ᠨᠢᠭᠡᠳᠦᠭᠡᠷ ᠰᠠᠮᠦ᠋ᠶᠧᠯ ᠵᠢᠷᠭᠤᠭᠠ
ᠹᠢᠯᠢᠰᠲ᠋ᠴᠦᠳ ᠡᠵᠡᠨ ᠦ ᠠᠪᠳᠠᠷᠠ ᠶᠢ ᠪᠤᠴᠠᠭᠠᠪᠠ
1 ᠡᠢᠨ ᠬᠦ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠹᠢᠯᠢᠰᠲ᠋ᠴᠦᠳ ᠦᠨ ᠲᠠᠯᠠ ᠨᠤᠲᠤᠭ ᠲᠤ ᠳᠣᠯᠣᠭᠠᠨ ᠰᠠᠷᠠ ᠪᠠᠢᠯᠠ᠃ 2 ᠹᠢᠯᠢᠰᠲ᠋ᠴᠦᠳ ᠲᠠᠬᠢᠯᠴᠢᠳ ᠪᠣᠯᠣᠨ ᠲᠥᠯᠭᠡᠴᠢᠳ ᠢ ᠳᠠᠭᠤᠳᠠᠨ᠄ 《ᠪᠢᠳᠡ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠶᠠᠭᠠᠬᠢᠬᠤ ᠪᠤᠢ︖ ᠲᠡᠭᠦᠨ ᠢ ᠪᠠᠢᠭᠰᠠᠨ ᠭᠠᠵᠠᠷ ᠲᠤᠨᠢ ᠬᠡᠷᠬᠢᠨ ᠶᠠᠪᠤᠭᠤᠯᠬᠤ ᠶᠢ ᠪᠢᠳᠡᠨ ᠳᠦ ᠬᠡᠯᠡᠵᠦ ᠥᠭᠭᠥᠭᠡᠴᠢ》 ᠭᠡᠬᠦ ᠳᠦ᠂ 3 ᠲᠡᠳᠡ᠄ 《ᠬᠡᠷᠪᠡ ᠲᠠ ᠨᠠᠷ ᠢᠰᠷᠧᠯ ᠤᠨ ᠪᠤᠷᠬᠠᠨ ᠤ ᠠᠪᠳᠠᠷᠠ ᠶᠢ ᠪᠤᠴᠠᠭᠠᠬᠤ ᠭᠡᠵᠦ ᠪᠠᠢᠭᠠ ᠪᠣᠯ ᠬᠣᠭᠣᠰᠣᠨ ᠶᠠᠪᠤᠭᠤᠯᠵᠤ ᠪᠣᠯᠬᠤ ᠦᠭᠡᠢ᠃ ᠵᠠᠪᠠᠯ ᠭᠡᠮ ᠦᠨ ᠡᠷᠭᠦᠯ ᠲᠡᠢ ᠬᠠᠮᠲᠤ ᠶᠠᠪᠤᠭᠤᠯᠬᠤ ᠶᠣᠰᠣᠲᠠᠢ︕ ᠲᠡᠭᠡᠪᠡᠯ ᠲᠠ ᠨᠠᠷ ᠡᠳᠡᠭᠡᠷᠡᠬᠦ ᠪᠣᠯᠣᠨᠠ᠂ ᠲᠡᠭᠦᠨ ᠦ ᠮᠤᠲᠤᠷ ᠶᠠᠭᠤᠨ ᠳᠤ ᠲᠠ ᠨᠠᠷ ᠠᠴᠠ ᠵᠠᠢᠯᠠᠭᠠ ᠦᠭᠡᠢ ᠶᠢ ᠴᠤ ᠮᠡᠳᠡᠬᠦ ᠪᠣᠯᠣᠨᠠ》 ᠭᠡᠪᠡ᠃ 4 ᠹᠢᠯᠢᠰᠲ᠋ᠴᠦᠳ᠄ 《ᠲᠡᠭᠦᠨ ᠳᠦ ᠶᠠᠮᠠᠷ ᠡᠷᠭᠦᠯ ᠢ ᠶᠠᠪᠤᠭᠤᠯᠬᠤ ᠶᠤᠮ ᠪᠤᠢ︖》 ᠭᠡᠰᠡᠨ ᠳᠦ᠂ ᠲᠡᠳᠡ᠄ 《ᠲᠠ ᠪᠦᠭᠦᠳᠡ ᠪᠣᠯᠣᠨ ᠲᠠᠨ ᠤ ᠨᠣᠶᠠᠳ ᠤᠨ ᠳᠡᠭᠡᠷᠡ ᠪᠠᠭᠤᠭᠰᠠᠨ ᠭᠠᠮᠰᠢᠭ ᠨᠢ ᠨᠢᠭᠡ ᠪᠣᠯᠬᠣᠷ ᠹᠢᠯᠢᠰᠲ ᠤᠨ ᠨᠣᠶᠠᠳ ᠤᠨ ᠲᠣᠭᠠ ᠲᠠᠢ ᠠᠳᠠᠯᠢ ᠲᠠᠪᠤᠨ ᠠᠯᠲᠠᠨ ᠪᠤᠯᠳᠤᠷᠤᠤ᠂ ᠲᠠᠪᠤᠨ ᠠᠯᠲᠠᠨ ᠬᠤᠯᠤᠭᠠᠨᠠ ᠶᠢ ᠶᠠᠪᠤᠭᠤᠯᠬᠤ ᠶᠣᠰᠣᠲᠠᠢ᠃ 5 ᠲᠡᠢᠮᠦ ᠡᠴᠡ ᠲᠠ ᠨᠠᠷ ᠡᠨᠡ ᠭᠠᠵᠠᠷ ᠢ ᠰᠦᠢᠷᠡᠭᠦᠯᠵᠦ ᠪᠤᠢ ᠪᠤᠯᠳᠤᠷᠤᠤ ᠡᠪᠡᠳᠴᠢᠨ ᠤ ᠳᠦᠷᠰᠦ ᠪᠣᠯᠣᠨ ᠬᠤᠯᠤᠭᠠᠨᠠ ᠶᠢᠨ ᠳᠦᠷᠰᠦ ᠶᠢ ᠬᠢ᠂ ᠢᠰᠷᠧᠯ ᠤᠨ ᠪᠤᠷᠬᠠᠨ ᠳᠤ ᠠᠯᠳᠠᠷ ᠢ ᠡᠷᠭᠦ᠂ ᠲᠡᠭᠡᠪᠡᠯ ᠲᠡᠷᠡ ᠲᠠ ᠨᠠᠷ ᠤᠨ ᠳᠡᠭᠡᠷᠡ᠂ ᠲᠠ ᠨᠠᠷ ᠤᠨ ᠪᠤᠷᠬᠠᠳ᠂ ᠮᠥᠨ ᠲᠠᠨ ᠤ ᠨᠤᠲᠤᠭ ᠤᠨ ᠳᠡᠭᠡᠷᠡ ᠳᠠᠷᠤᠭᠰᠠᠨ ᠮᠤᠲᠤᠷ ᠢᠶᠠᠨ ᠬᠥᠩᠭᠡᠯᠡᠵᠦ ᠮᠠᠭᠠᠳ᠃ 6 ᠲᠠ ᠨᠠᠷ ᠶᠧᠵᠢᠫᠲ᠋ᠴᠦᠳ ᠪᠣᠯᠣᠨ ᠹᠠᠷᠠᠣ᠋ ᠮᠡᠲᠦ ᠶᠠᠭᠤᠨ ᠳᠤ ᠰᠡᠳᠬᠢᠯ ᠢᠶᠠᠨ ᠬᠠᠲᠠᠭᠤᠷᠠᠭᠤᠯᠤᠨᠠ ᠪᠤᠢ︖ ᠲᠡᠳᠡ ᠪᠤᠷᠬᠠᠨ ᠳᠤ ᠠᠪᠲᠠᠭᠳᠠᠭᠠᠳ ᠢᠰᠷᠧᠯᠴᠦᠳ ᠢ ᠴᠢᠯᠥᠭᠡᠯᠡᠵᠦ ᠶᠠᠪᠤᠭᠤᠯᠤᠭᠰᠠᠨ ᠪᠢᠰᠢ ᠤᠤ︖ 7 ᠲᠡᠢᠮᠦ ᠡᠴᠡ ᠨᠢᠭᠡ ᠰᠢᠨᠡ ᠲᠡᠷᠭᠡ ᠬᠢ᠂ ᠪᠤᠭᠤᠯᠠᠭᠠᠨ ᠳᠤ ᠣᠷᠣᠭᠤᠯᠵᠤ ᠪᠠᠢᠭᠠ ᠦᠭᠡᠢ ᠬᠣᠶᠠᠷ ᠦᠨᠢᠶᠡ ᠶᠢ ᠠᠪᠴᠤ ᠲᠡᠷᠭᠡᠨ ᠳᠦ ᠬᠥᠯᠯᠡ᠂ ᠲᠤᠭᠤᠯ ᠤᠳ ᠢ ᠨᠢ ᠲᠡᠳᠡᠨ ᠡᠴᠡ ᠰᠠᠯᠭᠠᠵᠤ ᠬᠠᠰᠢᠶᠠᠨ ᠳᠤᠨᠢ ᠪᠤᠴᠠᠭᠠᠭᠲᠤᠨ᠃ 8 ᠲᠡᠭᠡᠭᠡᠳ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠠᠪᠴᠤ᠂ ᠲᠡᠷᠭᠡᠨ ᠳᠡᠭᠡᠷᠡ ᠲᠠᠯᠪᠢ᠃ ᠭᠡᠮ ᠦᠨ ᠡᠷᠭᠦᠯ ᠪᠣᠯᠭᠠᠨ ᠶᠠᠪᠤᠭᠤᠯᠬᠤ ᠠᠯᠲᠠᠨ ᠡᠳ᠋ᠯᠡᠯ ᠢ ᠬᠠᠢᠷᠴᠠᠭ ᠲᠤ ᠬᠢᠵᠦ᠂ ᠠᠪᠳᠠᠷᠠ ᠶᠢᠨ ᠬᠠᠵᠠᠭᠤ ᠳᠤ ᠲᠠᠯᠪᠢ᠃ ᠲᠡᠭᠡᠭᠡᠳ ᠲᠡᠷᠭᠡ ᠪᠡᠨ ᠰᠤᠯᠠ ᠲᠠᠯᠪᠢᠵᠤ ᠵᠥᠩ ᠢᠶᠡᠷ ᠨᠢ ᠶᠠᠪᠤᠭᠤᠯᠤᠭᠠᠳ 9 ᠠᠵᠢᠭᠯᠠᠵᠤ ᠪᠠᠢᠭᠲᠤᠨ᠃ ᠬᠡᠷᠪᠡ ᠲᠡᠷᠡ ᠥᠪᠡᠷ ᠦᠨ ᠨᠤᠲᠤᠭ ᠥᠭᠡᠳᠡ ᠴᠢᠭᠯᠡᠨ ᠪᠧᠲ ᠱᠧᠮᠧᠱ ᠲᠤ ᠬᠦᠷᠬᠦ ᠵᠠᠮ ᠢᠶᠠᠷ ᠶᠠᠪᠤᠪᠠᠯ᠂ ᠪᠢᠳᠡᠨ ᠳᠦ ᠡᠨᠡ ᠶᠡᠬᠡ ᠭᠠᠮᠰᠢᠭ ᠢ ᠤᠴᠠᠷᠠᠭᠤᠯᠤᠭᠰᠠᠨ ᠨᠢ ᠲᠡᠳᠡᠨ ᠦ ᠪᠤᠷᠬᠠᠨ ᠮᠥᠨ᠃ ᠥᠭᠡᠷᠡ ᠵᠠᠮ ᠢᠶᠠᠷ ᠶᠠᠪᠤᠪᠠᠯ᠂ ᠲᠡᠳᠡᠨ ᠦ ᠪᠤᠷᠬᠠᠨ ᠪᠢᠳᠡᠨ ᠢ ᠴᠣᠬᠢᠭᠰᠠᠨ ᠪᠤᠰᠤ᠂ ᠬᠠᠷᠢᠨ ᠰᠠᠨᠠᠮᠰᠠᠷ ᠦᠭᠡᠢ ᠭᠠᠮᠰᠢᠭ ᠪᠢᠳᠡᠨ ᠳᠦ ᠲᠣᠬᠢᠶᠠᠯᠳᠤᠭᠰᠠᠨ ᠭᠡᠳᠡᠭ ᠢ ᠪᠢᠳᠡ ᠮᠡᠳᠡᠬᠦ ᠪᠣᠯᠣᠨᠠ》 ᠭᠡᠪᠡ᠃
10 ᠬᠥᠮᠦᠰ ᠲᠡᠷᠡ ᠶᠣᠰᠣᠭᠠᠷ ᠦᠢᠯᠡᠳᠪᠡ᠃ ᠲᠡᠳᠡ ᠬᠣᠶᠠᠷ ᠦᠨᠢᠶᠡ ᠠᠪᠴᠢᠷᠠᠵᠤ᠂ ᠲᠡᠷᠭᠡᠨ ᠳᠦ ᠬᠥᠯᠯᠡᠨ᠂ ᠲᠤᠭᠤᠯ ᠤᠳ ᠢ ᠨᠢ ᠬᠠᠰᠢᠶᠠᠨ ᠳᠤ ᠲᠦᠭᠵᠢᠵᠦ᠂ 11 ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠪᠣᠯᠣᠨ ᠠᠯᠲᠠᠨ ᠬᠤᠯᠤᠭᠠᠨᠠ᠂ ᠠᠯᠲᠠᠨ ᠪᠤᠯᠳᠤᠷᠤᠤ ᠨᠤᠭᠤᠳ ᠤᠨ ᠳᠦᠷᠰᠦ ᠶᠢ ᠬᠢᠭᠰᠡᠨ ᠬᠠᠢᠷᠴᠠᠭ ᠢ ᠲᠡᠷᠭᠡᠨ ᠳᠡᠭᠡᠷᠡ ᠲᠠᠯᠪᠢᠪᠠ᠃ 12 ᠦᠨᠢᠶᠡ ᠨᠦᠭᠦᠳ ᠪᠧᠲ ᠱᠧᠮᠧᠱ ᠥᠭᠡᠳᠡ ᠰᠢᠭᠤᠳ ᠵᠦᠭᠯᠡᠵᠦ᠂ ᠶᠡᠬᠡ ᠵᠠᠮ ᠳᠠᠭᠠᠨ ᠮᠥᠭᠡᠷᠡᠭᠰᠡᠭᠡᠷ ᠶᠠᠪᠤᠬᠤ ᠳᠠᠭᠠᠨ ᠪᠠᠷᠠᠭᠤᠨᠰᠢ ᠪᠠᠨ ᠴᠤ᠂ ᠵᠡᠭᠦᠨᠰᠢ ᠪᠠᠨ ᠴᠤ ᠮᠤᠷᠤᠢᠭᠰᠠᠨ ᠦᠭᠡᠢ᠃ ᠹᠢᠯᠢᠰᠲ ᠤᠨ ᠨᠣᠶᠠᠳ ᠠᠷᠤ ᠠᠴᠠ ᠨᠢ ᠳᠠᠭᠠᠵᠤ ᠶᠠᠪᠤᠭᠰᠠᠭᠠᠷ ᠪᠧᠲ ᠱᠧᠮᠧᠱ ᠤᠨ ᠬᠢᠯᠢ ᠬᠢᠵᠠᠭᠠᠷ ᠲᠤ ᠬᠦᠷᠪᠡ᠃
13 ᠪᠧᠲ ᠱᠧᠮᠧᠱ ᠤᠨ ᠬᠥᠮᠦᠰ ᠬᠥᠨᠳᠡᠢ ᠲᠠᠯᠠ ᠳᠤ ᠤᠯᠠᠭᠠᠨ ᠪᠤᠭᠤᠳᠠᠢ ᠶᠢᠨ ᠤᠷᠭᠤᠴᠠ ᠪᠠᠨ ᠬᠤᠷᠢᠶᠠᠵᠤ ᠪᠠᠢᠭᠰᠠᠨ ᠢᠶᠠᠨ ᠬᠠᠷᠠᠴᠠ ᠪᠠᠨ ᠡᠷᠭᠦᠨ ᠠᠪᠳᠠᠷᠠ ᠶᠢ ᠣᠯᠵᠤ ᠬᠠᠷᠠᠭᠠᠳ ᠪᠠᠶᠠᠷᠯᠠᠨ ᠬᠥᠭᠡᠷᠴᠡᠭᠡᠪᠡ᠃ 14 ᠥᠨᠥᠬᠢ ᠲᠡᠷᠭᠡ ᠪᠧᠲ ᠱᠧᠮᠧᠱ ᠤᠨ ᠬᠥᠮᠦᠨ ᠶᠣᠱᠦ᠋ᠶᠠ ᠶᠢᠨ ᠲᠠᠯᠠᠪᠠᠢ ᠳᠤ ᠣᠷᠣᠵᠤ ᠢᠷᠡᠭᠡᠳ ᠵᠣᠭᠰᠣᠪᠠ᠃ ᠲᠡᠨᠳᠡ ᠨᠢᠭᠡᠨ ᠲᠣᠮᠣ ᠴᠢᠯᠠᠭᠤ ᠪᠠᠢᠵᠠᠢ᠃ ᠬᠥᠮᠦᠰ ᠥᠨᠥᠬᠢ ᠲᠡᠷᠭᠡᠨ ᠦ ᠮᠣᠳᠣ ᠶᠢ ᠬᠠᠭᠠᠯᠤᠨ᠂ ᠦᠨᠢᠶᠡ ᠨᠦᠭᠦᠳ ᠢᠶᠡᠷ ᠶᠣᠬᠣᠸᠠ ᠳᠤ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠡᠷᠭᠦᠯᠡ᠃ 15 ᠯᠧᠸᠢᠴᠦᠳ ᠪᠠᠭᠤᠯᠭᠠᠭᠰᠠᠨ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠪᠠ ᠠᠯᠲᠠᠨ ᠡᠳ᠋ᠯᠡᠯ ᠲᠡᠢ ᠬᠠᠢᠷᠴᠠᠭ ᠤᠳ ᠢ ᠲᠣᠮᠣ ᠴᠢᠯᠠᠭᠤᠨ ᠳᠡᠭᠡᠷᠡ ᠲᠠᠯᠪᠢᠵᠤ᠂ ᠪᠧᠲ ᠱᠧᠮᠧᠱ ᠤᠨ ᠬᠥᠮᠦᠰ ᠨᠢ ᠲᠡᠷᠡ ᠡᠳᠦᠷ ᠲᠡᠭᠡᠨ ᠶᠣᠬᠣᠸᠠ ᠳᠤ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠡᠷᠭᠦᠨ᠂ ᠨᠢᠲᠤᠯᠬᠤ ᠲᠠᠬᠢᠯ ᠲᠠᠯᠪᠢᠪᠠ᠃ 16 ᠹᠢᠯᠢᠰᠲ ᠤᠨ ᠲᠠᠪᠤᠨ ᠨᠣᠶᠠᠨ ᠡᠳᠡᠭᠡᠷ ᠢ ᠦᠵᠡᠭᠡᠳ᠂ ᠲᠡᠷᠡ ᠡᠳᠦᠷ ᠲᠡᠭᠡᠨ ᠡᠺᠷᠣᠨ ᠤᠷᠤᠭᠤ ᠪᠤᠴᠠᠵᠠᠢ᠃
17 ᠡᠢᠨ ᠬᠦ ᠹᠢᠯᠢᠰᠲ᠋ᠴᠦᠳ ᠠᠯᠲᠠᠨ ᠪᠤᠯᠳᠤᠷᠤᠤ ᠨᠤᠭᠤᠳ ᠬᠢᠵᠦ᠂ ᠨᠢᠭᠡ ᠶᠢ ᠨᠢ ᠠᠱᠠᠳᠣᠳ᠋ ᠤᠨ ᠲᠥᠯᠥᠭᠡ᠂ ᠨᠢᠭᠡ ᠶᠢ ᠨᠢ ᠭᠠᠽᠠ ᠶᠢᠨ ᠲᠥᠯᠥᠭᠡ᠂ ᠨᠢᠭᠡ ᠶᠢ ᠨᠢ ᠠᠱᠺᠧᠯᠣᠨ ᠤ ᠲᠥᠯᠥᠭᠡ᠂ ᠨᠢᠭᠡ ᠶᠢ ᠨᠢ ᠭᠠᠲ ᠤᠨ ᠲᠥᠯᠥᠭᠡ᠂ ᠨᠢᠭᠡ ᠶᠢ ᠨᠢ ᠡᠺᠷᠣᠨ ᠤ ᠲᠥᠯᠥᠭᠡ ᠭᠡᠮ ᠦᠨ ᠡᠷᠭᠦᠯ ᠪᠣᠯᠭᠠᠨ ᠶᠣᠬᠣᠸᠠ ᠳᠤ ᠶᠠᠪᠤᠭᠤᠯᠤᠭᠰᠠᠨ ᠪᠠᠢᠵᠠᠢ᠃ 18 ᠬᠠᠮᠲᠤ ᠶᠠᠪᠤᠭᠤᠯᠤᠭᠰᠠᠨ ᠠᠯᠲᠠᠨ ᠬᠤᠯᠤᠭᠠᠨᠠ ᠤᠨ ᠲᠣᠭᠠ ᠨᠢ ᠲᠠᠪᠤᠨ ᠨᠣᠶᠠᠨ ᠳᠤ ᠬᠠᠷᠢᠶᠠᠯᠠᠭᠳᠠᠳᠠᠭ ᠹᠢᠯᠢᠰᠲ᠋ᠴᠦᠳ ᠦᠨ ᠪᠡᠬᠢᠯᠡᠯᠲᠡᠲᠦ ᠬᠣᠲᠠ ᠠᠴᠠ ᠬᠥᠳᠡᠭᠡ ᠲᠠᠯᠠ ᠶᠢᠨ ᠲᠣᠰᠬᠣᠳ ᠬᠦᠷᠲᠡᠯᠡ ᠬᠠᠮᠤᠭ ᠬᠣᠲᠠ ᠶᠢᠨ ᠲᠣᠭᠠ ᠲᠠᠢ ᠠᠳᠠᠯᠢ ᠪᠠᠢᠯᠠ᠃ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠳᠡᠭᠡᠷᠡ ᠨᠢ ᠲᠠᠯᠪᠢᠭᠰᠠᠨ ᠲᠣᠮᠣ ᠴᠢᠯᠠᠭᠤ ᠥᠨᠥ ᠪᠣᠯᠲᠠᠯᠠ ᠪᠧᠲ ᠱᠧᠮᠧᠱ ᠤᠨ ᠬᠥᠮᠦᠨ ᠶᠣᠱᠦ᠋ᠶᠠ ᠶᠢᠨ ᠲᠠᠯᠠᠪᠠᠢ ᠳᠤ ᠪᠤᠢ᠃
19 ᠬᠠᠷᠢᠨ ᠶᠣᠬᠣᠸᠠ ᠪᠧᠲ ᠱᠧᠮᠧᠱ ᠤᠨ ᠬᠥᠮᠦᠰ ᠦᠨ ᠳᠤᠮᠳᠠ ᠠᠴᠠ ᠵᠠᠷᠢᠮ ᠢ ᠨᠢ ᠴᠣᠬᠢᠪᠠ᠂ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢᠨ ᠳᠣᠲᠣᠷᠠᠬᠢ ᠶᠢ ᠬᠠᠷᠠᠭᠰᠠᠨ ᠤᠴᠢᠷ ᠢᠶᠠᠷ ᠶᠣᠬᠣᠸᠠ ᠠᠷᠠᠳ ᠣᠯᠠᠨ ᠤ ᠳᠤᠮᠳᠠ ᠠᠴᠠ ᠳᠠᠯᠠᠨ ᠬᠥᠮᠦᠨ 8 ᠢ ᠴᠣᠬᠢᠪᠠ᠃ ᠶᠣᠬᠣᠸᠠ ᠬᠥᠮᠦᠰ ᠢ ᠦᠢ ᠣᠯᠠᠨ ᠢᠶᠠᠷ ᠬᠢᠳᠤᠭᠰᠠᠨ ᠳᠤ᠂ ᠠᠷᠠᠳ ᠣᠯᠠᠨ ᠡᠮᠬᠡᠨᠢᠨ ᠭᠠᠰᠢᠭᠤᠳᠠᠪᠠ᠃ 20 ᠪᠧᠲ ᠱᠧᠮᠧᠱ ᠤᠨ ᠬᠥᠮᠦᠰ᠄ 《ᠡᠨᠡ ᠠᠷᠢᠭᠤᠨ ᠪᠤᠷᠬᠠᠨ᠂ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠬᠡᠨ ᠵᠣᠭᠰᠣᠵᠤ ᠴᠢᠳᠠᠬᠤ ᠪᠤᠢ︖ ᠲᠡᠷᠡ ᠪᠤᠷᠬᠠᠨ ᠪᠢᠳᠡᠨ ᠡᠴᠡ ᠬᠡᠨ ᠤᠷᠤᠭᠤ ᠣᠴᠢᠬᠤ ᠪᠤᠢ︖》 ᠭᠡᠵᠡᠭᠡᠪᠡ᠃ 21 ᠲᠡᠢᠮᠦ ᠡᠴᠡ ᠲᠡᠳᠡ ᠺᠢᠷᠢᠶᠠᠲ ᠶᠧᠶᠠᠷᠢᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠤᠷᠤᠭᠤ ᠡᠯᠴᠢᠳ ᠢ ᠢᠯᠡᠭᠡᠵᠦ᠄ 《ᠹᠢᠯᠢᠰᠲ᠋ᠴᠦᠳ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠪᠤᠴᠠᠭᠠᠵᠤ ᠠᠪᠴᠢᠷᠠᠯᠠ᠃ ᠲᠠ ᠨᠠᠷ ᠢᠷᠡᠵᠦ᠂ ᠡᠭᠦᠨ ᠢ ᠥᠪᠡᠷ ᠲᠡᠭᠡᠨ ᠠᠪᠤᠭᠲᠤᠨ》 ᠭᠡᠪᠡ᠃