ᠨᠢᠭᠡᠳᠦᠭᠡᠷ ᠰᠠᠮᠦ᠋ᠶᠧᠯ ᠠᠷᠪᠠ
1 ᠰᠠᠮᠦ᠋ᠶᠧᠯ ᠰᠠᠪᠠ ᠲᠠᠢ ᠲᠣᠰᠣ ᠠᠪᠴᠤ᠂ ᠰᠠᠦ᠋ᠯ ᠤᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠴᠢᠳᠬᠤᠨ᠂ ᠲᠡᠭᠦᠨ ᠢ ᠦᠨᠦᠰᠦᠭᠡᠳ᠄ 《ᠶᠣᠬᠣᠸᠠ ᠥᠪᠡᠷ ᠦᠨ ᠠᠷᠠᠳ ᠲᠦᠮᠡᠨ ᠦ ᠵᠠᠬᠢᠷᠤᠭᠴᠢ ᠪᠣᠯᠭᠠᠬᠤ ᠭᠡᠵᠦ ᠴᠢᠮᠠᠶᠢ ᠲᠣᠰᠣᠯᠠᠭᠰᠠᠨ ᠪᠤᠰᠤ ᠤᠤ︖ 2 ᠴᠢ ᠥᠨᠥᠳᠥᠷ ᠨᠠᠳᠠ ᠠᠴᠠ ᠰᠠᠯᠵᠤ ᠶᠠᠪᠤᠭᠠᠳ ᠪᠢᠨᠶᠠᠮᠢᠨ ᠤ ᠨᠤᠲᠤᠭ ᠤᠨ ᠵᠠᠬᠠ ᠳᠠᠬᠢ ᠽᠧᠯᠽᠠ ᠳᠤ ᠪᠠᠢᠬᠠ ᠷᠠᠾᠢᠯ ᠤᠨ ᠪᠤᠯᠠᠰᠢᠨ ᠤ ᠳᠡᠷᠭᠡᠳᠡ ᠬᠣᠶᠠᠷ ᠬᠥᠮᠦᠨ ᠲᠡᠢ ᠲᠠᠭᠠᠷᠠᠯᠳᠤᠨᠠ᠃ ᠲᠡᠳᠡ ᠴᠢᠮᠠ ᠳᠤ᠄ 〈ᠴᠢᠨᠦ ᠬᠠᠢᠵᠤ ᠪᠠᠢᠭᠠ ᠡᠯᠵᠢᠭᠡ ᠨᠦᠭᠦᠳ ᠢ ᠣᠯᠣᠭᠰᠠᠨ᠃ ᠬᠠᠷᠠ᠂ ᠴᠢᠨᠦ ᠡᠴᠢᠭᠡ ᠡᠯᠵᠢᠭᠡ ᠨᠦᠭᠦᠳ ᠢ ᠪᠣᠳᠣᠬᠤ ᠪᠠᠨ ᠪᠣᠯᠢᠵᠤ ᠬᠦᠦ ᠮᠢᠨᠢ ᠶᠠᠭᠠᠬᠢᠪᠠ︖ ᠭᠡᠵᠦ ᠥᠭᠦᠯᠡᠨ ᠲᠠ ᠨᠠᠷ ᠤᠨ ᠠᠷᠤ ᠠᠴᠠ ᠰᠠᠨᠠᠭᠠ ᠵᠣᠪᠠᠵᠤ ᠪᠠᠢᠨᠠ〉 ᠭᠡᠵᠦ ᠬᠡᠯᠡᠬᠦ ᠪᠣᠯᠣᠨᠠ᠃ 3 ᠴᠢ ᠲᠡᠨᠳᠡ ᠡᠴᠡ ᠴᠢᠨᠠᠭᠰᠢ ᠶᠠᠪᠤᠵᠤ᠂ ᠲᠠᠪᠣᠷ ᠤᠨ ᠴᠠᠷᠠᠰᠤᠨ ᠮᠣᠳᠣ ᠬᠦᠷᠴᠦ᠂ ᠲᠡᠨᠳᠡ ᠪᠧᠲ᠋ᠧᠯ ᠤᠷᠤᠭᠤ ᠪᠤᠷᠬᠠᠨ ᠳᠤ ᠮᠥᠷᠭᠥᠬᠦ ᠪᠡᠷ ᠶᠠᠪᠤᠭᠠ ᠭᠤᠷᠪᠠᠨ ᠬᠥᠮᠦᠨ ᠲᠡᠢ ᠲᠠᠭᠠᠷᠠᠯᠳᠤᠨᠠ᠃ ᠨᠢᠭᠡ ᠨᠢ ᠭᠤᠷᠪᠠᠨ ᠢᠰᠢᠭᠡ᠂ ᠨᠥᠭᠥᠭᠡ ᠨᠢ ᠭᠤᠷᠪᠠᠨ ᠪᠣᠣᠪᠣ᠂ ᠪᠠᠰᠠ ᠨᠢᠭᠡ ᠨᠢ ᠨᠢᠭᠡ ᠲᠤᠯᠤᠮ ᠳᠠᠷᠠᠰᠤ ᠠᠪᠴᠤ ᠶᠠᠪᠤᠨᠠ᠃ 4 ᠲᠡᠳᠡ ᠮᠡᠨᠳᠦ ᠶᠢ ᠴᠢᠨᠢ ᠠᠰᠠᠭᠤᠵᠤ᠂ ᠴᠢᠮᠠ ᠳᠤ ᠬᠣᠶᠠᠷ ᠪᠣᠣᠪᠣ ᠥᠭᠬᠦ ᠳᠦ᠂ ᠴᠢ ᠭᠠᠷ ᠠᠴᠠ ᠨᠢ ᠪᠣᠣᠪᠣ ᠶᠢ ᠠᠪ᠃ 5 ᠳᠠᠷᠠᠭᠠ ᠨᠢ ᠹᠢᠯᠢᠰᠲ ᠤᠨ ᠬᠠᠷᠠᠭᠤᠯ ᠲᠠᠢ ᠪᠤᠷᠬᠠᠨ ᠤ ᠳᠣᠪᠣᠴᠠᠭ ᠲᠤ ᠴᠢ ᠬᠦᠷᠴᠦ ᠣᠴᠢᠨᠠ᠃ ᠴᠢ ᠬᠣᠲᠠ ᠳᠤ ᠣᠷᠣᠬᠤ ᠳᠠᠭᠠᠨ ᠮᠥᠷᠭᠥᠯ ᠦᠨ ᠥᠨᠳᠥᠷᠯᠢᠭ ᠡᠴᠡ ᠪᠠᠭᠤᠵᠤ ᠪᠠᠢᠭᠠ ᠬᠡᠰᠡᠭ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠲᠠᠢ ᠲᠠᠭᠠᠷᠠᠯᠳᠤᠨᠠ᠃ ᠲᠡᠳᠡᠨ ᠦ ᠲᠦᠷᠦᠭᠦᠨ ᠳᠦ ᠬᠤᠭᠤᠷ᠂ ᠬᠡᠩᠭᠡᠷᠭᠡ᠂ ᠪᠢᠰᠬᠢᠭᠦᠷ᠂ ᠶᠠᠲᠤᠭᠠ ᠬᠥᠭᠵᠢᠮ ᠳᠤᠤᠭᠠᠷᠬᠤ ᠪᠥᠭᠡᠳ ᠲᠡᠳᠡ ᠡᠰᠢ ᠦᠵᠡᠭᠦᠯᠵᠡᠭᠡᠵᠦ ᠪᠠᠢᠲᠠᠯᠠ 6 ᠶᠣᠬᠣᠸᠠ ᠶᠢᠨ ᠰᠦᠨᠡᠰᠦ ᠴᠢᠨᠦ ᠳᠡᠭᠡᠷᠡ ᠬᠦᠴᠦᠲᠡᠢ ᠪᠠᠭᠤᠵᠤ᠂ ᠴᠢ ᠲᠡᠳᠡᠨ ᠲᠡᠢ ᠬᠠᠮᠲᠤ ᠡᠰᠢ ᠦᠵᠡᠭᠦᠯᠦᠨ᠂ ᠥᠭᠡᠷᠡᠴᠢᠯᠡᠭᠳᠡᠵᠦ᠂ ᠰᠢᠨᠡ ᠬᠥᠮᠦᠨ ᠪᠣᠯᠣᠨᠠ᠃ 7 ᠡᠳᠡᠭᠡᠷ ᠲᠡᠮᠳᠡᠭ ᠤᠳ ᠲᠣᠬᠢᠶᠠᠯᠳᠤᠬᠤ ᠳᠤ ᠠᠶᠠ ᠪᠠᠷ ᠢᠶᠠᠨ ᠬᠢ᠂ ᠤᠴᠢᠷ ᠨᠢ ᠪᠤᠷᠬᠠᠨ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠣᠨᠠ᠃ 8 ᠴᠢ ᠨᠠᠳᠠ ᠠᠴᠠ ᠲᠦᠷᠦᠭᠦᠯᠡᠵᠦ ᠭᠢᠯᠭᠠᠯ ᠤᠷᠤᠭᠤ ᠣᠴᠢ᠃ ᠪᠢ ᠴᠤ ᠴᠢᠨᠦ ᠠᠷᠤ ᠠᠴᠠ ᠣᠴᠢᠵᠤ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠤᠳ ᠪᠣᠯᠣᠨ ᠡᠪ ᠦᠨ ᠲᠠᠬᠢᠯ ᠤᠳ ᠢ ᠡᠷᠭᠦᠨᠡ᠂ ᠪᠢ ᠣᠴᠢᠲᠠᠯᠠ ᠴᠢ ᠲᠡᠨᠳᠡ ᠪᠡᠨ ᠳᠣᠯᠣᠭᠠᠨ ᠬᠣᠨᠣᠭ ᠬᠦᠯᠢᠶᠡ᠃ ᠪᠢ ᠴᠢᠨᠦ ᠬᠢᠬᠦ ᠪᠦᠬᠦᠨ ᠢ ᠵᠢᠭᠠᠵᠤ ᠥᠭᠭᠥᠨᠡ》 ᠭᠡᠵᠦ ᠬᠡᠯᠡᠵᠡᠢ᠃
9 ᠰᠠᠦ᠋ᠯ ᠰᠠᠮᠦ᠋ᠶᠧᠯ ᠡᠴᠡ ᠰᠠᠯᠵᠤ ᠶᠠᠪᠤᠬᠤ ᠪᠠᠷ ᠡᠷᠭᠢᠬᠦ ᠦᠶᠡ ᠳᠦ᠂ ᠪᠤᠷᠬᠠᠨ ᠰᠠᠦ᠋ᠯ ᠤᠨ ᠵᠢᠷᠦᠬᠡ ᠶᠢ ᠰᠢᠨᠡᠴᠢᠯᠡᠭᠰᠡᠨ ᠪᠥᠭᠡᠳ ᠲᠡᠮᠳᠡᠭ ᠤᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠲᠡᠷᠡ ᠡᠳᠦᠷ ᠲᠡᠭᠡᠨ ᠪᠡᠶᠡᠯᠡᠭᠳᠡᠵᠡᠢ᠃ 10 ᠥᠨᠥᠬᠢ ᠳᠣᠪᠣᠴᠠᠭ ᠲᠤ ᠬᠦᠷᠲᠡᠯᠡ ᠬᠡᠰᠡᠭ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠲᠡᠭᠦᠨ ᠲᠡᠢ ᠲᠠᠭᠠᠷᠠᠯᠳᠤᠵᠤ᠂ ᠪᠤᠷᠬᠠᠨ ᠤ ᠰᠦᠨᠡᠰᠦ ᠰᠠᠦ᠋ᠯ ᠤᠨ ᠳᠡᠭᠡᠷᠡ ᠬᠦᠴᠦᠲᠡᠢ ᠪᠠᠭᠤᠭᠰᠠᠨ ᠳᠤ᠂ ᠲᠡᠷᠡ ᠴᠤ ᠲᠡᠳᠡᠨ ᠦ ᠳᠤᠮᠳᠠ ᠡᠰᠢ ᠦᠵᠡᠭᠦᠯᠪᠡ᠃ 11 ᠢᠩᠭᠢᠭᠡᠳ ᠤᠷᠢᠳᠤ ᠨᠢ ᠰᠠᠦ᠋ᠯ ᠢ ᠲᠠᠨᠢᠳᠠᠭ ᠪᠦᠬᠦ ᠬᠥᠮᠦᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠲᠠᠢ ᠬᠠᠮᠲᠤ ᠡᠰᠢ ᠦᠵᠡᠭᠦᠯᠵᠦ ᠪᠠᠢᠬᠤ ᠶᠢ ᠨᠢ ᠬᠠᠷᠠᠭᠠᠳ᠄ 《ᠺᠢᠱ ᠤᠨ ᠬᠥᠪᠡᠭᠦᠨ ᠶᠠᠭᠤ ᠪᠣᠯᠪᠠ︖ ᠰᠠᠦ᠋ᠯ ᠪᠠᠰᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠳᠤᠮᠳᠠ ᠪᠠᠢᠨᠠ ᠤᠤ︖》 ᠭᠡᠵᠦ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠷᠢᠯᠴᠠᠬᠤ ᠳᠤ᠂ 12 ᠲᠡᠨᠳᠡ ᠪᠠᠢᠭᠰᠠᠨ ᠨᠢᠭᠡ ᠬᠥᠮᠦᠨ ᠬᠠᠷᠢᠭᠤ ᠳᠤᠨᠢ᠄ 《ᠡᠳᠡᠨ ᠦ ᠡᠴᠢᠭᠡ ᠨᠢ ᠬᠡᠨ ᠪᠤᠢ︖》 ᠭᠡᠪᠡ᠃ ᠲᠡᠢᠮᠦ ᠡᠴᠡ᠄ 《ᠰᠠᠦ᠋ᠯ ᠪᠠᠰᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠳᠤᠮᠳᠠ ᠪᠠᠢᠨᠠ ᠭᠡᠵᠢ ᠤᠤ︖》 ᠭᠡᠳᠡᠭ ᠵᠦᠢᠷ ᠦᠭᠡ ᠭᠠᠷᠴᠠᠢ᠃ 13 ᠰᠠᠦ᠋ᠯ ᠡᠰᠢ ᠦᠵᠡᠭᠦᠯᠵᠦ ᠳᠠᠭᠤᠰᠤᠭᠠᠳ᠂ ᠮᠥᠷᠭᠥᠯ ᠦᠨ ᠥᠨᠳᠥᠷᠯᠢᠭ ᠥᠭᠡᠳᠡ ᠣᠴᠢᠪᠠ᠃
14 《ᠲᠠ ᠨᠠᠷ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠴᠢᠬᠠᠪᠠ︖》 ᠭᠡᠵᠦ ᠠᠪᠠᠭᠠ ᠨᠢ ᠰᠠᠦ᠋ᠯ ᠪᠣᠯᠣᠨ ᠲᠡᠭᠦᠨ ᠦ ᠵᠠᠷᠤᠴᠠ ᠠᠴᠠ ᠠᠰᠠᠭᠤᠬᠤ ᠳᠤ᠂ ᠰᠠᠦ᠋ᠯ᠄ 《ᠡᠮᠡ ᠡᠯᠵᠢᠭᠡ ᠨᠦᠭᠦᠳ ᠢᠶᠡᠨ ᠬᠠᠢᠭᠠᠳ᠁ ᠪᠠᠢᠬᠤ ᠦᠭᠡᠢ ᠶᠢ ᠨᠢ ᠬᠠᠷᠠᠭᠠᠳ ᠰᠠᠮᠦ᠋ᠶᠧᠯ ᠳᠡᠭᠡᠷᠡ ᠣᠴᠢᠭᠠᠳ ᠢᠷᠡᠯᠡ》 ᠭᠡᠵᠦ ᠬᠡᠯᠡᠪᠡ᠃ 15 ᠰᠠᠦ᠋ᠯ ᠤᠨ ᠠᠪᠠᠭᠠ ᠨᠢ᠄ 《ᠰᠠᠮᠦ᠋ᠶᠧᠯ ᠲᠠ ᠨᠠᠷ ᠲᠤ ᠶᠠᠭᠤ ᠬᠡᠯᠡᠭᠰᠡᠨ ᠢ ᠶᠠᠷᠢᠭᠠᠴᠢ》 ᠭᠡᠬᠦ ᠳᠦ᠂ 16 ᠰᠠᠦ᠋ᠯ ᠠᠪᠠᠭᠠ ᠳᠠᠭᠠᠨ᠄ 《ᠡᠮᠡ ᠡᠯᠵᠢᠭᠡ ᠨᠦᠭᠦᠳ ᠴᠢᠨᠢ ᠣᠯᠳᠠᠭᠰᠠᠨ ᠭᠡᠵᠦ ᠲᠣᠳᠣᠷᠬᠠᠢ ᠬᠡᠯᠡᠵᠦ ᠥᠭᠭᠥᠯᠡ》 ᠭᠡᠪᠡ᠃ ᠬᠠᠷᠢᠨ ᠰᠠᠦ᠋ᠯ ᠥᠪᠡᠷ ᠦᠨ ᠬᠢᠨᠢ ᠬᠠᠭᠠᠨ ᠪᠣᠯᠬᠤ 9 ᠲᠤᠬᠠᠢ ᠰᠠᠮᠦ᠋ᠶᠧᠯ ᠤᠨ ᠬᠡᠯᠡᠭᠰᠡᠨ ᠦᠭᠡ ᠶᠢ ᠳᠤᠭᠤᠯᠭᠠᠭᠰᠠᠨ ᠦᠭᠡᠢ᠃
17 ᠰᠠᠮᠦ᠋ᠶᠧᠯ ᠠᠷᠠᠳ ᠣᠯᠠᠨ ᠢ ᠮᠢᠽᠫᠠ ᠳᠤ ᠳᠠᠭᠤᠳᠠᠨ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠴᠤᠭᠯᠠᠭᠤᠯᠵᠤ᠂ 18 ᠢᠰᠷᠧᠯᠴᠦᠳ ᠲᠦ᠄ 《ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠢᠰᠷᠧᠯ ᠢ ᠶᠧᠵᠢᠫᠲ ᠡᠴᠡ ᠭᠠᠷᠭᠠᠭᠰᠠᠨ ᠨᠢ ᠪᠢ ᠪᠢᠯᠡ᠃ ᠪᠢ ᠲᠠ ᠨᠠᠷ ᠢ ᠶᠧᠵᠢᠫᠲ᠋ᠴᠦᠳ ᠦᠨ ᠭᠠᠷ ᠠᠴᠠ ᠠᠪᠴᠤ᠂ ᠲᠠ ᠨᠠᠷ ᠢ ᠳᠠᠷᠤᠯᠠᠭᠴᠢ ᠠᠯᠢᠪᠠ ᠬᠠᠭᠠᠨᠲᠤ ᠤᠯᠤᠰ ᠤᠨ ᠭᠠᠷ ᠠᠴᠠ ᠭᠡᠲᠦᠯᠭᠡᠭᠰᠡᠨ ᠶᠤᠮ〉 ᠭᠡᠪᠡ᠃ 19 ᠭᠡᠪᠡᠴᠦ ᠲᠠ ᠨᠠᠷ ᠥᠨᠥᠳᠥᠷ ᠲᠠ ᠨᠠᠷ ᠢ ᠪᠦᠬᠦᠢᠯᠡ ᠭᠠᠢ ᠭᠠᠮᠰᠢᠭ᠂ ᠵᠣᠪᠠᠯᠠᠩ ᠠᠴᠠ ᠠᠪᠤᠷᠠᠭᠰᠠᠨ ᠪᠤᠷᠬᠠᠨ ᠢᠶᠠᠨ ᠣᠭᠣᠷᠴᠤ᠄ 〈ᠪᠢᠳᠡᠨ ᠦ ᠳᠡᠭᠡᠷᠡ ᠬᠠᠭᠠᠨ ᠲᠠᠯᠪᠢᠭᠠᠴᠢ︕〉 ᠭᠡᠵᠡᠭᠡᠭᠰᠡᠨ᠃ ᠶᠠᠭᠠᠬᠢᠶᠠ ᠭᠡᠬᠦ ᠪᠤᠢ᠂ ᠲᠠ ᠨᠠᠷ ᠣᠳᠣ ᠣᠪᠣᠭ ᠪᠣᠯᠣᠨ ᠡᠷᠦᠬᠡ ᠡᠷᠦᠬᠡ ᠪᠡᠷ ᠢᠶᠠᠨ ᠪᠤᠷᠬᠠᠨ ᠤ ᠡᠮᠦᠨᠡ ᠢᠷᠡᠭᠡᠳ ᠵᠣᠭᠰᠣᠭᠲᠤᠨ》 ᠭᠡᠵᠦ ᠬᠡᠯᠡᠪᠡ᠃
20 ᠡᠢᠨ ᠬᠦ ᠰᠠᠮᠦ᠋ᠶᠧᠯ ᠢᠰᠷᠧᠯ ᠤᠨ ᠣᠪᠣᠭ ᠪᠦᠷᠢ ᠶᠢ ᠨᠠᠭᠠᠰᠢᠯᠠᠭᠤᠯᠬᠤ ᠳᠤ᠂ ᠪᠢᠨᠶᠠᠮᠢᠨ ᠤ ᠣᠪᠣᠭ ᠰᠢᠪᠠᠭᠠ ᠪᠠᠷ ᠲᠣᠨᠣᠪᠠ᠃ 21 ᠲᠡᠷᠡ ᠪᠢᠨᠶᠠᠮᠢᠨ ᠤ ᠣᠪᠣᠭ ᠢ ᠭᠡᠷ ᠪᠦᠯᠢ ᠪᠠᠷ ᠨᠢ ᠨᠠᠭᠠᠰᠢᠯᠠᠭᠤᠯᠤᠭᠰᠠᠨ ᠳᠤ᠂ ᠮᠠᠲ᠋ᠠᠷ ᠤᠨ ᠭᠡᠷ ᠪᠦᠯᠢ ᠲᠣᠨᠣᠭᠰᠠᠨ ᠪᠥᠭᠡᠳ ᠡᠴᠦᠰ ᠲᠤᠨᠢ ᠺᠢᠱ ᠤᠨ ᠬᠥᠪᠡᠭᠦᠨ ᠰᠠᠦ᠋ᠯ ᠲᠣᠨᠣᠪᠠ᠃ ᠬᠠᠷᠢᠨ ᠲᠡᠳᠡ ᠰᠠᠦ᠋ᠯ ᠢ ᠡᠷᠢᠵᠦ ᠬᠠᠢᠭᠰᠠᠨ ᠪᠣᠯᠪᠠᠴᠤ ᠣᠯᠣᠭᠰᠠᠨ ᠦᠭᠡᠢ᠃ 22 ᠲᠡᠢᠮᠦ ᠡᠴᠡ ᠲᠡᠳᠡ ᠶᠣᠬᠣᠸᠠ ᠠᠴᠠ᠄ 《ᠲᠡᠷᠡ ᠬᠥᠮᠦᠨ ᠡ᠊ᠨᠳᠡ ᠢᠷᠡᠭᠰᠡᠨ ᠤᠤ︖》 ᠭᠡᠵᠦ ᠯᠠᠪᠯᠠᠨ ᠠᠰᠠᠭᠤᠭᠰᠠᠨ ᠳᠤ᠂ ᠶᠣᠬᠣᠸᠠ᠄ 《ᠲᠡᠷᠡ ᠠᠴᠢᠶᠠ ᠨᠤᠭᠤᠳ ᠤᠨ ᠳᠤᠮᠳᠠ ᠨᠢᠭᠤᠭᠳᠠᠵᠤ ᠪᠠᠢᠨᠠ》 ᠭᠡᠪᠡ᠃ 23 ᠬᠥᠮᠦᠰ ᠭᠦᠶᠦᠨ ᠣᠴᠢᠵᠤ᠂ ᠲᠡᠭᠦᠨ ᠢ ᠲᠡᠨᠳᠡ ᠡᠴᠡ ᠠᠪᠴᠢᠷᠠᠪᠠ᠃ ᠰᠠᠦ᠋ᠯ ᠠᠷᠠᠳ ᠣᠯᠠᠨ ᠤ ᠳᠤᠮᠳᠠ ᠵᠣᠭᠰᠣᠬᠤ ᠳᠤ᠂ ᠪᠦᠬᠦ ᠬᠥᠮᠦᠨ ᠡᠴᠡ ᠲᠣᠯᠣᠭᠠᠢ ᠢᠯᠡᠭᠦᠦ ᠥᠨᠳᠥᠷ ᠪᠠᠢᠪᠠ᠃ 24 ᠰᠠᠮᠦ᠋ᠶᠧᠯ ᠠᠷᠠᠳ ᠲᠦᠮᠡᠨ ᠳᠦ᠄ 《ᠲᠠ ᠨᠠᠷ ᠶᠣᠬᠣᠸᠠ ᠶᠢᠨ ᠰᠣᠩ᠋ᠭᠣᠭᠰᠠᠨ ᠬᠥᠮᠦᠨ ᠢ ᠬᠠᠷᠠᠵᠤ ᠪᠠᠢᠨᠠ ᠤᠤ︖ ᠲᠡᠭᠦᠨ ᠲᠡᠢ ᠡᠩ ᠵᠡᠷᠭᠡᠴᠡᠬᠦ ᠬᠥᠮᠦᠨ ᠠᠷᠠᠳ ᠲᠦᠮᠡᠨ ᠦ ᠳᠤᠮᠳᠠ ᠪᠠᠢᠬᠤ ᠦᠭᠡᠢ ᠰᠢᠦ》 ᠭᠡᠬᠦ ᠳᠦ᠂ ᠠᠷᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠤᠤᠬᠠᠢᠯᠠᠵᠤ᠄ 《ᠬᠠᠭᠠᠨ ᠮᠠᠨᠳᠤᠲᠤᠭᠠᠢ︕》 ᠭᠡᠪᠡ᠃ 25 ᠰᠠᠮᠦ᠋ᠶᠧᠯ ᠠᠷᠠᠳ ᠣᠯᠠᠨ ᠳᠤ ᠬᠠᠭᠠᠨ ᠤ ᠶᠣᠰᠣ ᠵᠢᠷᠤᠮ ᠢ ᠲᠠᠢᠯᠪᠤᠷᠢᠯᠠᠵᠤ᠂ ᠲᠡᠳᠡᠭᠡᠷ ᠢ ᠬᠤᠢᠯᠠᠮᠠᠯ ᠳᠤ ᠪᠢᠴᠢᠨ᠂ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠲᠠᠯᠪᠢᠪᠠ᠃ ᠲᠡᠭᠡᠭᠡᠳ ᠰᠠᠮᠦ᠋ᠶᠧᠯ ᠪᠦᠬᠦ ᠠᠷᠠᠳ ᠣᠯᠠᠨ ᠢ ᠭᠡᠷ ᠭᠡᠷ ᠤᠷᠤᠭᠤ ᠨᠢ ᠶᠠᠪᠤᠭᠤᠯᠪᠠ᠃ 26 ᠰᠠᠦ᠋ᠯ ᠴᠤ ᠭᠢᠪᠧᠶᠠ ᠳᠠᠬᠢ ᠭᠡᠷ ᠤᠷᠤᠭᠤ ᠪᠠᠨ ᠶᠠᠪᠤᠯᠠ᠃ ᠪᠤᠷᠬᠠᠨ ᠳᠤ ᠰᠡᠳᠬᠢᠯ ᠨᠢ ᠬᠥᠳᠡᠯᠭᠡᠭᠳᠡᠭᠰᠡᠨ ᠵᠣᠷᠢᠭᠲᠤ ᠳᠠᠢᠴᠢᠨ ᠡᠷᠡᠰ ᠲᠡᠭᠦᠨ ᠲᠡᠢ ᠶᠠᠪᠤᠵᠠᠢ᠃ 27 ᠭᠡᠪᠡᠴᠦ ᠬᠡᠰᠡᠭ ᠪᠦᠲᠦᠯ ᠦᠭᠡᠢ ᠬᠥᠮᠦᠰ᠄ 《ᠡᠨᠡ ᠭᠠᠢᠬᠠᠯ ᠪᠢᠳᠡᠨ ᠢ ᠶᠠᠭᠠᠬᠢᠵᠤ ᠠᠪᠤᠷᠠᠬᠤ ᠶᠤᠮ ᠪᠤᠢ︖》 ᠭᠡᠳ ᠲᠡᠭᠦᠨ ᠢ ᠪᠠᠰᠤᠮᠵᠢᠯᠠᠵᠤ᠂ ᠲᠡᠭᠦᠨ ᠳᠦ ᠪᠡᠯᠡᠭ ᠴᠤ ᠠᠪᠴᠢᠷᠠᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠰᠠᠦ᠋ᠯ ᠳᠤᠭᠤᠢ ᠪᠠᠢᠪᠠ᠃