ᠳᠡᠳ᠋ ᠬᠠᠤᠯᠢ ᠠᠷᠪᠠᠨ ᠨᠠᠢ᠌ᠮᠠ
ᠯᠧᠸᠢᠴᠦᠳ ᠦᠨ ᠬᠦᠷᠲᠡᠬᠦ ᠬᠤᠪᠢ
1 ᠯᠧᠸᠢ ᠶᠢᠨ ᠲᠠᠬᠢᠯᠴᠢᠳ᠂ ᠪᠦᠬᠦ ᠯᠧᠸᠢ ᠣᠪᠣᠭ ᠤᠨ ᠬᠢᠨ ᠢᠰᠷᠧᠯ ᠤᠨ ᠳᠤᠮᠳᠠ ᠥᠪ᠂ ᠬᠤᠪᠢ ᠦᠭᠡᠢ᠃ ᠲᠡᠳᠡ ᠶᠣᠬᠣᠸᠠ ᠶᠢᠨ ᠬᠤᠪᠢ᠂ ᠲᠤᠬᠠᠢᠯᠠᠪᠠᠯ ᠲᠡᠭᠦᠨ ᠳᠦ ᠡᠷᠭᠦᠭᠰᠡᠨ ᠲᠠᠬᠢᠯ ᠢᠶᠠᠷ ᠠᠮᠢᠳᠤᠷᠠᠬᠤ ᠪᠣᠯᠣᠨᠠ᠃ 2 ᠲᠡᠳᠡ ᠠᠬᠠ ᠳᠡᠭᠦᠦᠰ ᠦᠨ ᠢᠶᠠᠨ ᠳᠤᠮᠳᠠ ᠥᠪ ᠦᠭᠡᠢ ᠪᠠᠢᠬᠤ ᠨᠢ ᠶᠣᠬᠣᠸᠠ ᠲᠡᠳᠡᠨ ᠢ ᠥᠪᠡᠷ ᠦᠨ ᠢᠶᠠᠨ ᠥᠪ ᠪᠣᠯᠭᠠᠭᠰᠠᠨ ᠤ ᠤᠴᠢᠷ ᠠᠴᠠ ᠶᠤᠮ᠃ ᠡᠨᠡ ᠨᠢ ᠶᠣᠬᠣᠸᠠ ᠶᠢᠨ ᠲᠡᠳᠡᠨ ᠳᠦ ᠠᠢᠯᠠᠳᠤᠭᠰᠠᠨ ᠶᠣᠰᠣᠭᠠᠷ ᠪᠢᠯᠡ᠃
3 ᠦᠬᠡᠷ᠂ ᠬᠣᠨᠢ ᠪᠠᠷ ᠲᠠᠬᠢᠯ ᠡᠷᠭᠦᠭᠰᠡᠨ ᠠᠷᠠᠳ ᠣᠯᠠᠨ ᠠᠴᠠ ᠲᠠᠬᠢᠯᠴᠢᠳ ᠤᠨ ᠬᠦᠷᠲᠡᠬᠦ ᠬᠤᠪᠢ ᠭᠡᠪᠡᠯ᠂ ᠲᠠᠬᠢᠯ ᠤᠨ ᠬᠠ᠂ ᠡᠷᠡᠦ ᠪᠣᠯᠣᠨ ᠭᠡᠳᠡᠰᠦ ᠳᠣᠲᠣᠷ ᠪᠣᠯᠣᠨᠠ᠃ 4 ᠡᠭᠦᠨ ᠡᠴᠡ ᠭᠠᠳᠠᠨᠠ ᠴᠢ ᠲᠡᠳᠡᠨ ᠳᠦ ᠦᠷᠡ ᠲᠠᠷᠢᠶᠠ᠂ ᠰᠢᠨᠡ ᠳᠠᠷᠠᠰᠤ᠂ ᠲᠣᠰᠣᠨ ᠤ ᠳᠡᠭᠡᠵᠢ᠂ ᠬᠣᠨᠢᠨ ᠨᠣᠣᠰᠣᠨ ᠤ ᠪᠠᠨ ᠠᠩ᠋ᠬᠠᠨ ᠤ ᠬᠢ ᠶᠢ ᠥᠭᠬᠦ ᠶᠣᠰᠣᠲᠠᠢ᠃ 5 ᠤᠴᠢᠷ ᠨᠢ ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠥᠪᠡᠷ ᠦᠨ ᠢᠶᠠᠨ ᠡᠮᠦᠨᠡ ᠵᠣᠭᠰᠣᠭᠠᠵᠤ᠂ ᠶᠣᠬᠣᠸᠠ ᠶᠢᠨ ᠨᠡᠷᠡ ᠪᠡᠷ ᠪᠠᠢᠩ᠋ᠭᠤ ᠦᠢᠯᠡᠴᠢᠯᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ ᠲᠠᠨ ᠤ ᠪᠦᠬᠦ ᠣᠪᠣᠭ ᠤᠨ ᠳᠤᠮᠳᠠ ᠠᠴᠠ ᠲᠡᠳᠡᠨ ᠢ ᠯᠠ ᠦᠷᠡ ᠤᠳᠤᠮ ᠤᠨ ᠬᠢᠨᠢ ᠬᠠᠮᠲᠤ ᠰᠢᠯᠢᠨ ᠠᠪᠤᠭᠰᠠᠨ ᠶᠤᠮ᠃
6 ᠬᠡᠷᠪᠡ ᠢᠰᠷᠧᠯ ᠤᠨ ᠨᠤᠲᠤᠭ ᠳᠠᠶᠠᠭᠠᠷ ᠤᠨ ᠠᠯᠢ ᠨᠢᠭᠡ ᠬᠣᠲᠠ ᠲᠣᠰᠬᠣᠨ ᠳᠤ ᠰᠠᠭᠤᠳᠠᠭ ᠯᠧᠸᠢ ᠬᠥᠮᠦᠨ ᠲᠡᠨᠳᠡ ᠡᠴᠡ ᠪᠡᠨ ᠨᠡᠭᠦᠵᠦ᠂ ᠶᠣᠬᠣᠸᠠ ᠶᠢᠨ ᠰᠢᠯᠢᠭᠰᠡᠨ ᠭᠠᠵᠠᠷ ᠲᠤ ᠬᠦᠰᠡᠭᠰᠡᠨ ᠶᠣᠰᠣᠭᠠᠷ ᠢᠶᠠᠨ ᠬᠦᠷᠴᠦ ᠢᠷᠡᠪᠡᠯ᠂ 7 ᠲᠡᠷᠡ ᠪᠡᠷ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠦᠢᠯᠡᠴᠢᠯᠡᠵᠦ ᠪᠠᠢᠭᠠ ᠪᠤᠰᠤᠳ ᠯᠧᠸᠢ ᠠᠬᠠ ᠳᠡᠭᠦᠦᠰ ᠦᠨ ᠢᠶᠠᠨ ᠨᠢᠭᠡᠨ ᠠᠳᠠᠯᠢ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠨᠡᠷᠡ ᠪᠡᠷ ᠦᠢᠯᠡᠴᠢᠯᠡᠬᠦ ᠪᠣᠯᠣᠨᠠ᠃ 8 ᠲᠡᠷᠡ ᠬᠥᠮᠦᠨ ᠡᠴᠢᠭᠡ ᠡᠴᠡ ᠪᠡᠨ ᠥᠪᠯᠡᠭᠰᠡᠨ ᠢᠶᠡᠨ ᠬᠤᠳᠠᠯᠳᠤᠵᠤ ᠣᠯᠣᠭᠰᠠᠨ ᠮᠥᠩᠭᠥ ᠡᠴᠡ ᠭᠠᠳᠠᠨᠠ᠂ ᠲᠡᠳᠡᠨ ᠦ ᠨᠢᠭᠡᠨ ᠠᠳᠠᠯᠢ ᠬᠤᠪᠢ ᠶᠢᠨ ᠬᠦᠨᠡᠰᠦ ᠶᠢ ᠬᠦᠷᠲᠡᠵᠦ ᠪᠣᠯᠣᠨᠠ᠃
ᠭᠠᠵᠢᠭᠤ ᠤᠪᠠᠳᠢᠰ ᠬᠢᠭᠡᠳ ᠡᠰᠢ ᠦᠵᠡᠭᠦᠯᠦᠯᠭᠡ
9 ᠴᠢ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠢᠶᠠᠨ ᠥᠭᠬᠦ ᠭᠡᠵᠦ ᠪᠤᠢ ᠲᠡᠷᠡ ᠨᠤᠲᠤᠭ ᠲᠤ ᠣᠷᠣᠪᠠᠯ᠂ ᠲᠡᠨᠳᠡᠬᠢ ᠶᠢᠨ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠵᠢᠭᠰᠢᠭᠦᠷᠢᠲᠦ ᠶᠠᠪᠤᠳᠠᠯ ᠢ ᠪᠦᠦ ᠳᠠᠭᠤᠷᠢᠶᠠᠭᠲᠤᠨ᠃ 10 ᠲᠠ ᠨᠠᠷ ᠤᠨ ᠳᠤᠮᠳᠠ ᠬᠦᠦ ᠥᠬᠢᠨ ᠢᠶᠠᠨ ᠭᠠᠯ ᠤᠨ ᠳᠤᠮᠳᠠᠭᠤᠷ ᠭᠠᠷᠭᠠᠭᠴᠢ᠂ ᠮᠡᠷᠭᠡ ᠲᠥᠯᠭᠡᠴᠢ᠂ ᠰᠤᠪᠢᠩ ᠲᠠᠢᠯᠤᠭᠴᠢ᠂ ᠷᠢᠳᠢ ᠰᠢᠳᠢᠲᠡᠨ᠂ ᠪᠥᠭᠡ ᠢᠳᠤᠭᠠᠨ᠂ 11 ᠬᠠᠷᠢᠶᠠᠯᠴᠢ᠂ ᠰᠦᠨᠡᠰᠦ ᠵᠠᠭᠤᠴᠢᠯᠠᠭᠴᠢ᠂ ᠬᠠᠷᠠ ᠳᠣᠮᠴᠢ᠂ ᠦᠬᠦᠭᠰᠡᠳ ᠢ ᠳᠠᠭᠤᠳᠠᠭᠴᠢ ᠪᠦᠦ ᠪᠠᠢᠭ᠃ 12 ᠡᠳᠡᠭᠡᠷ ᠢ ᠦᠢᠯᠡᠳᠦᠭᠴᠢ ᠪᠣᠯᠭᠠᠨ ᠶᠣᠬᠣᠸᠠ ᠳᠤ ᠵᠢᠭᠰᠢᠭᠦᠷᠢ ᠲᠠᠢ ᠶᠤᠮ᠃ ᠡᠳᠡᠭᠡᠷ ᠵᠢᠭᠰᠢᠭᠦᠷᠢᠲᠦ ᠬᠡᠷᠡᠭ ᠡᠴᠡ ᠪᠣᠯᠵᠤ ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠲᠡᠳᠡᠨ ᠢ ᠴᠢᠨᠦ ᠡᠮᠦᠨᠡ ᠡᠴᠡ ᠬᠥᠭᠡᠭᠡᠨ ᠭᠠᠷᠭᠠᠨᠠ᠃ 13 ᠴᠢ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠡᠮᠦᠨᠡ ᠥ ᠰᠡᠪ ᠦᠭᠡᠢ ᠪᠠᠢ᠃ 14 ᠴᠢᠨᠦ ᠬᠥᠭᠡᠭᠡᠨ ᠭᠠᠷᠭᠠᠬᠤ ᠡᠳᠡᠭᠡᠷ ᠦᠨᠳᠦᠰᠦᠲᠡᠨ ᠰᠤᠪᠢᠩ ᠲᠠᠢᠯᠤᠭᠴᠢ᠂ ᠮᠡᠷᠭᠡ ᠲᠥᠯᠭᠡᠴᠢᠳ ᠤᠨ ᠬᠢ ᠶᠢ ᠰᠣᠨᠣᠰᠳᠠᠭ᠃ ᠬᠠᠷᠢᠨ ᠴᠢᠨᠦ ᠬᠤᠪᠢ ᠳᠤ᠂ ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠲᠡᠭᠡᠬᠦ ᠶᠢ ᠴᠢᠮᠠ ᠳᠤ ᠵᠥᠪᠰᠢᠶᠡᠷᠡᠳᠡᠭ᠌ ᠦᠭᠡᠢ᠃
15 ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠴᠢᠨᠦ ᠲᠥᠯᠥᠭᠡ ᠨᠠᠳᠠ ᠰᠢᠭ᠋ ᠨᠢᠭᠡᠨ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠢ ᠲᠠ ᠨᠠᠷ ᠤᠨ ᠳᠤᠮᠳᠠ ᠠᠴᠠ᠂ ᠠᠬᠠ ᠳᠡᠭᠦᠦᠰ ᠦᠨ ᠴᠢᠨᠢ ᠳᠣᠲᠣᠷᠠ ᠠᠴᠠ ᠪᠣᠰᠬᠠᠨᠠ᠃ ᠲᠠ ᠨᠠᠷ ᠲᠡᠭᠦᠨ ᠦ ᠬᠢ ᠶᠢ ᠰᠣᠨᠣᠰᠬᠤ ᠶᠣᠰᠣᠲᠠᠢ᠃ 16 ᠬᠣᠷᠧᠪ ᠠᠭᠤᠯᠠᠨ ᠳᠤ ᠨᠡᠢᠲᠡ ᠴᠢᠭᠤᠯᠭᠠᠨ ᠬᠢᠭᠰᠡᠨ ᠲᠡᠷᠡ ᠡᠳᠦᠷ ᠴᠢ 《ᠶᠣᠬᠣᠸᠠ ᠪᠤᠷᠬᠠᠨ ᠤ ᠮᠢᠨᠢ ᠳᠠᠭᠤ ᠬᠣᠭᠣᠯᠠᠢ ᠶᠢ ᠨᠠᠳᠠ ᠳᠤ ᠳᠠᠬᠢᠨ ᠪᠦᠦ ᠰᠣᠨᠣᠰᠬᠠᠭᠠᠴᠢ᠃ ᠡᠨᠡ ᠶᠡᠬᠡ ᠭᠠᠯ ᠢ ᠨᠠᠳᠠ ᠳᠤ ᠳᠠᠬᠢᠨ ᠪᠦᠦ ᠬᠠᠷᠠᠭᠤᠯᠤᠭᠠᠴᠢ᠂ ᠪᠢ ᠦᠬᠦᠬᠦ ᠨᠢ ᠡ》 ᠬᠡᠮᠡᠨ ᠬᠡᠯᠡᠭᠰᠡᠨ ᠢᠶᠡᠷ ᠢᠶᠠᠨ ᠶᠣᠬᠣᠸᠠ ᠪᠤᠷᠬᠠᠨ ᠠᠴᠠ ᠪᠠᠨ ᠲᠡᠷᠡ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠢ ᠭᠤᠶᠤᠭᠰᠠᠨ ᠪᠢᠯᠡ᠃ 17 ᠲᠡᠷᠡ ᠦᠶᠡ ᠳᠦ ᠶᠣᠬᠣᠸᠠ ᠨᠠᠳᠠ ᠳᠤ᠄ 《ᠲᠡᠳᠡᠨ ᠦ ᠬᠡᠯᠡᠭᠰᠡᠨ ᠦᠭᠡ ᠵᠥᠪ ᠪᠠᠢᠨᠠ᠃ 18 ᠪᠢ ᠲᠡᠳᠡᠨ ᠦ ᠲᠥᠯᠥᠭᠡ ᠨᠢᠭᠡᠨ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠢ ᠠᠬᠠ ᠳᠡᠭᠦᠦ ᠨᠠᠷ ᠤᠨ ᠬᠢᠨᠢ ᠳᠤᠮᠳᠠ ᠠᠴᠠ ᠪᠣᠰᠬᠠᠵᠤ᠂ ᠲᠡᠭᠦᠨ ᠦ ᠠᠮᠠᠨ ᠳᠤ ᠦᠭᠡ ᠪᠡᠨ ᠥᠭᠭᠥᠨᠡ᠃ ᠮᠢᠨᠦ ᠲᠡᠭᠦᠨ ᠳᠦ ᠲᠤᠰᠢᠶᠠᠬᠤ ᠪᠦᠬᠦᠨ ᠢ ᠲᠡᠷᠡ ᠲᠡᠳᠡᠨ ᠳᠦ ᠬᠡᠯᠡᠨᠡ᠃ 19 ᠲᠡᠷᠡ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠢᠨ ᠮᠢᠨᠦ ᠨᠡᠷᠡ ᠪᠡᠷ ᠬᠡᠯᠡᠬᠦ ᠮᠢᠨᠦ ᠦᠭᠡ ᠶᠢ ᠰᠣᠨᠣᠰᠬᠤ ᠦᠭᠡᠢ ᠬᠥᠮᠦᠨ ᠪᠠᠢᠪᠠᠯ᠂ ᠪᠢ ᠥᠪᠡᠷ ᠢᠶᠡᠨ ᠲᠡᠭᠦᠨ ᠳᠦ ᠪᠤᠷᠤᠭᠤ ᠶᠢ ᠨᠢ ᠡᠭᠦᠷᠦᠭᠦᠯᠦᠨᠡ᠃ 20 ᠭᠡᠪᠡᠴᠦ ᠮᠢᠨᠦ ᠲᠤᠰᠢᠶᠠᠭᠠ ᠦᠭᠡᠢ ᠦᠭᠡ ᠶᠢ ᠮᠢᠨᠦ ᠨᠡᠷᠡ ᠪᠡᠷ ᠪᠠᠷᠳᠠᠮᠨᠠᠨ ᠶᠠᠷᠢᠬᠤ ᠡᠰᠢ ᠦᠵᠡᠭᠦᠯᠦᠭᠴᠢ ᠪᠤᠶᠤ ᠥᠭᠡᠷᠡ ᠪᠤᠷᠬᠠᠳ ᠤᠨ ᠨᠡᠷᠡ ᠪᠡᠷ ᠶᠠᠷᠢᠬᠤ ᠡᠰᠢ ᠦᠵᠡᠭᠦᠯᠦᠭᠴᠢ ᠨᠢ ᠦᠬᠦᠬᠦ ᠶᠣᠰᠣᠲᠠᠢ》 ᠭᠡᠰᠡᠨ᠃ 21 ᠴᠢ ᠳᠣᠲᠣᠷᠠ ᠪᠠᠨ᠄ 《ᠶᠣᠬᠣᠸᠠ ᠲᠡᠷᠡ ᠦᠭᠡ ᠶᠢ ᠠᠢᠯᠠᠳᠤᠭᠠ ᠦᠭᠡᠢ ᠭᠡᠳᠡᠭ ᠢ ᠨᠢ ᠶᠠᠭᠠᠬᠢᠨ ᠮᠡᠳᠡᠬᠦ ᠪᠢᠯᠡ︖》 ᠭᠡᠵᠦ ᠪᠣᠳᠣᠵᠤ ᠮᠠᠭᠠᠳ ᠦᠭᠡᠢ᠃ 22 ᠡᠰᠢ ᠦᠵᠡᠭᠦᠯᠦᠭᠴᠢ ᠶᠣᠬᠣᠸᠠ ᠶᠢᠨ ᠨᠡᠷᠡ ᠪᠡᠷ ᠲᠤᠩ᠋ᠬᠠᠭᠯᠠᠭᠰᠠᠨ ᠳᠤ᠂ ᠲᠡᠭᠦᠨ ᠦ ᠬᠡᠯᠡᠭᠰᠡᠨ ᠶᠠᠪᠤᠳᠠᠯ ᠲᠣᠬᠢᠶᠠᠯᠳᠤᠬᠤ ᠴᠤ ᠦᠭᠡᠢ᠂ ᠪᠡᠶᠡᠯᠡᠬᠦ ᠴᠤ ᠦᠭᠡᠢ ᠪᠠᠢᠪᠠᠯ ᠶᠣᠬᠣᠸᠠ ᠡᠭᠦᠨ ᠢ ᠠᠢᠯᠠᠳᠤᠭᠰᠠᠨ ᠪᠢᠰᠢ᠃ ᠡᠰᠢ ᠦᠵᠡᠭᠦᠯᠦᠭᠴᠢ ᠡᠭᠦᠨ ᠢ ᠪᠠᠷᠳᠠᠮᠨᠠᠨ ᠬᠡᠯᠡᠭᠰᠡᠨ ᠲᠡᠳᠦᠢ ᠪᠣᠯᠬᠣᠷ ᠲᠡᠭᠦᠨ ᠡᠴᠡ ᠪᠦᠦ ᠠᠶᠤ᠃