ᠳᠡᠳ᠋ ᠬᠠᠤᠯᠢ ᠠᠷᠪᠠ ᠶᠢᠰᠦ
ᠬᠣᠷᠭᠣᠳᠠᠬᠤ ᠬᠣᠲᠠ
1 ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠡᠳᠡᠭᠡᠷ ᠦᠨᠳᠦᠰᠦᠲᠡᠨ ᠢ ᠤᠰᠠᠳᠬᠠᠭᠠᠳ ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠭᠠᠵᠠᠷ ᠨᠤᠲᠤᠭ ᠢ ᠨᠢ ᠴᠢᠮᠠ ᠳᠤ ᠥᠭᠬᠦ ᠳᠦ᠂ ᠴᠢ ᠲᠡᠳᠡᠨ ᠢ ᠡᠵᠡᠮᠰᠢᠵᠦ᠂ ᠲᠡᠳᠡᠨ ᠦ ᠬᠣᠲᠠ ᠪᠣᠯᠣᠨ ᠭᠡᠷ ᠣᠷᠣᠨ ᠳᠤᠨᠢ ᠰᠠᠭᠤᠷᠢᠰᠢᠪᠠᠯ᠂ 2 ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠴᠢᠮᠠ ᠳᠤ ᠥᠭᠴᠦ ᠡᠵᠡᠮᠰᠢᠭᠦᠯᠬᠦ ᠨᠤᠲᠤᠭ ᠤᠨ ᠳᠤᠮᠳᠠ ᠪᠠᠢᠭᠠ ᠭᠤᠷᠪᠠᠨ ᠬᠣᠲᠠ ᠶᠢ ᠥᠪᠡᠷ ᠦᠨ ᠢᠶᠠᠨ ᠲᠥᠯᠥᠭᠡ ᠲᠤᠰᠠᠭᠠᠷᠯᠠ᠃ 3 ᠲᠡᠭᠡᠭᠡᠳ ᠲᠡᠳᠡᠭᠡᠷ ᠬᠣᠲᠠ ᠬᠦᠷᠲᠡᠯᠡᠬᠢ ᠵᠠᠢ ᠶᠢ ᠦᠨᠳᠦᠰᠦᠯᠡᠵᠦ᠂ ᠶᠣᠬᠣᠸᠠ ᠪᠤᠷᠬᠠᠨ ᠤ ᠴᠢᠨᠢ ᠴᠢᠮᠠ ᠳᠤ ᠥᠪᠯᠡᠭᠦᠯᠬᠦ ᠨᠤᠲᠤᠭ ᠳᠡᠪᠢᠰᠬᠡᠷ ᠢ ᠭᠤᠷᠪᠠᠨ ᠬᠡᠰᠡᠭ ᠲᠦ ᠬᠤᠪᠢᠶᠠ᠃ ᠠᠮᠢᠨ ᠬᠡᠷᠡᠭᠲᠡᠨ ᠪᠣᠯᠭᠠᠨ ᠲᠡᠰᠢ ᠪᠠᠨ ᠵᠢᠭᠤᠲᠠᠵᠤ ᠪᠣᠯᠣᠨᠠ᠃
4 ᠠᠮᠢᠨ ᠬᠡᠷᠡᠭᠲᠡᠨ ᠳᠠᠷᠠᠭᠠᠬᠢ ᠨᠥᠬᠥᠴᠡᠯ ᠳᠦ ᠲᠡᠰᠢ ᠪᠠᠨ ᠵᠢᠭᠤᠲᠠᠵᠤ ᠠᠮᠢ ᠭᠠᠷᠴᠤ ᠪᠣᠯᠣᠨᠠ᠄ ᠲᠤᠬᠠᠢᠯᠠᠪᠠᠯ ᠤᠷᠢᠳᠤ ᠠᠴᠠ ᠥᠰ ᠬᠣᠨᠵᠢᠩ ᠦᠭᠡᠢ ᠠᠲᠠᠯᠠ ᠪᠠᠨ ᠰᠠᠨᠠᠮᠰᠠᠷ ᠦᠭᠡᠢ ᠪᠠᠷ ᠬᠥᠷᠰᠢ ᠪᠠᠨ ᠠᠯᠠᠭᠰᠠᠨ ᠬᠥᠮᠦᠨ ᠨᠢ 5 (ᠬᠥᠷᠰᠢ ᠲᠠᠢ ᠪᠠᠨ ᠬᠠᠮᠲᠤ ᠮᠣᠳᠣ ᠣᠭᠲᠣᠯᠬᠤ ᠪᠠᠷ ᠣᠢ ᠳᠤ ᠣᠴᠢᠵᠤ᠂ ᠰᠦᠬᠡ ᠡᠷᠭᠦᠨ ᠮᠣᠳᠣ ᠴᠠᠪᠴᠢᠵᠤ ᠪᠠᠢᠲᠠᠯᠠ ᠰᠦᠬᠡᠨ ᠦ ᠲᠣᠯᠣᠭᠠᠢ ᠨᠢ ᠡᠰᠢ ᠡᠴᠡ ᠪᠡᠨ ᠮᠤᠯᠲᠤ ᠦᠰᠦᠷᠦᠭᠡᠳ ᠬᠥᠷᠰᠢ ᠪᠠᠨ ᠴᠣᠬᠢᠵᠤ᠂ ᠲᠡᠷᠡ ᠨᠢ ᠦᠬᠦᠭᠰᠡᠨ ᠵᠡᠷᠭᠡ ᠲᠣᠬᠢᠶᠠᠯᠳᠤᠯ ᠳᠤ) ᠲᠡᠳᠡᠭᠡᠷ ᠬᠣᠲᠠ ᠶᠢᠨ ᠠᠯᠢ ᠨᠢᠭᠡᠨ ᠳᠦ ᠵᠢᠭᠤᠲᠠᠨ ᠣᠴᠢᠵᠤ᠂ ᠠᠮᠢ ᠭᠠᠷᠴᠤ ᠪᠣᠯᠣᠨᠠ᠃ 6 ᠵᠠᠮ ᠨᠢ ᠬᠡᠲᠦᠷᠬᠡᠢ ᠬᠣᠯᠠ ᠪᠣᠯ ᠴᠢᠰᠤᠨ ᠥᠰᠢᠶᠡ ᠠᠪᠤᠭᠴᠢ ᠨᠢ ᠣᠭᠵᠣᠮ ᠠᠭᠤᠷ ᠲᠠᠭᠠᠨ ᠨᠥᠭᠥᠭᠡ ᠠᠮᠢᠨ ᠬᠡᠷᠡᠭᠲᠡᠨ ᠢ ᠮᠥᠰᠬᠢᠵᠦ ᠭᠦᠢᠴᠡᠨ ᠣᠴᠢᠭᠠᠳ ᠲᠡᠭᠦᠨ ᠦ ᠠᠮᠢ ᠶᠢ ᠬᠥᠨᠥᠭᠡᠵᠦ ᠮᠠᠭᠠᠳ᠃ ᠬᠠᠷᠢᠨ ᠤᠭ ᠠᠴᠠ ᠪᠠᠨ ᠥᠰ ᠬᠣᠨᠵᠢᠩ ᠦᠭᠡᠢ ᠬᠥᠮᠦᠨ ᠢ ᠢᠩᠭᠢᠵᠦ ᠠᠯᠠᠬᠤ ᠨᠢ ᠵᠣᠬᠢᠰ ᠦᠭᠡᠢ᠃ 7 ᠡᠢᠮᠦ ᠤᠴᠢᠷ ᠠᠴᠠ ᠪᠢ ᠴᠢᠮᠠ ᠳᠤ᠄ 《ᠥᠪᠡᠷ ᠲᠡᠭᠡᠨ ᠭᠤᠷᠪᠠᠨ ᠬᠣᠲᠠ ᠶᠢ ᠲᠤᠰᠠᠭᠠᠷᠯᠠᠨ ᠠᠪ》 ᠭᠡᠵᠦ ᠲᠤᠰᠢᠶᠠᠵᠤ ᠪᠠᠢᠨᠠ᠃
8 ᠬᠡᠷᠪᠡ ᠴᠢ ᠥᠨᠥᠳᠥᠷ ᠦᠨ ᠮᠢᠨᠦ ᠲᠤᠰᠢᠶᠠᠵᠤ ᠪᠤᠢ ᠡᠨᠡ ᠪᠦᠬᠦ ᠲᠤᠰᠢᠶᠠᠯ ᠢ ᠰᠠᠬᠢᠨ ᠪᠡᠶᠡᠯᠡᠭᠦᠯᠵᠦ᠂ ᠶᠣᠬᠣᠸᠠ ᠪᠤᠷᠬᠠᠨ ᠢᠶᠠᠨ ᠬᠠᠢᠷᠠᠯᠠᠨ ᠲᠡᠭᠦᠨ ᠦ ᠵᠠᠮ ᠢᠶᠠᠷ ᠴᠠᠭ ᠦᠷᠭᠦᠯᠵᠢ ᠶᠠᠪᠤᠭᠰᠠᠭᠠᠷ ᠪᠠᠢᠪᠠᠯ 9 ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠡᠴᠢᠭᠡ ᠡᠪᠦᠭᠡᠳ ᠲᠦ ᠴᠢᠨᠢ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠶᠣᠰᠣᠭᠠᠷ ᠴᠢᠨᠦ ᠬᠢᠯᠢ ᠬᠢᠵᠠᠭᠠᠷ ᠢ ᠲᠡᠯᠡᠵᠦ᠂ ᠡᠴᠢᠭᠡ ᠡᠪᠦᠭᠡᠳ ᠲᠦ ᠴᠢᠨᠢ ᠥᠭᠬᠦ ᠪᠡᠷ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠪᠦᠬᠦ ᠭᠠᠵᠠᠷ ᠢ ᠴᠢᠮᠠ ᠳᠤ ᠥᠭᠬᠦ ᠪᠣᠯᠣᠨᠠ᠂ ᠲᠡᠷᠡ ᠦᠶᠡ ᠳᠦ ᠴᠢ ᠡᠨᠡ ᠭᠤᠷᠪᠠᠨ ᠬᠣᠲᠠ ᠠᠴᠠ ᠭᠠᠳᠠᠨᠠ ᠥᠭᠡᠷᠡ ᠭᠤᠷᠪᠠᠨ ᠬᠣᠲᠠ ᠶᠢ ᠨᠡᠮᠡᠵᠦ ᠠᠪ᠃ 10 ᠲᠡᠢᠨ ᠬᠦ ᠶᠣᠬᠣᠸᠠ ᠪᠤᠷᠬᠠᠨ ᠠᠴᠠ ᠴᠢᠨᠢ ᠴᠢᠮᠠ ᠳᠤ ᠥᠪ ᠪᠣᠯᠭᠠᠨ ᠰᠣᠶᠣᠷᠬᠠᠬᠤ ᠲᠡᠷᠡ ᠭᠠᠵᠠᠷ ᠳᠡᠭᠡᠷᠡ ᠭᠡᠮ ᠦᠭᠡᠢ ᠴᠢᠰᠤ ᠶᠢ ᠤᠷᠤᠰᠬᠠᠬᠤ ᠦᠭᠡᠢ᠂ ᠥᠪᠡᠷ ᠢᠶᠡᠨ ᠴᠢ ᠴᠢᠰᠤᠨ ᠤ ᠪᠤᠷᠤᠭᠤᠲᠠᠨ ᠪᠣᠯᠬᠤ ᠦᠭᠡᠢ ᠪᠠᠢᠬᠤ ᠪᠣᠯᠲᠤᠭᠠᠢ᠃
11 ᠭᠡᠪᠡᠴᠦ ᠬᠥᠮᠦᠨ ᠬᠥᠷᠰᠢ ᠪᠠᠨ ᠵᠠᠨᠤᠵᠤ᠂ ᠲᠡᠭᠦᠨ ᠢ ᠣᠲᠣᠵᠤ ᠪᠠᠢᠭᠠᠳ ᠲᠡᠭᠦᠨ ᠤᠷᠤᠭᠤ ᠳᠠᠭᠠᠷᠢᠨ ᠠᠮᠢ ᠶᠢ ᠨᠢ ᠬᠥᠨᠥᠭᠡᠵᠦ᠂ ᠲᠡᠳᠡᠭᠡᠷ ᠬᠣᠲᠠ ᠶᠢᠨ ᠠᠯᠢ ᠨᠢᠭᠡᠨ ᠳᠦ ᠵᠢᠭᠤᠲᠠᠨ ᠣᠴᠢᠬᠤ ᠲᠣᠬᠢᠶᠠᠯᠳᠤᠯ ᠳᠤ᠂ 12 ᠲᠡᠷᠡ ᠬᠣᠲᠠ ᠶᠢᠨ ᠠᠬᠠᠮᠠᠳ ᠤᠳ ᠬᠥᠮᠦᠨ ᠢᠯᠡᠭᠡᠵᠦ᠂ ᠲᠡᠭᠦᠨ ᠢ ᠲᠡᠨᠳᠡ ᠡᠴᠡ ᠪᠠᠷᠢᠭᠠᠳ ᠴᠢᠰᠤᠨ ᠥᠰᠢᠶᠡ ᠠᠪᠤᠭᠴᠢ ᠶᠢᠨ ᠬᠢᠨᠢ ᠭᠠᠷ ᠲᠤ ᠲᠤᠰᠢᠶᠠᠵᠤ᠂ ᠲᠡᠭᠦᠨ ᠢ ᠠᠯᠠᠭᠤᠯᠬᠤ ᠶᠣᠰᠣᠲᠠᠢ᠃ 13 ᠴᠢ ᠲᠡᠭᠦᠨ ᠢ ᠪᠦᠦ ᠥᠷᠥ ᠡᠪᠡᠳᠦᠨ ᠬᠠᠷᠠ᠃ ᠬᠠᠷᠢᠨ ᠴᠢ ᠭᠡᠮ ᠦᠭᠡᠢ ᠴᠢᠰᠤ ᠤᠷᠤᠰᠬᠠᠯᠲᠠ ᠶᠢ ᠢᠰᠷᠧᠯ ᠡᠴᠡ ᠵᠠᠢᠯᠠᠭᠤᠯ᠃ ᠲᠡᠭᠡᠪᠡᠯ ᠴᠢ ᠰᠠᠢᠨ ᠰᠠᠢᠬᠠᠨ ᠢ ᠠᠮᠰᠠᠬᠤ ᠪᠣᠯᠣᠨᠠ᠃
ᠬᠢᠯᠢ ᠶᠢᠨ ᠵᠠᠭᠠᠭ ᠢ ᠪᠦᠦ ᠥᠭᠡᠷᠡᠴᠢᠯᠡ
14 ᠶᠣᠬᠣᠸᠠ ᠪᠤᠷᠬᠠᠨ ᠤ ᠴᠢᠨᠢ ᠴᠢᠮᠠ ᠳᠤ ᠥᠭᠴᠦ ᠡᠵᠡᠮᠰᠢᠭᠦᠯᠬᠦ ᠲᠡᠷᠡ ᠭᠠᠵᠠᠷ᠂ ᠲᠤᠬᠠᠢᠯᠠᠪᠠᠯ ᠴᠢᠨᠦ ᠥᠪᠯᠡᠬᠦ ᠥᠪ ᠳᠡᠭᠡᠷᠡ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠲᠣᠭᠲᠠᠭᠠᠭᠰᠠᠨ ᠬᠥᠷᠰᠢ ᠶᠢᠨ ᠢᠶᠠᠨ ᠬᠢᠯᠢ ᠶᠢ ᠪᠦᠦ ᠥᠭᠡᠷᠡᠴᠢᠯᠡ᠃
ᠰᠢᠭᠦᠯᠲᠡ ᠶᠢᠨ ᠭᠡᠷᠡᠴᠢ
15 ᠶᠠᠮᠠᠷ ᠨᠢᠭᠡᠨ ᠭᠡᠮ᠂ ᠶᠠᠮᠠᠷ ᠨᠢᠭᠡᠨ ᠬᠡᠷᠡᠭ ᠢᠶᠡᠷ ᠴᠤ ᠬᠥᠮᠦᠨ ᠢ ᠭᠡᠮ ᠲᠡᠢ ᠭᠡᠵᠦ ᠵᠠᠭᠠᠯᠳᠤᠬᠤ ᠳᠤ᠂ ᠭᠠᠭᠴᠠᠬᠠᠨ ᠭᠡᠷᠡᠴᠢ ᠨᠢ ᠬᠦᠴᠦᠨ ᠦᠭᠡᠢ᠂ ᠬᠡᠷᠡᠭ ᠪᠣᠯᠭᠠᠨ ᠬᠣᠶᠠᠷ ᠪᠤᠶᠤ ᠭᠤᠷᠪᠠᠨ ᠭᠡᠷᠡᠴᠢ ᠶᠢᠨ ᠠᠮᠠ ᠪᠠᠷ ᠬᠦᠴᠦᠨ ᠲᠡᠢ ᠪᠣᠯᠣᠨᠠ᠃ 16 ᠬᠡᠷᠪᠡ ᠬᠣᠷᠣᠨ ᠰᠠᠨᠠᠭᠠᠲᠤ ᠭᠡᠷᠡᠴᠢ ᠭᠠᠷᠴᠤ ᠢᠷᠡᠭᠡᠳ ᠬᠥᠮᠦᠨ ᠢ ᠭᠦᠳᠬᠡᠪᠡᠯ᠂ 17 ᠮᠠᠷᠭᠤᠯᠳᠤᠵᠤ ᠪᠠᠢᠭᠠ ᠬᠣᠶᠠᠷ ᠬᠥᠮᠦᠨ ᠶᠣᠬᠣᠸᠠ ᠶᠢᠨ ᠡᠮᠦᠨᠡ᠂ ᠲᠤᠬᠠᠢ ᠶᠢᠨ ᠦᠶᠡ ᠶᠢᠨ ᠲᠠᠬᠢᠯᠴᠢᠳ ᠰᠢᠭᠦᠭᠴᠢᠳ ᠤᠨ ᠡᠮᠦᠨᠡ ᠵᠣᠭᠰᠣᠬᠤ ᠶᠣᠰᠣᠲᠠᠢ᠃ 18 ᠰᠢᠭᠦᠭᠴᠢᠳ ᠲᠡᠷᠡ ᠬᠡᠷᠡᠭ ᠢ ᠭᠦᠢᠴᠡᠳ ᠪᠠᠢᠴᠠᠭᠠᠭᠠᠳ ᠬᠡᠷᠪᠡ ᠭᠡᠷᠡᠴᠢ ᠨᠢ ᠬᠠᠭᠤᠷᠮᠠᠴᠢ ᠪᠥᠭᠡᠳ ᠠᠬᠠ ᠳᠡᠭᠦᠦ ᠶᠢᠨ ᠢᠶᠠᠨ ᠡᠰᠡᠷᠭᠦ ᠬᠤᠳᠠᠯ ᠮᠡᠳᠡᠭᠦᠯᠭᠡ ᠥᠭᠭᠥᠭᠰᠡᠨ ᠨᠢ ᠦᠨᠡᠨ ᠪᠠᠢᠪᠠᠯ᠂ 19 ᠠᠬᠠ ᠳᠡᠭᠦᠦ ᠶᠢᠨ ᠢᠶᠠᠨ ᠡᠰᠡᠷᠭᠦ ᠦᠢᠯᠡᠳᠬᠦ ᠭᠡᠰᠡᠨ ᠵᠦᠢᠯ ᠢ ᠨᠢ ᠥᠪᠡᠷ ᠲᠤᠨᠢ ᠣᠨᠣᠭᠠ᠃ ᠲᠠ ᠨᠠᠷ ᠥᠪᠡᠷᠰᠡᠳ ᠦᠨ ᠢᠶᠠᠨ ᠳᠤᠮᠳᠠ ᠠᠴᠠ ᠮᠠᠭᠤ ᠶᠠᠪᠤᠳᠠᠯ ᠢ ᠡᠢᠨ ᠬᠦ ᠵᠠᠢᠯᠠᠭᠤᠯ᠃ 20 ᠲᠡᠭᠡᠪᠡᠯ ᠪᠤᠰᠤᠳ ᠬᠥᠮᠦᠰ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠠᠶᠤᠨ ᠡᠮᠢᠶᠡᠬᠦ ᠪᠥᠭᠡᠳ ᠲᠠ ᠨᠠᠷ ᠤᠨ ᠳᠤᠮᠳᠠ ᠡᠢᠮᠦ ᠮᠠᠭᠤ ᠶᠠᠪᠤᠳᠠᠯ ᠳᠠᠬᠢᠨ ᠦᠢᠯᠡᠳᠦᠭᠳᠡᠬᠦ ᠦᠭᠡᠢ ᠪᠣᠯᠣᠨᠠ᠃ 21 ᠲᠡᠭᠦᠨ ᠢ ᠪᠦᠦ ᠥᠷᠥ ᠡᠪᠡᠳᠦᠨ ᠬᠠᠷᠠ᠃ ᠬᠠᠷᠢᠨ 《ᠠᠮᠢ ᠶᠢ ᠠᠮᠢ ᠪᠠᠷ᠂ ᠨᠢᠳᠦ ᠶᠢ ᠨᠢᠳᠦ ᠪᠡᠷ᠂ ᠰᠢᠳᠦ ᠶᠢ ᠰᠢᠳᠦ ᠪᠡᠷ᠂ ᠭᠠᠷ ᠢ ᠭᠠᠷ ᠢᠶᠠᠷ᠂ ᠬᠥᠯ ᠢ ᠬᠥᠯ ᠢᠶᠡᠷ》 ᠪᠠᠢᠬᠤ ᠶᠣᠰᠣᠲᠠᠢ᠃