ᠱᠠᠰᠲᠢᠷ ᠤᠨ ᠳᠡᠳ᠋ ᠳᠣᠯᠣᠭᠠ
ᠥᠷᠭᠥᠭᠡ ᠶᠢ ᠵᠣᠷᠢᠭᠤᠯᠪᠠ
1 ᠰᠣᠯᠣᠮᠣᠨ ᠳᠠᠭᠠᠳᠬᠠᠵᠤ ᠳᠠᠭᠤᠰᠬᠤ ᠳᠤ᠂ ᠲᠩᠷᠢ ᠡᠴᠡ ᠭᠠᠯ ᠪᠠᠭᠤᠵᠤ᠂ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠣᠯᠣᠨ ᠪᠤᠰᠤᠳ ᠲᠠᠬᠢᠯ ᠤᠳ ᠢ ᠰᠢᠲᠠᠭᠠᠪᠠ᠃ ᠶᠣᠬᠣᠸᠠ ᠶᠢᠨ ᠰᠦᠷ ᠵᠢᠪᠬᠤᠯᠠᠩ ᠥᠷᠭᠥᠭᠡ ᠶᠢ ᠳᠦᠭᠦᠷᠭᠡᠵᠡᠢ᠃ 2 ᠶᠣᠬᠣᠸᠠ ᠶᠢᠨ ᠰᠦᠷ ᠵᠢᠪᠬᠤᠯᠠᠩ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠶᠢ ᠳᠦᠭᠦᠷᠭᠡᠭᠰᠡᠨ ᠡᠴᠡ ᠪᠣᠯᠵᠤ᠂ ᠲᠠᠬᠢᠯᠴᠢᠳ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠤᠷᠤᠭᠤ ᠣᠷᠣᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ 3 ᠭᠠᠯ ᠪᠠᠭᠤᠵᠤ᠂ ᠶᠣᠬᠣᠸᠠ ᠶᠢᠨ ᠰᠦᠷ ᠵᠢᠪᠬᠤᠯᠠᠩ ᠥᠷᠭᠥᠭᠡᠨ ᠦ ᠳᠡᠭᠡᠷᠡ ᠲᠣᠭᠲᠠᠬᠤ ᠶᠢ ᠦᠵᠡᠭᠡᠳ ᠢᠰᠷᠧᠯᠴᠦᠳ ᠴᠢᠯᠠᠭᠤ ᠳᠡᠪᠢᠰᠦᠭᠰᠡᠨ ᠭᠠᠵᠠᠷ ᠳᠡᠭᠡᠷᠡ ᠨᠢᠭᠤᠷ ᠢᠶᠠᠨ ᠬᠦᠷᠭᠡᠨ ᠶᠣᠬᠣᠸᠠ ᠳᠤ ᠮᠥᠷᠭᠥᠨ ᠲᠠᠯᠠᠷᠬᠠᠵᠤ᠄ 《ᠲᠡᠷᠡ ᠰᠠᠢᠨ᠂ ᠦᠨᠡᠨ ᠬᠠᠢᠷᠠ ᠨᠢ ᠡᠭᠦᠷᠢᠳᠡ ᠶᠢᠨ ᠬᠢ》 ᠭᠡᠵᠡᠭᠡᠪᠡ᠃
4 ᠬᠠᠭᠠᠨ ᠪᠣᠯᠣᠨ ᠲᠡᠭᠦᠨ ᠲᠡᠢ ᠬᠠᠮᠲᠤ ᠪᠠᠢᠭᠠ ᠬᠠᠮᠤᠭ ᠠᠷᠠᠳ ᠲᠦᠮᠡᠨ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠲᠠᠬᠢᠯ ᠡᠷᠭᠦᠪᠡ᠃ 5 ᠰᠣᠯᠣᠮᠣᠨ ᠬᠠᠭᠠᠨ ᠶᠣᠬᠣᠸᠠ ᠳᠤ ᠵᠣᠷᠢᠭᠤᠯᠤᠨ ᠬᠣᠶᠠᠷ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠᠨ ᠦᠬᠡᠷ᠂ ᠠᠷᠪᠠᠨ ᠬᠣᠶᠠᠷ ᠲᠦᠮᠡᠨ ᠬᠣᠨᠢ ᠡᠷᠭᠦᠵᠡᠢ᠃ ᠲᠡᠢᠨ ᠬᠦ ᠬᠠᠭᠠᠨ ᠪᠦᠬᠦ ᠠᠷᠠᠳ ᠲᠦᠮᠡᠨ ᠲᠡᠢ ᠬᠠᠮᠲᠤ ᠪᠤᠷᠬᠠᠨ ᠤ ᠥᠷᠭᠥᠭᠡᠨ ᠦ ᠵᠣᠷᠢᠭᠤᠯᠤᠯᠲᠠ ᠶᠢᠨ ᠶᠣᠰᠣᠯᠠᠯ ᠢ ᠬᠢᠪᠡ᠃ 6 ᠲᠠᠬᠢᠯᠴᠢᠳ ᠪᠠᠢᠷᠢᠨ ᠳᠠᠭᠠᠨ ᠵᠣᠭᠰᠣᠵᠤ᠂ ᠯᠧᠸᠢᠴᠦᠳ ᠴᠤ ᠶᠣᠬᠣᠸᠠ ᠳᠤ ᠵᠣᠷᠢᠭᠤᠯᠤᠭᠰᠠᠨ ᠬᠥᠭᠵᠢᠮ ᠢ ᠪᠠᠷᠢᠨ ᠵᠣᠭᠰᠣᠵᠤ ᠪᠠᠢᠯᠠ᠃ ᠳ᠋ᠠᠸᠢᠳ᠋ ᠬᠠᠭᠠᠨ ᠲᠡᠳᠡᠨ ᠲᠡᠢ ᠬᠠᠮᠲᠤ ᠮᠠᠭᠲᠠᠭᠠᠯ ᠡᠷᠭᠦᠵᠦ 《ᠦᠨᠡᠨ ᠬᠠᠢᠷᠠ ᠨᠢ ᠡᠭᠦᠷᠢᠳᠡ ᠶᠢᠨ ᠬᠢ》 ᠬᠡᠮᠡᠨ ᠶᠣᠬᠣᠸᠠ ᠶᠢ ᠮᠠᠭᠲᠠᠬᠤ ᠶᠢᠨ ᠲᠥᠯᠥᠭᠡ ᠲᠡᠳᠡᠭᠡᠷ ᠬᠥᠭᠵᠢᠮ ᠢ ᠥᠪᠡᠷ ᠢᠶᠡᠨ ᠬᠢᠭᠰᠡᠨ ᠪᠢᠯᠡ᠃ ᠯᠧᠸᠢᠴᠦᠳ ᠦᠨ ᠬᠠᠷᠠᠯᠳᠤᠭᠠ ᠲᠠᠬᠢᠯᠴᠢᠳ ᠪᠦᠷᠢᠶᠡ ᠦᠯᠢᠶᠡᠵᠦ᠂ ᠪᠦᠬᠦ ᠢᠰᠷᠧᠯ ᠵᠣᠭᠰᠣᠵᠤ ᠪᠠᠢᠯᠠ᠃
7 ᠰᠣᠯᠣᠮᠣᠨ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠡᠮᠦᠨᠡ ᠬᠠᠰᠢᠶᠠᠨ ᠤ ᠲᠥᠪ ᠬᠡᠰᠡᠭ ᠢ ᠠᠷᠢᠭᠤᠰᠬᠠᠨ ᠲᠤᠰᠠᠭᠠᠷᠯᠠᠵᠤ᠂ ᠲᠡᠨᠳᠡ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ᠂ ᠢᠳᠡᠭᠡᠨ ᠲᠠᠬᠢᠯ ᠪᠠ ᠡᠪ ᠦᠨ ᠲᠠᠬᠢᠯ ᠤᠳ ᠤᠨ ᠥᠭᠡᠬᠦ ᠶᠢ ᠡᠷᠭᠦᠯᠡ᠃ ᠤᠴᠢᠷ ᠨᠢ ᠬᠦᠷᠡᠯ ᠲᠠᠬᠢᠯ ᠤᠨ ᠰᠢᠷᠡᠭᠡ ᠨᠢ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ᠂ ᠢᠳᠡᠭᠡᠨ ᠲᠠᠬᠢᠯ᠂ ᠪᠠᠰᠠ ᠥᠭᠡᠬᠦ ᠶᠢ ᠪᠠᠭᠲᠠᠭᠠᠵᠤ ᠴᠢᠳᠠᠬᠤ ᠪᠠᠷ ᠦᠭᠡᠢ ᠪᠠᠢᠵᠠᠢ᠃
8 ᠲᠡᠷᠡ ᠦᠶᠡ ᠳᠦ ᠰᠣᠯᠣᠮᠣᠨ ᠨᠠᠢᠷ ᠬᠢᠭᠰᠡᠨ ᠳᠦ᠂ ᠯᠧᠪᠣᠬᠠᠮᠠᠲ ᠠᠴᠠ ᠶᠧᠵᠢᠫᠲ ᠤᠨ ᠭᠣᠷᠣᠬᠠ ᠬᠦᠷᠲᠡᠯᠡᠬᠢ ᠪᠦᠬᠦ ᠢᠰᠷᠧᠯ ᠦᠢ ᠣᠯᠠᠨ ᠢᠶᠠᠷ ᠢᠶᠠᠨ ᠴᠤᠭᠯᠠᠷᠠᠵᠤ ᠳᠣᠯᠣᠭᠠᠨ ᠬᠣᠨᠣᠭ ᠪᠡᠯᠭᠡᠯᠡᠪᠡ᠃ 9 ᠲᠡᠳᠡ ᠳᠣᠯᠣᠭᠠᠨ ᠬᠣᠨᠣᠭ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠵᠣᠷᠢᠭᠤᠯᠤᠯᠲᠠ ᠶᠢᠨ ᠶᠣᠰᠣᠯᠠᠯ ᠬᠢᠵᠦ᠂ ᠳᠠᠷᠠᠭᠠᠬᠢ ᠳᠣᠯᠣᠭᠠᠨ ᠬᠣᠨᠣᠭ ᠲᠤᠨᠢ ᠪᠠᠶᠠᠷ ᠨᠠᠭᠠᠳᠤᠮ ᠬᠢᠭᠰᠡᠨ ᠦ ᠳᠠᠷᠠᠭᠠ᠂ ᠨᠠᠢ᠌ᠮᠠᠳᠠᠬᠢ ᠡᠳᠦᠷ ᠨᠢ ᠴᠤᠭᠯᠠᠭᠠᠨ ᠬᠢᠪᠡ᠃ 10 ᠳᠣᠯᠣᠳᠤᠭᠠᠷ ᠰᠠᠷᠠ ᠶᠢᠨ ᠬᠣᠷᠢᠨ ᠭᠤᠷᠪᠠᠨ ᠳᠤ᠂ ᠬᠠᠭᠠᠨ ᠠᠷᠠᠳ ᠲᠦᠮᠡᠨ ᠢᠶᠡᠨ ᠭᠡᠷ ᠭᠡᠷ ᠤᠷᠤᠭᠤ ᠨᠢ ᠪᠤᠴᠠᠭᠠᠪᠠ᠃ ᠠᠷᠠᠳ ᠣᠯᠠᠨ ᠶᠣᠬᠣᠸᠠ ᠶᠢᠨ ᠳ᠋ᠠᠸᠢᠳ᠋᠂ ᠰᠣᠯᠣᠮᠣᠨ ᠪᠣᠯᠣᠨ ᠥᠪᠡᠷ ᠦᠨ ᠢᠶᠠᠨ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠤᠨ ᠲᠥᠯᠥᠭᠡ ᠬᠢᠭᠰᠡᠨ ᠰᠠᠢᠨ ᠰᠠᠢᠬᠠᠨ ᠳᠤ ᠪᠠᠶᠠᠷᠯᠠᠨ ᠰᠡᠳᠬᠢᠯ ᠬᠠᠩ᠋ᠭᠠᠯᠤᠭᠤᠨ ᠪᠠᠢᠯᠠ᠃
ᠶᠣᠬᠣᠸᠠ ᠰᠣᠯᠣᠮᠣᠨ ᠳᠤ ᠦᠵᠡᠭᠳᠡᠪᠡ
11 ᠡᠢᠨ ᠬᠦ ᠰᠣᠯᠣᠮᠣᠨ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠪᠣᠯᠣᠨ ᠬᠠᠭᠠᠨ ᠤ ᠣᠷᠳᠣᠨ ᠢ ᠪᠠᠷᠢᠵᠤ ᠳᠠᠭᠤᠰᠬᠠᠨ᠂ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠪᠣᠯᠣᠨ ᠥᠪᠡᠷ ᠦᠨ ᠢᠶᠠᠨ ᠣᠷᠳᠣᠨ ᠳᠤ ᠬᠢᠬᠦ ᠪᠡᠷ ᠰᠠᠨᠠᠭᠰᠠᠨ ᠪᠦᠬᠦᠨ ᠢᠶᠡᠨ ᠠᠮᠵᠢᠯᠲᠠ ᠲᠠᠢ ᠪᠠᠷ ᠪᠡᠶᠡᠯᠡᠭᠦᠯᠪᠡ᠃
12 ᠶᠣᠬᠣᠸᠠ ᠰᠥᠨᠢ ᠪᠠᠷ ᠰᠣᠯᠣᠮᠣᠨ ᠳᠤ ᠦᠵᠡᠭᠳᠡᠵᠦ᠂ ᠲᠡᠭᠦᠨ ᠳᠦ᠄ 《ᠪᠢ ᠴᠢᠨᠦ ᠳᠠᠭᠠᠳᠬᠠᠯ ᠢ ᠰᠣᠨᠣᠰᠴᠤ᠂ ᠡᠨᠡ ᠭᠠᠵᠠᠷ ᠢ ᠲᠠᠬᠢᠯ ᠤᠨ ᠥᠷᠭᠥᠭᠡ ᠪᠣᠯᠭᠠᠨ ᠥᠪᠡᠷ ᠲᠡᠭᠡᠨ ᠰᠣᠩ᠋ᠭᠣᠵᠤ ᠠᠪᠤᠯᠠ᠃ 13 ᠠᠩ᠋ᠬᠠᠷᠤᠭᠲᠤᠨ᠂ ᠪᠢ ᠪᠣᠷᠣᠭᠠᠨ ᠣᠷᠣᠭᠤᠯᠬᠤ ᠦᠭᠡᠢ ᠲᠩᠷᠢ ᠶᠢ ᠬᠠᠭᠠᠬᠤ᠂ ᠡᠰᠡᠪᠡᠯ ᠡᠨᠡ ᠭᠠᠵᠠᠷ ᠠᠴᠠ ᠭᠠᠷᠤᠭᠰᠠᠨ ᠢ ᠢᠳᠡᠭᠦᠯᠬᠦ ᠪᠡᠷ ᠴᠠᠷᠴᠠᠬᠠᠢ ᠨᠤᠭᠤᠳ ᠲᠤ ᠲᠤᠰᠢᠶᠠᠬᠤ᠂ ᠡᠰᠡᠪᠡᠯ ᠠᠷᠠᠳ ᠲᠦᠮᠡᠨ ᠦ ᠪᠠᠨ ᠳᠤᠮᠳᠠ ᠲᠠᠬᠤᠯ ᠢᠯᠡᠭᠡᠬᠦ ᠲᠣᠬᠢᠶᠠᠯᠳᠤᠯ ᠳᠤ᠂ 14 ᠬᠡᠷᠪᠡ ᠮᠢᠨᠦ ᠨᠡᠷᠡ ᠪᠡᠷ ᠳᠠᠭᠤᠳᠠᠭᠳᠠᠳᠠᠭ ᠮᠢᠨᠦ ᠠᠷᠠᠳ ᠲᠦᠮᠡᠨ ᠥᠪᠡᠷ ᠢ ᠪᠠᠨ ᠳᠠᠷᠤᠤ ᠪᠣᠯᠭᠠᠵᠤ ᠳᠠᠭᠠᠳᠬᠠᠨ ᠮᠢᠨᠦ ᠨᠢᠭᠤᠷ ᠢ ᠬᠠᠢᠵᠤ᠂ ᠪᠤᠵᠠᠷ ᠮᠠᠭᠤ ᠵᠠᠮ ᠠᠴᠠ ᠪᠠᠨ ᠡᠷᠭᠢᠪᠡᠯ ᠪᠢ ᠲᠩᠷᠢ ᠡᠴᠡ ᠰᠣᠨᠣᠰᠴᠤ᠂ ᠨᠢᠭᠦᠯ ᠢ ᠨᠢ ᠠᠭᠤᠴᠢᠯᠠᠨ ᠭᠠᠵᠠᠷ ᠨᠤᠲᠤᠭ ᠢ ᠨᠢ ᠡᠳᠡᠭᠡᠭᠡᠨᠡ᠃ 15 ᠡᠨᠡ ᠭᠠᠵᠠᠷ ᠲᠤ ᠡᠷᠭᠦᠬᠦ ᠳᠠᠭᠠᠳᠬᠠᠯ ᠳᠤ ᠮᠢᠨᠦ ᠮᠡᠯᠮᠡᠢ ᠲᠤᠩ᠋ᠭᠠᠯᠠᠭ᠂ ᠮᠢᠨᠦ ᠴᠢᠬᠢ ᠰᠣᠨᠣᠷ ᠪᠠᠢᠬᠤ ᠪᠣᠯᠣᠨᠠ᠃ 16 ᠡᠳᠦᠭᠡ ᠪᠢ ᠡᠨᠡ ᠥᠷᠭᠥᠭᠡ ᠶᠢ ᠰᠣᠩ᠋ᠭᠣᠵᠤ ᠠᠷᠢᠭᠤᠰᠬᠠᠭᠰᠠᠨ ᠲᠤᠯᠠ ᠮᠢᠨᠦ ᠨᠡᠷᠡ ᠡ᠊ᠨᠳᠡ ᠡᠭᠦᠷᠢᠳᠡ ᠪᠠᠢᠬᠤ ᠪᠣᠯᠣᠨᠠ᠂ ᠮᠢᠨᠦ ᠮᠡᠯᠮᠡᠢ᠂ ᠮᠢᠨᠦ ᠵᠢᠷᠦᠬᠡ ᠦᠷᠭᠦᠯᠵᠢ ᠡ᠊ᠨᠳᠡ ᠪᠠᠢᠬᠤ ᠪᠣᠯᠣᠨᠠ᠃ 17 ᠬᠡᠷᠪᠡ ᠴᠢ ᠡᠴᠢᠭᠡ ᠳ᠋ᠠᠸᠢᠳ᠋ ᠰᠢᠭ᠋ ᠢᠶᠠᠨ ᠮᠢᠨᠦ ᠡᠮᠦᠨᠡ ᠠᠯᠬᠤᠵᠤ᠂ ᠴᠢᠮᠠ ᠳᠤ ᠲᠤᠰᠢᠶᠠᠭᠰᠠᠨ ᠪᠦᠬᠦᠨ ᠢ ᠮᠢᠨᠢ ᠪᠡᠶᠡᠯᠡᠭᠦᠯᠦᠨ ᠬᠠᠤᠯᠢ ᠵᠢᠭᠠᠪᠤᠷᠢ ᠨᠤᠭᠤᠳ ᠢ ᠮᠢᠨᠢ ᠰᠠᠬᠢᠪᠠᠯ᠂ 18 ᠪᠢ ᠴᠢᠨᠦ ᠡᠴᠢᠭᠡ ᠳ᠋ᠠᠸᠢᠳ᠋ ᠲᠠᠢ ᠭᠡᠷᠡ ᠪᠠᠢᠭᠤᠯᠤᠨ 〈ᠢᠰᠷᠧᠯ ᠢ ᠵᠠᠬᠢᠷᠬᠤ ᠬᠥᠮᠦᠨ ᠴᠢᠮᠠ ᠠᠴᠠ ᠬᠣᠢᠰᠢ ᠲᠠᠰᠤᠷᠠᠬᠤ ᠦᠭᠡᠢ〉 ᠭᠡᠰᠡᠨ ᠦ ᠠᠳᠠᠯᠢ ᠪᠢ ᠬᠠᠭᠠᠨ ᠰᠢᠷᠡᠭᠡ ᠶᠢ ᠴᠢᠨᠢ ᠪᠠᠲᠤᠵᠢᠭᠤᠯᠤᠨᠠ᠃
19 ᠬᠠᠷᠢᠨ ᠴᠢ ᠡᠷᠭᠢᠵᠦ᠂ ᠴᠢᠨᠦ ᠡᠮᠦᠨᠡ ᠲᠠᠯᠪᠢᠭᠰᠠᠨ ᠮᠢᠨᠦ ᠲᠣᠭᠲᠠᠭᠠᠯ᠂ ᠵᠢᠭᠠᠪᠤᠷᠢ ᠨᠤᠭᠤᠳ ᠢ ᠣᠷᠬᠢᠨ ᠶᠠᠪᠤᠵᠤ᠂ ᠥᠭᠡᠷᠡ ᠪᠤᠷᠬᠠᠳ ᠲᠤ ᠦᠢᠯᠡᠴᠢᠯᠡᠵᠦ ᠲᠡᠳᠡᠨ ᠳᠦ ᠮᠥᠷᠭᠥᠪᠡᠯ᠂ 20 ᠪᠢ ᠥᠭᠭᠥᠭᠰᠡᠨ ᠭᠠᠵᠠᠷ ᠠᠴᠠ ᠪᠠᠨ ᠢᠰᠷᠧᠯ ᠢ ᠰᠤᠭᠤᠯᠬᠤ ᠪᠥᠭᠡᠳ ᠥᠪᠡᠷ ᠦᠨ ᠢᠶᠠᠨ ᠨᠡᠷᠡ ᠶᠢᠨ ᠲᠥᠯᠥᠭᠡ ᠠᠷᠢᠭᠤᠰᠬᠠᠨ ᠲᠤᠰᠠᠭᠠᠷᠯᠠᠭᠰᠠᠨ ᠥᠷᠭᠥᠭᠡ ᠶᠢ ᠡᠮᠦᠨᠡ ᠡᠴᠡ ᠪᠡᠨ ᠵᠠᠢᠯᠠᠭᠤᠯᠤᠨ᠂ ᠲᠡᠭᠦᠨ ᠢ ᠬᠠᠮᠤᠭ ᠦᠨᠳᠦᠰᠦᠲᠡᠨ ᠦ ᠳᠤᠮᠳᠠ ᠶᠣᠭᠲᠠ ᠵᠦᠢᠷᠯᠡᠯ᠂ ᠡᠯᠡᠭ ᠳᠣᠭᠣᠭᠢ ᠪᠣᠯᠭᠠᠨᠠ᠃ 21 ᠡᠨᠡ ᠥᠷᠭᠥᠭᠡ ᠴᠤ ᠣᠪᠣᠭᠠᠯᠠᠭᠰᠠᠨ ᠨᠤᠷᠠᠩ᠋ᠭᠢ ᠪᠣᠯᠬᠤ ᠤᠴᠢᠷ ᠠᠴᠠ ᠬᠠᠵᠠᠭᠤ ᠪᠠᠷ ᠨᠢ ᠥᠩᠭᠡᠷᠡᠬᠦ ᠬᠥᠮᠦᠨ ᠪᠣᠯᠭᠠᠨ ᠭᠠᠢᠬᠠᠵᠤ᠄ 〈ᠶᠣᠬᠣᠸᠠ ᠶᠠᠭᠤᠨ ᠤ ᠤᠴᠢᠷ ᠠᠴᠠ ᠡᠨᠡ ᠨᠤᠲᠤᠭ᠂ ᠡᠨᠡ ᠥᠷᠭᠥᠭᠡᠨ ᠳᠦ ᠡᠢᠨ ᠬᠦ ᠦᠢᠯᠡᠳᠦᠭᠰᠡᠨ ᠪᠣᠯ ᠳᠠ︖〉 ᠭᠡᠬᠦ ᠪᠣᠯᠣᠨᠠ᠃ 22 ᠬᠥᠮᠦᠰ ᠬᠠᠷᠢᠭᠤᠯᠤᠨ᠄ 〈ᠡᠴᠢᠭᠡ ᠡᠪᠦᠭᠡᠳ ᠢ ᠨᠢ ᠶᠧᠵᠢᠫᠲ ᠡᠴᠡ ᠠᠪᠴᠢᠷᠠᠭᠰᠠᠨ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠪᠤᠷᠬᠠᠨ ᠢ ᠣᠷᠬᠢᠵᠤ᠂ ᠥᠭᠡᠷᠡ ᠪᠤᠷᠬᠠᠳ ᠠᠴᠠ ᠵᠢᠭᠤᠷᠠᠨ᠂ ᠲᠡᠳᠡᠨ ᠳᠦ ᠮᠥᠷᠭᠥᠵᠦ ᠦᠢᠯᠡᠴᠢᠯᠡᠭᠰᠡᠨ ᠦ ᠤᠴᠢᠷ ᠶᠤᠮ᠃ ᠡᠢᠮᠦ ᠡᠴᠡ ᠲᠡᠷᠡ ᠡᠨᠡ ᠪᠦᠬᠦ ᠭᠠᠢ ᠵᠣᠪᠠᠯᠠᠩ ᠢ ᠲᠡᠳᠡᠨ ᠳᠡᠭᠡᠷᠡ ᠪᠠᠭᠤᠯᠭᠠᠭᠰᠠᠨ ᠶᠤᠮ〉 ᠭᠡᠬᠦ ᠪᠣᠯᠣᠨᠠ》 ᠭᠡᠯᠡ᠃