ᠱᠠᠰᠲᠢᠷ ᠤᠨ ᠳᠡᠳ᠋ ᠨᠠᠢ᠌ᠮᠠ
ᠰᠣᠯᠣᠮᠣᠨ ᠤ ᠦᠢᠯᠡᠰ
1 ᠰᠣᠯᠣᠮᠣᠨ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠪᠣᠯᠣᠨ ᠥᠪᠡᠷ ᠦᠨ ᠢᠶᠠᠨ ᠣᠷᠳᠣᠨ ᠢ ᠬᠣᠷᠢᠨ ᠵᠢᠯ ᠤᠨ ᠬᠤᠭᠤᠴᠠᠭᠠᠨ ᠳᠤ ᠪᠠᠷᠢᠵᠤ ᠳᠠᠭᠤᠰᠬᠠᠭᠠᠳ 2 ᠾᠢᠷᠠᠮ ᠤᠨ ᠥᠭᠭᠥᠭᠰᠡᠨ ᠲᠣᠰᠬᠣᠨ ᠨᠤᠭᠤᠳ ᠢ ᠰᠡᠷᠭᠦᠭᠡᠨ ᠪᠣᠰᠬᠠᠵᠤ᠂ ᠲᠡᠨᠳᠡ ᠢᠰᠷᠧᠯᠴᠦᠳ ᠢ ᠰᠠᠭᠤᠷᠢᠰᠢᠭᠤᠯᠤᠭᠰᠠᠨ ᠪᠠᠢᠨᠠ᠃
3 ᠰᠣᠯᠣᠮᠣᠨ ᠪᠠᠰᠠ ᠶᠠᠪᠤᠵᠤ ᠬᠠᠮᠠᠲ ᠽᠣᠪᠠ ᠶᠢ ᠡᠵᠡᠯᠡᠪᠡ᠃ 4 ᠲᠡᠷᠡ ᠪᠡᠷ ᠴᠥᠯ ᠳᠤ ᠲᠠᠳ᠋ᠮᠣᠷ ᠢ ᠪᠠᠢᠭᠤᠯᠵᠤ᠂ ᠬᠠᠮᠠᠲ ᠲᠤ ᠨᠥᠭᠡᠴᠡᠯᠡᠬᠦ ᠲᠥᠪ ᠪᠣᠯᠬᠤ ᠬᠣᠲᠠ ᠨᠤᠭᠤᠳ ᠢ ᠪᠠᠷᠢᠪᠠ᠃ 5 ᠲᠡᠷᠡ ᠪᠠᠰᠠ ᠳᠡᠭᠡᠳᠦ᠂ ᠳᠣᠣᠷᠠᠳᠤ ᠪᠧᠲ ᠾᠣᠷᠣᠨ ᠵᠡᠷᠭᠡ ᠬᠡᠷᠡᠮ᠂ ᠬᠠᠭᠠᠯᠭᠠ᠂ ᠲᠦᠭᠵᠢᠶᠡ ᠪᠦᠬᠦᠢ ᠪᠡᠬᠢᠯᠡᠯᠲᠡᠲᠦ ᠬᠣᠲᠠ ᠨᠤᠭᠤᠳ ᠢ ᠪᠣᠰᠬᠠᠪᠠ᠃ 6 ᠮᠥᠨ ᠪᠠᠯᠠᠲ᠂ ᠥᠪᠡᠷ ᠦᠨ ᠰᠠᠩ ᠬᠥᠮᠥᠷᠭᠡ ᠶᠢᠨ ᠬᠣᠲᠠᠳ᠂ ᠲᠡᠷᠭᠡ ᠪᠠ ᠮᠣᠷᠢᠲᠤ ᠴᠡᠷᠢᠭ ᠤᠨ ᠬᠣᠲᠠᠳ ᠢ ᠪᠣᠰᠬᠠᠪᠠ᠃ ᠡᠢᠨ ᠬᠦ ᠰᠣᠯᠣᠮᠣᠨ ᠶᠧᠷᠦ᠋ᠰᠠᠯᠧᠮ᠂ ᠯᠧᠪᠠᠨᠣᠨ᠂ ᠪᠦᠬᠦ ᠬᠠᠷᠢᠶᠠ ᠨᠤᠲᠤᠭ ᠲᠠᠭᠠᠨ ᠪᠠᠢᠭᠤᠯᠤᠶᠠ ᠭᠡᠰᠡᠨ ᠪᠦᠬᠦᠨ ᠢᠶᠡᠨ ᠪᠠᠢᠭᠤᠯᠤᠭᠰᠠᠨ ᠪᠠᠢᠪᠠ᠃ 7 ᠢᠰᠷᠧᠯ ᠪᠤᠰᠤ ᠦᠨᠳᠦᠰᠦᠲᠡᠨ ᠨᠦᠭᠦᠳ᠂ ᠲᠤᠬᠠᠢᠯᠠᠪᠠᠯ ᠾᠢᠲ᠋ᠴᠦᠳ᠂ ᠠᠮᠣᠷᠢᠴᠤᠳ᠂ ᠫᠧᠷᠢᠽᠴᠦᠳ᠂ ᠾᠢᠸᠢᠴᠦᠳ᠂ ᠶᠧᠪᠦ᠋ᠰᠴᠦᠳ ᠡᠴᠡ ᠦᠯᠡᠳᠡᠭᠰᠡᠨ᠂ 8 ᠢᠰᠷᠧᠯᠴᠦᠳ ᠲᠦ ᠤᠰᠠᠳᠬᠠᠭᠳᠠᠭᠠ ᠦᠭᠡᠢ ᠲᠡᠷᠡ ᠨᠤᠲᠤᠭ ᠲᠤ ᠦᠯᠡᠳᠡᠭᠰᠡᠨ ᠲᠡᠳᠡᠨ ᠦ ᠦᠷᠡ ᠬᠣᠢᠴᠢᠰ ᠠᠴᠠ ᠰᠣᠯᠣᠮᠣᠨ ᠠᠯᠪᠠᠳᠠᠯᠭᠠ ᠶᠢᠨ ᠠᠵᠢᠯᠴᠢᠳ ᠢ ᠳᠠᠢᠴᠢᠯᠠᠭᠰᠠᠨ ᠢᠶᠠᠷ ᠲᠡᠳᠡ ᠥᠨᠥ ᠬᠦᠷᠲᠡᠯᠡ ᠪᠠᠢᠭᠰᠠᠭᠠᠷ᠃ 9 ᠬᠠᠷᠢᠨ ᠰᠣᠯᠣᠮᠣᠨ ᠢᠰᠷᠧᠯᠴᠦᠳ ᠢ ᠥᠪᠡᠷ ᠦᠨ ᠢᠶᠠᠨ ᠠᠵᠢᠯ ᠳᠤ ᠪᠣᠭᠣᠯᠴᠢᠯᠠᠭᠰᠠᠨ ᠦᠭᠡᠢ᠃ ᠢᠰᠷᠧᠯᠴᠦᠳ ᠨᠢ ᠪᠠᠢᠯᠳᠤᠭᠴᠢ᠂ ᠳᠠᠷᠤᠭᠠ᠂ ᠪᠠᠢᠯᠳᠤᠭᠠᠨ ᠤ ᠲᠡᠷᠭᠡ ᠮᠣᠷᠢᠳ ᠢ ᠬᠠᠷᠢᠭᠤᠴᠠᠭᠴᠢ ᠪᠣᠯᠳᠠᠭ ᠪᠥᠭᠡᠳ 10 ᠰᠣᠯᠣᠮᠣᠨ ᠬᠠᠭᠠᠨ ᠤ ᠲᠥᠯᠥᠭᠡ ᠠᠵᠢᠯᠯᠠᠳᠠᠭ ᠳᠠᠷᠤᠭᠠ ᠨᠠᠷ᠂ ᠠᠷᠠᠳ ᠣᠯᠠᠨ ᠢ ᠬᠢᠨᠠᠭᠴᠢᠳ ᠨᠢ ᠬᠣᠶᠠᠷ ᠵᠠᠭᠤ ᠲᠠᠪᠢᠨ ᠬᠥᠮᠦᠨ ᠪᠠᠢᠪᠠ᠃
11 ᠰᠣᠯᠣᠮᠣᠨ ᠳ᠋ᠠᠸᠢᠳ᠋ ᠤᠨ ᠬᠣᠲᠠ ᠠᠴᠠ ᠹᠠᠷᠠᠣ᠋ ᠶᠢᠨ ᠥᠬᠢᠨ ᠢ ᠥᠪᠡᠷ ᠲᠤᠨᠢ ᠵᠣᠷᠢᠭᠤᠯᠤᠨ ᠪᠠᠷᠢᠵᠤ ᠥᠭᠭᠥᠭᠰᠡᠨ ᠣᠷᠳᠣᠨ ᠤᠷᠤᠭᠤ ᠨᠢ ᠨᠡᠭᠦᠯᠭᠡᠵᠡᠢ᠃ ᠤᠴᠢᠷ ᠨᠢ ᠲᠡᠷᠡ᠄ 《ᠡᠬᠡᠨᠡᠷ ᠮᠢᠨᠢ ᠢᠰᠷᠧᠯ ᠤᠨ ᠬᠠᠭᠠᠨ ᠳ᠋ᠠᠸᠢᠳ᠋ ᠤᠨ ᠣᠷᠳᠣᠨ ᠳᠤ ᠰᠠᠭᠤᠵᠤ ᠪᠣᠯᠬᠤ ᠦᠭᠡᠢ᠃ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠵᠠᠯᠠᠷᠠᠭᠰᠠᠨ ᠭᠠᠵᠠᠷ ᠤᠴᠢᠷ ᠠᠴᠠ ᠡ᠊ᠨᠳᠡᠬᠢ ᠨᠢ ᠠᠷᠢᠭᠤᠨ ᠭᠠᠵᠠᠷ ᠶᠤᠮ》 ᠭᠡᠵᠡᠢ᠃
12 ᠰᠣᠯᠣᠮᠣᠨ ᠬᠣᠩᠭᠢᠯ ᠤᠨ ᠤᠷᠳᠤ ᠲᠠᠯᠠ ᠳᠤ ᠥᠪᠡᠷ ᠦᠨ ᠢᠶᠠᠨ ᠪᠣᠰᠬᠠᠭᠰᠠᠨ ᠶᠣᠬᠣᠸᠠ ᠶᠢᠨ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠶᠣᠬᠣᠸᠠ ᠳᠤ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠡᠷᠭᠦᠵᠡᠢ᠃ 13 ᠢᠩᠭᠢᠵᠦ ᠲᠡᠷᠡ ᠠᠮᠠᠷᠠᠯ ᠤᠨ ᠡᠳᠦᠷ᠂ ᠰᠢᠨᠡ ᠰᠠᠷᠠ ᠬᠢᠭᠡᠳ ᠵᠢᠯ ᠪᠦᠷᠢ ᠶᠢᠨ ᠲᠣᠭᠲᠠᠭᠰᠠᠨ ᠭᠤᠷᠪᠠᠨ ᠪᠠᠶᠠᠷ ᠪᠣᠯᠬᠤ ᠢᠰᠭᠡᠭᠡ ᠦᠭᠡᠢ ᠪᠣᠣᠪᠣ ᠶᠢᠨ ᠪᠠᠶᠠᠷ᠂ ᠳᠣᠯᠣᠭᠠᠨ ᠭᠠᠷᠠᠭ ᠤᠨ ᠪᠠᠶᠠᠷ᠂ ᠮᠠᠢᠬᠠᠨ ᠤ ᠪᠠᠶᠠᠷ ᠵᠡᠷᠭᠡ ᠡᠳᠦᠷ ᠤᠳ ᠲᠤ ᠮᠣᠰᠧ ᠶᠢᠨ ᠲᠤᠰᠢᠶᠠᠭᠰᠠᠨ ᠲᠠᠬᠢᠯ ᠤᠨ ᠵᠢᠷᠤᠮ ᠢ ᠳᠠᠭᠠᠵᠤ ᠪᠠᠢᠯᠠ᠃ 14 ᠰᠣᠯᠣᠮᠣᠨ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠲᠣᠭᠲᠠᠭᠠᠭᠰᠠᠨ ᠶᠣᠰᠣᠭᠠᠷ ᠲᠠᠬᠢᠯᠴᠢᠳ ᠢ ᠪᠦᠯᠦᠭ ᠬᠤᠪᠢᠶᠠᠨ ᠦᠢᠯᠡᠴᠢᠯᠡᠭᠦᠯᠵᠦ᠂ ᠯᠧᠸᠢᠴᠦᠳ ᠢᠶᠡᠷ ᠡᠳᠦᠷ ᠪᠦᠷᠢ ᠶᠢᠨ ᠵᠢᠷᠤᠮ ᠤᠨ ᠳᠠᠭᠠᠤ ᠮᠠᠭᠲᠠᠭᠠᠯ ᠡᠷᠭᠦᠭᠦᠯᠬᠦ ᠪᠠ ᠲᠠᠬᠢᠯᠴᠢᠳ ᠲᠤ ᠲᠤᠰᠠᠯᠠᠭᠤᠯᠵᠤ᠂ ᠮᠥᠨ ᠬᠠᠭᠠᠯᠭᠠᠴᠢᠳ ᠢ ᠨᠢ ᠪᠦᠯᠦᠭ ᠬᠤᠪᠢᠶᠠᠨ ᠬᠠᠭᠠᠯᠭᠠ ᠪᠣᠯᠭᠠᠨ ᠳᠡᠭᠡᠷᠡ ᠲᠣᠮᠢᠯᠠᠪᠠ᠃ ᠪᠤᠷᠬᠠᠨ ᠤ ᠬᠥᠮᠦᠨ ᠳ᠋ᠠᠸᠢᠳ᠋ ᠡᠢᠨ ᠬᠦ ᠲᠤᠰᠢᠶᠠᠭᠰᠠᠨ ᠪᠠᠢᠵᠠᠢ᠃ 15 ᠲᠠᠬᠢᠯᠴᠢᠳ ᠪᠣᠯᠣᠨ ᠯᠧᠸᠢᠴᠦᠳ ᠬᠥᠮᠥᠷᠭᠡ ᠶᠢᠨ ᠠᠵᠢᠯ ᠮᠡᠲᠦ ᠶᠢᠨ ᠶᠠᠮᠠᠷ ᠠᠵᠢᠯ ᠳᠡᠭᠡᠷᠡ ᠴᠤ ᠬᠠᠭᠠᠨ ᠤ ᠲᠤᠰᠢᠶᠠᠯ ᠢ ᠵᠥᠷᠢᠴᠡᠭᠰᠡᠨ ᠦᠭᠡᠢ᠃
16 ᠡᠢᠨ ᠬᠦ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠰᠠᠭᠤᠷᠢ ᠶᠢ ᠲᠠᠯᠪᠢᠭᠰᠠᠨ ᠡᠳᠦᠷ ᠡᠴᠡ ᠡᠬᠢᠯᠡᠨ ᠲᠡᠷᠡ ᠠᠵᠢᠯ ᠳᠠᠭᠤᠰᠬᠤ ᠬᠦᠷᠲᠡᠯᠡ ᠰᠣᠯᠣᠮᠣᠨ ᠤ ᠪᠦᠬᠦ ᠠᠵᠢᠯ ᠭᠦᠢᠴᠡᠭᠰᠡᠨ ᠪᠠᠢᠨᠠ᠃ ᠢᠩᠭᠢᠭᠡᠳ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠪᠡᠯᠡᠬᠡᠨ ᠪᠣᠯᠪᠠ᠃
17 ᠲᠡᠷᠡ ᠦᠶᠡ ᠳᠦ ᠰᠣᠯᠣᠮᠣᠨ ᠡᠳᠣᠮ ᠨᠤᠲᠤᠭ ᠲᠤ᠂ ᠲᠠᠩᠭᠢᠰ ᠤᠨ ᠬᠥᠪᠡᠭᠡᠨ ᠳᠠᠬᠢ ᠡᠽᠢᠶᠣᠨ ᠭᠧᠪᠧᠷ ᠪᠣᠯᠣᠨ ᠡᠯᠠᠲ ᠤᠷᠤᠭᠤ ᠣᠴᠢᠭᠰᠠᠨ ᠳᠤ᠂ 18 ᠾᠢᠷᠠᠮ ᠲᠦᠰᠢᠮᠡᠳ ᠲᠡᠭᠡᠨ ᠲᠤᠰᠢᠶᠠᠨ᠂ ᠰᠣᠯᠣᠮᠣᠨ ᠳᠤ ᠬᠥᠯᠭᠡ ᠣᠩ᠋ᠭᠣᠴᠠ ᠪᠠ ᠲᠤᠷᠰᠢᠯᠭᠠ ᠲᠠᠢ ᠳᠠᠯᠠᠢᠴᠢᠨ ᠵᠠᠷᠤᠴᠠ ᠨᠠᠷ ᠢᠶᠠᠨ ᠶᠠᠪᠤᠭᠤᠯᠵᠠᠢ᠃ ᠲᠡᠳᠡ ᠰᠣᠯᠣᠮᠣᠨ ᠤ ᠵᠠᠷᠤᠴᠠ ᠨᠠᠷ ᠲᠠᠢ ᠬᠠᠮᠲᠤ ᠣᠹᠢᠷ ᠲᠤ ᠣᠴᠢᠭᠠᠳ ᠲᠡᠨᠳᠡ ᠡᠴᠡ ᠰᠣᠯᠣᠮᠣᠨ ᠬᠠᠭᠠᠨ ᠳᠤ ᠳᠥᠷᠪᠡᠨ ᠵᠠᠭᠤ ᠲᠠᠪᠢᠨ ᠲᠠᠯᠠᠨᠲ 13 ᠠᠯᠲᠠ ᠠᠪᠴᠢᠷᠠᠵᠤ ᠥᠭᠭᠥᠭᠰᠡᠨ ᠶᠤᠮ᠃