ᠱᠠᠰᠲᠢᠷ ᠤᠨ ᠳᠡᠳ᠋ ᠠᠷᠪᠠ ᠶᠢᠰᠦ
1 ᠶᠦᠳᠠ ᠶᠢᠨ ᠬᠠᠭᠠᠨ ᠶᠧᠬᠣᠱᠠᠹᠠᠲ ᠶᠧᠷᠦ᠋ᠰᠠᠯᠧᠮ ᠳᠠᠬᠢ ᠣᠷᠳᠣᠨ ᠳᠠᠭᠠᠨ ᠡᠰᠡᠨ ᠮᠡᠨᠳᠦ ᠪᠤᠴᠠᠵᠤ ᠢᠷᠡᠪᠡ᠃ 2 ᠬᠠᠨᠠᠨᠢ ᠶᠢᠨ ᠬᠦᠦ ᠪᠣᠱᠣᠭᠴᠢ ᠶᠧᠾᠦ᠋ ᠲᠡᠭᠦᠨ ᠦ ᠡᠮᠦᠨᠡ ᠭᠠᠷᠴᠤ ᠢᠷᠡᠭᠡᠳ᠂ ᠶᠧᠬᠣᠱᠠᠹᠠᠲ ᠬᠠᠭᠠᠨ ᠳᠤ᠄ 《ᠲᠠ ᠬᠣᠷᠣᠨ ᠮᠠᠭᠤ ᠬᠥᠮᠦᠨ ᠳᠦ ᠲᠤᠰᠠᠯᠠᠨ᠂ ᠶᠣᠬᠣᠸᠠ ᠶᠢ ᠦᠵᠡᠨ ᠶᠠᠳᠠᠭᠴᠢ ᠶᠢ ᠬᠠᠢᠷᠠᠯᠠᠨᠠ ᠭᠡᠵᠢ ᠤᠤ︖ ᠡᠭᠦᠨ ᠡᠴᠡ ᠪᠣᠯᠵᠤ ᠶᠣᠬᠣᠸᠠ ᠶᠢᠨ ᠠᠭᠤᠷ ᠬᠢᠯᠢᠩ ᠲᠠᠨ ᠤ ᠳᠡᠭᠡᠷᠡ ᠪᠠᠢᠬᠤ ᠪᠣᠯᠣᠨᠠ᠃ 3 ᠭᠡᠪᠡᠴᠦ ᠲᠠᠨ ᠳᠤ ᠰᠠᠢᠨ ᠦᠢᠯᠡᠰ ᠴᠤ ᠪᠠᠢᠭᠰᠠᠨ᠂ ᠲᠠ ᠡᠨᠡ ᠭᠠᠵᠠᠷ ᠠᠴᠠ ᠠᠱᠧᠷᠠ ᠶᠢᠨ ᠱᠣᠩ ᠤᠳ ᠢ ᠵᠠᠢᠯᠠᠭᠤᠯᠵᠤ᠂ ᠵᠢᠷᠦᠬᠡ ᠰᠡᠳᠬᠢᠯ ᠡᠴᠡ ᠪᠡᠨ ᠪᠤᠷᠬᠠᠨ ᠢ ᠬᠠᠢᠵᠤ ᠪᠠᠢᠭᠰᠠᠨ ᠪᠢᠯᠡ》 ᠭᠡᠪᠡ᠃
ᠶᠧᠬᠣᠱᠠᠹᠠᠲ ᠤᠨ ᠰᠢᠨᠡᠴᠢᠯᠡᠯᠲᠡ
4 ᠶᠧᠬᠣᠱᠠᠹᠠᠲ ᠶᠧᠷᠦ᠋ᠰᠠᠯᠧᠮ ᠳᠤ ᠰᠠᠭᠤᠵᠤ ᠪᠠᠢᠯᠠ᠃ ᠬᠠᠷᠢᠨ ᠲᠡᠷᠡ ᠪᠧᠷᠣᠲ ᠱᠧᠪᠠ ᠠᠴᠠ ᠡᠹᠷᠠᠢᠮ ᠤᠨ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠬᠦᠷᠲᠡᠯᠡᠬᠢ ᠠᠷᠠᠳ ᠲᠦᠮᠡᠨ ᠦ ᠳᠤᠮᠳᠠᠭᠤᠷ ᠳᠠᠬᠢᠨ ᠳᠠᠬᠢᠨ ᠶᠠᠪᠤᠵᠤ᠂ ᠲᠡᠳᠡᠨ ᠢ ᠡᠴᠢᠭᠡ ᠡᠪᠦᠭᠡᠳ ᠦᠨ ᠬᠢᠨᠢ ᠪᠤᠷᠬᠠᠨ ᠶᠣᠬᠣᠸᠠ ᠤᠷᠤᠭᠤ ᠡᠷᠭᠢᠭᠦᠯᠦᠨ ᠠᠪᠴᠢᠷᠠᠵᠤ ᠪᠠᠢᠯᠠ᠃ 5 ᠲᠡᠷᠡ ᠪᠡᠷ ᠶᠦᠳᠠ ᠨᠤᠲᠤᠭ ᠤᠨ ᠪᠡᠬᠢᠯᠡᠯᠲᠡᠲᠦ ᠬᠣᠲᠠ ᠪᠦᠷᠢ ᠳᠤ ᠰᠢᠭᠦᠭᠴᠢ ᠲᠣᠮᠢᠯᠠᠭᠰᠠᠨ ᠪᠥᠭᠡᠳ 6 ᠰᠢᠭᠦᠭᠴᠢᠳ ᠲᠤ᠄ 《ᠲᠠ ᠨᠠᠷ ᠬᠥᠮᠦᠨ ᠦ ᠡᠮᠦᠨᠡ ᠡᠴᠡ ᠪᠤᠰᠤ᠂ ᠪᠤᠷᠬᠠᠨ ᠤ ᠡᠮᠦᠨᠡ ᠡᠴᠡ ᠰᠢᠭᠦᠬᠦ ᠪᠣᠯᠣᠨᠠ᠂ ᠬᠢᠵᠦ ᠪᠠᠢᠭᠠ ᠵᠦᠢᠯ ᠢᠶᠠᠨ ᠲᠤᠩ᠋ᠭᠠᠭᠠᠷᠠᠢ᠃ ᠰᠢᠢᠳᠪᠦᠷᠢ ᠭᠠᠷᠭᠠᠬᠤ ᠳᠤ ᠴᠢᠨᠢ ᠶᠣᠬᠣᠸᠠ ᠲᠠ ᠨᠠᠷ ᠤᠨ ᠳᠡᠷᠭᠡᠳᠡ ᠪᠠᠢᠳᠠᠭ ᠪᠢᠯᠡ᠃ 7 ᠶᠣᠬᠣᠸᠠ ᠠᠴᠠ ᠡᠮᠢᠶᠡᠬᠦᠢ ᠨᠢ ᠲᠠ ᠨᠠᠷ ᠲᠤ ᠪᠠᠢᠬᠤ ᠪᠣᠯᠲᠤᠭᠠᠢ᠃ ᠬᠢᠵᠦ ᠪᠤᠢ ᠵᠦᠢᠯ ᠳᠡᠭᠡᠨ ᠪᠣᠯᠭᠣᠮᠵᠢᠲᠠᠢ ᠪᠠᠢ᠃ ᠵᠥᠪ ᠪᠤᠰᠤ ᠪᠤᠶᠤ ᠥᠷᠥᠭᠡᠰᠦᠯ ᠰᠢᠢᠳᠪᠦᠷᠢ᠂ ᠡᠰᠡᠪᠡᠯ ᠬᠡᠭᠡᠯᠢ ᠬᠠᠬᠤᠤᠯᠢ ᠠᠪᠬᠤ ᠶᠠᠪᠤᠳᠠᠯ ᠢ ᠪᠢᠳᠡᠨ ᠦ ᠪᠤᠷᠬᠠᠨ ᠶᠣᠬᠣᠸᠠ ᠬᠦᠯᠢᠴᠡᠬᠦ ᠦᠭᠡᠢ》 ᠭᠡᠵᠦ ᠬᠡᠯᠡᠳᠡᠭ ᠪᠠᠢᠪᠠ᠃
8 ᠶᠧᠬᠣᠱᠠᠹᠠᠲ ᠮᠥᠨ ᠶᠧᠷᠦ᠋ᠰᠠᠯᠧᠮ ᠳᠤ ᠯᠧᠸᠢᠴᠦᠳ᠂ ᠲᠠᠬᠢᠯᠴᠢᠳ ᠪᠣᠯᠣᠨ ᠢᠰᠷᠧᠯ ᠤᠨ ᠠᠢᠮᠠᠭ ᠤᠨ ᠲᠡᠷᠢᠭᠦᠨ ᠡᠴᠡ ᠵᠠᠷᠢᠮ ᠢ ᠨᠢ ᠲᠣᠮᠢᠯᠠᠵᠤ᠂ ᠲᠡᠳᠡᠨ ᠢᠶᠡᠷ ᠶᠣᠬᠣᠸᠠ ᠶᠢᠨ ᠲᠥᠯᠥᠭᠡᠨᠡ ᠰᠢᠢᠳᠪᠦᠷᠢ ᠭᠠᠷᠭᠠᠭᠤᠯᠵᠤ᠂ ᠢᠷᠭᠡᠨ ᠦ ᠬᠡᠷᠡᠭ ᠢ ᠰᠢᠢᠳᠪᠦᠷᠢᠯᠡᠭᠦᠯᠪᠡ᠂ ᠲᠡᠳᠡ ᠶᠧᠷᠦ᠋ᠰᠠᠯᠧᠮ ᠳᠤ ᠰᠠᠭᠤᠳᠠᠭ ᠪᠠᠢᠪᠠ᠃ 9 ᠶᠧᠬᠣᠱᠠᠹᠠᠲ ᠲᠡᠳᠡᠨ ᠳᠦ ᠵᠠᠬᠢᠨ᠄ 《ᠲᠠ ᠨᠠᠷ ᠶᠣᠬᠣᠸᠠ ᠠᠴᠠ ᠡᠮᠢᠶᠡᠵᠦ᠂ ᠢᠲᠡᠭᠡᠮᠵᠢ ᠲᠠᠢ ᠪᠠᠷ᠂ ᠴᠢᠩ ᠰᠡᠳᠬᠢᠯ ᠢᠶᠠᠷ ᠦᠢᠯᠡᠴᠢᠯᠡᠭᠡᠷᠡᠢ᠃ 10 ᠲᠠ ᠨᠠᠷ ᠤᠨ ᠠᠬᠠ ᠳᠡᠭᠦᠦᠰ ᠰᠠᠭᠤᠳᠠᠭ ᠬᠣᠲᠠ ᠠᠴᠠ ᠪᠠᠨ ᠴᠢᠰᠤ ᠤᠷᠤᠰᠬᠠᠭᠰᠠᠨ ᠬᠡᠷᠡᠭ ᠪᠤᠶᠤ ᠬᠠᠤᠯᠢ᠂ ᠲᠤᠰᠢᠶᠠᠯ᠂ ᠲᠣᠭᠲᠠᠭᠠᠯ᠂ ᠡᠰᠡᠪᠡᠯ ᠵᠢᠷᠤᠮ ᠤᠨ ᠲᠠᠯᠠ ᠪᠠᠷ ᠰᠢᠭᠦᠯᠭᠡᠬᠦ ᠪᠡᠷ ᠢᠷᠡᠬᠦ ᠪᠣᠯᠭᠠᠨ ᠳᠤ᠂ ᠶᠣᠬᠣᠸᠠ ᠶᠢᠨ ᠡᠰᠡᠷᠭᠦ ᠨᠢᠭᠦᠯ ᠦᠢᠯᠡᠳᠴᠦ ᠪᠣᠯᠬᠤ ᠦᠭᠡᠢ ᠶᠢ ᠲᠡᠳᠡᠨ ᠳᠦ ᠰᠠᠨᠠᠭᠤᠯᠤᠭᠲᠤᠨ᠃ ᠡᠰᠡ ᠲᠡᠭᠡᠪᠡᠯ ᠲᠡᠭᠦᠨ ᠦ ᠠᠭᠤᠷ ᠬᠢᠯᠢᠩ ᠲᠠ ᠨᠠᠷ ᠤᠨ ᠳᠡᠭᠡᠷᠡ ᠪᠠᠭᠤᠨᠠ᠃ ᠰᠠᠨᠠᠭᠤᠯᠪᠠᠯ ᠭᠡᠮ ᠪᠤᠷᠤᠭᠤ ᠨᠢ ᠲᠠ ᠨᠠᠷ ᠤᠨ ᠬᠢ ᠪᠢᠰᠢ ᠪᠣᠯᠣᠨᠠ᠃ 11 ᠬᠠᠷᠠ᠂ ᠶᠣᠬᠣᠸᠠ ᠳᠤ ᠬᠠᠮᠢᠶᠠ ᠲᠠᠢ ᠪᠦᠬᠦᠨ ᠦ ᠲᠠᠯᠠ ᠪᠠᠷ ᠲᠠᠬᠢᠯᠴᠢ ᠠᠮᠠᠷᠢᠶᠠ᠂ ᠬᠠᠭᠠᠨ ᠳᠤ ᠬᠠᠮᠢᠶᠠ ᠲᠠᠢ ᠪᠦᠬᠦᠨ ᠦ ᠲᠠᠯᠠ ᠪᠠᠷ ᠶᠦᠳᠠ ᠣᠪᠣᠭ ᠤᠨ ᠠᠬᠠᠮᠠᠳ ᠢᠱᠮᠠᠶᠧᠯ ᠤᠨ ᠬᠦᠦ ᠽᠧᠪᠠᠳᠢᠶᠠ ᠲᠠ ᠨᠠᠷ ᠢ ᠤᠳᠤᠷᠢᠳᠬᠤ ᠪᠥᠭᠡᠳ ᠯᠧᠸᠢᠴᠦᠳ ᠲᠠ ᠨᠠᠷ ᠤᠨ ᠳᠠᠭᠠᠭᠠᠮᠠᠯ ᠪᠣᠯᠣᠨᠠ᠃ ᠲᠤᠤᠱᠲᠠᠢ ᠦᠢᠯᠡᠳᠦᠭᠲᠦᠨ᠃ ᠶᠣᠬᠣᠸᠠ ᠵᠥᠪ ᠰᠢᠳᠤᠷᠭᠤ ᠬᠥᠮᠦᠰ ᠲᠡᠢ ᠬᠠᠮᠲᠤ ᠪᠠᠢᠳᠠᠭ ᠶᠤᠮ》 ᠭᠡᠪᠡ᠃