ᠳᠡᠳ᠋ ᠬᠠᠤᠯᠢ ᠭᠤᠴᠢᠨ ᠨᠢᠭᠡ
ᠶᠣᠱᠦ᠋ᠶᠠ ᠮᠣᠰᠧ ᠶᠢ ᠵᠠᠯᠭᠠᠮᠵᠢᠯᠠᠪᠠ
1 ᠮᠣᠰᠧ ᠵᠠᠯᠭᠠᠭᠠᠳ ᠪᠦᠬᠦ ᠢᠰᠷᠧᠯ ᠳᠤ ᠳᠠᠷᠠᠭᠠᠬᠢ ᠦᠭᠡᠰ ᠢ ᠬᠡᠯᠡᠵᠡᠢ᠃ 2 ᠲᠡᠷᠡ ᠪᠡᠷ ᠲᠡᠳᠡᠨ ᠳᠦ᠄ 《ᠪᠢ ᠥᠨᠥᠳᠥᠷ ᠵᠠᠭᠤ ᠬᠣᠷᠢᠨ ᠨᠠᠰᠤᠲᠠᠢ᠃ ᠪᠢ ᠴᠢᠨᠠᠭᠰᠢᠳᠠ ᠲᠡᠷᠢᠭᠦᠯᠡᠨ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ᠃ ᠶᠣᠬᠣᠸᠠ ᠨᠠᠳᠠ ᠳᠤ᠄ 〈ᠴᠢ ᠡᠨᠡ ᠶᠣᠷᠳᠠᠨ ᠭᠣᠣᠯ ᠢ ᠭᠠᠲᠤᠯᠵᠤ ᠪᠣᠯᠬᠤ ᠦᠭᠡᠢ〉 ᠭᠡᠵᠦ ᠠᠢᠯᠠᠳᠤᠭᠰᠠᠨ᠃ 3 ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠥᠪᠡᠷ ᠢᠶᠡᠨ ᠴᠢᠨᠦ ᠡᠮᠦᠨᠡ ᠶᠠᠪᠤᠵᠤ᠂ ᠲᠡᠳᠡᠭᠡᠷ ᠦᠨᠳᠦᠰᠦᠲᠡᠨ ᠢ ᠤᠰᠠᠳᠬᠠᠨ ᠴᠢᠮᠠ ᠳᠤ ᠭᠠᠵᠠᠷ ᠢ ᠨᠢ ᠡᠵᠡᠮᠰᠢᠭᠦᠯᠬᠦ ᠤᠴᠢᠷ ᠠᠴᠠ ᠶᠣᠬᠣᠸᠠ ᠶᠢᠨ ᠠᠢᠯᠠᠳᠤᠭᠰᠠᠨᠴᠢᠯᠠᠨ ᠶᠣᠱᠦ᠋ᠶᠠ ᠴᠢᠨᠦ ᠡᠮᠦᠨᠡ ᠭᠠᠲᠤᠯᠤᠨ ᠶᠠᠪᠤᠬᠤ ᠪᠥᠭᠡᠳ 4 ᠶᠣᠬᠣᠸᠠ ᠤᠷᠢᠳᠤ ᠨᠢ ᠠᠮᠣᠷᠢᠴᠤᠳ ᠤᠨ ᠬᠠᠭᠠᠨ ᠰᠢᠬᠣᠨ᠂ ᠣᠭ ᠨᠠᠷ ᠪᠣᠯᠣᠨ ᠲᠡᠳᠡᠨ ᠦ ᠭᠠᠵᠠᠷ ᠨᠤᠲᠤᠭ ᠤᠨ ᠬᠢᠨ ᠢ ᠤᠰᠠᠳᠬᠠᠭᠰᠠᠨ ᠰᠢᠭ᠋ ᠢᠶᠠᠨ ᠲᠡᠳᠡᠨ ᠢ ᠴᠤ ᠤᠰᠠᠳᠬᠠᠨᠠ᠃ 5 ᠶᠣᠬᠣᠸᠠ ᠲᠡᠳᠡᠨ ᠢ ᠲᠤᠰᠢᠶᠠᠨ ᠥᠭᠬᠦ ᠳᠦᠨᠢ ᠲᠠ ᠨᠠᠷ ᠮᠢᠨᠦ ᠲᠤᠰᠢᠶᠠᠭᠰᠠᠨ ᠪᠦᠬᠦᠨ ᠦ ᠶᠣᠰᠣᠭᠠᠷ ᠲᠡᠳᠡᠨ ᠳᠦ ᠦᠢᠯᠡᠳᠬᠦ ᠶᠣᠰᠣᠲᠠᠢ᠃ 6 ᠲᠠ ᠨᠠᠷ ᠲᠤᠤᠱᠲᠠᠢ᠂ ᠵᠣᠷᠢᠭᠲᠠᠢ ᠪᠠᠢ᠃ ᠲᠡᠳᠡ ᠨᠠᠷ ᠤᠨ ᠡᠮᠦᠨᠡ ᠪᠦᠦ ᠠᠶᠤ᠂ ᠪᠦᠦ ᠴᠡᠴᠡᠷᠡ᠃ ᠴᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠥᠪᠡᠷ ᠢᠶᠡᠨ ᠴᠢᠮᠠ ᠲᠠᠢ ᠬᠠᠮᠲᠤ ᠶᠠᠪᠤᠨᠠ᠃ ᠲᠡᠷᠡ ᠴᠢᠮᠠᠶᠢ ᠣᠷᠬᠢᠬᠤ ᠦᠭᠡᠢ᠂ ᠮᠥᠨ ᠴᠢᠮᠠᠶᠢ ᠬᠠᠶᠠᠬᠤ ᠦᠭᠡᠢ》 ᠭᠡᠪᠡ᠃
7 ᠮᠣᠰᠧ ᠶᠣᠱᠦ᠋ᠶᠠ ᠶᠢ ᠪᠦᠬᠦ ᠢᠰᠷᠧᠯ ᠤᠨ ᠡᠮᠦᠨᠡ ᠳᠠᠭᠤᠳᠠᠵᠤ᠄ 《ᠴᠢ ᠲᠤᠤᠱᠲᠠᠢ᠂ ᠵᠣᠷᠢᠭᠲᠠᠢ ᠪᠠᠢ᠃ ᠡᠴᠢᠭᠡ ᠡᠪᠦᠭᠡᠳ ᠲᠤᠨᠢ ᠥᠭᠬᠦ ᠪᠡᠷ ᠶᠣᠬᠣᠸᠠ ᠶᠢᠨ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠲᠡᠷᠡ ᠭᠠᠵᠠᠷ ᠲᠤ ᠡᠨᠡ ᠠᠷᠠᠳ ᠲᠦᠮᠡᠨ ᠲᠡᠢ ᠬᠠᠮᠲᠤ ᠣᠷᠣᠭᠠᠳ ᠲᠡᠷᠡ ᠭᠠᠵᠠᠷ ᠢ ᠲᠡᠳᠡᠨ ᠳᠦ ᠥᠪ ᠪᠣᠯᠭᠠᠨ ᠥᠭᠬᠦ ᠬᠥᠮᠦᠨ ᠨᠢ ᠴᠢ ᠶᠤᠮ᠃ 8 ᠶᠣᠬᠣᠸᠠ ᠥᠪᠡᠷ ᠢᠶᠡᠨ ᠴᠢᠨᠦ ᠡᠮᠦᠨᠡ ᠶᠠᠪᠤᠬᠤ ᠪᠣᠯᠣᠨᠠ᠃ ᠲᠡᠷᠡ ᠥᠪᠡᠷ ᠢᠶᠡᠨ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠵᠤ᠂ ᠴᠢᠮᠠᠶᠢ ᠣᠷᠬᠢᠬᠤ ᠦᠭᠡᠢ᠂ ᠮᠥᠨ ᠴᠢᠮᠠᠶᠢ ᠬᠠᠶᠠᠬᠤ ᠦᠭᠡᠢ᠃ ᠪᠦᠦ ᠠᠶᠤ᠂ ᠪᠦᠦ ᠰᠢᠨᠲᠠᠷᠠ︕》 ᠭᠡᠯᠡ᠃
9 ᠮᠣᠰᠧ ᠡᠨᠡ ᠬᠠᠤᠯᠢ ᠶᠢ ᠪᠢᠴᠢᠭᠡᠳ ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠵᠥᠭᠡᠭᠡᠳᠡᠭ ᠯᠧᠸᠢ ᠶᠢᠨ ᠤᠳᠤᠮ ᠪᠣᠯᠬᠤ ᠲᠠᠬᠢᠯᠴᠢᠳ ᠬᠢᠭᠡᠳ ᠢᠰᠷᠧᠯ ᠤᠨ ᠪᠦᠬᠦ ᠠᠬᠠᠮᠠᠳ ᠲᠤ ᠥᠭᠪᠡ᠃ 10 ᠮᠣᠰᠧ ᠲᠡᠳᠡᠨ ᠳᠦ ᠲᠤᠰᠢᠶᠠᠨ᠄ 《ᠳᠣᠯᠣᠭᠠᠨ ᠵᠢᠯ ᠪᠦᠷᠢ ᠶᠢᠨ ᠡᠴᠦᠰ᠂ ᠲᠤᠬᠠᠢᠯᠠᠪᠠᠯ ᠥᠷᠢ ᠶᠢ ᠴᠤᠴᠠᠯᠬᠤ ᠪᠠᠷ ᠲᠣᠭᠲᠠᠭᠰᠠᠨ ᠲᠡᠷᠡ ᠵᠢᠯ ᠤᠨ ᠮᠠᠢᠬᠠᠨ ᠤ ᠪᠠᠶᠠᠷ ᠤᠨ ᠦᠶᠡ ᠪᠡᠷ᠂ 11 ᠪᠦᠬᠦ ᠢᠰᠷᠧᠯ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠰᠢᠯᠢᠵᠦ ᠠᠪᠬᠤ ᠭᠠᠵᠠᠷ ᠲᠤ ᠲᠡᠭᠦᠨ ᠦ ᠡᠮᠦᠨᠡ ᠦᠵᠡᠭᠳᠡᠬᠦ ᠪᠡᠷ ᠢᠷᠡᠬᠦ ᠦᠶᠡ ᠳᠦ᠂ ᠲᠠ ᠨᠠᠷ ᠡᠨᠡ ᠬᠠᠤᠯᠢ ᠶᠢ ᠤᠩ᠋ᠰᠢᠵᠤ ᠪᠦᠬᠦ ᠢᠰᠷᠧᠯ ᠳᠤ ᠰᠣᠨᠣᠰᠬᠠ᠃ 12 ᠠᠷᠠᠳ ᠲᠦᠮᠡᠨ ᠢ᠂ ᠡᠷᠡᠭᠲᠡᠢ ᠡᠮᠡᠭᠲᠡᠢ᠂ ᠬᠡᠦᠬᠡᠳ ᠪᠠᠭᠠᠴᠤᠳ ᠭᠡᠵᠦ ᠢᠯᠭᠠᠯ ᠦᠭᠡᠢ᠂ ᠲᠠᠨ ᠤ ᠲᠡᠨᠳᠡ ᠪᠠᠢᠭᠠ ᠬᠠᠷᠢ ᠶᠢᠨ ᠬᠥᠮᠦᠰ ᠢ ᠴᠤ ᠬᠠᠮᠲᠤ ᠴᠤᠭᠯᠠᠭᠤᠯ᠃ ᠲᠡᠳᠡ ᠪᠦᠬᠦᠨ ᠰᠣᠨᠣᠰᠴᠤ ᠰᠤᠷᠤᠭᠠᠳ ᠶᠣᠬᠣᠸᠠ ᠪᠤᠷᠬᠠᠨ ᠠᠴᠠ ᠴᠢᠨᠢ ᠡᠮᠢᠶᠡᠨ ᠡᠨᠡ ᠬᠠᠤᠯᠢ ᠶᠢᠨ ᠦᠭᠡ ᠪᠦᠷᠢ ᠶᠢ ᠰᠠᠬᠢᠨ ᠪᠡᠶᠡᠯᠡᠭᠦᠯᠬᠦ ᠶᠣᠰᠣᠲᠠᠢ᠃ 13 ᠡᠨᠡ ᠬᠠᠤᠯᠢ ᠶᠢ ᠮᠡᠳᠡᠳᠡᠭ ᠦᠭᠡᠢ ᠲᠡᠳᠡᠨ ᠦ ᠦᠷᠡ ᠬᠡᠦᠬᠡᠳ ᠤᠳ ᠴᠤ ᠲᠠ ᠨᠠᠷ ᠤᠨ ᠶᠣᠷᠳᠠᠨ ᠢ ᠭᠠᠲᠤᠯᠤᠨ ᠣᠴᠢᠵᠤ ᠡᠵᠡᠮᠰᠢᠬᠦ ᠭᠠᠵᠠᠷ ᠲᠤ ᠠᠮᠢᠳᠤᠷᠠᠨ ᠰᠠᠭᠤᠬᠤ ᠪᠦᠬᠦᠢᠯᠡ ᠬᠤᠭᠤᠴᠠᠭᠠᠨ ᠳᠠᠭᠠᠨ ᠡᠭᠦᠨ ᠢ ᠰᠣᠨᠣᠰᠴᠤ ᠶᠣᠬᠣᠸᠠ ᠪᠤᠷᠬᠠᠨ ᠠᠴᠠ ᠴᠢᠨᠢ ᠡᠮᠢᠶᠡᠬᠦ ᠶᠢ ᠰᠤᠷᠬᠤ ᠶᠣᠰᠣᠲᠠᠢ》 ᠭᠡᠪᠡ᠃
14 ᠶᠣᠬᠣᠸᠠ ᠮᠣᠰᠧ ᠳᠤ᠄ 《ᠬᠠᠷᠠ᠂ ᠨᠠᠰᠤ ᠪᠠᠷᠠᠬᠤ ᠴᠠᠭ ᠴᠢᠨᠢ ᠣᠢᠷᠠᠲᠤᠯᠠ︕ ᠶᠣᠱᠦ᠋ᠶᠠ ᠶᠢ ᠳᠠᠭᠤᠳᠠᠵᠤ᠂ ᠬᠠᠮᠲᠤ ᠳᠠᠭᠠᠨ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠲᠤ ᠢᠷᠡ᠃ ᠪᠢ ᠲᠡᠭᠦᠨ ᠳᠦ ᠲᠤᠰᠢᠶᠠᠯ ᠥᠭᠭᠥᠶᠡ》 ᠭᠡᠰᠡᠨ ᠳᠦ᠂ ᠮᠣᠰᠧ ᠶᠣᠱᠦ᠋ᠶᠠ ᠬᠣᠶᠠᠷ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠲᠤ ᠣᠴᠢᠵᠤ ᠲᠡᠨᠳᠡ ᠵᠣᠭᠰᠣᠪᠠ᠃ 15 ᠶᠣᠬᠣᠸᠠ ᠴᠠᠴᠠᠷ ᠲᠤ ᠡᠭᠦᠯᠡᠨ ᠪᠠᠭᠠᠨᠠ ᠳᠣᠲᠣᠷᠠ ᠦᠵᠡᠭᠳᠡᠵᠦ᠂ ᠡᠭᠦᠯᠡᠨ ᠪᠠᠭᠠᠨᠠ ᠨᠢ ᠴᠠᠴᠠᠷ ᠤᠨ ᠡᠭᠦᠳᠡᠨ ᠳᠡᠭᠡᠷᠡ ᠲᠣᠭᠲᠠᠪᠠ᠃
16 ᠶᠣᠬᠣᠸᠠ ᠮᠣᠰᠧ ᠳᠤ᠄ 《ᠬᠠᠷᠠ᠂ ᠴᠢ ᠤᠳᠠᠯ ᠦᠭᠡᠢ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠬᠠᠮᠲᠤ ᠨᠣᠢᠷᠰᠣᠬᠤ ᠪᠣᠯᠣᠨᠠ᠃ ᠬᠠᠷᠢᠨ ᠡᠨᠡ ᠠᠷᠠᠳ ᠲᠦᠮᠡᠨ ᠣᠴᠢᠵᠤ ᠰᠠᠭᠤᠷᠢᠰᠢᠬᠤ ᠭᠠᠵᠠᠷ ᠲᠠᠭᠠᠨ ᠬᠠᠷᠢ ᠶᠢᠨ ᠪᠤᠷᠬᠠᠳ ᠢ ᠳᠠᠭᠠᠵᠤ ᠰᠠᠳᠤᠷᠯᠠᠨᠠ᠂ ᠲᠡᠳᠡ ᠨᠠᠮᠠᠶᠢ ᠣᠷᠬᠢᠵᠤ᠂ ᠨᠠᠳᠠ ᠲᠠᠢ ᠪᠠᠢᠭᠤᠯᠤᠭᠰᠠᠨ ᠭᠡᠷᠡ ᠪᠡᠨ ᠵᠥᠷᠢᠴᠡᠬᠦ ᠪᠣᠯᠣᠨᠠ᠃ 17 ᠲᠡᠷᠡ ᠦᠶᠡ ᠳᠦ ᠮᠢᠨᠦ ᠬᠢᠯᠢᠩ ᠲᠡᠳᠡᠨ ᠦ ᠡᠰᠡᠷᠭᠦ ᠳᠦᠷᠡᠯᠵᠡᠬᠦ ᠪᠥᠭᠡᠳ ᠪᠢ ᠲᠡᠳᠡᠨ ᠢ ᠬᠠᠶᠠᠵᠤ ᠲᠡᠳᠡᠨ ᠡᠴᠡ ᠨᠢᠭᠤᠷ ᠢᠶᠠᠨ ᠪᠤᠷᠤᠭᠤᠯᠤᠨᠠ᠃ ᠲᠡᠳᠡ ᠤᠰᠠᠳᠬᠠᠭᠳᠠᠨ ᠡᠯᠳᠡᠪ ᠦᠨ ᠭᠠᠮᠰᠢᠭ ᠵᠣᠪᠠᠯᠠᠩ ᠳᠤ ᠲᠤᠯᠭᠠᠷᠠᠬᠤ ᠪᠣᠯᠬᠣᠷ ᠲᠡᠷᠡ ᠦᠶᠡ ᠳᠦ᠄ 〈ᠮᠠᠨ ᠤ ᠪᠤᠷᠬᠠᠨ ᠪᠢᠳᠡᠨ ᠦ ᠳᠤᠮᠳᠠ ᠪᠠᠢᠬᠤ ᠦᠭᠡᠢ ᠤᠴᠢᠷ ᠡᠳᠡᠭᠡᠷ ᠭᠠᠮᠰᠢᠭ ᠪᠢᠳᠡᠨ ᠳᠡᠭᠡᠷᠡ ᠪᠠᠭᠤᠭᠰᠠᠨ ᠪᠢᠰᠢ ᠤᠤ︖〉 ᠭᠡᠵᠦ ᠬᠡᠯᠡᠬᠦ ᠪᠣᠯᠣᠨᠠ᠃ 18 ᠬᠠᠷᠢᠨ ᠥᠭᠡᠷᠡ ᠪᠤᠷᠬᠠᠳ ᠤᠷᠤᠭᠤ ᠡᠷᠭᠢᠭᠡᠳ ᠦᠢᠯᠡᠳᠦᠭᠰᠡᠨ ᠲᠡᠳᠡᠨ ᠦ ᠠᠯᠢᠪᠠ ᠮᠠᠭᠤ ᠶᠠᠪᠤᠳᠠᠯ ᠠᠴᠠ ᠪᠣᠯᠵᠤ᠂ ᠪᠢ ᠲᠡᠷᠡ ᠦᠶᠡ ᠳᠦ ᠨᠢᠭᠤᠷ ᠢᠶᠠᠨ ᠪᠤᠷᠤᠭᠤᠯᠤᠭᠰᠠᠭᠠᠷ ᠪᠠᠢᠬᠤ ᠪᠣᠯᠣᠨᠠ᠃ 19 ᠲᠠ ᠨᠠᠷ ᠣᠳᠣ ᠳᠠᠷᠠᠭᠠᠬᠢ ᠳᠠᠭᠤᠤ ᠶᠢ ᠪᠢᠴᠢᠵᠦ ᠠᠪᠤᠭᠠᠳ ᠲᠡᠭᠦᠨ ᠢ ᠪᠠᠨ ᠢᠰᠷᠧᠯᠴᠦᠳ ᠲᠦ ᠰᠤᠷᠭᠠᠵᠤ ᠲᠡᠳᠡᠨ ᠦ ᠠᠮᠠᠨ ᠳᠤ ᠬᠢ᠃ ᠡᠨᠡ ᠳᠠᠭᠤᠤ ᠢᠰᠷᠧᠯᠴᠦᠳ ᠲᠦ ᠮᠢᠨᠦ ᠭᠡᠷᠡᠴᠢ ᠪᠣᠯᠣᠨᠠ᠃ 20 ᠪᠢ ᠡᠴᠢᠭᠡ ᠡᠪᠦᠭᠡᠳ ᠲᠤᠨᠢ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠶᠣᠰᠣᠭᠠᠷ ᠢᠶᠠᠨ ᠲᠡᠳᠡᠨ ᠢ ᠰᠦ᠋᠂ ᠪᠠᠯ ᠢᠶᠠᠷ ᠪᠢᠯᠬᠠᠭᠰᠠᠨ ᠨᠤᠲᠤᠭ ᠲᠤ ᠠᠪᠠᠴᠢᠪᠠᠯ᠂ ᠲᠡᠳᠡ ᠴᠠᠳᠲᠠᠯᠠ ᠢᠳᠡᠵᠦ ᠲᠠᠷᠭᠤᠯᠠᠭᠠᠳ ᠥᠭᠡᠷᠡ ᠪᠤᠷᠬᠠᠳ ᠤᠷᠤᠭᠤ ᠡᠷᠭᠢᠵᠦ᠂ ᠲᠡᠳᠡᠨ ᠳᠦ ᠵᠠᠷᠤᠭᠳᠠᠬᠤ ᠪᠣᠯᠣᠨᠠ᠃ ᠲᠡᠳᠡ ᠨᠠᠮᠠᠶᠢ ᠣᠭᠣᠷᠴᠤ ᠭᠡᠷᠡ ᠶᠢ ᠮᠢᠨᠢ ᠵᠥᠷᠢᠴᠡᠨᠡ᠃ 21 ᠲᠡᠭᠡᠭᠡᠳ ᠡᠯᠳᠡᠪ ᠦᠨ ᠵᠣᠪᠠᠯᠠᠩ ᠭᠠᠮᠰᠢᠭ ᠲᠤᠯᠭᠠᠷᠠᠬᠤ ᠦᠶᠡ ᠳᠦᠨᠢ ᠴᠤ ᠡᠨᠡ ᠳᠠᠭᠤᠤ ᠲᠡᠳᠡᠨ ᠦ ᠦᠷᠡ ᠤᠳᠤᠮ ᠤᠨ ᠬᠢᠨ ᠤ ᠠᠮᠠᠨ ᠠᠴᠠ ᠭᠡᠭᠡᠭᠳᠡᠭᠡ ᠦᠭᠡᠢ ᠪᠠᠢᠭᠰᠠᠭᠠᠷ ᠲᠡᠳᠡᠨ ᠳᠦ ᠭᠡᠷᠡᠴᠢ ᠪᠣᠯᠣᠨᠠ᠃ ᠲᠡᠳᠡᠨ ᠳᠦ ᠥᠭᠬᠦ ᠪᠡᠷ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠲᠡᠷᠡ ᠨᠤᠲᠤᠭ ᠲᠤ ᠠᠪᠠᠴᠢᠬᠤ ᠠᠴᠠ ᠪᠠᠨ ᠡᠮᠦᠨᠡ ᠥᠨᠥᠳᠥᠷ ᠴᠤ ᠪᠢ ᠲᠡᠳᠡᠨ ᠦ ᠶᠠᠭᠤ ᠪᠣᠳᠣᠵᠤ ᠪᠤᠢ ᠶᠢ ᠮᠡᠳᠡᠵᠦ ᠪᠠᠢᠨᠠ》 ᠭᠡᠯᠡ᠃ 22 ᠲᠡᠭᠡᠭᠡᠳ ᠮᠣᠰᠧ ᠡᠨᠡ ᠳᠠᠭᠤᠤ ᠶᠢ ᠲᠡᠷᠡ ᠡᠳᠦᠷ ᠲᠡᠭᠡᠨ ᠪᠢᠴᠢᠭᠡᠳ᠂ ᠢᠰᠷᠧᠯᠴᠦᠳ ᠲᠦ ᠵᠢᠭᠠᠵᠤ ᠥᠭᠴᠡᠢ᠃
23 ᠶᠣᠬᠣᠸᠠ ᠨᠦᠨ ᠦ ᠬᠦᠦ ᠶᠣᠱᠦ᠋ᠶᠠ ᠳᠤ ᠲᠤᠰᠢᠶᠠᠯ ᠥᠭᠴᠦ᠄ 《ᠴᠢ ᠲᠤᠤᠱᠲᠠᠢ ᠪᠥᠭᠡᠳ ᠵᠣᠷᠢᠭᠲᠠᠢ ᠪᠠᠢ᠃ ᠮᠢᠨᠦ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠭᠠᠵᠠᠷ ᠲᠤ ᠢᠰᠷᠧᠯᠴᠦᠳ ᠢ ᠣᠷᠣᠭᠤᠯᠬᠤ ᠬᠥᠮᠦᠨ ᠨᠢ ᠴᠢ ᠮᠥᠨ᠃ ᠪᠢ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠨᠠ》 ᠭᠡᠵᠡᠢ᠃
ᠮᠣᠰᠧ ᠶᠢᠨ ᠠᠩ᠋ᠬᠠᠷᠤᠭᠤᠯᠭᠠ
24 ᠮᠣᠰᠧ ᠡᠨᠡ ᠬᠠᠤᠯᠢ ᠶᠢᠨ ᠦᠭᠡᠰ ᠢ ᠨᠣᠮ ᠳᠤ ᠪᠦᠷᠢᠨ ᠪᠢᠴᠢᠵᠦ ᠳᠠᠭᠤᠰᠤᠭᠰᠠᠨ ᠤ ᠪᠠᠨ ᠳᠠᠷᠠᠭᠠ᠂ 25 ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠵᠥᠭᠡᠭᠡᠳᠡᠭ ᠯᠧᠸᠢᠴᠦᠳ ᠲᠦ ᠵᠠᠬᠢᠨ᠄ 26 《ᠡᠨᠡ ᠬᠠᠤᠯᠢ ᠶᠢᠨ ᠨᠣᠮ ᠢ ᠠᠪᠤᠭᠠᠳ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢᠨ ᠬᠠᠵᠠᠭᠤ ᠳᠤ ᠲᠠᠯᠪᠢᠵᠤ᠂ ᠥᠪᠡᠷᠰᠡᠳ ᠦᠨ ᠢᠶᠠᠨ ᠭᠡᠷᠡᠴᠢ ᠪᠣᠯᠭᠠᠨ ᠲᠡᠨᠳᠡ ᠪᠠᠢᠯᠭᠠ᠃ 27 ᠲᠠ ᠨᠠᠷ ᠤᠨ ᠲᠡᠷᠰᠯᠡᠭᠦᠦ᠂ ᠵᠥᠷᠢᠭᠦᠳ ᠵᠠᠩ ᠢ ᠪᠢ ᠮᠡᠳᠡᠨᠡ᠃ ᠣᠳᠣ ᠪᠢ ᠠᠮᠢᠳᠤ᠂ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠬᠤ ᠳᠤ ᠴᠤ ᠲᠠ ᠨᠠᠷ ᠶᠣᠬᠣᠸᠠ ᠶᠢᠨ ᠡᠰᠡᠷᠭᠦ ᠲᠡᠷᠰᠯᠡᠵᠦ ᠪᠠᠢᠭᠠ ᠪᠢᠯᠡ᠃ ᠪᠢ ᠦᠬᠦᠭᠰᠡᠨ ᠦ ᠳᠠᠷᠠᠭᠠ ᠨᠡᠩ ᠶᠠᠭᠠᠬᠢᠬᠤ ᠪᠣᠯ︖ 28 ᠣᠪᠣᠭ ᠤᠨ ᠢᠶᠠᠨ ᠪᠦᠬᠦ ᠠᠬᠠᠮᠠᠳ ᠪᠣᠯᠣᠨ ᠲᠦᠰᠢᠮᠡᠳ ᠢᠶᠡᠨ ᠮᠢᠨᠦ ᠡᠮᠦᠨᠡ ᠴᠤᠭᠯᠠᠭᠤᠯ᠃ ᠪᠢ ᠲᠩᠷᠢ ᠭᠠᠵᠠᠷ ᠢ ᠲᠡᠳᠡᠨ ᠦ ᠡᠰᠡᠷᠭᠦ ᠭᠡᠷᠡᠴᠢ ᠪᠠᠷ ᠳᠠᠭᠤᠳᠠᠭᠠᠳ ᠡᠳᠡᠭᠡᠷ ᠦᠭᠡ ᠶᠢ ᠲᠡᠳᠡᠨ ᠳᠦ ᠰᠣᠨᠣᠰᠬᠠᠶᠠ᠃ 29 ᠪᠢ ᠦᠬᠦᠭᠰᠡᠨ ᠦ ᠳᠠᠷᠠᠭᠠ᠂ ᠲᠠ ᠨᠠᠷ ᠯᠠᠪᠲᠠᠢ ᠵᠠᠪᠬᠠᠢᠷᠠᠵᠤ᠂ ᠮᠢᠨᠦ ᠵᠠᠬᠢᠭᠰᠠᠨ ᠵᠠᠮ ᠠᠴᠠ ᠡᠷᠭᠢᠬᠦ ᠶᠢ ᠪᠢ ᠮᠡᠳᠡᠵᠦ ᠪᠠᠢᠨᠠ᠃ ᠲᠠ ᠨᠠᠷ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠳᠦ ᠮᠠᠭᠤ ᠶᠢ ᠦᠢᠯᠡᠳᠴᠦ᠂ ᠭᠠᠷ ᠤᠨ ᠢᠶᠠᠨ ᠦᠢᠯᠡᠰ ᠢᠶᠡᠷ ᠲᠡᠭᠦᠨ ᠢ ᠬᠢᠯᠢᠩᠨᠡᠭᠦᠯᠦᠭᠰᠡᠭᠡᠷ ᠬᠣᠵᠢᠮ ᠤᠨ ᠡᠳᠦᠷ ᠤᠳ ᠲᠤ ᠥᠪᠡᠷᠰᠡᠳ ᠲᠡᠭᠡᠨ ᠭᠠᠢ ᠭᠠᠮᠰᠢᠭ ᠠᠪᠴᠢᠷᠠᠨᠠ》 ᠭᠡᠪᠡ᠃
ᠮᠣᠰᠧ ᠶᠢᠨ ᠳᠠᠭᠤᠤ
30 ᠮᠣᠰᠧ ᠢᠰᠷᠧᠯ ᠤᠨ ᠪᠦᠬᠦ ᠴᠢᠭᠤᠯᠭᠠᠨ ᠳᠤ ᠡᠨᠡ ᠳᠠᠭᠤᠤ ᠶᠢᠨ ᠦᠭᠡ ᠶᠢ ᠳᠠᠭᠤᠰᠲᠠᠯᠠ ᠨᠢ ᠰᠣᠨᠣᠰᠬᠠᠪᠠ᠄