ᠱᠠᠰᠲᠢᠷ ᠤᠨ ᠳᠡᠳ᠋ ᠠᠷᠪᠠᠨ ᠵᠢᠷᠭᠤᠭᠠ
ᠠᠰᠠ ᠶᠢᠨ ᠰᠡᠭᠦᠯᠴᠢ ᠶᠢᠨ ᠡᠳᠦᠷ ᠤᠳ
1 ᠠᠰᠠ ᠬᠠᠭᠠᠨ ᠤ ᠭᠤᠴᠢᠨ ᠵᠢᠷᠭᠤᠳᠤᠭᠠᠷ ᠣᠨ ᠳᠤ᠂ ᠢᠰᠷᠧᠯ ᠤᠨ ᠬᠠᠭᠠᠨ ᠪᠠᠱᠠ ᠶᠦᠳᠠ ᠳᠤ ᠬᠠᠯᠳᠠᠵᠤ᠂ ᠶᠦᠳᠠ ᠶᠢᠨ ᠬᠠᠭᠠᠨ ᠠᠰᠠ ᠤᠷᠤᠭᠤ ᠣᠷᠣᠵᠤ ᠭᠠᠷᠬᠤ ᠵᠠᠮ ᠢ ᠬᠠᠭᠠᠬᠤ ᠶᠢᠨ ᠲᠤᠯᠠᠳᠠ ᠷᠠᠮᠠ ᠳᠤ ᠪᠡᠬᠢᠯᠡᠯᠲᠡ ᠪᠣᠰᠬᠠᠵᠠᠢ᠃ 2 ᠠᠰᠠ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠪᠣᠯᠣᠨ ᠥᠪᠡᠷ ᠦᠨ ᠢᠶᠠᠨ ᠣᠷᠳᠣᠨ ᠤ ᠬᠥᠮᠥᠷᠭᠡ ᠡᠴᠡ ᠠᠯᠲᠠ ᠮᠥᠩᠭᠥ ᠠᠪᠴᠤ᠂ ᠲᠡᠭᠦᠨ ᠢ ᠳ᠋ᠠᠮᠠᠰᠺᠦ᠋ᠰ ᠲᠤ ᠰᠠᠭᠤᠵᠤ ᠪᠠᠢᠭᠠ ᠠᠷᠠᠮ ᠤᠨ ᠬᠠᠭᠠᠨ ᠪᠧᠨ ᠬᠠᠳᠠᠳ᠋ ᠲᠤ ᠢᠯᠡᠭᠡᠨ᠄ 3 《ᠮᠢᠨᠦ ᠡᠴᠢᠭᠡ ᠪᠣᠯᠣᠨ ᠲᠠᠨ ᠤ ᠡᠴᠢᠭᠡ ᠬᠣᠭᠣᠷᠣᠨᠳᠣ ᠪᠠᠨ ᠭᠡᠷᠡ ᠪᠠᠢᠭᠤᠯᠤᠭᠰᠠᠨ ᠰᠢᠭ᠋ ᠲᠠ ᠪᠢᠳᠡ ᠬᠣᠶᠠᠷ ᠴᠤ ᠪᠠᠢᠭᠤᠯᠤᠶᠠ᠃ ᠬᠠᠷᠠ᠂ ᠪᠢ ᠲᠠᠨ ᠳᠤ ᠠᠯᠲᠠ ᠮᠥᠩᠭᠥ ᠢᠯᠡᠭᠡᠶᠡ᠃ ᠲᠠ ᠢᠰᠷᠧᠯ ᠤᠨ ᠬᠠᠭᠠᠨ ᠪᠠᠱᠠ ᠲᠠᠢ ᠲᠣᠭᠲᠠᠭᠠᠭᠰᠠᠨ ᠭᠡᠷᠡ ᠪᠡᠨ ᠴᠤᠴᠠᠯᠤᠭᠠᠴᠢ᠂ ᠲᠡᠭᠡᠪᠡᠯ ᠲᠡᠷᠡ ᠨᠠᠳᠠ ᠠᠴᠠ ᠬᠣᠯᠠᠳᠠᠨᠠ》 ᠭᠡᠵᠡᠢ᠃ 4 ᠪᠧᠨ ᠬᠠᠳᠠᠳ᠋ ᠠᠰᠠ ᠬᠠᠭᠠᠨ ᠤ ᠬᠢ ᠶᠢ ᠰᠣᠨᠣᠰᠴᠤ᠂ ᠢᠰᠷᠧᠯ ᠤᠨ ᠬᠣᠲᠠ ᠨᠤᠭᠤᠳ ᠢ ᠳᠣᠪᠲᠣᠯᠬᠤ ᠪᠠᠷ ᠴᠡᠷᠢᠭ ᠤᠨ ᠵᠠᠩᠵᠤᠨ ᠨᠠᠷ ᠢᠶᠠᠨ ᠢᠯᠡᠭᠡᠨ ᠢᠶᠣᠨ᠂ ᠳ᠋ᠠᠨ᠂ ᠠᠪᠧᠯ ᠮᠠᠢᠮ ᠪᠣᠯᠣᠨ ᠨᠠᠹᠲ᠋ᠠᠯᠢ ᠳᠠᠬᠢ ᠨᠥᠭᠡᠴᠡᠯᠡᠬᠦ ᠲᠥᠪ ᠪᠣᠯᠬᠤ ᠪᠦᠬᠦ ᠬᠣᠲᠠ ᠶᠢ ᠳᠣᠪᠲᠣᠯᠵᠠᠢ᠃ 5 ᠪᠠᠱᠠ ᠡᠭᠦᠨ ᠢ ᠳᠤᠭᠤᠯᠤᠭᠠᠳ ᠷᠠᠮᠠ ᠶᠢ ᠪᠡᠬᠢᠯᠡᠨ ᠪᠠᠷᠢᠬᠤ ᠪᠠᠨ ᠪᠣᠯᠢᠵᠤ᠂ ᠠᠵᠢᠯ ᠢᠶᠠᠨ ᠵᠣᠭᠰᠣᠭᠠᠪᠠ᠃ 6 ᠠᠰᠠ ᠬᠠᠭᠠᠨ ᠶᠦᠳᠠ ᠡᠷᠡᠴᠦᠳ ᠢ ᠪᠦᠭᠦᠳᠡ ᠶᠢ ᠳᠠᠢᠴᠢᠯᠠᠨ ᠪᠠᠱᠠ ᠶᠢᠨ ᠷᠠᠮᠠ ᠶᠢ ᠪᠠᠷᠢᠬᠤ ᠳᠤ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠮᠣᠳᠣ ᠴᠢᠯᠠᠭᠤ ᠶᠢ ᠠᠪᠴᠢᠷᠠᠭᠤᠯᠵᠤ᠂ ᠲᠡᠳᠡᠭᠡᠷ ᠢᠶᠡᠷ ᠭᠧᠪᠠ ᠪᠣᠯᠣᠨ ᠮᠢᠽᠫᠠ ᠶᠢ ᠪᠣᠰᠬᠠᠪᠠ᠃
7 ᠲᠡᠷᠡ ᠦᠶᠡ ᠳᠦ ᠪᠣᠱᠣᠭᠴᠢ ᠬᠠᠨᠠᠨᠢ ᠶᠦᠳᠠ ᠶᠢᠨ ᠬᠠᠭᠠᠨ ᠠᠰᠠ ᠤᠷᠤᠭᠤ ᠢᠷᠡᠵᠦ᠂ ᠲᠡᠭᠦᠨ ᠳᠦ᠄ 《ᠲᠠ ᠶᠣᠬᠣᠸᠠ ᠪᠤᠷᠬᠠᠨ ᠳᠠᠭᠠᠨ ᠦᠯᠦ ᠨᠠᠢᠳᠠᠨ ᠠᠷᠠᠮ ᠤᠨ ᠬᠠᠭᠠᠨ ᠳᠤ ᠨᠠᠢᠳᠠᠵᠠᠢ᠃ ᠡᠭᠦᠨ ᠦ ᠤᠯᠠᠮ ᠢᠶᠠᠷ ᠠᠷᠠᠮ ᠤᠨ ᠬᠠᠭᠠᠨ ᠤ ᠴᠡᠷᠢᠭ ᠲᠠᠨ ᠤ ᠭᠠᠷ ᠠᠴᠠ ᠮᠤᠯᠲᠤᠷᠠᠯᠠ᠃ 8 ᠺᠦᠱᠴᠦᠳ᠂ ᠯᠢᠪᠴᠦᠳ ᠠᠰᠤᠷᠤ ᠣᠯᠠᠨ ᠲᠡᠷᠭᠡ ᠮᠣᠷᠢ ᠲᠠᠢ ᠶᠡᠬᠡ ᠴᠡᠷᠢᠭ ᠪᠠᠢᠭᠰᠠᠨ ᠪᠢᠰᠢ ᠤᠤ︖ ᠬᠠᠷᠢᠨ ᠲᠠ ᠶᠣᠬᠣᠸᠠ ᠳᠤ ᠨᠠᠢᠳᠠᠬᠤ ᠳᠤ᠂ ᠲᠡᠷᠡ ᠲᠡᠳᠡᠨ ᠢ ᠲᠠᠨ ᠤ ᠭᠠᠷ ᠲᠤ ᠲᠤᠰᠢᠶᠠᠭᠰᠠᠨ ᠪᠢᠯᠡ᠃ 9 ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠥᠪᠡᠷ ᠤᠷᠤᠭᠤ ᠨᠢ ᠵᠢᠷᠦᠬᠡ ᠰᠡᠳᠬᠢᠯ ᠢᠶᠠᠨ ᠪᠦᠷᠢᠨ ᠬᠠᠨᠳᠤᠭᠤᠯᠤᠭᠰᠠᠨ ᠬᠥᠮᠦᠨ ᠢ ᠬᠦᠴᠦᠷᠬᠡᠭᠵᠢᠭᠦᠯᠬᠦ ᠪᠡᠷ ᠳᠡᠯᠡᠬᠡᠢ ᠳᠠᠶᠠᠭᠠᠷ ᠬᠣᠢᠰᠢ ᠤᠷᠤᠭᠰᠢ ᠪᠠᠨ ᠬᠡᠷᠦᠨ ᠶᠠᠪᠤᠭᠰᠠᠭᠠᠷ ᠪᠠᠢᠳᠠᠭ᠃ ᠬᠠᠷᠢᠨ ᠲᠠ ᠡᠨᠡ ᠤᠳᠠᠭᠠ ᠮᠤᠩ᠋ᠬᠠᠭ ᠦᠢᠯᠡ ᠬᠢᠯᠡ᠃ ᠣᠳᠣ ᠠᠴᠠ ᠡᠬᠢᠯᠡᠨ ᠲᠠ ᠳᠠᠢᠨ ᠳᠠᠵᠢᠨ ᠲᠠᠢ ᠪᠠᠢᠬᠤ ᠪᠣᠯᠣᠨᠠ》 ᠭᠡᠵᠡᠢ᠃ 10 ᠠᠰᠠ ᠡᠨᠡ ᠶᠠᠪᠤᠳᠠᠯ ᠢᠶᠠᠷ ᠪᠣᠱᠣᠭᠴᠢ ᠳᠤ ᠬᠢᠯᠢᠩᠨᠡᠵᠦ᠂ ᠠᠭᠤᠷᠯᠠᠭᠰᠠᠨ ᠳᠠᠭᠠᠨ ᠲᠡᠭᠦᠨ ᠢ ᠭᠢᠨᠳᠠᠨ ᠳᠤ ᠬᠣᠷᠢᠪᠠ᠃ ᠮᠥᠨ ᠲᠡᠷᠡ ᠦᠶᠡ ᠳᠦ ᠠᠰᠠ ᠠᠷᠠᠳ ᠣᠯᠠᠨ ᠤ ᠵᠠᠷᠢᠮ ᠢ ᠨᠢ ᠬᠠᠷᠭᠢᠰᠯᠠᠨ ᠳᠠᠷᠤᠯᠠᠭᠰᠠᠨ ᠪᠠᠢᠯᠠ᠃
11 ᠠᠰᠠ ᠶᠢᠨ ᠦᠢᠯᠡ ᠶᠠᠪᠤᠳᠠᠯ ᠡᠬᠢᠨ ᠡᠴᠡ ᠪᠡᠨ ᠳᠠᠭᠤᠰᠲᠠᠯᠠ ᠢᠰᠷᠧᠯ ᠪᠣᠯᠣᠨ ᠶᠦᠳᠠ ᠶᠢᠨ ᠬᠠᠭᠠᠳ ᠤᠨ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠪᠠᠢᠳᠠᠭ᠃ 12 ᠬᠠᠭᠠᠨ ᠪᠣᠯᠣᠭᠰᠠᠨ ᠤ ᠬᠢᠨᠢ ᠭᠤᠴᠢ ᠶᠢᠰᠦᠳᠦᠭᠡᠷ ᠵᠢᠯ ᠳᠤ᠂ ᠠᠰᠠ ᠶᠢᠨ ᠬᠥᠯ ᠳᠤ ᠡᠪᠡᠳᠴᠢᠨ ᠲᠤᠰᠴᠤ᠂ ᠲᠡᠷᠡ ᠡᠪᠡᠳᠴᠢᠨ ᠨᠢ ᠳᠡᠭᠡᠭᠰᠢ ᠲᠠᠷᠬᠠᠵᠠᠢ᠃ ᠭᠡᠪᠡᠴᠦ ᠲᠡᠷᠡ ᠪᠡᠷ ᠡᠪᠡᠳᠴᠢᠲᠡᠢ ᠪᠠᠢᠬᠤ ᠳᠠᠭᠠᠨ ᠴᠤ ᠶᠣᠬᠣᠸᠠ ᠶᠢ ᠬᠠᠢᠯ ᠦᠭᠡᠢ᠂ ᠡᠮᠴᠢ ᠨᠠᠷ ᠢ ᠬᠠᠢᠪᠠ᠃ 13 ᠠᠰᠠ ᠬᠠᠭᠠᠨ ᠪᠣᠯᠣᠭᠰᠠᠨ ᠳᠥᠴᠢᠨ ᠨᠢᠭᠡᠳᠦᠭᠡᠷ ᠵᠢᠯ ᠳᠡᠭᠡᠨ ᠥᠭᠡᠳᠡ ᠪᠣᠯᠵᠤ᠂ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠬᠠᠮᠲᠤ ᠨᠣᠢᠷᠰᠣᠪᠠ᠃ 14 ᠬᠥᠮᠦᠰ ᠲᠡᠭᠦᠨ ᠢ ᠳ᠋ᠠᠸᠢᠳ᠋ ᠤᠨ ᠬᠣᠲᠠ ᠳᠤ ᠥᠪᠡᠷ ᠦᠨ ᠬᠢᠨᠢ ᠪᠡᠯᠡᠳᠬᠡᠭᠰᠡᠨ ᠪᠤᠯᠠᠰᠢᠨ ᠳᠤ ᠣᠷᠣᠰᠢᠭᠤᠯᠵᠤ᠂ ᠲᠡᠭᠦᠨ ᠢ ᠦᠨᠦᠷᠲᠡᠨ ᠬᠢᠭ᠍ᠴᠢᠳ ᠤᠨ ᠨᠠᠢᠷᠠᠭᠤᠯᠤᠭᠰᠠᠨ ᠲᠥᠷᠥᠯ ᠪᠦᠷᠢ ᠶᠢᠨ ᠦᠨᠦᠷᠲᠡᠨ ᠢᠶᠡᠷ ᠳᠦᠭᠦᠷᠭᠡᠭᠰᠡᠨ ᠣᠷᠣ ᠳᠡᠭᠡᠷᠡ ᠬᠡᠪᠲᠡᠭᠦᠯᠦᠭᠡᠳ᠂ ᠲᠡᠭᠦᠨ ᠳᠦ ᠵᠣᠷᠢᠭᠤᠯᠤᠨ ᠠᠰᠤᠷᠤ ᠲᠣᠮᠣ ᠭᠠᠯ ᠠᠰᠠᠭᠠᠵᠠᠢ᠃