ᠱᠠᠰᠲᠢᠷ ᠤᠨ ᠳᠡᠳ᠋ ᠬᠣᠷᠢᠨ ᠲᠠᠪᠤ
1 ᠠᠮᠠᠽᠢᠶᠠ ᠬᠣᠷᠢᠨ ᠲᠠᠪᠤᠨ ᠨᠠᠰᠤᠲᠠᠢ ᠳᠠᠭᠠᠨ ᠬᠠᠭᠠᠨ ᠪᠣᠯᠣᠭᠠᠳ ᠶᠧᠷᠦ᠋ᠰᠠᠯᠧᠮ ᠳᠤ ᠬᠣᠷᠢ ᠶᠢᠰᠦᠨ ᠵᠢᠯ ᠬᠠᠭᠠᠨᠴᠢᠯᠠᠵᠠᠢ᠃ ᠡᠬᠡ ᠨᠢ ᠶᠧᠷᠦ᠋ᠰᠠᠯᠧᠮ ᠬᠥᠮᠦᠨ ᠶᠧᠬᠣᠶᠠᠳᠢᠨ ᠪᠠᠢᠪᠠ᠃ 2 ᠠᠮᠠᠽᠢᠶᠠ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠶᠢᠨ ᠡᠮᠦᠨᠡ ᠵᠥᠪ ᠢ ᠦᠢᠯᠡᠳᠦᠭᠰᠡᠨ ᠪᠣᠯᠪᠠᠴᠤ ᠪᠦᠬᠦ ᠰᠡᠳᠬᠢᠯ ᠡᠴᠡ ᠪᠡᠨ ᠪᠢᠰᠢ ᠪᠠᠢᠯᠠ᠃ 3 ᠬᠠᠭᠠᠨᠴᠢᠯᠠᠯ ᠲᠡᠭᠦᠨ ᠦ ᠭᠠᠷ ᠲᠤ ᠪᠡᠬᠢᠵᠢᠬᠦ ᠳᠦ᠂ ᠠᠮᠠᠽᠢᠶᠠ ᠬᠠᠭᠠᠨ ᠡᠴᠢᠭᠡ ᠶᠢ ᠨᠢ ᠬᠣᠷᠣᠭᠠᠭᠰᠠᠨ ᠲᠦᠰᠢᠮᠡᠳ ᠢ ᠴᠠᠭᠠᠵᠠᠯᠠᠪᠠ᠃ 4 ᠬᠠᠷᠢᠨ ᠲᠡᠳᠡᠨ ᠦ ᠬᠥᠪᠡᠭᠦᠳ ᠢ ᠴᠠᠭᠠᠵᠠᠯᠠᠭᠰᠠᠨ ᠦᠭᠡᠢ᠃ ᠲᠡᠢᠨ ᠬᠦ ᠲᠡᠷᠡ ᠮᠣᠰᠧ ᠶᠢᠨ ᠬᠠᠤᠯᠢ ᠶᠢᠨ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ 《ᠡᠴᠢᠭᠡ ᠡᠬᠡ ᠶᠢ ᠨᠢ ᠬᠡᠦᠬᠡᠳ ᠦᠨ ᠬᠢᠨᠢ ᠤᠯᠠᠮ ᠢᠶᠠᠷ ᠪᠦᠦ ᠴᠠᠭᠠᠵᠠᠯᠠ᠂ ᠬᠡᠦᠬᠡᠳ ᠢ ᠨᠢ ᠡᠴᠢᠭᠡ ᠡᠬᠡ ᠶᠢᠨ ᠬᠢᠨᠢ ᠤᠯᠠᠮ ᠢᠶᠠᠷ ᠪᠦᠦ ᠴᠠᠭᠠᠵᠠᠯᠠ᠃ ᠬᠥᠮᠦᠨ ᠪᠦᠷᠢ ᠥᠪᠡᠷ ᠦᠨ ᠢᠶᠠᠨ ᠨᠢᠭᠦᠯ ᠦᠨ ᠤᠯᠠᠮ ᠢᠶᠠᠷ ᠯᠠ ᠴᠠᠭᠠᠵᠠᠯᠠᠭᠳᠠᠨᠠ》 ᠭᠡᠰᠡᠨ ᠶᠣᠬᠣᠸᠠ ᠶᠢᠨ ᠲᠤᠰᠢᠶᠠᠯ ᠢ ᠳᠠᠭᠠᠭᠰᠠᠨ ᠪᠠᠢᠨᠠ᠃
5 ᠠᠮᠠᠽᠢᠶᠠ ᠶᠦᠳᠠᠴᠤᠳ ᠢ ᠴᠤᠭᠯᠠᠭᠤᠯᠤᠨ᠂ ᠲᠡᠳᠡᠨ ᠢ ᠶᠦᠳᠠ᠂ ᠪᠢᠨᠶᠠᠮᠢᠨ ᠳᠠᠶᠠᠭᠠᠷ ᠤᠨ ᠪᠦᠯᠢ ᠨᠦᠭᠦᠳ ᠦᠨ ᠬᠢᠨᠢ ᠳᠠᠭᠠᠤ ᠬᠤᠪᠢᠶᠠᠷᠢᠯᠠᠨ ᠮᠢᠩ᠋ᠭᠠᠲᠤ᠂ ᠵᠠᠭᠤᠲᠤ ᠶᠢᠨ ᠳᠠᠷᠤᠭᠠ ᠨᠠᠷ ᠢ ᠲᠣᠮᠢᠯᠠᠪᠠ᠃ ᠲᠡᠷᠡ ᠬᠣᠷᠢ ᠪᠠ ᠲᠡᠭᠦᠨ ᠡᠴᠡ ᠳᠡᠭᠡᠭᠰᠢ ᠨᠠᠰᠤᠨ ᠤ ᠡᠷᠡᠴᠦᠳ ᠢ ᠲᠣᠭᠠᠯᠠᠭᠠᠳ ᠵᠢᠳᠠ᠂ ᠪᠠᠮᠪᠠᠢ ᠪᠠᠷᠢᠵᠤ ᠳᠠᠢᠨ ᠳᠤ ᠶᠠᠪᠤᠬᠤ ᠴᠢᠳᠠᠪᠤᠷᠢ ᠲᠠᠢ᠂ ᠭᠤᠴᠢᠨ ᠲᠦᠮᠡᠨ ᠡᠷᠡ ᠪᠠᠢᠬᠤ ᠶᠢ ᠮᠡᠳᠡᠵᠡᠢ᠃ 6 ᠲᠡᠷᠡ ᠪᠠᠰᠠ ᠢᠰᠷᠧᠯ ᠡᠴᠡ ᠵᠠᠭᠤᠨ ᠮᠥᠩᠭᠥᠨ ᠲᠠᠯᠠᠨᠲ 23 ᠢᠶᠠᠷ ᠠᠷᠪᠠᠨ ᠲᠦᠮᠡᠨ ᠳᠠᠢᠴᠢᠨ ᠬᠥᠯᠥᠰᠥᠯᠡᠨ ᠠᠪᠤᠪᠠ᠃ 7 ᠬᠠᠷᠢᠨ ᠪᠤᠷᠬᠠᠨ ᠤ ᠬᠥᠮᠦᠨ ᠲᠡᠭᠦᠨ ᠤᠷᠤᠭᠤ ᠢᠷᠡᠵᠦ᠄ 《ᠬᠠᠭᠠᠨᠲᠠᠨ ᠡ᠂ ᠢᠰᠷᠧᠯ ᠤᠨ ᠴᠡᠷᠢᠭ ᠲᠠᠨ ᠲᠠᠢ ᠬᠠᠮᠲᠤ ᠶᠠᠪᠤᠬᠤ ᠶᠣᠰᠣ ᠦᠭᠡᠢ᠃ ᠶᠣᠬᠣᠸᠠ ᠢᠰᠷᠧᠯ ᠪᠤᠶᠤ ᠡᠳᠡᠭᠡᠷ ᠡᠹᠷᠠᠢᠮᠴᠤᠳ ᠲᠠᠢ ᠬᠠᠮᠲᠤ ᠪᠠᠢᠬᠤ ᠦᠭᠡᠢ︕ 8 ᠬᠡᠷᠪᠡ ᠲᠠ ᠲᠡᠳᠡ ᠨᠠᠷ ᠲᠠᠢ ᠶᠠᠪᠤᠶᠠ ᠭᠡᠪᠡᠯ ᠶᠠᠪᠤ᠂ ᠬᠦᠴᠦ ᠭᠠᠷᠭᠠᠨ ᠪᠡᠯᠡᠳᠴᠦ ᠦᠵᠡ᠃ ᠬᠠᠷᠢᠨ ᠪᠤᠷᠬᠠᠨ ᠲᠠᠨ ᠢ ᠳᠠᠢᠰᠤᠨ ᠤ ᠴᠢᠨᠢ ᠡᠮᠦᠨᠡ ᠤᠨᠠᠭᠠᠬᠤ ᠪᠣᠯᠣᠨᠠ᠃ ᠲᠤᠰᠠᠯᠠᠬᠤ᠂ ᠡᠰᠡᠪᠡᠯ ᠤᠨᠠᠭᠠᠬᠤ ᠬᠦᠴᠦ ᠨᠢ ᠪᠤᠷᠬᠠᠨ ᠤ ᠬᠢ ᠰᠢᠦ》 ᠭᠡᠪᠡ᠃ 9 ᠠᠮᠠᠽᠢᠶᠠ ᠪᠤᠷᠬᠠᠨ ᠤ ᠬᠥᠮᠦᠨ ᠳᠦ᠄ 《ᠲᠡᠭᠡᠪᠡᠯ ᠢᠰᠷᠧᠯ ᠤᠨ ᠴᠡᠷᠢᠭ ᠤᠳ ᠲᠤ ᠥᠭᠭᠥᠭᠰᠡᠨ ᠵᠠᠭᠤᠨ ᠲᠠᠯᠠᠨᠲ ᠮᠥᠩᠭᠥ ᠶᠢ ᠶᠠᠭᠠᠬᠢᠬᠤ ᠪᠤᠢ︖》 ᠭᠡᠬᠦ ᠳᠦ᠂ ᠪᠤᠷᠬᠠᠨ ᠤ ᠬᠥᠮᠦᠨ᠄ 《ᠶᠣᠬᠣᠸᠠ ᠲᠡᠭᠦᠨ ᠡᠴᠡ ᠢᠯᠡᠭᠦᠦ ᠪᠡᠷ ᠲᠠᠨ ᠳᠤ ᠥᠭᠴᠦ ᠴᠢᠳᠠᠨᠠ》 ᠭᠡᠯᠡ᠃ 10 ᠠᠮᠠᠽᠢᠶᠠ ᠡᠹᠷᠠᠢᠮ ᠠᠴᠠ ᠥᠪᠡᠷ ᠤᠷᠤᠭᠤ ᠨᠢ ᠢᠷᠡᠭᠰᠡᠨ ᠴᠡᠷᠢᠭ ᠤᠳ ᠢ ᠲᠠᠷᠬᠠᠭᠠᠵᠤ ᠨᠤᠲᠤᠭ ᠤᠷᠤᠭᠤ ᠨᠢ ᠪᠤᠴᠠᠭᠠᠭᠰᠠᠨ ᠳᠤ᠂ ᠲᠡᠳᠡ ᠶᠦᠳᠠ ᠳᠤ ᠬᠢᠯᠢᠩᠨᠡᠵᠦ ᠶᠡᠬᠡᠳᠡ ᠠᠭᠤᠷ ᠲᠠᠢ ᠪᠠᠷ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠵᠠᠭᠠᠪᠠ᠃
11 ᠠᠮᠠᠽᠢᠶᠠ ᠵᠣᠷᠢᠭ ᠭᠠᠷᠭᠠᠵᠤ᠂ ᠠᠷᠠᠳ ᠲᠦᠮᠡᠨ ᠢᠶᠡᠨ ᠳᠠᠭᠠᠭᠤᠯᠤᠨ ᠳᠠᠪᠤᠰᠤᠲᠤ ᠬᠥᠨᠳᠡᠢ ᠳᠦ ᠣᠴᠢᠵᠤ᠂ ᠰᠧᠷ ᠬᠥᠮᠦᠨ ᠡᠴᠡ ᠲᠦᠮᠡ ᠶᠢ ᠰᠥᠨᠥᠭᠡᠪᠡ᠃ 12 ᠶᠦᠳᠠᠴᠤᠳ ᠪᠠᠰᠠ ᠲᠦᠮᠡᠨ ᠬᠥᠮᠦᠨ ᠢ ᠠᠮᠢᠳᠤ ᠪᠠᠷ ᠨᠢ ᠪᠠᠷᠢᠵᠤ᠂ ᠲᠡᠳᠡᠨ ᠢ ᠬᠠᠳᠠᠨ ᠴᠣᠬᠢᠶᠠᠨ ᠤ ᠣᠷᠣᠢ ᠳᠡᠭᠡᠷᠡ ᠠᠪᠠᠴᠢᠭᠠᠳ ᠲᠡᠨᠳᠡ ᠡᠴᠡ ᠳᠣᠭᠣᠭᠰᠢ ᠬᠠᠶᠠᠭᠰᠠᠨ ᠳᠤ᠂ ᠲᠡᠳᠡ ᠪᠦᠭᠦᠳᠡ ᠪᠢᠴᠠᠷᠠᠪᠠ᠃ 13 ᠲᠡᠷᠡ ᠬᠣᠭᠣᠷᠣᠨᠳᠣ ᠠᠮᠠᠽᠢᠶᠠ ᠶᠢᠨ ᠥᠪᠡᠷ ᠲᠡᠢ ᠨᠢ ᠬᠠᠮᠲᠤ ᠳᠠᠢᠨ ᠳᠤ ᠶᠠᠪᠤᠬᠤ ᠶᠢ ᠦᠯᠦ ᠵᠥᠪᠰᠢᠶᠡᠷᠡᠨ ᠪᠤᠴᠠᠭᠠᠨ ᠶᠠᠪᠤᠭᠤᠯᠤᠭᠰᠠᠨ ᠴᠡᠷᠢᠭ ᠤᠳ ᠰᠠᠮᠠᠷᠢᠶᠠ ᠠᠴᠠ ᠪᠧᠲ ᠾᠣᠷᠣᠨ ᠬᠦᠷᠲᠡᠯᠡᠬᠢ ᠶᠦᠳᠠ ᠶᠢᠨ ᠲᠣᠰᠬᠣᠨ ᠨᠤᠭᠤᠳ ᠢ ᠳᠡᠭᠡᠷᠡᠮᠳᠡᠵᠦ᠂ ᠭᠤᠷᠪᠠᠨ ᠮᠢᠩ᠋ᠭᠠᠨ ᠬᠥᠮᠦᠨ ᠢ ᠠᠯᠠᠵᠤ᠂ ᠮᠠᠰᠢ ᠶᠡᠬᠡ ᠡᠳ᠋ ᠶᠠᠭᠤᠮᠠᠰ ᠠᠪᠠᠴᠢᠪᠠ᠃
14 ᠠᠮᠠᠽᠢᠶᠠ ᠡᠳᠣᠮᠴᠤᠳ ᠢ ᠬᠢᠳᠤᠭᠠᠳ ᠪᠤᠴᠠᠵᠤ ᠢᠷᠡᠬᠦ ᠳᠡᠭᠡᠨ ᠰᠧᠷᠴᠦᠳ ᠦᠨ ᠪᠤᠷᠬᠠᠳ ᠢ ᠠᠪᠴᠢᠷᠠᠵᠤ᠂ ᠲᠡᠳᠡᠭᠡᠷ ᠢ ᠥᠪᠡᠷ ᠦᠨ ᠢᠶᠠᠨ ᠪᠤᠷᠬᠠᠳ ᠪᠣᠯᠭᠠᠨ ᠡᠮᠦᠨᠡ ᠨᠢ ᠮᠡᠬᠦᠢᠨ ᠰᠥᠭᠥᠳᠴᠦ᠂ ᠲᠡᠳᠡᠨ ᠳᠦ ᠤᠲᠤᠯᠭᠠ ᠤᠭᠤᠭᠢᠭᠤᠯᠪᠠ᠃ 15 ᠶᠣᠬᠣᠸᠠ ᠶᠢᠨ ᠠᠭᠤᠷ ᠬᠢᠯᠢᠩ ᠠᠮᠠᠽᠢᠶᠠ ᠶᠢᠨ ᠳᠡᠭᠡᠷᠡ ᠰᠢᠲᠠᠵᠤ᠂ ᠲᠡᠭᠦᠨ ᠳᠦ ᠡᠰᠢ ᠦᠵᠡᠭᠦᠯᠦᠭᠴᠢ ᠢᠯᠡᠭᠡᠨ᠄ 《ᠲᠡᠳᠡᠭᠡᠷ ᠪᠤᠷᠬᠠᠨ ᠥᠪᠡᠷ ᠦᠨ ᠢᠶᠠᠨ ᠠᠷᠠᠳ ᠲᠦᠮᠡᠨ ᠢ ᠬᠦᠷᠲᠡᠯᠡ ᠴᠢᠨᠦ ᠭᠠᠷ ᠠᠴᠠ ᠠᠪᠤᠷᠠᠵᠤ ᠴᠢᠳᠠᠭᠠ ᠦᠭᠡᠢ ᠪᠠᠢᠬᠤ ᠳᠤ᠂ ᠴᠢ ᠶᠠᠭᠤᠨ ᠳᠤ ᠲᠡᠷᠡ ᠠᠷᠠᠳ ᠲᠦᠮᠡᠨ ᠦ ᠪᠤᠷᠬᠠᠳ ᠢ ᠬᠠᠢᠪᠠ︖》 ᠭᠡᠵᠦ ᠬᠡᠯᠡᠭᠦᠯᠵᠡᠢ᠃ 16 ᠲᠡᠷᠡ ᠶᠠᠷᠢᠵᠤ ᠪᠠᠢᠲᠠᠯᠠ ᠬᠠᠭᠠᠨ᠄ 《ᠪᠢᠳᠡ ᠴᠢᠮᠠ ᠶᠢ ᠬᠠᠭᠠᠨ ᠤ ᠵᠥᠪᠯᠡᠭᠴᠢ ᠪᠠᠷ ᠲᠣᠮᠢᠯᠠᠭᠰᠠᠨ ᠪᠢᠯᠡ ᠤᠤ︖ ᠪᠣᠯᠢ︕ ᠶᠠᠭᠠᠬᠢᠭᠠᠳ ᠴᠢ ᠠᠯᠠᠭᠤᠯᠬᠤ ᠭᠡᠳ ᠪᠠᠢᠨᠠ︖》 ᠭᠡᠪᠡ᠃ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠠᠷᠢᠬᠤ ᠪᠠᠨ ᠵᠣᠭᠰᠣᠵᠤ᠄ 《ᠲᠠ ᠲᠡᠢᠮᠦ ᠵᠦᠢᠯ ᠬᠢᠵᠦ᠂ ᠵᠥᠪᠯᠡᠯᠭᠡ ᠶᠢ ᠮᠢᠨᠢ ᠰᠣᠨᠣᠰᠣᠭᠠ ᠦᠭᠡᠢ ᠲᠤᠯᠠ ᠣᠳᠣ ᠪᠤᠷᠬᠠᠨ ᠲᠠᠨ ᠢ ᠤᠰᠠᠳᠬᠠᠬᠤ ᠪᠠᠷ ᠲᠥᠯᠥᠪᠯᠡᠭᠰᠡᠨ ᠢ ᠪᠢ ᠮᠡᠳᠡᠯᠡ》 ᠭᠡᠪᠡ᠃
17 ᠶᠦᠳᠠ ᠶᠢᠨ ᠬᠠᠭᠠᠨ ᠠᠮᠠᠽᠢᠶᠠ ᠵᠥᠪᠯᠡᠯᠭᠡ ᠠᠪᠤᠭᠰᠠᠨ ᠤ ᠳᠠᠷᠠᠭᠠ᠂ ᠶᠧᠾᠦ᠋ ᠶᠢᠨ ᠠᠴᠢ᠂ ᠶᠧᠬᠣᠶᠠᠬᠠᠽ ᠤᠨ ᠬᠦᠦ᠂ ᠢᠰᠷᠧᠯ ᠤᠨ ᠬᠠᠭᠠᠨ ᠶᠧᠬᠣᠶᠠᠱ ᠲᠤ ᠡᠯᠴᠢ ᠢᠯᠡᠭᠡᠨ᠄ 《ᠢᠷᠡ᠂ ᠪᠢᠳᠡ ᠨᠢᠭᠤᠷ ᠲᠤᠯᠤᠨ ᠠᠭᠤᠯᠵᠠᠶᠠ》 ᠭᠡᠪᠡ᠃ 18 ᠢᠰᠷᠧᠯ ᠤᠨ ᠬᠠᠭᠠᠨ ᠶᠧᠬᠣᠶᠠᠱ ᠶᠦᠳᠠ ᠶᠢᠨ ᠬᠠᠭᠠᠨ ᠠᠮᠠᠽᠢᠶᠠ ᠳᠤ ᠬᠥᠮᠦᠨ ᠢᠯᠡᠭᠡᠨ᠄ 《ᠯᠧᠪᠠᠨᠣᠨ ᠤ ᠥᠷᠭᠡᠰᠦᠲᠦ ᠪᠤᠲᠠ ᠯᠧᠪᠠᠨᠣᠨ ᠤ ᠬᠤᠱᠢ ᠮᠣᠳᠣᠨ ᠳᠤ ᠡᠯᠴᠢ ᠢᠯᠡᠭᠡᠨ᠄ 〈ᠥᠬᠢᠨ ᠢᠶᠠᠨ ᠮᠢᠨᠦ ᠬᠦᠦ ᠳᠦ ᠡᠬᠡᠨᠡᠷ ᠪᠣᠯᠭᠠᠨ ᠥᠭᠭᠥᠭᠡᠴᠢ〉 ᠭᠡᠬᠦ ᠳᠦ᠂ ᠯᠧᠪᠠᠨᠣᠨ ᠤ ᠵᠡᠷᠯᠢᠭ ᠠᠷᠢᠶᠠᠲᠠᠨ ᠲᠡᠷᠡᠭᠦᠷ ᠶᠠᠪᠤᠵᠤ᠂ ᠥᠷᠭᠡᠰᠦᠲᠦ ᠪᠤᠲᠠ ᠶᠢ ᠭᠢᠰᠬᠢᠯᠡᠭᠰᠡᠨ ᠪᠢᠯᠡ᠃ 19 ᠴᠢ ᠡᠳᠣᠮ ᠢ ᠪᠤᠲᠠ ᠴᠣᠬᠢᠭᠰᠠᠨ ᠭᠡᠳ ᠪᠠᠷᠳᠠᠮ ᠵᠠᠩ ᠲᠠᠢ᠂ ᠰᠦᠷ ᠪᠠᠳᠠᠷᠠᠭᠤᠯᠬᠤ ᠳᠤᠷᠠ ᠲᠠᠢ ᠪᠣᠯᠵᠠᠢ᠂ ᠬᠠᠷᠢᠨ ᠭᠡᠷ ᠲᠡᠭᠡᠨ ᠯᠠ ᠰᠠᠭᠤᠵᠤ ᠪᠠᠢᠭᠠᠷᠠᠢ᠂ ᠴᠢ ᠶᠠᠭᠤᠨ ᠳᠤ ᠤᠷᠰᠢᠭ ᠲᠠᠲᠠᠵᠤ᠂ ᠶᠦᠳᠠ ᠶᠢ ᠥᠪᠡᠷ ᠦᠨ ᠢᠶᠠᠨ ᠬᠠᠮᠲᠤ ᠰᠦᠢᠷᠡᠯ ᠳᠦ ᠣᠷᠣᠭᠤᠯᠬᠤ ᠭᠡᠳ ᠪᠠᠢᠨᠠ ᠪᠤᠢ︖》 ᠭᠡᠪᠡ᠃
20 ᠭᠡᠪᠡᠴᠦ ᠠᠮᠠᠽᠢᠶᠠ ᠰᠣᠨᠣᠰᠣᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠡᠢᠮᠦ ᠪᠣᠯᠣᠭᠰᠠᠨ ᠨᠢ ᠪᠤᠷᠬᠠᠨ ᠤ ᠰᠠᠨᠠᠭᠠ ᠪᠢᠯᠡ᠃ ᠲᠡᠳᠡ ᠡᠳᠣᠮ ᠤᠨ ᠪᠤᠷᠬᠠᠳ ᠢ ᠬᠠᠢᠭᠰᠠᠨ ᠲᠤᠯᠠ ᠪᠤᠷᠬᠠᠨ ᠲᠡᠳᠡᠨ ᠢ ᠶᠧᠬᠣᠶᠠᠱ ᠤᠨ ᠭᠠᠷ ᠲᠤ ᠲᠤᠰᠢᠶᠠᠬᠤ ᠭᠡᠰᠡᠨ ᠶᠤᠮ᠃ 21 ᠢᠩᠭᠢᠭᠡᠳ ᠶᠦᠳᠠ ᠶᠢᠨ ᠬᠠᠭᠠᠨ ᠠᠮᠠᠽᠢᠶᠠ ᠲᠡᠷᠡ ᠬᠣᠶᠠᠷ ᠶᠦᠳᠠ ᠳᠤ ᠬᠠᠷᠢᠶᠠᠯᠠᠭᠳᠠᠳᠠᠭ ᠪᠧᠲ ᠱᠧᠮᠧᠱ ᠲᠤ ᠨᠢᠭᠤᠷ ᠲᠤᠯᠤᠨ ᠠᠭᠤᠯᠵᠠᠪᠠ᠃ 22 ᠶᠦᠳᠠ ᠢᠰᠷᠧᠯ ᠳᠤ ᠢᠯᠠᠭᠳᠠᠨ᠂ ᠬᠥᠮᠦᠨ ᠪᠣᠯᠭᠠᠨ ᠨᠢ ᠭᠡᠷ ᠭᠡᠷ ᠤᠷᠤᠭᠤ ᠪᠠᠨ ᠵᠢᠭᠤᠲᠠᠵᠠᠢ᠃ 23 ᠢᠰᠷᠧᠯ ᠤᠨ ᠬᠠᠭᠠᠨ ᠶᠧᠬᠣᠶᠠᠱ ᠪᠧᠲ ᠱᠧᠮᠧᠱ ᠲᠤ ᠠᠬᠠᠽᠢᠶᠠ ᠶᠢᠨ ᠠᠴᠢ᠂ ᠶᠣᠶᠠᠱ ᠤᠨ ᠬᠦᠦ᠂ ᠶᠦᠳᠠ ᠶᠢᠨ ᠬᠠᠭᠠᠨ ᠠᠮᠠᠽᠢᠶᠠ ᠶᠢ ᠣᠯᠵᠠᠯᠠᠨ ᠠᠪᠤᠭᠰᠠᠨ ᠤ ᠳᠠᠷᠠᠭᠠ᠂ ᠶᠧᠷᠦ᠋ᠰᠠᠯᠧᠮ ᠳᠤ ᠠᠪᠠᠴᠢᠵᠤ ᠶᠧᠷᠦ᠋ᠰᠠᠯᠧᠮ ᠤᠨ ᠬᠡᠷᠡᠮ ᠢ ᠡᠹᠷᠠᠢᠮ ᠤᠨ ᠬᠠᠭᠠᠯᠭᠠᠨ ᠠᠴᠠ ᠪᠤᠯᠤᠩ ᠤᠨ ᠬᠠᠭᠠᠯᠭᠠ ᠬᠦᠷᠲᠡᠯᠡ ᠳᠥᠷᠪᠡᠨ ᠵᠠᠭᠤᠨ ᠲᠣᠬᠣᠢ ᠨᠤᠷᠠᠭᠠᠪᠠ᠃ 24 ᠲᠡᠷᠡ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠳᠠᠬᠢ ᠣᠪᠧᠳ᠋ ᠡᠳᠣᠮ ᠤᠨ ᠬᠠᠮᠢᠶᠠᠷᠴᠤ ᠪᠠᠢᠭᠰᠠᠨ ᠪᠦᠬᠦ ᠠᠯᠲᠠ᠂ ᠮᠥᠩᠭᠥ ᠪᠣᠯᠣᠨ ᠪᠦᠬᠦ ᠬᠡᠷᠡᠭᠰᠡᠯ᠂ ᠮᠥᠨ ᠬᠠᠭᠠᠨ ᠤ ᠣᠷᠳᠣᠨ ᠤ ᠡᠷᠳᠡᠨᠢᠰ ᠢ ᠲᠣᠨᠣᠵᠤ᠂ ᠬᠥᠮᠦᠰ ᠢ ᠪᠠᠷᠢᠴᠠᠭᠠᠯᠠᠨ ᠠᠪᠤᠭᠠᠳ ᠰᠠᠮᠠᠷᠢᠶᠠ ᠤᠷᠤᠭᠤ ᠪᠤᠴᠠᠵᠠᠢ᠃
25 ᠢᠰᠷᠧᠯ ᠤᠨ ᠬᠠᠭᠠᠨ ᠶᠧᠬᠣᠶᠠᠬᠠᠽ ᠤᠨ ᠬᠦᠦ ᠶᠧᠬᠣᠶᠠᠱ ᠥᠭᠡᠳᠡ ᠪᠣᠯᠣᠭᠰᠠᠨ ᠤ ᠳᠠᠷᠠᠭᠠ᠂ ᠶᠦᠳᠠ ᠶᠢᠨ ᠬᠠᠭᠠᠨ ᠶᠣᠶᠠᠱ ᠤᠨ ᠬᠦᠦ ᠠᠮᠠᠽᠢᠶᠠ ᠠᠷᠪᠠᠨ ᠲᠠᠪᠤᠨ ᠵᠢᠯ ᠢᠯᠡᠭᠦᠦ ᠠᠮᠢᠳᠤᠷᠠᠪᠠ᠃ 26 ᠠᠮᠠᠽᠢᠶᠠ ᠶᠢᠨ ᠪᠤᠰᠤᠳ ᠶᠠᠪᠤᠳᠠᠯ ᠡᠬᠢᠨ ᠡᠴᠡ ᠪᠡᠨ ᠳᠠᠭᠤᠰᠲᠠᠯᠠ ᠶᠦᠳᠠ ᠪᠣᠯᠣᠨ ᠢᠰᠷᠧᠯ ᠤᠨ ᠬᠠᠭᠠᠳ ᠤᠨ ᠨᠠᠮᠲᠠᠷ ᠲᠤ ᠪᠢᠴᠢᠭᠳᠡᠭᠰᠡᠨ ᠪᠢᠰᠢ ᠤᠤ︖ 27 ᠠᠮᠠᠽᠢᠶᠠ ᠶᠣᠬᠣᠸᠠ ᠠᠴᠠ ᠭᠠᠵᠢᠭᠰᠠᠨ ᠴᠠᠭ ᠠᠴᠠ ᠡᠬᠢᠯᠡᠨ ᠶᠧᠷᠦ᠋ᠰᠠᠯᠧᠮ ᠳᠤ ᠬᠡᠰᠡᠭ ᠬᠥᠮᠦᠰ ᠲᠡᠭᠦᠨ ᠦ ᠡᠰᠡᠷᠭᠦ ᠬᠤᠤᠪᠢᠯᠳᠤᠭᠰᠠᠨ ᠳᠤ᠂ ᠲᠡᠷᠡ ᠯᠠᠺᠢᠱ ᠤᠷᠤᠭᠤ ᠵᠢᠭᠤᠲᠠᠪᠠ᠃ ᠭᠡᠪᠡᠴᠦ ᠲᠡᠳᠡ ᠠᠷᠤ ᠠᠴᠠ ᠨᠢ ᠬᠥᠮᠦᠨ ᠢᠯᠡᠭᠡᠵᠦ ᠲᠡᠨᠳᠡ ᠲᠡᠭᠦᠨ ᠢ ᠬᠣᠷᠣᠭᠠᠵᠠᠢ᠃ 28 ᠲᠡᠳᠡ ᠲᠡᠭᠦᠨ ᠦ ᠱᠠᠷᠢᠯ ᠢ ᠮᠣᠷᠢ ᠪᠠᠷ ᠠᠪᠴᠢᠷᠠᠵᠤ᠂ ᠡᠴᠢᠭᠡ ᠡᠪᠦᠭᠡᠳ ᠦᠨ ᠬᠢᠨᠢ ᠳᠡᠷᠭᠡᠳᠡ ᠶᠦᠳᠠ ᠶᠢᠨ ᠬᠣᠲᠠ ᠳᠤ ᠣᠷᠣᠰᠢᠭᠤᠯᠵᠠᠢ᠃