ᠳᠡᠳ᠋ ᠬᠠᠤᠯᠢ ᠭᠤᠴᠢᠨ ᠳᠥᠷᠪᠡ
ᠮᠣᠰᠧ ᠥᠭᠡᠳᠡ ᠪᠣᠯᠪᠠ
1 ᠮᠣᠰᠧ ᠮᠣᠶᠠᠪ ᠤᠨ ᠲᠠᠯᠠ ᠭᠠᠵᠠᠷ ᠠᠴᠠ ᠨᠧᠪᠣ ᠠᠭᠤᠯᠠᠨ ᠳᠤ ᠠᠪᠠᠷᠢᠵᠤ᠂ ᠶᠧᠷᠢᠺᠣ ᠶᠢᠨ ᠬᠠᠷᠠᠯᠳᠤᠭᠠ ᠫᠢᠰᠭᠠ ᠶᠢᠨ ᠣᠷᠭᠢᠯ ᠳᠤ ᠭᠠᠷᠬᠤ ᠳᠤ᠂ ᠶᠣᠬᠣᠸᠠ ᠲᠡᠭᠦᠨ ᠳᠦ ᠪᠦᠬᠦ ᠭᠠᠵᠠᠷ ᠢ ᠦᠵᠡᠭᠦᠯᠪᠡ᠃ ᠲᠡᠷᠡ ᠨᠢ ᠳ᠋ᠠᠨ ᠬᠦᠷᠲᠡᠯᠡᠬᠢ ᠭᠢᠯᠧᠶᠠᠳ᠋᠂ 2 ᠪᠦᠬᠦ ᠨᠠᠹᠲ᠋ᠠᠯᠢ᠂ ᠡᠹᠷᠠᠢᠮ ᠪᠠ ᠮᠠᠨᠠᠰᠧ ᠶᠢᠨ ᠭᠠᠵᠠᠷ᠂ ᠪᠠᠷᠠᠭᠤᠨ ᠳᠠᠯᠠᠢ ᠬᠦᠷᠲᠡᠯᠡᠬᠢ ᠶᠦᠳᠠ ᠶᠢᠨ ᠪᠦᠬᠦ ᠭᠠᠵᠠᠷ᠂ 3 ᠨᠧᠭᠧᠪ ᠪᠣᠯᠣᠨ ᠳᠠᠯᠳᠠᠤ ᠮᠣᠳᠣᠨ ᠤ ᠬᠣᠲᠠ ᠶᠧᠷᠢᠺᠣ ᠶᠢᠨ ᠬᠥᠨᠳᠡᠢ ᠲᠠᠯᠠ ᠭᠠᠵᠠᠷ ᠠᠴᠠ ᠽᠣᠶᠠᠷ ᠬᠦᠷᠲᠡᠯᠡᠬᠢ ᠪᠦᠬᠦ ᠨᠤᠲᠤᠭ ᠪᠠᠢᠯᠠ᠃ 4 ᠶᠣᠬᠣᠸᠠ ᠲᠡᠭᠦᠨ ᠳᠦ᠄ 《ᠠᠪᠷᠠᠬᠠᠮ᠂ ᠢᠰᠠᠺ᠂ ᠶᠠᠺᠣᠪ ᠲᠤ ᠲᠠᠩ᠋ᠭᠠᠷᠢᠭᠯᠠᠨ ᠲᠡᠳᠡᠨ ᠦ ᠦᠷᠡ ᠤᠳᠤᠮ ᠳᠤ ᠥᠭᠭᠥᠨᠡ ᠭᠡᠵᠦ ᠮᠢᠨᠦ ᠠᠮᠠᠯᠠᠭᠰᠠᠨ ᠭᠠᠵᠠᠷ ᠡᠨᠡ ᠪᠠᠢᠨᠠ᠃ ᠪᠢ ᠲᠡᠭᠦᠨ ᠢ ᠥᠪᠡᠷ ᠦᠨ ᠴᠢᠨᠢ ᠨᠢᠳᠦ ᠪᠡᠷ ᠬᠠᠷᠠᠭᠤᠯᠤᠯᠠ᠃ ᠬᠠᠷᠢᠨ ᠴᠢ ᠲᠡᠰᠢ ᠪᠠᠨ ᠭᠠᠲᠤᠯᠤᠨ ᠣᠴᠢᠵᠤ ᠴᠢᠳᠠᠬᠤ ᠦᠭᠡᠢ》 ᠭᠡᠵᠦ ᠠᠢᠯᠠᠳᠪᠠ᠃ 5 ᠲᠡᠢᠨ ᠬᠦ ᠶᠣᠬᠣᠸᠠ ᠶᠢᠨ ᠵᠠᠷᠤᠴᠠ ᠮᠣᠰᠧ ᠶᠣᠬᠣᠸᠠ ᠶᠢᠨ ᠠᠢᠯᠠᠳᠤᠭᠰᠠᠨ ᠶᠣᠰᠣᠭᠠᠷ ᠮᠣᠶᠠᠪ ᠤᠨ ᠨᠤᠲᠤᠭ ᠲᠤ ᠥᠭᠡᠳᠡ ᠪᠣᠯᠪᠠ᠃ 6 ᠶᠣᠬᠣᠸᠠ ᠲᠡᠭᠦᠨ ᠢ ᠪᠧᠲ ᠫᠧᠶᠣᠷ ᠤᠨ ᠡᠰᠡᠷᠭᠦ ᠲᠠᠯᠠ ᠳᠤ ᠪᠤᠢ ᠮᠣᠶᠠᠪ ᠨᠤᠲᠤᠭ ᠤᠨ ᠬᠥᠨᠳᠡᠢ ᠳᠦ ᠬᠥᠳᠡᠭᠡᠯᠡᠭᠦᠯᠵᠡᠢ᠃ ᠬᠠᠷᠢᠨ ᠥᠨᠥ ᠬᠦᠷᠲᠡᠯᠡ ᠲᠡᠭᠦᠨ ᠦ ᠪᠤᠯᠠᠰᠢ ᠶᠢ ᠮᠡᠳᠡᠬᠦ ᠬᠥᠮᠦᠨ ᠠᠯᠠᠭᠠ᠃ 7 ᠮᠣᠰᠧ ᠥᠭᠡᠳᠡ ᠪᠣᠯᠬᠤ ᠳᠠᠭᠠᠨ ᠵᠠᠭᠤ ᠬᠣᠷᠢᠨ ᠨᠠᠰᠤᠲᠠᠢ ᠪᠠᠢᠭᠰᠠᠨ ᠴᠤ ᠨᠢᠳᠦᠨ ᠦ ᠬᠢᠨᠢ ᠭᠠᠯ ᠪᠠᠭᠤᠷᠠᠭᠰᠠᠨ ᠦᠭᠡᠢ᠂ ᠬᠦᠴᠦ ᠲᠡᠩᠬᠡᠭᠡ ᠨᠢ ᠴᠤ ᠬᠠᠷᠢᠭᠰᠠᠨ ᠦᠭᠡᠢ᠃ 8 ᠢᠰᠷᠧᠯᠴᠦᠳ ᠮᠣᠰᠧ ᠶᠢᠨ ᠬᠣᠢᠨᠠ ᠠᠴᠠ ᠮᠣᠶᠠᠪ ᠤᠨ ᠲᠠᠯᠠ ᠳᠤ ᠭᠤᠴᠢᠨ ᠬᠣᠨᠣᠭ ᠭᠠᠰᠢᠭᠤᠳᠠᠵᠠᠭᠠᠵᠠᠢ᠃ ᠲᠡᠭᠡᠭᠡᠳ ᠮᠣᠰᠧ ᠶᠢᠨ ᠬᠣᠢᠨᠠ ᠠᠴᠠ ᠤᠬᠢᠯᠠᠨ ᠭᠠᠰᠢᠭᠤᠳᠠᠬᠤ ᠬᠤᠭᠤᠴᠠᠭᠠ ᠳᠠᠭᠤᠰᠤᠭᠰᠠᠨ ᠪᠠᠢᠨᠠ᠃
9 ᠮᠣᠰᠧ ᠨᠦᠨ ᠦ ᠬᠦᠦ ᠶᠣᠱᠦ᠋ᠶᠠ ᠳᠡᠭᠡᠷᠡ ᠭᠠᠷ ᠲᠠᠯᠪᠢᠭᠰᠠᠨ ᠤᠴᠢᠷ ᠠᠴᠠ ᠲᠡᠷᠡ ᠮᠡᠷᠭᠡᠨ ᠤᠬᠠᠭᠠᠨ ᠤ ᠰᠦᠨᠡᠰᠦ ᠪᠡᠷ ᠳᠦᠭᠦᠷᠪᠡ᠃ ᠢᠰᠷᠧᠯᠴᠦᠳ ᠶᠣᠱᠦ᠋ᠶᠠ ᠶᠢᠨ ᠦᠭᠡ ᠶᠢ ᠳᠠᠭᠠᠵᠤ᠂ ᠶᠣᠬᠣᠸᠠ ᠶᠢᠨ ᠮᠣᠰᠧ ᠳᠤ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠭᠦᠢᠴᠡᠳᠬᠡᠵᠡᠢ᠃
10 ᠢᠰᠷᠧᠯ ᠳᠤ ᠮᠣᠰᠧ ᠰᠢᠭ᠋ ᠡᠰᠢ ᠦᠵᠡᠭᠦᠯᠦᠭᠴᠢ ᠳᠠᠬᠢᠭᠠᠳ ᠭᠠᠷᠤᠭᠰᠠᠨ ᠦᠭᠡᠢ᠃ ᠶᠣᠬᠣᠸᠠ ᠲᠡᠭᠦᠨ ᠲᠡᠢ ᠨᠢᠭᠤᠷ ᠲᠤᠯᠤᠨ ᠠᠭᠤᠯᠵᠠᠳᠠᠭ ᠪᠥᠭᠡᠳ 11 ᠲᠡᠭᠦᠨ ᠢ ᠶᠧᠵᠢᠫᠲ ᠲᠤ ᠶᠠᠪᠤᠭᠤᠯᠵᠤ᠂ ᠹᠠᠷᠠᠣ᠋ ᠪᠣᠯᠣᠨ ᠲᠡᠭᠦᠨ ᠦ ᠲᠦᠰᠢᠮᠡᠳ᠂ ᠲᠡᠭᠦᠨ ᠦ ᠪᠦᠬᠦ ᠨᠤᠲᠤᠭ ᠤᠨ ᠬᠢᠨ ᠳᠤ ᠠᠯᠢᠪᠠ ᠰᠢᠳᠢ ᠲᠡᠮᠳᠡᠭ ᠪᠠ ᠭᠠᠢᠬᠠᠮᠰᠢᠭ ᠤᠳ ᠢ ᠦᠢᠯᠡᠳᠦᠭᠦᠯᠦᠭᠰᠡᠨ ᠪᠢᠯᠡ᠃ 12 ᠪᠦᠬᠦ ᠢᠰᠷᠧᠯ ᠤᠨ ᠨᠢᠳᠦᠨ ᠦ ᠡᠮᠦᠨᠡ ᠠᠯᠢᠪᠠ ᠬᠦᠴᠦᠲᠦ ᠦᠢᠯᠡᠰ᠂ ᠠᠶᠤᠮᠰᠢᠭᠲᠤ ᠵᠦᠢᠯ ᠢ ᠮᠣᠰᠧ ᠮᠡᠲᠦ ᠦᠢᠯᠡᠳᠦᠭᠰᠡᠨ ᠬᠥᠮᠦᠨ ᠥᠭᠡᠷᠡ ᠠᠯᠠᠭᠠ᠃