ᠱᠠᠰᠲᠢᠷ ᠤᠨ ᠳᠡᠳ᠋ ᠬᠣᠷᠢᠨ ᠨᠢᠭᠡ
ᠶᠦᠳᠠ ᠶᠢᠨ ᠬᠠᠭᠠᠨ ᠶᠧᠬᠣᠷᠠᠮ
1 ᠶᠧᠬᠣᠱᠠᠹᠠᠲ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠬᠠᠮᠲᠤ ᠨᠣᠢᠷᠰᠣᠵᠤ᠂ ᠳ᠋ᠠᠸᠢᠳ᠋ ᠤᠨ ᠬᠣᠲᠠ ᠳᠤ ᠲᠡᠳᠡᠨ ᠦ ᠳᠡᠷᠭᠡᠳᠡ ᠣᠷᠣᠰᠢᠭᠤᠯᠤᠭᠳᠠᠵᠠᠢ᠃ ᠬᠦᠦ ᠶᠧᠬᠣᠷᠠᠮ ᠨᠢ ᠲᠡᠭᠦᠨ ᠢ ᠵᠠᠯᠭᠠᠮᠵᠢᠯᠠᠨ ᠬᠠᠭᠠᠨ ᠪᠣᠯᠪᠠ᠃ 2 ᠲᠡᠭᠦᠨ ᠦ ᠠᠬᠠ ᠳᠡᠭᠦᠦᠰ ᠪᠣᠯ ᠠᠽᠠᠷᠢᠶᠠ᠂ ᠶᠧᠾᠢᠶᠧᠯ᠂ ᠽᠧᠺᠠᠷᠢᠶᠠ᠂ ᠠᠽᠠᠷᠢᠶᠠᠬᠦ᠂ ᠮᠢᠺᠠᠶᠧᠯ᠂ ᠱᠧᠹᠠᠲ᠋ᠢᠶᠠ ᠪᠥᠭᠡᠳ ᠲᠡᠳᠡ ᠪᠦᠭᠦᠳᠡ ᠢᠰᠷᠧᠯ ᠤᠨ ᠬᠠᠭᠠᠨ ᠶᠧᠬᠣᠱᠠᠹᠠᠲ ᠤᠨ ᠬᠥᠪᠡᠭᠦᠳ ᠶᠤᠮ᠃ 3 ᠡᠴᠢᠭᠡ ᠨᠢ ᠲᠡᠳᠡᠨ ᠳᠦ ᠠᠯᠲᠠ᠂ ᠮᠥᠩᠭᠥ᠂ ᠦᠨᠡᠲᠦ ᠵᠦᠢᠯᠡᠰ ᠪᠦᠬᠦᠢ ᠣᠯᠠᠨ ᠪᠡᠯᠡᠭ ᠪᠣᠯᠣᠨ ᠶᠦᠳᠠ ᠶᠢᠨ ᠪᠡᠬᠢᠯᠡᠯᠲᠡᠲᠦ ᠬᠣᠲᠠ ᠨᠤᠭᠤᠳ ᠢ ᠥᠭᠭᠥᠭᠡᠳ ᠬᠠᠭᠠᠨ ᠤ ᠡᠷᠬᠡ ᠶᠢ ᠤᠤᠭᠠᠨ ᠬᠦᠦ ᠶᠧᠬᠣᠷᠠᠮ ᠳᠠᠭᠠᠨ ᠥᠭᠭᠥᠭᠰᠡᠨ ᠪᠠᠢᠵᠠᠢ᠃ 4 ᠶᠧᠬᠣᠷᠠᠮ ᠡᠴᠢᠭᠡ ᠶᠢᠨ ᠢᠶᠠᠨ ᠰᠠᠭᠤᠷᠢᠨ ᠳᠤ ᠰᠠᠭᠤᠵᠤ᠂ ᠬᠦᠴᠦ ᠪᠡᠨ ᠪᠠᠲᠤᠵᠢᠭᠤᠯᠤᠭᠰᠠᠨ ᠤ ᠳᠠᠷᠠᠭᠠ᠂ ᠪᠦᠬᠦ ᠠᠬᠠ ᠳᠡᠭᠦᠦ᠂ ᠪᠠᠰᠠ ᠢᠰᠷᠧᠯ ᠤᠨ ᠵᠠᠷᠢᠮ ᠨᠣᠶᠠᠳ ᠢ ᠢᠯᠳᠦ ᠪᠡᠷ ᠬᠣᠷᠣᠭᠠᠭᠰᠠᠨ ᠪᠠᠢᠨᠠ᠃ 5 ᠶᠧᠬᠣᠷᠠᠮ ᠭᠤᠴᠢᠨ ᠬᠣᠶᠠᠷ ᠨᠠᠰᠤᠲᠠᠢ ᠳᠠᠭᠠᠨ ᠬᠠᠭᠠᠨ ᠪᠣᠯᠣᠭᠠᠳ ᠶᠧᠷᠦ᠋ᠰᠠᠯᠧᠮ ᠳᠤ ᠨᠠᠢ᠌ᠮᠠᠨ ᠵᠢᠯ ᠬᠠᠭᠠᠨᠴᠢᠯᠠᠵᠠᠢ᠃ 6 ᠲᠡᠷᠡ ᠪᠡᠷ ᠠᠬᠠᠪ ᠤᠨ ᠥᠬᠢᠨ ᠲᠠᠢ ᠭᠡᠷᠯᠡᠭᠰᠡᠨ ᠪᠣᠯᠬᠣᠷ ᠠᠬᠠᠪ ᠤᠨ ᠭᠡᠷ ᠦᠨ ᠦᠢᠯᠡᠳᠦᠭᠰᠡᠨ ᠲᠡᠢ ᠠᠳᠠᠯᠢ ᠢᠰᠷᠧᠯ ᠤᠨ ᠬᠠᠭᠠᠳ ᠤᠨ ᠵᠠᠮ ᠢᠶᠠᠷ ᠶᠠᠪᠤᠵᠤ᠂ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠳᠦ ᠪᠤᠵᠠᠷ ᠮᠠᠭᠤ ᠶᠢ ᠦᠢᠯᠡᠳᠪᠡ᠃ 7 ᠬᠠᠷᠢᠨ ᠶᠣᠬᠣᠸᠠ ᠳ᠋ᠠᠸᠢᠳ᠋ ᠲᠠᠢ ᠪᠠᠢᠭᠤᠯᠤᠭᠰᠠᠨ ᠭᠡᠷᠡ ᠶᠢᠨ ᠢᠶᠠᠨ ᠤᠯᠠᠮ ᠢᠶᠠᠷ ᠯᠠ ᠳ᠋ᠠᠸᠢᠳ᠋ ᠤᠨ ᠭᠡᠷ ᠢ ᠤᠰᠠᠳᠬᠠᠬᠤ ᠦᠭᠡᠢ ᠪᠠᠢᠯᠠ᠃ ᠤᠤᠯ ᠨᠢ ᠶᠣᠬᠣᠸᠠ ᠲᠡᠷᠡ ᠪᠣᠯᠣᠨ ᠲᠡᠭᠦᠨ ᠦ ᠦᠷᠡ ᠤᠳᠤᠮ ᠤᠨ ᠳ᠋ᠧᠩ ᠢ ᠦᠷᠭᠦᠯᠵᠢ ᠪᠠᠢᠯᠭᠠᠨᠠ ᠬᠡᠮᠡᠨ ᠠᠢᠯᠠᠳᠤᠭᠰᠠᠨ ᠶᠤᠮ᠃
8 ᠶᠧᠬᠣᠷᠠᠮ ᠤᠨ ᠡᠳᠦᠷ ᠤᠳ ᠲᠤ ᠡᠳᠣᠮ ᠶᠦᠳᠠ ᠠᠴᠠ ᠤᠷᠪᠠᠨ ᠥᠪᠡᠷ ᠦᠨ ᠢᠶᠠᠨ ᠬᠠᠭᠠᠨ ᠲᠠᠢ ᠪᠣᠯᠣᠭᠰᠠᠨ ᠳᠤ᠂ 9 ᠶᠧᠬᠣᠷᠠᠮ ᠬᠠᠮᠤᠭ ᠲᠡᠷᠭᠡ ᠪᠡᠨ ᠳᠠᠢᠴᠢᠯᠠᠨ ᠳᠠᠭᠠᠷᠢᠪᠠ᠃ ᠡᠳᠣᠮᠴᠤᠳ ᠶᠧᠬᠣᠷᠠᠮ ᠪᠣᠯᠣᠨ ᠲᠡᠭᠦᠨ ᠦ ᠲᠡᠷᠭᠡᠲᠦ ᠵᠠᠩᠵᠤᠨ ᠨᠠᠷ ᠢ ᠪᠦᠰᠡᠯᠡᠬᠦ ᠳᠦ᠂ ᠲᠡᠷᠡ ᠪᠡᠷ ᠰᠥᠨᠢ ᠪᠠᠷ ᠪᠣᠰᠴᠤ᠂ ᠡᠳᠣᠮᠴᠤᠳ ᠢ ᠴᠣᠬᠢᠪᠠ᠃ 10 ᠢᠩᠭᠢᠭᠡᠳ ᠡᠳᠣᠮ ᠥᠨᠥᠳᠥᠷ ᠬᠦᠷᠲᠡᠯᠡ ᠶᠦᠳᠠ ᠠᠴᠠ ᠤᠷᠪᠠᠭᠰᠠᠨ ᠬᠡᠪ ᠢᠶᠡᠷ ᠢᠶᠠᠨ ᠪᠠᠢᠨᠠ᠃ ᠲᠡᠷᠡ ᠦᠶᠡ ᠳᠦ ᠯᠢᠪᠨᠠ ᠴᠤ ᠲᠡᠭᠦᠨ ᠡᠴᠡ ᠤᠷᠪᠠᠭᠰᠠᠨ ᠶᠤᠮ᠃ ᠤᠴᠢᠷ ᠨᠢ ᠶᠧᠬᠣᠷᠠᠮ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢ ᠣᠷᠬᠢᠭᠰᠠᠨ ᠪᠢᠯᠡ᠃
11 ᠶᠧᠬᠣᠷᠠᠮ ᠪᠠᠰᠠ ᠶᠦᠳᠠ ᠶᠢᠨ ᠠᠭᠤᠯᠠᠰ ᠳᠡᠭᠡᠷᠡ ᠮᠥᠷᠭᠥᠯ ᠦᠨ ᠮᠠᠨᠳᠠᠯ ᠤᠳ ᠪᠣᠰᠬᠠᠵᠤ᠂ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠢ ᠵᠠᠪᠬᠠᠢᠷᠠᠭᠤᠯᠤᠨ᠂ ᠶᠦᠳᠠ ᠶᠢ ᠤᠷᠤᠭᠤ ᠲᠠᠲᠠᠵᠠᠢ᠃ 12 ᠡᠰᠢ ᠦᠵᠡᠭᠦᠯᠦᠭᠴᠢ ᠧᠯᠢᠶᠠ ᠲᠡᠭᠦᠨ ᠳᠦ ᠵᠠᠬᠢᠳᠠᠯ ᠶᠠᠪᠤᠭᠤᠯᠵᠤ᠄ 《ᠴᠢᠨᠦ ᠡᠴᠢᠭᠡ ᠡᠪᠦᠭᠡ ᠳ᠋ᠠᠸᠢᠳ᠋ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠴᠢ ᠡᠴᠢᠭᠡ ᠶᠧᠬᠣᠱᠠᠹᠠᠲ ᠤᠨ ᠢᠶᠠᠨ ᠵᠠᠮ ᠢᠶᠠᠷ ᠴᠤ᠂ ᠶᠦᠳᠠ ᠶᠢᠨ ᠬᠠᠭᠠᠨ ᠠᠰᠠ ᠶᠢᠨ ᠵᠠᠮ ᠢᠶᠠᠷ ᠴᠤ ᠶᠠᠪᠤᠯ ᠦᠭᠡᠢ᠂ 13 ᠬᠠᠷᠢᠨ ᠢᠰᠷᠧᠯ ᠤᠨ ᠬᠠᠭᠠᠳ ᠤᠨ ᠵᠠᠮ ᠢᠶᠠᠷ ᠶᠠᠪᠤᠵᠤ᠂ ᠠᠬᠠᠪ ᠤᠨ ᠭᠡᠷ ᠢᠰᠷᠧᠯ ᠢ ᠵᠠᠪᠬᠠᠢᠷᠠᠭᠤᠯᠤᠭᠰᠠᠨ ᠲᠠᠢ ᠠᠳᠠᠯᠢ ᠪᠠᠷ ᠶᠦᠳᠠ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠢ ᠵᠠᠪᠬᠠᠢᠷᠠᠭᠤᠯᠤᠭᠰᠠᠨ ᠶᠤᠮ᠃ ᠴᠢ ᠪᠠᠰᠠ ᠡᠴᠢᠭᠡ ᠶᠢᠨ ᠢᠶᠠᠨ ᠭᠡᠷ ᠪᠦᠯᠢ ᠳᠠᠬᠢ ᠴᠢᠮᠠ ᠠᠴᠠ ᠢᠯᠡᠭᠦᠦ ᠰᠠᠢᠨ ᠪᠠᠢᠭᠰᠠᠨ ᠠᠬᠠ ᠳᠡᠭᠦᠦᠰ ᠢᠶᠡᠨ ᠠᠯᠠᠵᠠᠢ᠃ 14 ᠬᠠᠷᠠ᠂ ᠶᠣᠬᠣᠸᠠ ᠥᠪᠡᠷ ᠢᠶᠡᠨ ᠴᠢᠨᠦ ᠠᠷᠠᠳ ᠲᠦᠮᠡᠨ᠂ ᠴᠢᠨᠦ ᠬᠥᠪᠡᠭᠦᠳ᠂ ᠡᠬᠡᠨᠡᠷ ᠤᠳ ᠪᠣᠯᠣᠨ ᠪᠦᠬᠦ ᠡᠵᠡᠮᠰᠢᠯ ᠢ ᠦᠯᠡᠮᠵᠢ ᠶᠡᠬᠡ ᠭᠠᠢ ᠭᠠᠮᠰᠢᠭ ᠢᠶᠠᠷ ᠴᠣᠬᠢᠬᠤ ᠪᠥᠭᠡᠳ 15 ᠴᠢᠮᠠᠶᠢ ᠭᠡᠳᠡᠰᠦᠨ ᠦ ᠬᠦᠨᠳᠦ ᠡᠪᠡᠳᠴᠢᠨ ᠢᠶᠠᠷ ᠴᠣᠬᠢᠨᠠ᠃ ᠲᠡᠷᠡ ᠡᠪᠡᠳᠴᠢᠨ ᠡᠳᠦᠷ ᠡᠴᠡ ᠡᠳᠦᠷ ᠬᠦᠨᠳᠦᠷᠡᠵᠦ᠂ ᠬᠣᠵᠢᠮ ᠭᠡᠳᠡᠰᠦ ᠴᠢᠨᠢ ᠴᠤᠪᠤᠷᠠᠨ ᠭᠠᠷᠬᠤ ᠪᠣᠯᠣᠨᠠ〉》 ᠭᠡᠪᠡ᠃
16 ᠶᠣᠬᠣᠸᠠ ᠹᠢᠯᠢᠰᠲ᠋ᠴᠦᠳ ᠪᠣᠯᠣᠨ ᠺᠦᠱᠴᠦᠳ ᠲᠡᠢ ᠬᠢᠯᠢᠯᠡᠳᠡᠭ ᠠᠷᠠᠪᠴᠤᠳ ᠤᠨ ᠠᠭᠤᠷ ᠢ ᠬᠥᠳᠡᠯᠭᠡᠵᠦ᠂ ᠶᠧᠬᠣᠷᠠᠮ ᠢ ᠴᠣᠬᠢᠭᠤᠯᠤᠭᠰᠠᠨ ᠳᠤ᠂ 17 ᠲᠡᠳᠡ ᠶᠦᠳᠠ ᠤᠷᠤᠭᠤ ᠬᠠᠯᠳᠠᠨ ᠳᠣᠪᠲᠣᠯᠵᠤ᠂ ᠬᠠᠭᠠᠨ ᠤ ᠣᠷᠳᠣᠨ ᠳᠤ ᠪᠠᠢᠭᠠ ᠪᠦᠬᠦ ᠡᠳ᠋ ᠶᠠᠭᠤᠮᠠ ᠶᠢ ᠬᠠᠭᠠᠨ ᠤ ᠬᠥᠪᠡᠭᠦᠳ ᠪᠣᠯᠣᠨ ᠡᠬᠡᠨᠡᠷ ᠤᠳ ᠲᠠᠢ ᠬᠠᠮᠲᠤ ᠠᠪᠠᠴᠢᠵᠤ᠂ ᠣᠳᠬᠣᠨ ᠬᠦᠦ ᠠᠬᠠᠽᠢᠶᠠ ᠠᠴᠠ ᠨᠢ ᠥᠭᠡᠷᠡ ᠬᠥᠪᠡᠭᠦᠨ ᠢ ᠲᠡᠭᠦᠨ ᠳᠦ ᠦᠯᠡᠳᠡᠭᠡᠭᠰᠡᠨ ᠦᠭᠡᠢ᠃
18 ᠡᠨᠡ ᠪᠦᠬᠦᠨ ᠦ ᠳᠠᠷᠠᠭᠠ ᠶᠣᠬᠣᠸᠠ ᠶᠧᠬᠣᠷᠠᠮ ᠢ ᠭᠡᠳᠡᠰᠦ ᠳᠣᠲᠣᠷ ᠤᠨ ᠡᠳᠡᠭᠡᠷᠡᠰᠢ ᠦᠭᠡᠢ ᠡᠪᠡᠳᠴᠢᠨ ᠢᠶᠠᠷ ᠴᠣᠬᠢᠪᠠ᠃ 19 ᠬᠡᠰᠡᠭ ᠬᠤᠭᠤᠴᠠᠭᠠᠨ ᠤ ᠳᠠᠷᠠᠭᠠ᠂ ᠲᠤᠬᠠᠢᠯᠠᠪᠠᠯ ᠬᠣᠶᠠᠷ ᠵᠢᠯ ᠤᠨ ᠡᠴᠦᠰ ᠲᠦ᠂ ᠲᠡᠷᠡ ᠠᠶᠤᠮᠰᠢᠭᠲᠠᠢ ᠪᠠᠷ ᠲᠠᠷᠴᠢᠯᠠᠵᠤ ᠨᠠᠰᠤ ᠪᠠᠷᠠᠪᠠ᠃ ᠲᠡᠭᠦᠨ ᠦ ᠭᠡᠳᠡᠰᠦ ᠳᠣᠲᠣᠷ ᠡᠪᠡᠳᠴᠢᠨ ᠡᠴᠡ ᠨᠢ ᠪᠣᠯᠵᠤ ᠴᠤᠪᠤᠨ ᠭᠠᠷᠤᠭᠰᠠᠨ ᠪᠠᠢᠯᠠ᠃ ᠠᠷᠠᠳ ᠲᠦᠮᠡᠨ ᠡᠴᠢᠭᠡ ᠡᠪᠦᠭᠡᠳ ᠢ ᠨᠢ ᠨᠠᠰᠤ ᠪᠠᠷᠠᠬᠤ ᠳᠤ ᠭᠠᠯ ᠠᠰᠠᠭᠠᠳᠠᠭ ᠪᠠᠢᠭᠰᠠᠨ ᠪᠣᠯ ᠲᠡᠭᠦᠨ ᠢ ᠨᠠᠰᠤ ᠪᠠᠷᠠᠬᠤ ᠳᠤ ᠭᠠᠯ ᠠᠰᠠᠭᠠᠭᠰᠠᠨ ᠦᠭᠡᠢ᠃ 20 ᠲᠡᠷᠡ ᠭᠤᠴᠢᠨ ᠬᠣᠶᠠᠷ ᠨᠠᠰᠤᠲᠠᠢ ᠳᠠᠭᠠᠨ ᠬᠠᠭᠠᠨ ᠪᠣᠯᠵᠤ᠂ ᠶᠧᠷᠦ᠋ᠰᠠᠯᠧᠮ ᠳᠤ ᠨᠠᠢ᠌ᠮᠠᠨ ᠵᠢᠯ ᠬᠠᠭᠠᠨᠴᠢᠯᠠᠵᠠᠢ᠃ ᠲᠡᠷᠡ ᠦᠬᠦᠬᠦ ᠳᠦ ᠬᠡᠨ ᠴᠤ ᠬᠠᠷᠠᠮᠰᠠᠭᠰᠠᠨ ᠦᠭᠡᠢ᠂ ᠬᠥᠮᠦᠰ ᠲᠡᠭᠦᠨ ᠢ ᠳ᠋ᠠᠸᠢᠳ᠋ ᠤᠨ ᠬᠣᠲᠠ ᠳᠤ ᠣᠷᠣᠰᠢᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠬᠠᠭᠠᠳ ᠤᠨ ᠪᠤᠯᠠᠰᠢᠨ ᠳᠤ ᠲᠠᠯᠪᠢᠭᠠ ᠦᠭᠡᠢ ᠪᠢᠯᠡ᠃