ᠨᠢᠭᠡᠳᠦᠭᠡᠷ ᠰᠠᠮᠦ᠋ᠶᠧᠯ ᠠᠷᠪᠠᠨ ᠨᠢᠭᠡ
ᠰᠠᠦ᠋ᠯ ᠤᠨ ᠠᠩ᠋ᠬᠠᠨ ᠤ ᠢᠯᠠᠯᠲᠠ
1 ᠠᠮᠣᠨ ᠬᠥᠮᠦᠨ ᠨᠠᠬᠠᠱ ᠬᠦᠷᠴᠦ ᠢᠷᠡᠭᠡᠳ᠂ ᠶᠠᠪᠧᠱ ᠭᠢᠯᠧᠶᠠᠳ᠋ ᠢ ᠪᠦᠰᠡᠯᠡᠨ ᠬᠤᠸᠠᠷᠠᠩᠨᠠᠪᠠ᠃ ᠶᠠᠪᠧᠱᠴᠤᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠨᠠᠬᠠᠱ ᠲᠤ᠄ 《ᠪᠢᠳᠡᠨ ᠲᠡᠢ ᠭᠡᠷᠡ ᠪᠠᠢᠭᠤᠯᠤᠭᠠᠴᠢ᠂ ᠪᠢᠳᠡ ᠲᠠᠨ ᠳᠤ ᠦᠢᠯᠡᠴᠢᠯᠡᠶᠡ》 ᠭᠡᠵᠡᠭᠡᠪᠡ᠃ 2 ᠬᠠᠷᠢᠨ ᠠᠮᠣᠨ ᠬᠥᠮᠦᠨ ᠨᠠᠬᠠᠱ ᠲᠡᠳᠡᠨ ᠳᠦ᠄ 《ᠲᠠ ᠨᠠᠷ ᠤᠨ ᠪᠦᠭᠦᠳᠡ ᠶᠢᠨ ᠴᠢᠨᠢ ᠪᠠᠷᠠᠭᠤᠨ ᠨᠢᠳᠦ ᠶᠢ ᠤᠬᠤᠵᠤ ᠠᠪᠤᠭᠠᠳ᠂ ᠪᠦᠬᠦ ᠢᠰᠷᠧᠯ ᠳᠤ ᠰᠢᠪᠰᠢᠭ ᠠᠪᠴᠢᠷᠠᠬᠤ ᠨᠥᠬᠥᠴᠡᠯ ᠳᠦ ᠪᠢ ᠲᠠ ᠨᠠᠷ ᠲᠠᠢ ᠭᠡᠷᠡ ᠪᠠᠢᠭᠤᠯᠤᠶᠠ》 ᠭᠡᠵᠦ ᠬᠠᠷᠢᠭᠤᠯᠪᠠ᠃ 3 ᠶᠠᠪᠧᠱ ᠤᠨ ᠠᠬᠠᠮᠠᠳ ᠤᠳ ᠲᠡᠭᠦᠨ ᠳᠦ᠄ 《ᠪᠢᠳᠡᠨ ᠳᠦ ᠳᠣᠯᠣᠭᠠᠨ ᠬᠣᠨᠣᠭ ᠤᠨ ᠬᠤᠭᠤᠴᠠᠭᠠ ᠶᠢ ᠵᠥᠪᠰᠢᠶᠡᠷᠡᠭᠡᠴᠢ︕ ᠪᠢᠳᠡ ᠢᠰᠷᠧᠯ ᠤᠨ ᠨᠤᠲᠤᠭ ᠳᠠᠶᠠᠭᠠᠷ ᠡᠯᠴᠢᠳ ᠢ ᠶᠠᠪᠤᠭᠤᠯᠤᠶᠠ᠃ ᠬᠡᠷᠪᠡ ᠠᠪᠤᠷᠠᠬᠤ ᠬᠥᠮᠦᠨ ᠣᠯᠳᠠᠬᠤ ᠦᠭᠡᠢ ᠪᠣᠯ ᠪᠢᠳᠡ ᠲᠠᠨ ᠤᠷᠤᠭᠤ ᠭᠠᠷᠴᠤ ᠣᠴᠢᠶᠠ》 ᠭᠡᠪᠡ᠃ 4 ᠲᠡᠭᠡᠭᠡᠳ ᠡᠯᠴᠢᠳ ᠰᠠᠦ᠋ᠯ ᠤᠨ ᠰᠠᠭᠤᠳᠠᠭ ᠭᠢᠪᠧᠶᠠ ᠤᠷᠤᠭᠤ ᠢᠷᠡᠵᠦ᠂ ᠲᠡᠨᠳᠡᠬᠢ ᠶᠢᠨ ᠪᠦᠬᠦ ᠬᠥᠮᠦᠨ ᠳᠦ ᠡᠨᠡ ᠶᠠᠪᠤᠳᠠᠯ ᠢ ᠳᠤᠭᠤᠯᠭᠠᠭᠰᠠᠨ ᠳᠤ᠂ ᠠᠷᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠳᠠᠭᠤ ᠲᠠᠯᠪᠢᠨ ᠤᠬᠢᠯᠠᠯᠳᠤᠪᠠ᠃
5 ᠲᠡᠷᠡ ᠦᠶᠡ ᠳᠦ ᠰᠠᠦ᠋ᠯ ᠦᠬᠡᠷ ᠢᠶᠡᠨ ᠲᠠᠭᠤᠵᠤ᠂ ᠲᠠᠯᠠᠪᠠᠢ ᠠᠴᠠ ᠪᠠᠨ ᠪᠤᠴᠠᠵᠤ ᠢᠷᠡᠵᠦ ᠪᠠᠢᠪᠠ᠃ ᠰᠠᠦ᠋ᠯ᠄ 《ᠬᠥᠮᠦᠰ ᠶᠠᠭᠤ ᠪᠣᠯᠣᠭᠠᠳ ᠤᠬᠢᠯᠠᠯᠳᠤᠵᠤ ᠪᠠᠢᠨᠠ ᠪᠤᠢ︖》 ᠭᠡᠰᠡᠨ ᠳᠦ᠂ ᠲᠡᠳᠡ ᠶᠠᠪᠧᠱᠴᠤᠳ ᠤᠨ ᠶᠠᠪᠤᠳᠠᠯ ᠢ ᠲᠡᠭᠦᠨ ᠳᠦ ᠲᠣᠭᠠᠴᠢᠵᠤ ᠥᠭᠪᠡ᠃ 6 ᠡᠨᠡ ᠴᠢᠮᠡᠭᠡ ᠶᠢ ᠰᠣᠨᠣᠰᠬᠤ ᠦᠶᠡ ᠳᠦ᠂ ᠪᠤᠷᠬᠠᠨ ᠤ ᠰᠦᠨᠡᠰᠦ ᠰᠠᠦ᠋ᠯ ᠤᠨ ᠳᠡᠭᠡᠷᠡ ᠬᠦᠴᠦᠲᠡᠢ ᠪᠠᠭᠤᠵᠤ᠂ ᠲᠡᠭᠦᠨ ᠦ ᠠᠭᠤᠷ ᠬᠢᠯᠢᠩ ᠶᠡᠬᠡᠳᠡ ᠳᠦᠷᠡᠯᠵᠡᠪᠡ᠃ 7 ᠲᠡᠷᠡ ᠬᠣᠣᠰ ᠪᠤᠭᠤᠯᠠᠭᠠ ᠲᠠᠢ ᠦᠬᠡᠷ ᠤᠳ ᠢ ᠠᠪᠴᠢᠷᠠᠵᠤ᠂ ᠴᠠᠪᠴᠢᠨ ᠬᠤᠪᠢᠶᠠᠭᠠᠳ᠂ ᠡᠯᠴᠢᠳ ᠤᠨ ᠭᠠᠷ ᠢᠶᠠᠷ ᠢᠰᠷᠧᠯ ᠤᠨ ᠨᠤᠲᠤᠭ ᠳᠠᠶᠠᠭᠠᠷ ᠢᠯᠡᠭᠡᠵᠦ᠄ 《ᠰᠠᠦ᠋ᠯ ᠪᠣᠯᠣᠨ ᠰᠠᠮᠦ᠋ᠶᠧᠯ ᠤᠨ ᠠᠷᠤ ᠠᠴᠠ ᠦᠯᠦ ᠳᠠᠭᠠᠭᠴᠢ ᠪᠣᠯᠭᠠᠨ ᠤ ᠦᠬᠡᠷ ᠤᠳ ᠢ ᠡᠢᠮᠦ ᠪᠣᠯᠭᠠᠨᠠ》 ᠭᠡᠵᠦ ᠬᠡᠯᠡᠭᠦᠯᠦᠭᠰᠡᠨ ᠳᠦ᠂ ᠶᠣᠬᠣᠸᠠ ᠠᠴᠠ ᠡᠮᠢᠶᠡᠬᠦᠢ ᠳᠦ ᠨᠥᠮᠥᠷᠥᠭᠳᠡᠨ ᠠᠷᠠᠳ ᠣᠯᠠᠨ ᠨᠢᠭᠡᠨ ᠬᠥᠮᠦᠨ ᠮᠡᠲᠦ ᠢᠷᠡᠵᠡᠭᠡᠪᠡ᠃ 8 ᠰᠠᠦ᠋ᠯ ᠲᠡᠳᠡᠨ ᠢ ᠪᠧᠽᠧᠺ ᠲᠤ ᠴᠤᠭᠯᠠᠭᠤᠯᠬᠤ ᠳᠤ᠂ ᠢᠰᠷᠧᠯᠴᠦᠳ ᠭᠤᠴᠢᠨ ᠲᠦᠮᠡ᠂ ᠶᠦᠳᠠᠴᠤᠳ ᠭᠤᠷᠪᠠᠨ ᠲᠦᠮᠡ ᠪᠠᠢᠪᠠ᠃ 9 ᠲᠡᠳᠡ ᠥᠨᠥᠬᠢ ᠡᠯᠴᠢᠳ ᠲᠤ᠄ 《ᠶᠠᠪᠧᠱ ᠭᠢᠯᠧᠶᠠᠳ᠋ ᠤᠨ ᠬᠥᠮᠦᠰ ᠲᠦ ᠬᠡᠯᠡ᠄ 〈ᠮᠠᠷᠭᠠᠰᠢ ᠨᠠᠷᠠ ᠰᠢᠷᠠᠵᠤ ᠪᠠᠢᠬᠤ ᠦᠶᠡ ᠳᠦ ᠲᠠ ᠨᠠᠷ ᠲᠤ ᠠᠪᠤᠷᠠᠯ ᠲᠤᠰᠠᠯᠠᠮᠵᠢ ᠣᠴᠢᠬᠤ ᠪᠣᠯᠣᠨᠠ〉》 ᠭᠡᠪᠡ᠃ ᠲᠡᠢᠨ ᠬᠦ ᠡᠯᠴᠢᠳ ᠪᠤᠴᠠᠵᠤ ᠶᠠᠪᠧᠱ ᠤᠨ ᠬᠥᠮᠦᠰ ᠲᠦ ᠮᠡᠳᠡᠭᠳᠡᠬᠦ ᠳᠦ᠂ ᠲᠡᠳᠡ ᠪᠠᠶᠠᠷᠯᠠᠪᠠ᠃ 10 ᠲᠡᠭᠡᠭᠡᠳ ᠶᠠᠪᠧᠱ ᠤᠨ ᠬᠥᠮᠦᠰ ᠠᠮᠣᠨᠴᠤᠳ ᠲᠤ᠄ 《ᠮᠠᠷᠭᠠᠰᠢ ᠪᠢᠳᠡ ᠲᠠ ᠨᠠᠷ ᠤᠷᠤᠭᠤ ᠭᠠᠷᠴᠤ ᠣᠴᠢᠨᠠ᠃ ᠲᠠ ᠨᠠᠷ ᠶᠠᠭᠤ ᠳᠤᠷᠠᠲᠠᠢ ᠪᠠᠨ ᠪᠢᠳᠡᠨ ᠳᠦ ᠬᠢᠵᠦ ᠪᠣᠯᠣᠨᠠ》 ᠭᠡᠪᠡ᠃ 11 ᠳᠠᠷᠠᠭᠠ ᠡᠳᠦᠷ ᠨᠢ ᠰᠠᠦ᠋ᠯ ᠬᠥᠮᠦᠰ ᠢᠶᠡᠨ ᠭᠤᠷᠪᠠᠨ ᠠᠩ᠋ᠭᠢ ᠪᠣᠯᠭᠠᠨ ᠬᠤᠪᠢᠶᠠᠪᠠ᠃ ᠥᠷᠯᠥᠭᠡᠨ ᠦ ᠮᠠᠨᠠᠭᠠᠨ ᠳᠡᠭᠡᠷᠡ ᠲᠡᠳᠡ ᠬᠤᠸᠠᠷᠠᠨ ᠤ ᠭᠣᠣᠯ ᠳᠤ ᠴᠥᠮᠥᠷᠥᠨ ᠣᠷᠣᠵᠤ᠂ ᠡᠳᠦᠷ ᠦᠨ ᠬᠠᠯᠠᠭᠤᠨ ᠬᠦᠷᠲᠡᠯᠡ ᠠᠮᠣᠨᠴᠤᠳ ᠢ ᠴᠣᠬᠢᠭᠰᠠᠨ ᠳᠤ᠂ ᠠᠮᠢᠳᠤ ᠦᠯᠡᠳᠡᠭᠰᠡᠳ ᠨᠢ ᠬᠣᠶᠠᠷ ᠬᠥᠮᠦᠨ ᠴᠤ ᠨᠢᠭᠡ ᠳᠣᠣᠷᠠ ᠦᠯᠡᠳᠡᠯ ᠦᠭᠡᠢ ᠪᠤᠲᠠᠷᠠᠨ ᠲᠠᠷᠬᠠᠪᠠ᠃
12 ᠢᠩᠭᠢᠭᠡᠳ ᠠᠷᠠᠳ ᠣᠯᠠᠨ ᠰᠠᠮᠦ᠋ᠶᠧᠯ ᠳᠤ᠄ 《〈ᠰᠠᠦ᠋ᠯ ᠪᠢᠳᠡᠨ ᠦ ᠬᠠᠭᠠᠨ ᠪᠣᠯᠬᠤ ᠭᠡᠵᠢ ᠤᠤ︖〉 ᠭᠡᠵᠦ ᠬᠡᠨ ᠬᠡᠯᠡᠭᠰᠡᠨ ᠪᠤᠢ︖ ᠲᠡᠷᠡ ᠬᠥᠮᠦᠰ ᠢ ᠨᠠᠰᠢ ᠨᠢ ᠥᠭᠭᠥᠭᠡᠳᠡᠭᠡ᠃ ᠪᠢᠳᠡ ᠲᠡᠳᠡᠨ ᠢ ᠠᠯᠠᠶᠠ》 ᠭᠡᠯᠴᠡᠪᠡ᠃ 13 ᠭᠡᠪᠡᠴᠦ ᠰᠠᠦ᠋ᠯ᠄ 《ᠥᠨᠥᠳᠥᠷ ᠬᠥᠮᠦᠨ ᠠᠯᠠᠵᠤ ᠪᠣᠯᠬᠤ ᠦᠭᠡᠢ᠃ ᠥᠨᠥᠳᠥᠷ ᠶᠣᠬᠣᠸᠠ ᠢᠰᠷᠧᠯ ᠳᠤ ᠠᠪᠤᠷᠠᠯ ᠢ ᠥᠭᠭᠥᠭᠰᠡᠨ ᠶᠤᠮ》 ᠭᠡᠰᠡᠨ ᠳᠦ᠂ 14 ᠰᠠᠮᠦ᠋ᠶᠧᠯ ᠠᠷᠠᠳ ᠣᠯᠠᠨ ᠳᠤ᠄ 《ᠵᠠ᠂ ᠪᠢᠳᠡ ᠭᠢᠯᠭᠠᠯ ᠥᠭᠡᠳᠡ ᠶᠠᠪᠤᠵᠠᠭᠠᠶᠠ᠃ ᠲᠡᠨᠳᠡ ᠬᠠᠭᠠᠨᠴᠢᠯᠠᠯ ᠢᠶᠠᠨ ᠰᠢᠨᠡᠴᠢᠯᠡᠵᠡᠭᠡᠶᠡ》 ᠭᠡᠯᠡ᠃ 15 ᠲᠡᠢᠨ ᠬᠦ ᠠᠷᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠢᠶᠠᠨ ᠭᠢᠯᠭᠠᠯ ᠳᠤ ᠬᠦᠷᠴᠦ᠂ ᠭᠢᠯᠭᠠᠯ ᠳᠤ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠰᠠᠦ᠋ᠯ ᠢ ᠬᠠᠭᠠᠨ ᠪᠣᠯᠭᠠᠭᠠᠳ ᠲᠡᠨᠳᠡ ᠡᠪ ᠦᠨ ᠲᠠᠬᠢᠯ ᠤᠳ ᠢ ᠡᠷᠭᠦᠪᠡ᠂ ᠲᠡᠨᠳᠡ ᠰᠠᠦ᠋ᠯ ᠢᠰᠷᠧᠯ ᠤᠨ ᠪᠦᠬᠦ ᠬᠥᠮᠦᠨ ᠲᠡᠢ ᠬᠠᠮᠲᠤ ᠠᠰᠤᠷᠤ ᠶᠡᠬᠡ ᠪᠡᠷ ᠪᠠᠶᠠᠷᠯᠠᠪᠠ᠃