ᠭᠡᠲᠦᠯᠦᠯ ᠬᠣᠶᠠᠷ
ᠮᠣᠰᠧ ᠲᠥᠷᠥᠪᠡ
1 ᠯᠧᠸᠢ ᠣᠪᠣᠭ ᠤᠨ ᠨᠢᠭᠡᠨ ᠬᠥᠮᠦᠨ ᠯᠧᠸᠢ ᠣᠪᠣᠭ ᠤᠨ ᠥᠬᠢᠨ ᠢ ᠡᠬᠡᠨᠡᠷ ᠪᠣᠯᠭᠠᠨ ᠠᠪᠤᠭᠰᠠᠨ ᠪᠠᠢᠨᠠ᠃ 2 ᠲᠡᠷᠡ ᠡᠮᠡᠭᠲᠡᠢ ᠵᠢᠷᠮᠦᠰᠦᠯᠡᠵᠦ ᠬᠦᠦ ᠲᠥᠷᠥᠭᠦᠯᠪᠡ᠃ ᠬᠦᠦ ᠪᠡᠨ ᠬᠠᠷᠠᠬᠤ ᠳᠤ᠂ ᠣᠨᠴᠠᠭᠠᠢ ᠰᠠᠢᠬᠠᠨ ᠪᠠᠢᠯᠠ᠃ ᠲᠡᠷᠡ ᠪᠡᠷ ᠲᠡᠭᠦᠨ ᠢ ᠭᠤᠷᠪᠠᠨ ᠰᠠᠷᠠ ᠨᠢᠭᠤᠵᠠᠢ᠃ 3 ᠭᠡᠪᠡᠴᠦ ᠲᠡᠭᠦᠨ ᠢ ᠴᠢᠨᠠᠭᠰᠢᠳᠠ ᠨᠢᠭᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠬᠤ ᠳᠠᠭᠠᠨ ᠵᠡᠭᠡᠰᠦᠨ ᠰᠠᠭᠰᠤ ᠠᠪᠴᠤ᠂ ᠳᠠᠪᠠᠷᠬᠠᠢ ᠪᠣᠯᠣᠨ ᠴᠠᠷᠳᠠᠰᠤ ᠪᠠᠷ ᠰᠢᠪᠠᠭᠠᠳ ᠳᠣᠲᠣᠷᠠ ᠨᠢ ᠬᠡᠦᠬᠡᠳ ᠢᠶᠡᠨ ᠬᠢᠵᠦ᠂ ᠨᠢᠯ ᠮᠥᠷᠡᠨ ᠦ ᠬᠥᠪᠡᠭᠡᠨ ᠦ ᠵᠡᠭᠡᠰᠦᠨ ᠳᠤᠮᠳᠠ ᠲᠠᠯᠪᠢᠪᠠ᠃ 4 ᠡᠭᠡᠴᠢ ᠨᠢ ᠲᠡᠷᠡ ᠬᠦᠦ ᠳᠦ ᠶᠠᠭᠤ ᠲᠣᠬᠢᠶᠠᠯᠳᠤᠬᠤ ᠶᠢ ᠮᠡᠳᠡᠬᠦ ᠭᠡᠵᠦ ᠵᠠᠢᠳᠠᠭᠤᠬᠠᠨ ᠵᠣᠭᠰᠣᠵᠤ ᠪᠠᠢᠯᠠ᠃
5 ᠲᠡᠷᠡ ᠦᠶᠡ ᠳᠦ ᠹᠠᠷᠠᠣ᠋ ᠶᠢᠨ ᠥᠬᠢᠨ ᠤᠰᠤᠨ ᠳᠤ ᠣᠷᠣᠬᠤ ᠪᠠᠷ ᠮᠥᠷᠡᠨ ᠤᠷᠤᠭᠤ ᠢᠷᠡᠵᠡᠢ᠃ ᠰᠢᠪᠡᠭᠴᠢᠳ ᠨᠢ ᠮᠥᠷᠡᠨ ᠦ ᠬᠥᠪᠡᠭᠡ ᠪᠡᠷ ᠶᠠᠪᠤᠵᠠᠭᠠᠵᠤ ᠪᠠᠢᠯᠠ᠃ ᠲᠡᠷᠡ ᠡᠮᠡᠭᠲᠡᠢ ᠵᠡᠭᠡᠰᠦᠨ ᠳᠤᠮᠳᠠ ᠪᠠᠢᠭᠠ ᠰᠠᠭᠰᠤ ᠶᠢ ᠬᠠᠷᠠᠭᠠᠳ᠂ ᠰᠢᠪᠡᠭᠴᠢᠨ ᠢᠶᠠᠨ ᠢᠯᠡᠭᠡᠵᠦ ᠲᠡᠭᠦᠨ ᠢ ᠠᠪᠴᠢᠷᠠᠭᠤᠯᠪᠠ᠃ 6 ᠲᠡᠷᠡ ᠨᠡᠭᠡᠭᠡᠭᠡᠳ ᠬᠡᠦᠬᠡᠳ ᠢ ᠬᠠᠷᠠᠪᠠ᠂ ᠨᠢᠭᠡᠨ ᠨᠢᠯᠬᠠ ᠬᠦᠦ ᠤᠬᠢᠯᠠᠵᠤ ᠪᠠᠢᠯᠠ︕ ᠲᠡᠷᠡ ᠡᠮᠡᠭᠲᠡᠢ ᠲᠡᠭᠦᠨ ᠢ ᠥᠷᠥ ᠡᠪᠡᠳᠦᠨ᠄ 《ᠡᠨᠡ ᠴᠢᠨᠢ ᠢᠪᠷᠠᠢ ᠬᠥᠮᠦᠨ ᠦ ᠬᠡᠦᠬᠡᠳ ᠪᠠᠢᠨᠠ ᠳᠠ》 ᠭᠡᠪᠡ᠃ 7 ᠬᠦᠦ ᠶᠢᠨ ᠡᠭᠡᠴᠢ ᠢᠷᠡᠭᠡᠳ ᠹᠠᠷᠠᠣ᠋ ᠶᠢᠨ ᠥᠬᠢᠨ ᠳᠤ᠄ 《ᠪᠢ ᠢᠪᠷᠠᠢ ᠡᠮᠡᠭᠲᠡᠢᠴᠦᠳ ᠦᠨ ᠳᠤᠮᠳᠠ ᠠᠴᠠ ᠡᠨᠡ ᠬᠡᠦᠬᠡᠳ ᠢ ᠬᠥᠬᠥᠭᠦᠯᠬᠦ ᠬᠥᠮᠦᠨ ᠢ ᠲᠠᠨ ᠳᠤ ᠣᠯᠵᠤ ᠥᠭᠬᠦ ᠤᠤ︖》 ᠭᠡᠰᠡᠨ ᠳᠦ᠂ 8 ᠹᠠᠷᠠᠣ᠋ ᠶᠢᠨ ᠥᠬᠢᠨ᠄ 《ᠲᠡᠭᠡ》 ᠭᠡᠯᠡ᠃ ᠲᠡᠷᠡ ᠥᠬᠢᠨ ᠶᠠᠪᠤᠵᠤ᠂ ᠥᠨᠥᠬᠢ ᠬᠡᠦᠬᠡᠳ ᠦᠨ ᠡᠬᠡ ᠶᠢ ᠠᠪᠴᠢᠷᠠᠯᠠ᠃ 9 ᠹᠠᠷᠠᠣ᠋ ᠶᠢᠨ ᠥᠬᠢᠨ ᠲᠡᠭᠦᠨ ᠳᠦ᠄ 《ᠡᠨᠡ ᠬᠡᠦᠬᠡᠳ ᠢ ᠠᠪᠠᠴᠢᠵᠤ᠂ ᠮᠢᠨᠦ ᠣᠷᠣᠨ ᠳᠤ ᠬᠥᠬᠥᠭᠦᠯᠵᠦ ᠥᠭ᠂ ᠪᠢ ᠴᠢᠮᠠ ᠳᠤ ᠬᠥᠯᠥᠰᠥ ᠶᠢ ᠨᠢ ᠥᠭᠭᠥᠶᠡ》 ᠭᠡᠪᠡ᠃ ᠡᠢᠨ ᠬᠦ ᠲᠡᠷᠡ ᠡᠮᠡᠭᠲᠡᠢ ᠬᠡᠦᠬᠡᠳ ᠢ ᠠᠪᠠᠴᠢᠵᠤ ᠬᠥᠬᠥᠭᠦᠯᠦᠭᠰᠡᠨ ᠪᠠᠢᠨᠠ᠃ 10 ᠬᠡᠦᠬᠡᠳ ᠲᠣᠮᠣ ᠪᠣᠯᠣᠭᠰᠠᠨ ᠤ ᠳᠠᠷᠠᠭᠠ᠂ ᠲᠡᠷᠡ ᠡᠮᠡᠭᠲᠡᠢ ᠬᠦᠦ ᠶᠢ ᠳᠠᠭᠠᠭᠤᠯᠵᠤ ᠣᠴᠢᠬᠤ ᠳᠤᠨᠢ ᠹᠠᠷᠠᠣ᠋ ᠶᠢᠨ ᠥᠬᠢᠨ ᠲᠡᠭᠦᠨ ᠢ ᠬᠦᠦ ᠪᠡᠨ ᠪᠣᠯᠭᠠᠨ ᠠᠪᠴᠤ᠂ 《ᠪᠢ ᠲᠡᠭᠦᠨ ᠢ ᠤᠰᠤᠨ ᠠᠴᠠ ᠭᠠᠷᠭᠠᠵᠤ ᠠᠪᠤᠭᠰᠠᠨ》 ᠭᠡᠳ ᠮᠣᠰᠧ 2 ᠭᠡᠵᠦ ᠨᠡᠷᠡᠯᠡᠪᠡ᠃
ᠮᠣᠰᠧ ᠵᠢᠭᠤᠲᠠᠪᠠ
11 ᠮᠣᠰᠧ ᠨᠠᠰᠤᠨ ᠳᠤ ᠬᠦᠷᠦᠭᠰᠡᠨ ᠦ ᠳᠠᠷᠠᠭᠠ᠂ ᠨᠢᠭᠡᠨ ᠡᠳᠦᠷ ᠭᠠᠷᠴᠤ ᠥᠪᠡᠷ ᠦᠨ ᠢᠶᠠᠨ ᠠᠬᠠ ᠳᠡᠭᠦᠦ ᠨᠠᠷ ᠤᠷᠤᠭᠤ ᠣᠴᠢᠭᠠᠳ ᠲᠡᠳᠡᠨ ᠦ ᠬᠦᠨᠳᠦ ᠬᠥᠳᠡᠯᠮᠦᠷᠢ ᠶᠢ ᠬᠠᠷᠠᠵᠠᠢ᠃ ᠲᠡᠨᠳᠡ ᠨᠢᠭᠡᠨ ᠶᠧᠵᠢᠫᠲ ᠬᠥᠮᠦᠨ ᠥᠪᠡᠷ ᠦᠨ ᠬᠢᠨᠢ ᠠᠬᠠ ᠳᠡᠭᠦᠦ ᠪᠣᠯᠬᠤ ᠢᠪᠷᠠᠢ ᠬᠥᠮᠦᠨ ᠢ ᠵᠣᠳᠣᠵᠤ ᠪᠠᠢᠯᠠ᠃ 12 ᠮᠣᠰᠧ ᠡᠰᠢ ᠲᠡᠰᠢ ᠠᠵᠢᠵᠤ᠂ ᠬᠥᠮᠦᠨ ᠦᠭᠡᠢ ᠪᠠᠢᠬᠤ ᠶᠢ ᠬᠠᠷᠠᠭᠠᠳ ᠥᠨᠥᠬᠢ ᠶᠧᠵᠢᠫᠲ ᠬᠥᠮᠦᠨ ᠢ ᠠᠯᠠᠵᠤ᠂ ᠡᠯᠡᠰᠦᠨ ᠳᠦ ᠨᠢᠭᠤᠪᠠ᠃ 13 ᠳᠠᠷᠠᠭᠠ ᠡᠳᠦᠷ ᠨᠢ ᠳᠠᠬᠢᠨ ᠣᠴᠢᠬᠤ ᠳᠤ᠂ ᠬᠣᠶᠠᠷ ᠢᠪᠷᠠᠢ ᠬᠥᠮᠦᠨ ᠵᠣᠳᠣᠯᠳᠤᠵᠤ ᠪᠠᠢᠪᠠ︕ ᠲᠡᠷᠡ ᠪᠡᠷ ᠪᠤᠷᠤᠭᠤᠲᠠᠨ ᠳᠤ᠄ 《ᠴᠢ ᠶᠠᠭᠤᠨ ᠳᠤ ᠢᠪᠷᠠᠢ ᠨᠠᠢᠵᠠ ᠪᠠᠨ ᠵᠣᠳᠣᠵᠤ ᠪᠠᠢᠨᠠ ᠪᠤᠢ︖》 ᠭᠡᠰᠡᠨ ᠳᠦ᠂ 14 ᠨᠥᠭᠥᠭᠡ ᠬᠥᠮᠦᠨ᠄ 《ᠬᠡᠨ ᠴᠢᠮᠠᠶᠢ ᠪᠢᠳᠡᠨ ᠢ ᠵᠠᠬᠢᠷᠬᠤ᠂ ᠰᠢᠭᠦᠬᠦ ᠬᠥᠮᠦᠨ ᠪᠣᠯᠭᠠᠭᠰᠠᠨ ᠪᠤᠢ︖ ᠴᠢ ᠶᠧᠵᠢᠫᠲ ᠬᠥᠮᠦᠨ ᠢ ᠠᠯᠠᠭᠰᠠᠨ ᠰᠢᠭ᠋ ᠢᠶᠠᠨ ᠨᠠᠮᠠᠶᠢ ᠪᠠᠰᠠ ᠠᠯᠠᠬᠤ ᠨᠢ ᠤᠤ︖》 ᠭᠡᠰᠡᠨ ᠳᠦ᠂ ᠮᠣᠰᠧ ᠠᠶᠤᠵᠤ᠄ 《ᠬᠡᠷᠡᠭ ᠮᠠᠨᠢ ᠯᠡᠪᠡᠷᠡᠭᠰᠡᠨ ᠶᠤᠮ ᠪᠠᠢᠨᠠ︕》 ᠭᠡᠵᠦ ᠪᠣᠳᠣᠵᠠᠢ᠃ 15 ᠹᠠᠷᠠᠣ᠋ ᠡᠨᠡ ᠬᠡᠷᠡᠭ ᠢ ᠰᠣᠨᠣᠰᠣᠭᠠᠳ᠂ ᠮᠣᠰᠧ ᠶᠢ ᠠᠯᠠᠬᠤ ᠪᠠᠷ ᠬᠠᠢᠪᠠ᠃ ᠬᠠᠷᠢᠨ ᠮᠣᠰᠧ ᠹᠠᠷᠠᠣ᠋ ᠶᠢᠨ ᠨᠢᠳᠦᠨ ᠡᠴᠡ ᠵᠢᠭᠤᠲᠠᠵᠤ᠂ ᠮᠢᠳᠢᠶᠠᠨ ᠭᠠᠵᠠᠷ ᠲᠤ ᠠᠮᠢᠳᠤᠷᠠᠭᠰᠠᠨ ᠪᠠᠢᠨᠠ᠃ ᠨᠢᠭᠡᠨ ᠡᠳᠦᠷ ᠲᠡᠷᠡ ᠬᠤᠳᠳᠤᠭ ᠤᠨ ᠳᠡᠷᠭᠡᠳᠡ ᠰᠠᠭᠤᠵᠤ ᠪᠠᠢᠯᠠ᠃
16 ᠮᠢᠳᠢᠶᠠᠨ ᠤ ᠨᠢᠭᠡ ᠲᠠᠬᠢᠯᠴᠢ ᠳᠤ ᠳᠣᠯᠣᠭᠠᠨ ᠥᠬᠢᠨ ᠲᠠᠢ ᠪᠠᠢᠵᠠᠢ᠃ ᠲᠡᠳᠡ ᠢᠷᠡᠭᠡᠳ ᠤᠰᠤ ᠲᠠᠲᠠᠵᠤ᠂ ᠣᠩ᠋ᠭᠣᠴᠠ ᠨᠤᠭᠤᠳ ᠢ ᠳᠦᠭᠦᠷᠭᠡᠨ ᠡᠴᠢᠭᠡ ᠶᠢᠨ ᠢᠶᠠᠨ ᠬᠣᠨᠢᠨ ᠰᠦᠷᠦᠭ ᠢ ᠤᠰᠤᠯᠠᠬᠤ ᠭᠡᠵᠦ ᠪᠠᠢᠪᠠ᠃ 17 ᠬᠠᠷᠢᠨ ᠥᠭᠡᠷᠡ ᠬᠣᠨᠢᠴᠢᠳ ᠢᠷᠡᠭᠡᠳ ᠲᠡᠳᠡᠨ ᠢ ᠬᠥᠭᠡᠭᠡᠭᠰᠡᠨ ᠳᠦ᠂ ᠮᠣᠰᠧ ᠪᠣᠰᠴᠤ᠂ ᠥᠬᠢᠳ ᠢ ᠥᠮᠥᠭᠯᠡᠵᠦ ᠬᠣᠨᠢᠳ ᠢ ᠨᠢ ᠤᠰᠤᠯᠠᠵᠤ ᠥᠭᠴᠡᠢ᠃ 18 ᠲᠡᠳᠡ ᠡᠴᠢᠭᠡ ᠷᠧᠣᠶᠧᠯ ᠳᠡᠭᠡᠨ ᠢᠷᠡᠬᠦ ᠳᠦ᠂ ᠲᠡᠷᠡ᠄ 《ᠥᠨᠥᠳᠥᠷ ᠲᠠ ᠨᠠᠷ ᠶᠠᠭᠠᠬᠢᠭᠠᠳ ᠡᠢᠮᠦ ᠡᠷᠲᠡ ᠢᠷᠡᠪᠡ︖》 ᠭᠡᠯᠡ᠃ 19 ᠲᠡᠳᠡ᠄ 《ᠨᠢᠭᠡᠨ ᠶᠧᠵᠢᠫᠲ ᠬᠥᠮᠦᠨ ᠪᠢᠳᠡᠨ ᠢ ᠬᠣᠨᠢᠴᠢᠳ ᠤᠨ ᠭᠠᠷ ᠠᠴᠠ ᠠᠪᠤᠷᠠᠭᠰᠠᠨ᠃ ᠲᠡᠭᠦᠨ ᠢᠶᠡᠷ ᠴᠤ ᠪᠠᠷᠠᠬᠤ ᠦᠭᠡᠢ᠂ ᠲᠡᠷᠡ ᠪᠢᠳᠡᠨ ᠳᠦ ᠤᠰᠤ ᠲᠠᠲᠠᠨ ᠥᠭᠴᠦ᠂ ᠬᠣᠨᠢᠳ ᠢ ᠮᠠᠨᠢ ᠤᠰᠤᠯᠠᠭᠰᠠᠨ ᠰᠢᠦ》 ᠭᠡᠵᠡᠢ᠃ 20 ᠲᠡᠷᠡ ᠥᠬᠢᠳ ᠲᠡᠭᠡᠨ᠄ 《ᠲᠡᠷᠡ ᠬᠠᠮᠢᠭᠠ ᠪᠠᠢᠨᠠ︖ ᠲᠠ ᠨᠠᠷ ᠶᠠᠭᠠᠬᠢᠭᠠᠳ ᠲᠡᠷᠡ ᠬᠥᠮᠦᠨ ᠢ ᠣᠷᠬᠢᠭᠠᠳ ᠢᠷᠡᠴᠢᠬᠡᠭᠰᠡᠨ ᠪᠤᠢ︖ ᠲᠡᠭᠦᠨ ᠢ ᠤᠷᠢᠵᠤ ᠬᠣᠭᠣᠯᠠ ᠢᠳᠡᠭᠦᠯ》 ᠭᠡᠵᠦ ᠬᠡᠯᠡᠪᠡ᠃ 21 ᠮᠣᠰᠧ ᠲᠡᠷᠡ ᠬᠥᠮᠦᠨ ᠦ ᠳᠦ ᠰᠠᠭᠤᠬᠤ ᠳᠤᠷᠠᠲᠠᠢ ᠪᠠᠢᠭᠰᠠᠨ ᠪᠣᠯᠬᠣᠷ ᠷᠧᠣᠶᠧᠯ ᠮᠣᠰᠧ ᠳᠤ ᠥᠬᠢᠨ ᠽᠢᠫᠣᠷᠠ ᠪᠠᠨ ᠥᠭᠴᠡᠢ᠃ 22 ᠽᠢᠫᠣᠷᠠ ᠬᠦᠦ ᠲᠥᠷᠥᠭᠦᠯᠬᠦ ᠳᠦ᠂ ᠮᠣᠰᠧ 《ᠪᠢ ᠬᠥᠮᠦᠨ ᠦ ᠭᠠᠵᠠᠷ ᠲᠤ ᠴᠠᠭᠠᠴᠢᠨ ᠪᠣᠯᠵᠠᠢ》 ᠭᠡᠳ ᠬᠦᠦ ᠪᠡᠨ ᠭᠧᠷᠱᠣᠮ 3 ᠭᠡᠵᠦ ᠨᠡᠷᠡᠯᠡᠭᠰᠡᠨ ᠪᠠᠢᠨᠠ᠃
23 ᠤᠳᠠᠭᠠᠨ ᠬᠤᠭᠤᠴᠠᠭᠠ ᠥᠩᠭᠡᠷᠡᠵᠦ᠂ ᠶᠧᠵᠢᠫᠲ ᠤᠨ ᠬᠠᠭᠠᠨ ᠥᠭᠡᠳᠡ ᠪᠣᠯᠪᠠ᠃ ᠢᠰᠷᠧᠯᠴᠦᠳ ᠳᠠᠷᠤᠯᠠᠯ ᠤᠨ ᠳᠣᠣᠷᠠ ᠶᠣᠣᠯᠠᠵᠤ ᠬᠠᠰᠬᠢᠷᠬᠤ ᠳᠤ᠂ ᠳᠠᠷᠤᠯᠠᠯ ᠠᠴᠠ ᠪᠣᠯᠣᠭᠰᠠᠨ ᠲᠡᠳᠡᠨ ᠦ ᠬᠠᠰᠬᠢᠷᠤᠭᠠᠨ ᠪᠤᠷᠬᠠᠨ ᠳᠤ ᠬᠦᠷᠦᠭᠰᠡᠨ ᠪᠠᠢᠯᠠ᠃ 24 ᠪᠤᠷᠬᠠᠨ ᠲᠡᠳᠡᠨ ᠦ ᠭᠠᠰᠠᠯᠬᠤ ᠳᠠᠭᠤᠨ ᠢ ᠰᠣᠨᠣᠰᠣᠭᠠᠳ ᠠᠪᠷᠠᠬᠠᠮ᠂ ᠢᠰᠠᠺ᠂ ᠶᠠᠺᠣᠪ ᠲᠠᠢ ᠪᠠᠢᠭᠤᠯᠤᠭᠰᠠᠨ ᠭᠡᠷᠡ ᠪᠡᠨ ᠰᠠᠨᠠᠭᠠᠯᠵᠠᠪᠠ᠃ 25 ᠪᠤᠷᠬᠠᠨ ᠢᠰᠷᠧᠯᠴᠦᠳ ᠢ ᠬᠠᠷᠠᠪᠠ᠃ ᠪᠤᠷᠬᠠᠨ ᠲᠡᠳᠡᠨ ᠳᠦ ᠰᠠᠨᠠᠭᠠ ᠲᠠᠯᠪᠢᠪᠠ᠃