ᠱᠠᠰᠲᠢᠷ ᠤᠨ ᠳᠡᠳ᠋ ᠬᠣᠷᠢ
ᠳᠠᠭᠠᠳᠬᠠᠵᠤ ᠢᠯᠠᠪᠠ
1 ᠡᠭᠦᠨ ᠦ ᠳᠠᠷᠠᠭᠠ ᠮᠣᠶᠠᠪᠴᠤᠳ ᠪᠣᠯᠣᠨ ᠠᠮᠣᠨᠴᠤᠳ ᠬᠡᠰᠡᠭ ᠮᠧᠶᠦ᠋ᠨᠴᠦᠳ ᠲᠡᠢ ᠬᠠᠮᠲᠤ ᠪᠠᠷ ᠶᠧᠬᠣᠱᠠᠹᠠᠲ ᠯᠤᠭᠠ ᠳᠠᠢᠲᠤᠬᠤ ᠪᠠᠷ ᠢᠷᠡᠪᠡ᠃ 2 ᠬᠡᠰᠡᠭ ᠬᠥᠮᠦᠨ ᠢᠷᠡᠵᠦ᠂ ᠶᠧᠬᠣᠱᠠᠹᠠᠲ ᠲᠤ ᠮᠡᠳᠡᠭᠦᠯᠦᠨ᠄ 《ᠳᠠᠯᠠᠢ ᠶᠢᠨ ᠴᠢᠨᠠᠳᠤ ᠲᠠᠯᠠ ᠶᠢᠨ ᠡᠳᠣᠮ ᠠᠴᠠ ᠶᠡᠬᠡ ᠴᠡᠷᠢᠭ ᠲᠠᠨ ᠤᠷᠤᠭᠤ ᠢᠷᠡᠵᠦ ᠪᠠᠢᠨᠠ᠃ ᠣᠳᠣ ᠲᠡᠳᠡ ᠬᠠᠽᠠᠽᠣᠨ ᠲᠠᠮᠠᠷ ᠭᠡᠭᠳᠡᠳᠡᠭ ᠧᠨ ᠭᠧᠳᠢ ᠳᠤ ᠪᠠᠢᠨᠠ》 ᠭᠡᠪᠡ᠃ 3 ᠶᠧᠬᠣᠱᠠᠹᠠᠲ ᠠᠶᠤᠭᠰᠠᠨ ᠪᠣᠯᠪᠠᠴᠤ ᠶᠣᠬᠣᠸᠠ ᠶᠢ ᠬᠠᠢᠬᠤ ᠪᠠᠷ ᠰᠡᠳᠬᠢᠯ ᠰᠢᠭᠤᠳᠴᠤ᠂ ᠶᠦᠳᠠ ᠳᠠᠶᠠᠭᠠᠷ ᠪᠠᠴᠠᠭ ᠪᠠᠷᠢᠯᠲᠠ ᠶᠢ ᠵᠠᠷᠯᠠᠪᠠ᠃ 4 ᠶᠦᠳᠠᠴᠤᠳ ᠶᠣᠬᠣᠸᠠ ᠠᠴᠠ ᠲᠤᠰᠠᠯᠠᠮᠵᠢ ᠭᠤᠶᠤᠬᠤ ᠪᠠᠷ ᠴᠤᠭᠯᠠᠷᠠᠵᠠᠢ᠃ ᠲᠡᠳᠡ ᠦᠨᠡᠬᠡᠷ ᠶᠣᠬᠣᠸᠠ ᠶᠢ ᠬᠠᠢᠬᠤ ᠭᠡᠵᠦ ᠶᠦᠳᠠ ᠶᠢᠨ ᠬᠣᠲᠠ ᠪᠣᠯᠭᠠᠨ ᠠᠴᠠ ᠢᠷᠡᠭᠰᠡᠨ ᠪᠠᠢᠯᠠ᠃
5 ᠲᠡᠭᠡᠭᠡᠳ ᠶᠧᠬᠣᠱᠠᠹᠠᠲ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠰᠢᠨᠡ ᠬᠠᠰᠢᠶᠠᠨ ᠳᠤ ᠴᠤᠭᠯᠠᠷᠠᠭᠰᠠᠨ ᠶᠦᠳᠠ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠤᠨ ᠴᠢᠭᠤᠯᠭᠠᠨ ᠤ ᠳᠤᠮᠳᠠ ᠵᠣᠭᠰᠣᠭᠠᠳ᠄ 6 《ᠪᠢᠳᠡᠨ ᠦ ᠡᠴᠢᠭᠡ ᠡᠪᠦᠭᠡᠳ ᠦᠨ ᠪᠤᠷᠬᠠᠨ ᠶᠣᠬᠣᠸᠠ ᠡ᠂ ᠲᠩᠷᠢ ᠳᠠᠬᠢ ᠪᠤᠷᠬᠠᠨ ᠨᠢ ᠲᠠ ᠪᠢᠰᠢ ᠤᠤ︖ ᠳᠡᠯᠡᠬᠡᠢ ᠶᠢᠨ ᠪᠦᠬᠦ ᠬᠠᠭᠠᠨᠴᠢᠯᠠᠯ ᠢ ᠵᠠᠬᠢᠷᠳᠠᠭ ᠨᠢ ᠲᠠ ᠪᠢᠰᠢ ᠤᠤ︖ ᠲᠠᠨ ᠤ ᠮᠤᠲᠤᠷ ᠲᠤ ᠬᠦᠴᠦ ᠴᠢᠳᠠᠯ ᠪᠤᠢ᠂ ᠲᠠᠨ ᠤ ᠡᠮᠦᠨᠡ ᠵᠣᠭᠰᠣᠵᠤ ᠴᠢᠳᠠᠬᠤ ᠬᠡᠨ ᠴᠤ ᠠᠯᠠᠭᠠ᠃ 7 ᠪᠢᠳᠡᠨ ᠦ ᠪᠤᠷᠬᠠᠨ᠂ ᠥᠪᠡᠷ ᠦᠨ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠤᠨ ᠡᠮᠦᠨᠡ ᠡᠴᠡ ᠡᠨᠡ ᠨᠤᠲᠤᠭ ᠤᠨ ᠤᠤᠭᠠᠯ ᠬᠥᠮᠦᠰ ᠢ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠵᠤ᠂ ᠭᠠᠵᠠᠷ ᠨᠤᠲᠤᠭ ᠢ ᠨᠢ ᠥᠪᠡᠷ ᠦᠨ ᠢᠶᠠᠨ ᠨᠠᠢᠵᠢ ᠠᠪᠷᠠᠬᠠᠮ ᠤᠨ ᠦᠷᠡ ᠤᠳᠤᠮ ᠳᠤ ᠮᠥᠩᠬᠡᠳᠡ ᠥᠭᠭᠥᠭᠰᠡᠨ ᠨᠢ ᠲᠠ ᠪᠢᠰᠢ ᠤᠤ︖ 8 ᠲᠡᠳᠡ ᠡ᠊ᠨᠳᠡ ᠠᠮᠢᠳᠤᠷᠠᠵᠤ᠂ ᠡ᠊ᠨᠳᠡ ᠲᠠᠨ ᠤ ᠨᠡᠷᠡ ᠳᠦ ᠵᠣᠷᠢᠭᠤᠯᠤᠨ ᠠᠷᠢᠭᠤᠨ ᠭᠠᠵᠠᠷ ᠪᠠᠷᠢᠵᠤ᠂ 9 〈ᠪᠢᠳᠡᠨ ᠦ ᠳᠡᠭᠡᠷᠡ ᠢᠯᠳᠦᠨ ᠦ ᠰᠢᠳᠬᠡᠯ᠂ ᠲᠠᠬᠤᠯ᠂ ᠡᠰᠡᠪᠡᠯ ᠥᠯᠥᠰᠬᠥᠯᠡᠩ ᠦᠨ ᠭᠠᠮᠰᠢᠭ ᠪᠠᠭᠤᠬᠤ ᠳᠤ᠂ ᠪᠢᠳᠡ ᠡᠨᠡ ᠥᠷᠭᠥᠭᠡᠨ ᠦ ᠡᠮᠦᠨᠡ᠂ ᠲᠠᠨ ᠤ ᠨᠡᠷᠡ ᠪᠠᠢᠭᠠ ᠡᠨᠡ ᠥᠷᠭᠥᠭᠡᠨ ᠳᠦ ᠲᠠᠨ ᠤ ᠡᠮᠦᠨᠡ ᠵᠣᠭᠰᠣᠭᠠᠳ ᠵᠣᠪᠠᠯᠠᠩ ᠳᠤᠮᠳᠠ ᠪᠠᠨ ᠲᠠᠨ ᠤᠷᠤᠭᠤ ᠬᠠᠰᠬᠢᠷᠪᠠᠯ ᠲᠠ ᠰᠣᠨᠣᠰᠴᠤ᠂ ᠪᠢᠳᠡᠨ ᠢ ᠠᠪᠤᠷᠠᠬᠤ ᠪᠣᠯᠣᠨᠠ〉 ᠭᠡᠰᠡᠨ ᠪᠢᠯᠡ᠃ 10 ᠣᠳᠣ ᠠᠮᠣᠨ᠂ ᠮᠣᠶᠠᠪ᠂ ᠰᠧᠷ ᠠᠭᠤᠯᠠᠨ ᠠᠴᠠ ᠢᠷᠡᠭᠰᠡᠨ ᠡᠨᠡ ᠬᠥᠮᠦᠰ ᠢ ᠬᠠᠷᠠᠭᠠᠴᠢ᠃ ᠲᠠ ᠶᠧᠵᠢᠫᠲ ᠡᠴᠡ ᠭᠠᠷᠤᠭᠰᠠᠨ ᠢᠰᠷᠧᠯᠴᠦᠳ ᠲᠦ ᠡᠨᠡ ᠬᠥᠮᠦᠰ ᠦᠨ ᠨᠤᠲᠤᠭ ᠲᠤ ᠣᠷᠣᠬᠤ ᠶᠢ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ ᠲᠤᠯᠠ ᠢᠰᠷᠧᠯᠴᠦᠳ ᠲᠡᠳᠡᠨ ᠢ ᠤᠰᠠᠳᠬᠠᠯ ᠦᠭᠡᠢ ᠴᠢᠭᠯᠡᠯ ᠢᠶᠡᠨ ᠥᠭᠡᠷᠡᠴᠢᠯᠡᠭᠰᠡᠨ ᠪᠢᠯᠡ᠃ 11 ᠲᠡᠳᠡᠨ ᠦ ᠥᠭᠴᠦ ᠪᠠᠢᠭᠠ ᠬᠠᠷᠢᠭᠤ ᠶᠢ ᠬᠠᠷᠠᠭᠠᠴᠢ᠂ ᠲᠡᠳᠡ ᠲᠠᠨ ᠤ ᠪᠢᠳᠡᠨ ᠳᠦ ᠥᠪ ᠪᠣᠯᠭᠠᠨ ᠥᠭᠭᠥᠭᠰᠡᠨ ᠡᠨᠡ ᠭᠠᠵᠠᠷ ᠠᠴᠠ ᠪᠢᠳᠡᠨ ᠢ ᠬᠥᠭᠡᠭᠡᠬᠦ ᠪᠡᠷ ᠢᠷᠡᠯᠡ᠃ 12 ᠪᠢᠳᠡᠨ ᠦ ᠪᠤᠷᠬᠠᠨ᠂ ᠲᠠ ᠲᠡᠳᠡᠨ ᠢ ᠰᠢᠳᠬᠡᠬᠦ ᠦᠭᠡᠢ ᠭᠡᠵᠢ ᠤᠤ︖ ᠪᠢᠳᠡ ᠰᠤᠯᠠ ᠳᠣᠷᠣᠢ ᠪᠣᠯᠬᠣᠷ ᠪᠢᠳᠡᠨ ᠢ ᠴᠣᠬᠢᠬᠤ ᠪᠠᠷ ᠢᠷᠡᠵᠦ ᠪᠤᠢ ᠡᠨᠡ ᠠᠰᠤᠷᠤ ᠶᠡᠬᠡ ᠴᠡᠷᠢᠭ ᠤᠨ ᠡᠮᠦᠨᠡ ᠶᠠᠭᠤ ᠬᠢᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ᠂ ᠲᠠᠨ ᠢ ᠯᠠ ᠬᠠᠷᠠᠵᠤ ᠪᠠᠢᠨᠠ》 ᠭᠡᠪᠡ᠃ 13 ᠪᠦᠬᠦ ᠶᠦᠳᠠᠴᠤᠳ ᠡᠬᠡᠨᠡᠷ ᠬᠡᠦᠬᠡᠳ᠂ ᠪᠠᠭᠠᠴᠤᠳ ᠲᠠᠢ ᠪᠠᠨ ᠬᠠᠮᠲᠤ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠵᠣᠭᠰᠣᠵᠤ ᠪᠠᠢᠪᠠ᠃
14 ᠲᠡᠭᠡᠲᠡᠯᠡ ᠶᠣᠬᠣᠸᠠ ᠶᠢᠨ ᠰᠦᠨᠡᠰᠦ ᠴᠢᠭᠤᠯᠭᠠᠨ ᠤ ᠳᠤᠮᠳᠠ᠂ ᠯᠧᠸᠢ ᠬᠥᠮᠦᠨ ᠶᠠᠬᠠᠽᠢᠶᠧᠯ ᠤᠨ ᠳᠡᠭᠡᠷᠡ ᠪᠠᠭᠤᠯᠠ᠃ ᠶᠠᠬᠠᠽᠢᠶᠧᠯ ᠪᠣᠯ ᠠᠰᠠᠹ ᠤᠨ ᠦᠷᠡ ᠤᠳᠤᠮ ᠮᠠᠲ᠋ᠠᠨᠢᠶᠠ ᠶᠢᠨ ᠭᠤᠴᠢ᠂ ᠶᠧᠶᠧᠯ ᠤᠨ ᠵᠢᠴᠢ᠂ ᠪᠧᠨᠠᠢᠶᠠ ᠶᠢᠨ ᠠᠴᠢ᠂ ᠽᠧᠺᠠᠷᠢᠶᠠ ᠶᠢᠨ ᠬᠦᠦ ᠪᠢᠯᠡ᠃ 15 ᠲᠡᠷᠡ ᠪᠡᠷ᠄ 《ᠪᠦᠬᠦ ᠶᠦᠳᠠ᠂ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠪᠣᠯᠣᠨ ᠶᠧᠬᠣᠱᠠᠹᠠᠲ ᠬᠠᠭᠠᠨ ᠡ᠂ ᠰᠣᠨᠣᠰᠴᠠᠭᠠ᠃ ᠶᠣᠬᠣᠸᠠ ᠲᠠ ᠨᠠᠷ ᠲᠤ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠡᠨᠡ ᠶᠡᠬᠡ ᠴᠡᠷᠢᠭ ᠡᠴᠡ ᠪᠣᠯᠵᠤ ᠪᠦᠦ ᠠᠶᠤ᠂ ᠪᠦᠦ ᠰᠢᠨᠲᠠᠷᠠ᠃ ᠡᠨᠡ ᠲᠤᠯᠤᠯᠳᠤᠭᠠᠨ ᠲᠠ ᠨᠠᠷ ᠤᠨ ᠬᠢ ᠪᠢᠰᠢ᠂ ᠬᠠᠷᠢᠨ ᠪᠤᠷᠬᠠᠨ ᠤ ᠬᠢ ᠶᠤᠮ᠃ 16 ᠲᠠ ᠨᠠᠷ ᠮᠠᠷᠭᠠᠰᠢ ᠲᠡᠳᠡᠨ ᠤᠷᠤᠭᠤ ᠪᠠᠭᠤᠵᠤ ᠶᠠᠪᠤᠭᠲᠤᠨ᠃ ᠲᠡᠳᠡ ᠯᠠᠪᠲᠠᠢ ᠽᠢᠽ ᠤᠨ ᠥᠭᠰᠥᠭᠦᠷ ᠵᠠᠮ ᠢᠶᠠᠷ ᠭᠠᠷᠴᠤ ᠢᠷᠡᠬᠦ ᠪᠣᠯᠣᠨᠠ᠂ ᠲᠠ ᠨᠠᠷ ᠲᠡᠳᠡᠨ ᠲᠡᠢ ᠶᠧᠷᠦ᠋ᠶᠧᠯ ᠤᠨ ᠴᠥᠯ ᠦᠨ ᠡᠮᠦᠨᠡ ᠬᠥᠨᠳᠡᠢ ᠶᠢᠨ ᠮᠤᠬᠤᠷ ᠲᠤ ᠲᠠᠭᠠᠷᠠᠯᠳᠤᠬᠤ ᠪᠣᠯᠣᠨᠠ᠃ 17 ᠲᠠ ᠨᠠᠷ ᠡᠨᠡ ᠲᠤᠯᠤᠯᠳᠤᠭᠠᠨ ᠳᠤ ᠳᠠᠢᠲᠤᠬᠤ ᠬᠡᠷᠡᠭ ᠦᠭᠡᠢ᠃ ᠬᠠᠷᠢᠨ ᠵᠢᠭᠰᠠᠭᠠᠯ ᠪᠡᠯᠡᠳᠴᠦ ᠵᠣᠭᠰᠣᠭᠠᠳ᠂ ᠶᠣᠬᠣᠸᠠ ᠶᠢᠨ ᠠᠪᠤᠷᠠᠯ ᠢ 21 ᠦᠵᠡᠭᠲᠦᠨ᠃ ᠥ᠂ ᠶᠦᠳᠠ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠡ᠂ ᠶᠣᠬᠣᠸᠠ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠨᠠ᠃ ᠪᠦᠦ ᠠᠶᠤ᠂ ᠪᠦᠦ ᠰᠢᠨᠲᠠᠷᠠ᠃ ᠮᠠᠷᠭᠠᠰᠢ ᠲᠡᠳᠡᠨ ᠤᠷᠤᠭᠤ ᠭᠠᠷᠴᠤ ᠶᠠᠪᠤ᠂ ᠶᠣᠬᠣᠸᠠ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠨᠠ〉》 ᠭᠡᠪᠡ᠃
18 ᠶᠧᠬᠣᠱᠠᠹᠠᠲ ᠨᠢᠭᠤᠷ ᠢᠶᠠᠨ ᠭᠠᠵᠠᠷ ᠲᠤ ᠬᠦᠷᠭᠡᠨ ᠪᠥᠬᠥᠢᠬᠦ ᠳᠦ᠂ ᠪᠦᠬᠦ ᠶᠦᠳᠠ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠪᠥᠬᠥᠢᠨ᠂ ᠶᠣᠬᠣᠸᠠ ᠳᠤ ᠮᠥᠷᠭᠥᠵᠡᠢ᠃ 19 ᠯᠧᠸᠢᠴᠦᠳ ᠦᠨ ᠳᠤᠮᠳᠠ ᠠᠴᠠ ᠵᠠᠷᠢᠮ ᠺᠣᠬᠠᠲ᠋ᠴᠤᠳ᠂ ᠺᠣᠷᠠᠴᠤᠳ ᠪᠣᠰᠣᠭᠠᠳ ᠮᠠᠰᠢ ᠴᠢᠩᠭ᠍ᠠ ᠳᠠᠭᠤ ᠪᠠᠷ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢ ᠮᠠᠭᠲᠠᠵᠠᠭᠠᠵᠠᠢ᠃
20 ᠲᠡᠳᠡ ᠥᠷᠯᠥᠭᠡ ᠡᠷᠲᠡᠯᠡᠨ ᠪᠣᠰᠣᠭᠠᠳ᠂ ᠲᠧᠺᠣᠶᠠ ᠶᠢᠨ ᠴᠥᠯ ᠤᠷᠤᠭᠤ ᠬᠥᠳᠡᠯᠪᠡ᠃ ᠲᠡᠳᠡ ᠬᠥᠳᠡᠯᠬᠦ ᠳᠦ᠂ ᠶᠧᠬᠣᠱᠠᠹᠠᠲ ᠪᠣᠰᠴᠤ᠄ 《ᠶᠦᠳᠠ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠤᠨ ᠰᠠᠭᠤᠭᠠᠯᠢᠴᠢᠳ ᠡ᠂ ᠮᠢᠨᠦᠬᠢ ᠶᠢ ᠰᠣᠨᠣᠰᠴᠠᠭᠠ᠃ ᠲᠠ ᠨᠠᠷ ᠶᠣᠬᠣᠸᠠ ᠪᠤᠷᠬᠠᠨ ᠳᠠᠭᠠᠨ ᠪᠠᠲᠤ ᠢᠲᠡᠭᠡ᠂ ᠲᠡᠭᠡᠪᠡᠯ ᠲᠠ ᠨᠠᠷ ᠪᠠᠲᠤᠵᠢᠨᠠ᠃ ᠲᠡᠭᠦᠨ ᠦ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠲᠤ ᠪᠠᠲᠤ ᠢᠲᠡᠭᠡ᠂ ᠲᠡᠭᠡᠪᠡᠯ ᠪᠦᠲᠦᠨᠡ》 ᠭᠡᠪᠡ᠃ 21 ᠶᠧᠬᠣᠱᠠᠹᠠᠲ ᠠᠷᠠᠳ ᠣᠯᠠᠨ ᠲᠠᠢ ᠵᠥᠪᠯᠡᠯᠳᠦᠭᠰᠡᠨ ᠦ ᠳᠠᠷᠠᠭᠠ᠂ ᠶᠣᠬᠣᠸᠠ ᠶᠢ ᠮᠠᠭᠲᠠᠨ ᠳᠠᠭᠤᠯᠠᠵᠤ᠂ ᠲᠡᠭᠦᠨ ᠦ ᠠᠷᠢᠭᠤᠨ ᠠᠯᠳᠠᠷ ᠢ ᠮᠠᠭᠲᠠᠬᠤ ᠬᠥᠮᠦᠰ ᠢ ᠲᠣᠮᠢᠯᠠᠵᠠᠢ᠃ ᠲᠡᠳᠡ ᠴᠡᠷᠢᠭ ᠤᠳ ᠤᠨ ᠡᠮᠦᠨᠡ ᠶᠠᠪᠤᠵᠤ᠄ 《ᠶᠣᠬᠣᠸᠠ ᠳᠤ ᠲᠠᠯᠠᠷᠬᠠᠯ ᠡᠷᠭᠦᠶᠡ ᠲᠡᠭᠦᠨ ᠦ ᠬᠠᠢᠷᠠ ᠮᠥᠩᠬᠡᠳᠡ》 ᠬᠡᠮᠡᠨ ᠳᠠᠭᠤᠯᠠᠵᠤ ᠪᠠᠢᠯᠠ᠃
22 ᠲᠡᠳᠡ ᠨᠠᠷ ᠳᠠᠭᠤᠯᠠᠨ ᠮᠠᠭᠲᠠᠵᠤ ᠡᠬᠢᠯᠡᠬᠦ ᠳᠦ᠂ ᠶᠣᠬᠣᠸᠠ ᠠᠮᠣᠨ᠂ ᠮᠣᠶᠠᠪ ᠪᠣᠯᠣᠨ ᠰᠧᠷ ᠠᠭᠤᠯᠠ ᠠᠴᠠ ᠶᠦᠳᠠ ᠶᠢ ᠴᠣᠬᠢᠬᠤ ᠪᠠᠷ ᠢᠷᠡᠵᠦ ᠪᠤᠢ ᠬᠥᠮᠦᠰ ᠲᠦ ᠪᠦᠭᠬᠦᠭᠦᠯ ᠲᠠᠯᠪᠢᠭᠰᠠᠨ ᠳᠤ᠂ ᠲᠡᠳᠡ ᠪᠤᠲᠠ ᠴᠣᠬᠢᠭᠳᠠᠪᠠ᠃ 23 ᠠᠮᠣᠨᠴᠤᠳ ᠪᠣᠯᠣᠨ ᠮᠣᠶᠠᠪᠴᠤᠳ ᠰᠧᠷ ᠠᠭᠤᠯᠠ ᠶᠢᠨ ᠬᠢᠨ ᠤ ᠡᠰᠡᠷᠭᠦ ᠪᠣᠰᠴᠤ᠂ ᠲᠡᠳᠡᠨ ᠢ ᠤᠰᠠᠳᠬᠠᠵᠤ ᠬᠦᠢᠰᠦ ᠲᠡᠮᠲᠡᠷᠢᠪᠡ᠃ ᠲᠡᠳᠡ ᠰᠧᠷ ᠤᠨ ᠬᠢᠨ ᠢ ᠡᠴᠦᠰᠯᠡᠭᠦᠯᠦᠭᠰᠡᠨ ᠦ ᠳᠠᠷᠠᠭᠠ ᠨᠢᠭᠡ ᠨᠢᠭᠡᠨ ᠢᠶᠡᠨ ᠳᠠᠭᠠᠷᠢᠵᠤ ᠤᠰᠠᠳᠬᠠᠪᠠ᠃
24 ᠶᠦᠳᠠᠴᠤᠳ ᠴᠥᠯ ᠦᠨ ᠪᠠᠷᠠ ᠬᠠᠷᠠᠭᠳᠠᠬᠤ ᠭᠠᠵᠠᠷ ᠲᠤ ᠬᠦᠷᠴᠦ᠂ ᠥᠨᠥᠬᠢ ᠶᠡᠬᠡ ᠴᠡᠷᠢᠭ ᠢ ᠬᠠᠷᠠᠯᠠ᠂ ᠭᠠᠵᠠᠷ ᠰᠠᠢ ᠦᠭᠡᠢ ᠤᠨᠳᠤᠢ ᠰᠤᠨᠳᠤᠢ ᠬᠡᠭᠦᠷ ᠪᠣᠯᠵᠤ᠂ ᠲᠡᠳᠡᠨ ᠦ ᠨᠢᠭᠡ ᠨᠢ ᠴᠤ ᠮᠤᠯᠲᠤᠷᠠᠭᠰᠠᠨ ᠦᠭᠡᠢ ᠠᠵᠢ᠃ 25 ᠶᠧᠬᠣᠱᠠᠹᠠᠲ ᠠᠷᠠᠳ ᠣᠯᠠᠨ ᠲᠠᠢ ᠪᠠᠨ ᠬᠠᠮᠲᠤ ᠣᠯᠵᠠ ᠣᠯᠬᠤ ᠪᠠᠷ ᠲᠡᠰᠢ ᠣᠴᠢᠵᠤ ᠦᠵᠡᠬᠦ ᠳᠦ᠂ ᠠᠰᠤᠷᠤ ᠶᠡᠬᠡ ᠡᠳ᠋ ᠬᠥᠷᠥᠩᠭᠡ᠂ ᠬᠤᠪᠴᠠᠰᠤ ᠬᠤᠨᠠᠷ ᠪᠣᠯᠣᠨ ᠦᠨᠡᠲᠦ ᠵᠦᠢᠯᠡᠰ ᠪᠠᠢᠯᠠ᠃ ᠣᠯᠵᠠ ᠨᠢ ᠳᠠᠭᠠᠭᠠᠵᠤ ᠶᠠᠳᠠᠮᠠ ᠠᠷᠪᠢᠨ ᠪᠣᠯᠬᠣᠷ ᠲᠡᠳᠡ ᠲᠡᠳᠡᠭᠡᠷ ᠢ ᠭᠤᠷᠪᠠᠨ ᠡᠳᠦᠷ ᠦᠨ ᠲᠤᠷᠰᠢ ᠴᠤᠭᠯᠠᠭᠤᠯᠵᠤ ᠠᠪᠴᠢᠷᠠᠭᠰᠠᠨ ᠶᠤᠮ᠃ 26 ᠳᠥᠷᠪᠡᠳᠡᠬᠢ ᠡᠳᠦᠷ ᠨᠢ ᠲᠡᠳᠡ ᠪᠧᠷᠠᠺᠠ 22 ᠶᠢᠨ ᠬᠥᠨᠳᠡᠢ ᠳᠦ ᠴᠤᠭᠯᠠᠷᠠᠵᠤ᠂ ᠲᠡᠨᠳᠡ ᠶᠣᠬᠣᠸᠠ ᠶᠢ ᠮᠠᠭᠲᠠᠭᠰᠠᠨ ᠪᠠᠢᠨᠠ᠃ ᠡᠭᠦᠨ ᠦ ᠤᠯᠠᠮ ᠢᠶᠠᠷ ᠲᠡᠷᠡ ᠭᠠᠵᠠᠷ ᠥᠨᠥᠳᠥᠷ ᠬᠦᠷᠲᠡᠯᠡ 《ᠪᠧᠷᠠᠺᠠ ᠶᠢᠨ ᠬᠥᠨᠳᠡᠢ》 ᠭᠡᠵᠦ ᠨᠡᠷᠡᠯᠡᠭᠳᠡᠭᠰᠡᠭᠡᠷ ᠪᠠᠢᠨᠠ᠃ 27 ᠶᠧᠬᠣᠱᠠᠹᠠᠲ ᠢᠶᠠᠷ ᠤᠳᠤᠷᠢᠳᠤᠭᠤᠯᠤᠭᠰᠠᠨ ᠶᠦᠳᠠ᠂ ᠶᠧᠷᠦ᠋ᠰᠠᠯᠧᠮ ᠤᠨ ᠬᠥᠮᠦᠰ ᠪᠦᠭᠦᠳᠡᠭᠡᠷ ᠢᠶᠡᠨ ᠶᠧᠷᠦ᠋ᠰᠠᠯᠧᠮ ᠳᠤ ᠪᠠᠶᠠᠷ ᠲᠠᠢ ᠪᠠᠷ ᠪᠤᠴᠠᠵᠠᠢ᠃ ᠶᠣᠬᠣᠸᠠ ᠲᠡᠳᠡᠨ ᠢ ᠳᠠᠢᠰᠤᠨ ᠠᠴᠠ ᠨᠢ ᠴᠢᠯᠥᠭᠡᠯᠡᠨ ᠦᠨᠡᠬᠡᠷ ᠪᠠᠶᠠᠷᠯᠠᠭᠤᠯᠤᠭᠰᠠᠨ ᠶᠤᠮ᠃ 28 ᠢᠩᠭᠢᠭᠡᠳ ᠲᠡᠳᠡ ᠬᠤᠭᠤᠷ᠂ ᠶᠠᠲᠤᠭᠠ᠂ ᠪᠦᠷᠢᠶᠡᠨ ᠳᠠᠭᠤᠨ ᠤ ᠳᠤᠮᠳᠠ ᠶᠧᠷᠦ᠋ᠰᠠᠯᠧᠮ ᠳᠤ ᠣᠷᠣᠭᠠᠳ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠦ ᠣᠴᠢᠵᠠᠢ᠃ 29 ᠶᠣᠬᠣᠸᠠ ᠢᠰᠷᠧᠯ ᠤᠨ ᠳᠠᠢᠰᠤᠨ ᠨᠤᠭᠤᠳ ᠲᠠᠢ ᠳᠠᠢᠲᠤᠭᠰᠠᠨ ᠢ ᠰᠣᠨᠣᠰᠣᠭᠰᠠᠨ ᠬᠠᠷᠢ ᠭᠦᠷᠦᠨ ᠨᠦᠭᠦᠳ ᠦᠨ ᠳᠡᠭᠡᠷᠡ ᠪᠤᠷᠬᠠᠨ ᠤ ᠥᠭᠭᠥᠭᠰᠡᠨ ᠠᠢᠳᠠᠰ ᠪᠠᠭᠤᠭᠰᠠᠨ ᠲᠤᠯᠠ 30 ᠶᠧᠬᠣᠱᠠᠹᠠᠲ ᠤᠨ ᠬᠠᠭᠠᠨᠴᠢᠯᠠᠯ ᠠᠮᠤᠷ ᠠᠮᠤᠭᠤᠯᠠᠩ ᠪᠠᠢᠪᠠ᠃ ᠲᠡᠭᠦᠨ ᠦ ᠪᠤᠷᠬᠠᠨ ᠲᠡᠭᠦᠨ ᠳᠦ ᠪᠦᠬᠦ ᠲᠠᠯᠠ ᠪᠠᠷ ᠠᠮᠠᠷᠠᠯ ᠰᠣᠶᠣᠷᠬᠠᠭᠰᠠᠨ ᠪᠠᠢᠪᠠ᠃
ᠶᠧᠬᠣᠱᠠᠹᠠᠲ ᠤᠨ ᠦᠢᠯᠡᠰ
31 ᠲᠡᠢᠨ ᠬᠦ ᠶᠧᠬᠣᠱᠠᠹᠠᠲ ᠶᠦᠳᠠ ᠶᠢ ᠵᠠᠬᠢᠷᠪᠠ᠃ ᠲᠡᠷᠡ ᠭᠤᠴᠢᠨ ᠲᠠᠪᠤᠨ ᠨᠠᠰᠤᠲᠠᠢ ᠳᠠᠭᠠᠨ ᠬᠠᠭᠠᠨ ᠪᠣᠯᠣᠭᠠᠳ ᠶᠧᠷᠦ᠋ᠰᠠᠯᠧᠮ ᠳᠤ ᠬᠣᠷᠢᠨ ᠲᠠᠪᠤᠨ ᠵᠢᠯ ᠬᠠᠭᠠᠨᠴᠢᠯᠠᠵᠠᠢ᠃ ᠲᠡᠭᠦᠨ ᠦ ᠡᠬᠡ ᠪᠣᠯ ᠱᠢᠯᠾᠢ ᠶᠢᠨ ᠥᠬᠢᠨ ᠠᠽᠦ᠋ᠪᠠ ᠶᠤᠮ᠃ 32 ᠶᠧᠬᠣᠱᠠᠹᠠᠲ ᠡᠴᠢᠭᠡ ᠠᠰᠠ ᠶᠢᠨ ᠢᠶᠠᠨ ᠵᠠᠮ ᠢᠶᠠᠷ ᠶᠠᠪᠤᠵᠤ᠂ ᠲᠡᠷᠡ ᠵᠠᠮ ᠠᠴᠠ ᠡᠷᠭᠢᠯ ᠦᠭᠡᠢ᠂ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠶᠢᠨ ᠡᠮᠦᠨᠡ ᠵᠥᠪ ᠢ ᠦᠢᠯᠡᠳᠴᠡᠢ᠃ 33 ᠬᠠᠷᠢᠨ ᠮᠥᠷᠭᠥᠯ ᠦᠨ ᠮᠠᠨᠳᠠᠯ ᠤᠳ ᠠᠷᠢᠯᠤᠭᠠ ᠦᠭᠡᠢ ᠪᠥᠭᠡᠳ ᠠᠷᠠᠳ ᠲᠦᠮᠡᠨ ᠪᠠᠰᠠ ᠯᠠ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠪᠤᠷᠬᠠᠨ ᠳᠤ ᠵᠢᠷᠦᠬᠡ ᠪᠡᠨ ᠬᠠᠨᠳᠤᠭᠤᠯᠤᠭᠠ ᠦᠭᠡᠢ ᠪᠠᠢᠯᠠ᠃
34 ᠶᠧᠬᠣᠱᠠᠹᠠᠲ ᠤᠨ ᠪᠤᠰᠤᠳ ᠶᠠᠪᠤᠳᠠᠯ ᠡᠬᠢᠨ ᠡᠴᠡ ᠪᠡᠨ ᠳᠠᠭᠤᠰᠲᠠᠯᠠ᠂ ᠬᠠᠨᠠᠨᠢ ᠶᠢᠨ ᠬᠦᠦ ᠶᠧᠾᠦ᠋ ᠶᠢᠨ ᠨᠠᠮᠲᠠᠷ ᠲᠤ ᠪᠢᠴᠢᠭᠳᠡᠵᠦ ᠢᠰᠷᠧᠯ ᠤᠨ ᠬᠠᠭᠠᠳ ᠤᠨ ᠨᠣᠮ ᠳᠤ ᠣᠷᠣᠭᠰᠠᠨ ᠶᠤᠮ᠃
35 ᠡᠭᠦᠨ ᠦ ᠳᠠᠷᠠᠭᠠ ᠶᠦᠳᠠ ᠶᠢᠨ ᠬᠠᠭᠠᠨ ᠶᠧᠬᠣᠱᠠᠹᠠᠲ ᠢᠰᠷᠧᠯ ᠤᠨ ᠬᠠᠭᠠᠨ ᠠᠬᠠᠽᠢᠶᠠ ᠲᠠᠢ ᠨᠢᠭᠡᠳᠪᠡ᠃ ᠠᠬᠠᠽᠢᠶᠠ ᠬᠣᠷᠣᠨ ᠮᠠᠭᠤ ᠶᠢ ᠦᠢᠯᠡᠳᠳᠡᠭ ᠪᠠᠢᠲᠠᠯᠠ 36 ᠶᠧᠬᠣᠱᠠᠹᠠᠲ ᠲᠠᠷᠱᠢᠱ ᠤᠷᠤᠭᠤ ᠶᠠᠪᠤᠬᠤ ᠬᠥᠯᠭᠡ ᠣᠩ᠋ᠭᠣᠴᠠ ᠬᠢᠬᠦ ᠪᠡᠷ ᠲᠡᠭᠦᠨ ᠲᠡᠢ ᠨᠢᠭᠡᠳᠴᠦ᠂ ᠲᠡᠳᠡ ᠡᠽᠢᠶᠣᠨ ᠭᠧᠪᠧᠷ ᠲᠤ ᠣᠩ᠋ᠭᠣᠴᠠ ᠬᠢᠪᠡ᠃ 37 ᠮᠠᠷᠧᠱᠠ ᠶᠢᠨ ᠳ᠋ᠣᠳᠠᠸᠠᠾᠦ᠋ ᠶᠢᠨ ᠬᠦᠦ ᠡᠯᠢᠶᠧᠽᠧᠷ ᠶᠧᠬᠣᠱᠠᠹᠠᠲ ᠲᠤ ᠬᠠᠨᠳᠤᠨ᠄ 《ᠴᠢ ᠠᠬᠠᠽᠢᠶᠠ ᠲᠠᠢ ᠨᠢᠭᠡᠳᠦᠭᠰᠡᠨ ᠤᠴᠢᠷ ᠶᠣᠬᠣᠸᠠ ᠲᠠᠨ ᠤ ᠬᠢᠭᠰᠡᠨ ᠢ ᠪᠤᠲᠠᠯᠤᠨᠠ》 ᠭᠡᠵᠦ ᠡᠰᠢ ᠦᠵᠡᠭᠦᠯᠦᠭᠰᠡᠨ ᠳᠦ᠂ ᠦᠨᠡᠬᠡᠷ ᠲᠡᠳᠡᠨ ᠦ ᠬᠥᠯᠭᠡ ᠣᠩ᠋ᠭᠣᠴᠠ ᠨᠤᠭᠤᠳ ᠰᠦᠢᠷᠡᠵᠦ᠂ ᠲᠠᠷᠱᠢᠱ ᠤᠷᠤᠭᠤ ᠶᠠᠪᠤᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃