ᠱᠠᠰᠲᠢᠷ ᠤᠨ ᠳᠡᠳ᠋ ᠬᠣᠷᠢᠨ ᠬᠣᠶᠠᠷ
ᠶᠦᠳᠠ ᠶᠢᠨ ᠬᠠᠭᠠᠨ ᠠᠬᠠᠽᠢᠶᠠ
1 ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠶᠧᠬᠣᠷᠠᠮ ᠤᠨ ᠣᠳᠬᠣᠨ ᠬᠦᠦ ᠠᠬᠠᠽᠢᠶᠠ ᠶᠢ ᠲᠡᠭᠦᠨ ᠦ ᠣᠷᠣᠨ ᠳᠤ ᠬᠠᠭᠠᠨ ᠪᠣᠯᠭᠠᠪᠠ᠃ ᠠᠬᠠ ᠨᠠᠷ ᠨᠢ ᠪᠦᠭᠦᠳᠡᠭᠡᠷ ᠢᠶᠡᠨ ᠬᠤᠸᠠᠷᠠᠨ ᠤᠷᠤᠭᠤ ᠢᠷᠡᠭᠰᠡᠨ ᠠᠷᠠᠪᠴᠤᠳ ᠪᠣᠯᠣᠨ ᠳᠡᠭᠡᠷᠡᠮᠴᠢᠳ ᠲᠤ ᠠᠯᠠᠭᠳᠠᠭᠰᠠᠨ ᠪᠠᠢᠵᠠᠢ᠃ ᠲᠡᠢᠨ ᠬᠦ ᠶᠧᠬᠣᠷᠠᠮ ᠤᠨ ᠬᠦᠦ ᠠᠬᠠᠽᠢᠶᠠ ᠶᠦᠳᠠ ᠶᠢᠨ ᠬᠠᠭᠠᠨ ᠪᠣᠯᠵᠠᠢ᠃ 2 ᠠᠬᠠᠽᠢᠶᠠ ᠬᠣᠷᠢᠨ ᠬᠣᠶᠠᠷ ᠨᠠᠰᠤᠲᠠᠢ ᠳᠠᠭᠠᠨ ᠬᠠᠭᠠᠨ ᠪᠣᠯᠣᠭᠠᠳ ᠶᠧᠷᠦ᠋ᠰᠠᠯᠧᠮ ᠳᠤ ᠨᠢᠭᠡ ᠵᠢᠯ ᠬᠠᠭᠠᠨᠴᠢᠯᠠᠪᠠ᠃ ᠡᠬᠡ ᠨᠢ ᠠᠲ᠋ᠠᠯᠢᠶᠠ ᠭᠡᠳᠡᠭ ᠪᠥᠭᠡᠳ ᠣᠮᠷᠢ ᠶᠢᠨ ᠠᠴᠢ ᠥᠬᠢᠨ ᠶᠤᠮ᠃ 3 ᠡᠬᠡ ᠨᠢ ᠲᠡᠭᠦᠨ ᠦ ᠪᠤᠵᠠᠷ ᠮᠠᠭᠤ ᠶᠢ ᠦᠢᠯᠡᠳᠬᠦ ᠳᠦ ᠵᠥᠪᠯᠡᠳᠡᠭ ᠤᠴᠢᠷ ᠠᠴᠠ ᠠᠬᠠᠽᠢᠶᠠ ᠪᠠᠰᠠ ᠠᠬᠠᠪ ᠤᠨ ᠭᠡᠷ ᠦᠨ ᠬᠢᠨ ᠤ ᠵᠠᠮ ᠢᠶᠠᠷ ᠶᠠᠪᠤᠵᠤ᠂ 4 ᠠᠬᠠᠪ ᠤᠨ ᠭᠡᠷ ᠦᠨ ᠬᠢᠨ ᠲᠠᠢ ᠠᠳᠠᠯᠢ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠳᠦ ᠮᠠᠭᠤ ᠶᠢ ᠦᠢᠯᠡᠳᠴᠡᠢ᠂ ᠲᠡᠢᠨ ᠬᠦ ᠡᠴᠢᠭᠡ ᠨᠢ ᠦᠬᠦᠭᠰᠡᠨ ᠦ ᠳᠠᠷᠠᠭᠠ᠂ ᠲᠡᠳᠡ ᠲᠡᠭᠦᠨ ᠦ ᠵᠥᠪᠯᠡᠭᠴᠢᠳ ᠪᠣᠯᠵᠤ᠂ ᠲᠡᠭᠦᠨ ᠢ ᠰᠦᠢᠷᠡᠯ ᠳᠦ ᠬᠦᠷᠭᠡᠵᠡᠢ᠃
5 ᠠᠬᠠᠽᠢᠶᠠ ᠲᠡᠳᠡᠨ ᠦ ᠵᠥᠪᠯᠡᠯᠭᠡ ᠶᠢ ᠴᠤ ᠳᠠᠭᠠᠵᠤ᠂ ᠠᠷᠠᠮ ᠤᠨ ᠬᠠᠭᠠᠨ ᠬᠠᠽᠠᠶᠧᠯ ᠲᠠᠢ ᠲᠤᠯᠤᠯᠳᠤᠬᠤ ᠪᠠᠷ ᠢᠰᠷᠧᠯ ᠤᠨ ᠬᠠᠭᠠᠨ ᠠᠬᠠᠪ ᠤᠨ ᠬᠦᠦ ᠶᠣᠷᠠᠮ ᠲᠠᠢ ᠬᠠᠮᠲᠤ ᠷᠠᠮᠣᠲ ᠭᠢᠯᠧᠶᠠᠳ᠋ ᠤᠷᠤᠭᠤ ᠣᠴᠢᠭᠰᠠᠨ ᠦᠶᠡ ᠳᠦ᠂ ᠠᠷᠠᠮᠴᠤᠳ ᠶᠣᠷᠠᠮ ᠢ ᠰᠢᠷᠬᠠᠲᠤᠭᠤᠯᠵᠠᠢ᠃ 6 ᠲᠡᠭᠡᠭᠡᠳ ᠶᠣᠷᠠᠮ ᠠᠷᠠᠮ ᠤᠨ ᠬᠠᠭᠠᠨ ᠬᠠᠽᠠᠶᠧᠯ ᠲᠠᠢ ᠲᠤᠯᠤᠯᠳᠤᠵᠤ ᠪᠠᠢᠬᠤ ᠳᠠᠭᠠᠨ ᠰᠢᠷᠬᠠᠲᠤᠭᠰᠠᠨ ᠰᠢᠷᠬᠠ ᠪᠠᠨ ᠡᠮᠨᠡᠭᠦᠯᠬᠦ ᠪᠡᠷ ᠶᠧᠽᠷᠧᠯ ᠤᠷᠤᠭᠤ ᠪᠤᠴᠠᠪᠠ᠃ ᠠᠬᠠᠪ ᠤᠨ ᠬᠦᠦ ᠶᠣᠷᠠᠮ ᠰᠢᠷᠬᠠᠲᠤᠭᠰᠠᠨ ᠳᠤ ᠶᠧᠬᠣᠷᠠᠮ ᠤᠨ ᠬᠦᠦ᠂ ᠶᠦᠳᠠ ᠶᠢᠨ ᠬᠠᠭᠠᠨ ᠠᠬᠠᠽᠢᠶᠠ ᠲᠡᠭᠦᠨ ᠢ ᠪᠣᠯᠭᠣᠭᠠᠬᠤ ᠪᠠᠷ ᠶᠧᠽᠷᠧᠯ ᠤᠷᠤᠭᠤ ᠣᠴᠢᠭᠰᠠᠨ ᠪᠠᠢᠪᠠ᠃
7 ᠠᠬᠠᠽᠢᠶᠠ ᠶᠣᠷᠠᠮ ᠤᠷᠤᠭᠤ ᠣᠴᠢᠭᠰᠠᠨ ᠢᠶᠠᠷ ᠢᠶᠠᠨ ᠮᠥᠬᠥᠯ ᠳᠤ ᠬᠦᠷᠦᠭᠰᠡᠨ ᠪᠥᠭᠡᠳ ᠡᠨᠡ ᠨᠢ ᠪᠤᠷᠬᠠᠨ ᠠᠴᠠ ᠢᠷᠡᠭᠰᠡᠨ ᠶᠤᠮ᠃ ᠤᠴᠢᠷ ᠨᠢ ᠠᠬᠠᠽᠢᠶᠠ ᠲᠡᠨᠳᠡ ᠣᠴᠢᠭᠠᠳ ᠪᠠᠢᠬᠤ ᠳᠠᠭᠠᠨ ᠶᠣᠷᠠᠮ ᠤᠨ ᠬᠠᠮᠲᠤ ᠨᠢᠮᠱᠢ ᠶᠢᠨ ᠬᠦᠦ ᠶᠧᠾᠦ᠋ ᠲᠠᠢ ᠲᠠᠭᠠᠷᠠᠯᠳᠤᠵᠠᠢ᠃ ᠶᠣᠬᠣᠸᠠ ᠠᠬᠠᠪ ᠤᠨ ᠭᠡᠷ ᠢ ᠲᠠᠰᠤᠳᠠᠭᠤᠯᠬᠤ ᠪᠠᠷ ᠶᠧᠾᠦ᠋ ᠶᠢ ᠲᠣᠰᠣᠯᠠᠭᠰᠠᠨ ᠪᠠᠢᠪᠠ᠃ 8 ᠶᠧᠾᠦ᠋ ᠠᠬᠠᠪ ᠤᠨ ᠭᠡᠷ ᠦᠨ ᠬᠢᠨ ᠤ ᠬᠦᠯᠢᠶᠡᠬᠦ ᠰᠢᠳᠬᠡᠯ ᠢ ᠭᠦᠢᠴᠡᠭᠡᠬᠦ ᠳᠡᠭᠡᠨ ᠶᠦᠳᠠ ᠶᠢᠨ ᠨᠣᠶᠠᠳ ᠢ ᠪᠣᠯᠣᠨ ᠠᠬᠠᠽᠢᠶᠠ ᠳᠤ ᠦᠢᠯᠡᠴᠢᠯᠡᠳᠡᠭ᠌ ᠠᠬᠠᠽᠢᠶᠠ ᠶᠢᠨ ᠬᠠᠮᠢᠶᠠᠲᠠᠳ ᠤᠨ ᠬᠥᠪᠡᠭᠦᠳ ᠢ ᠴᠤ ᠣᠯᠵᠤ᠂ ᠲᠡᠳᠡᠨ ᠢ ᠬᠣᠷᠣᠭᠠᠪᠠ᠃ 9 ᠶᠧᠾᠦ᠋ ᠠᠬᠠᠽᠢᠶᠠ ᠶᠢ ᠡᠷᠢᠵᠦ ᠪᠠᠢᠬᠤ ᠳᠤ᠂ ᠬᠥᠮᠦᠰ ᠰᠠᠮᠠᠷᠢᠶᠠ ᠳᠤ ᠨᠢᠭᠤᠵᠤ ᠪᠠᠢᠭᠰᠠᠨ ᠠᠬᠠᠽᠢᠶᠠ ᠶᠢ ᠪᠠᠷᠢᠵᠤ ᠲᠡᠭᠦᠨ ᠤᠷᠤᠭᠤ ᠠᠪᠴᠢᠷᠠᠪᠠ᠃ ᠲᠡᠳᠡ ᠲᠡᠭᠦᠨ ᠢ ᠠᠯᠠᠭᠰᠠᠨ ᠤ ᠳᠠᠷᠠᠭᠠ᠄ 《ᠲᠡᠷᠡ ᠪᠣᠯ ᠶᠣᠬᠣᠸᠠ ᠶᠢ ᠪᠦᠬᠦ ᠵᠢᠷᠦᠬᠡ ᠪᠡᠷ ᠢᠶᠠᠨ ᠬᠠᠢᠵᠤ ᠪᠠᠢᠭᠰᠠᠨ ᠶᠧᠬᠣᠱᠠᠹᠠᠲ ᠤᠨ ᠬᠦᠦ ᠶᠤᠮ》 ᠭᠡᠵᠡᠭᠡᠨ ᠲᠡᠭᠦᠨ ᠢ ᠣᠷᠣᠰᠢᠭᠤᠯᠵᠠᠢ᠃ ᠡᠢᠨ ᠬᠦ ᠠᠬᠠᠽᠢᠶᠠ ᠶᠢᠨ ᠭᠡᠷ ᠲᠦ ᠬᠠᠭᠠᠨᠴᠢᠯᠠᠯ ᠤᠨ ᠡᠷᠬᠡ ᠪᠠᠷᠢᠬᠤ ᠬᠥᠮᠦᠨ ᠨᠢᠭᠡ ᠴᠤ ᠦᠯᠡᠳᠡᠭᠰᠡᠨ ᠦᠭᠡᠢ᠃
ᠬᠠᠭᠠᠨ ᠰᠢᠷᠡᠭᠡ ᠪᠤᠯᠢᠶᠠᠭᠳᠠᠪᠠ
10 ᠠᠬᠠᠽᠢᠶᠠ ᠶᠢᠨ ᠡᠬᠡ ᠠᠲ᠋ᠠᠯᠢᠶᠠ ᠬᠦᠦ ᠶᠢᠨ ᠢᠶᠠᠨ ᠦᠬᠦᠭᠰᠡᠨ ᠢ ᠮᠡᠳᠡᠭᠡᠳ ᠪᠣᠰᠴᠤ᠂ ᠶᠦᠳᠠ ᠶᠢᠨ ᠭᠡᠷ ᠦᠨ ᠬᠠᠭᠠᠨ ᠤ ᠤᠳᠤᠮ ᠤᠨ ᠪᠦᠬᠦ ᠬᠥᠪᠡᠭᠦᠳ ᠢ ᠤᠰᠠᠳᠬᠠᠪᠠ᠃ 11 ᠬᠠᠷᠢᠨ ᠶᠧᠬᠣᠷᠠᠮ ᠬᠠᠭᠠᠨ ᠤ ᠥᠬᠢᠨ᠂ ᠶᠧᠬᠣᠱᠧᠪᠠ ᠠᠯᠠᠭᠳᠠᠬᠤ ᠭᠡᠵᠦ ᠪᠠᠢᠭᠰᠠᠨ ᠬᠠᠭᠠᠨ ᠤ ᠬᠥᠪᠡᠭᠦᠳ ᠦᠨ ᠳᠤᠮᠳᠠ ᠠᠴᠠ ᠠᠬᠠᠽᠢᠶᠠ ᠶᠢᠨ ᠬᠦᠦ ᠶᠣᠶᠠᠱ ᠢ ᠰᠡᠮᠬᠡᠨ ᠠᠪᠤᠭᠠᠳ ᠠᠰᠠᠷᠠᠭᠴᠢ ᠲᠠᠢ ᠨᠢ ᠬᠠᠮᠲᠤ ᠤᠨᠲᠠᠯᠭᠠ ᠶᠢᠨ ᠥᠷᠥᠭᠡᠨ ᠳᠡᠭᠡᠨ ᠪᠠᠢᠯᠭᠠᠪᠠ᠃ ᠡᠢᠨ ᠬᠦ ᠶᠧᠬᠣᠷᠠᠮ ᠬᠠᠭᠠᠨ ᠤ ᠥᠬᠢᠨ᠂ ᠲᠠᠬᠢᠯᠴᠢ ᠶᠧᠬᠣᠶᠠᠳᠠ ᠶᠢᠨ ᠡᠬᠡᠨᠡᠷ ᠶᠧᠬᠣᠱᠧᠪᠠ ᠶᠣᠶᠠᠱ ᠢ ᠠᠲ᠋ᠠᠯᠢᠶᠠ ᠠᠴᠠ ᠨᠢᠭᠤᠵᠤ ᠠᠯᠠᠭᠤᠯᠤᠭᠰᠠᠨ ᠦᠭᠡᠢ᠃ ᠶᠧᠬᠣᠱᠧᠪᠠ ᠪᠣᠯ ᠠᠬᠠᠽᠢᠶᠠ ᠶᠢᠨ ᠡᠭᠡᠴᠢ ᠶᠤᠮ᠃ 12 ᠶᠣᠶᠠᠱ ᠲᠡᠳᠡᠨ ᠲᠡᠢ ᠬᠠᠮᠲᠤ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠳᠦ ᠵᠢᠷᠭᠤᠭᠠᠨ ᠵᠢᠯ ᠨᠢᠭᠤᠭᠳᠠᠵᠤ ᠪᠠᠢᠬᠤ ᠳᠤ᠂ ᠠᠲ᠋ᠠᠯᠢᠶᠠ ᠲᠡᠷᠡ ᠭᠠᠵᠠᠷ ᠢ ᠵᠠᠬᠢᠷᠴᠤ ᠪᠠᠢᠪᠠ᠃