ᠳᠡᠳ᠋ ᠬᠠᠤᠯᠢ ᠬᠣᠷᠢ
ᠪᠠᠢᠯᠳᠤᠭᠠᠨ ᠤ ᠶᠣᠰᠣ ᠵᠢᠷᠤᠮ
1 ᠴᠢ ᠳᠠᠢᠰᠤᠨ ᠲᠠᠢ ᠪᠠᠨ ᠲᠤᠯᠤᠯᠳᠤᠬᠤ ᠪᠠᠷ ᠭᠠᠷᠬᠤ ᠳᠠᠭᠠᠨ ᠮᠣᠷᠢᠳ᠂ ᠵᠡᠪᠰᠡᠭᠲᠦ ᠲᠡᠷᠭᠡ ᠪᠣᠯᠣᠨ ᠥᠪᠡᠷ ᠦᠨ ᠬᠢᠨ ᠡᠴᠡ ᠪᠡᠨ ᠢᠯᠡᠭᠦᠦ ᠣᠯᠠᠨ ᠳᠠᠢᠴᠢᠨ ᠢ ᠬᠠᠷᠠᠭᠰᠠᠨ ᠴᠤ ᠲᠡᠳᠡᠨ ᠡᠴᠡ ᠪᠦᠦ ᠠᠶᠤ᠃ ᠴᠢᠮᠠᠶᠢ ᠶᠧᠵᠢᠫᠲ ᠨᠤᠲᠤᠭ ᠠᠴᠠ ᠲᠠᠲᠠᠵᠤ ᠭᠠᠷᠭᠠᠭᠰᠠᠨ ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠨᠠ᠃ 2 ᠲᠠ ᠨᠠᠷ ᠲᠤᠯᠤᠯᠳᠤᠭᠠᠨ ᠤ ᠭᠠᠵᠠᠷ ᠣᠢᠷᠠᠲᠤᠨ ᠣᠴᠢᠪᠠᠯ ᠲᠠᠬᠢᠯᠴᠢ ᠳᠥᠭᠥᠨ ᠢᠷᠡᠵᠦ᠂ ᠳᠠᠢᠴᠢᠳ ᠲᠤ ᠦᠭᠡ ᠬᠡᠯᠡᠬᠦ ᠶᠣᠰᠣᠲᠠᠢ᠃ 3 ᠲᠡᠷᠡ ᠪᠡᠷ᠄ 《ᠰᠣᠨᠣᠰ︕ ᠢᠰᠷᠧᠯ ᠡ᠂ ᠥᠨᠥᠳᠥᠷ ᠲᠠ ᠨᠠᠷ ᠳᠠᠢᠰᠤᠨ ᠲᠠᠢ ᠪᠠᠨ ᠲᠤᠯᠤᠯᠳᠤᠬᠤ ᠪᠠᠷ ᠬᠦᠷᠴᠦ ᠢᠷᠡᠭᠡᠳ ᠪᠠᠢᠨᠠ᠃ ᠪᠦᠦ ᠵᠢᠷᠦᠬᠡ ᠠᠯᠲᠠ᠂ ᠲᠡᠳᠡᠨ ᠡᠴᠡ ᠪᠦᠦ ᠠᠶᠤ᠂ ᠪᠦᠦ ᠰᠠᠨᠳᠤᠷ᠂ ᠪᠦᠦ ᠴᠡᠴᠡᠷᠡ︕ 4 ᠲᠠᠨ ᠤ ᠪᠤᠷᠬᠠᠨ ᠶᠣᠬᠣᠸᠠ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠶᠠᠪᠤᠵᠤ ᠪᠠᠢᠨᠠ︕ ᠲᠡᠷᠡ ᠲᠠ ᠨᠠᠷ ᠤᠨ ᠡᠮᠦᠨᠡ ᠡᠴᠡ ᠳᠠᠢᠰᠤᠨ ᠨᠤᠭᠤᠳ ᠲᠠᠢ ᠴᠢᠨᠢ ᠪᠠᠢᠯᠳᠤᠵᠤ᠂ ᠲᠠ ᠨᠠᠷ ᠢ ᠠᠪᠤᠷᠠᠨᠠ》 ᠭᠡᠵᠦ ᠬᠡᠯᠡ᠃ 5 ᠳᠠᠭᠠᠭᠠᠮᠠᠯ ᠤᠳ ᠨᠢ ᠳᠠᠢᠴᠢᠳ ᠲᠤ᠄ 《ᠰᠢᠨᠡ ᠪᠠᠢᠰᠢᠩ ᠪᠠᠷᠢᠭᠠᠳ ᠵᠣᠷᠢᠭᠤᠯᠤᠯᠲᠠ ᠬᠢᠭᠡ ᠦᠭᠡᠢ ᠬᠥᠮᠦᠨ ᠪᠠᠢᠨᠠ ᠤᠤ︖ ᠲᠡᠷᠡ ᠬᠥᠮᠦᠨ ᠭᠡᠷ ᠤᠷᠤᠭᠤ ᠪᠠᠨ ᠪᠤᠴᠠ᠃ ᠲᠡᠷᠡ ᠪᠡᠷ ᠳᠠᠢᠨ ᠳᠤ ᠨᠠᠰᠤ ᠪᠠᠷᠠᠵᠤ᠂ ᠥᠭᠡᠷᠡ ᠬᠥᠮᠦᠨ ᠪᠠᠢᠰᠢᠩ ᠢ ᠨᠢ ᠠᠰᠢᠭᠯᠠᠬᠤ ᠪᠤᠢ᠃ 6 ᠦᠵᠦᠮ ᠦᠨ ᠴᠡᠴᠡᠷᠯᠢᠭ ᠪᠠᠢᠭᠤᠯᠤᠭᠠᠳ ᠦᠷᠡ ᠵᠢᠮᠢᠰ ᠡᠴᠡ ᠪᠡᠨ ᠠᠮᠰᠠᠭᠠ ᠦᠭᠡᠢ ᠬᠥᠮᠦᠨ ᠪᠠᠢᠨᠠ ᠤᠤ︖ ᠲᠡᠷᠡ ᠬᠥᠮᠦᠨ ᠭᠡᠷ ᠤᠷᠤᠭᠤ ᠪᠠᠨ ᠪᠤᠴᠠ᠃ ᠲᠡᠷᠡ ᠪᠡᠷ ᠳᠠᠢᠨ ᠳᠤ ᠨᠠᠰᠤ ᠪᠠᠷᠠᠵᠤ᠂ ᠥᠭᠡᠷᠡ ᠬᠥᠮᠦᠨ ᠦᠷᠡ ᠵᠢᠮᠢᠰ ᠢ ᠨᠢ ᠢᠳᠡᠬᠦ ᠪᠤᠢ᠃ 7 ᠪᠦᠰᠡᠭᠦᠢ ᠬᠥᠮᠦᠨ ᠲᠡᠢ ᠰᠦᠢ ᠲᠠᠯᠪᠢᠭᠰᠠᠨ ᠪᠣᠯᠪᠠᠴᠤ ᠭᠡᠷᠯᠡᠵᠦ ᠠᠮᠵᠢᠭᠠ ᠦᠭᠡᠢ ᠬᠥᠮᠦᠨ ᠪᠠᠢᠨᠠ ᠤᠤ︖ ᠲᠡᠷᠡ ᠬᠥᠮᠦᠨ ᠭᠡᠷ ᠤᠷᠤᠭᠤ ᠪᠠᠨ ᠪᠤᠴᠠ᠃ ᠲᠡᠷᠡ ᠪᠡᠷ ᠳᠠᠢᠨ ᠳᠤ ᠨᠠᠰᠤ ᠪᠠᠷᠠᠵᠤ᠂ ᠥᠭᠡᠷᠡ ᠡᠷᠡ ᠲᠡᠷᠡ ᠪᠦᠰᠡᠭᠦᠢ ᠲᠡᠢ ᠭᠡᠷᠯᠡᠬᠦ ᠪᠤᠢ》 ᠭᠡᠳ᠂ 8 ᠳᠠᠭᠠᠭᠠᠮᠠᠯ ᠤᠳ ᠨᠢ ᠴᠠᠰᠢ ᠵᠠᠯᠭᠠᠨ ᠳᠠᠢᠴᠢᠳ ᠲᠠᠭᠠᠨ᠄ 《ᠠᠶᠤᠮᠠᠬᠠᠢ᠂ ᠵᠢᠷᠦᠬᠡ ᠠᠯᠳᠠᠭᠰᠠᠨ ᠬᠥᠮᠦᠨ ᠪᠠᠢᠨᠠ ᠤᠤ︖ ᠲᠡᠷᠡ ᠬᠥᠮᠦᠨ ᠭᠡᠷ ᠤᠷᠤᠭᠤ ᠪᠠᠨ ᠪᠤᠴᠠ᠃ ᠲᠡᠷᠡ ᠪᠡᠷ ᠵᠢᠷᠦᠬᠡ ᠮᠣᠬᠣᠭᠰᠠᠨ ᠰᠢᠭ᠋ ᠢᠶᠠᠨ ᠠᠬᠠ ᠳᠡᠭᠦᠦ ᠨᠠᠷ ᠤᠨ ᠢᠶᠠᠨ ᠵᠢᠷᠦᠬᠡ ᠶᠢ ᠮᠣᠬᠣᠭᠠᠬᠤ ᠪᠤᠢ》 ᠭᠡᠵᠦ ᠬᠡᠯᠡ᠃ 9 ᠳᠠᠭᠠᠭᠠᠮᠠᠯ ᠤᠳ ᠨᠢ ᠳᠠᠢᠴᠢᠳ ᠲᠤ ᠶᠠᠷᠢᠵᠤ ᠳᠠᠭᠤᠰᠤᠭᠠᠳ᠂ ᠳᠠᠢᠴᠢᠳ ᠢ ᠲᠣᠯᠣᠭᠠᠢᠯᠠᠬᠤ ᠴᠡᠷᠢᠭ ᠤᠨ ᠳᠠᠷᠤᠭᠠ ᠨᠠᠷ ᠢ ᠲᠣᠮᠢᠯᠠᠬᠤ ᠪᠣᠯᠣᠨᠠ᠃
10 ᠴᠢ ᠠᠯᠢ ᠨᠢᠭᠡ ᠬᠣᠲᠠ ᠶᠢ ᠳᠠᠭᠠᠷᠢᠨ ᠡᠵᠡᠯᠡᠬᠦ ᠪᠡᠷ ᠲᠡᠰᠢ ᠣᠢᠷᠠᠲᠤᠨ ᠣᠴᠢᠬᠤ ᠦᠶᠡ ᠳᠡᠭᠡᠨ᠂ ᠲᠡᠷᠡ ᠬᠣᠲᠠ ᠶᠢᠨ ᠬᠢᠨ ᠳᠤ ᠨᠠᠢᠷᠠᠮᠳᠠᠬᠤ ᠰᠠᠨᠠᠯ ᠳᠡᠪᠰᠢᠭᠦᠯ᠃ 11 ᠬᠡᠷᠪᠡ ᠲᠡᠷᠡ ᠬᠣᠲᠠ ᠶᠢᠨ ᠬᠢᠨ ᠴᠢᠮᠠ ᠳᠤ ᠨᠠᠢᠷᠠᠮᠳᠠᠬᠤ ᠬᠠᠷᠢᠭᠤ ᠥᠭᠴᠦ ᠬᠠᠭᠠᠯᠭᠠ ᠪᠠᠨ ᠴᠢᠮᠠ ᠳᠤ ᠨᠡᠭᠡᠭᠡᠵᠦ ᠥᠭᠪᠡᠯ᠂ ᠲᠡᠷᠡ ᠬᠣᠲᠠ ᠳᠤ ᠣᠯᠳᠠᠬᠤ ᠬᠥᠮᠦᠨ ᠪᠦᠬᠦᠨ ᠴᠢᠮᠠ ᠳᠤ ᠠᠯᠪᠠᠲᠤ ᠪᠣᠯᠣᠨᠠ᠃ 12 ᠬᠡᠷᠪᠡ ᠲᠡᠷᠡ ᠬᠣᠲᠠ ᠶᠢᠨ ᠬᠢᠨ ᠴᠢᠮᠠ ᠲᠠᠢ ᠨᠠᠢᠷᠠᠮᠳᠠᠯ ᠲᠣᠭᠲᠠᠭᠠᠬᠤ ᠦᠭᠡᠢ᠂ ᠴᠢᠮᠠᠶᠢ ᠡᠰᠡᠷᠭᠦᠴᠡᠨ ᠪᠠᠢᠯᠳᠤᠬᠤ ᠭᠡᠪᠡᠯ᠂ ᠴᠢ ᠲᠡᠷᠡ ᠬᠣᠲᠠ ᠶᠢ ᠪᠦᠰᠡᠯᠡᠭᠲᠦᠨ᠃ 13 ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠲᠡᠷᠡ ᠬᠣᠲᠠ ᠶᠢ ᠴᠢᠨᠦ ᠭᠠᠷ ᠲᠤ ᠲᠤᠰᠢᠶᠠᠬᠤ ᠪᠣᠯᠣᠨᠠ᠃ ᠴᠢ ᠲᠡᠨᠳᠡᠬᠢ ᠶᠢᠨ ᠪᠦᠬᠦ ᠡᠷᠡᠴᠦᠳ ᠢ ᠢᠯᠳᠦᠨ ᠦ ᠢᠷ ᠢᠶᠠᠷ ᠴᠣᠬᠢ᠃ 14 ᠬᠠᠷᠢᠨ ᠴᠢ ᠡᠮᠡᠭᠲᠡᠢᠴᠦᠳ᠂ ᠬᠡᠦᠬᠡᠳ ᠤᠳ᠂ ᠮᠠᠯ ᠰᠦᠷᠦᠭ ᠪᠣᠯᠣᠨ ᠬᠣᠲᠠ ᠶᠢᠨ ᠪᠦᠬᠦ ᠡᠳ᠋ ᠵᠦᠢᠯ ᠢ ᠣᠯᠵᠠ ᠪᠣᠯᠭᠠᠨ ᠥᠪᠡᠷ ᠲᠡᠭᠡᠨ ᠠᠪᠴᠤ ᠪᠣᠯᠣᠨᠠ᠃ ᠴᠢ ᠳᠠᠢᠰᠤᠨ ᠠᠴᠠ ᠪᠠᠨ ᠣᠯᠵᠠᠯᠠᠭᠰᠠᠨ ᠢᠶᠠᠨ ᠡᠳ᠋ᠯᠡᠵᠦ ᠬᠡᠷᠡᠭᠯᠡ᠃ ᠡᠳᠡᠭᠡᠷ ᠢ ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠴᠢᠮᠠ ᠳᠤ ᠥᠭᠭᠥᠭᠰᠡᠨ᠃ 15 ᠲᠠᠨ ᠤ ᠲᠡᠨᠳᠡ ᠡᠴᠡ ᠠᠯᠤᠰ ᠬᠣᠯᠠ ᠪᠠᠢᠭᠠ ᠬᠣᠲᠠ ᠨᠤᠭᠤᠳ᠂ ᠲᠤᠬᠠᠢᠯᠠᠪᠠᠯ ᠣᠷᠴᠢᠨ ᠲᠣᠭᠣᠷᠢᠨ ᠳᠤ ᠴᠢᠨᠢ ᠪᠠᠢᠭᠠ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠬᠢ ᠪᠢᠰᠢ ᠬᠣᠲᠠ ᠨᠤᠭᠤᠳ ᠲᠤ ᠴᠢ ᠲᠡᠢᠨ ᠬᠦ ᠦᠢᠯᠡᠳᠬᠦ ᠪᠣᠯᠪᠠᠴᠤ 16 ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠴᠢᠮᠠ ᠳᠤ ᠥᠪ ᠪᠣᠯᠭᠠᠨ ᠥᠭᠬᠦ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠬᠣᠲᠠ ᠨᠤᠭᠤᠳ ᠤᠨ ᠬᠤᠪᠢ ᠳᠤ ᠠᠮᠢ ᠠᠮᠢᠰᠬᠤᠯ ᠲᠠᠢ ᠶᠠᠭᠤ ᠶᠢ ᠴᠤ ᠪᠦᠦ ᠦᠯᠡᠳᠡᠭᠡ᠃ 17 ᠬᠠᠷᠢᠨ ᠴᠢ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠾᠢᠲ᠋ᠴᠦᠳ᠂ ᠠᠮᠣᠷᠢᠴᠤᠳ᠂ ᠺᠠᠨᠠᠨᠴᠤᠳ᠂ ᠫᠧᠷᠢᠽᠴᠦᠳ᠂ ᠾᠢᠸᠢᠴᠦᠳ᠂ ᠶᠧᠪᠦ᠋ᠰᠴᠦᠳ ᠢ ᠵᠠᠪᠠᠯ ᠬᠦᠢᠰᠦ ᠲᠡᠮᠲᠡᠷᠢ᠃ 18 ᠡᠰᠡ ᠲᠡᠭᠡᠪᠡᠯ ᠲᠡᠳᠡ ᠪᠤᠷᠬᠠᠳ ᠲᠠᠭᠠᠨ ᠮᠥᠷᠭᠥᠬᠦ ᠳᠡᠭᠡᠨ ᠦᠢᠯᠡᠳᠳᠡᠭ ᠵᠢᠭᠰᠢᠭᠦᠷᠢᠲᠦ ᠪᠦᠬᠦᠨ ᠢᠶᠡᠨ ᠲᠠ ᠨᠠᠷ ᠲᠤ ᠰᠤᠷᠭᠠᠵᠤ᠂ ᠲᠠ ᠨᠠᠷ ᠢᠶᠠᠷ ᠶᠣᠬᠣᠸᠠ ᠪᠤᠷᠬᠠᠨ ᠳᠤ ᠴᠢᠨᠢ ᠨᠢᠭᠦᠯ ᠦᠢᠯᠡᠳᠦᠭᠦᠯᠬᠦ ᠪᠣᠯᠣᠨᠠ᠃
19 ᠴᠢ ᠠᠯᠢ ᠨᠢᠭᠡ ᠬᠣᠲᠠ ᠶᠢ ᠡᠵᠡᠯᠡᠬᠦ ᠪᠡᠷ ᠳᠠᠢᠲᠤᠨ ᠤᠳᠠᠭᠠᠨ ᠬᠤᠭᠤᠴᠠᠭᠠ ᠪᠠᠷ ᠪᠦᠰᠡᠯᠡᠬᠦ ᠦᠶᠡ ᠳᠦ᠂ ᠲᠡᠨᠳᠡᠬᠢ ᠶᠢᠨ ᠮᠣᠳᠣᠳ ᠢ ᠰᠦᠬᠡ ᠪᠡᠷ ᠴᠠᠪᠴᠢᠨ ᠰᠦᠢᠳᠬᠡᠵᠦ ᠪᠣᠯᠬᠤ ᠦᠭᠡᠢ᠃ ᠲᠡᠷᠡ ᠮᠣᠳᠣᠳ ᠤᠨ ᠵᠢᠮᠢᠰ ᠡᠴᠡ ᠢᠳᠡᠵᠦ ᠪᠣᠯᠬᠤ ᠤᠴᠢᠷ ᠡᠳᠡᠭᠡᠷ ᠢ ᠪᠦᠰᠡᠯᠡᠯᠲᠡ ᠳᠦ ᠠᠰᠢᠭᠯᠠᠬᠤ ᠶᠢᠨ ᠲᠤᠯᠠᠳᠠ ᠴᠠᠪᠴᠢᠨ ᠤᠨᠠᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠬᠡᠭᠡᠷᠡ ᠶᠢᠨ ᠮᠣᠳᠣᠨ ᠤ ᠵᠢᠮᠢᠰ ᠨᠢ ᠬᠥᠮᠦᠨ ᠦ ᠬᠦᠨᠡᠰᠦ ᠪᠣᠯᠳᠠᠭ ᠤᠴᠢᠷ ᠲᠡᠭᠦᠨ ᠢ ᠴᠠᠪᠴᠢᠵᠤ ᠶᠠᠭᠠᠬᠢᠬᠤ ᠪᠤᠢ︖ 20 ᠬᠠᠷᠢᠨ ᠢᠳᠡᠵᠦ ᠪᠣᠯᠬᠤ ᠵᠢᠮᠢᠰ ᠪᠠᠢᠬᠤ ᠦᠭᠡᠢ ᠭᠡᠵᠦ ᠮᠡᠳᠡᠭᠰᠡᠨ ᠮᠣᠳᠣᠳ ᠢ ᠨᠢ ᠴᠠᠪᠴᠢᠨ ᠠᠪᠴᠤ᠂ ᠲᠡᠭᠦᠨ ᠢ ᠲᠠ ᠨᠠᠷ ᠲᠠᠢ ᠪᠠᠢᠯᠳᠤᠵᠤ ᠪᠠᠢᠭᠠ ᠲᠡᠷᠡ ᠬᠣᠲᠠ ᠶᠢ ᠨᠤᠷᠠᠭᠠᠬᠤ ᠬᠦᠷᠲᠡᠯᠡ ᠪᠦᠰᠡᠯᠡᠬᠦ ᠪᠡᠬᠢᠯᠡᠯᠲᠡ ᠪᠠᠷᠢᠬᠤ ᠳᠤ ᠠᠰᠢᠭᠯᠠᠵᠤ ᠪᠣᠯᠣᠨᠠ᠃