ᠱᠠᠰᠲᠢᠷ ᠤᠨ ᠳᠡᠳ᠋ ᠭᠤᠴᠢᠨ ᠬᠣᠶᠠᠷ
ᠠᠰᠢᠷᠢᠶᠠᠴᠤᠳ ᠶᠧᠷᠦ᠋ᠰᠠᠯᠧᠮ ᠢ ᠪᠦᠰᠡᠯᠡᠪᠡ
1 ᠲᠡᠷᠡ ᠡᠳᠡᠭᠡᠷ ᠢ ᠦᠨᠡᠨᠴᠢ ᠪᠠᠷ ᠭᠦᠢᠴᠡᠳᠬᠡᠭᠰᠡᠨ ᠦ ᠬᠢᠨᠢ ᠳᠠᠷᠠᠭᠠ᠂ ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ ᠰᠧᠨᠠᠾᠧᠷᠢᠪ ᠶᠦᠳᠠ ᠶᠢ ᠳᠣᠪᠲᠣᠯᠣᠨ ᠢᠷᠡᠵᠦ᠂ ᠪᠡᠬᠢᠯᠡᠯᠲᠡᠲᠦ ᠬᠣᠲᠠ ᠨᠤᠭᠤᠳ ᠤᠨ ᠬᠢᠨᠢ ᠡᠮᠦᠨᠡ ᠬᠤᠸᠠᠷᠠᠩᠨᠠᠵᠤ᠂ ᠲᠡᠭᠦᠨ ᠢ ᠡᠵᠡᠯᠡᠨ ᠠᠪᠬᠤ ᠪᠠᠷ ᠰᠠᠨᠠᠭᠠᠷᠬᠠᠵᠤ ᠪᠠᠢᠪᠠ᠃ 2 ᠾᠧᠽᠧᠺᠢᠶᠠ ᠰᠧᠨᠠᠾᠧᠷᠢᠪ ᠤᠨ ᠢᠷᠡᠭᠰᠡᠨ ᠪᠠ ᠶᠧᠷᠦ᠋ᠰᠠᠯᠧᠮ ᠢ ᠳᠠᠭᠠᠷᠢᠬᠤ ᠵᠣᠷᠢᠯᠭᠠ ᠲᠠᠢ ᠪᠠᠢᠬᠤ ᠶᠢ ᠮᠡᠳᠡᠭᠡᠳ᠂ 3 ᠬᠣᠲᠠ ᠶᠢᠨ ᠭᠠᠳᠠᠨᠠᠬᠢ ᠪᠤᠯᠠᠭ ᠤᠳ ᠢ ᠬᠠᠭᠠᠬᠤ ᠲᠠᠯᠠ ᠪᠠᠷ ᠲᠦᠰᠢᠮᠡᠳ ᠪᠣᠯᠣᠨ ᠵᠠᠩᠵᠤᠨ ᠨᠠᠷ ᠲᠠᠢ ᠪᠠᠨ ᠵᠥᠪᠯᠡᠯᠳᠦᠬᠦ ᠳᠦ᠂ ᠲᠡᠳᠡ ᠴᠤ ᠳᠡᠮᠵᠢᠵᠦ ᠪᠠᠢᠯᠠ᠃ 4 ᠣᠯᠠᠨ ᠬᠥᠮᠦᠨ ᠴᠤᠭᠯᠠᠷᠠᠵᠤ 《ᠠᠰᠢᠷᠢᠶᠠ ᠶᠢᠨ ᠬᠠᠭᠠᠳ ᠢᠷᠡᠬᠦ ᠳᠦ᠂ ᠡᠨᠡ ᠶᠡᠬᠡ ᠤᠰᠤ ᠶᠢ ᠲᠡᠳᠡᠨ ᠳᠦ ᠶᠠᠭᠠᠬᠢᠨ ᠣᠯᠭᠣᠵᠤ ᠪᠣᠯᠬᠤ ᠪᠤᠢ︖》 ᠭᠡᠳ ᠳᠡᠭᠦᠷᠭᠡ ᠶᠢᠨ ᠪᠦᠬᠦ ᠪᠤᠯᠠᠭ ᠬᠢᠭᠡᠳ ᠲᠡᠷᠡᠭᠦᠷ ᠤᠷᠤᠰᠳᠠᠭ ᠭᠣᠷᠣᠬᠠ ᠶᠢ ᠬᠠᠭᠠᠪᠠ᠃ 5 ᠾᠧᠽᠧᠺᠢᠶᠠ ᠵᠣᠷᠢᠭ ᠣᠷᠣᠵᠤ᠂ ᠨᠤᠷᠠᠭᠠᠳ ᠪᠠᠢᠭᠰᠠᠨ ᠪᠦᠬᠦ ᠬᠡᠷᠡᠮ ᠢ ᠰᠡᠷᠭᠦᠭᠡᠨ᠂ ᠳᠡᠭᠡᠷᠡ ᠨᠢ ᠣᠯᠠᠨ ᠴᠠᠮᠬᠠᠭ᠂ ᠭᠠᠳᠠᠨᠠ ᠨᠢ ᠥᠭᠡᠷᠡ ᠬᠡᠷᠡᠮ ᠪᠠᠷᠢᠵᠤ᠂ ᠳ᠋ᠠᠸᠢᠳ᠋ ᠤᠨ ᠬᠣᠲᠠ ᠳᠠᠬᠢ ᠮᠢᠯᠣ᠋ ᠪᠡᠬᠢᠯᠡᠯᠲᠡ ᠶᠢ ᠪᠠᠲᠤᠵᠢᠭᠤᠯᠵᠤ᠂ ᠮᠠᠰᠢ ᠣᠯᠠᠨ ᠵᠡᠪᠰᠡᠭ ᠪᠠ ᠪᠠᠮᠪᠠᠢ ᠨᠤᠭᠤᠳ ᠬᠢᠪᠡ᠃ 6 ᠲᠡᠷᠡ ᠪᠡᠷ ᠴᠡᠷᠢᠭ ᠤᠨ ᠨᠣᠶᠠᠳ ᠢ ᠲᠣᠮᠢᠯᠠᠭᠰᠠᠨ ᠤ ᠳᠠᠷᠠᠭᠠ᠂ ᠲᠡᠳᠡᠨ ᠢ ᠬᠣᠲᠠ ᠶᠢᠨ ᠬᠠᠭᠠᠯᠭᠠᠨ ᠤ ᠲᠠᠯᠠᠪᠠᠢ ᠳᠤ ᠳᠠᠭᠤᠳᠠᠨ ᠴᠤᠭᠯᠠᠭᠤᠯᠪᠠ᠃ ᠾᠧᠽᠧᠺᠢᠶᠠ ᠲᠡᠳᠡᠨ ᠢ ᠤᠷᠮᠠᠰᠢᠭᠤᠯᠤᠨ᠄ 7 《ᠬᠦᠴᠦᠲᠡᠢ ᠪᠥᠭᠡᠳ ᠵᠣᠷᠢᠭᠲᠠᠢ ᠪᠠᠢ᠃ ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ ᠠᠴᠠ ᠪᠦᠦ ᠠᠶᠤ᠂ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠭᠠ ᠦᠢ ᠲᠦᠮᠡᠨ ᠦ ᠡᠮᠦᠨᠡ ᠪᠦᠦ ᠰᠢᠨᠲᠠᠷᠠ᠃ ᠪᠢᠳᠡᠨ ᠲᠡᠢ ᠬᠠᠮᠲᠤ ᠪᠠᠢᠭᠠ ᠨᠢᠭᠡᠨ ᠨᠢ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠭᠠ ᠨᠢᠭᠡᠨ ᠡᠴᠡ ᠠᠭᠤᠤ ᠶᠤᠮ᠃ 8 ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠭᠠ ᠨᠢ ᠮᠢᠬᠠᠨ ᠭᠠᠷ᠂ ᠪᠢᠳᠡᠨ ᠲᠡᠢ ᠬᠠᠮᠲᠤ ᠪᠠᠢᠭᠠ ᠨᠢ ᠪᠢᠳᠡᠨ ᠦ ᠪᠤᠷᠬᠠᠨ ᠶᠣᠬᠣᠸᠠ ᠪᠢᠯᠡ᠃ ᠲᠡᠷᠡ ᠪᠢᠳᠡᠨ ᠢ ᠲᠤᠰᠠᠯᠠᠨ ᠲᠤᠯᠤᠯᠳᠤᠭᠠᠨ ᠳᠤ ᠲᠤᠯᠤᠯᠳᠤᠨᠠ》 ᠭᠡᠬᠦ ᠳᠦ᠂ ᠠᠷᠠᠳ ᠲᠦᠮᠡᠨ ᠶᠦᠳᠠ ᠶᠢᠨ ᠬᠠᠭᠠᠨ ᠾᠧᠽᠧᠺᠢᠶᠠ ᠶᠢᠨ ᠦᠭᠡᠨ ᠳᠦ ᠢᠲᠡᠭᠡᠵᠡᠢ᠃
9 ᠡᠭᠦᠨ ᠦ ᠳᠠᠷᠠᠭᠠ᠂ ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ ᠰᠧᠨᠠᠾᠧᠷᠢᠪ ᠯᠠᠺᠢᠱ ᠬᠣᠲᠠ ᠶᠢ ᠪᠦᠬᠦ ᠴᠡᠷᠢᠭ ᠤᠨ ᠬᠦᠴᠦ ᠪᠡᠷ ᠢᠶᠠᠨ ᠪᠦᠰᠡᠯᠡᠵᠦ ᠪᠠᠢᠬᠤ ᠦᠶᠡ ᠳᠡᠭᠡᠨ ᠶᠧᠷᠦ᠋ᠰᠠᠯᠧᠮ ᠥᠭᠡᠳᠡ᠂ ᠶᠦᠳᠠ ᠶᠢᠨ ᠬᠠᠭᠠᠨ ᠾᠧᠽᠧᠺᠢᠶᠠ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠳᠤ ᠪᠠᠢᠭᠰᠠᠨ ᠪᠦᠬᠦ ᠶᠦᠳᠠᠴᠤᠳ ᠤᠷᠤᠭᠤ ᠵᠠᠷᠤᠴᠠ ᠨᠠᠷ ᠢᠶᠠᠨ ᠢᠯᠡᠭᠡᠵᠦ᠄ 10 《ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ ᠰᠧᠨᠠᠾᠧᠷᠢᠪ ᠡᠢᠨ ᠬᠦ ᠬᠡᠯᠡᠵᠦ ᠪᠠᠢᠨᠠ᠄ ᠲᠠ ᠨᠠᠷ ᠶᠠᠭᠤᠨ ᠳᠤ ᠨᠠᠢᠳᠠᠵᠤ᠂ ᠪᠦᠰᠡᠯᠡᠭᠳᠡᠭᠰᠡᠨ ᠶᠧᠷᠦ᠋ᠰᠠᠯᠧᠮ ᠳᠤ ᠪᠠᠢᠭᠠᠳ ᠪᠠᠢᠨᠠ ᠪᠤᠢ︖ 11 ᠾᠧᠽᠧᠺᠢᠶᠠ 〈ᠪᠢᠳᠡᠨ ᠦ ᠪᠤᠷᠬᠠᠨ ᠶᠣᠬᠣᠸᠠ ᠪᠢᠳᠡᠨ ᠢ ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ ᠤ ᠭᠠᠷ ᠠᠴᠠ ᠠᠪᠤᠷᠠᠨᠠ〉 ᠭᠡᠵᠦ ᠬᠡᠯᠡᠳᠡᠭ ᠨᠢ ᠲᠠ ᠨᠠᠷ ᠢ ᠲᠥᠭᠡᠷᠢᠭᠦᠯᠦᠨ᠂ ᠥᠯᠥᠰᠭᠡᠵᠦ ᠴᠠᠩ᠋ᠭᠠᠭᠠᠵᠤ ᠠᠯᠠᠬᠤ ᠭᠡᠵᠦ ᠪᠠᠢᠭᠠ ᠪᠢᠰᠢ ᠤᠤ︖ 12 ᠾᠧᠽᠧᠺᠢᠶᠠ ᠭᠡᠭᠴᠢ ᠡᠨᠡ ᠬᠥᠮᠦᠨ ᠶᠦᠳᠠ᠂ ᠶᠧᠷᠦ᠋ᠰᠠᠯᠧᠮ ᠳᠤ᠄ 〈ᠲᠠ ᠨᠠᠷ ᠨᠢᠭᠡ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠡᠮᠦᠨᠡ ᠮᠥᠷᠭᠥᠵᠦ᠂ ᠲᠡᠭᠦᠨ ᠳᠡᠭᠡᠷᠡ ᠯᠠ ᠤᠲᠤᠯᠭᠠ ᠤᠭᠤᠭᠢᠭᠤᠯᠬᠤ ᠶᠣᠰᠣᠲᠠᠢ〉 ᠬᠡᠮᠡᠨ ᠲᠠᠨ ᠤ ᠪᠤᠷᠬᠠᠳ ᠤᠨ ᠮᠥᠷᠭᠥᠯ ᠦᠨ ᠮᠠᠨᠳᠠᠯ ᠤᠳ ᠢ ᠲᠠᠬᠢᠯ ᠤᠨ ᠰᠢᠷᠡᠭᠡ ᠨᠦᠭᠦᠳ ᠲᠡᠢ ᠴᠢᠨᠢ ᠬᠠᠮᠲᠤ ᠠᠷᠢᠯᠭᠠᠭᠰᠠᠨ ᠪᠢᠰᠢ ᠤᠤ︖ 13 ᠬᠠᠷᠢᠨ ᠪᠢ ᠪᠣᠯᠣᠨ ᠮᠢᠨᠦ ᠡᠴᠢᠭᠡ ᠡᠪᠦᠭᠡᠳ ᠭᠠᠵᠠᠷ ᠳᠡᠯᠡᠬᠡᠢ ᠶᠢᠨ ᠬᠠᠮᠤᠭ ᠦᠨᠳᠦᠰᠦᠲᠡᠨ ᠳᠦ ᠶᠠᠭᠤ ᠬᠢᠭᠰᠡᠨ ᠢ ᠲᠠ ᠨᠠᠷ ᠮᠡᠳᠡᠬᠦ ᠦᠭᠡᠢ ᠭᠡᠵᠢ ᠤᠤ︖ ᠲᠡᠳᠡᠭᠡᠷ ᠭᠠᠵᠠᠷ ᠤᠨ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠪᠤᠷᠬᠠᠳ ᠭᠠᠵᠠᠷ ᠨᠤᠲᠤᠭ ᠢᠶᠠᠨ ᠮᠢᠨᠦ ᠭᠠᠷ ᠠᠴᠠ ᠠᠪᠤᠷᠠᠨ ᠭᠠᠷᠭᠠᠵᠤ ᠴᠢᠳᠠᠭᠰᠠᠨ ᠭᠡᠵᠢ ᠤᠤ︖ 14 ᠡᠴᠢᠭᠡ ᠡᠪᠦᠭᠡᠳ ᠦᠨ ᠮᠢᠨᠢ ᠪᠦᠷᠢᠮᠦᠰᠦᠨ ᠤᠰᠠᠳᠬᠠᠭᠰᠠᠨ ᠲᠡᠳᠡᠭᠡᠷ ᠭᠦᠷᠦᠨ ᠨᠦᠭᠦᠳ ᠦᠨ ᠠᠯᠢ ᠪᠤᠷᠬᠠᠨ ᠨᠢ ᠮᠢᠨᠦ ᠭᠠᠷ ᠠᠴᠠ ᠠᠷᠠᠳ ᠲᠦᠮᠡᠨ ᠢᠶᠡᠨ ᠠᠪᠤᠷᠠᠵᠤ ᠴᠢᠳᠠᠴᠢᠬᠠᠭᠠᠳ ᠲᠠ ᠨᠠᠷ ᠤᠨ ᠪᠤᠷᠬᠠᠨ ᠲᠠ ᠨᠠᠷ ᠢ ᠮᠢᠨᠦ ᠭᠠᠷ ᠠᠴᠠ ᠠᠪᠤᠷᠠᠵᠤ ᠴᠢᠳᠠᠨᠠ ᠭᠡᠵᠦ ᠪᠠᠢᠨᠠ ᠪᠤᠢ︖ 15 ᠣᠳᠣ ᠲᠠ ᠨᠠᠷ ᠾᠧᠽᠧᠺᠢᠶᠠ ᠳᠤ ᠢᠩᠭᠢᠵᠦ ᠮᠡᠬᠡᠯᠡᠭᠳᠡᠵᠦ ᠲᠥᠭᠡᠷᠢᠭᠳᠡᠬᠦ ᠬᠡᠷᠡᠭ ᠦᠭᠡᠢ᠃ ᠲᠡᠭᠦᠨ ᠳᠦ ᠪᠦᠦ ᠢᠲᠡᠭᠡ᠂ ᠠᠯᠢ ᠦᠨᠳᠦᠰᠦᠲᠡᠨ᠂ ᠠᠯᠢ ᠬᠠᠭᠠᠨᠴᠢᠯᠠᠯ ᠤᠨ ᠪᠤᠷᠬᠠᠳ ᠴᠤ ᠠᠷᠠᠳ ᠲᠦᠮᠡᠨ ᠢᠶᠡᠨ ᠮᠢᠨᠦ ᠭᠠᠷ ᠠᠴᠠ ᠪᠤᠶᠤ ᠮᠢᠨᠦ ᠡᠴᠢᠭᠡ ᠡᠪᠦᠭᠡᠳ ᠦᠨ ᠭᠠᠷ ᠠᠴᠠ ᠠᠪᠤᠷᠠᠵᠤ ᠪᠠᠢᠭᠠ ᠦᠭᠡᠢ᠃ ᠲᠡᠢᠮᠦ ᠪᠠᠢᠬᠤ ᠳᠤ᠂ ᠲᠠ ᠨᠠᠷ ᠤᠨ ᠪᠤᠷᠬᠠᠨ ᠯᠠ ᠲᠠ ᠨᠠᠷ ᠢ ᠮᠢᠨᠦ ᠭᠠᠷ ᠠᠴᠠ ᠠᠪᠤᠷᠠᠴᠢᠬᠠᠨᠠ ᠭᠡᠵᠢ ᠤᠤ︖〉》 ᠭᠡᠵᠦ ᠬᠡᠯᠡᠭᠦᠯᠵᠡᠢ᠃
16 ᠰᠧᠨᠠᠾᠧᠷᠢᠪ ᠤᠨ ᠵᠠᠷᠤᠴᠠ ᠨᠠᠷ ᠴᠤ ᠶᠣᠬᠣᠸᠠ ᠪᠤᠷᠬᠠᠨ ᠢ᠂ ᠮᠥᠨ ᠲᠡᠭᠦᠨ ᠦ ᠵᠠᠷᠤᠴᠠ ᠾᠧᠽᠧᠺᠢᠶᠠ ᠶᠢ ᠪᠦᠷ ᠢᠯᠡᠭᠦᠦ ᠮᠠᠭᠤᠰᠢᠶᠠᠪᠠ᠃ 17 ᠰᠧᠨᠠᠾᠧᠷᠢᠪ ᠮᠥᠨ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢ ᠳᠣᠷᠣᠮᠵᠢᠯᠠᠨ ᠮᠠᠭᠤᠯᠠᠬᠤ ᠪᠠᠷ ᠵᠠᠬᠢᠳᠠᠯ ᠪᠢᠴᠢᠵᠦ᠄ 《ᠭᠠᠵᠠᠷ ᠳᠡᠭᠡᠷᠡᠬᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠪᠤᠷᠬᠠᠳ ᠠᠷᠠᠳ ᠲᠦᠮᠡᠨ ᠢᠶᠡᠨ ᠮᠢᠨᠦ ᠭᠠᠷ ᠠᠴᠠ ᠠᠪᠤᠷᠠᠵᠤ ᠴᠢᠳᠠᠭᠠ ᠦᠭᠡᠢ ᠶᠢᠨ ᠠᠳᠠᠯᠢ ᠾᠧᠽᠧᠺᠢᠶᠠ ᠶᠢᠨ ᠪᠤᠷᠬᠠᠨ ᠴᠤ ᠠᠷᠠᠳ ᠲᠦᠮᠡᠨ ᠢᠶᠡᠨ ᠮᠢᠨᠦ ᠭᠠᠷ ᠠᠴᠠ ᠠᠪᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ》 ᠭᠡᠵᠦ ᠪᠠᠢᠯᠠ᠃ 18 ᠰᠧᠨᠠᠾᠧᠷᠢᠪ ᠤᠨ ᠵᠠᠷᠤᠴᠠ ᠨᠠᠷ ᠬᠡᠷᠡᠮ ᠳᠡᠭᠡᠷᠡ ᠪᠠᠢᠭᠠ ᠶᠧᠷᠦ᠋ᠰᠠᠯᠧᠮ ᠤᠨ ᠬᠢᠨ ᠤᠷᠤᠭᠤ ᠢᠪᠷᠠᠢ ᠬᠡᠯᠡ ᠪᠡᠷ ᠴᠢᠩᠭ᠍ᠠ ᠳᠠᠭᠤ ᠪᠠᠷ ᠬᠠᠰᠬᠢᠷᠴᠤ ᠪᠠᠢᠪᠠ᠃ ᠢᠩᠭᠢᠭᠰᠡᠨ ᠢᠶᠡᠷ ᠲᠡᠳᠡᠨ ᠢ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠵᠦ᠂ ᠬᠣᠲᠠ ᠶᠢ ᠨᠢ ᠡᠵᠡᠯᠡᠬᠦ ᠭᠡᠵᠦ ᠪᠠᠢᠪᠠ᠃ 19 ᠲᠡᠳᠡ ᠶᠧᠷᠦ᠋ᠰᠠᠯᠧᠮ ᠤᠨ ᠪᠤᠷᠬᠠᠨ ᠤ ᠲᠤᠬᠠᠢ ᠶᠠᠷᠢᠬᠤ ᠳᠠᠭᠠᠨ ᠭᠠᠵᠠᠷ ᠤᠨ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠬᠥᠮᠦᠨ ᠦ ᠭᠠᠷ ᠢᠶᠠᠷ ᠬᠢᠭᠰᠡᠨ ᠪᠤᠷᠬᠠᠳ ᠤᠨ ᠲᠤᠬᠠᠢ ᠶᠠᠷᠢᠵᠤ ᠪᠠᠢᠭᠠ ᠰᠢᠭ᠋ ᠶᠠᠷᠢᠵᠠᠭᠠᠭᠰᠠᠨ ᠪᠠᠢᠨᠠ᠃
20 ᠾᠧᠽᠧᠺᠢᠶᠠ ᠬᠠᠭᠠᠨ ᠠᠮᠣᠽ ᠤᠨ ᠬᠦᠦ ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠠᠢᠶᠠ ᠲᠠᠢ ᠬᠠᠮᠲᠤ ᠡᠭᠦᠨ ᠦ ᠲᠤᠬᠠᠢ ᠳᠠᠭᠠᠳᠬᠠᠨ ᠲᠩᠷᠢ ᠥᠭᠡᠳᠡ ᠬᠠᠰᠬᠢᠷᠬᠤ ᠳᠤ᠂ 21 ᠶᠣᠬᠣᠸᠠ ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ ᠤ ᠬᠤᠸᠠᠷᠠᠨ ᠤᠷᠤᠭᠤ ᠲᠩᠷᠢ ᠡᠯᠴᠢ ᠪᠠᠨ ᠢᠯᠡᠭᠡᠨ᠂ ᠪᠦᠬᠦ ᠬᠦᠴᠦᠲᠦ ᠳᠠᠢᠴᠢᠨ᠂ ᠵᠠᠩᠵᠤᠨ ᠨᠠᠷ᠂ ᠲᠦᠰᠢᠮᠡᠳ ᠢ ᠨᠢ ᠤᠰᠠᠳᠬᠠᠭᠰᠠᠨ ᠳᠤ᠂ ᠬᠠᠭᠠᠨ ᠢᠴᠢᠭᠦᠷᠢᠲᠡᠢ ᠪᠠᠷ ᠨᠤᠲᠤᠭ ᠤᠷᠤᠭᠤ ᠪᠠᠨ ᠪᠤᠴᠠᠪᠠ᠃ ᠲᠡᠷᠡ ᠪᠤᠷᠬᠠᠨ ᠤ ᠪᠠᠨ ᠳᠤᠭᠠᠩ ᠳᠤ ᠣᠷᠣᠭᠠᠳ ᠪᠠᠢᠬᠤ ᠳᠤ᠂ ᠬᠥᠪᠡᠭᠦᠳ ᠨᠢ ᠲᠡᠭᠦᠨ ᠢ ᠢᠯᠳᠦ ᠪᠡᠷ ᠠᠯᠠᠵᠠᠢ᠃ 22 ᠲᠡᠢᠨ ᠬᠦ ᠶᠣᠬᠣᠸᠠ ᠾᠧᠽᠧᠺᠢᠶᠠ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠢ ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ ᠰᠧᠨᠠᠾᠧᠷᠢᠪ ᠤᠨ ᠭᠠᠷ ᠠᠴᠠ᠂ ᠮᠥᠨ ᠠᠯᠢᠪᠠ ᠳᠠᠢᠰᠤᠨ ᠤ ᠬᠢᠨᠢ ᠭᠠᠷ ᠠᠴᠠ ᠠᠪᠤᠷᠠᠵᠤ᠂ ᠲᠠᠯᠠ ᠪᠦᠷᠢ ᠳᠦᠨᠢ ᠠᠮᠤᠷ ᠠᠮᠤᠭᠤᠯᠠᠩ ᠢ ᠰᠣᠶᠣᠷᠬᠠᠭᠰᠠᠨ ᠶᠤᠮ᠃ 23 ᠦᠢ ᠣᠯᠠᠨ ᠬᠥᠮᠦᠨ ᠶᠧᠷᠦ᠋ᠰᠠᠯᠧᠮ ᠳᠤ ᠢᠷᠡᠵᠦ᠂ ᠶᠣᠬᠣᠸᠠ ᠳᠤ ᠡᠷᠭᠦᠯ᠂ ᠮᠥᠨ ᠶᠦᠳᠠ ᠶᠢᠨ ᠬᠠᠭᠠᠨ ᠾᠧᠽᠧᠺᠢᠶᠠ ᠳᠤ ᠦᠨᠡᠲᠦ ᠵᠦᠢᠯᠡᠰ ᠪᠠᠷᠢᠵᠠᠢ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠲᠡᠷᠡ ᠪᠦᠬᠦ ᠬᠠᠷᠢᠴᠤᠳ ᠤᠨ ᠡᠮᠦᠨᠡ ᠡᠷᠭᠦᠮᠵᠢᠯᠡᠭᠳᠡᠪᠡ᠃
ᠾᠧᠽᠧᠺᠢᠶᠠ ᠶᠢᠨ ᠪᠠᠷᠳᠠᠮᠨᠠᠯ᠂ ᠪᠠᠶᠠᠯᠢᠭ᠂ ᠲᠡᠭᠦᠰᠬᠡᠯ
24 ᠲᠡᠷᠡ ᠡᠳᠦᠷ ᠤᠳ ᠲᠤ ᠾᠧᠽᠧᠺᠢᠶᠠ ᠡᠪᠡᠳᠴᠢᠯᠡᠵᠦ ᠦᠬᠦᠬᠦ ᠣᠢᠷᠠᠲᠤᠯᠠ᠃ ᠲᠡᠷᠡ ᠪᠡᠷ ᠶᠣᠬᠣᠸᠠ ᠳᠤ ᠳᠠᠭᠠᠳᠬᠠᠭᠰᠠᠨ ᠳᠤ᠂ ᠶᠣᠬᠣᠸᠠ ᠲᠡᠭᠦᠨ ᠳᠦ ᠠᠢᠯᠠᠳᠴᠤ ᠲᠡᠮᠳᠡᠭ ᠥᠭᠪᠡ᠃ 25 ᠬᠠᠷᠢᠨ ᠾᠧᠽᠧᠺᠢᠶᠠ ᠪᠠᠷᠳᠠᠮ ᠵᠠᠩ ᠭᠠᠷᠭᠠᠵᠤ᠂ ᠬᠦᠷᠲᠡᠭᠰᠡᠨ ᠢᠪᠡᠭᠡᠯ ᠦᠨ ᠢᠶᠠᠨ ᠶᠣᠰᠣᠭᠠᠷ ᠶᠣᠬᠣᠸᠠ ᠳᠤ ᠬᠠᠷᠢᠭᠤᠯᠤᠭᠰᠠᠨ ᠦᠭᠡᠢ᠃ ᠡᠢᠮᠦ ᠡᠴᠡ ᠠᠭᠤᠷ ᠬᠢᠯᠢᠩ ᠲᠡᠭᠦᠨ ᠳᠡᠭᠡᠷᠡ ᠪᠣᠯᠣᠨ ᠶᠦᠳᠠ᠂ ᠶᠧᠷᠦ᠋ᠰᠠᠯᠧᠮ ᠤᠨ ᠳᠡᠭᠡᠷᠡ ᠪᠠᠢᠪᠠ᠃ 26 ᠾᠧᠽᠧᠺᠢᠶᠠ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠪᠠᠷᠳᠠᠮᠨᠠᠯ ᠢᠶᠠᠨ ᠭᠡᠮᠰᠢᠭᠰᠡᠨ ᠢᠶᠡᠷ ᠶᠣᠬᠣᠸᠠ ᠶᠢᠨ ᠠᠭᠤᠷ ᠬᠢᠯᠢᠩ ᠾᠧᠽᠧᠺᠢᠶᠠ ᠶᠢᠨ ᠡᠳᠦᠷ ᠤᠳ ᠲᠤ ᠲᠡᠳᠡᠨ ᠦ ᠳᠡᠭᠡᠷᠡ ᠪᠠᠭᠤᠭᠰᠠᠨ ᠦᠭᠡᠢ᠃
27 ᠾᠧᠽᠧᠺᠢᠶᠠ ᠦᠯᠡᠮᠵᠢ ᠶᠡᠬᠡ ᠡᠳ᠋ ᠪᠠᠶᠠᠯᠢᠭ᠂ ᠨᠡᠷᠡ ᠬᠦᠨᠳᠦ ᠲᠠᠢ ᠪᠠᠢᠪᠠ᠃ ᠲᠡᠷᠡ ᠮᠥᠩᠭᠥ᠂ ᠠᠯᠲᠠ᠂ ᠦᠨᠡᠲᠦ ᠴᠢᠯᠠᠭᠤ᠂ ᠠᠩᠬᠢᠯᠤᠭᠤᠨ ᠲᠣᠰᠣ᠂ ᠪᠠᠮᠪᠠᠢ ᠪᠣᠯᠣᠨ ᠶᠠᠩᠵᠤ ᠪᠦᠷᠢ ᠶᠢᠨ ᠦᠨᠡᠲᠦ ᠡᠳ᠋ ᠬᠡᠷᠡᠭᠰᠡᠯ ᠦᠨ ᠰᠠᠩ ᠤᠳ᠂ 28 ᠮᠥᠨ ᠦᠷᠡ ᠲᠠᠷᠢᠶᠠ᠂ ᠳᠠᠷᠠᠰᠤ᠂ ᠲᠣᠰᠣᠨ ᠤ ᠬᠥᠮᠥᠷᠭᠡ ᠨᠦᠭᠦᠳ ᠢ᠂ ᠪᠦᠬᠦ ᠲᠥᠷᠥᠯ ᠦᠨ ᠮᠠᠯ ᠤᠨ ᠬᠠᠰᠢᠶᠠ᠂ ᠬᠣᠨᠢᠨ ᠤ ᠬᠣᠷᠣᠭᠠ ᠪᠠᠷᠢᠭᠰᠠᠨ ᠪᠠ 29 ᠲᠣᠰᠬᠣᠳ ᠪᠠᠢᠭᠤᠯᠵᠤ᠂ ᠦᠯᠡᠮᠵᠢ ᠣᠯᠠᠨ ᠮᠠᠯ ᠰᠦᠷᠦᠭ ᠢ ᠡᠵᠡᠮᠰᠢᠵᠡᠢ᠃ ᠪᠤᠷᠬᠠᠨ ᠲᠡᠭᠦᠨ ᠳᠦ ᠲᠡᠢᠮᠦ ᠶᠡᠬᠡ ᠡᠳ᠋ ᠪᠠᠶᠠᠯᠢᠭ ᠢ ᠰᠣᠶᠣᠷᠬᠠᠭᠰᠠᠨ ᠪᠠᠢᠯᠠ᠃ 30 ᠭᠢᠬᠣᠨ ᠪᠤᠯᠠᠭ ᠤᠨ ᠳᠡᠭᠡᠳᠦ ᠤᠷᠤᠰᠬᠠᠯ ᠢ ᠬᠠᠭᠠᠵᠤ᠂ ᠳᠣᠷᠣᠭᠰᠢ ᠳ᠋ᠠᠸᠢᠳ᠋ ᠤᠨ ᠬᠣᠲᠠ ᠶᠢᠨ ᠪᠠᠷᠠᠭᠤᠨ ᠲᠠᠯᠠ ᠤᠷᠤᠭᠤ ᠤᠷᠤᠰᠬᠠᠭᠰᠠᠨ ᠬᠥᠮᠦᠨ ᠨᠢ ᠴᠤ ᠾᠧᠽᠧᠺᠢᠶᠠ ᠶᠤᠮ᠃ ᠾᠧᠽᠧᠺᠢᠶᠠ ᠬᠢᠭᠰᠡᠨ ᠪᠦᠭᠦᠳᠡ ᠳᠡᠭᠡᠨ ᠠᠮᠵᠢᠯᠲᠠ ᠣᠯᠵᠠᠢ᠃ 31 ᠲᠡᠢᠮᠦ ᠡᠴᠡ ᠪᠠᠪᠢᠯᠣᠨ ᠤ ᠨᠣᠶᠠᠳ ᠣᠷᠣᠨ ᠨᠤᠲᠤᠭ ᠲᠤᠨᠢ ᠪᠣᠯᠣᠭᠰᠠᠨ ᠭᠠᠢᠬᠠᠮᠰᠢᠭᠲᠤ ᠲᠡᠮᠳᠡᠭ ᠦᠨ ᠲᠠᠯᠠ ᠪᠠᠷ ᠠᠰᠠᠭᠤᠯᠭᠠᠬᠤ ᠪᠠᠷ ᠲᠡᠭᠦᠨ ᠤᠷᠤᠭᠤ ᠲᠥᠯᠥᠭᠡᠯᠡᠭᠴᠢᠳ ᠢᠶᠠᠨ ᠢᠯᠡᠭᠡᠪᠡ᠃ ᠲᠡᠭᠡᠬᠦ ᠳᠦ ᠪᠤᠷᠬᠠᠨ ᠾᠧᠽᠧᠺᠢᠶᠠ ᠶᠢ ᠣᠷᠬᠢᠵᠤ᠂ ᠵᠢᠷᠦᠬᠡᠨ ᠳᠦᠨᠢ ᠪᠠᠢᠭᠠ ᠪᠦᠬᠦᠨ ᠢ ᠣᠯᠵᠤ ᠮᠡᠳᠡᠬᠦ ᠪᠡᠷ ᠲᠡᠭᠦᠨ ᠢ ᠰᠣᠷᠢᠭᠰᠠᠨ ᠶᠤᠮ᠃
32 ᠾᠧᠽᠧᠺᠢᠶᠠ ᠶᠢᠨ ᠪᠤᠰᠤᠳ ᠶᠠᠪᠤᠳᠠᠯ᠂ ᠦᠨᠡᠨᠴᠢ ᠦᠢᠯᠡᠰ ᠵᠡᠷᠭᠡ ᠨᠢ ᠠᠮᠣᠽ ᠤᠨ ᠬᠦᠦ᠂ ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠠᠢᠶᠠ ᠶᠢᠨ ᠦᠵᠡᠭᠳᠡᠯ ᠦᠨ ᠨᠣᠮ ᠳᠤ᠂ ᠢᠰᠷᠧᠯ ᠪᠠ ᠶᠦᠳᠠ ᠶᠢᠨ ᠬᠠᠭᠠᠳ ᠤᠨ ᠨᠠᠮᠲᠠᠷ ᠲᠤ ᠪᠢᠴᠢᠭᠳᠡᠭᠰᠡᠨ ᠪᠢᠯᠡ᠃ 33 ᠾᠧᠽᠧᠺᠢᠶᠠ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠬᠠᠮᠲᠤ ᠨᠣᠢᠷᠰᠣᠵᠤ ᠬᠥᠮᠦᠰ ᠲᠡᠭᠦᠨ ᠢ ᠳ᠋ᠠᠸᠢᠳ᠋ ᠤᠨ ᠦᠷᠡ ᠤᠳᠤᠮ ᠤᠨ ᠪᠤᠯᠠᠰᠢᠨ ᠤ ᠳᠡᠭᠡᠳᠦ ᠬᠡᠰᠡᠭ ᠲᠦ ᠣᠷᠣᠰᠢᠭᠤᠯᠪᠠ᠃ ᠲᠡᠷᠡ ᠥᠭᠡᠳᠡ ᠪᠣᠯᠬᠤ ᠳᠤ ᠪᠦᠬᠦ ᠶᠦᠳᠠ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠬᠦᠨᠳᠦᠳᠬᠡᠯ ᠢᠶᠡᠨ ᠢᠯᠡᠷᠬᠡᠶᠢᠯᠡᠵᠡᠢ᠃ ᠬᠦᠦ ᠮᠠᠨᠠᠰᠧ ᠨᠢ ᠲᠡᠭᠦᠨ ᠢ ᠵᠠᠯᠭᠠᠮᠵᠢᠯᠠᠨ ᠬᠠᠭᠠᠨ ᠪᠣᠯᠪᠠ᠃