ᠱᠠᠰᠲᠢᠷ ᠤᠨ ᠳᠡᠳ᠋ ᠬᠣᠶᠠᠷ
ᠥᠷᠭᠥᠭᠡ ᠪᠠᠷᠢᠬᠤ ᠪᠡᠯᠡᠳᠬᠡᠯ
1 ᠰᠣᠯᠣᠮᠣᠨ ᠶᠣᠬᠣᠸᠠ ᠶᠢᠨ ᠨᠡᠷᠡ ᠠᠯᠳᠠᠷ ᠤᠨ ᠲᠥᠯᠥᠭᠡ ᠲᠡᠭᠦᠨ ᠦ ᠥᠷᠭᠥᠭᠡ ᠶᠢ᠂ ᠪᠠᠰᠠ ᠥᠪᠡᠷ ᠦᠨ ᠢᠶᠠᠨ ᠲᠥᠯᠥᠭᠡ ᠬᠠᠭᠠᠨ ᠤ ᠣᠷᠳᠣᠨ ᠪᠠᠷᠢᠬᠤ ᠪᠠᠷ ᠰᠢᠢᠳᠴᠡᠢ᠃ 2 ᠡᠭᠦᠨ ᠦ ᠲᠥᠯᠥᠭᠡ ᠰᠣᠯᠣᠮᠣᠨ ᠠᠴᠢᠶᠠ ᠵᠥᠭᠡᠭᠡᠬᠦ ᠳᠣᠯᠣᠭᠠᠨ ᠲᠦᠮᠡᠨ ᠬᠥᠮᠦᠨ᠂ ᠠᠭᠤᠯᠠᠨ ᠠᠴᠠ ᠴᠢᠯᠠᠭᠤ ᠠᠪᠴᠢᠷᠠᠬᠤ ᠨᠠᠢ᠌ᠮᠠᠨ ᠲᠦᠮᠡᠨ ᠬᠥᠮᠦᠨ᠂ ᠲᠡᠳᠡᠨ ᠢ ᠬᠢᠨᠠᠬᠤ ᠭᠤᠷᠪᠠᠨ ᠮᠢᠩ᠋ᠭᠠ ᠵᠢᠷᠭᠤᠭᠠᠨ ᠵᠠᠭᠤᠨ ᠬᠥᠮᠦᠨ ᠢ ᠳᠠᠢᠴᠢᠯᠠᠪᠠ᠃
3 ᠲᠡᠭᠡᠭᠡᠳ ᠰᠣᠯᠣᠮᠣᠨ ᠲᠢᠷ ᠤᠨ ᠬᠠᠭᠠᠨ ᠾᠢᠷᠠᠮ ᠳᠤ ᠦᠭᠡ ᠢᠯᠡᠭᠡᠨ᠄ 《ᠲᠠ ᠮᠢᠨᠦ ᠡᠴᠢᠭᠡ ᠳ᠋ᠠᠸᠢᠳ᠋ ᠲᠤ ᠰᠠᠢᠨ ᠬᠠᠨᠳᠤᠵᠤ᠂ ᠰᠠᠭᠤᠬᠤ ᠣᠷᠳᠣᠨ ᠢᠶᠠᠨ ᠪᠠᠷᠢᠬᠤ ᠳᠤᠨᠢ ᠬᠤᠱᠢ ᠮᠣᠳᠣ ᠢᠯᠡᠭᠡᠭᠰᠡᠨ ᠪᠢᠯᠡ᠃ 4 ᠬᠠᠷᠠ᠂ ᠪᠢ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠨᠡᠷᠡ ᠶᠢᠨ ᠲᠥᠯᠥᠭᠡ ᠥᠷᠭᠥᠭᠡ ᠪᠠᠷᠢᠵᠤ ᠲᠡᠭᠦᠨ ᠳᠦ ᠵᠣᠷᠢᠭᠤᠯᠬᠤ ᠭᠡᠵᠦ ᠪᠠᠢᠨᠠ᠃ ᠢᠩᠭᠢᠭᠡᠳ ᠪᠢ ᠲᠡᠨᠳᠡ ᠲᠡᠭᠦᠨ ᠦ ᠡᠮᠦᠨᠡ ᠠᠩᠬᠢᠯᠤᠭᠤᠨ ᠤᠲᠤᠯᠭᠠ ᠤᠭᠤᠭᠢᠭᠤᠯᠵᠤ᠂ ᠲᠠᠪᠢᠭ ᠪᠣᠣᠪᠣ ᠲᠠᠯᠪᠢᠨ ᠥᠷᠯᠥᠭᠡ ᠣᠷᠣᠶ᠂ ᠠᠮᠠᠷᠠᠯ ᠤᠨ ᠡᠳᠦᠷ᠂ ᠰᠢᠨᠡ ᠰᠠᠷᠠ᠂ ᠮᠥᠨ ᠪᠢᠳᠡᠨ ᠦ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠪᠠᠶᠠᠷ ᠢᠶᠠᠷ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠡᠷᠭᠦᠬᠦ ᠪᠠ ᠡᠨᠡ ᠨᠢ ᠢᠰᠷᠧᠯ ᠳᠤ ᠡᠭᠦᠷᠢᠳᠡ ᠪᠠᠢᠬᠤ ᠪᠣᠯᠣᠨᠠ᠃ 5 ᠪᠢᠳᠡᠨ ᠦ ᠪᠤᠷᠬᠠᠨ ᠪᠤᠰᠤᠳ ᠪᠤᠷᠬᠠᠳ ᠠᠴᠠ ᠠᠤᠭᠠ ᠤᠴᠢᠷ ᠠᠴᠠ ᠮᠢᠨᠦ ᠪᠠᠷᠢᠬᠤ ᠥᠷᠭᠥᠭᠡ ᠠᠤᠭᠠ ᠪᠠᠢᠬᠤ ᠤᠴᠢᠷᠲᠠᠢ᠃ 6 ᠭᠡᠪᠡᠴᠦ ᠲᠩᠷᠢ ᠴᠤ᠂ ᠬᠠᠮᠤᠭ ᠤᠨ ᠳᠡᠭᠡᠳᠦ ᠲᠩᠷᠢ ᠴᠤ ᠲᠡᠭᠦᠨ ᠢ ᠪᠠᠭᠲᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠲᠠᠯᠠ ᠬᠡᠨ ᠲᠡᠭᠦᠨ ᠳᠦ ᠵᠣᠷᠢᠭᠤᠯᠤᠨ ᠥᠷᠭᠥᠭᠡ ᠪᠠᠷᠢᠵᠤ ᠴᠢᠳᠠᠬᠤ ᠪᠢᠯᠡ︖ ᠪᠢ ᠬᠡᠨ ᠪᠣᠯᠴᠢᠬᠠᠭᠠᠳ ᠲᠡᠭᠦᠨ ᠳᠦ ᠵᠣᠷᠢᠭᠤᠯᠤᠨ ᠥᠷᠭᠥᠭᠡ ᠪᠠᠷᠢᠬᠤ ᠪᠣᠯᠪᠠ︖ ᠦᠨᠡᠨ ᠳᠡᠭᠡᠨ ᠪᠢ ᠲᠡᠭᠦᠨ ᠦ ᠡᠮᠦᠨᠡ ᠤᠲᠤᠯᠭᠠ ᠤᠭᠤᠭᠢᠭᠤᠯᠬᠤ ᠯᠠ ᠬᠤᠪᠢ ᠲᠠᠢ ᠶᠤᠮ᠃ 7 ᠣᠳᠣ ᠲᠠ ᠠᠯᠲᠠ᠂ ᠮᠥᠩᠭᠥ᠂ ᠬᠦᠷᠡᠯ᠂ ᠲᠡᠮᠦᠷ ᠪᠣᠯᠣᠨ ᠤᠯᠠᠭᠠᠨ᠂ ᠨᠢᠯ ᠶᠠᠭᠠᠨ᠂ ᠬᠦᠷᠡᠩ ᠤᠯᠠᠭᠠᠨ᠂ ᠴᠡᠩᠬᠡᠷ ᠤᠲᠠᠰᠤ ᠪᠠᠷ ᠤᠷᠠᠯᠠᠬᠤ ᠠᠪᠢᠶᠠᠰ ᠲᠠᠢ᠂ ᠪᠠᠰᠠ ᠰᠡᠢᠯᠪᠦᠷᠢ ᠳᠤ ᠮᠡᠷᠭᠡᠰᠢᠭᠰᠡᠨ ᠨᠢᠭᠡ ᠬᠥᠮᠦᠨ ᠢ ᠨᠠᠳᠠ ᠤᠷᠤᠭᠤ ᠢᠯᠡᠭᠡᠨᠡ ᠤᠤ︖ ᠲᠡᠷᠡ ᠬᠥᠮᠦᠨ ᠮᠢᠨᠦ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠪᠡᠯᠡᠳᠬᠡᠭᠰᠡᠨ ᠪᠢᠳᠡᠨ ᠦ ᠤᠷᠠᠴᠤᠳ ᠲᠠᠢ ᠬᠠᠮᠲᠤ ᠶᠦᠳᠠ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠳᠤ ᠠᠵᠢᠯᠯᠠᠬᠤ ᠪᠣᠯᠣᠨᠠ᠃ 8 ᠮᠥᠨ ᠯᠧᠪᠠᠨᠣᠨ ᠠᠴᠠ ᠨᠠᠳᠠ ᠤᠷᠤᠭᠤ ᠬᠤᠱᠢ᠂ ᠨᠠᠷᠠᠰᠤ᠂ ᠽᠠᠨᠳᠠᠨ ᠮᠣᠳᠣ ᠢᠯᠡᠭᠡᠨᠡ ᠤᠤ︖ ᠲᠠᠨ ᠤ ᠵᠠᠷᠤᠴᠠ ᠨᠠᠷ ᠯᠧᠪᠠᠨᠣᠨ ᠤ ᠮᠣᠳᠣᠳ ᠢ ᠣᠭᠲᠣᠯᠬᠤ ᠳᠤ ᠮᠡᠷᠭᠡᠰᠢᠭᠰᠡᠨ ᠭᠡᠳᠡᠭ ᠢ ᠪᠢ ᠮᠡᠳᠡᠨᠡ᠂ ᠮᠢᠨᠦ ᠵᠠᠷᠤᠴᠠ ᠨᠠᠷ ᠴᠤ ᠲᠠᠨ ᠤ ᠵᠠᠷᠤᠴᠠ ᠨᠠᠷ ᠲᠠᠢ ᠬᠠᠮᠲᠤ ᠠᠵᠢᠯᠯᠠᠵᠤ 9 ᠮᠢᠨᠦ ᠲᠥᠯᠥᠭᠡ ᠶᠡᠬᠡ ᠬᠡᠮᠵᠢᠶᠡᠨ ᠦ ᠮᠣᠳᠣ ᠪᠡᠯᠡᠳᠬᠡᠨᠡ᠂ ᠮᠢᠨᠦ ᠪᠠᠷᠢᠬᠤ ᠭᠡᠵᠦ ᠪᠤᠢ ᠥᠷᠭᠥᠭᠡ ᠰᠦᠷᠯᠢᠭ ᠰᠠᠢᠬᠠᠨ ᠪᠠᠢᠬᠤ ᠤᠴᠢᠷᠲᠠᠢ᠃ 10 ᠬᠠᠷᠠ᠂ ᠮᠣᠳᠣ ᠪᠡᠯᠡᠳᠬᠡᠬᠦ ᠮᠣᠳᠣᠴᠢᠨ ᠵᠠᠷᠤᠴᠠ ᠨᠠᠷ ᠲᠤ ᠴᠢᠨᠢ ᠪᠢ ᠲᠡᠭᠡᠷᠮᠡᠳᠡᠭᠰᠡᠨ ᠪᠤᠭᠤᠳᠠᠢ ᠬᠣᠶᠠᠷ ᠲᠦᠮᠡᠨ ᠺᠣᠷ 6 ᠂ ᠠᠷᠪᠠᠢ ᠬᠣᠶᠠᠷ ᠲᠦᠮᠡᠨ ᠺᠣᠷ᠂ ᠳᠠᠷᠠᠰᠤ ᠳᠥᠷᠪᠡᠨ ᠵᠠᠭᠤ ᠵᠢᠷᠠᠨ ᠪᠠᠲ 7 ᠂ ᠴᠢᠳᠦᠨ ᠲᠣᠰᠣ ᠳᠥᠷᠪᠡᠨ ᠵᠠᠭᠤ ᠵᠢᠷᠠᠨ ᠪᠠᠲ ᠥᠭᠭᠥᠨᠡ》 ᠭᠡᠪᠡ᠃
11 ᠲᠢᠷ ᠤᠨ ᠬᠠᠭᠠᠨ ᠾᠢᠷᠠᠮ ᠰᠣᠯᠣᠮᠣᠨ ᠳᠤ ᠬᠠᠷᠢᠭᠤ ᠵᠠᠬᠢᠳᠠᠯ ᠢᠯᠡᠭᠡᠨ᠄ 《ᠶᠣᠬᠣᠸᠠ ᠠᠷᠠᠳ ᠲᠦᠮᠡᠨ ᠢᠶᠡᠨ ᠬᠠᠢᠷᠠᠯᠠᠳᠠᠭ ᠤᠴᠢᠷ ᠠᠴᠠ ᠲᠠᠨ ᠢ ᠲᠡᠳᠡᠨ ᠦ ᠬᠠᠭᠠᠨ ᠪᠣᠯᠭᠠᠵᠠᠢ》 ᠭᠡᠪᠡ᠃ 12 ᠾᠢᠷᠠᠮ ᠴᠢᠨᠠᠭᠰᠢ ᠨᠢ᠄ 《ᠲᠩᠷᠢ ᠭᠠᠵᠠᠷ ᠢ ᠪᠦᠲᠦᠭᠡᠭᠰᠡᠨ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠮᠠᠭᠲᠠᠭᠳᠠᠬᠤ ᠪᠣᠯᠲᠤᠭᠠᠢ᠃ ᠶᠣᠬᠣᠸᠠ ᠳ᠋ᠠᠸᠢᠳ᠋ ᠬᠠᠭᠠᠨ ᠳᠤ ᠤᠬᠠᠭᠠᠨ ᠲᠠᠢ ᠮᠡᠷᠭᠡᠨ ᠬᠦᠦ ᠶᠢ ᠵᠠᠶᠠᠭᠠᠭᠰᠠᠨ ᠢᠶᠠᠷ ᠲᠡᠷᠡ ᠶᠣᠬᠣᠸᠠ ᠶᠢᠨ ᠲᠥᠯᠥᠭᠡ ᠥᠷᠭᠥᠭᠡ ᠪᠠᠷᠢᠵᠤ᠂ ᠥᠪᠡᠷ ᠦᠨ ᠢᠶᠠᠨ ᠲᠥᠯᠥᠭᠡ ᠣᠷᠳᠣᠨ ᠪᠠᠷᠢᠭᠤᠯᠬᠤ ᠪᠣᠯᠵᠠᠢ᠃
13 ᠣᠳᠣ ᠪᠢ ᠰᠡᠷᠭᠦᠯᠡᠩ᠂ ᠠᠪᠢᠶᠠᠰ ᠲᠠᠢ ᠾᠦᠷᠠᠮ ᠠᠪᠢ ᠭᠡᠳᠡᠭ ᠬᠥᠮᠦᠨ ᠢ ᠢᠯᠡᠭᠡᠶᠡ᠃ 14 ᠡᠬᠡ ᠨᠢ ᠳ᠋ᠠᠨ ᠬᠥᠮᠦᠨ᠂ ᠡᠴᠢᠭᠡ ᠨᠢ ᠲᠢᠷ ᠬᠥᠮᠦᠨ ᠶᠤᠮ᠃ ᠲᠡᠷᠡ ᠬᠥᠮᠦᠨ ᠠᠯᠲᠠ᠂ ᠮᠥᠩᠭᠥ᠂ ᠬᠦᠷᠡᠯ᠂ ᠲᠡᠮᠦᠷ᠂ ᠴᠢᠯᠠᠭᠤ᠂ ᠮᠣᠳᠣ ᠪᠣᠯᠣᠨ ᠨᠢᠯ ᠶᠠᠭᠠᠨ᠂ ᠴᠡᠩᠬᠡᠷ᠂ ᠬᠦᠷᠡᠩ ᠤᠯᠠᠭᠠᠨ ᠤᠲᠠᠰᠤ ᠪᠣᠯᠣᠨ ᠮᠠᠭᠠᠯᠢᠩ᠋ᠭᠤ ᠪᠠᠷ ᠤᠷᠠᠯᠠᠬᠤ ᠪᠠ ᠶᠠᠩᠵᠤ ᠪᠦᠷᠢ ᠶᠢᠨ ᠰᠡᠢᠯᠪᠦᠷᠢ ᠶᠢᠨ ᠠᠵᠢᠯ ᠳᠤ ᠮᠡᠷᠭᠡᠰᠢᠭᠰᠡᠨ ᠪᠥᠭᠡᠳ ᠥᠪᠡᠷ ᠲᠤᠨᠢ ᠳᠠᠭᠠᠭᠠᠯᠭᠠᠭᠰᠠᠨ ᠶᠠᠮᠠᠷ ᠴᠤ ᠵᠠᠭᠪᠤᠷ ᠢ ᠬᠢᠵᠦ ᠴᠢᠳᠠᠨᠠ᠃ ᠲᠡᠭᠦᠨ ᠢ ᠲᠠ ᠥᠪᠡᠷ ᠦᠨ ᠤᠷᠠᠴᠤᠳ ᠪᠣᠯᠣᠨ ᠮᠢᠨᠦ ᠡᠵᠡᠨ᠂ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠤᠷᠠᠴᠤᠳ ᠲᠠᠢ ᠬᠠᠮᠲᠤ ᠠᠵᠢᠯᠯᠠᠭᠤᠯ᠃ 15 ᠣᠳᠣ ᠮᠢᠨᠦ ᠡᠵᠡᠨ ᠲᠠ ᠠᠮᠠᠯᠠᠭᠰᠠᠨ ᠢᠶᠠᠷ ᠢᠶᠠᠨ ᠪᠤᠭᠤᠳᠠᠢ᠂ ᠠᠷᠪᠠᠢ᠂ ᠲᠣᠰᠣ᠂ ᠳᠠᠷᠠᠰᠤ ᠶᠢ ᠥᠪᠡᠷ ᠦᠨ ᠵᠠᠷᠤᠴᠠ ᠨᠠᠷ ᠲᠠᠭᠠᠨ ᠢᠯᠡᠭᠡᠨᠡ ᠤᠤ︖ 16 ᠪᠢᠳᠡ ᠲᠠᠨ ᠳᠤ ᠬᠡᠷᠡᠭ ᠲᠡᠢ ᠪᠦᠬᠦ ᠮᠣᠳᠣ ᠶᠢ ᠯᠧᠪᠠᠨᠣᠨ ᠠᠴᠠ ᠣᠭᠲᠣᠯᠵᠤ᠂ ᠲᠡᠳᠡᠭᠡᠷ ᠢᠶᠡᠷ ᠰᠠᠯ ᠬᠢᠵᠦ ᠲᠠᠩᠭᠢᠰ ᠢᠶᠠᠷ ᠬᠥᠪᠪᠥᠭᠦᠯᠦᠨ ᠶᠣᠫᠠ ᠳᠤ ᠬᠦᠷᠭᠡᠶᠡ᠂ ᠲᠡᠭᠡᠪᠡᠯ ᠲᠠ ᠶᠧᠷᠦ᠋ᠰᠠᠯᠧᠮ ᠥᠭᠡᠳᠡ ᠠᠪᠠᠴᠢᠭᠠᠷᠠᠢ》 ᠭᠡᠪᠡ᠃
17 ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠬᠢᠭᠰᠡᠨ ᠲᠣᠭᠠᠯᠠᠯᠭᠠ ᠶᠢᠨ ᠳᠠᠭᠠᠤ ᠰᠣᠯᠣᠮᠣᠨ ᠢᠰᠷᠧᠯ ᠤᠨ ᠨᠤᠲᠤᠭ ᠲᠤ ᠪᠠᠢᠭᠠ ᠬᠠᠷᠢ ᠬᠥᠮᠦᠰ ᠢ ᠪᠦᠭᠦᠳᠡ ᠶᠢ ᠲᠣᠭᠠᠯᠠᠵᠤ ᠦᠵᠡᠬᠦ ᠳᠦ᠂ ᠠᠷᠪᠠᠨ ᠲᠠᠪᠤᠨ ᠲᠦᠮᠡ ᠭᠤᠷᠪᠠᠨ ᠮᠢᠩ᠋ᠭᠠ ᠵᠢᠷᠭᠤᠭᠠᠨ ᠵᠠᠭᠤᠨ ᠬᠥᠮᠦᠨ ᠪᠠᠢᠭᠰᠠᠨ ᠲᠤᠯᠠ 18 ᠲᠡᠳᠡᠨ ᠦ ᠳᠣᠯᠣᠭᠠᠨ ᠲᠦᠮᠡ ᠶᠢ ᠨᠢ ᠠᠴᠢᠶᠠ ᠵᠥᠭᠡᠭᠡᠭᠴᠢ᠂ ᠨᠠᠢ᠌ᠮᠠᠨ ᠲᠦᠮᠡ ᠶᠢ ᠨᠢ ᠠᠭᠤᠯᠠᠨ ᠳᠤ ᠴᠢᠯᠠᠭᠤ ᠴᠠᠪᠴᠢᠭᠴᠢ᠂ ᠭᠤᠷᠪᠠᠨ ᠮᠢᠩ᠋ᠭᠠ ᠵᠢᠷᠭᠤᠭᠠᠨ ᠵᠠᠭᠤ ᠶᠢ ᠨᠢ ᠡᠳᠡᠭᠡᠷ ᠬᠥᠮᠦᠰ ᠦᠨ ᠠᠵᠢᠯ ᠢ ᠬᠢᠨᠠᠭᠴᠢ ᠪᠠᠷ ᠲᠣᠮᠢᠯᠠᠭᠰᠠᠨ ᠪᠠᠢᠨᠠ᠃