ᠱᠠᠰᠲᠢᠷ ᠤᠨ ᠳᠡᠳ᠋ ᠬᠣᠷᠢᠨ ᠭᠤᠷᠪᠠ
ᠬᠠᠭᠠᠨ ᠰᠢᠷᠡᠭᠡ ᠶᠢ ᠪᠤᠴᠠᠭᠠᠵᠤ ᠠᠪᠤᠪᠠ
1 ᠳᠣᠯᠣᠳᠠᠬᠢ ᠵᠢᠯ ᠳᠦᠨᠢ ᠶᠧᠬᠣᠶᠠᠳᠠ ᠵᠣᠷᠢᠭ ᠭᠠᠷᠭᠠᠨ ᠶᠧᠷᠣᠬᠠᠮ ᠤᠨ ᠬᠦᠦ ᠠᠽᠠᠷᠢᠶᠠ᠂ ᠶᠧᠬᠣᠬᠠᠨᠠᠨ ᠤ ᠬᠦᠦ ᠢᠱᠮᠠᠶᠧᠯ᠂ ᠣᠪᠧᠳ᠋ ᠤᠨ ᠬᠦᠦ ᠠᠽᠠᠷᠢᠶᠠ᠂ ᠠᠳᠠᠢᠶᠠ ᠶᠢᠨ ᠬᠦᠦ ᠮᠠᠶᠠᠰᠧᠶᠠ᠂ ᠽᠢᠺᠷᠢ ᠶᠢᠨ ᠬᠦᠦ ᠡᠯᠢᠱᠠᠹᠠᠲ ᠵᠡᠷᠭᠡ ᠵᠠᠭᠤᠲᠤ ᠶᠢᠨ ᠳᠠᠷᠤᠭᠠ ᠨᠠᠷ ᠲᠠᠢ ᠭᠡᠷᠡ ᠪᠠᠢᠭᠤᠯᠪᠠ᠃ 2 ᠲᠡᠳᠡ ᠪᠦᠬᠦ ᠶᠦᠳᠠ ᠪᠠᠷ ᠶᠠᠪᠤᠵᠤ᠂ ᠶᠦᠳᠠ ᠶᠢᠨ ᠪᠦᠬᠦ ᠬᠣᠲᠠ ᠠᠴᠠ ᠯᠧᠸᠢᠴᠦᠳ ᠪᠣᠯᠣᠨ ᠢᠰᠷᠧᠯ ᠤᠨ ᠪᠦᠯᠢ ᠶᠢᠨ ᠲᠡᠷᠢᠭᠦᠳ ᠢ ᠴᠤᠭᠯᠠᠭᠤᠯᠵᠤ᠂ ᠶᠧᠷᠦ᠋ᠰᠠᠯᠧᠮ ᠳᠤ ᠢᠷᠡᠭᠦᠯᠵᠡᠢ᠃ 3 ᠪᠦᠬᠦ ᠴᠢᠭᠤᠯᠭᠠᠨ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠳᠦ ᠬᠠᠭᠠᠨ ᠲᠠᠢ ᠭᠡᠷᠡ ᠪᠠᠢᠭᠤᠯᠪᠠ᠃ ᠶᠧᠬᠣᠶᠠᠳᠠ ᠲᠡᠳᠡᠨ ᠳᠦ᠄ 《ᠬᠠᠭᠠᠨ ᠤ ᠬᠥᠪᠡᠭᠦᠨ ᠡ᠊ᠨᠳᠡ ᠪᠠᠢᠨᠠ᠂ ᠳ᠋ᠠᠸᠢᠳ᠋ ᠤᠨ ᠦᠷᠡ ᠤᠳᠤᠮ ᠤᠨ ᠲᠤᠬᠠᠢ ᠶᠣᠬᠣᠸᠠ ᠶᠢᠨ ᠠᠮᠠᠯᠠᠭᠰᠠᠨ ᠬᠠᠭᠠᠨ ᠪᠣᠯᠬᠤ ᠶᠣᠰᠣᠲᠠᠢ ᠨᠢᠭᠡᠨ ᠨᠢ ᠡᠨᠡ ᠮᠥᠨ᠃ 4 ᠲᠠ ᠨᠠᠷ ᠢᠩᠭᠢᠵᠦ ᠬᠢ᠄ ᠠᠮᠠᠷᠠᠯ ᠤᠨ ᠡᠳᠦᠷ ᠡᠭᠡᠯᠵᠢ ᠲᠠᠢ ᠲᠠᠬᠢᠯᠴᠢᠳ ᠪᠣᠯᠣᠨ ᠯᠧᠸᠢᠴᠦᠳ ᠲᠠ ᠪᠦᠭᠦᠳᠡ ᠶᠢᠨ ᠭᠤᠷᠪᠠᠨ ᠤ ᠨᠢᠭᠡ ᠨᠢ ᠬᠠᠭᠠᠯᠭᠠ ᠨᠤᠭᠤᠳ ᠢ ᠬᠠᠷᠠᠭᠤᠯᠳᠠᠵᠤ᠂ 5 ᠭᠤᠷᠪᠠᠨ ᠤ ᠨᠢᠭᠡ ᠨᠢ ᠬᠠᠭᠠᠨ ᠤ ᠣᠷᠳᠣᠨ ᠢ᠂ ᠭᠤᠷᠪᠠᠨ ᠤ ᠨᠢᠭᠡ ᠨᠢ 〈ᠰᠠᠭᠤᠷᠢ ᠶᠢᠨ ᠬᠠᠭᠠᠯᠭᠠ〉 ᠶᠢ ᠬᠠᠷᠠᠭᠤᠯᠳᠠᠭᠠᠷᠠᠢ᠃ ᠪᠤᠰᠤᠳ ᠬᠥᠮᠦᠰ ᠨᠢ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠬᠦᠷᠢᠶᠡᠨ ᠳᠦ ᠪᠠᠢᠭᠠᠷᠠᠢ᠃ 6 ᠡᠭᠡᠯᠵᠢ ᠲᠠᠢ ᠲᠠᠬᠢᠯᠴᠢᠳ ᠪᠣᠯᠣᠨ ᠯᠧᠸᠢᠴᠦᠳ ᠡᠴᠡ ᠥᠭᠡᠷᠡ ᠬᠡᠨ ᠴᠤ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠦ ᠣᠷᠣᠵᠤ ᠪᠣᠯᠬᠤ ᠦᠭᠡᠢ᠃ ᠲᠡᠳᠡ ᠠᠷᠢᠭᠤᠨ ᠪᠣᠯᠬᠣᠷ ᠣᠷᠣᠵᠤ ᠪᠣᠯᠣᠨᠠ᠂ ᠭᠡᠪᠡᠴᠦ ᠪᠤᠰᠤᠳ ᠨᠢ ᠶᠣᠬᠣᠸᠠ ᠶᠢᠨ ᠰᠠᠬᠢᠭᠤᠯᠤᠭᠰᠠᠨ ᠢ ᠰᠠᠬᠢᠬᠤ ᠶᠣᠰᠣᠲᠠᠢ᠃ 7 ᠯᠧᠸᠢᠴᠦᠳ ᠭᠠᠷ ᠲᠠᠭᠠᠨ ᠵᠡᠷ ᠵᠡᠪᠰᠡᠭ ᠢᠶᠡᠨ ᠪᠠᠷᠢᠨ ᠬᠠᠭᠠᠨ ᠢ ᠬᠦᠷᠢᠶᠡᠯᠡᠨ ᠵᠣᠭᠰᠣᠵᠤ᠂ ᠬᠡᠨ ᠥᠷᠭᠥᠭᠡᠨ ᠳᠦ ᠣᠷᠣᠬᠤ ᠭᠡᠪᠡᠯ᠂ ᠲᠡᠭᠦᠨ ᠢ ᠠᠯᠠ᠃ ᠬᠠᠭᠠᠨ ᠭᠠᠷᠴᠤ ᠣᠷᠣᠬᠤ ᠪᠦᠷᠢ ᠳᠤ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠵᠠᠭᠠ》 ᠭᠡᠪᠡ᠃
8 ᠯᠧᠸᠢᠴᠦᠳ ᠪᠣᠯᠣᠨ ᠪᠦᠬᠦ ᠶᠦᠳᠠ ᠬᠥᠮᠦᠨ ᠲᠠᠬᠢᠯᠴᠢ ᠶᠧᠬᠣᠶᠠᠳᠠ ᠶᠢᠨ ᠲᠤᠰᠢᠶᠠᠭᠰᠠᠨ ᠪᠦᠬᠦᠨ ᠦ ᠶᠣᠰᠣᠭᠠᠷ ᠭᠦᠢᠴᠡᠳᠬᠡᠪᠡ᠃ ᠲᠠᠬᠢᠯᠴᠢ ᠶᠧᠬᠣᠶᠠᠳᠠ ᠠᠯᠢ ᠴᠤ ᠪᠦᠯᠦᠭ ᠢ ᠲᠠᠷᠬᠠᠭᠠᠭᠠ ᠦᠭᠡᠢ ᠤᠴᠢᠷ ᠠᠴᠠ ᠲᠡᠳᠡᠨ ᠦ ᠬᠥᠮᠦᠨ ᠪᠦᠷᠢ ᠠᠮᠠᠷᠠᠯ ᠤᠨ ᠡᠳᠦᠷ ᠣᠷᠣᠵᠤ ᠭᠠᠷᠳᠠᠭ ᠪᠦᠬᠦ ᠬᠠᠷᠢᠶᠠ ᠬᠥᠮᠦᠰ ᠢᠶᠡᠨ ᠳᠠᠭᠠᠭᠤᠯᠤᠨ ᠢᠷᠡᠪᠡ᠃ 9 ᠲᠠᠬᠢᠯᠴᠢ ᠶᠧᠬᠣᠶᠠᠳᠠ ᠵᠠᠭᠤᠲᠤ ᠶᠢᠨ ᠳᠠᠷᠤᠭᠠ ᠨᠠᠷ ᠲᠤ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠳᠦ ᠪᠠᠢᠭᠰᠠᠨ ᠳ᠋ᠠᠸᠢᠳ᠋ ᠬᠠᠭᠠᠨ ᠤ ᠵᠢᠳᠠ᠂ ᠲᠣᠮᠣ ᠵᠢᠵᠢᠭ ᠪᠠᠮᠪᠠᠢ ᠨᠤᠭᠤᠳ ᠢ ᠥᠭᠪᠡ᠃ 10 ᠲᠡᠷᠡ ᠪᠡᠷ ᠲᠣᠷᠭᠠᠨ ᠴᠡᠷᠢᠭ ᠤᠨ ᠬᠥᠮᠦᠨ ᠪᠦᠷᠢ ᠳᠤ ᠥᠪᠡᠷ ᠦᠨ ᠬᠢᠨᠢ ᠵᠡᠪᠰᠡᠭ ᠢ ᠪᠠᠷᠢᠭᠤᠯᠵᠤ᠂ ᠬᠠᠭᠠᠨ ᠢ ᠬᠦᠷᠢᠶᠡᠯᠡᠭᠦᠯᠦᠨ ᠲᠠᠬᠢᠯ ᠤᠨ ᠰᠢᠷᠡᠭᠡ ᠪᠣᠯᠣᠨ ᠥᠷᠭᠥᠭᠡᠨ ᠦ ᠣᠢᠷᠠᠯᠴᠠᠭᠠ᠂ ᠥᠷᠭᠥᠭᠡᠨ ᠦ ᠪᠠᠷᠠᠭᠤᠨ ᠲᠠᠯᠠ ᠠᠴᠠ ᠵᠡᠭᠦᠨ ᠲᠠᠯᠠ ᠬᠦᠷᠲᠡᠯᠡ ᠵᠣᠭᠰᠣᠭᠠᠵᠠᠢ᠃ 11 ᠶᠧᠬᠣᠶᠠᠳᠠ ᠬᠥᠪᠡᠭᠦᠳ ᠲᠡᠢ ᠪᠡᠨ ᠬᠠᠮᠲᠤ ᠬᠠᠭᠠᠨ ᠤ ᠬᠦᠦ ᠶᠢ ᠭᠠᠷᠭᠠᠨ ᠠᠪᠴᠢᠷᠠᠪᠠ᠃ ᠲᠡᠳᠡ ᠲᠡᠭᠦᠨ ᠳᠦ ᠲᠢᠲᠢᠮ ᠡᠮᠦᠰᠬᠡᠨ᠂ ᠭᠡᠷᠡ ᠶᠢᠨ ᠪᠢᠴᠢᠭ ᠢ ᠥᠭᠴᠦ᠂ ᠲᠡᠭᠦᠨ ᠢ ᠬᠠᠭᠠᠨ ᠪᠣᠯᠭᠠᠨ ᠲᠣᠰᠣᠯᠠᠵᠤ᠄ 《ᠬᠠᠭᠠᠨ ᠮᠠᠨᠳᠤᠲᠤᠭᠠᠢ︕》 ᠭᠡᠵᠡᠭᠡᠯᠡ᠃
12 ᠠᠲ᠋ᠠᠯᠢᠶᠠ ᠠᠷᠠᠳ ᠲᠦᠮᠡᠨ ᠦ ᠭᠦᠶᠦᠯᠳᠦᠬᠦ ᠴᠢᠮᠡᠭᠡ ᠪᠣᠯᠣᠨ ᠬᠠᠭᠠᠨ ᠢ ᠮᠠᠭᠲᠠᠬᠤ ᠶᠢ ᠰᠣᠨᠣᠰᠣᠭᠠᠳ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠦ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠤᠷᠤᠭᠤ ᠣᠴᠢᠵᠤ 13 ᠬᠠᠷᠠᠬᠤ ᠳᠤ᠂ ᠬᠠᠭᠠᠨ ᠡᠭᠦᠳᠡᠨ ᠦ ᠪᠠᠭᠠᠨᠠ ᠶᠢᠨ ᠬᠠᠵᠠᠭᠤ ᠳᠤ ᠵᠣᠭᠰᠣᠵᠤ᠂ ᠨᠣᠶᠠᠳ ᠪᠣᠯᠣᠨ ᠪᠦᠷᠢᠶᠡᠴᠢᠳ ᠬᠠᠭᠠᠨ ᠤ ᠳᠡᠷᠭᠡᠳᠡ ᠵᠣᠭᠰᠣᠵᠤ ᠪᠠᠢᠯᠠ᠃ ᠭᠠᠵᠠᠷ ᠤᠨ ᠪᠦᠬᠦ ᠠᠷᠠᠳ ᠲᠦᠮᠡᠨ ᠪᠠᠶᠠᠷᠯᠠᠯᠳᠤᠨ ᠪᠦᠷᠢᠶᠡ ᠪᠡᠨ ᠬᠦᠩᠭᠢᠨᠡᠭᠦᠯᠵᠦ᠂ ᠳᠠᠭᠤᠴᠢᠳ ᠬᠥᠭᠵᠢᠮᠳᠡᠨ ᠮᠠᠭᠲᠠᠭᠠᠯ ᠢ ᠤᠳᠤᠷᠢᠳᠴᠤ ᠪᠠᠢᠯᠠ᠃ ᠠᠲ᠋ᠠᠯᠢᠶᠠ ᠬᠤᠪᠴᠠᠰᠤ ᠪᠠᠨ ᠤᠷᠠᠭᠠᠳ᠄ 《ᠤᠷᠪᠠᠯᠲᠠ︕ ᠤᠷᠪᠠᠯᠲᠠ︕》 ᠭᠡᠵᠦ ᠬᠠᠰᠬᠢᠷᠪᠠ᠃ 14 ᠲᠠᠬᠢᠯᠴᠢ ᠶᠧᠬᠣᠶᠠᠳᠠ ᠴᠡᠷᠢᠭ ᠢ ᠤᠳᠤᠷᠢᠳᠳᠠᠭ ᠵᠠᠭᠤᠲᠤ ᠶᠢᠨ ᠳᠠᠷᠤᠭᠠ ᠨᠠᠷ ᠢ ᠶᠠᠪᠤᠭᠤᠯᠵᠤ᠄ 《ᠲᠡᠷᠡ ᠡᠮᠡ ᠶᠢ ᠬᠦᠷᠢᠶᠡᠨ ᠳᠤᠮᠳᠠ ᠠᠴᠠ ᠭᠠᠷᠭᠠ᠃ ᠲᠡᠭᠦᠨ ᠢ ᠳᠠᠭᠠᠬᠤ ᠬᠥᠮᠦᠨ ᠢ ᠢᠯᠳᠦ ᠪᠡᠷ ᠠᠯᠠᠭᠲᠤᠨ》 ᠭᠡᠪᠡ᠃ ᠲᠡᠷᠡ ᠲᠠᠬᠢᠯᠴᠢ᠄ 《ᠲᠡᠭᠦᠨ ᠢ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠦ ᠪᠦᠦ ᠠᠯᠠ》 ᠭᠡᠵᠦ ᠬᠡᠯᠡᠭᠰᠡᠨ ᠳᠦ᠂ 15 ᠲᠡᠳᠡ ᠲᠡᠭᠦᠨ ᠢ ᠬᠠᠭᠠᠨ ᠤ ᠣᠷᠳᠣᠨ ᠤ ᠮᠣᠷᠢᠨ ᠬᠠᠭᠠᠯᠭᠠ ᠤᠷᠤᠭᠤ ᠣᠷᠣᠬᠤ ᠡᠭᠦᠳᠡᠨ ᠳᠦ ᠬᠦᠷᠬᠦ ᠳᠦᠨᠢ ᠪᠠᠷᠢᠪᠴᠢᠯᠠᠵᠤ ᠲᠡᠨᠳᠡ ᠠᠯᠠᠪᠠ᠃
16 ᠶᠧᠬᠣᠶᠠᠳᠠ ᠥᠪᠡᠷ ᠢᠶᠡᠨ ᠠᠷᠠᠳ ᠲᠦᠮᠡᠨ ᠪᠣᠯᠣᠨ ᠬᠠᠭᠠᠨ ᠲᠠᠢ ᠶᠣᠬᠣᠸᠠ ᠶᠢᠨ ᠠᠷᠠᠳ ᠲᠦᠮᠡᠨ ᠪᠣᠯᠣᠨᠠ ᠭᠡᠰᠡᠨ ᠭᠡᠷᠡ ᠶᠢ ᠲᠣᠭᠲᠠᠭᠠᠵᠠᠢ᠃ 17 ᠠᠷᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠪᠠᠯ ᠤᠨ ᠳᠤᠭᠠᠩ ᠳᠤ ᠣᠴᠢᠭᠠᠳ ᠳᠤᠭᠠᠩ ᠢ ᠨᠤᠷᠠᠭᠠᠵᠤ᠂ ᠲᠠᠬᠢᠯ ᠤᠨ ᠰᠢᠷᠡᠭᠡ ᠨᠦᠭᠦᠳ ᠪᠠ ᠬᠥᠷᠥᠭ ᠤᠳ ᠢ ᠨᠢ ᠪᠤᠲᠠᠯᠵᠤ᠂ ᠪᠠᠯ ᠤᠨ ᠲᠠᠬᠢᠯᠴᠢ ᠮᠠᠲ᠋ᠠᠨ ᠢ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠬᠢᠨᠢ ᠡᠮᠦᠨᠡ ᠠᠯᠠᠪᠠ᠃ 18 ᠶᠧᠬᠣᠶᠠᠳᠠ ᠪᠠᠰᠠ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠶᠢ ᠯᠧᠸᠢ ᠶᠢᠨ ᠲᠠᠬᠢᠯᠴᠢᠳ ᠢᠶᠠᠷ ᠬᠠᠷᠢᠭᠤᠴᠠᠭᠤᠯᠪᠠ᠃ ᠤᠷᠢᠳᠤ ᠨᠢ ᠳ᠋ᠠᠸᠢᠳ᠋ ᠲᠡᠳᠡᠨ ᠢ ᠪᠦᠯᠦᠭ ᠬᠤᠪᠢᠶᠠᠵᠤ ᠥᠷᠭᠥᠭᠡᠨ ᠳᠦ ᠠᠵᠢᠯᠯᠠᠭᠤᠯᠳᠠᠭ ᠪᠠᠢᠭᠰᠠᠨ᠃ ᠲᠡᠳᠡ ᠮᠣᠰᠧ ᠶᠢᠨ ᠬᠠᠤᠯᠢ ᠳᠤ ᠪᠢᠴᠢᠭᠳᠡᠭᠰᠡᠨ ᠶᠣᠰᠣᠭᠠᠷ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠡᠷᠭᠦᠵᠦ᠂ ᠳ᠋ᠠᠸᠢᠳ᠋ ᠤᠨ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠪᠠᠶᠠᠷᠯᠠᠨ ᠳᠠᠭᠤᠯᠠᠳᠠᠭ ᠪᠠᠢᠯᠠ᠃ 19 ᠶᠧᠬᠣᠶᠠᠳᠠ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠬᠠᠭᠠᠯᠭᠠᠨ ᠳᠤ ᠬᠠᠭᠠᠯᠭᠠᠴᠢᠳ ᠢ ᠲᠣᠮᠢᠯᠠᠵᠤ᠂ ᠶᠠᠮᠠᠷ ᠰᠢᠯᠲᠠᠭᠠᠨ᠂ ᠶᠠᠮᠠᠷ ᠤᠴᠢᠷ ᠢᠶᠠᠷ ᠴᠤ ᠪᠤᠵᠠᠷᠲᠤᠭᠰᠠᠨ ᠬᠥᠮᠦᠨ ᠢ ᠳᠣᠲᠣᠭᠰᠢ ᠣᠷᠣᠭᠤᠯᠳᠠᠭ ᠦᠭᠡᠢ ᠪᠠᠢᠯᠠ᠃ 20 ᠲᠡᠷᠡ ᠪᠡᠷ ᠵᠠᠭᠤᠲᠤ ᠶᠢᠨ ᠳᠠᠷᠤᠭᠠ ᠨᠠᠷ᠂ ᠨᠣᠶᠠᠳ᠂ ᠠᠷᠠᠳ ᠲᠦᠮᠡᠨ ᠦ ᠵᠠᠬᠢᠷᠤᠭᠴᠢᠳ ᠪᠣᠯᠣᠨ ᠭᠠᠵᠠᠷ ᠤᠨ ᠪᠦᠬᠦ ᠠᠷᠠᠳ ᠲᠦᠮᠡᠨ ᠢ ᠳᠠᠭᠠᠭᠤᠯᠤᠨ ᠬᠠᠭᠠᠨ ᠢ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠡᠴᠡ ᠳᠣᠷᠣᠭᠰᠢ ᠪᠠᠭᠤᠯᠭᠠᠭᠠᠳ᠂ 《ᠳᠡᠭᠡᠳᠦ ᠬᠠᠭᠠᠯᠭᠠ》 ᠪᠠᠷ ᠥᠩᠭᠡᠷᠡᠨ ᠬᠠᠭᠠᠨ ᠤ ᠣᠷᠳᠣᠨ ᠳᠤ ᠬᠦᠷᠴᠦ᠂ ᠬᠠᠭᠠᠨ ᠤ ᠰᠡᠨᠲᠢ ᠳᠦᠨᠢ ᠵᠠᠯᠠᠵᠠᠢ᠃ 21 ᠭᠠᠵᠠᠷ ᠤᠨ ᠠᠷᠠᠳ ᠲᠦᠮᠡᠨ ᠪᠦᠭᠦᠳᠡᠭᠡᠷ ᠪᠠᠶᠠᠷᠯᠠᠯᠳᠤᠵᠤ᠂ ᠬᠣᠲᠠ ᠠᠮᠤᠷ ᠲᠠᠢᠪᠤᠩ ᠪᠣᠯᠪᠠ᠃ ᠲᠡᠢᠨ ᠬᠦ ᠲᠡᠳᠡ ᠠᠲ᠋ᠠᠯᠢᠶᠠ ᠶᠢ ᠢᠯᠳᠦ ᠪᠡᠷ ᠠᠯᠠᠭᠰᠠᠨ ᠪᠢᠯᠡ᠃