ᠱᠠᠰᠲᠢᠷ ᠤᠨ ᠳᠡᠳ᠋ ᠭᠤᠷᠪᠠ
ᠥᠷᠭᠥᠭᠡ ᠶᠢ ᠪᠣᠰᠬᠠᠪᠠ
1 ᠰᠣᠯᠣᠮᠣᠨ ᠶᠧᠷᠦ᠋ᠰᠠᠯᠧᠮ ᠤᠨ ᠮᠣᠷᠢᠶᠠ ᠠᠭᠤᠯᠠᠨ ᠳᠡᠭᠡᠷᠡ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠶᠢ ᠪᠠᠷᠢᠵᠤ ᠡᠬᠢᠯᠡᠪᠡ᠃ ᠲᠡᠨᠳᠡ ᠶᠣᠬᠣᠸᠠ ᠡᠴᠢᠭᠡ ᠳ᠋ᠠᠸᠢᠳ᠋ ᠲᠤᠨᠢ ᠦᠵᠡᠭᠳᠡᠭᠰᠡᠨ ᠪᠥᠭᠡᠳ ᠳ᠋ᠠᠸᠢᠳ᠋ ᠶᠧᠪᠦ᠋ᠰ ᠬᠥᠮᠦᠨ ᠣᠷᠨᠠᠨ ᠤ ᠦᠲᠦᠷᠮᠡ ᠳᠡᠭᠡᠷᠡ ᠲᠡᠷᠡ ᠭᠠᠵᠠᠷ ᠢ ᠪᠡᠯᠡᠳᠬᠡᠭᠰᠡᠨ ᠪᠠᠢᠯᠠ᠃ 2 ᠰᠣᠯᠣᠮᠣᠨ ᠬᠠᠭᠠᠨ ᠪᠣᠯᠣᠭᠰᠠᠨ ᠳᠥᠷᠪᠡᠳᠡᠬᠢ ᠵᠢᠯ ᠤᠨ ᠢᠶᠠᠨ ᠬᠣᠶᠠᠳᠤᠭᠠᠷ ᠰᠠᠷᠠ ᠶᠢᠨ ᠬᠣᠶᠠᠳᠠᠬᠢ ᠡᠳᠦᠷ ᠲᠡᠭᠦᠨ ᠢ ᠪᠠᠷᠢᠵᠤ ᠡᠬᠢᠯᠡᠵᠡᠢ᠃ 3 ᠪᠤᠷᠬᠠᠨ ᠤ ᠥᠷᠭᠥᠭᠡ ᠶᠢ ᠪᠠᠷᠢᠬᠤ ᠪᠠᠷ ᠰᠣᠯᠣᠮᠣᠨ ᠤ ᠲᠠᠯᠪᠢᠭᠰᠠᠨ ᠰᠠᠭᠤᠷᠢ ᠨᠢ ᠬᠠᠭᠤᠴᠢᠨ ᠪᠠᠷᠢᠮᠵᠢᠶᠠ ᠪᠠᠷ ᠵᠢᠷᠠᠨ ᠲᠣᠬᠣᠢ ᠤᠷᠲᠤ᠂ ᠬᠣᠷᠢᠨ ᠲᠣᠬᠣᠢ ᠥᠷᠭᠡᠨ ᠪᠠᠢᠯᠠ᠃ 4 ᠥᠷᠭᠥᠭᠡᠨ ᠦ ᠡᠮᠦᠨᠡᠬᠢ ᠬᠣᠩᠭᠢᠯ ᠤᠨ ᠤᠷᠲᠤ ᠨᠢ ᠥᠷᠭᠥᠭᠡᠨ ᠦ ᠥᠷᠭᠡᠨ ᠲᠡᠢ ᠡᠩ ᠰᠠᠴᠠᠭᠤ ᠬᠣᠷᠢᠨ ᠲᠣᠬᠣᠢ ᠪᠠᠢᠵᠤ᠂ ᠥᠨᠳᠥᠷ ᠨᠢ ᠵᠠᠭᠤ ᠬᠣᠷᠢᠨ ᠲᠣᠬᠣᠢ ᠪᠠᠢᠪᠠ᠃ ᠳᠣᠲᠣᠷᠠ ᠲᠠᠯᠠ ᠶᠢ ᠨᠢ ᠰᠢᠵᠢᠷ ᠠᠯᠲᠠ ᠪᠠᠷ ᠪᠦᠷᠢᠵᠡᠢ᠃ 5 ᠭᠣᠣᠯ ᠲᠠᠩᠬᠢᠮ ᠢ ᠨᠢ ᠨᠠᠷᠠᠰᠤᠨ ᠮᠣᠳᠣ ᠪᠠᠷ ᠳᠣᠲᠣᠷᠯᠠᠨ᠂ ᠴᠡᠪᠡᠷ ᠠᠯᠲᠠ ᠪᠠᠷ ᠪᠦᠷᠢᠵᠦ᠂ ᠳᠡᠭᠡᠷᠡ ᠨᠢ ᠳᠠᠯᠳᠠᠤ ᠮᠣᠳᠣ ᠪᠣᠯᠣᠨ ᠭᠢᠨᠵᠢ ᠨᠦᠭᠦᠳ ᠰᠡᠢᠯᠪᠡ᠃ 6 ᠥᠷᠭᠥᠭᠡ ᠶᠢ ᠡᠷᠳᠡᠨᠢ ᠶᠢᠨ ᠴᠢᠯᠠᠭᠤ ᠪᠠᠷ ᠴᠢᠮᠡᠭᠯᠡᠪᠡ᠃ ᠬᠡᠷᠡᠭᠯᠡᠭᠰᠡᠨ ᠠᠯᠲᠠ ᠨᠢ ᠫᠠᠷᠸᠠᠢᠮ ᠤᠨ ᠠᠯᠲᠠ ᠪᠥᠭᠡᠳ 7 ᠲᠡᠷᠡ ᠪᠦᠬᠦ ᠥᠷᠭᠥᠭᠡ ᠶᠢ᠂ ᠲᠤᠬᠠᠢᠯᠠᠪᠠᠯ ᠨᠢᠷᠤᠭᠤ᠂ ᠪᠣᠱᠣᠭᠠ᠂ ᠬᠠᠨᠠ᠂ ᠬᠠᠭᠠᠯᠭᠠ ᠵᠡᠷᠭᠡ ᠶᠢ ᠠᠯᠲᠠ ᠪᠠᠷ ᠪᠦᠷᠢᠪᠡ᠃ ᠬᠠᠨᠠ ᠨᠤᠭᠤᠳ ᠳᠡᠭᠡᠷᠡ ᠨᠢ ᠺᠧᠷᠣᠪ ᠤᠳ ᠢ ᠰᠡᠢᠯᠪᠡ᠃
8 ᠲᠡᠷᠡ ᠪᠡᠷ ᠪᠠᠰᠠ ᠠᠷᠢᠭᠤᠨ ᠠᠴᠠ ᠠᠷᠢᠭᠤᠨ ᠭᠠᠵᠠᠷ ᠢ ᠪᠠᠷᠢᠪᠠ᠃ ᠤᠷᠲᠤ ᠨᠢ ᠥᠷᠭᠥᠭᠡᠨ ᠦ ᠥᠷᠭᠡᠨ ᠦ ᠡᠩ ᠢᠶᠡᠷ ᠬᠣᠷᠢᠨ ᠲᠣᠬᠣᠢ᠂ ᠥᠷᠭᠡᠨ ᠨᠢ ᠮᠥᠨ ᠬᠣᠷᠢᠨ ᠲᠣᠬᠣᠢ ᠪᠠᠢᠪᠠ᠃ ᠳᠣᠲᠣᠷᠠ ᠲᠠᠯᠠ ᠶᠢ ᠨᠢ ᠵᠢᠷᠭᠤᠭᠠᠨ ᠵᠠᠭᠤᠨ ᠲᠠᠯᠠᠨᠲ 8 ᠴᠡᠪᠡᠷ ᠠᠯᠲᠠ ᠪᠠᠷ ᠪᠦᠷᠢᠵᠡᠢ᠃ 9 ᠠᠯᠲᠠᠨ ᠬᠠᠳᠠᠭᠠᠰᠤ ᠨᠤᠭᠤᠳ ᠤᠨ ᠵᠢᠩ ᠨᠢ ᠲᠠᠪᠢᠨ ᠱᠧᠺᠧᠯ 9 ᠪᠣᠯᠪᠠ᠃ ᠲᠡᠷᠡ ᠳᠡᠭᠡᠳᠦ ᠥᠷᠥᠭᠡ ᠨᠦᠭᠦᠳ ᠢ ᠪᠠᠰᠠ ᠠᠯᠲᠠ ᠪᠠᠷ ᠪᠦᠷᠢᠪᠡ᠃
10 ᠠᠷᠢᠭᠤᠨ ᠠᠴᠠ ᠠᠷᠢᠭᠤᠨ ᠭᠠᠵᠠᠷ ᠲᠤ ᠬᠣᠣᠰ ᠺᠧᠷᠣᠪ ᠤᠨ ᠪᠠᠷᠢᠮᠠᠯ ᠪᠦᠲᠦᠭᠡᠵᠦ᠂ ᠲᠡᠭᠦᠨ ᠢ ᠠᠯᠲᠠ ᠪᠠᠷ ᠪᠦᠷᠢᠪᠡ᠃ 11 ᠺᠧᠷᠣᠪ ᠤᠳ ᠤᠨ ᠳᠡᠯᠭᠡᠭᠳᠡᠭᠰᠡᠨ ᠳᠠᠯᠠᠪᠴᠢ ᠨᠢ ᠬᠣᠷᠢᠨ ᠲᠣᠬᠣᠢ ᠤᠷᠲᠤ ᠪᠠᠢᠪᠠ᠃ ᠺᠧᠷᠣᠪ ᠤᠨ ᠨᠢᠭᠡ ᠳᠠᠯᠠᠪᠴᠢ ᠨᠢ ᠲᠠᠪᠤᠨ ᠲᠣᠬᠣᠢ ᠤᠷᠲᠤ ᠪᠥᠭᠡᠳ ᠥᠷᠭᠥᠭᠡᠨ ᠦ ᠨᠠᠭᠠᠳᠤ ᠬᠠᠨᠠᠨ ᠳᠤ ᠬᠦᠷᠴᠦ᠂ ᠨᠥᠭᠥᠭᠡ ᠳᠠᠯᠠᠪᠴᠢ ᠨᠢ ᠪᠠᠰᠠ ᠲᠠᠪᠤᠨ ᠲᠣᠬᠣᠢ ᠤᠷᠲᠤ ᠪᠥᠭᠡᠳ ᠨᠥᠭᠥᠭᠡ ᠺᠧᠷᠣᠪ ᠤᠨ ᠳᠠᠯᠠᠪᠴᠢᠨ ᠳᠤ ᠬᠦᠷᠴᠦ ᠪᠠᠢᠪᠠ᠃ 12 ᠨᠥᠭᠥᠭᠡ ᠺᠧᠷᠣᠪ ᠤᠨ ᠨᠢᠭᠡ ᠳᠠᠯᠠᠪᠴᠢ ᠴᠤ ᠲᠠᠪᠤᠨ ᠲᠣᠬᠣᠢ ᠤᠷᠲᠤ ᠪᠥᠭᠡᠳ ᠥᠷᠭᠥᠭᠡᠨ ᠦ ᠴᠠᠭᠠᠲᠤ ᠲᠠᠯᠠ ᠶᠢᠨ ᠬᠠᠨᠠᠨ ᠳᠤ ᠬᠦᠷᠴᠦ᠂ ᠨᠥᠭᠥᠭᠡ ᠳᠠᠯᠠᠪᠴᠢ ᠨᠢ ᠪᠠᠰᠠ ᠲᠠᠪᠤᠨ ᠲᠣᠬᠣᠢ ᠤᠷᠲᠤ ᠪᠥᠭᠡᠳ ᠡᠬᠢᠨ ᠤ ᠺᠧᠷᠣᠪ ᠤᠨ ᠳᠠᠯᠠᠪᠴᠢᠨ ᠳᠤ ᠬᠦᠷᠴᠦ ᠪᠠᠢᠪᠠ᠃ 13 ᠡᠳᠡᠭᠡᠷ ᠺᠧᠷᠣᠪ ᠤᠳ ᠤᠨ ᠳᠡᠯᠭᠡᠭᠳᠡᠭᠰᠡᠨ ᠳᠠᠯᠠᠪᠴᠢ ᠨᠢ ᠨᠡᠢᠲᠡ ᠬᠣᠷᠢᠨ ᠲᠣᠬᠣᠢ ᠤᠷᠲᠤ ᠪᠥᠭᠡᠳ ᠲᠡᠳᠡ ᠭᠣᠣᠯ ᠲᠠᠩᠬᠢᠮ ᠤᠷᠤᠭᠤ ᠬᠠᠷᠠᠨ ᠵᠣᠭᠰᠣᠵᠠᠭᠠᠵᠤ ᠪᠠᠢᠪᠠ᠃ 14 ᠴᠡᠩᠬᠡᠷ᠂ ᠨᠢᠯ ᠶᠠᠭᠠᠨ᠂ ᠬᠦᠷᠡᠩ ᠤᠯᠠᠭᠠᠨ ᠪᠥᠰ᠂ ᠨᠠᠷᠢᠨ ᠮᠠᠭᠠᠯᠢᠩ᠋ᠭᠤ ᠪᠠᠷ ᠬᠥᠰᠢᠭᠡ ᠬᠢᠵᠦ᠂ ᠳᠡᠭᠡᠷᠡ ᠨᠢ ᠺᠧᠷᠣᠪ ᠤᠳ ᠢ ᠤᠷᠠᠯᠠᠪᠠ᠃
15 ᠲᠡᠷᠡ ᠪᠠᠰᠠ ᠥᠷᠭᠥᠭᠡᠨ ᠦ ᠤᠷᠳᠤ ᠲᠠᠯᠠ ᠳᠤ ᠭᠤᠴᠢᠨ ᠲᠠᠪᠤᠨ ᠲᠣᠬᠣᠢ ᠥᠨᠳᠥᠷ ᠬᠣᠣᠰ ᠪᠠᠭᠠᠨᠠ ᠪᠦᠲᠦᠭᠡᠪᠡ᠃ ᠪᠠᠭᠠᠨᠠ ᠪᠦᠷᠢ ᠶᠢᠨ ᠣᠷᠣᠢ ᠳᠡᠭᠡᠷᠡ ᠲᠠᠪᠤᠨ ᠲᠣᠬᠣᠢ ᠥᠨᠳᠥᠷ ᠪᠠᠭᠠᠨᠠ ᠶᠢᠨ ᠲᠣᠯᠣᠭᠠᠢ ᠪᠠᠢᠪᠠ᠃ 16 ᠲᠡᠷᠡ ᠪᠡᠷ ᠭᠢᠨᠵᠢ ᠨᠦᠭᠦᠳ ᠬᠢᠵᠦ ᠪᠠᠭᠠᠨᠠ ᠶᠢᠨ ᠣᠷᠣᠢ ᠳᠡᠭᠡᠷᠡ ᠪᠠᠢᠷᠢᠯᠠᠭᠤᠯᠤᠭᠠᠳ᠂ ᠵᠠᠭᠤᠨ ᠠᠨᠠᠷ ᠤᠷᠠᠯᠠᠨ ᠭᠢᠨᠵᠢ ᠨᠦᠭᠦᠳ ᠳᠡᠭᠡᠷᠡ ᠲᠣᠭᠲᠠᠭᠠᠪᠠ᠃ 17 ᠲᠡᠷᠡ ᠪᠡᠷ ᠥᠷᠭᠥᠭᠡᠨ ᠦ ᠡᠮᠦᠨᠡ ᠬᠣᠣᠰ ᠪᠠᠭᠠᠨᠠ ᠶᠢ᠂ ᠨᠢᠭᠡ ᠶᠢ ᠨᠢ ᠪᠠᠷᠠᠭᠤᠨ ᠲᠠᠯᠠ ᠳᠤ᠂ ᠨᠥᠭᠥᠭᠡ ᠶᠢ ᠨᠢ ᠵᠡᠭᠦᠨ ᠲᠠᠯᠠ ᠳᠤ ᠪᠣᠰᠬᠠᠭᠠᠳ᠂ ᠪᠠᠷᠠᠭᠤᠨ ᠲᠠᠯᠠ ᠶᠢᠨ ᠬᠢ ᠶᠢ ᠨᠢ ᠶᠠᠺᠢᠨ 10 ᠂ ᠵᠡᠭᠦᠨ ᠲᠠᠯᠠ ᠶᠢᠨ ᠬᠢ ᠶᠢ ᠨᠢ ᠪᠣᠶᠠᠽ 11 ᠭᠡᠵᠦ ᠨᠡᠷᠡᠯᠡᠵᠡᠢ᠃