᠡᠨ ᠰᠠᠦ᠋ᠯ ᠡᠷᠬᠢᠮ ᠲᠢᠲᠢᠮ ᠣᠯᠪᠠ
1 ᠪᠢᠨᠶᠠᠮᠢᠨᠴᠤᠳ ᠤᠨ ᠳᠣᠲᠣᠷᠠ ᠺᠢᠱ ᠭᠡᠳᠡᠭ ᠬᠦᠴᠦ ᠲᠠᠢ᠂ ᠬᠥᠷᠥᠩᠭᠡ ᠲᠠᠢ ᠬᠥᠮᠦᠨ ᠪᠠᠢᠵᠠᠢ᠃ ᠲᠡᠷᠡ ᠪᠣᠯ ᠪᠢᠨᠶᠠᠮᠢᠨ ᠬᠥᠮᠦᠨ ᠠᠹᠢᠶᠠ ᠶᠢᠨ ᠭᠤᠴᠢ᠂ ᠪᠧᠺᠣᠷᠠᠲ ᠤᠨ ᠵᠢᠴᠢ᠂ ᠠᠽᠧᠷᠣᠷ ᠤᠨ ᠠᠴᠢ᠂ ᠠᠪᠢᠶᠧᠯ ᠤᠨ ᠬᠥᠪᠡᠭᠦᠨ ᠪᠢᠯᠡ᠃ 2 ᠺᠢᠱ ᠨᠢᠭᠡ ᠬᠦᠦ ᠲᠠᠢ ᠪᠥᠭᠡᠳ ᠲᠡᠭᠦᠨ ᠦ ᠨᠡᠷᠡ ᠶᠢ ᠰᠠᠦ᠋ᠯ ᠭᠡᠳᠡᠭ ᠪᠠᠢᠪᠠ᠃ ᠰᠠᠦ᠋ᠯ ᠨᠠᠰᠤ ᠵᠠᠯᠠᠭᠤ᠂ ᠪᠡᠶᠡ ᠪᠢᠯᠳᠠᠷ ᠰᠠᠢᠲᠠᠢ ᠪᠥᠭᠡᠳ ᠢᠰᠷᠧᠯ ᠤᠨ ᠬᠥᠪᠡᠭᠦᠳ ᠦᠨ ᠳᠣᠲᠣᠷᠠ ᠲᠡᠭᠦᠨ ᠡᠴᠡ ᠢᠯᠡᠭᠦᠦ ᠰᠠᠢᠬᠠᠨ ᠨᠢ ᠦᠭᠡᠢ ᠪᠠᠢᠪᠠ᠃ ᠲᠡᠷᠡ ᠠᠷᠠᠳ ᠣᠯᠠᠨ ᠠᠴᠠ ᠲᠣᠯᠣᠭᠠᠢ ᠢᠯᠡᠭᠦᠦ ᠥᠨᠳᠥᠷ ᠠᠵᠢ᠃
3 ᠨᠢᠭᠡ ᠤᠳᠠᠭᠠ ᠰᠠᠦ᠋ᠯ ᠤᠨ ᠡᠴᠢᠭᠡ ᠺᠢᠱ ᠤᠨ ᠬᠡᠳᠦᠨ ᠡᠮᠡ ᠡᠯᠵᠢᠭᠡ ᠨᠢ ᠠᠯᠠᠭᠠ ᠪᠣᠯᠵᠠᠢ᠃ ᠺᠢᠱ ᠬᠦᠦ ᠰᠠᠦ᠋ᠯ ᠳᠠᠭᠠᠨ᠄ 《ᠵᠠᠷᠤᠴᠠ ᠠᠴᠠ ᠪᠠᠨ ᠨᠢᠭᠡ ᠶᠢ ᠳᠠᠭᠠᠭᠤᠯᠤᠨ ᠡᠮᠡ ᠡᠯᠵᠢᠭᠡ ᠨᠦᠭᠦᠳ ᠢᠶᠡᠨ ᠬᠠᠢᠬᠤ ᠪᠠᠷ ᠶᠠᠪᠤ》 ᠭᠡᠰᠡᠨ ᠳᠦ᠂ 4 ᠲᠡᠳᠡ ᠡᠹᠷᠠᠢᠮ ᠤᠨ ᠠᠭᠤᠯᠠᠰ ᠢ ᠳᠠᠪᠠᠵᠤ᠂ ᠱᠠᠯᠢᠱᠠ ᠨᠤᠲᠤᠭ ᠢᠶᠠᠷ ᠳᠠᠭᠠᠷᠢᠭᠰᠠᠨ ᠪᠣᠯᠪᠠᠴᠤ ᠡᠯᠵᠢᠭᠡ ᠨᠦᠭᠦᠳ ᠢᠶᠡᠨ ᠣᠯᠣᠭᠰᠠᠨ ᠦᠭᠡᠢ᠂ ᠱᠠᠯᠢᠮ ᠨᠤᠲᠤᠭ ᠢᠶᠠᠷ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠡᠯᠵᠢᠭᠡ ᠨᠦᠭᠦᠳ ᠲᠡᠨᠳᠡ ᠪᠠᠢᠭᠰᠠᠨ ᠦᠭᠡᠢ᠃ ᠲᠡᠷᠡ ᠪᠢᠨᠶᠠᠮᠢᠨ ᠤ ᠨᠤᠲᠤᠭ ᠢᠶᠠᠷ ᠥᠩᠭᠡᠷᠡᠭᠰᠡᠨ ᠴᠤ ᠣᠯᠣᠭᠰᠠᠨ ᠦᠭᠡᠢ᠃
5 ᠲᠡᠳᠡ ᠽᠦᠹ ᠤᠨ ᠨᠤᠲᠤᠭ ᠲᠤ ᠬᠦᠷᠦᠭᠡᠳ ᠰᠠᠦ᠋ᠯ ᠬᠠᠮᠲᠤ ᠶᠠᠪᠤᠭᠰᠠᠨ ᠵᠠᠷᠤᠴᠠ ᠳᠠᠭᠠᠨ᠄ 《ᠵᠠ᠂ ᠪᠤᠴᠠᠶᠠ︕ ᠡᠴᠢᠭᠡ ᠮᠠᠨᠢ ᠡᠯᠵᠢᠭᠡ ᠨᠦᠭᠦᠳ ᠲᠡᠭᠡᠨ ᠪᠢᠰᠢ᠂ ᠬᠠᠷᠢᠨ ᠪᠢᠳᠡᠨ ᠳᠦ ᠰᠠᠨᠠᠭᠠ ᠵᠣᠪᠠᠬᠤ ᠪᠤᠢ》 ᠭᠡᠪᠡ᠃ 6 ᠵᠠᠷᠤᠴᠠ ᠨᠢ ᠲᠡᠭᠦᠨ ᠳᠦ᠄ 《ᠪᠠᠢᠵᠠ᠂ ᠡᠨᠡ ᠬᠣᠲᠠ ᠳᠤ ᠪᠤᠷᠬᠠᠨ ᠤ ᠬᠥᠮᠦᠨ ᠪᠤᠢ᠂ ᠲᠡᠷᠡ ᠮᠠᠰᠢ ᠬᠦᠨᠳᠦᠲᠡᠢ ᠬᠥᠮᠦᠨ ᠰᠢᠦ᠃ ᠲᠡᠭᠦᠨ ᠦ ᠬᠡᠯᠡᠭᠰᠡᠨ ᠦᠭᠡ ᠪᠦᠷᠢ ᠨᠢ ᠵᠠᠪᠠᠯ ᠪᠡᠶᠡᠯᠡᠭᠳᠡᠳᠡᠭ ᠭᠡᠨᠡ᠃ ᠣᠳᠣ ᠲᠡᠰᠢ ᠪᠠᠨ ᠣᠴᠢᠵᠠᠭᠠᠶᠠ᠃ ᠪᠢᠳᠡᠨ ᠦ ᠶᠠᠪᠤᠭᠠ ᠵᠠᠮ ᠤᠨ ᠲᠤᠬᠠᠢ ᠲᠡᠷᠡ ᠵᠢᠭᠠᠵᠤ ᠥᠭᠴᠦ ᠮᠠᠭᠠᠳ ᠦᠭᠡᠢ ᠶᠤᠮ》 ᠭᠡᠪᠡ᠃ 7 ᠰᠠᠦ᠋ᠯ ᠵᠠᠷᠤᠴᠠ ᠳᠠᠭᠠᠨ᠄ 《ᠪᠢᠳᠡ ᠣᠴᠢᠬᠤ ᠪᠠᠷ ᠪᠣᠳᠣᠬᠤ ᠳᠤ᠂ ᠲᠡᠷᠡ ᠬᠥᠮᠦᠨ ᠳᠦ ᠶᠠᠭᠤ ᠠᠪᠠᠴᠢᠬᠤ ᠪᠢᠯᠡ︖ ᠪᠢᠳᠡᠨ ᠦ ᠪᠣᠭᠴᠣᠨ ᠳᠠᠬᠢ ᠪᠣᠣᠪᠣ ᠴᠤ ᠳᠠᠭᠤᠰᠴᠢᠬᠠᠭᠰᠠᠨ᠃ ᠪᠤᠷᠬᠠᠨ ᠤ ᠬᠥᠮᠦᠨ ᠳᠦ ᠪᠠᠷᠢᠬᠤ ᠪᠡᠯᠡᠭ ᠴᠤ ᠠᠯᠠᠭᠠ᠂ ᠶᠠᠭᠤ ᠴᠤ ᠪᠠᠢᠬᠤ ᠦᠭᠡᠢ ᠪᠢᠵᠡ ᠳᠠ︖》 ᠭᠡᠬᠦ ᠳᠦ᠂ 8 ᠵᠠᠷᠤᠴᠠ ᠨᠢ ᠰᠠᠦ᠋ᠯ ᠳᠤ ᠳᠠᠬᠢᠨ᠄ 《ᠬᠥᠶᠶ᠂ ᠨᠠᠳᠠ ᠳᠤ ᠳᠥᠷᠪᠡᠨ ᠦ ᠨᠢᠭᠡ ᠱᠧᠺᠧᠯ ᠤᠨ ᠮᠥᠩᠭᠥ ᠪᠠᠢᠨᠠ᠃ ᠪᠢ ᠡᠭᠦᠨ ᠢ ᠪᠤᠷᠬᠠᠨ ᠤ ᠬᠥᠮᠦᠨ ᠳᠦ ᠥᠭᠭᠥᠶᠡ᠂ ᠲᠡᠷᠡ ᠶᠠᠪᠤᠬᠤ ᠵᠠᠮ ᠢ ᠮᠢᠨᠢ ᠵᠢᠭᠠᠵᠤ ᠥᠭᠭᠥᠨᠡ》 ᠭᠡᠵᠦ ᠬᠠᠷᠢᠭᠤᠯᠪᠠ᠃ 9 (ᠤᠷᠢᠳᠤ ᠢᠰᠷᠧᠯ ᠳᠤ ᠬᠡᠨ ᠨᠢᠭᠡ ᠨᠢ ᠪᠤᠷᠬᠠᠨ ᠠᠴᠠ ᠯᠠᠪᠯᠠᠨ ᠠᠰᠠᠭᠤᠬᠤ ᠪᠠᠷ ᠣᠴᠢᠬᠤ ᠳᠠᠭᠠᠨ 〈ᠪᠣᠱᠣᠭᠴᠢ ᠳᠤ ᠣᠴᠢᠶᠠ〉 ᠭᠡᠳᠡᠭ ᠪᠠᠢᠵᠠᠢ᠃ ᠣᠳᠣ ᠶᠢᠨ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠢ ᠤᠷᠢᠳᠤ ᠴᠠᠭ ᠲᠤ ᠪᠣᠱᠣᠭᠴᠢ ᠭᠡᠳᠡᠭ ᠪᠠᠢᠪᠠ᠃) 10 ᠰᠠᠦ᠋ᠯ᠄ 《ᠰᠠᠢᠨ ᠪᠠᠢᠨᠠ᠃ ᠵᠠ᠂ ᠶᠠᠪᠤᠵᠠᠭᠠᠶᠠ》 ᠭᠡᠵᠦ ᠵᠠᠷᠤᠴᠠ ᠳᠠᠭᠠᠨ ᠬᠡᠯᠡᠭᠡᠳ ᠬᠣᠶᠠᠭᠤᠯᠠ ᠪᠤᠷᠬᠠᠨ ᠤ ᠬᠥᠮᠦᠨ ᠪᠠᠢᠭᠠ ᠬᠣᠲᠠ ᠤᠷᠤᠭᠤ ᠶᠠᠪᠤᠪᠠ᠃
11 ᠲᠡᠳᠡ ᠬᠣᠲᠠ ᠤᠷᠤᠭᠤ ᠥᠭᠰᠥᠵᠦ ᠪᠠᠢᠬᠤ ᠳᠠᠭᠠᠨ ᠤᠰᠤ ᠲᠠᠲᠠᠬᠤ ᠪᠠᠷ ᠪᠠᠭᠤᠨ ᠢᠷᠡᠵᠦ ᠪᠤᠢ ᠪᠦᠰᠡᠭᠦᠢᠴᠦᠳ ᠲᠡᠢ ᠲᠠᠭᠠᠷᠠᠯᠳᠤᠵᠤ᠄ 《ᠪᠣᠱᠣᠭᠴᠢ ᠡ᠊ᠨᠳᠡ ᠪᠠᠢᠭᠠ ᠤᠤ︖》 ᠭᠡᠬᠦ ᠳᠦ᠂ 12 ᠲᠡᠳᠡ ᠬᠠᠷᠢᠭᠤ ᠳᠤᠨᠢ᠄ 《ᠪᠠᠢᠨᠠ᠂ ᠲᠡᠷᠡ ᠲᠠᠨ ᠤ ᠡᠮᠦᠨᠡ ᠶᠠᠪᠤᠵᠤ ᠪᠠᠢᠭᠠ᠃ ᠪᠤᠰᠢᠭᠤ ᠶᠠᠪᠤᠭᠠᠷᠠᠢ᠂ ᠥᠨᠥᠳᠥᠷ ᠠᠷᠠᠳ ᠣᠯᠠᠨ ᠮᠥᠷᠭᠥᠯ ᠦᠨ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠲᠠᠬᠢᠯ ᠡᠷᠭᠦᠬᠦ ᠪᠣᠯᠬᠣᠷ ᠲᠡᠷᠡ ᠰᠠᠶ᠋ᠢᠬᠠᠨ ᠬᠣᠲᠠ ᠳᠤ ᠣᠷᠣᠭᠰᠠᠨ᠃ 13 ᠲᠠ ᠨᠠᠷ ᠬᠣᠲᠠ ᠳᠤ ᠣᠷᠣᠪᠠᠯ᠂ ᠲᠡᠭᠦᠨ ᠢ ᠮᠥᠷᠭᠥᠯ ᠦᠨ ᠥᠨᠳᠥᠷᠯᠢᠭ ᠥᠭᠡᠳᠡ ᠭᠠᠷᠴᠤ᠂ ᠵᠣᠭᠣᠭ ᠪᠠᠷᠢᠬᠤ ᠠᠴᠠ ᠨᠢ ᠡᠮᠦᠨᠡ ᠰᠢᠭᠤᠳ ᠠᠭᠤᠯᠵᠠ᠃ ᠲᠡᠷᠡ ᠢᠷᠡᠬᠦ ᠡᠴᠡ ᠨᠠᠰᠢ ᠬᠥᠮᠦᠰ ᠵᠣᠭᠣᠭ ᠪᠠᠷᠢᠬᠤ ᠦᠭᠡᠢ᠃ ᠲᠡᠷᠡ ᠲᠠᠬᠢᠯ ᠢ ᠢᠷᠥᠭᠡᠭᠰᠡᠨ ᠦ ᠳᠠᠷᠠᠭᠠ ᠯᠠ ᠤᠷᠢᠭᠳᠠᠭᠰᠠᠨ ᠣᠯᠠᠨ ᠵᠣᠭᠣᠭ ᠪᠠᠷᠢᠨᠠ᠃ ᠲᠠ ᠨᠠᠷ ᠣᠳᠣ ᠣᠴᠢ᠂ ᠲᠡᠭᠦᠨ ᠢ ᠰᠢᠭᠤᠳ ᠣᠯᠵᠤ ᠠᠭᠤᠯᠵᠠ》 ᠭᠡᠪᠡ᠃ 14 ᠲᠡᠢᠨ ᠬᠦ ᠲᠡᠳᠡ ᠬᠣᠲᠠ ᠥᠭᠡᠳᠡ ᠶᠠᠪᠤᠵᠠᠭᠠᠪᠠ᠃ ᠲᠡᠳᠡ ᠬᠣᠲᠠ ᠳᠤ ᠣᠷᠣᠲᠠᠯᠠ᠂ ᠰᠠᠮᠦ᠋ᠶᠧᠯ ᠮᠥᠷᠭᠥᠯ ᠦᠨ ᠥᠨᠳᠥᠷᠯᠢᠭ ᠥᠭᠡᠳᠡ ᠭᠠᠷᠬᠤ ᠪᠠᠷ ᠲᠡᠳᠡᠨ ᠦ ᠡᠰᠡᠷᠭᠦ ᠡᠴᠡ ᠢᠷᠡᠵᠦ ᠪᠠᠢᠪᠠ᠃
15 ᠰᠠᠦ᠋ᠯ ᠢᠷᠡᠬᠦ ᠡᠴᠡ ᠨᠢᠭᠡ ᠡᠳᠦᠷ ᠦᠨ ᠡᠮᠦᠨᠡ᠂ ᠶᠣᠬᠣᠸᠠ ᠰᠠᠮᠦ᠋ᠶᠧᠯ ᠤᠨ ᠰᠣᠨᠣᠷ ᠢ ᠨᠡᠭᠡᠭᠡᠵᠦ᠄ 16 《ᠮᠠᠷᠭᠠᠰᠢ ᠶᠢᠨ ᠡᠳᠦᠢ ᠳᠦ ᠪᠢ ᠴᠢᠮᠠ ᠤᠷᠤᠭᠤ ᠪᠢᠨᠶᠠᠮᠢᠨ ᠤ ᠨᠤᠲᠤᠭ ᠠᠴᠠ ᠨᠢᠭᠡ ᠬᠥᠮᠦᠨ ᠢ ᠶᠠᠪᠤᠭᠤᠯᠤᠨᠠ᠃ ᠴᠢ ᠲᠡᠭᠦᠨ ᠢ ᠲᠣᠰᠣᠯᠠᠵᠤ ᠮᠢᠨᠦ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠤᠨ ᠵᠠᠬᠢᠷᠤᠭᠴᠢ ᠪᠠᠷ ᠲᠣᠮᠢᠯᠠ᠃ ᠲᠡᠷᠡ ᠮᠢᠨᠦ ᠠᠷᠠᠳ ᠲᠦᠮᠡᠨ ᠢ ᠹᠢᠯᠢᠰᠲ᠋ᠴᠦᠳ ᠦᠨ ᠭᠠᠷ ᠠᠴᠠ ᠠᠪᠤᠷᠠᠬᠤ ᠪᠣᠯᠣᠨᠠ᠃ ᠪᠢ ᠠᠷᠠᠳ ᠲᠦᠮᠡᠨ ᠦ ᠪᠠᠨ ᠪᠠᠢᠳᠠᠯ ᠢ ᠬᠠᠷᠠᠯᠠ᠂ ᠲᠡᠳᠡᠨ ᠦ ᠬᠠᠰᠬᠢᠷᠬᠤ ᠳᠠᠭᠤ ᠨᠠᠳᠠ ᠳᠤ ᠢᠷᠡᠭᠰᠡᠨ》 ᠭᠡᠵᠡᠢ᠃ 17 ᠰᠠᠮᠦ᠋ᠶᠧᠯ ᠰᠠᠦ᠋ᠯ ᠢ ᠬᠠᠷᠠᠬᠤ ᠦᠶᠡ ᠳᠦ ᠶᠣᠬᠣᠸᠠ ᠲᠡᠭᠦᠨ ᠳᠦ᠄ 《ᠬᠠᠷᠠᠭᠲᠤᠨ᠂ ᠮᠢᠨᠦ ᠴᠢᠮᠠ ᠳᠤ ᠬᠡᠯᠡᠭᠰᠡᠨ ᠬᠥᠮᠦᠨ ᠡᠨᠡ ᠪᠠᠢᠨᠠ᠃ ᠡᠨᠡ ᠬᠥᠮᠦᠨ ᠮᠢᠨᠦ ᠠᠷᠠᠳ ᠲᠦᠮᠡᠨ ᠢ ᠠᠳᠬᠤᠨ ᠵᠠᠬᠢᠷᠤᠨᠠ》 ᠭᠡᠵᠦ ᠮᠡᠳᠡᠭᠳᠡᠪᠡ᠃ 18 ᠰᠠᠦ᠋ᠯ ᠬᠠᠭᠠᠯᠭᠠᠨ ᠤ ᠳᠣᠲᠣᠭᠣᠳᠤ ᠲᠠᠯᠠ ᠳᠤ ᠰᠠᠮᠦ᠋ᠶᠧᠯ ᠤᠷᠤᠭᠤ ᠣᠢᠷᠠᠲᠤᠵᠤ ᠢᠷᠡᠭᠡᠳ᠄ 《ᠪᠣᠱᠣᠭᠴᠢ ᠶᠢᠨ ᠭᠡᠷ ᠬᠠᠮᠢᠭᠠ ᠪᠠᠢᠨᠠ︖ ᠨᠠᠳᠠ ᠳᠤ ᠵᠢᠭᠠᠵᠤ ᠥᠭᠭᠥᠨᠡ ᠤᠤ︖》 ᠭᠡᠪᠡ᠃ 19 ᠰᠠᠮᠦ᠋ᠶᠧᠯ ᠰᠠᠦ᠋ᠯ ᠳᠤ ᠬᠠᠷᠢᠭᠤᠯᠤᠨ᠄ 《ᠪᠢ ᠪᠣᠱᠣᠭᠴᠢ ᠪᠠᠢᠨᠠ᠂ ᠴᠢ ᠮᠥᠷᠭᠥᠯ ᠦᠨ ᠥᠨᠳᠥᠷᠯᠢᠭ ᠥᠭᠡᠳᠡ ᠮᠢᠨᠦ ᠲᠦᠷᠦᠭᠦᠨ ᠳᠦ ᠶᠠᠪᠤᠭᠠᠷᠠᠢ᠃ ᠲᠠ ᠨᠠᠷ ᠥᠨᠥᠳᠥᠷ ᠨᠠᠳᠠ ᠲᠠᠢ ᠬᠠᠮᠲᠤ ᠬᠣᠭᠣᠯᠠ ᠢᠳᠡᠬᠦ ᠪᠣᠯᠣᠨᠠ᠃ ᠮᠠᠷᠭᠠᠰᠢ ᠥᠷᠯᠥᠭᠡ ᠪᠢ ᠴᠢᠮᠠᠶᠢ ᠶᠠᠪᠤᠭᠤᠯᠬᠤ ᠳᠠᠭᠠᠨ ᠰᠡᠳᠬᠢᠯ ᠳᠤ ᠴᠢᠨᠢ ᠪᠠᠢᠭᠠ ᠪᠦᠭᠦᠳᠡ ᠶᠢ ᠴᠢᠮᠠ ᠳᠤ ᠬᠡᠯᠡᠶᠡ᠃ 20 ᠭᠤᠷᠪᠠᠨ ᠬᠣᠨᠣᠭ ᠤᠨ ᠡᠮᠦᠨᠡ ᠠᠯᠠᠭᠠ ᠪᠣᠯᠣᠭᠰᠠᠨ ᠬᠡᠳᠦᠨ ᠡᠮᠡ ᠡᠯᠵᠢᠭᠡ ᠶᠢᠨ ᠢᠶᠠᠨ ᠲᠥᠯᠥᠭᠡ ᠰᠠᠨᠠᠭᠠ ᠪᠣᠯᠬᠤ ᠬᠡᠷᠡᠭ ᠦᠭᠡᠢ᠂ ᠣᠯᠳᠠᠭᠰᠠᠨ᠃ ᠬᠠᠷᠢᠨ ᠢᠰᠷᠧᠯ ᠪᠦᠬᠦ ᠭᠣᠷᠢᠳᠠᠯᠭᠠ ᠪᠠᠨ ᠬᠡᠨ ᠳᠦ ᠲᠠᠯᠪᠢᠬᠤ ᠪᠢᠯᠡ︖ ᠴᠢᠮᠠ ᠳᠤ ᠪᠣᠯᠣᠨ ᠡᠴᠢᠭᠡ ᠶᠢᠨ ᠴᠢᠨᠢ ᠪᠦᠬᠦ ᠭᠡᠷ ᠲᠦ ᠲᠠᠯᠪᠢᠭᠠ ᠪᠢᠰᠢ ᠤᠤ︖》 ᠭᠡᠵᠦ ᠬᠡᠯᠡᠪᠡ᠃ 21 ᠰᠠᠦ᠋ᠯ ᠬᠠᠷᠢᠭᠤ ᠳᠤᠨᠢ᠄ 《ᠪᠢ ᠢᠰᠷᠧᠯ ᠤᠨ ᠬᠠᠮᠤᠭ ᠤᠨ ᠵᠢᠵᠢᠭ ᠣᠪᠣᠭ ᠪᠢᠨᠶᠠᠮᠢᠨ ᠤ ᠬᠥᠮᠦᠨ᠂ ᠮᠢᠨᠦ ᠠᠢᠮᠠᠭ ᠴᠤ ᠪᠢᠨᠶᠠᠮᠢᠨ ᠣᠪᠣᠭ ᠤᠨ ᠪᠦᠬᠦ ᠠᠢᠮᠠᠭ ᠤᠨ ᠳᠣᠲᠣᠷᠠ ᠠᠴᠠ ᠳᠣᠷᠣᠢ ᠨᠢ ᠪᠢᠰᠢ ᠤᠤ︖ ᠲᠠ ᠶᠠᠭᠠᠬᠢᠭᠠᠳ ᠨᠠᠳᠠ ᠳᠤ ᠡᠢᠮᠦ ᠦᠭᠡ ᠶᠠᠷᠢᠨᠠ ᠪᠤᠢ︖》 ᠭᠡᠪᠡ᠃
22 ᠰᠠᠮᠦ᠋ᠶᠧᠯ ᠰᠠᠦ᠋ᠯ ᠢ ᠵᠠᠷᠤᠴᠠ ᠲᠠᠢ ᠨᠢ ᠬᠠᠮᠲᠤ ᠳᠠᠭᠠᠭᠤᠯᠤᠨ ᠲᠠᠩᠬᠢᠮ ᠳᠤ ᠣᠷᠣᠵᠤ᠂ ᠤᠷᠢᠭᠳᠠᠭᠰᠠᠨ ᠣᠯᠠᠨ ᠤ ᠲᠡᠷᠢᠭᠦᠨ ᠰᠠᠭᠤᠳᠠᠯ ᠳᠤ ᠰᠠᠭᠤᠯᠭᠠᠪᠠ᠃ ᠲᠡᠨᠳᠡ ᠤᠷᠢᠭᠳᠠᠭᠰᠠᠨ ᠭᠤᠴᠢ ᠣᠷᠴᠢᠮ ᠬᠥᠮᠦᠨ ᠪᠠᠢᠵᠠᠢ᠃ 23 ᠰᠠᠮᠦ᠋ᠶᠧᠯ ᠲᠣᠭᠣᠭᠠᠴᠢ ᠳᠤ᠄ 《ᠴᠢᠮᠠ ᠳᠤ 〈ᠴᠠᠰᠢ ᠲᠠᠯᠪᠢ〉 ᠭᠡᠳ ᠥᠭᠭᠥᠭᠰᠡᠨ ᠬᠤᠪᠢ ᠶᠢᠨ ᠮᠢᠬᠠ ᠶᠢ ᠠᠪᠴᠢᠷᠠ》 ᠭᠡᠬᠦ ᠳᠦ᠂ 24 ᠲᠣᠭᠣᠭᠠᠴᠢ ᠨᠢ ᠪᠦᠲᠦᠨ ᠭᠤᠶᠠ ᠶᠢᠨ ᠮᠢᠬᠠ ᠶᠢ ᠠᠪᠴᠢᠷᠠᠵᠤ᠂ ᠰᠠᠦ᠋ᠯ ᠤᠨ ᠡᠮᠦᠨᠡ ᠲᠠᠯᠪᠢᠪᠠ᠃ ᠰᠠᠮᠦ᠋ᠶᠧᠯ᠄ 《ᠴᠢᠮᠠ ᠳᠤ ᠦᠯᠡᠳᠡᠭᠡᠭᠰᠡᠨ ᠵᠦᠢᠯ ᠡᠨᠡ ᠪᠠᠢᠨᠠ᠂ ᠡᠮᠦᠨᠡ ᠪᠡᠨ ᠲᠠᠯᠪᠢᠵᠤ᠂ ᠡᠭᠦᠨ ᠢ ᠵᠣᠭᠣᠭᠯᠠᠭᠲᠤᠨ᠃ ᠪᠢ ᠵᠣᠴᠢᠳ ᠤᠷᠢᠭᠰᠠᠨ ᠭᠡᠵᠦ ᠬᠡᠯᠡᠭᠰᠡᠨ ᠴᠠᠭ ᠠᠴᠠ ᠥᠨᠥ ᠬᠦᠷᠲᠡᠯᠡ ᠴᠢᠮᠠ ᠳᠤ ᠵᠣᠷᠢᠭᠤᠯᠤᠨ ᠡᠭᠦᠨ ᠢ ᠬᠠᠳᠠᠭᠠᠯᠠᠭᠰᠠᠨ ᠶᠤᠮ》 ᠭᠡᠪᠡ᠃ ᠡᠢᠨ ᠬᠦ ᠲᠡᠷᠡ ᠡᠳᠦᠷ ᠰᠠᠦ᠋ᠯ ᠰᠠᠮᠦ᠋ᠶᠧᠯ ᠲᠠᠢ ᠬᠠᠮᠲᠤ ᠬᠣᠭᠣᠯᠠᠯᠠᠪᠠ᠃ 25 ᠲᠡᠳᠡ ᠮᠥᠷᠭᠥᠯ ᠦᠨ ᠥᠨᠳᠥᠷᠯᠢᠭ ᠡᠴᠡ ᠬᠣᠲᠠ ᠳᠤ ᠣᠷᠣᠪᠠ᠂ ᠰᠠᠮᠦ᠋ᠶᠧᠯ ᠰᠠᠦ᠋ᠯ ᠲᠠᠢ ᠳᠡᠭᠡᠪᠦᠷ ᠳᠡᠭᠡᠷᠡ ᠶᠠᠷᠢᠯᠴᠠᠵᠤ ᠪᠠᠢᠯᠠ᠃ 26 ᠲᠡᠳᠡ ᠡᠷᠲᠡ ᠪᠣᠰᠣᠯᠠ᠃ ᠦᠷ ᠴᠠᠢᠬᠤ ᠳᠤ ᠳᠡᠭᠡᠪᠦᠷ ᠳᠡᠭᠡᠷᠡ ᠰᠠᠮᠦ᠋ᠶᠧᠯ ᠰᠠᠦ᠋ᠯ ᠢ ᠳᠠᠭᠤᠳᠠᠨ᠄ 《ᠪᠣᠰᠣᠭᠲᠤᠨ᠂ ᠪᠢ ᠴᠢᠮᠠᠶᠢ ᠦᠳᠡᠶᠡ》 ᠭᠡᠬᠦ ᠳᠦ᠂ ᠰᠠᠦ᠋ᠯ ᠪᠣᠰᠪᠠ᠃ ᠰᠠᠮᠦ᠋ᠶᠧᠯ ᠲᠡᠭᠦᠨ ᠲᠡᠢ ᠬᠠᠮᠲᠤ ᠭᠠᠳᠠᠭᠰᠢ ᠪᠠᠨ ᠭᠠᠷᠤᠯᠠ᠃ 27 ᠲᠡᠳᠡ ᠬᠣᠲᠠ ᠶᠢᠨ ᠵᠠᠬᠠ ᠳᠤ ᠬᠦᠷᠦᠭᠡᠳ ᠰᠠᠮᠦ᠋ᠶᠧᠯ ᠰᠠᠦ᠋ᠯ ᠳᠤ᠄ 《ᠵᠠᠷᠤᠴᠠ ᠳᠠᠭᠠᠨ ᠪᠢᠳᠡᠨ ᠡᠴᠡ ᠲᠦᠷᠦᠭᠦᠨ ᠳᠦ ᠶᠠᠪᠤᠬᠤ ᠶᠢ ᠵᠠᠬᠢᠭᠠᠷᠠᠢ》 ᠭᠡᠰᠡᠨ ᠪᠠ ᠵᠠᠷᠤᠴᠠ ᠨᠢ ᠲᠥᠷᠥᠭᠦᠯᠦᠨ ᠶᠠᠪᠤᠭᠰᠠᠨ ᠳᠤ᠄ 《ᠬᠠᠷᠢᠨ ᠴᠢ ᠲᠦᠷ ᠪᠠᠢᠵᠤ ᠪᠠᠢ᠃ ᠪᠢ ᠴᠢᠮᠠ ᠳᠤ ᠪᠤᠷᠬᠠᠨ ᠤ ᠦᠭᠡ ᠶᠢ ᠰᠣᠨᠣᠰᠬᠠᠶᠠ》 ᠭᠡᠵᠦ ᠬᠡᠯᠡᠪᠡ᠃