ᠳᠡᠳ᠋ ᠬᠠᠤᠯᠢ ᠬᠣᠷᠢᠨ ᠳᠥᠷᠪᠡ
ᠭᠡᠷᠯᠡᠯᠲᠡ ᠪᠠ ᠰᠠᠯᠤᠯᠲᠠ
1 ᠬᠥᠮᠦᠨ ᠡᠬᠡᠨᠡᠷ ᠠᠪᠴᠤ ᠭᠡᠷᠯᠡᠭᠰᠡᠨ ᠦ ᠪᠠᠨ ᠳᠠᠷᠠᠭᠠ᠂ ᠲᠡᠭᠦᠨ ᠳᠦ ᠢᠴᠢᠭᠦᠷᠢᠲᠦ ᠶᠠᠪᠤᠳᠠᠯ ᠪᠠᠢᠭᠠ ᠶᠢ ᠣᠯᠵᠤ ᠮᠡᠳᠡᠭᠡᠳ ᠲᠡᠭᠦᠨ ᠢ ᠲᠠᠭᠠᠯᠠᠬᠤ ᠪᠠᠨ ᠪᠣᠯᠢᠬᠤ ᠲᠣᠬᠢᠶᠠᠯᠳᠤᠯ ᠳᠤ᠂ ᠲᠡᠷᠡ ᠪᠡᠷ ᠰᠠᠯᠤᠯᠲᠠ ᠶᠢᠨ ᠭᠡᠷᠡᠴᠢ ᠪᠢᠴᠢᠵᠦ᠂ ᠭᠠᠷ ᠲᠤᠨᠢ ᠥᠭᠭᠥᠭᠡᠳ ᠲᠡᠭᠦᠨ ᠢ ᠭᠡᠷ ᠡᠴᠡ ᠪᠡᠨ ᠶᠠᠪᠤᠭᠤᠯᠵᠤ ᠪᠣᠯᠣᠨᠠ᠃ 2 ᠬᠠᠷᠢᠨ ᠲᠡᠷᠡ ᠡᠮᠡᠭᠲᠡᠢ ᠭᠡᠷ ᠡᠴᠡ ᠨᠢ ᠭᠠᠷᠴᠤ ᠶᠠᠪᠤᠭᠠᠳ᠂ ᠥᠭᠡᠷᠡ ᠬᠥᠮᠦᠨ ᠦ ᠡᠬᠡᠨᠡᠷ ᠪᠣᠯᠣᠭᠰᠠᠨ ᠤ ᠳᠠᠷᠠᠭᠠ᠂ 3 ᠬᠣᠶᠠᠳᠠᠬᠢ ᠨᠥᠬᠥᠷ ᠨᠢ ᠪᠠᠰᠠ ᠲᠡᠭᠦᠨ ᠳᠦ ᠳᠤᠷᠠ ᠦᠭᠡᠶᠢᠴᠡᠵᠦ ᠰᠠᠯᠤᠯᠲᠠ ᠶᠢᠨ ᠭᠡᠷᠡᠴᠢ ᠪᠢᠴᠢᠨ᠂ ᠭᠠᠷ ᠲᠤᠨᠢ ᠥᠭᠭᠥᠭᠡᠳ ᠭᠡᠷ ᠡᠴᠡ ᠪᠡᠨ ᠶᠠᠪᠤᠭᠤᠯᠬᠤ᠂ ᠡᠰᠡᠪᠡᠯ ᠬᠣᠶᠠᠳᠠᠬᠢ ᠨᠥᠬᠥᠷ ᠨᠢ ᠨᠠᠰᠤ ᠪᠠᠷᠠᠬᠤ ᠲᠣᠬᠢᠶᠠᠯᠳᠤᠯ ᠳᠤ᠂ 4 ᠲᠡᠷᠡ ᠡᠮᠡᠭᠲᠡᠢ ᠪᠤᠵᠠᠷᠲᠤᠭᠰᠠᠨ ᠤᠴᠢᠷ ᠠᠩ᠋ᠬᠠᠨ ᠤ ᠨᠥᠬᠥᠷ ᠨᠢ ᠳᠠᠬᠢᠨ ᠡᠬᠡᠨᠡᠷ ᠢᠶᠡᠨ ᠪᠣᠯᠭᠠᠨ ᠠᠪᠴᠤ ᠪᠣᠯᠬᠤ ᠦᠭᠡᠢ᠃ ᠢᠩᠭᠢᠬᠦ ᠨᠢ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠵᠢᠭᠰᠢᠭᠦᠷᠢᠲᠦ ᠵᠦᠢᠯ ᠪᠣᠯᠣᠨᠠ᠃ ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠠᠴᠠ ᠴᠢᠮᠠ ᠳᠤ ᠥᠪ ᠪᠣᠯᠭᠠᠨ ᠥᠭᠬᠦ ᠲᠡᠷᠡ ᠨᠤᠲᠤᠭ ᠳᠡᠭᠡᠷᠡ ᠴᠢ ᠨᠢᠭᠦᠯ ᠢ ᠪᠦᠦ ᠪᠠᠢᠯᠭᠠ᠃
5 ᠰᠠᠶ᠋ᠢᠬᠠᠨ ᠭᠡᠷᠯᠡᠭᠰᠡᠨ ᠬᠥᠮᠦᠨ ᠢ ᠴᠡᠷᠢᠭ ᠲᠤ ᠪᠦᠦ ᠶᠠᠪᠤᠭᠤᠯ᠂ ᠠᠯᠢᠪᠠ ᠠᠯᠪᠠᠨ ᠳᠤ ᠪᠦᠦ ᠲᠠᠲᠠ᠃ ᠲᠡᠷᠡ ᠨᠢᠭᠡ ᠵᠢᠯ ᠭᠡᠷ ᠲᠡᠭᠡᠨ ᠴᠢᠯᠥᠭᠡᠲᠡᠢ ᠰᠠᠭᠤᠵᠤ᠂ ᠠᠪᠤᠭᠰᠠᠨ ᠡᠬᠡᠨᠡᠷ ᠢᠶᠡᠨ ᠵᠢᠷᠭᠠᠭᠤᠯᠬᠤ ᠶᠣᠰᠣᠲᠠᠢ᠃
ᠠᠮᠢ ᠶᠢ ᠬᠠᠮᠠᠭᠠᠯᠠᠬᠤ
6 ᠭᠠᠷ ᠲᠡᠭᠡᠷᠮᠡ᠂ ᠡᠰᠡᠪᠡᠯ ᠲᠡᠭᠦᠨ ᠦ ᠪᠤᠯᠤ ᠴᠢᠯᠠᠭᠤ ᠶᠢ ᠪᠠᠷᠢᠴᠠᠭᠠᠨ ᠳᠤ ᠪᠦᠦ ᠠᠪ᠃ ᠲᠡᠭᠡᠬᠦ ᠨᠢ ᠬᠥᠮᠦᠨ ᠦ ᠠᠮᠢ ᠶᠢ ᠪᠠᠷᠢᠴᠠᠭᠠᠯᠠᠬᠤ ᠲᠠᠢ ᠠᠳᠠᠯᠢ᠃
7 ᠢᠰᠷᠧᠯ ᠠᠬᠠ ᠳᠡᠭᠦᠦ ᠪᠡᠨ ᠤᠤᠯᠭᠠᠯᠠᠵᠤ ᠲᠡᠭᠦᠨ ᠢ ᠪᠠᠨ ᠪᠣᠭᠣᠯᠴᠢᠯᠠᠭᠰᠠᠨ᠂ ᠡᠰᠡᠪᠡᠯ ᠬᠤᠳᠠᠯᠳᠤᠭᠰᠠᠨ ᠬᠥᠮᠦᠨ ᠪᠠᠷᠢᠭᠳᠠᠪᠠᠯ ᠲᠡᠷᠡ ᠤᠤᠯᠭᠠᠯᠠᠭᠴᠢ ᠶᠢ ᠴᠠᠭᠠᠵᠠᠯᠠ᠃ ᠲᠠ ᠨᠠᠷ ᠡᠢᠮᠦᠷᠬᠦ ᠮᠠᠭᠤ ᠶᠠᠪᠤᠳᠠᠯ ᠢ ᠳᠣᠲᠣᠷᠠ ᠠᠴᠠ ᠪᠠᠨ ᠵᠠᠢᠯᠠᠭᠤᠯ᠃
8 ᠴᠢ ᠠᠷᠠᠰᠤᠨ ᠤ ᠬᠠᠯᠳᠠᠪᠤᠷᠢᠲᠤ ᠡᠪᠡᠳᠴᠢᠨ ᠡᠴᠡ ᠪᠣᠯᠭᠣᠮᠵᠢᠯᠠᠵᠤ᠂ ᠲᠠᠬᠢᠯᠴᠢ ᠯᠧᠸᠢᠴᠦᠳ ᠦᠨ ᠵᠢᠭᠠᠪᠤᠷᠢᠯᠠᠬᠤ ᠪᠦᠭᠦᠳᠡ ᠶᠢᠨ ᠳᠠᠭᠠᠤ ᠭᠦᠢᠴᠡᠳ ᠰᠠᠬᠢᠵᠤ ᠪᠡᠶᠡᠯᠡᠭᠦᠯ᠂ ᠮᠢᠨᠦ ᠲᠡᠳᠡᠨ ᠳᠦ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠴᠢ ᠰᠠᠬᠢᠵᠤ ᠪᠡᠶᠡᠯᠡᠭᠦᠯᠬᠦ ᠶᠣᠰᠣᠲᠠᠢ᠃ 9 ᠲᠠ ᠨᠠᠷ ᠤᠨ ᠶᠧᠵᠢᠫᠲ ᠡᠴᠡ ᠭᠠᠷᠴᠤ ᠢᠷᠡᠬᠦ ᠵᠠᠮ ᠳᠤ ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠮᠢᠷᠢᠶᠠᠮ ᠳᠤ ᠶᠠᠭᠤ ᠦᠢᠯᠡᠳᠦᠭᠰᠡᠨ ᠢ ᠰᠠᠨᠠᠭᠲᠤᠨ᠃
ᠶᠠᠳᠠᠭᠤᠰ ᠢ ᠬᠠᠯᠠᠮᠵᠢᠯᠠᠬᠤ
10 ᠴᠢ ᠬᠥᠷᠰᠢ ᠳᠡᠭᠡᠨ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠵᠢᠭᠡᠯᠡᠭᠦᠯᠬᠦ ᠳᠡᠭᠡᠨ ᠪᠠᠷᠢᠴᠠᠭᠠ ᠠᠪᠬᠤ ᠪᠠᠷ ᠭᠡᠷ ᠲᠤᠨᠢ ᠪᠦᠦ ᠣᠷᠣ᠃ 11 ᠬᠠᠷᠢᠨ ᠭᠠᠳᠠᠨᠠ ᠨᠢ ᠵᠣᠭᠰᠣᠵᠤ ᠪᠠᠢ᠂ ᠴᠢᠮᠠ ᠠᠴᠠ ᠵᠢᠭᠡᠯᠡᠯᠭᠡ ᠠᠪᠤᠭᠰᠠᠨ ᠬᠥᠮᠦᠨ ᠪᠠᠷᠢᠴᠠᠭᠠ ᠪᠠᠨ ᠥᠪᠡᠷ ᠢᠶᠡᠨ ᠴᠢᠮᠠ ᠳᠤ ᠠᠪᠴᠢᠷᠠᠵᠤ ᠥᠭᠭᠥᠭ᠃ 12 ᠬᠡᠷᠪᠡ ᠲᠡᠷᠡ ᠬᠥᠮᠦᠨ ᠶᠠᠳᠠᠭᠤ ᠪᠣᠯ ᠴᠢ ᠲᠡᠭᠦᠨ ᠦ ᠪᠠᠷᠢᠴᠠᠭᠠ ᠶᠢ ᠨᠥᠮᠥᠷᠴᠦ ᠤᠨᠲᠠᠵᠤ ᠪᠣᠯᠬᠤ ᠦᠭᠡᠢ᠃ 13 ᠴᠢ ᠲᠡᠭᠦᠨ ᠦ ᠪᠠᠷᠢᠴᠠᠭᠠ ᠶᠢ ᠨᠠᠷᠠ ᠰᠢᠩᠭᠡᠬᠦ ᠦᠶᠡ ᠳᠦ ᠵᠠᠪᠠᠯ ᠪᠤᠴᠠᠭᠠᠵᠤ ᠥᠭᠬᠦ ᠶᠣᠰᠣᠲᠠᠢ᠃ ᠲᠡᠭᠡᠪᠡᠯ ᠲᠡᠷᠡ ᠬᠥᠮᠦᠨ ᠬᠤᠪᠴᠠᠰᠤ ᠪᠠᠨ ᠨᠥᠮᠥᠷᠴᠦ ᠤᠨᠲᠠᠬᠤ ᠪᠥᠭᠡᠳ ᠴᠢᠮᠠᠶᠢ ᠢᠷᠥᠭᠡᠬᠦ ᠲᠤᠯᠠ ᠡᠨᠡ ᠦᠢᠯᠡ ᠴᠢᠨᠢ ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠵᠥᠪ ᠲᠤ ᠲᠣᠭᠠᠴᠠᠭᠳᠠᠬᠤ ᠪᠣᠯᠣᠨᠠ᠃
14 ᠢᠰᠷᠧᠯᠴᠦᠳ ᠦᠨ ᠳᠤᠮᠳᠠ᠂ ᠡᠰᠡᠪᠡᠯ ᠲᠠᠨ ᠤ ᠨᠤᠲᠤᠭ ᠤᠨ ᠬᠣᠲᠠ ᠲᠣᠰᠬᠣᠨ ᠳᠤ ᠰᠠᠭᠤᠳᠠᠭ ᠬᠠᠷᠢᠴᠤᠳ ᠤᠨ ᠳᠤᠮᠳᠠ ᠪᠠᠢᠭᠠ ᠶᠠᠳᠠᠭᠤ ᠵᠦᠳᠡᠭᠦᠦ ᠬᠥᠯᠥᠰᠥᠨ ᠦ ᠠᠵᠢᠯᠴᠢᠨ ᠢ ᠪᠦᠦ ᠮᠥᠯᠵᠢ᠃ 15 ᠲᠡᠷᠡ ᠶᠠᠳᠠᠭᠤ ᠪᠥᠭᠡᠳ ᠬᠥᠯᠥᠰᠥ ᠮᠥᠩᠭᠥ ᠪᠡᠷ ᠢᠶᠠᠨ ᠠᠮᠢ ᠭᠣᠣᠯ ᠢᠶᠠᠨ ᠵᠢᠭᠤᠵᠤ ᠪᠠᠢᠳᠠᠭ ᠤᠴᠢᠷ ᠬᠥᠯᠥᠰᠥ ᠶᠢ ᠨᠢ ᠨᠠᠷᠠ ᠰᠢᠩᠭᠡᠬᠦ ᠡᠴᠡ ᠡᠮᠦᠨᠡ ᠡᠳᠦᠷ ᠲᠤᠨᠢ ᠥᠭᠴᠦ ᠪᠠᠢ᠃ ᠡᠰᠡ ᠲᠡᠭᠡᠪᠡᠯ ᠲᠡᠷᠡ ᠴᠢᠮᠠᠶᠢ ᠶᠣᠬᠣᠸᠠ ᠳᠤ ᠮᠡᠳᠡᠭᠦᠯᠵᠦ ᠴᠢ ᠨᠢᠭᠦᠯ ᠲᠡᠢ ᠪᠣᠯᠬᠤ ᠪᠤᠢ᠃
16 ᠡᠴᠢᠭᠡ ᠨᠢ ᠬᠦᠦ ᠡᠴᠡ ᠪᠡᠨ ᠪᠣᠯᠵᠤ ᠴᠠᠭᠠᠵᠠᠯᠠᠭᠳᠠᠬᠤ ᠶᠣᠰᠣ ᠦᠭᠡᠢ᠃ ᠬᠦᠦ ᠨᠢ ᠴᠤ ᠡᠴᠢᠭᠡ ᠡᠴᠡ ᠪᠡᠨ ᠪᠣᠯᠵᠤ ᠴᠠᠭᠠᠵᠠᠯᠠᠭᠳᠠᠬᠤ ᠶᠣᠰᠣ ᠦᠭᠡᠢ᠃ ᠬᠥᠮᠦᠨ ᠪᠦᠷᠢ ᠥᠪᠡᠷ ᠦᠨ ᠢᠶᠠᠨ ᠨᠢᠭᠦᠯ ᠦᠨ ᠤᠯᠠᠮ ᠢᠶᠠᠷ ᠴᠠᠭᠠᠵᠠᠯᠠᠭᠳᠠᠬᠤ ᠶᠣᠰᠣᠲᠠᠢ᠃
17 ᠥᠨᠥᠴᠢᠨ ᠴᠠᠭᠠᠴᠢᠨ ᠤ ᠭᠣᠮᠣᠳᠠᠯ ᠢ ᠪᠦᠦ ᠣᠭᠣᠷ᠃ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠶᠢᠨ ᠬᠤᠪᠴᠠᠰᠤ ᠶᠢ ᠪᠠᠷᠢᠴᠠᠭᠠᠨ ᠳᠤ ᠪᠦᠦ ᠠᠪ᠃ 18 ᠴᠢ ᠶᠧᠵᠢᠫᠲ ᠲᠤ ᠪᠣᠭᠣᠯ ᠪᠠᠢᠭᠰᠠᠨ ᠢᠶᠠᠨ᠂ ᠶᠣᠬᠣᠸᠠ ᠪᠤᠷᠬᠠᠨ ᠴᠢᠨᠢ ᠴᠢᠮᠠᠶᠢ ᠲᠡᠨᠳᠡ ᠡᠴᠡ ᠵᠣᠯᠢᠵᠤ ᠠᠪᠤᠭᠰᠠᠨ ᠢ ᠰᠠᠨᠠᠵᠤ ᠶᠠᠪᠤ᠃ ᠲᠡᠢᠮᠦ ᠤᠴᠢᠷ ᠠᠴᠠ ᠪᠢ ᠴᠢᠮᠠ ᠳᠤ ᠡᠭᠦᠨ ᠢ ᠲᠤᠰᠢᠶᠠᠵᠤ ᠪᠠᠢᠨᠠ᠃
19 ᠴᠢ ᠲᠠᠯᠠᠪᠠᠢ ᠳᠠᠬᠢ ᠲᠠᠷᠢᠶᠠ ᠪᠠᠨ ᠬᠠᠳᠤᠵᠤ ᠪᠠᠢᠬᠤ ᠳᠠᠭᠠᠨ ᠲᠡᠨᠳᠡ ᠨᠢᠭᠡ ᠪᠣᠭᠣᠵᠢ ᠶᠢ ᠮᠠᠷᠲᠠᠭᠰᠠᠨ ᠪᠣᠯ᠂ ᠲᠡᠭᠦᠨ ᠢ ᠪᠠᠨ ᠠᠪᠬᠤ ᠪᠠᠷ ᠪᠦᠦ ᠪᠤᠴᠠ᠂ ᠬᠠᠷᠢᠨ ᠬᠠᠷᠢ ᠶᠢᠨ ᠬᠥᠮᠦᠨ᠂ ᠥᠨᠥᠴᠢᠨ ᠬᠡᠦᠬᠡᠳ᠂ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠶᠢᠨ ᠲᠥᠯᠥᠭᠡ ᠦᠯᠡᠳᠡᠭᠡ᠃ ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠭᠠᠷ ᠢᠶᠠᠷ ᠢᠶᠠᠨ ᠬᠢᠬᠦ ᠪᠦᠬᠦᠨ ᠢ ᠴᠢᠨᠢ ᠢᠪᠡᠭᠡᠬᠦ ᠪᠣᠯᠣᠨᠠ᠃ 20 ᠴᠢ ᠴᠢᠳᠦᠨ ᠮᠣᠳᠣ ᠪᠠᠨ ᠰᠡᠭᠰᠦᠷᠦᠭᠰᠡᠨ ᠦ ᠳᠠᠷᠠᠭᠠ᠂ ᠮᠥᠴᠢᠷ ᠳᠡᠭᠡᠷᠡᠬᠢ ᠶᠢ ᠨᠢ ᠳᠠᠬᠢᠨ ᠪᠦᠦ ᠠᠵᠢᠭᠯᠠ᠃ ᠦᠯᠡᠳᠡᠭᠰᠡᠨ ᠨᠢ ᠬᠠᠷᠢ ᠶᠢᠨ ᠬᠥᠮᠦᠨ᠂ ᠥᠨᠥᠴᠢᠨ ᠬᠡᠦᠬᠡᠳ᠂ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠶᠢᠨ ᠬᠢ ᠪᠣᠯᠣᠭ᠃
21 ᠴᠢ ᠦᠵᠦᠮ ᠦᠨ ᠴᠡᠴᠡᠷᠯᠢᠭ ᠡᠴᠡ ᠪᠡᠨ ᠦᠵᠦᠮ ᠢᠶᠡᠨ ᠬᠤᠷᠢᠶᠠᠭᠰᠠᠨ ᠤ ᠳᠠᠷᠠᠭᠠ᠂ ᠦᠯᠡᠳᠡᠭᠰᠡᠨ ᠢ ᠨᠢ ᠪᠦᠦ ᠲᠡᠭᠦ᠂ ᠦᠯᠡᠳᠡᠭᠰᠡᠨ ᠨᠢ ᠬᠠᠷᠢ ᠶᠢᠨ ᠬᠥᠮᠦᠨ᠂ ᠥᠨᠥᠴᠢᠨ ᠬᠡᠦᠬᠡᠳ᠂ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠶᠢᠨ ᠬᠢ ᠪᠣᠯᠣᠭ᠃ 22 ᠴᠢ ᠶᠧᠵᠢᠫᠲ ᠨᠤᠲᠤᠭ ᠲᠤ ᠪᠣᠭᠣᠯ ᠪᠠᠢᠭᠰᠠᠨ ᠢᠶᠠᠨ ᠰᠠᠨᠠ᠃ ᠲᠡᠢᠮᠦ ᠤᠴᠢᠷ ᠠᠴᠠ ᠪᠢ ᠴᠢᠮᠠ ᠳᠤ ᠡᠭᠦᠨ ᠢ ᠲᠤᠰᠢᠶᠠᠵᠤ ᠪᠠᠢᠨᠠ᠃