ᠱᠠᠰᠲᠢᠷ ᠤᠨ ᠳᠡᠳ᠋ ᠠᠷᠪᠠᠨ ᠨᠠᠢ᠌ᠮᠠ
ᠡᠰᠢ ᠦᠵᠡᠭᠦᠯᠦᠭᠴᠢ ᠬᠠᠭᠠᠨ ᠳᠤ ᠠᠩ᠋ᠬᠠᠷᠤᠭᠤᠯᠪᠠ
1 ᠶᠧᠬᠣᠱᠠᠹᠠᠲ ᠠᠰᠤᠷᠤ ᠶᠡᠬᠡ ᠬᠥᠷᠥᠩᠭᠡ ᠲᠠᠢ᠂ ᠨᠡᠷᠡ ᠬᠦᠨᠳᠦᠲᠡᠢ ᠪᠠᠢᠯᠠ᠃ ᠲᠡᠷᠡ ᠠᠬᠠᠪ ᠲᠠᠢ ᠬᠣᠲᠠ ᠤᠷᠤᠭ ᠪᠣᠯᠵᠤ᠂ 2 ᠬᠡᠳᠦᠨ ᠵᠢᠯ ᠤᠨ ᠳᠠᠷᠠᠭᠠ ᠰᠠᠮᠠᠷᠢᠶᠠ ᠳᠤ ᠪᠠᠢᠭᠠ ᠠᠬᠠᠪ ᠳᠡᠭᠡᠷᠡ ᠣᠴᠢᠪᠠ᠃ ᠠᠬᠠᠪ ᠲᠡᠭᠦᠨ ᠳᠦ ᠪᠣᠯᠣᠨ ᠲᠡᠭᠦᠨ ᠦ ᠬᠠᠷᠢᠶᠠ ᠬᠥᠮᠦᠰ ᠲᠦ ᠵᠣᠷᠢᠭᠤᠯᠤᠨ ᠣᠯᠠᠨ ᠬᠣᠨᠢ ᠦᠬᠡᠷ ᠭᠠᠷᠭᠠᠵᠤ᠂ ᠷᠠᠮᠣᠲ ᠭᠢᠯᠧᠶᠠᠳ᠋ ᠢ ᠳᠣᠪᠲᠣᠯᠣᠭᠤᠯᠬᠤ ᠪᠠᠷ ᠢᠳᠬᠠᠪᠠ᠃ 3 ᠢᠰᠷᠧᠯ ᠤᠨ ᠬᠠᠭᠠᠨ ᠠᠬᠠᠪ ᠶᠦᠳᠠ ᠶᠢᠨ ᠬᠠᠭᠠᠨ ᠶᠧᠬᠣᠱᠠᠹᠠᠲ ᠠᠴᠠ᠄ 《ᠲᠠ ᠨᠠᠳᠠ ᠲᠠᠢ ᠬᠠᠮᠲᠤ ᠷᠠᠮᠣᠲ ᠭᠢᠯᠧᠶᠠᠳ᠋ ᠲᠤ ᠶᠠᠪᠤᠬᠤ ᠤᠤ︖》 ᠭᠡᠵᠦ ᠠᠰᠠᠭᠤᠪᠠ᠂ ᠶᠧᠬᠣᠱᠠᠹᠠᠲ᠄ 《ᠲᠠ ᠪᠢᠳᠡ ᠬᠣᠶᠠᠷ ᠪᠣᠯ ᠨᠢᠭᠡ ᠶᠤᠮ᠂ ᠮᠠᠨ ᠤ ᠠᠷᠠᠳ ᠲᠦᠮᠡᠨ ᠪᠣᠯ ᠲᠠᠨ ᠤ ᠠᠷᠠᠳ ᠲᠦᠮᠡᠨ᠂ ᠲᠤᠯᠤᠯᠳᠤᠭᠠᠨ ᠳᠤ ᠪᠢᠳᠡ ᠲᠠᠨ ᠲᠠᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠣᠨᠠ》 ᠭᠡᠪᠡ᠃
4 ᠶᠧᠬᠣᠱᠠᠹᠠᠲ ᠢᠰᠷᠧᠯ ᠤᠨ ᠬᠠᠭᠠᠨ ᠳᠤ᠄ 《ᠬᠠᠷᠢᠨ ᠶᠠᠭᠤᠨ ᠤ ᠡᠮᠦᠨᠡ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠠᠰᠠᠭᠤᠵᠤ ᠥᠭᠭᠥᠨᠡ ᠤᠤ︖》 ᠭᠡᠬᠦ ᠳᠦ᠂ 5 ᠢᠰᠷᠧᠯ ᠤᠨ ᠬᠠᠭᠠᠨ ᠳᠥᠷᠪᠡᠨ ᠵᠠᠭᠤᠨ ᠡᠰᠢ ᠦᠵᠡᠭᠦᠯᠦᠭᠴᠢ ᠴᠤᠭᠯᠠᠭᠤᠯᠵᠠᠢ᠃ ᠠᠬᠠᠪ᠄ 《ᠪᠢᠳᠡ ᠷᠠᠮᠣᠲ ᠭᠢᠯᠧᠶᠠᠳ᠋ ᠥᠭᠡᠳᠡ ᠪᠠᠢᠯᠳᠤᠬᠤ ᠪᠠᠷ ᠶᠠᠪᠤᠬᠤ ᠤᠤ︖ ᠪᠣᠯᠢᠬᠤ ᠤᠤ︖》 ᠭᠡᠰᠡᠨ ᠳᠦ᠂ ᠲᠡᠳᠡ᠄ 《ᠶᠠᠪᠤ᠂ ᠪᠤᠷᠬᠠᠨ ᠲᠡᠷᠡ ᠬᠣᠲᠠ ᠶᠢ ᠬᠠᠭᠠᠨ ᠤ ᠭᠠᠷ ᠲᠤ ᠲᠤᠰᠢᠶᠠᠬᠤ ᠪᠣᠯᠣᠨᠠ》 ᠭᠡᠵᠡᠭᠡᠯᠡ᠃ 6 ᠶᠧᠬᠣᠱᠠᠹᠠᠲ᠄ 《ᠡ᠊ᠨᠳᠡ ᠲᠡᠳᠡᠨ ᠡᠴᠡ ᠥᠭᠡᠷᠡ ᠪᠢᠳᠡᠨ ᠦ ᠠᠰᠠᠭᠤᠴᠢᠬᠠᠬᠤ ᠪᠠᠷ ᠶᠣᠬᠣᠸᠠ ᠶᠢᠨ ᠡᠰᠢ ᠦᠵᠡᠭᠦᠯᠦᠭᠴᠢ ᠠᠯᠠᠭᠠ ᠤᠤ︖》 ᠭᠡᠪᠡ᠃ 7 ᠢᠰᠷᠧᠯ ᠤᠨ ᠬᠠᠭᠠᠨ ᠪᠡᠷ ᠶᠧᠬᠣᠱᠠᠹᠠᠲ ᠲᠤ᠄ 《ᠢᠮᠯᠠ ᠶᠢᠨ ᠬᠦᠦ ᠮᠢᠺᠠᠢᠶᠠ ᠭᠡᠳᠡᠭ ᠨᠢᠭᠡ ᠬᠥᠮᠦᠨ ᠪᠤᠢ᠃ ᠲᠡᠭᠦᠨ ᠢᠶᠡᠷ ᠳᠠᠮᠵᠢᠭᠤᠯᠤᠨ ᠶᠣᠬᠣᠸᠠ ᠠᠴᠠ ᠠᠰᠠᠭᠤᠵᠤ ᠪᠣᠯᠣᠨᠠ᠃ ᠭᠡᠪᠡᠴᠦ ᠲᠡᠷᠡ ᠮᠢᠨᠦ ᠲᠤᠬᠠᠢ ᠰᠠᠢᠨ ᠢ ᠡᠰᠢ ᠦᠵᠡᠭᠦᠯᠳᠡᠭ ᠦᠭᠡᠢ᠂ ᠳᠠᠩᠳᠠ ᠪᠠᠨ ᠮᠠᠭᠤ ᠶᠢ ᠯᠠ ᠬᠡᠯᠡᠳᠡᠭ ᠤᠴᠢᠷ ᠠᠴᠠ ᠪᠢ ᠲᠡᠭᠦᠨ ᠢ ᠦᠵᠡᠨ ᠶᠠᠳᠠᠳᠠᠭ ᠶᠤᠮ》 ᠭᠡᠬᠦ ᠳᠦ᠂ ᠶᠧᠬᠣᠱᠠᠹᠠᠲ᠄ 《ᠬᠠᠭᠠᠨ ᠬᠥᠮᠦᠨ ᠲᠡᠭᠡᠵᠦ ᠶᠠᠷᠢᠵᠤ ᠪᠣᠯᠬᠤ ᠦᠭᠡᠢ ᠰᠢᠦ》 ᠭᠡᠵᠡᠢ᠃ 8 ᠢᠩᠭᠢᠭᠡᠳ ᠢᠰᠷᠧᠯ ᠤᠨ ᠬᠠᠭᠠᠨ ᠨᠢᠭᠡᠨ ᠲᠦᠰᠢᠮᠡᠯ ᠢᠶᠡᠨ ᠳᠠᠭᠤᠳᠠᠨ᠄ 《ᠢᠮᠯᠠ ᠶᠢᠨ ᠬᠦᠦ ᠮᠢᠺᠠᠢᠶᠠ ᠶᠢ ᠬᠤᠷᠳᠤᠨ ᠠᠪᠴᠢᠷᠠ》 ᠭᠡᠵᠦ ᠬᠡᠯᠡᠪᠡ᠃ 9 ᠢᠰᠷᠧᠯ ᠤᠨ ᠬᠠᠭᠠᠨ ᠬᠢᠭᠡᠳ ᠶᠦᠳᠠ ᠶᠢᠨ ᠬᠠᠭᠠᠨ ᠶᠧᠬᠣᠱᠠᠹᠠᠲ ᠬᠠᠭᠠᠨ ᠤ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠨ᠂ ᠰᠠᠮᠠᠷᠢᠶᠠ ᠬᠣᠲᠠ ᠶᠢᠨ ᠬᠠᠭᠠᠯᠭᠠᠨ ᠤ ᠬᠠᠵᠠᠭᠤ ᠳᠠᠬᠢ ᠦᠲᠦᠷᠮᠡ ᠳᠦ ᠲᠤᠰ ᠲᠤᠰ ᠤᠨ ᠢᠶᠠᠨ ᠰᠡᠨᠲᠢ ᠳᠤ ᠵᠠᠯᠠᠷᠠᠵᠤ᠂ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠪᠦᠭᠦᠳᠡᠭᠡᠷ ᠲᠡᠳᠡᠨ ᠦ ᠡᠮᠦᠨᠡ ᠡᠰᠢ ᠦᠵᠡᠭᠦᠯᠵᠦ ᠪᠠᠢᠯᠠ᠃ 10 ᠺᠧᠨᠠᠨᠠ ᠶᠢᠨ ᠬᠦᠦ ᠽᠧᠳᠧᠺᠢᠶᠠ ᠬᠢᠭᠰᠡᠨ ᠲᠡᠮᠦᠷ ᠡᠪᠡᠷ ᠤᠳ ᠢᠶᠠᠨ ᠠᠪᠴᠢᠷᠠᠭᠠᠳ᠄ 《ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠂ ᠲᠠ ᠡᠳᠡᠭᠡᠷ ᠢᠶᠡᠷ ᠠᠷᠠᠮᠴᠤᠳ ᠢ ᠮᠥᠷᠭᠥᠵᠦ ᠤᠰᠠᠳᠬᠠᠬᠤ ᠪᠣᠯᠣᠨᠠ》 ᠭᠡᠵᠦ ᠲᠤᠩ᠋ᠬᠠᠭᠯᠠᠪᠠ᠃ 11 ᠪᠤᠰᠤᠳ ᠡᠰᠢ ᠦᠵᠡᠭᠦᠯᠦᠭᠴᠢ ᠴᠤ ᠪᠦᠭᠦᠳᠡᠭᠡᠷ ᠲᠡᠢᠨ ᠬᠦ ᠡᠰᠢ ᠦᠵᠡᠭᠦᠯᠵᠦ᠄ 《ᠷᠠᠮᠣᠲ ᠭᠢᠯᠧᠶᠠᠳ᠋ ᠤᠷᠤᠭᠤ ᠶᠠᠪᠤᠵᠤ ᠢᠯᠠᠯᠲᠠ ᠣᠯᠣᠭᠠᠷᠠᠢ᠃ ᠶᠣᠬᠣᠸᠠ ᠲᠡᠷᠡ ᠬᠣᠲᠠ ᠶᠢ ᠬᠠᠭᠠᠨ ᠤ ᠭᠠᠷ ᠲᠤ ᠲᠤᠰᠢᠶᠠᠬᠤ ᠪᠣᠯᠣᠨᠠ》 ᠭᠡᠵᠡᠭᠡᠵᠦ ᠪᠠᠢᠯᠠ᠃
12 ᠮᠢᠺᠠᠢᠶᠠ ᠶᠢ ᠳᠠᠭᠤᠳᠠᠬᠤ ᠪᠠᠷ ᠣᠴᠢᠭᠰᠠᠨ ᠡᠯᠴᠢ ᠲᠡᠭᠦᠨ ᠳᠦ᠄ 《ᠬᠠᠷᠠ᠂ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠳᠠᠭᠤ ᠨᠢᠭᠡ ᠲᠠᠢ ᠪᠠᠷ ᠬᠠᠭᠠᠨ ᠳᠤ ᠰᠠᠢᠨ ᠢ ᠯᠠ ᠶᠠᠷᠢᠵᠤ ᠪᠠᠢᠨᠠ᠂ ᠲᠠ ᠪᠠᠰᠠ ᠲᠡᠳᠡᠨ ᠲᠡᠢ ᠠᠳᠠᠯᠢ ᠰᠠᠢᠨ ᠢ ᠯᠠ ᠶᠠᠷᠢ ᠳᠠ》 ᠭᠡᠰᠡᠨ ᠳᠦ᠂ 13 ᠮᠢᠺᠠᠢᠶᠠ᠄ 《ᠶᠣᠬᠣᠸᠠ ᠶᠢᠨ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ᠂ ᠮᠢᠨᠦ ᠪᠤᠷᠬᠠᠨ ᠶᠠᠭᠤ ᠠᠢᠯᠠᠳᠪᠠᠯ᠂ ᠪᠢ ᠲᠡᠭᠦᠨ ᠢ ᠯᠠ ᠶᠠᠷᠢᠬᠤ ᠪᠣᠯᠣᠨᠠ》 ᠭᠡᠯᠡ᠃ 14 ᠲᠡᠷᠡ ᠪᠡᠷ ᠬᠠᠭᠠᠨ ᠤ ᠡᠮᠦᠨᠡ ᠢᠷᠡᠬᠦ ᠳᠦ᠂ ᠬᠠᠭᠠᠨ ᠲᠡᠭᠦᠨ ᠡᠴᠡ᠄ 《ᠮᠢᠺᠠᠢᠶᠠ᠂ ᠪᠢᠳᠡ ᠷᠠᠮᠣᠲ ᠭᠢᠯᠧᠶᠠᠳ᠋ ᠥᠭᠡᠳᠡ ᠪᠠᠢᠯᠳᠤᠬᠤ ᠪᠠᠷ ᠶᠠᠪᠤᠬᠤ ᠤᠤ︖ ᠪᠣᠯᠢᠬᠤ ᠤᠤ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ ᠮᠢᠺᠠᠢᠶᠠ ᠲᠡᠭᠦᠨ ᠳᠦ᠄ 《ᠶᠠᠪᠤᠵᠤ᠂ ᠢᠯᠠᠯᠲᠠ ᠣᠯ᠃ ᠲᠡᠳᠡ ᠬᠠᠭᠠᠨ ᠤ ᠭᠠᠷ ᠲᠤ ᠲᠤᠰᠢᠶᠠᠭᠳᠠᠬᠤ ᠪᠣᠯᠣᠨᠠ》 ᠭᠡᠵᠡᠢ᠃ 15 ᠬᠠᠷᠢᠨ ᠬᠠᠭᠠᠨ ᠲᠡᠭᠦᠨ ᠳᠦ᠄ 《ᠶᠣᠬᠣᠸᠠ ᠶᠢᠨ ᠨᠡᠷᠡ ᠳᠡᠭᠡᠷᠡ ᠨᠠᠳᠠ ᠳᠤ ᠵᠥᠪᠬᠡᠨ ᠦᠨᠡᠨ ᠢ ᠯᠠ ᠬᠡᠯᠡᠬᠦ ᠶᠣᠰᠣᠲᠠᠢ ᠶᠢ ᠪᠢ ᠴᠢᠮᠠ ᠪᠠᠷ ᠬᠡᠴᠢᠨᠡᠨ ᠤᠳᠠᠭᠠ ᠠᠮᠠᠯᠠᠭᠤᠯᠬᠤ ᠶᠤᠮ ᠪᠤᠢ︖》 ᠭᠡᠪᠡ᠃ 16 ᠮᠢᠺᠠᠢᠶᠠ ᠬᠠᠷᠢᠭᠤ ᠳᠤᠨᠢ᠄ 《ᠪᠦᠬᠦ ᠢᠰᠷᠧᠯ ᠬᠣᠨᠢᠴᠢᠨ ᠦᠭᠡᠢ ᠬᠣᠨᠢᠳ ᠮᠡᠲᠦ ᠠᠭᠤᠯᠠ ᠠᠭᠤᠯᠠ ᠪᠠᠷ ᠲᠠᠷᠬᠠᠭᠰᠠᠨ ᠪᠠᠢᠬᠤ ᠶᠢ ᠪᠢ ᠬᠠᠷᠠᠭᠰᠠᠨ᠂ 〈ᠲᠡᠳᠡᠨ ᠳᠦ ᠡᠵᠡᠨ ᠪᠠᠢᠬᠤ ᠦᠭᠡᠢ᠂ ᠲᠡᠳᠡ ᠪᠦᠭᠦᠳᠡ ᠭᠡᠷ ᠭᠡᠷ ᠤᠷᠤᠭᠤ ᠪᠠᠨ ᠠᠮᠤᠷ ᠲᠠᠢᠪᠤᠩ ᠬᠠᠷᠢᠵᠠᠭᠠᠭ〉 ᠭᠡᠵᠦ ᠶᠣᠬᠣᠸᠠ ᠠᠢᠯᠠᠳᠤᠭᠰᠠᠨ》 ᠭᠡᠪᠡ᠃ 17 ᠢᠰᠷᠧᠯ ᠤᠨ ᠬᠠᠭᠠᠨ ᠶᠧᠬᠣᠱᠠᠹᠠᠲ ᠲᠤ᠄ 《ᠲᠡᠷᠡ ᠮᠢᠨᠦ ᠲᠠᠯᠠ ᠪᠠᠷ ᠰᠠᠢᠨ ᠢ ᠡᠰᠢ ᠦᠵᠡᠭᠦᠯᠳᠡᠭ ᠦᠭᠡᠢ᠂ ᠮᠠᠭᠤ ᠶᠢ ᠯᠠ ᠬᠡᠯᠡᠳᠡᠭ ᠭᠡᠵᠦ ᠪᠢ ᠲᠠᠨ ᠳᠤ ᠶᠠᠷᠢᠭᠰᠠᠨ ᠪᠢᠰᠢ ᠤᠤ︖》 ᠭᠡᠪᠡ᠃
18 ᠮᠢᠺᠠᠢᠶᠠ᠄ 《ᠲᠡᠭᠡᠪᠡᠯ ᠣᠳᠣ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠰᠣᠨᠣᠰᠣᠭᠲᠤᠨ᠃ ᠶᠣᠬᠣᠸᠠ ᠰᠡᠨᠲᠢ ᠳᠡᠭᠡᠨ ᠵᠠᠯᠠᠷᠠᠵᠤ᠂ ᠲᠡᠭᠦᠨ ᠦ ᠪᠠᠷᠠᠭᠤᠨ᠂ ᠵᠡᠭᠦᠨ ᠲᠠᠯᠠ ᠪᠠᠷ ᠲᠩᠷᠢ ᠶᠢᠨ ᠲᠦᠭ ᠲᠦᠮᠡᠨ ᠪᠦᠭᠦᠳᠡᠭᠡᠷ ᠵᠣᠭᠰᠣᠵᠤ ᠪᠠᠢᠬᠤ ᠶᠢ ᠪᠢ ᠬᠠᠷᠠᠭᠰᠠᠨ᠃ 19 ᠶᠣᠬᠣᠸᠠ᠄ 〈ᠢᠰᠷᠧᠯ ᠤᠨ ᠬᠠᠭᠠᠨ ᠠᠬᠠᠪ ᠤᠨ ᠷᠠᠮᠣᠲ ᠭᠢᠯᠧᠶᠠᠳ᠋ ᠤᠷᠤᠭᠤ ᠶᠠᠪᠤᠵᠤ ᠰᠥᠨᠥᠬᠦ ᠳᠦᠨᠢ ᠬᠡᠨ ᠤᠷᠤᠭᠤ ᠲᠠᠲᠠᠬᠤ ᠪᠤᠢ︖〉 ᠬᠡᠮᠡᠨ ᠠᠰᠠᠭᠤᠯᠠ᠃ ᠨᠢᠭᠡ ᠨᠢ ᠡᠢᠮᠦ ᠭᠡᠬᠦ ᠳᠦ᠂ ᠨᠥᠭᠥᠭᠡ ᠨᠢ ᠲᠡᠢᠮᠦ ᠭᠡᠵᠦ ᠪᠠᠢᠯᠠ᠃ 20 ᠲᠡᠭᠡᠲᠡᠯᠡ ᠨᠢᠭᠡ ᠰᠦᠨᠡᠰᠦ ᠭᠠᠷᠴᠤ ᠢᠷᠡᠨ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠵᠣᠭᠰᠣᠭᠠᠳ᠄ 〈ᠪᠢ ᠲᠡᠭᠦᠨ ᠢ ᠤᠷᠤᠭᠤ ᠲᠠᠲᠠᠶᠠ〉 ᠭᠡᠪᠡ᠃ ᠶᠣᠬᠣᠸᠠ᠄ 〈ᠶᠠᠭᠠᠬᠢᠵᠤ︖〉 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 21 ᠲᠡᠷᠡ᠄ 〈ᠪᠢ ᠡ᠊ᠨᠳᠡ ᠡᠴᠡ ᠭᠠᠷᠴᠤ ᠬᠠᠭᠤᠷᠲᠠᠭ ᠰᠦᠨᠡᠰᠦ ᠪᠣᠯᠣᠭᠠᠳ ᠲᠡᠭᠦᠨ ᠦ ᠪᠦᠬᠦ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠢᠨ ᠠᠮᠠᠨ ᠳᠤ ᠣᠷᠣᠶᠠ〉 ᠭᠡᠪᠡ᠃ ᠶᠣᠬᠣᠸᠠ᠄ 〈ᠴᠢ ᠯᠠᠪᠲᠠᠢ ᠲᠡᠭᠦᠨ ᠢ ᠤᠷᠤᠭᠤ ᠲᠠᠲᠠᠵᠤ ᠴᠢᠳᠠᠬᠤ ᠪᠣᠯᠣᠨᠠ᠃ ᠶᠠᠪᠤᠵᠤ᠂ ᠪᠡᠶᠡᠯᠡᠭᠦᠯᠦᠭᠲᠦᠨ〉 ᠭᠡᠯᠡ᠃ 22 ᠣᠳᠣ ᠬᠠᠷᠠᠭᠲᠤᠨ᠂ ᠶᠣᠬᠣᠸᠠ ᠲᠠᠨ ᠤ ᠡᠳᠡᠭᠡᠷ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠢᠨ ᠠᠮᠠᠨ ᠳᠤ ᠬᠠᠭᠤᠷᠲᠠᠭ ᠰᠦᠨᠡᠰᠦ ᠶᠢ ᠬᠢᠭᠰᠡᠨ︕ ᠲᠡᠢᠨ ᠬᠦ ᠶᠣᠬᠣᠸᠠ ᠲᠠᠨ ᠳᠤ ᠭᠠᠢ ᠭᠠᠮᠰᠢᠭ ᠢ ᠲᠤᠩ᠋ᠬᠠᠭᠯᠠᠭᠰᠠᠨ ᠶᠤᠮ》 ᠭᠡᠪᠡ᠃
23 ᠺᠧᠨᠠᠨᠠ ᠶᠢᠨ ᠬᠦᠦ ᠽᠧᠳᠧᠺᠢᠶᠠ ᠳᠥᠭᠥᠨ ᠢᠷᠡᠵᠦ᠂ ᠮᠢᠺᠠᠢᠶᠠ ᠶᠢᠨ ᠬᠠᠴᠠᠷ ᠢ ᠠᠯᠠᠭᠠᠳᠠᠭᠠᠳ᠄ 《ᠶᠣᠬᠣᠸᠠ ᠶᠢᠨ ᠰᠦᠨᠡᠰᠦ ᠨᠠᠳᠠ ᠠᠴᠠ ᠬᠠᠮᠢᠭᠠᠭᠤᠷ ᠵᠠᠢᠯᠠᠭᠠᠳ ᠴᠢᠮᠠ ᠳᠤ ᠶᠠᠷᠢᠭᠰᠠᠨ ᠪᠤᠢ︖》 ᠭᠡᠰᠡᠨ ᠳᠦ᠂ 24 ᠮᠢᠺᠠᠢᠶᠠ᠄ 《ᠬᠠᠷᠠ᠂ ᠴᠢ ᠥᠷᠥᠭᠡᠨ ᠡᠴᠡ ᠥᠷᠥᠭᠡ ᠤᠷᠤᠭᠤ ᠨᠢᠭᠤᠭᠳᠠᠬᠤ ᠪᠠᠷ ᠵᠢᠭᠤᠲᠠᠬᠤ ᠡᠳᠦᠷ ᠢᠶᠡᠨ ᠣᠢᠯᠠᠭᠠᠬᠤ ᠪᠣᠯᠣᠨᠠ》 ᠭᠡᠪᠡ᠃ 25 ᠢᠰᠷᠧᠯ ᠤᠨ ᠬᠠᠭᠠᠨ᠄ 《ᠮᠢᠺᠠᠢᠶᠠ ᠶᠢ ᠪᠠᠷᠢᠵᠤ᠂ ᠬᠣᠲᠠ ᠶᠢᠨ ᠵᠠᠬᠢᠷᠤᠭᠴᠢ ᠠᠮᠣᠨ ᠪᠣᠯᠣᠨ ᠬᠠᠭᠠᠨ ᠤ ᠬᠦᠦ ᠶᠣᠶᠠᠱ ᠲᠤ ᠬᠦᠷᠭᠡᠭᠡᠳ᠄ 26 ᠬᠠᠭᠠᠨ ᠡᠢᠨ ᠬᠦ ᠲᠤᠰᠢᠶᠠᠵᠤ ᠪᠠᠢᠨᠠ᠄ 〈ᠡᠨᠡ ᠬᠥᠮᠦᠨ ᠢ ᠭᠢᠨᠳᠠᠨ ᠳᠤ ᠬᠢᠵᠦ᠂ ᠨᠠᠮᠠᠶᠢ ᠡᠰᠡᠨ ᠮᠡᠨᠳᠦ ᠪᠤᠴᠠᠨ ᠢᠷᠡᠲᠡᠯᠡ ᠬᠣᠮᠰᠠᠬᠠᠨ ᠪᠣᠣᠪᠣ ᠤᠰᠤ ᠪᠠᠷ ᠥᠯ ᠵᠠᠯᠭᠠᠭᠤᠯᠵᠤ ᠪᠠᠢ〉 ᠭᠡᠵᠦ ᠬᠡᠯᠡ》 ᠭᠡᠬᠦ ᠳᠦ᠂ 27 ᠮᠢᠺᠠᠢᠶᠠ᠄ 《ᠬᠡᠷᠪᠡ ᠲᠠ ᠦᠨᠡᠬᠡᠷ ᠡᠰᠡᠨ ᠮᠡᠨᠳᠦ ᠪᠤᠴᠠᠵᠤ ᠢᠷᠡᠪᠡᠯ ᠶᠣᠬᠣᠸᠠ ᠨᠠᠳᠠ ᠪᠠᠷ ᠳᠠᠮᠵᠢᠭᠤᠯᠤᠨ ᠠᠢᠯᠠᠳᠤᠭᠰᠠᠨ ᠪᠢᠰᠢ》 ᠭᠡᠰᠡᠨ ᠪᠥᠭᠡᠳ ᠲᠡᠷᠡ ᠪᠠᠰᠠ᠄ 《ᠪᠦᠬᠦ ᠠᠷᠠᠳ ᠲᠦᠮᠡᠨ ᠠᠩ᠋ᠬᠠᠷᠤᠭᠲᠤᠨ》 ᠭᠡᠪᠡ᠃
ᠬᠠᠭᠠᠨ ᠠᠯᠠᠭᠳᠠᠪᠠ
28 ᠢᠰᠷᠧᠯ ᠤᠨ ᠬᠠᠭᠠᠨ ᠪᠡᠷ ᠶᠦᠳᠠ ᠶᠢᠨ ᠬᠠᠭᠠᠨ ᠶᠧᠬᠣᠱᠠᠹᠠᠲ ᠲᠠᠢ ᠬᠠᠮᠲᠤ ᠷᠠᠮᠣᠲ ᠭᠢᠯᠧᠶᠠᠳ᠋ ᠥᠭᠡᠳᠡ ᠬᠥᠳᠡᠯᠪᠡ᠃ 29 ᠢᠰᠷᠧᠯ ᠤᠨ ᠬᠠᠭᠠᠨ ᠪᠡᠷ ᠶᠧᠬᠣᠱᠠᠹᠠᠲ ᠲᠤ ᠬᠠᠨᠳᠤᠨ᠄ 《ᠪᠢ ᠵᠢᠰᠦ ᠪᠡᠨ ᠪᠤᠷᠤᠭᠤᠯᠠᠭᠠᠳ ᠲᠤᠯᠤᠯᠳᠤᠭᠠᠨ ᠳᠤ ᠣᠷᠣᠨᠠ᠂ ᠬᠠᠷᠢᠨ ᠲᠠ ᠥᠪᠡᠷ ᠦᠨ ᠢᠶᠠᠨ ᠬᠤᠪᠴᠠᠰᠤ ᠲᠠᠢ ᠪᠠᠨ ᠪᠠᠢᠭᠠᠷᠠᠢ》 ᠭᠡᠪᠡ᠃ ᠢᠩᠭᠢᠭᠡᠳ ᠢᠰᠷᠧᠯ ᠤᠨ ᠬᠠᠭᠠᠨ ᠵᠢᠰᠦ ᠪᠡᠨ ᠪᠤᠷᠤᠭᠤᠯᠤᠭᠠᠳ ᠲᠡᠳᠡ ᠨᠠᠷ ᠲᠤᠯᠤᠯᠳᠤᠭᠠᠨ ᠳᠤ ᠣᠷᠣᠯᠠ᠃ 30 ᠤᠤᠯ ᠨᠢ ᠠᠷᠠᠮ ᠤᠨ ᠬᠠᠭᠠᠨ ᠲᠡᠷᠭᠡᠲᠦ ᠴᠡᠷᠢᠭ ᠤᠨ ᠵᠠᠩᠵᠤᠨ ᠳᠠᠭᠠᠨ ᠵᠠᠬᠢᠨ᠄ 《ᠲᠠ ᠨᠠᠷ ᠲᠣᠮᠣ ᠵᠢᠵᠢᠭ ᠢ ᠨᠢ ᠢᠯᠭᠠᠯ ᠦᠭᠡᠢ ᠪᠠᠷ ᠪᠦᠦ ᠲᠤᠯᠤᠯᠳᠤ᠂ ᠵᠥᠪᠬᠡᠨ ᠢᠰᠷᠧᠯ ᠤᠨ ᠬᠠᠭᠠᠨ ᠲᠠᠢ ᠲᠤᠯᠤᠯᠳᠤᠭᠲᠤᠨ》 ᠭᠡᠰᠡᠨ ᠪᠠᠢᠯᠠ᠃ 31 ᠲᠡᠢᠮᠦ ᠡᠴᠡ ᠲᠡᠷᠭᠡᠲᠦ ᠴᠡᠷᠢᠭ ᠤᠨ ᠵᠠᠩᠵᠤᠨ ᠨᠠᠷ ᠶᠧᠬᠣᠱᠠᠹᠠᠲ ᠢ ᠬᠠᠷᠠᠭᠠᠳ᠄ 《ᠢᠰᠷᠧᠯ ᠤᠨ ᠬᠠᠭᠠᠨ ᠡᠨᠡ ᠪᠠᠢᠨᠠ》 ᠭᠡᠳ ᠲᠡᠭᠦᠨ ᠤᠷᠤᠭᠤ ᠡᠷᠭᠢᠵᠦ ᠳᠠᠭᠠᠷᠢᠵᠠᠢ᠃ ᠶᠧᠬᠣᠱᠠᠹᠠᠲ ᠴᠢᠩᠭ᠍ᠠ ᠪᠠᠷ ᠬᠠᠰᠬᠢᠷᠬᠤ ᠳᠤ᠂ ᠶᠣᠬᠣᠸᠠ ᠲᠡᠭᠦᠨ ᠳᠦ ᠲᠤᠰᠠᠯᠠᠪᠠ᠃ ᠪᠤᠷᠬᠠᠨ ᠲᠡᠳᠡᠨ ᠢ ᠲᠡᠭᠦᠨ ᠡᠴᠡ ᠬᠣᠯᠠᠳᠠᠭᠤᠯᠤᠭᠰᠠᠨ ᠶᠤᠮ᠃ 32 ᠲᠡᠷᠭᠡᠲᠦ ᠴᠡᠷᠢᠭ ᠤᠨ ᠵᠠᠩᠵᠤᠨ ᠨᠠᠷ ᠢᠰᠷᠧᠯ ᠤᠨ ᠬᠠᠭᠠᠨ ᠪᠢᠰᠢ ᠪᠣᠯᠬᠤ ᠶᠢ ᠨᠢ ᠮᠡᠳᠡᠭᠡᠳ ᠲᠡᠭᠦᠨ ᠡᠴᠡ ᠡᠷᠭᠢᠵᠡᠢ᠃ 33 ᠨᠢᠭᠡᠨ ᠬᠥᠮᠦᠨ ᠦ ᠵᠣᠷᠢᠯᠭᠠ ᠦᠭᠡᠢ ᠬᠠᠷᠪᠤᠭᠰᠠᠨ ᠰᠤᠮᠤ ᠢᠰᠷᠧᠯ ᠤᠨ ᠬᠠᠭᠠᠨ ᠤ ᠬᠤᠶᠠᠭ ᠤᠨ ᠬᠢᠨᠢ ᠵᠠᠪᠰᠠᠷ ᠢᠶᠠᠷ ᠣᠨᠣᠵᠠᠢ᠃ ᠬᠠᠭᠠᠨ ᠲᠡᠷᠭᠡᠨ ᠦ ᠪᠠᠨ ᠬᠥᠲᠥᠴᠢ ᠳᠤ᠄ 《ᠲᠡᠷᠭᠡ ᠶᠢ ᠡᠷᠭᠢᠭᠦᠯ᠂ ᠲᠤᠯᠤᠯᠳᠤᠭᠠᠨ ᠤ ᠲᠠᠯᠠᠪᠤᠷ ᠠᠴᠠ ᠭᠠᠷᠤᠶᠠ᠃ ᠪᠢ ᠰᠢᠷᠬᠠᠲᠤᠯᠠ》 ᠭᠡᠵᠦ ᠬᠡᠯᠡᠪᠡ᠃ 34 ᠭᠡᠪᠡᠴᠦ ᠲᠡᠷᠡ ᠡᠳᠦᠷ ᠦᠨ ᠲᠤᠯᠤᠯᠳᠤᠭᠠᠨ ᠰᠢᠷᠦᠭᠦᠨ ᠪᠠᠢᠭᠰᠠᠨ ᠪᠣᠯᠬᠣᠷ ᠢᠰᠷᠧᠯ ᠤᠨ ᠬᠠᠭᠠᠨ ᠠᠷᠠᠮᠴᠤᠳ ᠤᠨ ᠡᠮᠦᠨᠡ ᠲᠡᠷᠭᠡᠨ ᠳᠡᠭᠡᠷᠡ ᠪᠡᠨ ᠬᠥᠮᠦᠨ ᠢᠶᠡᠷ ᠲᠦᠰᠢᠭᠦᠯᠦᠨ ᠵᠣᠭᠰᠣᠭᠰᠠᠭᠠᠷ ᠪᠠᠢᠭᠠᠳ ᠨᠠᠷᠠ ᠵᠢᠷᠭᠠᠬᠤ ᠳᠤ ᠨᠠᠰᠤ ᠪᠠᠷᠠᠵᠠᠢ᠃