ᠱᠠᠰᠲᠢᠷ ᠤᠨ ᠳᠡᠳ᠋ ᠭᠤᠴᠢᠨ ᠳᠥᠷᠪᠡ
ᠶᠣᠰᠢᠶᠠ ᠶᠢᠨ ᠰᠢᠨᠡᠴᠢᠯᠡᠯᠲᠡ
1 ᠶᠣᠰᠢᠶᠠ ᠨᠠᠢ᠌ᠮᠠᠨ ᠨᠠᠰᠤᠲᠠᠢ ᠳᠠᠭᠠᠨ ᠬᠠᠭᠠᠨ ᠪᠣᠯᠣᠭᠠᠳ ᠶᠧᠷᠦ᠋ᠰᠠᠯᠧᠮ ᠳᠤ ᠭᠤᠴᠢᠨ ᠨᠢᠭᠡᠨ ᠵᠢᠯ ᠬᠠᠭᠠᠨᠴᠢᠯᠠᠪᠠ᠃ 2 ᠶᠣᠰᠢᠶᠠ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠳᠦ ᠵᠥᠪ ᠢ ᠦᠢᠯᠡᠳᠦᠨ᠂ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠬᠠᠵᠠᠢᠯ ᠦᠭᠡᠢ᠂ ᠡᠪᠦᠭᠡ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠵᠠᠮ ᠢᠶᠠᠷ ᠠᠯᠬᠤᠭᠰᠠᠨ ᠶᠤᠮ᠃ 3 ᠲᠡᠷᠡ ᠪᠡᠷ ᠪᠠᠭᠠ ᠠᠴᠠ ᠪᠠᠨ᠂ ᠬᠠᠭᠠᠨ ᠪᠣᠯᠣᠭᠰᠠᠨ ᠨᠠᠢ᠌ᠮᠠᠳᠠᠬᠢ ᠵᠢᠯ ᠡᠴᠡ ᠪᠡᠨ ᠡᠬᠢᠯᠡᠨ ᠡᠪᠦᠭᠡ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠪᠤᠷᠬᠠᠨ ᠢ ᠬᠠᠢᠵᠤ᠂ ᠠᠷᠪᠠᠨ ᠬᠣᠶᠠᠳᠠᠬᠢ ᠵᠢᠯ ᠡᠴᠡ ᠪᠡᠨ ᠡᠬᠢᠯᠡᠨ ᠶᠦᠳᠠ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠢ ᠮᠥᠷᠭᠥᠯ ᠦᠨ ᠮᠠᠨᠳᠠᠯ ᠤᠳ᠂ ᠠᠱᠧᠷᠠ ᠶᠢᠨ ᠱᠣᠩ ᠤᠳ᠂ ᠰᠡᠢᠯᠦᠮᠡᠯ ᠪᠤᠶᠤ ᠴᠢᠳᠬᠤᠮᠠᠯ ᠬᠥᠷᠥᠭ ᠤᠳ ᠠᠴᠠ ᠴᠡᠪᠡᠷᠰᠢᠭᠦᠯᠦᠭᠰᠡᠨ ᠶᠤᠮ᠃ 4 ᠬᠥᠮᠦᠰ ᠲᠡᠭᠦᠨ ᠦ ᠡᠮᠦᠨᠡ ᠪᠠᠯ ᠤᠨ ᠲᠠᠬᠢᠯ ᠤᠨ ᠰᠢᠷᠡᠭᠡ ᠨᠦᠭᠦᠳ ᠢ ᠨᠤᠷᠠᠭᠠᠬᠤ ᠳᠤ᠂ ᠲᠡᠷᠡ ᠪᠡᠷ ᠳᠡᠭᠡᠷᠡ ᠨᠢ ᠪᠠᠢᠷᠢᠯᠠᠭᠤᠯᠤᠭᠰᠠᠨ ᠤᠲᠤᠯᠭᠠ ᠶᠢᠨ ᠲᠠᠬᠢᠯ ᠤᠨ ᠰᠢᠷᠡᠭᠡ ᠨᠦᠭᠦᠳ ᠢ ᠴᠠᠪᠴᠢᠭᠤᠯᠵᠤ᠂ ᠪᠠᠰᠠ ᠠᠱᠧᠷᠠ ᠶᠢᠨ ᠱᠣᠩ ᠤᠳ᠂ ᠰᠡᠢᠯᠦᠮᠡᠯ ᠪᠤᠶᠤ ᠴᠢᠳᠬᠤᠮᠠᠯ ᠬᠥᠷᠥᠭ ᠤᠳ ᠤᠨ ᠬᠠᠮᠲᠤ ᠪᠤᠲᠠᠯᠤᠭᠠᠳ᠂ ᠨᠤᠨᠲᠠᠭ ᠪᠣᠯᠭᠠᠵᠤ ᠲᠡᠳᠡᠭᠡᠷ ᠲᠦ ᠲᠠᠬᠢᠯ ᠡᠷᠭᠦᠵᠦ ᠪᠠᠢᠭᠰᠠᠨ ᠬᠥᠮᠦᠰ ᠦᠨ ᠪᠤᠯᠠᠰᠢᠨ ᠳᠡᠭᠡᠭᠦᠷ ᠰᠠᠴᠤᠪᠠ᠃ 5 ᠲᠡᠭᠡᠭᠡᠳ ᠲᠡᠷᠡ ᠪᠡᠷ ᠲᠠᠬᠢᠯᠴᠢᠳ ᠤᠨ ᠶᠠᠰᠤ ᠶᠢ ᠲᠠᠬᠢᠯ ᠤᠨ ᠰᠢᠷᠡᠭᠡ ᠨᠦᠭᠦᠳ ᠳᠡᠭᠡᠷᠡ ᠨᠢ ᠰᠢᠲᠠᠭᠠᠵᠤ᠂ ᠶᠦᠳᠠ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠢ ᠴᠡᠪᠡᠷᠰᠢᠭᠦᠯᠪᠡ᠃ 6 ᠮᠠᠨᠠᠰᠧ᠂ ᠡᠹᠷᠠᠢᠮ᠂ ᠰᠢᠮᠧᠶᠣᠨ ᠪᠣᠯᠣᠨ ᠨᠠᠹᠲ᠋ᠠᠯᠢ ᠶᠢᠨ ᠬᠣᠲᠠ ᠨᠤᠭᠤᠳ ᠲᠤ᠂ ᠮᠥᠨ ᠡᠷᠭᠢᠨ ᠲᠣᠭᠣᠷᠢᠨ ᠤ ᠬᠢᠨᠢ ᠪᠠᠯᠭᠠᠰᠤ ᠨᠤᠭᠤᠳ ᠲᠤ ᠴᠤ 7 ᠲᠡᠷᠡ ᠲᠠᠬᠢᠯ ᠤᠨ ᠰᠢᠷᠡᠭᠡ ᠨᠦᠭᠦᠳ ᠢ ᠨᠤᠷᠠᠭᠠᠵᠤ᠂ ᠠᠱᠧᠷᠠ ᠶᠢᠨ ᠱᠣᠩ ᠤᠳ ᠪᠣᠯᠣᠨ ᠰᠡᠢᠯᠦᠮᠡᠯ ᠰᠢᠲᠦᠭᠡᠨ ᠨᠦᠭᠦᠳ ᠢ ᠬᠡᠮᠬᠡᠴᠢᠵᠦ᠂ ᠪᠦᠬᠦ ᠢᠰᠷᠧᠯ ᠳᠠᠬᠢ ᠤᠲᠤᠯᠭᠠ ᠶᠢᠨ ᠲᠠᠬᠢᠯ ᠤᠨ ᠰᠢᠷᠡᠭᠡ ᠨᠦᠭᠦᠳ ᠢ ᠴᠠᠪᠴᠢᠵᠤ ᠬᠠᠶᠠᠭᠠᠳ ᠶᠧᠷᠦ᠋ᠰᠠᠯᠧᠮ ᠤᠷᠤᠭᠤ ᠪᠤᠴᠠᠪᠠ᠃
8 ᠶᠣᠰᠢᠶᠠ ᠭᠠᠵᠠᠷ ᠨᠤᠲᠤᠭ ᠪᠣᠯᠣᠨ ᠥᠷᠭᠥᠭᠡ ᠶᠢ ᠴᠡᠪᠡᠷᠰᠢᠭᠦᠯᠦᠭᠰᠡᠨ ᠦ ᠳᠠᠷᠠᠭᠠ᠂ ᠬᠠᠭᠠᠨᠴᠢᠯᠠᠯ ᠤᠨ ᠢᠶᠠᠨ ᠠᠷᠪᠠᠨ ᠨᠠᠢ᠌ᠮᠠᠳᠤᠭᠠᠷ ᠵᠢᠯ ᠳᠤ ᠥᠪᠡᠷ ᠦᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠶᠢ ᠵᠠᠰᠠᠪᠤᠷᠢᠯᠠᠭᠤᠯᠬᠤ ᠪᠠᠷ ᠠᠽᠠᠯᠢᠶᠠ ᠶᠢᠨ ᠬᠦᠦ ᠱᠠᠹᠠᠨ᠂ ᠬᠣᠲᠠ ᠶᠢᠨ ᠵᠠᠬᠢᠷᠤᠭᠴᠢ ᠮᠠᠶᠠᠰᠧᠶᠠ᠂ ᠰᠤᠳᠤᠷᠴᠢ ᠶᠣᠶᠠᠬᠠᠽ ᠤᠨ ᠬᠦᠦ ᠶᠣᠶᠠ ᠨᠠᠷ ᠢ ᠢᠯᠡᠭᠡᠪᠡ᠃ 9 ᠲᠡᠳᠡ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠾᠢᠯᠺᠢᠶᠠ ᠳᠡᠭᠡᠷᠡ ᠣᠴᠢᠭᠠᠳ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠳᠦ ᠠᠷᠠᠳ ᠲᠦᠮᠡᠨ ᠦ ᠠᠪᠴᠢᠷᠠᠭᠰᠠᠨ ᠮᠥᠩᠭᠥ ᠶᠢ ᠲᠤᠰᠢᠶᠠᠵᠠᠢ᠃ ᠬᠠᠭᠠᠯᠭᠠᠴᠢ ᠯᠧᠸᠢᠴᠦᠳ ᠲᠡᠳᠡᠭᠡᠷ ᠡᠷᠭᠦᠯ ᠢ ᠮᠠᠨᠠᠰᠧ᠂ ᠡᠹᠷᠠᠢᠮ ᠵᠡᠷᠭᠡ ᠢᠰᠷᠧᠯ ᠤᠨ ᠦᠯᠡᠳᠡᠭᠰᠡᠳ ᠪᠦᠭᠦᠳᠡ ᠡᠴᠡ᠂ ᠮᠥᠨ ᠪᠦᠬᠦ ᠶᠦᠳᠠ᠂ ᠪᠢᠨᠶᠠᠮᠢᠨ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠠᠴᠠ ᠴᠤᠭᠯᠠᠭᠤᠯᠤᠭᠰᠠᠨ ᠪᠠᠢᠪᠠ᠃ 10 ᠲᠡᠷᠡ ᠮᠥᠩᠭᠥ ᠶᠢ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠶᠢᠨ ᠬᠠᠷᠠᠭᠠᠯᠵᠠᠭᠴᠢᠳ ᠤᠨ ᠭᠠᠷ ᠲᠤ ᠲᠤᠰᠢᠶᠠᠭᠰᠠᠨ ᠳᠤ᠂ ᠲᠡᠳᠡ ᠲᠡᠭᠦᠨ ᠢ ᠠᠵᠢᠯᠴᠢᠳ ᠲᠤ ᠥᠭᠴᠦ᠂ ᠥᠷᠭᠥᠭᠡ ᠶᠢ ᠰᠡᠷᠭᠦᠭᠡᠵᠦ ᠵᠠᠰᠠᠪᠤᠷᠢᠯᠠᠭᠤᠯᠬᠤ ᠳᠤ ᠬᠡᠷᠡᠭᠯᠡᠪᠡ᠃ 11 ᠲᠡᠳᠡ ᠲᠡᠭᠦᠨ ᠢ ᠮᠣᠳᠣᠨ ᠳᠠᠷᠬᠠᠳ᠂ ᠪᠠᠷᠢᠯᠭᠠᠴᠢᠳ ᠲᠤ ᠥᠭᠴᠦ ᠵᠠᠰᠠᠭᠰᠠᠨ ᠴᠢᠯᠠᠭᠤ᠂ ᠬᠥᠨᠳᠡᠯᠡᠪᠴᠢ ᠮᠣᠳᠣ᠂ ᠨᠢᠷᠤᠭᠤ ᠠᠪᠤᠭᠤᠯᠤᠨ᠂ ᠶᠦᠳᠠ ᠶᠢᠨ ᠬᠠᠭᠠᠳ ᠤᠨ ᠪᠠᠯᠭᠠᠰᠤ ᠪᠣᠯᠭᠠᠨ ᠣᠷᠬᠢᠭᠰᠠᠨ ᠥᠷᠭᠥᠭᠡ ᠶᠢ ᠵᠠᠰᠠᠪᠤᠷᠢᠯᠠᠭᠤᠯᠵᠠᠢ᠃ 12 ᠬᠥᠮᠦᠰ ᠠᠵᠢᠯ ᠢᠶᠠᠨ ᠢᠲᠡᠭᠡᠮᠵᠢᠲᠠᠢ ᠪᠠᠷ ᠬᠢᠪᠡ᠃ ᠲᠡᠳᠡᠨ ᠢ ᠬᠢᠨᠠᠵᠤ ᠪᠠᠢᠭᠰᠠᠨ ᠳᠠᠭᠠᠭᠠᠮᠠᠯ ᠤᠳ ᠨᠢ ᠮᠧᠷᠠᠷᠢ ᠶᠢᠨ ᠦᠷᠡ ᠤᠳᠤᠮ ᠪᠣᠯᠬᠤ ᠶᠠᠬᠠᠲ᠂ ᠣᠪᠠᠳᠢᠶᠠ ᠨᠠᠷ ᠪᠠ ᠺᠣᠬᠠᠲ ᠤᠨ ᠦᠷᠡ ᠤᠳᠤᠮ ᠪᠣᠯᠬᠤ ᠽᠧᠺᠠᠷᠢᠶᠠ᠂ ᠮᠧᠱᠦ᠋ᠯᠠᠮ ᠵᠡᠷᠭᠡ ᠯᠧᠸᠢᠴᠦᠳ ᠪᠠᠢᠯᠠ᠃ ᠲᠡᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠬᠥᠭᠵᠢᠮ ᠳᠤ ᠮᠡᠷᠭᠡᠰᠢᠭᠰᠡᠨ ᠯᠧᠸᠢᠴᠦᠳ ᠪᠠᠢᠪᠠ᠃ 13 ᠲᠡᠳᠡ ᠠᠴᠢᠶᠠ ᠵᠥᠭᠡᠭᠡᠭᠴᠢᠳ ᠢ ᠬᠠᠷᠠᠭᠠᠯᠵᠠᠵᠤ᠂ ᠲᠥᠷᠥᠯ ᠪᠦᠷᠢ ᠶᠢᠨ ᠠᠵᠢᠯᠴᠢᠳ ᠢ ᠬᠢᠨᠠᠵᠤ ᠪᠠᠢᠪᠠ᠃ ᠵᠠᠷᠢᠮ ᠯᠧᠸᠢᠴᠦᠳ ᠨᠢ ᠪᠢᠴᠢᠭᠡᠴᠢ᠂ ᠲᠦᠰᠢᠮᠡᠯ ᠪᠣᠯᠣᠨ ᠬᠠᠭᠠᠯᠭᠠᠴᠢ ᠪᠣᠯᠪᠠ᠃
14 ᠲᠠᠬᠢᠯᠴᠢ ᠾᠢᠯᠺᠢᠶᠠ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠦ ᠬᠥᠮᠦᠰ ᠦᠨ ᠬᠠᠨᠳᠢᠪᠯᠠᠭᠰᠠᠨ ᠮᠥᠩᠭᠥ ᠶᠢ ᠭᠠᠷᠭᠠᠬᠤ ᠳᠠᠭᠠᠨ ᠮᠣᠰᠧ ᠪᠠᠷ ᠳᠠᠮᠵᠢᠭᠤᠯᠤᠭᠰᠠᠨ ᠶᠣᠬᠣᠸᠠ ᠶᠢᠨ ᠬᠠᠤᠯᠢ ᠶᠢᠨ ᠨᠣᠮ ᠢ ᠣᠯᠵᠤ᠂ 15 ᠪᠢᠴᠢᠭᠡᠴᠢ ᠱᠠᠹᠠᠨ ᠳᠤ᠄ 《ᠪᠢ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠡᠴᠡ ᠬᠠᠤᠯᠢ ᠶᠢᠨ ᠨᠣᠮ ᠣᠯᠣᠯᠠ》 ᠭᠡᠪᠡ᠃ ᠾᠢᠯᠺᠢᠶᠠ ᠲᠡᠷᠡ ᠨᠣᠮ ᠢ ᠱᠠᠹᠠᠨ ᠳᠤ ᠥᠭᠬᠦ ᠳᠦ᠂ 16 ᠱᠠᠹᠠᠨ ᠨᠣᠮ ᠢ ᠬᠠᠭᠠᠨ ᠳᠤ ᠠᠪᠴᠢᠷᠠᠵᠤ᠂ ᠲᠡᠭᠦᠨ ᠳᠦ ᠦᠭᠡ ᠤᠯᠠᠮᠵᠢᠯᠠᠨ᠄ 《ᠲᠠᠨ ᠤ ᠵᠠᠷᠤᠴᠠ ᠨᠠᠷ ᠬᠠᠷᠢᠭᠤᠴᠠᠭᠰᠠᠨ ᠪᠦᠬᠦᠨ ᠢᠶᠡᠨ ᠭᠦᠢᠴᠡᠳᠬᠡᠵᠦ ᠪᠠᠢᠭᠠ᠃ 17 ᠲᠡᠳᠡ ᠪᠠᠰᠠ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠦ ᠪᠠᠢᠭᠰᠠᠨ ᠮᠥᠩᠭᠥ ᠶᠢ ᠴᠤᠭᠯᠠᠭᠤᠯᠵᠤ᠂ ᠬᠠᠷᠠᠭᠠᠯᠵᠠᠭᠴᠢᠳ ᠪᠣᠯᠣᠨ ᠠᠵᠢᠯᠯᠠᠭᠴᠢᠳ ᠤᠨ ᠭᠠᠷ ᠲᠤ ᠲᠤᠰᠢᠶᠠᠯᠠ》 ᠭᠡᠪᠡ᠃ 18 ᠪᠢᠴᠢᠭᠡᠴᠢ ᠱᠠᠹᠠᠨ ᠪᠠᠰᠠ ᠬᠠᠭᠠᠨ ᠳᠤ᠄ 《ᠲᠠᠬᠢᠯᠴᠢ ᠾᠢᠯᠺᠢᠶᠠ ᠨᠠᠳᠠ ᠳᠤ ᠨᠢᠭᠡ ᠨᠣᠮ ᠥᠭᠭᠥᠭᠰᠡᠨ》 ᠭᠡᠪᠡ᠃ ᠱᠠᠹᠠᠨ ᠬᠠᠭᠠᠨ ᠳᠤ ᠨᠣᠮ ᠠᠴᠠ ᠤᠩ᠋ᠰᠢᠵᠤ ᠥᠭᠴᠡᠢ᠃
19 ᠬᠠᠭᠠᠨ ᠲᠡᠷᠡ ᠬᠠᠤᠯᠢ ᠶᠢᠨ ᠦᠭᠡᠰ ᠢ ᠰᠣᠨᠣᠰᠣᠭᠠᠳ ᠬᠤᠪᠴᠠᠰᠤ ᠪᠠᠨ ᠤᠷᠠᠪᠠ᠃ 20 ᠬᠠᠭᠠᠨ ᠾᠢᠯᠺᠢᠶᠠ ᠳᠤ᠂ ᠮᠥᠨ ᠱᠠᠹᠠᠨ ᠤ ᠬᠦᠦ ᠠᠾᠢᠺᠠᠮ᠂ ᠮᠢᠺᠠ ᠶᠢᠨ ᠬᠦᠦ ᠠᠪᠳᠣᠨ᠂ ᠪᠢᠴᠢᠭᠡᠴᠢ ᠱᠠᠹᠠᠨ ᠪᠣᠯᠣᠨ ᠬᠠᠭᠠᠨ ᠤ ᠵᠠᠷᠤᠴᠠ ᠠᠰᠠᠢᠶᠠ ᠨᠠᠷ ᠲᠤ ᠵᠠᠬᠢᠨ᠄ 21 《ᠣᠯᠳᠠᠭᠰᠠᠨ ᠡᠨᠡ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠦᠭᠡᠰ ᠦᠨ ᠲᠤᠬᠠᠢ ᠮᠢᠨᠦ ᠡᠮᠦᠨᠡ ᠡᠴᠡ᠂ ᠮᠥᠨ ᠢᠰᠷᠧᠯ ᠪᠣᠯᠣᠨ ᠶᠦᠳᠠ ᠳᠤ ᠦᠯᠡᠳᠡᠭᠰᠡᠳ ᠦᠨ ᠡᠮᠦᠨᠡ ᠡᠴᠡ ᠶᠣᠬᠣᠸᠠ ᠠᠴᠠ ᠠᠰᠠᠭᠤᠬᠤ ᠪᠠᠷ ᠲᠠ ᠨᠠᠷ ᠶᠠᠪᠤᠵᠠᠭᠠ᠃ ᠪᠢᠳᠡᠨ ᠦ ᠡᠴᠢᠭᠡ ᠡᠪᠦᠭᠡᠳ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠰᠠᠬᠢᠭᠰᠠᠨ ᠦᠭᠡᠢ᠂ ᠡᠨᠡ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠪᠦᠬᠦᠨ ᠢ ᠪᠡᠶᠡᠯᠡᠭᠦᠯᠦᠭᠡ ᠦᠭᠡᠢ ᠤᠴᠢᠷ ᠠᠴᠠ ᠪᠢᠳᠡᠨ ᠦ ᠳᠡᠭᠡᠷᠡ ᠶᠣᠬᠣᠸᠠ ᠶᠢᠨ ᠦᠯᠡᠮᠵᠢ ᠠᠭᠤᠷ ᠬᠢᠯᠢᠩ ᠠᠰᠬᠠᠭᠳᠠᠭᠰᠠᠨ ᠪᠠᠢᠨᠠ》 ᠭᠡᠪᠡ᠃
22 ᠾᠢᠯᠺᠢᠶᠠ ᠪᠣᠯᠣᠨ ᠬᠠᠭᠠᠨ ᠤ ᠢᠯᠡᠭᠡᠭᠰᠡᠨ ᠬᠥᠮᠦᠰ ᠱᠠᠯᠦ᠋ᠮ ᠤᠨ ᠡᠬᠡᠨᠡᠷ ᠡᠰᠢ ᠦᠵᠡᠭᠦᠯᠦᠭᠴᠢ ᠾᠦᠯᠳᠠ ᠤᠷᠤᠭᠤ ᠣᠴᠢᠪᠠ᠃ ᠱᠠᠯᠦ᠋ᠮ ᠪᠣᠯ ᠬᠠᠰᠷᠠ ᠶᠢᠨ ᠠᠴᠢ᠂ ᠲᠣᠺᠬᠠᠲ ᠤᠨ ᠬᠦᠦ ᠪᠠᠢᠵᠤ᠂ ᠣᠷᠳᠣᠨ ᠤ ᠬᠤᠪᠴᠠᠰᠤ ᠬᠤᠨᠠᠷ ᠢ ᠬᠠᠳᠠᠭᠠᠯᠠᠭᠴᠢ ᠪᠥᠭᠡᠳ ᠾᠦᠯᠳᠠ ᠶᠧᠷᠦ᠋ᠰᠠᠯᠧᠮ ᠤᠨ ᠬᠣᠶᠠᠳᠤᠭᠠᠷ ᠳᠡᠭᠦᠷᠭᠡ ᠳᠦ ᠰᠠᠭᠤᠳᠠᠭ ᠪᠠᠢᠪᠠ᠃ ᠲᠡᠳᠡ ᠲᠡᠭᠦᠨ ᠲᠡᠢ ᠶᠠᠷᠢᠯᠴᠠᠬᠤ ᠳᠤ᠂ 23 ᠾᠦᠯᠳᠠ ᠲᠡᠳᠡᠨ ᠳᠦ᠄ 《ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠂ ᠥᠪᠡᠷᠰᠡᠳ ᠢ ᠴᠢᠨᠢ ᠨᠠᠳᠠ ᠤᠷᠤᠭᠤ ᠢᠯᠡᠭᠡᠭᠰᠡᠨ ᠬᠥᠮᠦᠨ ᠳᠦ ᠬᠡᠯᠡᠵᠡᠭᠡ᠃ 24 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠬᠠᠷᠠ᠂ ᠪᠢ ᠡᠨᠡ ᠭᠠᠵᠠᠷ ᠪᠣᠯᠣᠨ ᠡ᠊ᠨᠳᠡᠬᠢ ᠶᠢᠨ ᠰᠠᠭᠤᠭᠠᠯᠢᠴᠢᠳ ᠳᠡᠭᠡᠷᠡ ᠭᠠᠢ ᠵᠣᠪᠠᠯᠠᠩ ᠠᠪᠴᠢᠷᠠᠵᠤ᠂ ᠶᠦᠳᠠ ᠶᠢᠨ ᠬᠠᠭᠠᠨ ᠤ ᠡᠮᠦᠨᠡ ᠲᠡᠳᠡᠨ ᠦ ᠤᠩ᠋ᠰᠢᠭᠰᠠᠨ ᠲᠡᠷᠡ ᠬᠦ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠪᠦᠬᠦᠨ ᠢ ᠪᠡᠶᠡᠯᠡᠭᠦᠯᠬᠦ ᠭᠡᠵᠦ ᠪᠠᠢᠨᠠ᠃ 25 ᠲᠡᠳᠡ ᠨᠠᠮᠠᠶᠢ ᠣᠷᠬᠢᠨ᠂ ᠥᠭᠡᠷᠡ ᠪᠤᠷᠬᠠᠳ ᠲᠤ ᠤᠲᠤᠯᠭᠠ ᠤᠭᠤᠭᠢᠭᠤᠯᠵᠤ᠂ ᠭᠠᠷ ᠢᠶᠠᠷ ᠢᠶᠠᠨ ᠬᠢᠭᠰᠡᠨ ᠪᠦᠬᠦᠨ ᠢᠶᠡᠷ ᠨᠠᠮᠠᠶᠢ ᠬᠢᠯᠢᠩᠨᠡᠭᠦᠯᠦᠭᠰᠡᠨ ᠤᠴᠢᠷ ᠠᠴᠠ ᠤᠨᠲᠠᠷᠠᠰᠢ ᠦᠭᠡᠢ ᠠᠭᠤᠷ ᠬᠢᠯᠢᠩ ᠮᠢᠨᠢ ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠠᠰᠬᠠᠭᠳᠠᠬᠤ ᠪᠣᠯᠣᠨᠠ᠃〉 26 ᠬᠠᠷᠢᠨ ᠶᠣᠬᠣᠸᠠ ᠠᠴᠠ ᠠᠰᠠᠭᠤᠯᠭᠠᠬᠤ ᠪᠠᠷ ᠥᠪᠡᠷᠰᠡᠳ ᠢ ᠴᠢᠨᠢ ᠢᠯᠡᠭᠡᠭᠰᠡᠨ ᠶᠦᠳᠠ ᠶᠢᠨ ᠬᠠᠭᠠᠨ ᠳᠤ ᠲᠠ ᠨᠠᠷ ᠡᠭᠦᠨ ᠢ ᠬᠡᠯᠡᠭᠲᠦᠨ᠄ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠴᠢᠨᠦ ᠰᠣᠨᠣᠰᠣᠭᠰᠠᠨ ᠦᠭᠡᠰ ᠦᠨ ᠲᠤᠬᠠᠢ ᠬᠡᠯᠡᠵᠦ ᠥᠭᠭᠥᠶᠡ᠂ 27 ᠡᠨᠡ ᠭᠠᠵᠠᠷ ᠪᠣᠯᠣᠨ ᠡ᠊ᠨᠳᠡᠬᠢ ᠶᠢᠨ ᠰᠠᠭᠤᠭᠠᠯᠢᠴᠢᠳ ᠤᠨ ᠬᠢᠨᠢ ᠲᠤᠬᠠᠢ ᠲᠡᠭᠦᠨ ᠦ ᠶᠠᠷᠢᠭᠰᠠᠨ ᠢ ᠴᠢ ᠰᠣᠨᠣᠰᠣᠭᠠᠳ ᠵᠢᠷᠦᠬᠡ ᠪᠡᠨ ᠵᠥᠭᠡᠯᠡᠷᠡᠭᠦᠯᠵᠦ᠂ ᠪᠤᠷᠬᠠᠨ ᠤ ᠡᠮᠦᠨᠡ ᠥᠪᠡᠷ ᠢ ᠪᠠᠨ ᠳᠠᠷᠤᠤ ᠪᠣᠯᠭᠠᠭᠰᠠᠨ ᠶᠤᠮ᠂ ᠲᠡᠢᠨ ᠬᠦ ᠴᠢ ᠮᠢᠨᠦ ᠡᠮᠦᠨᠡ ᠳᠠᠷᠤᠤ ᠪᠣᠯᠣᠭᠠᠳ ᠬᠤᠪᠴᠠᠰᠤ ᠪᠠᠨ ᠤᠷᠠᠵᠤ᠂ ᠤᠬᠢᠯᠠᠭᠰᠠᠨ ᠤᠴᠢᠷ ᠠᠴᠠ ᠪᠢ ᠴᠤ ᠴᠢᠨᠦᠬᠢ ᠶᠢ ᠰᠣᠨᠣᠰᠣᠯᠠ᠂〉 ᠶᠣᠬᠣᠸᠠ ᠶᠢᠨ ᠦᠭᠡ ᠡᠨᠡ ᠪᠠᠢᠨᠠ᠂ 28 ᠠᠩ᠋ᠬᠠᠷᠤᠭᠲᠤᠨ᠂ ᠪᠢ ᠴᠢᠮᠠ ᠶᠢ ᠡᠴᠢᠭᠡ ᠡᠪᠦᠭᠡᠳ ᠥᠭᠡᠳᠡ ᠴᠢᠨᠢ ᠣᠴᠢᠭᠤᠯᠵᠤ᠂ ᠴᠢ ᠪᠤᠯᠠᠰᠢᠨ ᠳᠠᠭᠠᠨ ᠠᠮᠤᠷ ᠲᠠᠢᠪᠤᠩ ᠢᠶᠠᠷ ᠣᠷᠣᠬᠤ ᠪᠣᠯᠣᠨᠠ᠃ ᠡᠨᠡ ᠭᠠᠵᠠᠷ ᠪᠣᠯᠣᠨ ᠡ᠊ᠨᠳᠡᠬᠢ ᠶᠢᠨ ᠰᠠᠭᠤᠭᠠᠯᠢᠴᠢᠳ ᠳᠡᠭᠡᠷᠡ ᠮᠢᠨᠦ ᠠᠪᠴᠢᠷᠠᠬᠤ ᠠᠯᠢᠪᠠ ᠭᠠᠢ ᠵᠣᠪᠠᠯᠠᠩ ᠢ ᠴᠢ ᠨᠢᠳᠦ ᠪᠡᠷ ᠢᠶᠠᠨ ᠦᠵᠡᠬᠦ ᠦᠭᠡᠢ〉》 ᠭᠡᠪᠡ᠃ ᠢᠩᠭᠢᠭᠡᠳ ᠲᠡᠳᠡ ᠬᠠᠷᠢᠭᠤ ᠦᠭᠡ ᠶᠢ ᠬᠠᠭᠠᠨ ᠳᠤ ᠠᠪᠴᠢᠷᠠᠪᠠ᠃
29 ᠬᠠᠭᠠᠨ ᠶᠦᠳᠠ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠤᠨ ᠪᠦᠬᠦ ᠠᠬᠠᠮᠠᠳ ᠢ ᠥᠪᠡᠷ ᠤᠷᠤᠭᠤ ᠪᠠᠨ ᠳᠠᠭᠤᠳᠠᠨ ᠴᠤᠭᠯᠠᠭᠤᠯᠪᠠ᠃ 30 ᠬᠠᠭᠠᠨ ᠶᠦᠳᠠ ᠶᠢᠨ ᠪᠦᠬᠦ ᠡᠷᠡ᠂ ᠶᠧᠷᠦ᠋ᠰᠠᠯᠧᠮ ᠤᠨ ᠪᠦᠬᠦ ᠰᠠᠭᠤᠭᠠᠯᠢ᠂ ᠮᠥᠨ ᠲᠠᠬᠢᠯᠴᠢᠳ᠂ ᠯᠧᠸᠢᠴᠦᠳ ᠪᠣᠯᠣᠨ ᠬᠥᠭᠰᠢᠨ ᠵᠠᠯᠠᠭᠤ ᠢᠯᠭᠠᠯ ᠦᠭᠡᠢ ᠪᠦᠬᠦ ᠠᠷᠠᠳ ᠲᠠᠢ ᠬᠠᠮᠲᠤ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠥᠭᠡᠳᠡ ᠣᠴᠢᠵᠤ᠂ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠡᠴᠡ ᠣᠯᠳᠠᠭᠰᠠᠨ ᠭᠡᠷᠡ ᠶᠢᠨ ᠨᠣᠮ ᠤᠨ ᠪᠦᠬᠦ ᠦᠭᠡ ᠶᠢ ᠤᠩ᠋ᠰᠢᠵᠤ᠂ ᠲᠡᠳᠡᠨ ᠳᠦ ᠰᠣᠨᠣᠰᠬᠠᠪᠠ᠃ 31 ᠬᠠᠭᠠᠨ ᠵᠣᠭᠰᠣᠳᠠᠭ ᠭᠠᠵᠠᠷ ᠲᠠᠭᠠᠨ ᠵᠣᠭᠰᠣᠭᠠᠳ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠭᠡᠷᠡ ᠪᠠᠢᠭᠤᠯᠬᠤ ᠳᠠᠭᠠᠨ᠂ ᠪᠦᠬᠦ ᠵᠢᠷᠦᠬᠡ᠂ ᠪᠦᠬᠦ ᠠᠮᠢ ᠪᠠᠷ ᠶᠣᠬᠣᠸᠠ ᠶᠢ ᠳᠠᠭᠠᠵᠤ᠂ ᠲᠡᠭᠦᠨ ᠦ ᠲᠤᠰᠢᠶᠠᠯ᠂ ᠵᠠᠷᠴᠢᠮ᠂ ᠲᠣᠭᠲᠠᠭᠠᠯ ᠤᠳ ᠢ ᠰᠠᠬᠢᠵᠤ᠂ ᠡᠨᠡ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠭᠡᠷᠡ ᠶᠢᠨ ᠦᠭᠡᠰ ᠢ ᠪᠡᠶᠡᠯᠡᠭᠦᠯᠬᠦ ᠪᠡᠷ ᠲᠠᠩ᠋ᠭᠠᠷᠢᠭᠯᠠᠵᠤ᠂ 32 ᠮᠥᠨ ᠶᠧᠷᠦ᠋ᠰᠠᠯᠧᠮ ᠪᠠ ᠪᠢᠨᠶᠠᠮᠢᠨ ᠳᠤ ᠪᠠᠢᠭᠠ ᠬᠥᠮᠦᠨ ᠪᠦᠬᠦᠨ ᠢ ᠲᠠᠩ᠋ᠭᠠᠷᠢᠭᠯᠠᠭᠤᠯᠬᠤ ᠳᠤ᠂ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠪᠤᠷᠬᠠᠨ ᠤ ᠭᠡᠷᠡ᠂ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠪᠤᠷᠬᠠᠨ ᠤ ᠭᠡᠷᠡ ᠶᠢᠨ ᠳᠠᠭᠠᠤ ᠦᠢᠯᠡᠳᠪᠡ᠃ 33 ᠶᠣᠰᠢᠶᠠ ᠢᠰᠷᠧᠯᠴᠦᠳ ᠦᠨ ᠨᠤᠲᠤᠭ ᠳᠠᠶᠠᠭᠠᠷ ᠤᠨ ᠪᠦᠬᠦ ᠵᠢᠭᠰᠢᠭᠦᠷᠢᠲᠦ ᠰᠢᠲᠦᠭᠡᠨ ᠢ ᠵᠠᠢᠯᠠᠭᠤᠯᠤᠭᠠᠳ ᠢᠰᠷᠧᠯ ᠳᠤ ᠪᠤᠢ ᠪᠦᠬᠦ ᠬᠥᠮᠦᠨ ᠢ ᠥᠪᠡᠷᠰᠡᠳ ᠦᠨ ᠪᠤᠷᠬᠠᠨ ᠶᠣᠬᠣᠸᠠ ᠳᠤ ᠦᠢᠯᠡᠴᠢᠯᠡᠭᠦᠯᠦᠭᠰᠡᠨ ᠳᠦ᠂ ᠲᠡᠳᠡ ᠲᠡᠭᠦᠨ ᠦ ᠪᠦᠬᠦ ᠡᠳᠦᠷ ᠤᠳ ᠢᠶᠠᠷ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢ ᠳᠠᠭᠠᠬᠤ ᠠᠴᠠ ᠪᠤᠴᠠᠭᠰᠠᠨ ᠦᠭᠡᠢ ᠶᠤᠮ᠃