ᠱᠠᠰᠲᠢᠷ ᠤᠨ ᠳᠡᠳ᠋ ᠵᠢᠷᠭᠤᠭᠠ
1 ᠲᠡᠷᠡ ᠦᠶᠡ ᠳᠦ ᠰᠣᠯᠣᠮᠣᠨ᠄ 《ᠶᠣᠬᠣᠸᠠ ᠥᠪᠡᠷ ᠢ ᠪᠠᠨ ᠬᠠᠷᠠᠩ᠋ᠭᠤᠢ ᠡᠭᠦᠯᠡᠨ ᠳᠣᠲᠣᠷᠠ ᠣᠷᠣᠰᠢᠨᠠ ᠭᠡᠵᠦ ᠠᠢᠯᠠᠳᠤᠭᠰᠠᠨ ᠪᠢᠯᠡ᠃ 2 ᠲᠠᠨ ᠳᠤ ᠵᠣᠷᠢᠭᠤᠯᠤᠨ ᠰᠦᠷᠯᠢᠭ ᠥᠷᠭᠥᠭᠡ᠂ ᠲᠤᠬᠠᠢᠯᠠᠪᠠᠯ ᠲᠠᠨ ᠤ ᠮᠥᠩᠬᠡᠳᠡ ᠣᠷᠣᠰᠢᠬᠤ ᠭᠠᠵᠠᠷ ᠢ ᠪᠢ ᠪᠠᠷᠢᠯᠠ》 ᠭᠡᠵᠦ ᠬᠡᠯᠡᠪᠡ᠃
3 ᠬᠠᠭᠠᠨ ᠡᠷᠭᠢᠨ ᠬᠠᠷᠠᠵᠤ᠂ ᠲᠡᠨᠳᠡ ᠵᠣᠭᠰᠣᠵᠤ ᠪᠤᠢ ᠢᠰᠷᠧᠯ ᠤᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠢ ᠢᠷᠥᠭᠡᠭᠰᠡᠨ ᠨᠢ᠄ 4 《ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠮᠠᠭᠲᠠᠭᠳᠠᠬᠤ ᠪᠣᠯᠲᠤᠭᠠᠢ᠃ ᠲᠡᠷᠡ ᠪᠡᠷ ᠮᠢᠨᠦ ᠡᠴᠢᠭᠡ ᠳ᠋ᠠᠸᠢᠳ᠋ ᠲᠤ ᠠᠮᠠ ᠪᠠᠷ ᠢᠶᠠᠨ ᠠᠢᠯᠠᠳᠤᠭᠰᠠᠨ ᠦᠭᠡ ᠪᠡᠨ ᠮᠤᠲᠤᠷ ᠢᠶᠠᠷ ᠢᠶᠠᠨ ᠪᠡᠶᠡᠯᠡᠭᠦᠯᠵᠦ ᠥᠭᠭᠥᠯᠡ᠃ ᠲᠡᠷᠡ ᠠᠢᠯᠠᠳᠬᠤ ᠳᠠᠭᠠᠨ᠄ 5 〈ᠪᠢ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠢᠶᠠᠨ ᠶᠧᠵᠢᠫᠲ ᠡᠴᠡ ᠭᠠᠷᠭᠠᠭᠰᠠᠨ ᠡᠳᠦᠷ ᠡᠴᠡ ᠬᠣᠢᠰᠢ᠂ ᠥᠪᠡᠷ ᠦᠨ ᠢᠶᠠᠨ ᠨᠡᠷᠡ ᠶᠢ ᠪᠠᠢᠯᠭᠠᠬᠤ ᠪᠠᠷ ᠥᠷᠭᠥᠭᠡ ᠪᠠᠷᠢᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠢᠰᠷᠧᠯ ᠤᠨ ᠣᠪᠣᠭ ᠤᠳ ᠠᠴᠠ ᠠᠯᠢ ᠴᠤ ᠬᠣᠲᠠ ᠶᠢ ᠰᠣᠩ᠋ᠭᠣᠭᠠ ᠦᠭᠡᠢ᠂ ᠮᠥᠨ ᠬᠡᠨ ᠢ ᠴᠤ ᠮᠢᠨᠦ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠤᠨ ᠤᠳᠤᠷᠢᠳᠤᠭᠴᠢ ᠪᠠᠷ ᠰᠣᠩ᠋ᠭᠣᠭᠠ ᠦᠭᠡᠢ ᠪᠠᠢᠵᠤ᠂ 6 ᠬᠣᠵᠢᠮ ᠨᠢ ᠶᠧᠷᠦ᠋ᠰᠠᠯᠧᠮ ᠢ ᠰᠣᠩ᠋ᠭᠣᠨ᠂ ᠥᠪᠡᠷ ᠦᠨ ᠢᠶᠠᠨ ᠨᠡᠷᠡ ᠶᠢ ᠲᠡᠨᠳᠡ ᠪᠠᠢᠯᠭᠠᠵᠤ᠂ ᠳ᠋ᠠᠸᠢᠳ᠋ ᠢ ᠰᠣᠩ᠋ᠭᠣᠨ ᠥᠪᠡᠷ ᠦᠨ ᠢᠶᠠᠨ ᠠᠷᠠᠳ ᠲᠦᠮᠡᠨ ᠢ ᠵᠠᠬᠢᠷᠤᠭᠤᠯᠤᠭᠰᠠᠨ ᠪᠢᠯᠡ〉 ᠭᠡᠪᠡ᠃ 7 ᠮᠢᠨᠦ ᠡᠴᠢᠭᠡ ᠳ᠋ᠠᠸᠢᠳ᠋ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠨᠡᠷᠡ ᠶᠢᠨ ᠲᠥᠯᠥᠭᠡ ᠥᠷᠭᠥᠭᠡ ᠪᠠᠷᠢᠬᠤ ᠰᠠᠨᠠᠭᠠ ᠲᠠᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ 8 ᠶᠣᠬᠣᠸᠠ ᠮᠢᠨᠦ ᠡᠴᠢᠭᠡ ᠳ᠋ᠠᠸᠢᠳ᠋ ᠲᠤ ᠠᠢᠯᠠᠳᠤᠨ᠄ 〈ᠴᠢ ᠮᠢᠨᠦ ᠨᠡᠷᠡ ᠶᠢᠨ ᠲᠥᠯᠥᠭᠡ ᠥᠷᠭᠥᠭᠡ ᠪᠠᠷᠢᠬᠤ ᠰᠠᠨᠠᠭᠠ ᠲᠠᠢ ᠪᠠᠢᠨᠠ᠂ ᠲᠡᠷᠡ ᠰᠠᠨᠠᠭᠠ ᠴᠢᠨᠢ ᠰᠠᠢᠨ ᠪᠣᠯᠪᠠᠴᠤ 9 ᠲᠡᠷᠡ ᠥᠷᠭᠥᠭᠡ ᠶᠢ ᠪᠣᠰᠬᠠᠬᠤ ᠬᠥᠮᠦᠨ ᠨᠢ ᠴᠢ ᠪᠢᠰᠢ᠂ ᠬᠠᠷᠢᠨ ᠴᠢᠨᠦ ᠪᠡᠶᠡ ᠡᠴᠡ ᠭᠠᠷᠬᠤ ᠬᠦᠦ ᠴᠢᠨᠢ ᠪᠢᠯᠡ᠂ ᠲᠡᠷᠡ ᠮᠢᠨᠦ ᠨᠡᠷᠡ ᠶᠢᠨ ᠲᠥᠯᠥᠭᠡ ᠥᠷᠭᠥᠭᠡ ᠪᠠᠷᠢᠬᠤ ᠪᠣᠯᠣᠨᠠ〉 ᠭᠡᠰᠡᠨ ᠶᠤᠮ᠃ 10 ᠣᠳᠣ ᠶᠣᠬᠣᠸᠠ ᠠᠢᠯᠠᠳᠤᠭᠰᠠᠨ ᠦᠭᠡ ᠪᠡᠨ ᠪᠡᠶᠡᠯᠡᠭᠦᠯᠦᠭᠰᠡᠨ ᠪᠠᠢᠨᠠ᠃ ᠪᠢ ᠡᠴᠢᠭᠡ ᠳ᠋ᠠᠸᠢᠳ᠋ ᠢᠶᠠᠨ ᠵᠠᠯᠭᠠᠮᠵᠢᠯᠠᠨ ᠢᠰᠷᠧᠯ ᠤᠨ ᠰᠡᠨᠲᠢ ᠳᠤ ᠰᠠᠭᠤᠵᠤ᠂ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠨᠡᠷᠡ ᠶᠢᠨ ᠲᠥᠯᠥᠭᠡ ᠥᠷᠭᠥᠭᠡ ᠪᠠᠷᠢᠭᠰᠠᠨ ᠨᠢ ᠶᠣᠬᠣᠸᠠ ᠶᠢᠨ ᠠᠢᠯᠠᠳᠤᠭᠰᠠᠨ ᠶᠣᠰᠣᠭᠠᠷ ᠪᠣᠯᠣᠯᠠ᠃ 11 ᠶᠣᠬᠣᠸᠠ ᠶᠢᠨ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠲᠠᠢ ᠪᠠᠨ ᠪᠠᠢᠭᠤᠯᠤᠭᠰᠠᠨ ᠭᠡᠷᠡ ᠶᠢ ᠠᠭᠤᠯᠤᠭᠰᠠᠨ ᠠᠪᠳᠠᠷᠠ ᠶᠢ ᠪᠢ ᠡ᠊ᠨᠳᠡ ᠵᠠᠯᠠᠯᠠ》 ᠭᠡᠪᠡ᠃
ᠰᠣᠯᠣᠮᠣᠨ ᠤ ᠳᠠᠭᠠᠳᠬᠠᠯ
12 ᠰᠣᠯᠣᠮᠣᠨ ᠶᠣᠬᠣᠸᠠ ᠶᠢᠨ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠡᠮᠦᠨᠡ ᠢᠰᠷᠧᠯ ᠤᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠤᠷᠤᠭᠤ ᠬᠠᠷᠠᠵᠤ ᠵᠣᠭᠰᠣᠭᠠᠳ᠂ ᠭᠠᠷ ᠢᠶᠠᠨ ᠡᠷᠭᠦᠪᠡ᠃ 13 ᠰᠣᠯᠣᠮᠣᠨ ᠲᠠᠪᠤᠨ ᠲᠣᠬᠣᠢ ᠤᠷᠲᠤ᠂ ᠲᠠᠪᠤᠨ ᠲᠣᠬᠣᠢ ᠥᠷᠭᠡᠨ᠂ ᠭᠤᠷᠪᠠᠨ ᠲᠣᠬᠣᠢ ᠥᠨᠳᠥᠷ ᠬᠦᠷᠡᠯ ᠲᠠᠪᠴᠠᠩ ᠬᠢᠵᠦ᠂ ᠬᠦᠷᠢᠶᠡᠨ ᠦ ᠭᠣᠣᠯ ᠳᠤ ᠪᠠᠢᠷᠢᠯᠠᠭᠤᠯᠤᠭᠰᠠᠨ ᠪᠠᠢᠵᠠᠢ᠃ ᠲᠡᠷᠡ ᠲᠠᠪᠴᠠᠩ ᠳᠡᠭᠡᠷᠡ ᠭᠠᠷᠴᠤ᠂ ᠢᠰᠷᠧᠯ ᠤᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠡᠮᠦᠨᠡ ᠡᠪᠦᠳᠦᠭ ᠰᠥᠭᠥᠳᠥᠭᠡᠳ ᠲᠩᠷᠢ ᠥᠭᠡᠳᠡ ᠭᠠᠷ ᠢᠶᠠᠨ ᠡᠷᠭᠦᠵᠦ᠂ 14 《ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ︕ ᠲᠩᠷᠢ ᠳᠡᠭᠡᠷᠡ ᠴᠤ ᠭᠠᠵᠠᠷ ᠳᠡᠭᠡᠷᠡ ᠴᠤ ᠥᠭᠡᠷᠡ ᠪᠤᠷᠬᠠᠨ ᠭᠡᠵᠦ ᠦᠭᠡᠢ᠃ ᠪᠦᠬᠦ ᠵᠢᠷᠦᠬᠡ ᠪᠡᠷ ᠢᠶᠠᠨ ᠲᠠᠨ ᠤ ᠡᠮᠦᠨᠡ ᠶᠠᠪᠤᠳᠠᠭ ᠵᠠᠷᠤᠴᠠ ᠨᠠᠷ ᠲᠠᠭᠠᠨ ᠬᠠᠢᠷᠠ ᠶᠢᠨ ᠭᠡᠷᠡ ᠪᠡᠨ ᠰᠠᠬᠢᠳᠠᠭ ᠲᠠᠨ ᠰᠢᠭ᠋ ᠨᠢᠭᠡᠨ ᠨᠢ ᠦᠭᠡᠢ᠃ 15 ᠲᠠ ᠥᠪᠡᠷ ᠦᠨ ᠢᠶᠠᠨ ᠵᠠᠷᠤᠴᠠ ᠮᠢᠨᠦ ᠡᠴᠢᠭᠡ ᠳ᠋ᠠᠸᠢᠳ᠋ ᠲᠤ ᠠᠢᠯᠠᠳᠤᠭᠰᠠᠨ ᠢᠶᠠᠨ ᠰᠠᠬᠢᠭᠰᠠᠨ᠃ ᠠᠮᠠ ᠪᠠᠷ ᠢᠶᠠᠨ ᠠᠢᠯᠠᠳᠤᠭᠰᠠᠨ ᠢᠶᠠᠨ ᠥᠨᠥᠳᠥᠷ ᠥᠪᠡᠷ ᠦᠨ ᠢᠶᠠᠨ ᠮᠤᠲᠤᠷ ᠢᠶᠠᠷ ᠪᠡᠶᠡᠯᠡᠭᠦᠯᠦᠭᠰᠡᠨ᠃ 16 ᠲᠡᠢᠮᠦ ᠡᠴᠡ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠮᠢᠨᠢ᠂ ᠲᠠ ᠥᠪᠡᠷ ᠦᠨ ᠢᠶᠠᠨ ᠵᠠᠷᠤᠴᠠ᠂ ᠮᠢᠨᠦ ᠡᠴᠢᠭᠡ ᠳ᠋ᠠᠸᠢᠳ᠋ ᠲᠤ᠄ 〈ᠬᠡᠷᠪᠡ ᠴᠢᠨᠦ ᠦᠷᠡ ᠤᠳᠤᠮ ᠮᠢᠨᠦ ᠡᠮᠦᠨᠡ ᠶᠠᠪᠤᠭᠰᠠᠨ ᠴᠢᠮᠠ ᠲᠠᠢ ᠠᠳᠠᠯᠢ ᠮᠢᠨᠦ ᠬᠠᠤᠯᠢ ᠶᠢ ᠳᠠᠭᠠᠵᠤ ᠮᠢᠨᠦ ᠡᠮᠦᠨᠡ ᠶᠠᠪᠤᠬᠤ ᠵᠠᠮ ᠢᠶᠠᠨ ᠠᠩ᠋ᠬᠠᠷᠪᠠᠯ᠂ ᠮᠢᠨᠦ ᠡᠮᠦᠨᠡ ᠢᠰᠷᠧᠯ ᠤᠨ ᠰᠡᠨᠲᠢ ᠳᠤ ᠰᠠᠭᠤᠬᠤ ᠬᠥᠮᠦᠨ ᠴᠢᠮᠠ ᠠᠴᠠ ᠲᠠᠰᠤᠷᠠᠬᠤ ᠦᠭᠡᠢ〉 ᠭᠡᠵᠦ ᠠᠢᠯᠠᠳᠤᠭᠰᠠᠨ ᠦᠭᠡ ᠪᠡᠨ ᠪᠡᠶᠡᠯᠡᠭᠦᠯᠦᠭᠡᠴᠢ᠂ 17 ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠮᠢᠨᠢ ᠡ᠂ ᠥᠪᠡᠷ ᠦᠨ ᠢᠶᠠᠨ ᠵᠠᠷᠤᠴᠠ ᠳ᠋ᠠᠸᠢᠳ᠋ ᠲᠤ ᠠᠢᠯᠠᠳᠤᠭᠰᠠᠨ ᠦᠭᠡ ᠪᠡᠨ ᠣᠳᠣ ᠪᠠᠲᠤᠳᠬᠠᠵᠤ ᠬᠠᠢᠷᠠᠯᠠᠨᠠ ᠤᠤ︖
18 ᠭᠡᠬᠦ ᠳᠡᠭᠡᠨ ᠪᠤᠷᠬᠠᠨ ᠨᠡᠭᠡᠷᠡᠨ ᠭᠠᠵᠠᠷ ᠳᠡᠭᠡᠷᠡ ᠬᠥᠮᠦᠨ ᠲᠡᠢ ᠬᠠᠮᠲᠤ ᠣᠷᠣᠰᠢᠨᠠ ᠭᠡᠵᠢ ᠤᠤ︖ ᠬᠠᠷᠠᠭᠠᠴᠢ᠂ ᠲᠩᠷᠢ ᠴᠤ᠂ ᠲᠩᠷᠢ ᠨᠦᠭᠦᠳ ᠦᠨ ᠲᠩᠷᠢ ᠴᠤ ᠲᠠᠨ ᠢ ᠪᠠᠭᠲᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠠᠲᠠᠯᠠ ᠮᠢᠨᠦ ᠪᠠᠢᠭᠤᠯᠤᠭᠰᠠᠨ ᠡᠨᠡ ᠥᠷᠭᠥᠭᠡ ᠬᠡᠷᠬᠢᠨ ᠴᠢᠳᠠᠬᠤ ᠪᠢᠯᠡ︖ 19 ᠭᠡᠪᠡᠴᠦ ᠮᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ ᠡ᠂ ᠵᠠᠷᠤᠴᠠ ᠶᠢᠨ ᠢᠶᠠᠨ ᠳᠠᠭᠠᠳᠬᠠᠯ ᠪᠠ ᠭᠤᠶᠤᠯᠲᠠ ᠶᠢ ᠪᠣᠯᠭᠣᠭᠠᠨᠠ ᠤᠤ︖ ᠲᠠᠨ ᠤ ᠡᠮᠦᠨᠡ ᠬᠠᠰᠬᠢᠷᠴᠤ ᠪᠤᠢ ᠵᠠᠷᠤᠴᠠ ᠶᠢᠨ ᠢᠶᠠᠨ ᠳᠠᠭᠠᠳᠬᠠᠯ ᠢ ᠰᠣᠨᠣᠰᠣᠭᠠᠴᠢ᠃ 20 ᠲᠠᠨ ᠤ ᠮᠡᠯᠮᠡᠢ ᠡᠨᠡ ᠥᠷᠭᠥᠭᠡ ᠤᠷᠤᠭᠤ᠂ 〈ᠪᠢ ᠨᠡᠷᠡ ᠪᠡᠨ ᠲᠡᠨᠳᠡ ᠪᠠᠢᠯᠭᠠᠨᠠ〉 ᠭᠡᠵᠦ ᠲᠠᠨ ᠤ ᠠᠢᠯᠠᠳᠤᠭᠰᠠᠨ ᠡᠨᠡ ᠭᠠᠵᠠᠷ ᠤᠷᠤᠭᠤ ᠬᠠᠨᠳᠤᠨ ᠲᠤᠰᠴᠤ᠂ ᠵᠠᠷᠤᠴᠠ ᠶᠢᠨ ᠢᠶᠠᠨ ᠡᠨᠡ ᠭᠠᠵᠠᠷ ᠤᠷᠤᠭᠤ ᠬᠠᠨᠳᠤᠨ ᠡᠷᠭᠦᠬᠦ ᠳᠠᠭᠠᠳᠬᠠᠯ ᠢ ᠲᠠ ᠰᠣᠨᠣᠰᠬᠤ ᠴᠤ ᠪᠣᠯᠣᠭᠠᠰᠠᠢ᠃ 21 ᠲᠠᠨ ᠤ ᠵᠠᠷᠤᠴᠠ ᠪᠣᠯᠣᠨ ᠲᠠᠨ ᠤ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠡᠨᠡ ᠭᠠᠵᠠᠷ ᠤᠷᠤᠭᠤ ᠬᠠᠨᠳᠤᠨ ᠳᠠᠭᠠᠳᠬᠠᠬᠤ ᠳᠤ᠂ ᠲᠠ ᠲᠡᠷᠡ ᠭᠤᠶᠤᠯᠲᠠ ᠶᠢ ᠰᠣᠨᠣᠰᠬᠤ ᠪᠣᠯᠣᠨᠠ᠃ ᠲᠠ ᠲᠩᠷᠢ ᠳᠠᠬᠢ ᠥᠪᠡᠷ ᠦᠨ ᠢᠶᠠᠨ ᠵᠠᠯᠠᠷᠠᠬᠤ ᠭᠠᠵᠠᠷ ᠠᠴᠠ ᠰᠣᠨᠣᠰᠬᠤ ᠳᠠᠭᠠᠨ ᠰᠣᠨᠣᠰᠣᠭᠰᠠᠨ ᠶᠣᠰᠣᠭᠠᠷ ᠢᠶᠠᠨ ᠥᠷᠥᠰᠢᠶᠡᠨ ᠰᠣᠶᠣᠷᠬᠠᠭᠠᠴᠢ᠃ 22 ᠬᠡᠷᠪᠡ ᠬᠥᠮᠦᠨ ᠬᠥᠷᠰᠢ ᠳᠡᠭᠡᠨ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠬᠡᠷᠡᠭ ᠢᠶᠡᠷ ᠲᠠᠩ᠋ᠭᠠᠷᠢᠭ ᠬᠢᠬᠦ ᠶᠣᠰᠣᠲᠠᠢ ᠪᠣᠯᠵᠤ ᠡᠨᠡ ᠥᠷᠭᠥᠭᠡᠨ ᠳᠦ ᠢᠷᠡᠭᠡᠳ ᠲᠠᠨ ᠤ ᠰᠢᠷᠡᠭᠡᠨ ᠦ ᠡᠮᠦᠨᠡ ᠲᠠᠩ᠋ᠭᠠᠷᠢᠭᠯᠠᠪᠠᠯ᠂ 23 ᠲᠠ ᠲᠩᠷᠢ ᠡᠴᠡ ᠰᠣᠨᠣᠰᠣᠭᠠᠳ ᠬᠥᠳᠡᠯᠦᠭᠡᠴᠢ᠂ ᠵᠠᠷᠤᠴᠠ ᠨᠠᠷ ᠢᠶᠠᠨ ᠰᠢᠭᠦᠭᠡᠴᠢ᠂ ᠪᠤᠷᠤᠭᠤᠲᠠᠨ ᠳᠤ ᠦᠢᠯᠡᠳᠦᠭᠰᠡᠨ ᠶᠣᠰᠣᠭᠠᠷ ᠨᠢ ᠬᠠᠷᠢᠭᠤ ᠶᠢ ᠨᠢ ᠥᠭᠴᠦ᠂ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠪᠤᠴᠠᠭᠠᠭᠠᠴᠢ᠂ ᠵᠥᠪᠲᠦ ᠬᠥᠮᠦᠨ ᠢ ᠵᠥᠪᠲᠥᠭᠡᠨ ᠵᠥᠪ ᠦᠨ ᠬᠢᠨᠢ ᠶᠣᠰᠣᠭᠠᠷ ᠬᠠᠷᠢᠭᠤᠯᠤᠭᠠᠴᠢ᠃
24 ᠬᠡᠷᠪᠡ ᠲᠠᠨ ᠤ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠲᠠᠨ ᠳᠤ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠡᠴᠡ ᠪᠡᠨ ᠪᠣᠯᠵᠤ᠂ ᠳᠠᠢᠰᠤᠨ ᠳᠠᠭᠠᠨ ᠴᠣᠬᠢᠭᠳᠠᠭᠰᠠᠨ ᠦᠶᠡ ᠳᠡᠭᠡᠨ ᠡᠷᠭᠢᠭᠡᠳ ᠡᠨᠡ ᠥᠷᠭᠥᠭᠡᠨ ᠳᠦ ᠲᠠᠨ ᠤ ᠨᠡᠷᠡ ᠶᠢ ᠮᠠᠭᠲᠠᠵᠤ᠂ ᠲᠠᠨ ᠤ ᠡᠮᠦᠨᠡ ᠳᠠᠭᠠᠳᠬᠠᠨ ᠭᠤᠶᠤᠪᠠᠯ᠂ 25 ᠲᠠ ᠲᠩᠷᠢ ᠡᠴᠡ ᠰᠣᠨᠣᠰᠴᠤ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠤᠨ ᠢᠶᠠᠨ ᠨᠢᠭᠦᠯ ᠢ ᠠᠭᠤᠴᠢᠯᠠᠵᠤ᠂ ᠲᠡᠳᠡᠨ ᠳᠦ ᠪᠣᠯᠣᠨ ᠡᠴᠢᠭᠡ ᠡᠪᠦᠭᠡᠳ ᠲᠤᠨᠢ ᠰᠣᠶᠣᠷᠬᠠᠭᠰᠠᠨ ᠨᠤᠲᠤᠭ ᠤᠷᠤᠭᠤ ᠪᠠᠨ ᠲᠡᠳᠡᠨ ᠢ ᠪᠤᠴᠠᠭᠠᠭᠠᠴᠢ᠃
26 ᠬᠡᠷᠪᠡ ᠲᠡᠳᠡ ᠲᠠᠨ ᠳᠤ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠡᠴᠡ ᠪᠣᠯᠵᠤ ᠲᠩᠷᠢ ᠬᠠᠭᠠᠭᠳᠠᠵᠤ᠂ ᠬᠤᠷᠠ ᠪᠣᠷᠣᠭᠠ ᠦᠭᠡᠢ ᠪᠣᠯᠬᠤ ᠳᠤ᠂ ᠲᠡᠳᠡ ᠡᠨᠡ ᠭᠠᠵᠠᠷ ᠤᠷᠤᠭᠤ ᠬᠠᠨᠳᠤᠨ ᠳᠠᠭᠠᠳᠬᠠᠵᠤ᠂ ᠲᠠᠨ ᠤ ᠨᠡᠷᠡ ᠶᠢ ᠮᠠᠭᠲᠠᠪᠠᠯ᠂ ᠲᠠ ᠲᠡᠳᠡᠨ ᠢ ᠰᠢᠳᠬᠡᠬᠦ ᠳᠦ ᠲᠡᠳᠡ ᠨᠢᠭᠦᠯ ᠡᠴᠡ ᠪᠡᠨ ᠡᠷᠭᠢᠪᠡᠯ᠂ 27 ᠲᠠ ᠲᠩᠷᠢ ᠡᠴᠡ ᠰᠣᠨᠣᠰᠣᠭᠠᠳ ᠥᠪᠡᠷ ᠦᠨ ᠢᠶᠠᠨ ᠵᠠᠷᠤᠴᠠ ᠨᠠᠷ ᠪᠣᠯᠣᠨ ᠥᠪᠡᠷ ᠦᠨ ᠢᠶᠠᠨ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠤᠨ ᠨᠢᠭᠦᠯ ᠢ ᠠᠭᠤᠴᠢᠯᠠᠭᠠᠴᠢ᠃ ᠲᠠ ᠲᠡᠳᠡᠨ ᠳᠦ ᠠᠮᠢᠳᠤᠷᠠᠯ ᠤᠨ ᠵᠥᠪ ᠵᠠᠮ ᠢ ᠵᠢᠭᠠᠵᠤ᠂ ᠠᠷᠠᠳ ᠲᠦᠮᠡᠨ ᠳᠡᠭᠡᠨ ᠥᠪ ᠪᠣᠯᠭᠠᠨ ᠰᠣᠶᠣᠷᠬᠠᠭᠰᠠᠨ ᠭᠠᠵᠠᠷ ᠲᠠᠭᠠᠨ ᠬᠤᠷᠠ ᠪᠣᠷᠣᠭᠠ ᠣᠷᠣᠭᠤᠯᠤᠨᠠ ᠤᠤ︖
28 ᠬᠡᠷᠪᠡ ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠥᠯᠥᠰᠬᠥᠯᠡᠩ ᠪᠤᠶᠤ ᠲᠠᠬᠤᠯ᠂ ᠲᠠᠷᠢᠶᠠᠨ ᠤ ᠬᠣᠷᠣᠬᠠᠢ ᠪᠤᠶᠤ ᠬᠥᠭᠡᠴᠦ᠂ ᠴᠠᠷᠴᠠᠬᠠᠢ ᠪᠤᠶᠤ ᠲᠥᠭᠡᠯᠡᠭᠦᠷ ᠦᠨ ᠭᠠᠮᠰᠢᠭ ᠲᠣᠬᠢᠶᠠᠯᠳᠤᠬᠤ ᠦᠶᠡ ᠳᠦ᠂ ᠡᠰᠡᠪᠡᠯ ᠳᠠᠢᠰᠤᠨ ᠨᠤᠭᠤᠳ ᠨᠢ ᠡᠨᠡ ᠨᠤᠲᠤᠭ ᠲᠤ ᠣᠷᠣᠵᠤ ᠬᠣᠲᠠ ᠶᠢ ᠨᠢ ᠪᠦᠰᠡᠯᠡᠬᠦ ᠪᠤᠶᠤ ᠶᠠᠮᠠᠷ ᠨᠢᠭᠡ ᠡᠪᠡᠳᠴᠢᠨ᠂ ᠭᠠᠮᠰᠢᠭ ᠲᠣᠬᠢᠶᠠᠯᠳᠤᠬᠤ ᠦᠶᠡ ᠳᠦ᠂ 29 ᠲᠠᠨ ᠤ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠤᠨ ᠬᠥᠮᠦᠨ ᠪᠦᠷᠢ ᠭᠠᠮᠰᠢᠭ ᠵᠣᠪᠠᠯᠠᠩ ᠢ ᠤᠬᠠᠭᠠᠷᠠᠵᠤ᠂ ᠪᠦᠬᠦ ᠬᠥᠮᠦᠨ ᠪᠤᠶᠤ ᠠᠯᠢ ᠨᠢᠭᠡ ᠬᠥᠮᠦᠨ ᠶᠠᠮᠠᠷ ᠨᠢᠭᠡ ᠳᠠᠭᠠᠳᠬᠠᠯ ᠪᠤᠶᠤ ᠭᠤᠶᠤᠯᠲᠠ ᠡᠷᠭᠦᠪᠡᠯ᠂ 30 ᠲᠠ ᠲᠩᠷᠢ ᠳᠠᠬᠢ ᠥᠪᠡᠷ ᠦᠨ ᠢᠶᠠᠨ ᠵᠠᠯᠠᠷᠠᠬᠤ ᠭᠠᠵᠠᠷ ᠠᠴᠠ ᠰᠣᠨᠣᠰᠣᠭᠠᠳ ᠠᠭᠤᠴᠢᠯᠠᠭᠠᠴᠢ᠂ ᠲᠠ ᠬᠥᠮᠦᠨ ᠪᠦᠷᠢ ᠶᠢᠨ ᠰᠡᠳᠬᠢᠯ ᠢ ᠮᠡᠳᠡᠳᠡᠭ ᠲᠤᠯᠠ ᠬᠥᠮᠦᠨ ᠪᠦᠷᠢ ᠳᠤ ᠦᠢᠯᠡᠳᠦᠭᠰᠡᠨ ᠶᠣᠰᠣᠭᠠᠷ ᠨᠢ ᠬᠠᠷᠢᠭᠤᠯᠤᠭᠠᠴᠢ (ᠭᠠᠭᠴᠠ ᠲᠠ ᠯᠠ ᠬᠥᠮᠦᠨ ᠦ ᠰᠡᠳᠬᠢᠯ ᠢ ᠮᠡᠳᠡᠳᠡᠭ ᠶᠤᠮ)᠃ 31 ᠲᠡᠭᠡᠪᠡᠯ ᠲᠡᠳᠡ ᠲᠠᠨ ᠤ ᠡᠴᠢᠭᠡ ᠡᠪᠦᠭᠡᠳ ᠲᠦ ᠮᠠᠨᠢ ᠰᠣᠶᠣᠷᠬᠠᠭᠰᠠᠨ ᠡᠨᠡ ᠭᠠᠵᠠᠷ ᠲᠤ ᠠᠮᠢᠳᠤᠷᠠᠬᠤ ᠪᠦᠬᠦ ᠬᠤᠭᠤᠴᠠᠭᠠᠨ ᠳᠠᠭᠠᠨ ᠲᠠᠨ ᠠᠴᠠ ᠡᠮᠢᠶᠡᠵᠦ ᠲᠠᠨ ᠤ ᠵᠠᠮ ᠢᠶᠠᠷ ᠶᠠᠪᠤᠬᠤ ᠪᠣᠯᠣᠨᠠ᠃
32 ᠬᠡᠷᠪᠡ ᠲᠠᠨ ᠤ ᠢᠰᠷᠧᠯ ᠠᠷᠠᠳ ᠲᠦᠮᠡᠨ ᠪᠤᠰᠤ ᠬᠠᠷᠢ ᠬᠥᠮᠦᠨ ᠴᠤ ᠲᠠᠨ ᠤ ᠠᠭᠤᠤ ᠨᠡᠷᠡ᠂ ᠲᠠᠨ ᠤ ᠬᠦᠴᠦᠲᠦ ᠭᠠᠷ᠂ ᠲᠠᠨ ᠤ ᠰᠤᠩ᠋ᠭᠠᠭᠰᠠᠨ ᠮᠤᠲᠤᠷ ᠤᠨ ᠤᠯᠠᠮ ᠢᠶᠠᠷ ᠬᠣᠯᠠ ᠭᠠᠵᠠᠷ ᠠᠴᠠ ᠢᠷᠡᠵᠦ᠂ ᠡᠨᠡ ᠥᠷᠭᠥᠭᠡ ᠤᠷᠤᠭᠤ ᠬᠠᠨᠳᠤᠨ ᠳᠠᠭᠠᠳᠬᠠᠪᠠᠯ᠂ 33 ᠲᠠ ᠲᠩᠷᠢ ᠳᠠᠬᠢ ᠥᠪᠡᠷ ᠦᠨ ᠢᠶᠠᠨ ᠵᠠᠯᠠᠷᠠᠬᠤ ᠭᠠᠵᠠᠷ ᠠᠴᠠ ᠰᠣᠨᠣᠰᠣᠭᠠᠳ ᠲᠡᠷᠡ ᠬᠠᠷᠢ ᠬᠥᠮᠦᠨ ᠦ ᠲᠠᠨ ᠠᠴᠠ ᠭᠤᠶᠤᠬᠤ ᠪᠦᠬᠦᠨ ᠢ ᠪᠡᠶᠡᠯᠡᠭᠦᠯᠵᠦ ᠥᠭᠭᠥᠨᠡ ᠤᠤ︖ ᠲᠡᠢᠨ ᠬᠦ ᠭᠠᠵᠠᠷ ᠳᠡᠭᠡᠷᠡᠬᠢ ᠬᠠᠮᠤᠭ ᠦᠨᠳᠦᠰᠦᠲᠡᠨ ᠲᠠᠨ ᠤ ᠨᠡᠷᠡ ᠶᠢ ᠮᠡᠳᠡᠵᠦ᠂ ᠲᠠᠨ ᠤ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠲᠠᠢ ᠠᠳᠠᠯᠢ ᠲᠠᠨ ᠠᠴᠠ ᠡᠮᠢᠶᠡᠨ᠂ ᠮᠢᠨᠦ ᠪᠠᠷᠢᠭᠰᠠᠨ ᠡᠨᠡ ᠥᠷᠭᠥᠭᠡ ᠪᠣᠯ ᠲᠠᠨ ᠤ ᠨᠡᠷᠡ ᠪᠡᠷ ᠳᠠᠭᠤᠳᠠᠭᠳᠠᠳᠠᠭ ᠭᠡᠳᠡᠭ ᠢ ᠮᠡᠳᠡᠬᠦ ᠪᠣᠯᠲᠤᠭᠠᠢ᠃
34 ᠬᠡᠷᠪᠡ ᠲᠠᠨ ᠤ ᠠᠷᠠᠳ ᠲᠦᠮᠡᠨ ᠳᠠᠢᠰᠤᠨ ᠨᠤᠭᠤᠳ ᠲᠠᠢ ᠪᠠᠨ ᠲᠤᠯᠤᠯᠳᠤᠬᠤ ᠪᠠᠷ ᠭᠠᠷᠴᠤ᠂ ᠲᠠᠨ ᠤ ᠶᠠᠪᠤᠭᠤᠯᠤᠭᠰᠠᠨ ᠶᠠᠮᠠᠷ ᠨᠢᠭᠡ ᠭᠠᠵᠠᠷ ᠲᠤ᠂ ᠲᠠᠨ ᠤ ᠰᠢᠯᠢᠵᠦ ᠠᠪᠤᠭᠰᠠᠨ ᠡᠨᠡ ᠬᠣᠲᠠ ᠬᠢᠭᠡᠳ ᠲᠠᠨ ᠤ ᠨᠡᠷᠡ ᠶᠢᠨ ᠲᠥᠯᠥᠭᠡ ᠮᠢᠨᠦ ᠪᠠᠷᠢᠭᠰᠠᠨ ᠡᠨᠡ ᠥᠷᠭᠥᠭᠡ ᠤᠷᠤᠭᠤ ᠬᠠᠨᠳᠤᠨ ᠲᠡᠨᠳᠡ ᠡᠴᠡ ᠲᠠᠨ ᠳᠤ ᠳᠠᠭᠠᠳᠬᠠᠪᠠᠯ᠂ 35 ᠲᠠ ᠲᠩᠷᠢ ᠡᠴᠡ ᠲᠡᠳᠡᠨ ᠦ ᠳᠠᠭᠠᠳᠬᠠᠯ ᠪᠣᠯᠣᠨ ᠭᠤᠶᠤᠯᠲᠠ ᠶᠢ ᠰᠣᠨᠣᠰᠣᠭᠠᠳ ᠲᠡᠳᠡᠨ ᠳᠦ ᠭᠣᠣᠯᠴᠢ ᠬᠠᠷᠢᠭᠤ ᠥᠭᠭᠥᠭᠡᠴᠢ᠃
36 ᠨᠢᠭᠦᠯ ᠦᠢᠯᠡᠳᠬᠦ ᠦᠭᠡᠢ ᠬᠥᠮᠦᠨ ᠭᠡᠵᠦ ᠦᠭᠡᠢ᠃ ᠲᠡᠳᠡ ᠲᠠᠨ ᠳᠤ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠢᠶᠡᠷ ᠲᠠ ᠬᠢᠯᠢᠩᠨᠡᠨ ᠲᠡᠳᠡᠨ ᠢ ᠳᠠᠢᠰᠤᠨ ᠳᠤᠨᠢ ᠲᠤᠰᠢᠶᠠᠵᠤ᠂ ᠳᠠᠢᠰᠤᠨ ᠲᠡᠳᠡᠨ ᠢ ᠣᠯᠵᠠᠯᠠᠨ ᠬᠣᠯᠠ ᠣᠢᠷᠠ ᠶᠢᠨ ᠨᠢᠭᠡ ᠨᠤᠲᠤᠭ ᠲᠤ ᠠᠪᠠᠴᠢᠬᠤ ᠦᠶᠡ ᠳᠦ᠂ 37 ᠬᠡᠷᠪᠡ ᠲᠡᠳᠡ ᠤᠤᠯᠭᠠᠯᠠᠭᠳᠠᠨ ᠠᠪᠠᠴᠢᠭᠳᠠᠭᠰᠠᠨ ᠨᠤᠲᠤᠭ ᠲᠠᠭᠠᠨ ᠰᠠᠨᠠᠭᠠ ᠪᠠᠨ ᠥᠭᠡᠷᠡᠴᠢᠯᠡᠨ᠂ ᠣᠯᠵᠠᠯᠠᠭᠳᠠᠨ ᠣᠴᠢᠭᠰᠠᠨ ᠲᠡᠷᠡ ᠨᠤᠲᠤᠭ ᠲᠤ ᠲᠠᠨ ᠤ ᠲᠠᠭᠠᠯᠠᠯ ᠢ ᠭᠤᠶᠤᠵᠤ 〈ᠪᠢᠳᠡ ᠨᠢᠭᠦᠯ ᠦᠢᠯᠡᠳᠴᠡᠢ᠂ ᠪᠢᠳᠡ ᠪᠤᠷᠤᠭᠤ ᠲᠠᠢ᠂ ᠭᠡᠮ ᠲᠡᠢ〉 ᠭᠡᠳ᠂ 38 ᠮᠥᠨ ᠣᠯᠵᠠᠯᠠᠭᠳᠠᠨ ᠣᠴᠢᠭᠰᠠᠨ᠂ ᠳᠠᠢᠰᠤᠨ ᠨᠤᠭᠤᠳ ᠤᠨ ᠨᠤᠲᠤᠭ ᠲᠤ ᠪᠦᠬᠦ ᠵᠢᠷᠦᠬᠡ ᠪᠦᠬᠦ ᠰᠡᠳᠬᠢᠯ ᠢᠶᠠᠷ ᠢᠶᠠᠨ ᠲᠠᠨ ᠤᠷᠤᠭᠤ ᠡᠷᠭᠢᠵᠦ᠂ ᠲᠠᠨ ᠤ ᠡᠴᠢᠭᠡ ᠡᠪᠦᠭᠡᠳ ᠲᠤᠨᠢ ᠰᠣᠶᠣᠷᠬᠠᠭᠰᠠᠨ ᠨᠤᠲᠤᠭ᠂ ᠲᠠᠨ ᠤ ᠰᠣᠩ᠋ᠭᠣᠭᠰᠠᠨ ᠬᠣᠲᠠ᠂ ᠮᠢᠨᠦ ᠲᠠᠨ ᠤ ᠨᠡᠷᠡ ᠳᠦ ᠵᠣᠷᠢᠭᠤᠯᠵᠤ ᠪᠠᠢᠭᠤᠯᠤᠭᠰᠠᠨ ᠡᠨᠡ ᠥᠷᠭᠥᠭᠡ ᠤᠷᠤᠭᠤ ᠬᠠᠨᠳᠤᠨ ᠳᠠᠭᠠᠳᠬᠠᠪᠠᠯ᠂ 39 ᠲᠠ ᠲᠩᠷᠢ ᠳᠠᠬᠢ ᠥᠪᠡᠷ ᠦᠨ ᠢᠶᠠᠨ ᠵᠠᠯᠠᠷᠠᠬᠤ ᠭᠠᠵᠠᠷ ᠠᠴᠠ ᠲᠡᠳᠡᠨ ᠦ ᠳᠠᠭᠠᠳᠬᠠᠯ ᠪᠠ ᠭᠤᠶᠤᠯᠲᠠ ᠶᠢ ᠰᠣᠨᠣᠰᠣᠭᠠᠳ ᠭᠣᠣᠯᠴᠢ ᠬᠠᠷᠢᠭᠤ ᠥᠭᠭᠥᠭᠡᠴᠢ᠃ ᠲᠠᠨ ᠳᠤ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠠᠷᠠᠳ ᠲᠦᠮᠡᠨ ᠢᠶᠡᠨ ᠥᠷᠥᠰᠢᠶᠡᠨᠡ ᠤᠤ︖ 40 ᠥ᠂ ᠪᠤᠷᠬᠠᠨ ᠮᠢᠨᠢ᠂ ᠡᠨᠡ ᠭᠠᠵᠠᠷ ᠲᠤ ᠡᠷᠭᠦᠬᠦ ᠳᠠᠭᠠᠳᠬᠠᠯ ᠳᠤ ᠲᠠᠨ ᠤ ᠮᠡᠯᠮᠡᠢ ᠲᠤᠩ᠋ᠭᠠᠯᠠᠭ᠂ ᠲᠠᠨ ᠤ ᠴᠢᠬᠢ ᠰᠣᠨᠣᠷ ᠪᠠᠢᠬᠤ ᠪᠣᠯᠲᠤᠭᠠᠢ᠃
41 ᠶᠣᠬᠣᠸᠠ ᠪᠤᠷᠬᠠᠨ ᠮᠢᠨᠢ᠂ ᠲᠠ ᠣᠳᠣ ᠪᠣᠰᠣᠭᠠᠳ ᠬᠦᠴᠦ ᠴᠢᠳᠠᠯ ᠤᠨ ᠠᠪᠳᠠᠷᠠ ᠲᠠᠢ ᠪᠠᠨ ᠬᠠᠮᠲᠤ ᠠᠮᠠᠷᠠᠬᠤ ᠭᠠᠵᠠᠷ ᠲᠠᠭᠠᠨ ᠥᠪᠡᠷ ᠢᠶᠡᠨ ᠵᠠᠯᠠᠷᠠᠨᠠ ᠤᠤ︖ ᠶᠣᠬᠣᠸᠠ ᠪᠤᠷᠬᠠᠨ ᠮᠢᠨᠢ᠂ ᠲᠠᠬᠢᠯᠴᠢᠳ ᠢᠶᠠᠨ ᠠᠪᠤᠷᠠᠯ ᠢᠶᠠᠷ ᠬᠤᠪᠴᠠᠰᠤᠯᠠᠵᠤ ᠢᠲᠡᠭᠡᠭᠴᠢᠳ ᠢᠶᠠᠨ ᠰᠠᠢᠨ ᠰᠠᠢᠬᠠᠨ ᠢᠶᠠᠷ ᠪᠠᠶᠠᠰᠬᠠᠭᠠᠴᠢ᠃
42 ᠶᠣᠬᠣᠸᠠ ᠪᠤᠷᠬᠠᠨ ᠮᠢᠨᠢ᠂ ᠥᠪᠡᠷ ᠦᠨ ᠲᠣᠰᠣᠯᠠᠭᠰᠠᠨ ᠨᠢᠭᠡᠨ ᠡᠴᠡ ᠨᠢᠭᠤᠷ ᠢᠶᠠᠨ ᠪᠦᠦ ᠪᠤᠷᠤᠭᠤᠯᠠᠭᠠᠴᠢ ᠥᠪᠡᠷ ᠦᠨ ᠢᠶᠠᠨ ᠵᠠᠷᠤᠴᠠ ᠳ᠋ᠠᠸᠢᠳ᠋ ᠲᠤ ᠠᠮᠠᠯᠠᠭᠰᠠᠨ ᠬᠠᠢᠷᠠ ᠡᠨᠡᠷᠢᠯ ᠢᠶᠠᠨ ᠰᠠᠨᠠᠭᠠᠴᠢ》 ᠭᠡᠪᠡ᠃