ᠳᠡᠳ᠋ ᠬᠠᠤᠯᠢ ᠬᠣᠷᠢᠨ ᠳᠣᠯᠣᠭᠠ
ᠴᠢᠯᠠᠭᠤᠨ ᠳᠡᠭᠡᠷᠡ ᠪᠢᠴᠢᠭᠰᠡᠨ ᠬᠠᠤᠯᠢ
1 ᠮᠣᠰᠧ ᠢᠰᠷᠧᠯ ᠤᠨ ᠠᠬᠠᠮᠠᠳ ᠤᠳ ᠤᠨ ᠬᠠᠮᠲᠤ ᠠᠷᠠᠳ ᠲᠦᠮᠡᠨ ᠳᠦ ᠲᠤᠰᠢᠶᠠᠨ᠄ 《ᠥᠨᠥᠳᠥᠷ ᠦᠨ ᠮᠢᠨᠦ ᠥᠭᠴᠦ ᠪᠠᠢᠭᠠ ᠪᠦᠬᠦ ᠲᠤᠰᠢᠶᠠᠯ ᠢ ᠲᠠ ᠨᠠᠷ ᠰᠠᠬᠢᠬᠤ ᠶᠣᠰᠣᠲᠠᠢ᠃ 2 ᠶᠣᠷᠳᠠᠨ ᠢ ᠭᠠᠲᠤᠯᠵᠤ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠥᠭᠬᠦ ᠭᠠᠵᠠᠷ ᠤᠷᠤᠭᠤ ᠣᠷᠣᠬᠤ ᠳᠠᠭᠠᠨ ᠲᠣᠮᠣ ᠴᠢᠯᠠᠭᠤ ᠨᠤᠭᠤᠳ ᠪᠣᠰᠬᠠᠵᠤ ᠴᠣᠬᠣᠢ ᠪᠠᠷ ᠴᠣᠬᠣᠢᠳᠠ᠃ 3 ᠲᠠ ᠨᠠᠷ ᠭᠣᠣᠯ ᠭᠠᠲᠤᠯᠵᠤ᠂ ᠡᠴᠢᠭᠡ ᠡᠪᠦᠭᠡᠳ ᠦᠨ ᠴᠢᠨᠢ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠴᠢᠮᠠ ᠳᠤ ᠠᠮᠠᠯᠠᠭᠰᠠᠨ ᠶᠣᠰᠣᠭᠠᠷ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠴᠢᠨᠢ ᠴᠢᠮᠠ ᠳᠤ ᠥᠭᠬᠦ ᠭᠠᠵᠠᠷ᠂ ᠰᠦ᠋ ᠪᠠᠯ ᠤᠷᠤᠰᠤᠭᠰᠠᠨ ᠲᠡᠷᠡ ᠨᠤᠲᠤᠭ ᠲᠤ ᠣᠷᠣᠬᠤ ᠦᠶᠡ ᠳᠡᠭᠡᠨ ᠴᠢ ᠡᠨᠡ ᠬᠠᠤᠯᠢ ᠶᠢᠨ ᠪᠦᠬᠦ ᠦᠭᠡ ᠶᠢ ᠲᠡᠷᠡ ᠴᠢᠯᠠᠭᠤ ᠨᠤᠭᠤᠳ ᠳᠡᠭᠡᠷᠡ ᠪᠢᠴᠢ᠃ 4 ᠲᠠ ᠨᠠᠷ ᠶᠣᠷᠳᠠᠨ ᠢ ᠭᠠᠲᠤᠯᠤᠭᠰᠠᠨ ᠤ ᠳᠠᠷᠠᠭᠠ᠂ ᠥᠨᠥᠳᠥᠷ ᠦᠨ ᠮᠢᠨᠦ ᠲᠤᠰᠢᠶᠠᠭᠰᠠᠨ ᠲᠡᠳᠡᠭᠡᠷ ᠴᠢᠯᠠᠭᠤ ᠶᠢ ᠡᠪᠠᠯ ᠠᠭᠤᠯᠠᠨ ᠳᠡᠭᠡᠷᠡ ᠪᠣᠰᠬᠠᠭᠠᠳ ᠴᠣᠬᠣᠢ ᠪᠠᠷ ᠴᠣᠬᠣᠢᠳᠠ᠃ 5 ᠲᠡᠮᠦᠷ ᠪᠠᠭᠠᠵᠢ ᠬᠦᠷᠭᠡᠭᠡ ᠦᠭᠡᠢ ᠴᠢᠯᠠᠭᠤ ᠨᠤᠭᠤᠳ ᠢᠶᠠᠷ ᠲᠡᠨᠳᠡ ᠶᠣᠬᠣᠸᠠ ᠪᠤᠷᠬᠠᠨ ᠳᠠᠭᠠᠨ ᠵᠣᠷᠢᠭᠤᠯᠤᠨ ᠲᠠᠬᠢᠯ ᠤᠨ ᠰᠢᠷᠡᠭᠡ ᠪᠣᠰᠬᠠ᠃ 6 ᠴᠢ ᠪᠦᠲᠦᠨ ᠴᠢᠯᠠᠭᠤ ᠨᠤᠭᠤᠳ ᠢᠶᠠᠷ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠲᠠᠬᠢᠯ ᠤᠨ ᠰᠢᠷᠡᠭᠡ ᠶᠢ ᠪᠣᠰᠬᠠᠵᠤ᠂ ᠲᠡᠭᠦᠨ ᠳᠡᠭᠡᠷᠡ ᠶᠣᠬᠣᠸᠠ ᠪᠤᠷᠬᠠᠨ ᠳᠠᠭᠠᠨ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠡᠷᠭᠦ᠃ 7 ᠮᠥᠨ ᠡᠪ ᠦᠨ ᠲᠠᠬᠢᠯ ᠡᠷᠭᠦᠭᠡᠳ᠂ ᠲᠡᠨᠳᠡ ᠪᠡᠨ ᠢᠳᠡᠵᠦ᠂ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠡᠮᠦᠨᠡ ᠪᠠᠶᠠᠰᠴᠠᠭᠠ᠃ 8 ᠴᠢ ᠲᠡᠳᠡᠭᠡᠷ ᠴᠢᠯᠠᠭᠤᠨ ᠳᠡᠭᠡᠷᠡ ᠡᠨᠡ ᠬᠠᠤᠯᠢ ᠶᠢᠨ ᠪᠦᠬᠦ ᠦᠭᠡ ᠶᠢ ᠲᠣᠪ ᠲᠣᠳᠣ ᠪᠢᠴᠢ》 ᠭᠡᠪᠡ᠃
ᠭᠡᠷᠡ ᠶᠢ ᠵᠥᠷᠢᠴᠡᠪᠡᠯ ᠬᠠᠷᠢᠶᠠᠭᠳᠠᠨᠠ
9 ᠮᠣᠰᠧ ᠲᠠᠬᠢᠯᠴᠢ ᠯᠧᠸᠢᠴᠦᠳ ᠲᠡᠢ ᠬᠠᠮᠲᠤ ᠪᠦᠬᠦ ᠢᠰᠷᠧᠯ ᠳᠤ᠄ 《ᠴᠢᠮᠡᠭᠡ ᠦᠭᠡᠢ ᠰᠣᠨᠣᠰ᠂ ᠢᠰᠷᠧᠯ ᠡ︕ ᠥᠨᠥᠳᠥᠷ ᠴᠢ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠠᠷᠠᠳ ᠲᠦᠮᠡᠨ ᠪᠣᠯᠣᠯᠠ᠃ 10 ᠲᠡᠢᠮᠦ ᠡᠴᠡ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠢᠶᠠᠨ ᠳᠠᠭᠤ ᠬᠣᠭᠣᠯᠠᠢ ᠶᠢ ᠰᠣᠨᠣᠰᠴᠤ ᠥᠨᠥᠳᠥᠷ ᠦᠨ ᠮᠢᠨᠦ ᠴᠢᠮᠠ ᠳᠤ ᠲᠤᠰᠢᠶᠠᠵᠤ ᠪᠠᠢᠭᠠ ᠲᠡᠭᠦᠨ ᠦ ᠲᠤᠰᠢᠶᠠᠯ ᠵᠢᠭᠠᠪᠤᠷᠢ ᠨᠤᠭᠤᠳ ᠢ ᠪᠡᠶᠡᠯᠡᠭᠦᠯ》 ᠭᠡᠪᠡ᠃
11 ᠮᠣᠰᠧ ᠲᠡᠷᠡ ᠡᠳᠦᠷ ᠠᠷᠠᠳ ᠲᠦᠮᠡᠨ ᠳᠦ ᠲᠤᠰᠢᠶᠠᠨ᠄ 12 《ᠶᠣᠷᠳᠠᠨ ᠢ ᠭᠠᠲᠤᠯᠤᠭᠰᠠᠨ ᠤ ᠳᠠᠷᠠᠭᠠ᠂ ᠰᠢᠮᠧᠶᠣᠨ᠂ ᠯᠧᠸᠢ᠂ ᠶᠦᠳᠠ᠂ ᠢᠰᠠᠺᠠᠷ᠂ ᠶᠣᠰᠧᠹ᠂ ᠪᠢᠨᠶᠠᠮᠢᠨ ᠣᠪᠣᠭ ᠤᠨ ᠬᠢᠨ ᠠᠷᠠᠳ ᠲᠦᠮᠡᠨ ᠢ ᠢᠷᠥᠭᠡᠬᠦ ᠪᠡᠷ ᠭᠧᠷᠢᠽᠢᠮ ᠠᠭᠤᠯᠠᠨ ᠳᠡᠭᠡᠷᠡ ᠵᠣᠭᠰᠣᠵᠤ᠂ 13 ᠷᠧᠣᠪᠧᠨ᠂ ᠭᠠᠳ᠋᠂ ᠠᠱᠧᠷ᠂ ᠽᠧᠪᠦ᠋ᠯᠣᠨ᠂ ᠳ᠋ᠠᠨ᠂ ᠨᠠᠹᠲ᠋ᠠᠯᠢ ᠣᠪᠣᠭ ᠤᠨ ᠬᠢᠨ ᠬᠠᠷᠢᠶᠠᠬᠤ ᠪᠠᠷ ᠡᠪᠠᠯ ᠠᠭᠤᠯᠠᠨ ᠳᠡᠭᠡᠷᠡ ᠵᠣᠭᠰᠣᠨᠠ᠃ 14 ᠯᠧᠸᠢᠴᠦᠳ ᠪᠦᠬᠦ ᠢᠰᠷᠧᠯᠴᠦᠳ ᠲᠦ ᠴᠢᠩᠭ᠍ᠠ ᠳᠠᠭᠤ ᠪᠠᠷ ᠲᠤᠩ᠋ᠬᠠᠭᠯᠠᠨ᠄
15 〈ᠤᠷᠠᠴᠤᠳ ᠤᠨ ᠭᠠᠷ ᠢᠶᠠᠷ ᠰᠡᠢᠯᠦᠭᠰᠡᠨ᠂ ᠡᠰᠡᠪᠡᠯ ᠴᠢᠳᠬᠤᠭᠰᠠᠨ ᠰᠢᠲᠦᠭᠡᠨ ᠨᠢ ᠶᠣᠬᠣᠸᠠ ᠳᠤ ᠵᠢᠭᠰᠢᠭᠦᠷᠢ ᠲᠠᠢ ᠪᠠᠢᠲᠠᠯᠠ ᠲᠡᠳᠡᠭᠡᠷ ᠢ ᠬᠢᠵᠦ᠂ ᠨᠢᠭᠤᠴᠠ ᠪᠠᠷ ᠪᠣᠰᠬᠠᠭᠴᠢ ᠨᠢ ᠬᠠᠷᠢᠶᠠᠭᠳᠠᠭᠰᠠᠨ〉 ᠭᠡᠬᠦ ᠳᠦ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ ᠬᠠᠷᠢᠭᠤ ᠳᠤᠨᠢ᠄ 〈ᠠᠮᠧᠨ〉 ᠭᠡᠨᠡ᠃
16 〈ᠡᠴᠢᠭᠡ ᠡᠬᠡ ᠪᠡᠨ ᠪᠠᠰᠤᠮᠵᠢᠯᠠᠭᠴᠢ ᠬᠠᠷᠢᠶᠠᠭᠳᠠᠭᠰᠠᠨ〉 ᠭᠡᠬᠦ ᠳᠦ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ᠄ 〈ᠠᠮᠧᠨ〉 ᠭᠡᠨᠡ᠃
17 〈ᠬᠥᠷᠰᠢ ᠶᠢᠨ ᠢᠶᠠᠨ ᠬᠢᠯᠢ ᠶᠢ ᠥᠭᠡᠷᠡᠴᠢᠯᠡᠭᠴᠢ ᠬᠠᠷᠢᠶᠠᠭᠳᠠᠭᠰᠠᠨ〉 ᠭᠡᠬᠦ ᠳᠦ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ᠄ 〈ᠠᠮᠧᠨ〉 ᠭᠡᠨᠡ᠃
18 〈ᠰᠣᠬᠣᠷ ᠬᠥᠮᠦᠨ ᠢ ᠵᠠᠮ ᠠᠴᠠ ᠨᠢ ᠲᠥᠭᠡᠷᠢᠭᠦᠯᠦᠭᠴᠢ ᠬᠠᠷᠢᠶᠠᠭᠳᠠᠭᠰᠠᠨ〉 ᠭᠡᠬᠦ ᠳᠦ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ᠄ 〈ᠠᠮᠧᠨ〉 ᠭᠡᠨᠡ᠃
19 〈ᠴᠠᠭᠠᠴᠢᠨ᠂ ᠥᠨᠥᠴᠢᠨ᠂ ᠪᠡᠯᠪᠡᠰᠦᠨ ᠦ ᠭᠣᠮᠣᠳᠠᠯ ᠢ ᠣᠭᠣᠷᠣᠭᠴᠢ ᠬᠠᠷᠢᠶᠠᠭᠳᠠᠭᠰᠠᠨ〉 ᠭᠡᠬᠦ ᠳᠦ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ᠄ 〈ᠠᠮᠧᠨ〉 ᠭᠡᠨᠡ᠃
20 〈ᠡᠴᠢᠭᠡ ᠶᠢᠨ ᠢᠶᠠᠨ ᠡᠬᠡᠨᠡᠷ ᠲᠡᠢ ᠤᠨᠲᠠᠵᠤ᠂ ᠡᠴᠢᠭᠡ ᠶᠢᠨ ᠢᠶᠠᠨ ᠬᠣᠷᠮᠣᠢ ᠶᠢ ᠰᠡᠬᠦᠭᠴᠢ ᠬᠠᠷᠢᠶᠠᠭᠳᠠᠭᠰᠠᠨ〉 ᠭᠡᠬᠦ ᠳᠦ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ᠄ 〈ᠠᠮᠧᠨ〉 ᠭᠡᠨᠡ᠃
21 〈ᠮᠠᠯ ᠠᠮᠢᠲᠠᠨ ᠲᠠᠢ ᠶᠠᠪᠤᠯᠳᠠᠭᠴᠢ ᠬᠠᠷᠢᠶᠠᠭᠳᠠᠭᠰᠠᠨ〉 ᠭᠡᠬᠦ ᠳᠦ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ᠄ 〈ᠠᠮᠧᠨ〉 ᠭᠡᠨᠡ᠃
22 〈ᠥᠪᠡᠷ ᠦᠨ ᠡᠭᠡᠴᠢ ᠳᠡᠭᠦᠦ᠂ ᠡᠴᠢᠭᠡ ᠶᠢᠨ ᠢᠶᠠᠨ ᠥᠬᠢᠨ᠂ ᠡᠰᠡᠪᠡᠯ ᠡᠬᠡ ᠶᠢᠨ ᠢᠶᠠᠨ ᠥᠬᠢᠨ ᠲᠠᠢ ᠤᠨᠲᠠᠭᠴᠢ ᠬᠠᠷᠢᠶᠠᠭᠳᠠᠭᠰᠠᠨ〉 ᠭᠡᠬᠦ ᠳᠦ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ᠄ 〈ᠠᠮᠧᠨ〉 ᠭᠡᠨᠡ᠃
23 〈ᠬᠠᠳᠠᠮ ᠡᠬᠡ ᠲᠠᠢ ᠪᠠᠨ ᠤᠨᠲᠠᠭᠴᠢ ᠬᠠᠷᠢᠶᠠᠭᠳᠠᠭᠰᠠᠨ〉 ᠭᠡᠬᠦ ᠳᠦ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ᠄ 〈ᠠᠮᠧᠨ〉 ᠭᠡᠨᠡ᠃
24 〈ᠬᠥᠷᠰᠢ ᠪᠠᠨ ᠨᠢᠭᠤᠴᠠ ᠪᠠᠷ ᠴᠣᠬᠢᠭᠴᠢ ᠬᠠᠷᠢᠶᠠᠭᠳᠠᠭᠰᠠᠨ〉 ᠭᠡᠬᠦ ᠳᠦ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ᠄ 〈ᠠᠮᠧᠨ〉 ᠭᠡᠨᠡ᠃
25 〈ᠬᠠᠬᠤᠤᠯᠢ ᠠᠪᠴᠤ ᠭᠡᠮ ᠦᠭᠡᠢ ᠴᠢᠰᠤ ᠶᠢ ᠤᠷᠤᠰᠬᠠᠭᠴᠢ ᠬᠠᠷᠢᠶᠠᠭᠳᠠᠭᠰᠠᠨ〉 ᠭᠡᠬᠦ ᠳᠦ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ᠄ 〈ᠠᠮᠧᠨ〉 ᠭᠡᠨᠡ᠃
26 〈ᠡᠨᠡ ᠬᠠᠤᠯᠢ ᠶᠢᠨ ᠪᠦᠬᠦ ᠦᠭᠡ ᠶᠢ ᠳᠠᠭᠠᠵᠤ ᠪᠡᠶᠡᠯᠡᠭᠦᠯᠬᠦ ᠦᠭᠡᠢ ᠬᠥᠮᠦᠨ ᠬᠠᠷᠢᠶᠠᠭᠳᠠᠭᠰᠠᠨ〉 ᠭᠡᠬᠦ ᠳᠦ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ᠄ 〈ᠠᠮᠧᠨ〉》 ᠭᠡᠨᠡ᠃