ᠱᠠᠰᠲᠢᠷ ᠤᠨ ᠳᠡᠳ᠋ ᠬᠣᠷᠢᠨ ᠵᠢᠷᠭᠤᠭᠠ
ᠶᠦᠳᠠ ᠶᠢᠨ ᠬᠠᠭᠠᠨ ᠦᠽᠢᠶᠠ
1 ᠶᠦᠳᠠ ᠶᠢᠨ ᠪᠦᠬᠦ ᠠᠷᠠᠳ ᠲᠦᠮᠡᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠦᠽᠢᠶᠠ ᠶᠢ ᠡᠴᠢᠭᠡ ᠠᠮᠠᠽᠢᠶᠠ ᠶᠢᠨ ᠬᠢᠨᠢ ᠣᠷᠣᠨ ᠳᠤ ᠬᠠᠭᠠᠨ ᠢᠶᠠᠷ ᠡᠷᠭᠦᠮᠵᠢᠯᠡᠵᠡᠢ᠃ 2 ᠠᠮᠠᠽᠢᠶᠠ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠬᠠᠮᠲᠤ ᠨᠣᠢᠷᠰᠣᠭᠰᠠᠨ ᠤ ᠳᠠᠷᠠᠭᠠ᠂ ᠡᠯᠠᠲ ᠢ ᠰᠡᠷᠭᠦᠭᠡᠨ ᠪᠣᠰᠬᠠᠵᠤ ᠶᠦᠳᠠ ᠲᠠᠢ ᠳᠠᠬᠢᠨ ᠨᠢᠭᠡᠳᠬᠡᠭᠰᠡᠨ ᠨᠢ ᠲᠡᠷᠡ ᠶᠤᠮ᠃ 3 ᠦᠽᠢᠶᠠ ᠠᠷᠪᠠᠨ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠳᠠᠭᠠᠨ ᠬᠠᠭᠠᠨ ᠪᠣᠯᠣᠭᠠᠳ ᠶᠧᠷᠦ᠋ᠰᠠᠯᠧᠮ ᠳᠤ ᠲᠠᠪᠢᠨ ᠬᠣᠶᠠᠷ ᠵᠢᠯ ᠬᠠᠭᠠᠨᠴᠢᠯᠠᠪᠠ᠃ ᠡᠬᠡ ᠨᠢ ᠶᠧᠷᠦ᠋ᠰᠠᠯᠧᠮ ᠬᠥᠮᠦᠨ ᠶᠧᠺᠣᠯᠢᠶᠠ ᠪᠠᠢᠪᠠ᠃ 4 ᠦᠽᠢᠶᠠ ᠡᠴᠢᠭᠡ ᠠᠮᠠᠽᠢᠶᠠ ᠶᠢᠨ ᠢᠶᠠᠨ ᠬᠢᠭᠰᠡᠨ ᠪᠦᠭᠦᠳᠡ ᠶᠢ ᠳᠠᠭᠤᠷᠢᠶᠠᠨ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠳᠦ ᠵᠥᠪ ᠢ ᠦᠢᠯᠡᠳᠴᠡᠢ᠂ 5 ᠽᠧᠺᠠᠷᠢᠶᠠ ᠲᠡᠭᠦᠨ ᠳᠦ ᠪᠤᠷᠬᠠᠨ ᠠᠴᠠ ᠡᠮᠢᠶᠡᠬᠦ ᠶᠢ ᠰᠤᠷᠭᠠᠵᠤ ᠪᠠᠢᠭᠰᠠᠨ ᠡᠳᠦᠷ ᠤᠳ ᠲᠤ ᠲᠡᠷᠡ ᠪᠡᠷ ᠪᠤᠷᠬᠠᠨ ᠢ ᠬᠠᠢᠭᠰᠠᠨ ᠪᠥᠭᠡᠳ ᠶᠣᠬᠣᠸᠠ ᠶᠢ ᠬᠠᠢᠵᠤ ᠪᠠᠢᠬᠤ ᠳᠤᠨᠢ ᠪᠤᠷᠬᠠᠨ ᠲᠡᠭᠦᠨ ᠢ ᠠᠮᠵᠢᠯᠲᠠ ᠲᠠᠢ ᠪᠠᠢᠯᠭᠠᠪᠠ᠃
6 ᠲᠡᠷᠡ ᠭᠠᠷᠴᠤ ᠶᠠᠪᠤᠭᠠᠳ ᠹᠢᠯᠢᠰᠲ᠋ᠴᠦᠳ ᠲᠡᠢ ᠪᠠᠢᠯᠳᠤᠵᠤ᠂ ᠭᠠᠲ ᠤᠨ ᠬᠡᠷᠡᠮ᠂ ᠶᠠᠪᠨᠧ ᠶᠢᠨ ᠬᠡᠷᠡᠮ᠂ ᠠᠱᠠᠳᠣᠳ᠋ ᠤᠨ ᠬᠡᠷᠡᠮ ᠢ ᠨᠤᠷᠠᠭᠠᠨ ᠠᠱᠠᠳᠣᠳ᠋ ᠤᠨ ᠨᠤᠲᠤᠭ ᠪᠣᠯᠣᠨ ᠹᠢᠯᠢᠰᠲ ᠤᠨ ᠪᠤᠰᠤᠳ ᠭᠠᠵᠠᠷ ᠢᠶᠠᠷ ᠬᠣᠲᠠ ᠪᠠᠢᠭᠤᠯᠤᠭᠰᠠᠨ ᠪᠠᠢᠨᠠ᠃ 7 ᠪᠤᠷᠬᠠᠨ ᠲᠡᠭᠦᠨ ᠳᠦ ᠲᠤᠰᠠᠯᠠᠭᠰᠠᠨ ᠳᠤ᠂ ᠲᠡᠷᠡ ᠹᠢᠯᠢᠰᠲ᠋ᠴᠦᠳ᠂ ᠮᠥᠨ ᠭᠦᠦᠷ ᠪᠠᠯ ᠳᠤ ᠰᠠᠭᠤᠳᠠᠭ ᠠᠷᠠᠪᠴᠤᠳ ᠪᠣᠯᠣᠨ ᠮᠧᠶᠦ᠋ᠨᠴᠦᠳ ᠢ ᠴᠣᠬᠢᠭᠰᠠᠨ ᠪᠥᠭᠡᠳ 8 ᠠᠮᠣᠨᠴᠤᠳ ᠴᠤ ᠦᠽᠢᠶᠠ ᠳᠤ ᠠᠯᠪᠠ ᠭᠤᠪᠴᠢᠭᠤᠷ ᠪᠠᠷᠢᠪᠠ᠃ ᠦᠽᠢᠶᠠ ᠠᠰᠤᠷᠤ ᠶᠡᠬᠡ ᠬᠦᠴᠦᠷᠬᠡᠭᠵᠢᠵᠦ᠂ ᠠᠯᠳᠠᠷ ᠨᠡᠷᠡ ᠨᠢ ᠶᠧᠵᠢᠫᠲ ᠤᠨ ᠬᠢᠯᠢ ᠬᠦᠷᠲᠡᠯᠡ ᠳᠠᠭᠤᠷᠢᠰᠪᠠ᠃ 9 ᠦᠽᠢᠶᠠ ᠶᠧᠷᠦ᠋ᠰᠠᠯᠧᠮ ᠳᠤ ᠪᠤᠯᠤᠩ ᠤᠨ ᠬᠠᠭᠠᠯᠭᠠ᠂ ᠬᠥᠨᠳᠡᠢ ᠶᠢᠨ ᠬᠠᠭᠠᠯᠭᠠ ᠪᠣᠯᠣᠨ ᠬᠡᠷᠡᠮ ᠦᠨ ᠪᠤᠯᠤᠩ ᠳᠤ ᠣᠯᠠᠨ ᠴᠠᠮᠬᠠᠭ ᠪᠠᠷᠢᠵᠤ᠂ ᠲᠡᠳᠡᠭᠡᠷ ᠢ ᠪᠡᠬᠢᠯᠡᠪᠡ᠃ 10 ᠲᠡᠷᠡ ᠪᠡᠷ ᠴᠥᠯ ᠳᠤ ᠣᠯᠠᠨ ᠴᠠᠮᠬᠠᠭ ᠪᠣᠰᠬᠠᠵᠤ᠂ ᠣᠯᠠᠨ ᠬᠤᠳᠳᠤᠭ ᠤᠬᠤᠪᠠ᠃ ᠤᠴᠢᠷ ᠨᠢ ᠲᠡᠷᠡ ᠨᠠᠮ ᠳᠣᠣᠷᠠ ᠭᠠᠵᠠᠷ ᠲᠤ ᠴᠤ᠂ ᠲᠠᠯᠠ ᠭᠠᠵᠠᠷ ᠲᠤ ᠴᠤ ᠥᠨᠢᠷ ᠣᠯᠠᠨ ᠮᠠᠯ ᠰᠦᠷᠦᠭ ᠲᠡᠢ᠂ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠲᠤ ᠴᠤ᠂ ᠦᠷᠡᠵᠢᠯ ᠰᠢᠮᠡᠲᠡᠢ ᠲᠠᠯᠠᠪᠠᠢ ᠳᠤ ᠴᠤ ᠲᠠᠷᠢᠶᠠᠴᠢᠳ᠂ ᠦᠵᠦᠮᠴᠢᠳ ᠲᠠᠢ ᠪᠠᠢᠪᠠ᠂ ᠲᠡᠷᠡ ᠭᠠᠵᠠᠷ ᠰᠢᠷᠣᠢ ᠳᠤ ᠬᠠᠢᠷᠠᠲᠠᠢ ᠬᠥᠮᠦᠨ ᠪᠠᠢᠪᠠ᠃ 11 ᠦᠽᠢᠶᠠ ᠪᠠᠢᠯᠳᠤᠬᠤ ᠳᠤ ᠪᠡᠯᠡᠬᠡᠨ ᠴᠡᠷᠢᠭ ᠲᠠᠢ᠂ ᠲᠡᠳᠡᠨ ᠢ ᠴᠤᠭᠯᠠᠭᠤᠯᠵᠤ ᠵᠣᠬᠢᠶᠠᠨ ᠪᠠᠢᠭᠤᠯᠤᠭᠴᠢ ᠨᠢ ᠪᠢᠴᠢᠭᠡᠴᠢ ᠶᠧᠶᠧᠯ᠂ ᠲᠦᠰᠢᠮᠡᠯ ᠮᠠᠶᠠᠰᠧᠶᠠ᠂ ᠤᠳᠤᠷᠢᠳᠤᠭᠴᠢ ᠨᠢ ᠬᠠᠭᠠᠨ ᠤ ᠵᠠᠩᠵᠤᠨ ᠬᠠᠨᠠᠨᠢᠶᠠ᠂ 12 ᠳᠠᠷᠤᠭᠠ ᠨᠠᠷ ᠨᠢ ᠭᠡᠷ ᠪᠦᠯᠢ ᠶᠢᠨ ᠠᠬᠠᠮᠠᠳ (ᠬᠣᠶᠠᠷ ᠮᠢᠩ᠋ᠭᠠ ᠵᠢᠷᠭᠤᠭᠠᠨ ᠵᠠᠭᠤᠨ ᠬᠥᠮᠦᠨ) ᠪᠥᠭᠡᠳ 13 ᠲᠡᠳᠡᠨ ᠦ ᠭᠠᠷ ᠳᠣᠣᠷᠠ ᠭᠤᠴᠢᠨ ᠲᠦᠮᠡ ᠳᠣᠯᠣᠭᠠᠨ ᠮᠢᠩ᠋ᠭᠠ ᠲᠠᠪᠤᠨ ᠵᠠᠭᠤᠨ ᠬᠦᠴᠦᠲᠦ ᠴᠡᠷᠢᠭ ᠪᠠᠢᠪᠠ᠃ ᠲᠡᠳᠡ ᠬᠠᠭᠠᠨ ᠢ ᠳᠠᠮᠵᠢᠨ ᠳᠠᠢᠰᠤᠨ ᠢ ᠴᠣᠬᠢᠳᠠᠭ ᠪᠥᠭᠡᠳ ᠬᠦᠴᠦᠷᠬᠡᠭ᠂ ᠲᠤᠯᠤᠯᠳᠤᠬᠤ ᠴᠢᠳᠠᠪᠤᠷᠢ ᠲᠠᠢ ᠶᠤᠮ᠃ 14 ᠦᠽᠢᠶᠠ ᠡᠳᠡᠭᠡᠷ ᠪᠦᠬᠦ ᠴᠡᠷᠢᠭ ᠲᠤ ᠪᠠᠮᠪᠠᠢ᠂ ᠵᠢᠳᠠ᠂ ᠳᠤᠭᠤᠯᠠᠭᠠ᠂ ᠬᠤᠶᠠᠭ᠂ ᠨᠤᠮᠤ ᠰᠤᠮᠤ ᠪᠣᠯᠣᠨ ᠴᠢᠯᠠᠭᠤ ᠳᠦᠦᠭᠡᠦᠷᠳᠡᠬᠦ ᠬᠡᠷᠡᠭᠰᠡᠯ ᠪᠡᠯᠡᠳᠬᠡᠵᠦ ᠥᠭᠭᠥᠭᠰᠡᠨ ᠪᠢᠯᠡ᠃ 15 ᠲᠡᠷᠡ ᠶᠧᠷᠦ᠋ᠰᠠᠯᠧᠮ ᠳᠤ ᠳᠠᠷᠬᠠᠳ ᠢᠶᠠᠷ ᠰᠤᠮᠤ ᠪᠣᠯᠣᠨ ᠲᠣᠮᠣ ᠴᠢᠯᠠᠭᠤ ᠬᠠᠷᠪᠤᠬᠤ ᠪᠠᠭᠠᠵᠢ ᠬᠢᠯᠭᠡᠵᠦ᠂ ᠴᠠᠮᠬᠠᠭ ᠪᠠ ᠪᠡᠬᠢᠯᠡᠯᠲᠡ ᠶᠢᠨ ᠪᠤᠯᠤᠩ ᠳᠤ ᠪᠠᠢᠷᠢᠯᠠᠭᠤᠯᠵᠠᠢ᠃ ᠭᠠᠢᠬᠠᠮᠰᠢᠭᠲᠠᠢ ᠲᠤᠰᠠᠯᠠᠮᠵᠢ ᠪᠠᠷ ᠬᠦᠴᠦᠷᠬᠡᠭ ᠪᠣᠯᠣᠭᠰᠠᠨ ᠲᠡᠭᠦᠨ ᠦ ᠨᠡᠷᠡ ᠬᠣᠯᠠ ᠣᠢᠷᠠ ᠳᠤ ᠠᠯᠳᠠᠷᠰᠢᠭᠰᠠᠨ ᠪᠠᠢᠨᠠ᠃
16 ᠭᠡᠪᠡᠴᠦ ᠦᠽᠢᠶᠠ ᠬᠦᠴᠦᠷᠬᠡᠭ ᠪᠣᠯᠣᠭᠰᠠᠨ ᠤ ᠪᠠᠨ ᠳᠠᠷᠠᠭᠠ᠂ ᠪᠠᠷᠳᠠᠮᠨᠠᠵᠤ᠂ ᠵᠠᠪᠬᠠᠢᠷᠠᠵᠤ᠂ ᠶᠣᠬᠣᠸᠠ ᠪᠤᠷᠬᠠᠨ ᠳᠠᠭᠠᠨ ᠢᠲᠡᠭᠡᠮᠵᠢ ᠦᠭᠡᠢ ᠬᠠᠨᠳᠤᠪᠠ᠃ ᠲᠡᠷᠡ ᠪᠡᠷ ᠶᠣᠬᠣᠸᠠ ᠶᠢᠨ ᠣᠷᠳᠣᠨ ᠳᠤ ᠣᠷᠣᠵᠤ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠤᠲᠤᠯᠭᠠ ᠤᠭᠤᠭᠢᠭᠤᠯᠬᠤ ᠭᠡᠪᠡ᠃ 17 ᠲᠠᠬᠢᠯᠴᠢ ᠠᠽᠠᠷᠢᠶᠠ ᠶᠣᠬᠣᠸᠠ ᠶᠢᠨ ᠨᠠᠶᠠᠨ ᠵᠣᠷᠢᠭᠲᠤ ᠲᠠᠬᠢᠯᠴᠢ ᠶᠢ ᠳᠠᠭᠠᠭᠤᠯᠤᠨ ᠲᠡᠭᠦᠨ ᠦ ᠠᠷᠤ ᠠᠴᠠ ᠣᠷᠣᠵᠤ᠂ 18 ᠦᠽᠢᠶᠠ ᠬᠠᠭᠠᠨ ᠢ ᠬᠣᠷᠢᠭᠯᠠᠨ ᠲᠡᠭᠦᠨ ᠳᠦ᠄ 《ᠦᠽᠢᠶᠠ᠂ ᠶᠣᠬᠣᠸᠠ ᠳᠤ ᠤᠲᠤᠯᠭᠠ ᠤᠭᠤᠭᠢᠭᠤᠯᠬᠤ ᠨᠢ ᠲᠠᠨ ᠤ ᠡᠭᠦᠷᠭᠡ ᠪᠢᠰᠢ᠂ ᠬᠠᠷᠢᠨ ᠤᠲᠤᠯᠭᠠ ᠤᠭᠤᠭᠢᠭᠤᠯᠬᠤ ᠪᠠᠷ ᠲᠤᠰᠠᠭᠠᠷᠯᠠᠭᠳᠠᠭᠰᠠᠨ ᠠᠷᠣᠨ ᠤ ᠦᠷᠡ ᠤᠳᠤᠮ ᠤᠨ ᠲᠠᠬᠢᠯᠴᠢᠳ ᠤᠨ ᠡᠭᠦᠷᠭᠡ ᠶᠤᠮ᠃ ᠲᠠ ᠢᠲᠡᠭᠡᠮᠵᠢ ᠦᠭᠡᠢ ᠬᠠᠨᠳᠤᠭᠰᠠᠨ ᠲᠤᠯᠠ ᠠᠷᠢᠭᠤᠨ ᠭᠠᠵᠠᠷ ᠠᠴᠠ ᠭᠠᠷᠤᠭᠠᠷᠠᠢ᠂ ᠶᠣᠬᠣᠸᠠ ᠪᠤᠷᠬᠠᠨ ᠲᠠᠨ ᠳᠤ ᠬᠦᠨᠳᠦᠯᠡᠯ ᠥᠭᠬᠦ ᠦᠭᠡᠢ》 ᠭᠡᠬᠦ ᠳᠦ᠂ 19 ᠦᠽᠢᠶᠠ ᠬᠢᠯᠢᠩᠨᠡᠪᠡ᠃ ᠲᠡᠷᠡ ᠤᠲᠤᠯᠭᠠ ᠤᠭᠤᠭᠢᠭᠤᠯᠬᠤ ᠪᠣᠢᠫᠣᠷ ᠪᠠᠷᠢᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠲᠠᠬᠢᠯᠴᠢᠳ ᠲᠤ ᠬᠢᠯᠢᠩᠨᠡᠲᠡᠯᠡ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠦ᠂ ᠤᠲᠤᠯᠭᠠᠲᠤ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠳᠡᠷᠭᠡᠳᠡ ᠪᠠᠢᠭᠰᠠᠨ ᠲᠠᠬᠢᠯᠴᠢᠳ ᠤᠨ ᠡᠮᠦᠨᠡ ᠲᠡᠭᠦᠨ ᠦ ᠮᠠᠩᠨᠠᠢ ᠳᠡᠭᠡᠷᠡ ᠤᠶᠠᠮᠠᠨ ᠡᠪᠡᠳᠴᠢᠨ ᠭᠠᠷᠴᠠᠢ᠃ 20 ᠠᠬᠠᠯᠠᠬᠤ ᠲᠠᠬᠢᠯᠴᠢ ᠠᠽᠠᠷᠢᠶᠠ ᠪᠣᠯᠣᠨ ᠲᠠᠬᠢᠯᠴᠢᠳ ᠪᠦᠭᠦᠳᠡᠭᠡᠷ ᠲᠡᠭᠦᠨ ᠤᠷᠤᠭᠤ ᠡᠷᠭᠢᠵᠦ ᠬᠠᠷᠠᠲᠠᠯᠠ ᠮᠠᠩᠨᠠᠢ ᠳᠡᠭᠡᠷᠡ ᠨᠢ ᠤᠶᠠᠮᠠᠨ ᠡᠪᠡᠳᠴᠢᠨ ᠲᠤᠰᠤᠭᠰᠠᠨ ᠪᠠᠢᠪᠠ︕ ᠶᠣᠬᠣᠸᠠ ᠲᠡᠭᠦᠨ ᠢ ᠴᠣᠬᠢᠭᠰᠠᠨ ᠤᠴᠢᠷ ᠠᠴᠠ ᠲᠡᠳᠡ ᠲᠡᠭᠦᠨ ᠢ ᠲᠡᠨᠳᠡ ᠡᠴᠡ ᠶᠠᠭᠠᠷᠠᠪᠴᠢᠯᠠᠨ ᠭᠠᠷᠭᠠᠭᠰᠠᠨ ᠪᠥᠭᠡᠳ ᠦᠽᠢᠶᠠ ᠥᠪᠡᠷ ᠢᠶᠡᠨ ᠴᠤ ᠶᠠᠭᠠᠷᠠᠨ ᠭᠠᠷᠴᠠᠢ᠃ 21 ᠦᠽᠢᠶᠠ ᠬᠠᠭᠠᠨ ᠨᠠᠰᠤ ᠪᠠᠷᠠᠬᠤ ᠡᠳᠦᠷ ᠢᠶᠡᠨ ᠬᠦᠷᠲᠡᠯᠡ ᠤᠶᠠᠮᠠᠨ ᠡᠪᠡᠳᠴᠢᠨ ᠲᠡᠢ ᠪᠠᠢᠭᠰᠠᠭᠠᠷ ᠪᠠᠢᠯᠠ᠃ ᠲᠡᠷᠡ ᠪᠡᠷ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠡᠴᠡ ᠲᠤᠰᠠᠭᠠᠷᠯᠠᠭᠳᠠᠵᠤ ᠤᠶᠠᠮᠠᠨ ᠡᠪᠡᠳᠴᠢᠨ ᠲᠡᠢ ᠪᠠᠢᠭᠰᠠᠭᠠᠷ ᠥᠪᠡᠷ ᠦᠨ ᠢᠶᠠᠨ ᠭᠡᠷ ᠲᠦ ᠲᠤᠰᠠᠭᠠᠷ ᠰᠠᠭᠤᠳᠠᠭ ᠪᠣᠯᠵᠠᠢ᠃ ᠬᠠᠭᠠᠨ ᠤ ᠬᠦᠦ ᠶᠣᠲ᠋ᠠᠮ ᠬᠠᠭᠠᠨ ᠤ ᠣᠷᠳᠣᠨ ᠤ ᠬᠢᠨ ᠢᠶᠠᠨ ᠲᠣᠯᠣᠭᠠᠢᠯᠠᠨ᠂ ᠭᠠᠵᠠᠷ ᠤᠨ ᠠᠷᠠᠳ ᠲᠦᠮᠡᠨ ᠢᠶᠡᠨ ᠵᠠᠬᠢᠷᠴᠠᠢ᠃
22 ᠦᠽᠢᠶᠠ ᠶᠢᠨ ᠪᠤᠰᠤᠳ ᠶᠠᠪᠤᠳᠠᠯ ᠢ ᠡᠬᠢᠨ ᠡᠴᠡ ᠨᠢ ᠳᠠᠭᠤᠰᠲᠠᠯᠠ ᠠᠮᠣᠽ ᠤᠨ ᠬᠦᠦ᠂ ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠠᠢᠶᠠ ᠪᠢᠴᠢᠭᠰᠡᠨ ᠪᠢᠯᠡ᠃ 23 ᠦᠽᠢᠶᠠ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠬᠠᠮᠲᠤ ᠨᠣᠢᠷᠰᠣᠭᠰᠠᠨ ᠳᠤ᠂ ᠬᠥᠮᠦᠰ ᠲᠡᠭᠦᠨ ᠢ ᠤᠶᠠᠮᠠᠨ ᠡᠪᠡᠳᠴᠢᠨ ᠲᠡᠢ ᠭᠡᠳ ᠬᠠᠭᠠᠳ ᠤᠨ ᠪᠤᠯᠠᠰᠢᠨ ᠤ ᠬᠠᠵᠠᠭᠤ ᠳᠠᠬᠢ ᠲᠠᠯᠠᠪᠠᠢ ᠳᠤ ᠡᠴᠢᠭᠡ ᠡᠪᠦᠭᠡᠳ ᠦᠨ ᠬᠢᠨᠢ ᠳᠡᠷᠭᠡᠳᠡ ᠣᠷᠣᠰᠢᠭᠤᠯᠵᠠᠢ᠃ ᠬᠦᠦ ᠶᠣᠲ᠋ᠠᠮ ᠨᠢ ᠲᠡᠭᠦᠨ ᠢ ᠵᠠᠯᠭᠠᠮᠵᠢᠯᠠᠨ ᠬᠠᠭᠠᠨ ᠪᠣᠯᠪᠠ᠃